ដោយ ៖ រ៉ាណេត
ភ្នំពេញ ៖ ខណ្ឌសែនសុខ ដែលធ្លាប់តែជាតំបន់ជាប់ចំណាត់ថ្នាក់លេខ១ក្នុងការអភិវឌ្ឍលំនៅដ្ឋានកម្រិតមធ្យមកាលពីឆ្នាំកន្លងទៅនោះ បច្ចុប្បន្ននេះត្រូវបានអ្នកជំនាញនៅក្នុងវិស័យនេះអះអាងថា បានឈានចូលដល់ដំណាក់ចង្អៀត និងមានឱកាសតិចតួចក្នុងការទទួលបានចំណេញពីការអភិវឌ្ឍ។

អ្នកជំនាញអចលនទ្រព្យអន្តរជាតិ លោក សោម កែវម៉ាលីដា បានមានប្រសាសន៍ប្រាប់កាលពីល្ងាចថ្ងៃទី១២ ខែមីនា ឆ្នាំ២០២០ថា ខណ្ឌសែនសុខ ពេលនេះបានអភិវឌ្ឍន៍ខ្លួនក្លាយជាតំបន់ពាណិជ្ជកម្មកម្រិតខ្ពស់រួចហើយហើយ។ លោកបានមានប្រសាសន៍បន្តទៀតថា “សែនសុខបច្ចុប្បន្ននេះបានបំពេញទៅដោយបុរីលំនៅដ្ឋានធំៗ ក៏ដូចជាបណ្តុំលំនៅដ្ឋានកម្រិតខ្ពស់ រួមជាមួយវត្តមាននៃអគារខ្ពស់ៗដែលបម្រើឱ្យវិស័យពាណិជ្ជកម្ម”។

លោក សោម កែវម៉ាលីដា បានមានប្រសាសន៍បន្តទៀតថា “ពីមុនតំបន់ខណ្ឌសែនសុខ ស័ក្ដិសមទៅនឹងការវិនិយោគ និងអភិវឌ្ឍន៍ទៅលើគម្រោងលំនៅដ្ឋានកម្រិតមធ្យម និងក្រោមមធ្យម ប៉ុន្តែសព្វថ្ងៃនេះខុសពីកាលពីឆ្នាំកន្លងទៅ។ ការវិនិយោគលើគម្រោងលំនៅដ្ឋានកម្រិតមធ្យមនៅទីនេះលែងមានទៀតហើយ ប៉ុន្តែសម្រាប់គម្រោងអភិវឌ្ឍន៍លំនៅដ្ឋានកម្រិតខ្ពស់ ឬមជ្ឈមណ្ឌលពាណិជ្ជកម្មគឺនៅមានឱកាស ដោយសារតែតម្លៃដីនៅតំបន់ខណ្ឌសែនសុខបានឡើងខ្ពស់រួចទៅហើយ ដែលជាហេតុផល និងជាឧបសគ្គសម្រាប់ការអភិវឌ្ឍ”។

អគ្គនាយកក្រុមហ៊ុនភ្នាក់ងារអចលនទ្រព្យអន្តរជាតិ KW Sen Sok លោក សំ សុខនឿន បានមានប្រសាសន៍ថា “កាលពីឆ្នាំ២០១៨-២០១៩ ខណ្ឌសែនសុខ គឺជាតំបន់ដែលមានប្រជាប្រិយភាពខ្ពស់ ក្នុងការអភិវឌ្ឍលើវិស័យលំនៅដ្ឋានតម្លៃមធ្យម ដោយសារតែតម្លៃដីនៅមានកម្រិត ប៉ុន្តែសម្រាប់ឆ្នាំ២០២០នេះ ខណ្ឌមួយនេះមិនស័ក្ដិសមនឹងការអភិ វឌ្ឍន៍វិស័យលំនៅដ្ឋានទៀតនោះទេ ដោយសារតែតម្លៃដីឡើងខ្ពស់មិនក្រោម១០០០ដុល្លារក្នុងមួយម៉ែត្រការ៉េនោះទេ ប៉ុន្តែតម្លៃនេះបានអនុគ្រោះ ដល់ការវិនិយោគលើវិស័យលំនៅដ្ឋានកម្រិតខ្ពស់ ឬវិស័យខុនដូរកម្រិតមធ្យម”។

