ដោយៈរ៉ាណេត      

ព្រះសីហនុៈ ចាប់តាំងពីបើកដំណើរការកាលពីចុងឆ្នាំ២០១៩ រហូតមកដល់ពេលនេះ ផ្សារទំនើប FURI Times Square កាន់តែទទួលបានការគាំទ្រពីសំណាក់អតិថិជនយ៉ាងច្រើនគួរជាទីមោទន ដែលក្នុងនោះមានទាំងជនជាតិបរទេស និងប្រជាជនក្នុងស្រុកផងដែរ។

តាមការឱ្យពីសំណាក់អ្នកចាត់ការទូទៅ នៅផ្សារទំនើបដ៏ធំលើកដំបូងគេនៅក្នុងក្រុងព្រះសីហនុ FURI Times Squareបានឱ្យដឹងនារសៀលថ្ងៃទី១២ មិនានេះថា បើទោះជាស្ថិតនៅក្នុងភាពភ្ញាក់ផ្អើលនៃជំងឺ Covid-19 ក៏ដោយ ប៉ុន្តែសម្រាប់ផ្សារទំនើបនៅក្រុងព្រះសីហនុមួយនេះ មិនមានភាពស្ងប់ស្ងាត់នោះទេ ផ្ទុយទៅវិញគឺមានកំណើននៃចំនួនអតិថិជន ក៏ដូចជាភ្ញៀវទេសចរណ៍ចំរុះជាតិសាសន៍កាន់តែច្រើនជាងមុន។

លោកបានបន្តទៀតថា “គិតត្រឹមដើមខែមីនា ឆ្នាំ២០២០នេះ កំណើននៃចំនួនអតិ​ថិ​ជន និងភ្ញៀវទេសចរមកកាន់ផ្សារទំនើប FURI Times Square គឺមានគួរឱ្យកត់សម្គាល់ បើប្រៀបធៀបទៅនឹងខែមករា និងមានសន្ទុះខ្ពស់ប្រមាណ ៣៥-៤០ភាគរយ ខណៈដែលបច្ចុប្បន្ននេះ ក្នុងមួយថ្ងៃមានសរុបក្នុងចន្លោះជាង២៥០០-៣០០០នាក់”។

លោកបានបញ្ជាក់ទៀតថា ជាមួយនឹងកំណើន នៃចំនួនអតិថិជនគាំទ្រខាងលើនេះ ក៏មានលំហូរបន្ថែម នៃចំនួនក្រុមហ៊ុនថ្មី ចូលមកសហការលក់ផលិតផល និងសេវាកម្មរបស់ខ្លួនចំនួន៤ផងដែរ ដោយនោះរួមមានក្រុមហ៊ុនលក់ទូរស័ព្ទ Huaw ei ក្លីនិក ព្យាបាល និងថែរក្សាសម្ផស្ស ធនាគារ និងក្រុមហ៊ុនលក់សម្លៀកបំពាក់ ខណៈដែលក្រុមហ៊ុនចំនួន៣ផ្សេងទៀតកំពុងតែរៀបចំតុបតែងលម្អស្ដង់ និងត្រៀមបើកជាផ្លូវការណ៍នៅមុនបុណ្យចូលឆ្នាំខ្មែរ”។

នាយកគ្រប់គ្រងទូទៅនៃហាងកាហ្វេ Starbucks ប្រចាំនៅប្រទេសកម្ពុជា និងឡាវ លោកប៉ោ លីម ដែលមានសាខានៅផ្សារទំនើប FURI Times Square ក៏បានមានប្រសាសន៍ផងដែរថា “តាមការកត់សម្គាល់របស់ខ្ញុំ ទោះជាស្ថិតនៅក្នុងស្ថានភាពនៃការភ័យខ្លាចការរាតត្បាតនៃជំងឺរលាកផ្លូវដង្ហើមនៅពេលបច្ចុប្បន្ននេះ ភាពប្រែប្រួលស្ងប់ស្ងាត់គឺមិនមាននោះទេ ហើយសម្រាប់អតិថិជនដែលគាំទ្ររសជាតិកាហ្វេ Starbucks គឺនៅតែបន្តមកដដែល”។

លោកបានបន្តទៀយថា “ជាការចូលរួមទប់ស្កាត់ជំងឺមួយនេះ បណ្តាបុគ្គលិកដែលបម្រើការងារនៅសាខា Starbuck ផ្សារទំនើប FURI Times Square បានព្យាយមថែរក្សាអនាម័យ ដោយការពាក់ម៉ាស និងប្រើទឹកអាល់កុលសម្លាប់មេរោគជាប់ជាប្រចាំ ហើយខ្ញុំជឿជាក់ថា បន្ទាប់ពីមានភាពធូរស្បើយពីបញ្ហានៃជំងឺនេះ នឹងមានមនុស្សកាន់តែច្រើនចូលមកកាន់ទីនេះ”។

