ដោយ ហ្សូលី

ប្រទេសឡាវៈ រដ្ឋាភិបាលឡាវអនុម័តឱ្យមានការបិទប៉ុស្តិ៍ ត្រួតពិនិត្យច្រកព្រំដែនកម្ពុជា និងវៀតណាម ដើម្បីទប់ស្កាត់ការឆ្លងរីករាលដាលនៃមេរោគកូវីដ១៩ បន្ទាប់ពីកម្ពុជានិងវៀតណាមបានប្រកាសពីករណីជាបន្តបន្ទាប់។

ការិយាល័យនៃរដ្ឋបាលខេត្ត Houaphanh បានចេញសេចក្តីជូនដំណឹងបន្ទាន់កាលពីសប្តាហ៍មុន ដោយបញ្ជាឱ្យមានការបិទប៉ុស្តិ៍ ត្រួតពិនិត្យព្រំដែនវៀតណាមចំនួន ១០ កន្លែងក្នុងចំណោម១៤របស់ភាគឥសាននៃខេត្តនេះ។

មូលហេតុដែលបណ្តាលឱ្យមានការបិទជាបណ្តោះអាសន្ននេះ ដោយសារប្រទេសឡាវកំពុងខ្វះខាតធនធាននិងសម្ភារៈពិនិត្យមើលពីស្ថានភាពសុខភាពអ្នកធ្វើដំណើរ ខណៈបច្ចុប្បន្ននេះប្រទេសឡាវទើបតែប្រកាសនៅថ្ងៃទី ១៧ មីនា ឆ្នាំ ២០២០នេះថា មានអ្នកឆ្លងវីរុសកូរ៉ូណាចំនួន ៧៩ ករណី។

នៅសល់តែ៤ច្រកទៀតប៉ុណ្ណោះ ដែលនៅបើកដំណើរការ ព្រោះថាវាជាច្រកធំលក្ខណៈអន្តរជាតិ ដែលមានម៉ាស៊ីនស្កេនតែមួយប៉ុណ្ណោះនៅតាមច្រកនិមួយៗនោះ។

អាជ្ញាធរ និងមន្ត្រីសុខាភិបាលប្រទេសឡាវបាន នឹងកំពុងរៀបចំបរិក្ខារនិងឧបករ​ណ៍ផ្សេងៗ ជាពិសេសគឺក្រុមការងារសុខាភិបាលប្រចាំការ ត្រួតពិនិត្យនៅច្រកព្រំដែនផ្សេងៗទៀត ដែលស្ថិតនៅភាគខាងត្បូងប្រទេសឡាវ គឺនៅព្រំប្រទល់វៀតណាមដូចគ្នា ក្នុងនោះក៏មានកម្ពុជាផងដែរ។

ប្រទេសឡាវបើកតែព្រំដែនថៃតែប៉ុណ្ណោះ ព្រោះប្រទេសថៃមានហេដ្ឋារចនាសម្ព័ន្ធសុខាភិបាលមានភាពប្រសើរជាងនៅប្រទេសរបស់ខ្លួន ទោះបីជាបច្ចុប្បន្នប្រទេសថៃកំពុងមានករណីជាង១៤០ក៏ដោយ៕

ដោយ ហ្សូលី

ប្រទេសថៃៈ ធនាគារពិភពលោកបានឱ្យដឹងថា អត្រាភាពក្រីក្រនៅប្រទេសថៃកើនឡើងជាលំដាប់ ខណៈពេលដែលកំណើនសេដ្ឋកិច្ចប្រទេសនេះ មានសភាពយ៉ាប់យឺន ដែលជាហេតុបណ្តាលឱ្យមានគម្លាតរវាងអ្នកមាន និងអ្នកក្រ ក្នុងប្រទេសមានសេដ្ឋកិច្ចខ្ពស់ជាងគេលំដាប់ទី២ នៅតំបន់អាស៊ីអាគ្នេយ៍។

កិច្ចប្រជុំស្តីពីភាពក្រីក្រ និងវិសមភាពប្រទេសថៃ កាលពីសប្តាហ៍មុនបានឱ្យដឹងថា អត្រាភាពក្រីក្រ ក្នុងប្រទេសថៃបានហក់ឡើងពី៧.២% ដល់៩.៨% កាលពីឆ្នាំ ២០១៨ ដោយបច្ចុប្បន្នប្រជាជនក្រីក្រ បានកើនឡើងប្រមាណជិត ២លាននាក់ទៀត។