លោកបានមានប្រសាសន៍បន្តទៀតថា “សម្រាប់ការអភិវឌ្ឍវិស័យលំនៅដ្ឋានកម្រិតមធ្យម និងក្រោមមធ្យម អាចធ្វើទៅបាននៅលើដីដែលមានតម្លៃត្រឹម៤០០ដុល្លារក្នុងមួយម៉ែត្រការ៉េ ប៉ុន្តែចំពោះដីដែលស្ថិតនៅក្នុងខណ្ឌសែនសុខ ជាពិសេស តំបន់បណ្តុំទីប្រជុំជន គឺមានតម្លៃរហូតដល់១០០០-១២០០ដុល្លារ ក្នុងមួយម៉ែត្រការ៉េ ដែលតម្លៃនេះ អាចធ្វើឱ្យកាសនៃការអភិវឌ្ឍលំនៅដ្ឋានកម្រិតមធ្យមពិបាកនឹងទទួលបានចំណេញ”៕

ដោយៈ រ៉ាណេត

ភ្នំពេញៈ នៅមិនទាន់ឃ្លាតឆ្ងាយពីបរិបទនៃជំងឺរលាកផ្លូវដង្ហើម Covid-19 ដែលកំពុងតែរាតត្បាតស្ទើរពេញសាកលោកនៅឡើយ ប៉ុន្តែសម្រាប់ការអភិវឌ្ឍ ការវិនិយោគនៅក្នុងវិស័យអចលនទ្រព្យកម្ពុជា នៅតែបន្តមានសកម្មភាព និងផ្ដល់ឱកាសកាន់តែងាយស្រួលសម្រាប់អ្នកដែលមានលុយតិច ចង់ទិញលំនៅដ្ឋាន ក៏ដូចជាអចលនទ្រព្យនានាដែលមានតម្លៃក្រោម៧ម៉ឺនដុល្លារ។

អគ្គនាយកក្រុមហ៊ុនភ្នាក់ងារអចលនទ្រព្យអន្តរជាតិ KW Sen Sok និងជានាយកក្រុមហ៊ុន SAM SN Realty លោក សំ សុខនឿន បានមានប្រសាសន៍កាលពីថ្ងៃទី១២ ខែមីនា ឆ្នាំ២០២០កន្លងមកថា នៅដើមឆ្នាំ២០២០នេះ ពិភពលោកទាំងមូលកំពុងតែជួបវិបត្តិមួយ គឺការរីករាលដាលនៃមេរោគ COVID-19 ដែលបណ្តាលអោយមានផលប៉ះពាល់ទៅដល់ខ្សែចង្វាក់ផលិតកម្មទាំងមូលរបស់ពិភពលោក។ ដោយឡែកចំពោះវិស័យអច​លនវត្ថុនៅក្នុងប្រទេសកម្ពុជាវិញ COVID-19 បានបង្អាក់ចលនាម្លាំងនៃការទិញ ទាំងការវិនិយោគក្នុងស្រុក និងពីក្រៅស្រុក នៅត្រីមាសទី១ នៃឆ្នាំ២០២០នេះ។

អ្នកជំនាញរូបនេះបានបន្តថា “ចំពោះបញ្ហាCOVID-19 ពិតជាមានផលប៉ះពាល់ដល់ការទិញលក់អចលនវត្ថុ នៅក្នុងប្រទេសកម្ពុជាពិតប្រាកដមែន”។ លោកបន្ថែមថា “ជាវិធានការ និងដំណោះស្រាយ រដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រីកម្ពុជា មានយន្តការមួយចំនួនដើម្បីឆ្លើយតបនឹងស្ថានការនេះ ដូចជាការលើកលែងពន្ធប្រថាប់ត្រា សម្រាប់ការទិញអចលនវត្ថុទាំងឡាយណា ដែលមានតំលៃក្រោម៧ម៉ឺនដុល្លារ ថែមទាំងអំពាវនាវឱ្យអ្នកអភិវឌ្ឍអចលនវត្ថុទាំងអស់បញ្ចុះតម្លៃ ដើម្បីឆ្លើយតបនឹងតម្រូវការក្នុងស្រុក និងដើម្បីលើកកម្ពស់ជីវភាព សុខមាលភាព និងសេចក្តីថ្លៃថ្នូររបស់ប្រជាជនខ្មែរ”។

