ដោយវុត្ថា

បាត់ដំបងៈ លោក Aoki Tabashz តំណាងឱ្យក្រុមហ៊ុនជប៉ុនផលិតអំពូលភ្លើងក្នុងប្រទេសកម្ពុជា បានស្នើសុំរដ្ឋបាលខេត្តបាត់ដំបង ចូលរួមវិនិយោគឱ្យមានការប្រើប្រាស់ប្រព័ន្ធLED នៅក្នុងខេត្ត ដើម្បីទាក់ទាញការវិនិយោគ និងទេសចរណ៍។

លោក Aoki Tabashz នៅក្នុងជំនួបជាមួយ លោក សឿម ប៊ុនរិទ្ធិ អភិបាលរង នៃគណៈអភិបាលខេត្តបាត់ដំបងកាលពីពេលថ្មីៗនេះឱ្យដឹងថា ទក្រុមហ៊ុនជប៉ុនផលិតអំពូលភ្លើងក្នុងស្រុក ដែលផលិត និងជាស្នាដៃរបស់កូនខ្មែរសម្រាប់បំរើ ដល់ប្រជាពលរដ្ឋ និងនៅតាមបណ្តាខេត្តនានារបស់កម្ពុជា។

លោក សឿម ប៊ុនរិទ្ធិ អភិបាលរង នៃគណៈអភិបាលខេត្តបាត់ដំបងបានសម្តែងការស្វាគមន៍ ចំពោះក្រុមហ៊ុនផលិតអំពូលភ្លើងក្នុងស្រុករបសជប៉ុន ដែលជាស្នាដៃកូនខ្មែរ ក្នុងការផលិតផល និងមានបច្ចេកទេសខ្ពស់ជួយសន្សុំសំចៃថវិកា ដោយប្រើប្រាស់ប្រព័ន្ធ LED និងមានបច្ចេកវិទ្យាខ្ពស់ផង ហើយម៉្យាងវិញទៀតជាផលិតផលក្នុងស្រុកផងដែរ។

លោកបានបន្តទៀតថា “រដ្ឋបាលខេត្តបាត់ដំបង បានជាប់កុងត្រាជាមួយក្រុមហ៊ុនមួយទៀតដែលជួយរៀបចំបំភ្លឺផ្លូវសាធារណៈ ដូច្នេះលោកនឹងធ្វើការរាយការណ៍ជូនអភិបា​លខេត្ត ដើម្បីស្នើសុំគោលការណ៍ និងលើកជាយោបល់ជូនឯកឧត្តម ដើម្បីធ្វើការពិនិត្យ និងគ្រោងថវិកាសម្រាប់អនុវត្តក្នុងឆ្នាំណាមួយផងដែរ”។

ខេត្តបាត់ដំបង គឺជាខេត្តដែលមានសក្តានុពលសេដ្ឋកិច្ច ពាណិជ្ជកម្ម ទេសចរណ៍ វិនិយោគ កសិកម្មរបស់កម្ពុជា និងជាខេត្តគោលដៅរបស់រាជរដ្ឋាភិបាល ដាក់ចូលជាទីក្រុងវៃឆ្លាត (Smart City) ក្នុងចំណោមក្រុងផ្សេងទៀត៕

ដោយគង់ សូរិយា

ភ្នំពេញៈ ទេសរដ្ឋមន្រ្តី រដ្ឋមន្រ្តីក្រសួងសាធារណៈការ និងដឹកជញ្ជូនបានពិភាក្សាជាមួយតំណាងទីភ្នាក់ងារអភិវឌ្ឍន៍អង្គការសហប្រជាតិជាតិ(UN) ដើម្បីឈានទៅរៀបចំ គោលនយោបាយជាតិដឹកជញ្ជូនផ្លូវគោក។

ក្នុងជំនួបពិភាក្សាការងារជាមួយលោកNick Beresford តំណាងកម្មវិធីអភិវឌ្ឍន៍សហប្រជាជាតិ ដែលមាននិវេសនដ្ឋានប្រចាំកម្ពុជា លោកទេសរដ្ឋមន្រ្តី បានផ្តោតជា សំខាន់លើដំណើរការរៀបចំ គោលនយោបាយជាតិដឹកជញ្ជូនផ្លូវគោក ការអភិវឌ្ឍវិស័យដឹកជញ្ជូន បញ្ហាប្រឈម និងដំណោះស្រាយចំពោះគ្រោះថ្នាក់ចរាចរណ៍នៅកម្ពុជា ការលើកកម្ពស់ប្រព័ន្ធភស្តុភារកម្ម ការអភិវឌ្ឍច្រករបៀងសេដ្ឋកិច្ចសំខាន់ៗ រួមមាន ច្រកទ្វារព្រំដែនអន្តរជាតិបាវិត-ម៉ុកបៃ និងច្រកទ្វារព្រំដែនអន្តរជាតិស្ទឹងបត់-បានណងអៀន ដើម្បីបង្កើនភាពប្រកួតប្រជែងក្នុងតំបន់ និងពិភពលោកផងដែរ។

លោកទេសរដ្ឋមន្ត្រីស៊ុន ចាន់ថុល បានជម្រាបជូនភ្ញៀវអំពីគម្រោង បំពាក់ជញ្ជីងស្វ័យប្រវត្តិ (Weight in Motion) និងកាមេរ៉ាឆ្លាតវៃ (AI Camera) តាមដានយានយន្តចូល និងមិនចូលស្ថានីយថ្លឹង រថយន្តដឹកជញ្ជូនលើសទម្ងន់កម្រិតកំណត់ ដើម្បីជូនដំណឹ​ងទៅសមត្ថកិច្ចពាក់ព័ន្ធដោយស្វ័យប្រវត្តិដើម្បីចាត់វិធានការ។