បច្ចុប្បន្ននេះ នៅក្នុងផ្សារទំនើប FURI Times Square មានបណ្តាក្រុមហ៊ុនល្បីៗលំដាប់អន្តរជាតិជាច្រើន ដែលកំពុងតែដំណើរការលក់ ដែលក្នុងនោះក្រៅពីក្រុមហ៊ុនអាមេរិក Starbuck នៅមានក្រុមហ៊ុនDakasi Tea ហាងអាហារមកពីប្រទេសសាំងហ្គាពួរ ក្រុមហ៊ុន Amazone Café ក្រុមហ៊ុន KOI ក្រុមហ៊ុនលក់សម្លៀកបំពាក់ LEVI’s ក្រុមហ៊ុន NIKE ក្រុមហ៊ុន Samsonite ក្រុមហ៊ុននាឡិកាដ៏ល្បីឈ្មោះ G-Shock ក្រុមហ៊ុនលក់រថយន្ត HGB Group ក្រុមហ៊ុនទូរស័ព្ទដៃទំនើប Huawei ធនាគារ BIC Bank ក្លីនិកព្យាបាល និងថែរក្សាសម្ផស្ស រួមជាមួយក្រុមហ៊ុនល្បីៗជាច្រើនទៀត ដោយរាប់បញ្ចូលទាំងគ្រឿងសំអាងផងដែរ។

តាមរយៈផ្សារទំនើបដ៏ធំ និងទាន់សម័យ FURI Times Square នឹងនាំមកជូនអតិថិជននូវហាងលក់ផលិតផល ចំណីអាហារ សម្ភារៈប្រើប្រាស់ ដែលមានគុណភាពកម្រិតអន្តរជាតិ រួមជាមួយកម្មវិធីកម្សាន្តៗជាច្រើនទៀត ជាពិសេសបន្ទាប់ពីពិធីបើកសម្ពោធលក់ជាផ្លូវការ នៅពេលឆាប់ៗខាងមុខនេះតែម្ដង៕

ដោយរ៉ា ណេត

ភ្នំពេញៈ ជាការឆ្លើយតប និងជួយសម្រួលដល់បណ្ដាអាជីវករលក់ដូរ ដែលនឹងត្រូវរុះរើចាក់ចេញពីអតីតផ្សារឃ្លាំងរំសេវចាស់ ដែលស្ថិតនៅក្នុងបរិវេណមជ្ឈមណ្ឌលម៉ុងឌីយ៉ាល់ក្នុងពេលដ៏ខ្លីខាងមុខនេះ ផ្សារឃ្លាំងរំសេវថ្មីសែនសុខ ដែលមានទីតាំងស្ថិតនៅចំណុចកណ្តាលនៃទីប្រជុំជន ក្នុងខណ្ឌសែនសុខ បានត្រៀមខ្លួនរួចជាស្រេចក្នុងការទទួលស្វាគម ន៍បណ្តាអាជីវករទាំងអស់ ជាពិសេសអាជីវករផ្នែកទិញ-លក់ និងជួសជុលទូរស័ព្ទតែម្ដង។

សហស្ថាបនិកផ្សារឃ្លាំងរំសេវថ្មី សែនសុខ លោក សោម កែវម៉ាលីដា បានមានប្រសាសន៍ប្រាប់ នៅក្នុងពិធីសម្ពោធបើកការដ្ឋានសាងសង់កាលពីព្រឹកថ្ងៃទី១២ ខែមីនា ឆ្នាំ២០២០នេះថា ផ្សារឃ្លាំងរំសេវថ្មី សែនសុខ បានធ្វើការអភិវឌ្ឍនៅលើផ្ទៃដីទំហំសរុប២,៧ហិកតា ប៉ុន្តែក្នុងដំណាក់ដំបូងនេះយើងត្រឹម១,៤ហិកតា ស្មើនឹង៩៨០ស្ដង់ ដោយស្ដង់នីមួយៗមានទំហំ៤ម៉ែត្រការ៉េ បែងចែកជាតំបន់សម្រាប់លក់សម្លៀកបំពាក់ អាហារ ដ្ឋាន ជាពិសេសផ្តោតគ្រឿងអេឡិចត្រូនិចផ្នែកទូរស័ព្ទដៃ។