លោក សំ សុខនឿន បានបង្ហាញពីគំនិតវិជ្ជមានថា នៅឆ្នាំ២០២០នេះ គឺជាឱកាសសំរាប់អ្នកមានបំណងចង់ទិញលំនៅដ្ឋានដើម្បីស្នាក់នៅ ដោយយោងតាមហេតុផល៣ដូចជា ទី១- អ្នកអភិវឌ្ឍបុរីជាទូទៅកំពុង តែផ្តល់លក្ខខ័ណ្ឌបង់ប្រាក់ងាយស្រួល និងមានការបញ្ចុះតំលៃពិសេស។ ទី២- នៅក្នុងឆ្នាំ២០២០នេះ អ្នកទិញនឹងមិនត្រូវបង់ពន្ធប្រថាប់ត្រា៤% សំរាប់ផ្ទះតំលៃ៧ម៉ឺនដុល្លារចុះ និងទី៣- អ្នកទិញមានឱកាសចំនេញបានខ្ពស់ ព្រោះប្រទេសកម្ពុជា ពុំមានការរីករាលដាលខ្លាំងនៃមេរោគ COVID 19 ដូចប្រទេសដទៃឡើយ សញ្ញាណវិជ្ជមានជាច្រើនបានបង្ហាញថា ពិភពលោកអាចគ្រប់គ្រងស្ថានការនៃការរីករាលដាលនេះបានហើយ។

អគ្គនាយកក្រុមហ៊ុនអចលនទ្រព្យ Khmer Foundation Appraisal លោកឧកញ៉ា នួន រិទ្ធី បានមានប្រសាសន៍ថា បញ្ហានៃជំងឺCovid-19 គ្រាន់តែជាព្រឹត្តិការណ៍តែប៉ុណ្ណោះ ដែលមិនមែនកើតមានតែនៅក្នុងប្រទេសកម្ពុជានោះទេ ប៉ុន្តែវាជាបញ្ហានៅលើសាកលលោកដែលប្រទេសធំៗ កំពុងតែមានវិធានការទប់ស្កាត់ និងឈានទៅលុបបំបាត់។

លោកឧកញ៉ាបន្តទៀតថា “ទោះជានៅក្នុងបរិបថបែបនេះក្ដី សម្រាប់អ្នកវិនិយោគពិតប្រាកដ គេនៅតែបន្តសកម្មភាពទិញ-លក់ ដដែល ហើយភ្ជាប់ជាមួយនឹភាពភ័យខ្លាចនេះ គេអាចមានឱកាសទិញបានអចលនវត្ថុមានតម្លៃទាប ដែលនឹងទទួលបានចំណេញខ្ពស់នៅពេលលក់ចេញទៅវិញ”។

ដោយឡែកសម្រាប់អ្នកអភិវឌ្ឍន៍ ដែលមានលំនឹងគ្រប់គ្រាន់ទៅលើលំហូរទុន ក៏គេនៅតែបន្តគម្រោងសាងសង់សំណង់របស់គេដដែល និងអាចមានឱកាសលក់បានកាន់តែឆាប់រហ័ស នៅក្នុងទីផ្សារបន្ទាប់បញ្ចប់គម្រោងសាងសង់ ដែលកាន់តែបង្កើនភាពជឿជាក់ទៅដល់អតិថិជន។

លោកឧកញ៉ានួ​ន រិទ្ឋីបានបញ្ជាក់ថា “វាមិនមានសញ្ញាណាមួយបង្ហាញថា វិស័យអចលនទ្រព្យនៅកម្ពុជាធ្លាក់ចុះខ្លាំងនោះទេ ប៉ុន្តែវានឹងកាន់តែល្អប្រសើរនៅឆ្នាំបន្ទាប់ ជាពិសេសវិស័យលំនៅដ្ឋាន ដែលកំពុងតែមានតម្រូវការទាំងនៅក្នុងពេលបច្ចុប្បន្ននេះ និងបន្តទៅថ្ងៃអនាគតខាងមុខទៀត”៕