ដើមចមដែលបណ្តាលឱ្យអត្រានេះឡើងខ្ពស់ ព្រោះតែកំណើនសេដ្ឋកិច្ចយឺតហើយប្រាក់ចំនូលរបស់ប្រជាជន ដែលប្រកបមុខរបរជាកសិករនៅជនបទ និងអ្នកជំនួញក្នុងទីក្រុងមានការធ្លាក់ចុះ។ មួយវិញទៀត វាកើតឡើងស្របពេលដែលវិបត្តិសេដ្ឋកិច្ចសកលលោកកំពុងជួបប្រទះផលវិបាក ការធ្លាក់ចុះនៃការប្រើប្រាស់ និងការវិនិយោគជាដើម។

អ្នកវិភាគបានឱ្យដឹងថា ចំនូលធ្លាក់ចុះគឺជាកត្តាធំ ដែលបង្ហាញនៅក្នុងឆ្នាំ ២០១៩កន្លងទៅ។ ហើយតំបន់ដែលក្រីក្របំផុតនោះ គឺនៅភាគខាងត្បូង ចំណែកឯភាគខាងជើងក៏មានអត្រាខ្ពស់គួរសមដែរ។

ការព្យាករណ៍ទិន្នផលសរុបឆ្នាំ២០២០ កាន់តែអាក្រក់ទៅៗ ដោយសារការផ្ទុះនៃមេរោគឆ្លងកូវីដ១៩ ដែលបានជះឥទិ្ធពលដល់វិស័យទេសចរណ៍ ដ៏សំខាន់របស់ប្រទេសថៃ។

យ៉ាងណាមិញ ធនាគារពិភពលោក (WHO) បានណែនាំឱ្យអាជ្ញាធរបន្តពង្រឹងបណ្តាញសុវត្ថិភាពក្នុងប្រទេស និងព្យាយាមបង្កើតការងារកាន់ប្រសើរ សម្រាប់អ្នកមានប្រាក់ចំណូលទាបផងដែរ៕

ដោយវុត្ថា

ភ្នំពេញៈ គណកម្មាធិការអចិន្ត្រៃយ៍នៃរដ្ឋសភា បានចាប់ផ្តើមពិភាក្សា និងសិក្សាគម្រោងវិនិយោគ លើសាងសង់រោងចក្រអគ្គិសនីចំនួន៣ ដែលមានទុនវិនិយោគប្រមា​ណ១,៧០០លានដុល្លារ បន្ទាប់ពីទទួលបានការអនុម័តពីរាជរដ្ឋាភិបាលកម្ពុជា។

យោងតាមសេចក្តីប្រកាសព័ត៌មានស្តីពី លទ្ធផលកិច្ចប្រជុំគណៈកម្មាធិការអចិន្ត្រៃយ៍នៃរដ្ឋសភានាថ្ងៃទី១៧ ខែមីនាឆ្នាំ ២០២០នេះ បានឱ្យដឹងថា គម្រោងវិនិយោគលើសាងសង់រោងចក្រអគ្គិសនីចំនួន៣នេះ ត្រូវបានបញ្ជូនទៅគណៈកម្មការជំនាញដើម្បីពិនិត្យ និងសិក្សាឱ្យបានលម្អិតជាមួយមន្ត្រីជំនាញ មកពីរដ្ឋាភិបាលមុននឹងឈានដល់ការសម្រេចជាផ្លូវការនាពេលខាងមុខនេះ។

យោងតាមខ្លឹមសារកិច្ចប្រជុំពេញអង្គ គណៈរដ្ឋមន្រ្តីកាលពីថ្ងៃទី ៧ ខែកុម្ភៈ ឆ្នាំ ២០២០ នេះ ឱ្យដឹងថា គម្រោងវិនិយោគលើវិស័យអគ្គិសនីចំនួន៣ ដូចជា ទី១ គម្រោងរោងចក្រអគ្គិសនីដុតធ្យូងថ្ម២៦៥មេហ្កាវ៉ាត់ នៅស្រុកត្រពាំងប្រាសាទ ខេត្តឧត្តរមានជ័យ ទី២ គម្រោងខ្សែបណ្ដាញ២៣០គីឡូវ៉ុល ភ្ជាប់ពីរោងចក្រអគ្គិសនី ស្រុកត្រពាំងប្រាសាទ មកអនុស្ថានីយខាងកើតសៀមរាប និងទី៣ គម្រោងរោងចក្រអគ្គិសនីដុតធ្យូងថ្ម អានុភាព ៧០០ មេហ្កាវ៉ាត់នៅស្រុកបុទុមសាគរ ខេត្តកោះកុង។

រដ្ឋាភិបាលបញ្ជាក់ថា ការអនុញ្ញាតឱ្យមានការវិនិយោគ លើវិស័យអគ្គិសនីយ៍នេះបន្ថែមទៅក្នុងផែនការមេឆ្នាំ២០២០ ដល់ឆ្នាំ២០៣០ ដើម្បីបំពេញឲ្យបានគ្រប់គ្រាន់នូវប្រភពអគ្គិសនី សម្រាប់ផ្គត់ផ្គង់ឲ្យសេចក្តីត្រូវការអគ្គិសនីពីឆ្នាំ២០២១ ដល់ឆ្នាំ ២០២៤៕