លោកបានបញ្ជាក់ទៀតថា “ទីតាំងផ្សារឃ្លាំងរំសេវថ្មី សែនសុខនេះ គឺមានសក្ដានុពលខ្ពស់ អំណោយផលដល់ការធ្វើអាជីវកម្ម គ្រប់ប្រភេទរបស់បងប្អូនអាជីវករ ដែលក្រៅពីស្ថិតនៅក្នុងតំបន់ដែលមានការអភិវឌ្ឍ និងមានមនុស្សរស់នៅច្រើន ក៏មានវត្តមានរបស់ក្រុមហ៊ុនជាតិ និងអន្តរជាតិធំៗចូលមកបង្ហាញវត្តមាននៅទីនេះផងដែរ ជាក់ស្ដែងដូចជាផ្សារទំនើប AEON2 ផ្សារម៉ាក្រូ ផ្សារ GLOBAL HOUSE តំបន់អភិវឌ្ឍន៍ជីពម៉ុងលែន គម្រោងផ្សារទំនើប The Green Avenue Community Malls រួមជាមួយនឹងមជ្ឈមណ្ឌលពាណិជ្ជកម្មជាច្រើនទៀត ហើយរឹតតែពិសេសជាងនេះ គឺមានបណ្តុំរោងចក្រនៅហ៊ុព័ទ្ធជុំវិញ ដែលមានបងប្អូនកម្មករ-កម្មការិនីរាប់ម៉ឺននាក់បម្រើការងារនៅទីនេះ។

រហូតមកទល់ពេលនេះ ស្តង់ក្នុងផ្សារនេះទទួលបានការទិញពីអតិថិជនអស់ប្រមា​ណ៨០ភាគរយរួចហើយ។

លោកបន្តទៀតថា ការជួលស្ដង់លក់នៅក្នុងផ្សារឃ្លាំងរំសេវថ្មី សែនសុខ នេះ គ្រប់អាជីវករទាំងអស់ នឹងទទួលបានកុងត្រានៃការជួលក្នុងរយៈ១០ឆ្នាំ ហើយអ្វីដែលរឹតតែពិសេស សម្រាប់អតិថិជនដែលជួលនៅពេលនេះ នឹងទទួលបានការបញ្ចុះតម្លៃរហូតដល់៥០ភាគរយពេញមួយឆ្នាំ ដល់បណ្តាអាជីវករទាំងអស់ និងអាចដំណើរការលក់ក្នុងរយៈពេល៦ខែខាងមុខនេះ”។

អតិថិជនជាអាជីវករចាប់អារម្មណ៍ទិញស្តង់នៅក្នុងផ្សារ ដែលមានស្តង់ដាអន្តរជាតិនេះអាចទំនាក់ទំនងលេខទូរស័ព្ទ 096 5 655 566,012 289355៕

ដោយ ហ្សូលី

ភ្នំពេញ៖ តម្លៃលំនៅដ្ឋានធ្លាក់ចុះ ៣៣% ចាប់តាំងពីរដ្ឋាភិបាលសម្រេចចេញវិធានការបិទហ្គេមអនឡាញកាលពីខែសីហាកន្លងទៅ ដែលបណ្តាលឱ្យជនអន្តោសប្រវេសន៍ចិន និងអាជីវករចិនយ៉ាងតិច ៤សែននាក់ បង្ខំចិត្តត្រឡប់ទៅប្រទេសកំណើតខ្លួនវិញ។ នេះបើយោងតាមស្ថិតិអន្តោប្រវេសន៍របស់រដ្ឋាភិបាល។

តម្លៃលំនៅដ្ឋានក្នុងទីក្រុងមាត់សមុទ្រនៅក្រុងខេត្តព្រះសីហនុធ្លាក់ចុះយ៉ាងគួរឱ្យបារម្ភ ព្រោះថាទីនោះគឺជាចំនុចកណ្តាលនៃការវិនិយោគដែលចិនមកបណ្តាក់ទុនទិញអចនទ្រព្យនៅក្នុងប្រទេសកម្ពុជា។

បើនិយាយពីការវិនិយោគទុនរបស់ជនជាតិចិនមានការកើនឡើងជិត ១០ដង ដោយក្នុងនោះមានជាការជួលផ្ទះ ទិញផ្ទះជាមួយអត្រាតម្លៃមួយគួរឱ្យស្ងើចនៅក្នុងចន្លោះឆ្នាំ ២០១៧ និង ២០១៩ ព្រោះថាជនជាតិចិនមានលុយចំណាយវិនិយោគនិងហ៊ានឱ្យតម្លៃលើសពីទីផ្សារធម្មតាទៅទៀត។