ដោយរ៉ាវី

ភ្នំពេញ៖ ជារឿយៗការទិញ-លក់ដីពុះឡូតិ៍ តែងត្រូវបានអ្នកជំនាញ ក៏ដូចជាមន្រ្តីជាន់ខ្ពស់របស់ក្រសួងដែនដីនគរូបនីយកម្ម និងសំណង់ ចេញសេចក្ដីប្រកាស និងព្រមានជាហូរហែរដល់អ្នកទិញ ក៏ដូចជាអ្នកអភិវឌ្ឍន៍ផងដែរ ចៀសវាងកើតមានហានិភ័យនានា ដែលប្រាសចាកពីច្បាប់អនុញ្ញាត ជាពិសេស​ការបំបែបក្បាលដី និងចេញប្លង់កម្មសិទ្ធិស្រ​ប​ច្បាប់មិនបានត្រឹមត្រូវតែម្ដង។

តើការបំបែកក្បាលដី ឬចេញប្លង់កម្មសិទ្ធិខុសនីតិវិធីច្បាប់ នឹងកើតមានបញ្ហាបែបណា?

លោកធី ប៊ុនធឿននាយកផ្នែកទីផ្សារ និងផ្នែកលក់ក្រុមហ៊ុនពុះដីឡូតិ៍នៅស្រុកអង្គស្នួល ស្ថិតនៅតាមបណ្តោយផ្លូវជាតិលេខ៤ ដែលជាតំបន់កំពុងមានការផុសផុលយ៉ាងខ្លាំងលើការពុះដីឡូតិ៍លក់ បានមានប្រសាសន៍ឲ្យដឹងកាលពីថ្ងៃទី៦ កុម្ភៈកន្លងមកថា ជាទូទៅចំពោះការពុះដីឡូតិ៍លក់ ក្រុមហ៊ុនដែលជាអ្នកអភិវឌ្ឍត្រូវទទួលខុសត្រូវទៅលើការរៀបចំឯកសារស្របច្បាប់ទៅឱ្យអតិថិជនរបស់ខ្លួន ដែលក្នុងនោះការបំបែកក្បាលដី ឬការរៀបចំឯកសារស្នើសុំប័ណ្ណម្ចាស់កម្មសិទ្ធិស្របច្បាប់ ដែលទទួលស្គាល់ដោយក្រសួងគឺជារឿងសំខាន់បំផុត ហើយវាក៏ជាការបង្កើនទំនុកចិត្តដល់អតិថិជនផងដែរ។

លោកបន្តថា “ការរៀបចំឯកសារពាក់ព័ន្ធ នឹងការស្នើសុំប័ណ្ណកម្មសិទ្ធិ (វិញ្ញាបនប័ត្រសម្គាល់ម្ចាស់អចលនវត្ថុ) ត្រូវមានការទទួលស្គាល់ពីអជ្ញាធរ ចាប់ពីថ្នាក់មូលដ្ឋានឡើងទៅរហូតដល់ថ្នាក់ខេត្ត (មន្ទីរ) ទើបហៅថាស្របច្បាប់ពេញលេញ”។

លោកធី ប៊ុនធឿនបានបន្តថា កាលពីមុនការរៀបចំឯកសារស្នើសុំ គឺមានភាពងាយស្រួល ប៉ុន្តែចាប់តាំងពីឆ្នាំ២០១៩ រហូតមកហាក់មានភាពពិបាកក្នុងការស្នើសុំ រហូ​តមានក្រុមហ៊ុនពុះដីឡូតិ៍មួយចំនួនបានរំលងពីនីតិវិធី ឬចេញលិខិតប្រាស់ចាកពីច្បាប់ទៅឱ្យអតិថិជនរបស់ខ្លួន(ឆបោក) ដែលធ្វើយ៉ាងណាឱ្យការលក់របស់ខ្លួនទទួលបានជោ​គ​​ជ័យទៅតាមគម្រោង ដែលប្រការនេះវានឹងផ្តល់ភាពលំបាក ទៅដល់អតិថិជននៅថ្ងៃអនាគត។