ដោយ ប៊ី

ភ្នំពេញៈ ធនាគារកណ្តាលរបស់អាមេរិក បានទម្លាក់អត្រាការប្រាក់ឱ្យនៅជិតសូន្យភាគរយកាលពីយប់មិញ ហើយបានចាប់ផ្តើមកម្មវិធីបោះពុម្ពប្រាក់ ដែលមិនធ្លាប់មានចាប់តាំងពីវិបត្តិហិរញ្ញវត្ថុពិភពលោក ខណៈដែលខ្លួនព្យាយាមធ្វើឱ្យទីផ្សារស្ងប់ស្ងាត់ ដែលបណ្តាលមកពីការរីករាលដាលនៃជំងឺឆ្លង COVID-19។

ធនាគារកណ្តាលអាមេរិក បានកាត់បន្ថយអត្រាការប្រាក់គោលរបស់ខ្លួន ត្រឹមមួយភាគរយ ក្នុងការកាត់បន្ថយការសង្គ្រោះបន្ទាន់លើកទី២ ចាប់តាំងពីឆ្នាំ ២០០៨ ហើយបាននិយាយថា ខ្លួននឹងបញ្ចូលទឹកប្រាក់ចំនួន៧០០ពាន់លានដុល្លារ ទៅក្នុងសេដ្ឋកិច្ចនៅប៉ុន្មានសប្តាហ៍ខាងមុខនេះ។

ព្រឹកនេះក្រុមហ៊ុន FTSE 100 បានធ្លាក់ចុះ ៧ ភាគរយ ឬ ៣៨០ ពិន្ទុ ហើយទីផ្សារនៅអាល្លឺម៉ង់ បារាំង អេស្បាញ និងអ៊ីតាលីបានធ្លាក់ចុះយ៉ាងខ្លាំង។ សន្ទស្សន៍ប្រាក់អឺរ៉ូបានធ្លាក់ចុះ ៥០ ដែលជាសន្ទស្សន៍ នៃការភ័យខ្លាចចំពោះភាគហ៊ុនអឺរ៉ុប – បានកើនឡើងដល់កម្រិតខ្ពស់បំផុតគឺ៨៧,៨៩ ពិន្ទុខ្ពស់ជាង ពេលមានវិបត្តិហិរញ្ញវត្ថុ។

លោកប្រធានាធិបតី Trump ដែលបានបញ្ចេញមតិក្នុងការរិះគន់របស់លោកចំពោះធនាគារកណ្តាលអាមេរិក បានកោតសរសើរចំពោះចំណាត់ការ របស់ធនាគារកណ្តាល និងបានព្យាយាម ធានាដល់ជនជាតិអាមេរិកដែលព្រួយបារម្ភថា ការផ្គត់ផ្គង់ស្បៀងអាហា​រនឹងមិនត្រូវបានរំខានឡើយ។ បន្ទាប់ពីមានបញ្ហាជាច្រើនសប្តាហ៍ រដ្ឋបាលបានសន្យាជាថ្មីម្តងទៀត ដើម្បីពង្រីកការទទួលបានការធ្វើតេស្តរកមេរោគ ប៉ុន្តែមន្រ្តីជាន់ខ្ពស់ម្នាក់បានបន្ថែមថា “ខ្ញុំនឹងមិននិយាយថាបញ្ហាតេស្តិ៍មន្ទីរពិសោធន៍បានបញ្ចប់នោះទេ”។

នៅសហរដ្ឋអាមេរិកមានករណីឆ្លងវីរុសជាង៣១០០ករណី ត្រូវបានគេរាយការ​ណ៍​ទូទាំងរដ្ឋចំនួន៤៩ គិតត្រឹមថ្ងៃអាទិត្យកន្លងមកនេះ ហើយមន្រ្តីសាធារណៈបានដាក់ពង្រា​យវិធានការណ៍រឹតបន្តឹង ដើម្បីបន្ថយការរីករាលដាលនៃមេរោគនេះ រួមមានការបិទសាលារៀនភោជនីយដ្ឋានបារ៍ និងអាជីវកម្មដទៃទៀត។

ប្រព័ន្ធរដ្ឋបាលសាលាក្រុងញូវយ៉ក ដែលជាសាលារៀនធំបំផុតរបស់ប្រទេសនេះដែលមានសិស្ស១,១ លាននាក់នឹងត្រូវបិទទ្វារនៅសប្តាហ៍នេះ៕