តម្លៃដីនៅខេត្តព្រះសីហនុបានធ្លាក់ចុះច្រើនជាអនេកប្រមាណ ៣០% រីតម្លៃជួលវិញក៏ចុះថោក។ យោងតាមរបាយការណ៍ឧស្សាហកម្មបានឱ្យដឹងថា កាលពីឆ្នាំ២០១៩ តម្លៃជួលផ្ទះអាចហក់ឡើងដល់ទៅ ៨០០ ដុល្លារក្នុងមួយខែ ដែលបច្ចុប្បន្នមួយខែបានតម្លៃត្រឹម ២០០ដុល្លារប៉ុណ្ណោះ។

អ្នកវិភាគមួយចំនួនបានគូសបញ្ជាក់ថា តម្លៃធ្លាក់ចុះគឺបណ្តាលមកពីកំណែទីផ្សារ ថ្វីត្បិតតែធ្លាក់ក៏ពិតមែន ប៉ុន្តែវិស័យអចនទ្រព្យនិងសំណង់មិនដួលរលំក្រោយសម្ពាធនៃការធ្លាក់ចុះតម្លៃឡើយ។

សហព័ន្ធសមាគមពាណិជ្ជកម្មខេត្តព្រះសីហនុដែលជាក្រុមអ្នកជំនួញជនជាតិចិនបានប៉ាន់ប្រមាណថាបរិមាណនៃការជួលទ្រព្យសម្បត្តិពាណិជ្ជកម្មនៅខេត្តព្រះសីហនុបានធ្លាក់ចុះចំនួន ៨៥% និងការលក់ដីធ្លី ២៥%។ ជាមធ្យមផ្ទះចំនួន ៦០០ល្វែង ត្រូវបានជួល និង ២០ល្វែង បានទិញលក់ក្នុងមួយថ្ងៃ បើធៀបនឹងបច្ចុប្បន្ន ធ្លាក់ចុះមកត្រឹមក្រោម ២០ល្វែង និង ៩ល្វែងក្នុងមួយថ្ងៃ។

ប្រសិនបើតម្លៃអចលនៈទ្រព្យបន្តធ្លាក់ចុះក្នុងឆ្នាំ ២០២០ និងឆ្នាំ ២០២១ នោះវិស័យហិរញ្ញវត្ថុរបស់ប្រទេសកម្ពុជាអាចប្រឈមនឹងមានភាពតានតឹងខ្លះៗ។ សូម្បីតែក្រុមហ៊ុនអភិវឌ្ឍអចនទ្រព្យមួយចំនួនមានការព្រួយបារម្ភអំពីផលចំណេញនាពេលអនាគតផងដែរ ប្រសិនបើតម្លៃនៅតែបន្តធ្លាក់ចុះដូចជាពេលបច្ចុប្បន្នព្រោះពួកគេអាចនឹងជួបហានិភ័យហិរញ្ញវត្ថុ។

ក្រុមហ៊ុនប្រឹក្សាអចលនទ្រព្យសកលលោក CBRE ប្រចាំកម្ពុជា បានព្យាការណ៍ថា ទីផ្សារលំនៅដ្ឋាននឹងមានភាពនឹងនរក្នុងឆ្នាំ ២០២០។ យ៉ាងណាមិញភ័ស្តុតាងរួមបង្ហាញថា តម្លៃអចលនទ្រព្យក៏បានធ្លាក់ចុះផងដែរនៅក្នុងទីក្រុងដូចជា កំពតបាវិត និងរាជធានីភ្នំពេញ ទោះបីជាវាបានធ្លាក់ចុះយ៉ាងលឿននៅខេត្តព្រះសីហនុក៏ដោយ។

គម្រោងសាងសង់មួួយចំនួនត្រូវបានជាប់គាំងដោយគ្មានដំណើរការ ដោយទីតាំងមួយចំនួនបានសាងសង់ហើយបានពាក់កណ្តាលនៃគម្រោង។ ចំណែកឯហេដ្ឋារចនាសម្ព័ន្ធផ្លូវថ្នល់វិញរងនូវការខូចខាតដោយសារការស្ថាបនាអចនទ្រព្យទាំងនោះ៕