ជាមួយគ្នានេះលោកឧកញ៉ានួន រិទ្ធី ដែលជាអ្នកជំនាញផ្នែកវិស័យអចលនទ្រព្យ និងជាអគ្គនាយកក្រុមហ៊ុន Khmer Foundation Appraisal បានលើកឡើងផងដែរថា ភាគច្រើនអ្នកទិញ មិនបានដឹងច្បាស់ពីបញ្ហាផ្លូវច្បាប់នោះទេ ដែលវាក៏ជាការទទួលខុសត្រូវរបស់ក្រុមហ៊ុន ដែលជាអ្នកអភិវឌ្ឍន៍ទាំងស្រុង ហើយចំពោះក្រុមហ៊ុនមួយចំនួនដែលមិនមានលទ្ធភាព ក្នុងការរៀបចំឯកសារក្នុងការស្នើសុំបំបែកក្បាលដី និងចេញបណ្ណសម្គាល់ម្ចាស់កម្មសិទ្ធិឱ្យអតិថិជរបស់ខ្លួន អាចបណ្តាលមកពីក្រុមហ៊ុនទាំងនោះមិនបានចុះបញ្ជីស្របច្បាប់នៅឡើយ ហើយប្រកាសលក់ពុះដីឡូតិ៍បែបអាណាធិបតេយ្យ ដែលប្រការនេះវាបង្កហានិភ័យខ្ពស់ ដល់អតិថិជននៅថ្ងៃអនាគត ឬអាចឈានដល់ការខាតបងទ្រព្យទាំងស្រុង។

លោកបន្តថា “អតិថិជនចាំបាច់ត្រូវស្វែងយល់ ពីកត្តាផ្លូវច្បាប់ពាក់ព័ន្ធមួយចំនួនមុននឹងសម្រេចចិត្តចំណាយលុយទិញដីឡូតិ៍ទាំងនោះ ដូចជា សួរនាំឱ្យដឹងច្បាស់ថា តើក្រុមហ៊ុនដែលជាអ្នកលក់មានចុះបញ្ជីត្រឹមត្រូវឬទេ ? តើក្រុមហ៊ុន មានអាជ្ញាប័ណ្ណ ដែលទទួលស្គាល់ដោយក្រសួង និងមានជាប់ពាក់ព័ន្ធទៅនឹងបណ្ដឹងឬទេ?”។លោកបន្តថា “ជាមួយគ្នានេះ អតិថិជនក៏ត្រូវដឹងពីប្រវត្តិដី រួមជាមួយនឹងការស្វែងយល់ពីប្លង់គោលរបស់ក្រុមហ៊ុនស្របតាមគោលការណ៍ និងសេចក្ដីជូនដំណឹង (ស,ជ,ណ) របស់ក្រសួងជាដើម ដូចជាទំហំផ្លូវត្រូវទុកយ៉ាងយ៉ាងតិច៨ម៉ែត្រ មានបណ្តាញអគ្គិសនី មានប្រពន្ធបង្ហូរទឹកត្រឹមត្រូវ ដែលទាំងអស់នេះ អតិថិជនត្រូវតែទាមទារស្វែងយល់ឱ្យបានលម្អិត ហើយអ្វីដែលសំខាន់ តើតំបន់អភិវឌ្ឍដែលពុះដីឡូតិ៍ មានជាប់ពាក់ព័ន្ធទៅនឹងគម្រោងប្លង់មេរបស់ក្រសួងដែរឬទេ ដើម្បីចៀសវាងមានបញ្ហាទៅថ្ងៃក្រោយ”៕

ដោយវុត្ថា

ភ្នំពេញៈ ឆ្លើយតបទៅនឹងក្តីកង្វល់ជុំវិញការធ្លាក់ចុះ នៃវិស័យអចលនទ្រព្យនៅក្នុងប្រទេសកម្ពុជាដែលបង្កឡើងដោយ ជំងឺផូវដង្ហើមប្រភេទថ្មីកូរូណាវីរុស ឬ កូវីដ១៩ ដែលបាននិងកំងរាតត្បាតនៅក្នុងប្រទេសកម្ពុជា និងពិភពលោកនោះ អ្នកជំនាញក្នុងវិស័យនេះបានផ្ញើរសារ និងនៅតែអះអាងថា នៅតែបន្តមានការរីកចំរើន ដោយសារតែមានការគាំទ្រពីរាជរដ្ឋាភិបាល និងធនាគារ។

លោក ច្រឹក សុខនីម ប្រធានសមាគមភ្នាក់ការងារ និងវាយតម្លៃអចលនវត្ថុកម្ពុជា បានឱ្យដឹងនៅថ្ងៃទី ១២ ខែមីនា ឆ្នាំ ២០២០ នេះ តាមរយៈការបង្ហោះជាសារវីដេអូថា ទីផ្សារអលចនទ្រព្យ ជាទូទៅផ្សារភ្ជាប់ទៅនឹងសេដ្ឋកិច្ចជាតិ (សេដ្ឋកិច្ច និងអចលនទ្រព្យ) តែបើគិតពីដើមឆ្នាំ២០២០ រហូតដល់ពេលនេះ គឺមានការព្រួយបារម្ភច្រើនជុំវិញទីផ្សារអចលនទ្រព្យនៅក្នុងប្រទេសកម្ពុជា ដោយសារតែវិបត្តកូវីដ១៩ និងការចាកចេញរបស់ជនជាតិចិនជាដើម។

តាមរយៈខ្សែអាត់វីដេអូជិត៦នាទី លោកច្រឹក សុខនីមបន្តថា “នេះជាបញ្ហាប្រឈមមួយក្នុងទីផ្សារវិស័យអចលនទ្រព្យ តែយ៉ាងណាក៏ដោយ ភាពប្រឈមនេះ ស្ថិតនៅក្នុងរយៈពេលខ្លីតែប៉ុណ្ណោះ”។លោកបន្ថែមថា “ពីព្រោះថាកម្ពុជាមានគោលនយោបាយសេដ្ឋកិច្ចរឹងមាំក្នុងទំហំប្រមាណ៧ភាគរយ ក្នុងរយៈពេល១០ចុងក្រោយនេះ។ ដូច្នេះអាចនិយា​យបានថា ប្រទេសកម្ពុជាគឺជាប្រទេស ដែលមានសេដ្ឋកិច្ចលូតលាស់នៅក្នុងតំបន់អាស៊ី”។

លោកបញ្ជាក់ទៀតថា វិស័យអចលនទ្រព្យបាន នឹងកំពុងរីកចំរើនក្នុងរង្វង់១០ ទៅ ១៥ ភាគរយជារាល់ឆ្នាំ ដែលអាចឱ្យអ្នកវិនិយោគិន ទទួលបានប្រាក់ចំណេញពីការវិនិ​យោគទៅលើវិស័យអចលនទ្រព្យ ស្របទៅនឹងការរីកចំរើនរបស់កម្ពុជាដែលដឹកនាំដោយសម្តេចអគ្គមហាសេនាបតីតេជោ ហ៊ុន សែនប្រកបដោយភាពឈ្លៀសវៃ ហើយបានត្រួសត្រាយផ្លូវ និងកំណត់ផែនការ យុទ្ធសាស្ត្រក្នុងរយៈពេលវែង ឱ្យសេដ្ឋកិច្ចរបស់កម្ពុជាដើរក្នុងលំនឹង។

លោកបញ្ជាក់ទៀតថា ដូច្នេះវិស័យអចលនទ្រព្យ បាននិងកំពុងរីកចំរើនតាមរយៈការគាំទ្ររបស់រាជរដ្ឋាភិបាល  តាមរយៈការគាំទ្ររបស់វិស័យធនាគារ  និងតម្រូវការជាក់ស្តែង។ ប្រទេសកម្ពុជា មានប្រជាជជនប្រមាណ១៥.៥លាននាក់ ហើយតម្រូវការផ្ទះមានរង្វង់៥ម៉ឺនខ្នងក្នុង១ឆ្នាំៗ ដែលទាមទាឱ្យវិស័យអលនទ្រព្យនេះ ធ្វើការអភិវឌ្ឍនទៅក្នុងពេលអនាគតប្រកបដោយភាពជឿជាក់។

បច្ចុប្បន្នភាព យើងអាចទាញយកផលចំណេញ តាមរយៈគម្រោងវិនិយោគនេះបានដោយផ្អែកលើមូលដ្ឋាន និងគោលការណ៍ទិន្ន័យវិនិយោគ ដែលបានប្រមូលព័ត៌មាន ប្រកបដោយភាពជឿជាក់ ហើយទីផ្សារអចលនទ្រព្យរបស់កមម្ពុជា ធៀបទៅនឹងទីផ្សារអចលនទ្រព្យ នៅក្នុងតំបន់អាស៊ីគឺនៅមានតម្លៃនៅឡើយ។ ការវិនិយោគនៅក្នុងប្រទេសកម្ពុជា ធៀបទៅនឹងបណ្តាប្រទេនៅក្នុងតំបន់អាស៊ាន គឺការវិនិយោគនៅក្នុងប្រទេសកម្ពុជាទទួលបានផលចំណេញប្រាក់ច្រើន ជាបណ្តាប្រទេសនៅជិតខាងរបស់កម្ពុជា ដូចជាវៀតណាម ថៃ និងឡាវជាដើម។