ដោយ ៖ រ៉ាណេត

ភ្នំពេញ ៖ ស្ថិតនៅក្នុងស្ថានភាពដែលកំពុងតែមានការប្រកួតប្រជែងខ្លាំងនៅលើទីផ្សារអចលនទ្រព្យកម្ពុជា ក្រុមហ៊ុនភ្នាក់ងារអចលនទ្រព្យលំដាប់អន្តរជាតិធំៗចំនួន២ គឺក្រុមហ៊ុនភ្នាក់ងារអចលនទ្រព្យអន្តរជាតិ CBRE Cambodia និងក្រុមហ៊ុនភ្នាក់ងារអចលនទ្រព្យ LSCG Real Estate Co,.Ltd បានធ្វើការចុះអនុស្សារណៈយោគយល់គ្នា ដើម្បីពង្រីកទីផ្សារ និងពង្រឹងឧត្តមភាពនៅក្នុងវិស័យមួយនេះ។

អគ្គនាយកក្រុមហ៊ុនភ្នាក់ងារអចលនទ្រព្យ LSCG Real Estate Co., Ltd លោក លី សុខឆាយ បានមានប្រសាសន៍ថា បច្ចុប្បន្ននេះ វិស័យអចលនទ្រព្យនៅកម្ពុជាកំពុងតែមានសន្ទុះលើការអភិវឌ្ឍយ៉ាងខ្លាំង ដែលធ្វើក្រុមហ៊ុនពាក់ព័ន្ធនៅក្នុងវិស័យមួយនេះកើតមានយ៉ាងច្រើន និងចូលមកប្រកួតប្រជែងនៅក្នុងទីផ្សាររួម។

លោកបានមានប្រសាសន៍បញ្ជាក់ថា “នៅក្នុងចំណោមក្រុមហ៊ុនទាំងអស់ដែលកំពុងតែមានប្រតិបត្តិការនៅក្នុងទីផ្សារអចលនទ្រព្យមួយនេះគឺមានច្រើនប្រភេទ មានទាំងក្រុមហ៊ុនក្នុងស្រុក និងក្រុមហ៊ុនលំដាប់អន្តរជាតិ ជាក់ស្ដែងដូចជាក្រុមហ៊ុនភ្នាក់ងារអចលនទ្រព្យ CBRE Cambodia ដែលខ្ញុំទើបតែបានព្រមព្រៀងចុះអនុស្សារណៈយោគយល់គ្នាក្នុងនាមជាក្រុមហ៊ុនសហការជាដៃគូ”។ លោកបានបន្តទៀតថា “គោលដៅកិច្ចចុះកិច្ចព្រមព្រៀងរវាងក្រុមហ៊ុនទាំង២នេះ គែដោយសារតែយើងបានសម្លឹងឃើញពីវិសាលភាព និងផលប្រយោជន៍ជាច្រើនដែលអាចទទួលបានពីកិច្ចការធ្វើរួមគ្នាលើផ្ដល់ជូននូវសេវាកម្ម ទិញ-លក់ ជួល និងប្រឹក្សាទៅដល់អតិថិជនប្រកបដោយប្រសិទ្ធភាពខ្ពស់ ជាពិសេស ពង្រីកឧត្តមភាពរបស់ក្រុមហ៊ុនទាំង២ឱ្យកាន់តែខ្លាំងនៅក្នុងទីផ្សារអចលនទ្រព្យកម្ពុជា”។

នាយិកាប្រចាំប្រទេសក្រុមហ៊ុន CBRE Cambodia លោកស្រី អាន សុធីតា បានមានប្រសាសន៍ផងដែរថា “មុនពេលធ្វើការសម្រេចចុះកិច្ចព្រមព្រៀងជាដៃគូ គឺពួកយើងបានធ្វើការសិក្សាពីប្រវត្តិក្រុមហ៊ុនទៅវិញទៅមក និងបានស្គាល់ច្បាស់ពីលទ្ធភាព ឧត្តមភាពរបស់ក្រុមហ៊ុន”។ លោកស្រីបានបន្តទៀតថា “យើងបើកទូលាយក្នុងការចាប់យកដៃគូសហការជាមួយគ្នា ព្រោះជាធម្មតាក្នុងនាមជាអ្នករកស៊ីនៅក្នុងវិស័យអចលនទ្រព្យដូចគ្នា មិនថាក្រុមហ៊ិនបរទេស ឬក្នុងស្រុកនោះទេ ត្រូវតែសហការគ្នា ដើម្បីជំរុញទីផ្សារឱ្យទៅមុខ ក៏ដូចជាជំរុញឱ្យមានការវិនិយោគនៅក្នុងប្រទេសឱ្យបានកាន់តែច្រើន” ។​