ដូច្នេះទម្រង់សេដ្ឋកិច្ច គោលនយោបាយ និងភាពរឹងមាំព្រមទាំងស្ថានភាពនយោ​បាយមានស្ថេរភាព គឺជាកត្តាដ៏សំខាន់ដែលជំរុញឱ្យវិស័យអចលនទ្រព្យ នៅក្នុងប្រទេសកម្ពុជានៅតែបន្តមានការរីកចម្រើន និងទទួលបានចំណូលខ្ពស់សម្រាប់វិនិយោគិន៕

ដោយៈ រ៉ាណេត

ភ្នំពេញៈ សម្ដេចក្រឡាហោមស ខេង បានក្រើនរំឭកសារជាថ្មី ដល់គណៈអភិបាលខេត្តទាំងអស់ ដែលស្ថិតនៅជាប់ព្រំដែនជាមួយប្រទេសជិតខាង ត្រូវបន្តការណែនាំដល់ប្រជាពលរដ្ឋកុំឱ្យជួលដីស្រែរបស់ខ្លួនឱ្យទៅកសិករប្រទេសជិតខាង។

សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានមានប្រសាសន៍ នៅក្នុងឱកាសអញ្ជើញជាអធិបតីពិធីបិទ សន្និបាតបូកសរុបលទ្ធផលការងារប្រចាំឆ្នាំ២០១៩ និងលើកទិសដៅការងារឆ្នាំ២០២០ របស់រដ្ឋបាលខេត្តព្រៃវែង និងក្រុមការងាររាជរដ្ឋាភិបាលចុះមូលដ្ឋាន ថ្ងៃទី១២ ខែមីនា ឆ្នាំ២០២០នេះថា គ្រប់អាជ្ញាធរ ជាពិសេសអភិបាលខេត្តទាំងអស់ ដែលនៅជាប់តំបន់ព្រំដែនប្រទេសជិតខាង ត្រូវបន្តការណែនាំដល់ប្រជាពលរដ្ឋ កុំជួលដីស្រែចម្ការរបស់ខ្លួន ដែលស្ថិតនៅតំបន់ព្រំដែនឱ្យទៅជនបរទេស។

សម្ដេចបញ្ជាក់ទៀតថា “ករណីគេសុំជួលដី ដើម្បីបង្កបង្កើនផលនៅតាមព្រំដែន គឺកុំឱ្យមានឱ្យសោះ ពីព្រោះការធ្វើស្រែបន្តិចបន្តួចនៅតាមព្រំដែន វានឹងនាំឱ្យមានការស្មុគស្មាញទៅថ្ងៃក្រោយ ហើយប្រជាជនណា ដែលជួលដីស្រែឱ្យទៅប្រទេសជិតខាង គឺខុសច្បាប់ កាធ្វើបែបនេះ ក្នុងន័យដើម្បីការពារបូរណភាព អធិបតេយ្យទឹកដីរបស់យើង”។

កាលពីអំឡុងខែវិច្ឆិកា ឆ្នាំ២០១៥ រាជរដ្ឋាភិបាលកម្ពុជា បានចេញសារាចរមួយ ដើម្បីហាមប្រជាពលរដ្ឋខ្មែរ កុំឱ្យលក់ ឬជួលដីស្រែ ដីចំការ ឬដីលំនៅឋាននៅតាមតំបន់ព្រំដែនឱ្យទៅប្រជាពលរដ្ឋនៃប្រទេសជិតខាង ដូចជាប្រទេសវៀតណាម ឡាវ និងថៃ ជាដើម។ នៅក្នុងសារាចរនោះក៏បានបញ្ជាក់ថា ក្នុងករណីមានការជួលហើយ តែពុំមានឯកសារគតិយុត្ត ឬកិច្ចសន្យាត្រឹមត្រូវ អភិបាលខេត្តត្រូវបញ្ឈប់លែងឱ្យមានការជួលតទៅទៀត។ ប៉ុន្តែក្នុងករណីជួលរួចហើយ មានឯកសារគតិយុត្តត្រឹមត្រូវ ការជួលដីនោះអាចបន្តរហូតដល់អស់សុពលភាព ហើយបន្ទាប់ពីអស់សុពលភាព ហាមមិនឱ្យជួលដីនោះបន្តឱ្យប្រជាពលរដ្ឋប្រទេសជិតខាងទៀតឡើយ៕