ជាមួយគ្នានេះផងដែរ លោកទេសរដ្ឋមន្ត្រី បានប្រសាសន៍ថា ក្រសួងនឹងរៀបចំប្រព័ន្ធអនឡាញ ដើម្បីឱ្យក្រុមហ៊ុន រោងចក្រ សហគ្រាស អាចរាយការណ៍ជាប្រចាំមកកាន់គណៈកម្មាធិការជាតិសុវត្ថិភាពចរាចរណ៍ផ្លូវគោក អំពីសកម្មភាពបណ្តុះបណ្តាលអប់រំផ្សព្វផ្សាយដល់បុគ្គលិក កម្មករ និយោជិតរបស់ខ្លួន អំពីច្បាប់ចរាចរណ៍ផ្លូវគោក៕

ដោយៈ រ៉ាណេត

ភ្នំពេញៈ ដោយភាពប្រឈមទៅនឹងកង្វះខាតវត្ថុធាតុដើម ដែលផ្គត់ផ្គង់ដោយប្រទេសចិន បានធ្វើឱ្យបណ្តារោងចក្រជាច្រើន ដែលដំណើរការនៅកម្ពុជាបង្ខំចិត្តបិទទ្វារផ្អាកជាបណ្តោះអាសន្ន ខណៈដែលសញ្ញានៃការផ្គត់ផ្គង់វត្ថុធាតុដើម ចាប់ផ្តើមបង្ហាញសញ្ញាល្អវិញជាបណ្ដើរៗ។

ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានគយ និងរដ្ឋាករ លោក គុណ ញឹម បានលើកឡើងនៅក្នុងសន្និសីទសារព័ត៌មានស្ដីពី វឌ្ឍនភាព និងទិសដៅបន្ដរបស់ក្រសួងសេដ្ឋកិច្ច និងហរិញ្ញវត្ថុ ដែលរៀបចំដោយអង្គភាពអ្នកនាំពាក្យរាជរដ្ឋាភិបាលកម្ពុជា នៅព្រឹកថ្ងៃទី៥ ខែមីនា ឆ្នាំ២០២០នេះថា បន្ទាប់ពីជួបបញ្ហាប្រឈមរហូតបិទទ្វារជាបណ្តោះអាសន្ននោះ ពេលនេះសញ្ញាល្អនៃការនាំយកវត្ថុធាតុដើមសម្រាប់វិស័យរោងចក្រចាប់ផ្តើមបង្ហាញជាបណ្តើរៗហើយ។

លោកបានបន្តថា “សញ្ញាល្អនៃការផ្គត់ផ្គង់វត្ថុធាតុដើម ដែលអគ្គនាយកដ្ឋានគយមិនប្រមូលចំណូលសម្រាប់វិស័យកាត់ដេរ ពន្ធអាករបន្ទុករដ្ឋទាំងអស់កត់សម្គាល់ថា ឃើញងើបឡើងវិញ”។ លោកបន្ថែមថា “ទន្ទឹមនោះ ទំនិញដែលនាំចូលមកជាលក្ខណៈពាណិជ្ជកម្ម ដើម្បីយកមកលក់នៅក្នុងទីផ្សារក្នុងស្រុក ក៏ចាប់ផ្ដើមងើបឡើងវិញបន្ដិចផងដែរ។ ចឹង នេះជាសញ្ញាល្អ ដែលយើងនឹងតាមដានបន្តទៀត”។

គិតត្រឹមដើមសប្ដាហ៍កន្លងទៅនេះ មានរោងចក្រកាត់ដេរមួយចំនួនដែលអាស្រ័យលើការផ្គត់ផ្គង់វត្ថុធាតុដើម នាំយកមកពីប្រទេសចិន បានបិទទ្វារបណ្តោះអាសន្នជាបន្តបន្ទាប់ ដែលបណ្តាលឱ្យកម្មករ-កម្មការិនីប្រមាណ១៨,០០០នាក់ បាត់បង់ការងារ ជាមួយនឹងការព្យាករណ៍ថា នៅមានរោងចក្រច្រើនជាង២០០ទៀតដែលរងនូវផលប៉ះពាល់។

លោកគុណ ញឹម បានមានប្រសាសន៍ថា ជាការជួយសម្រួល និងដោះស្រាយបញ្ហាប្រឈមរបស់វិស័យរោងចក្រ អគ្គនាយកដ្ឋានគយ នៅកំពង់ផែអន្ដរជាតិខេត្តព្រះសីហនុ នៅពេលនេះ ធ្វើការមិនកំណត់ពេលនោះទេ ពោលប្រសិនបើទំនិញមកដល់ម៉ោង១២ ឬម៉ោង១រំលងអធ្រាត្រ ក៏ត្រូវបំពេញបែបបទបញ្ជូនចេញដែរ មិនអាចពន្យាពេលបាននោះទេ ដើម្បីសម្រួលដល់រោងចក្រដែលកំពុងកង្វះវត្ថុធាតុដើម៕

ដោយ ប៊ី

ភ្នំពេញ៖ គ្រឹះស្ថានហិរញ្ញវត្ថុអភិវឌ្ឍន៍អាល្លឺម៉ង់ Deutsche Investitions- und Entwicklungsgesellschaft (DEG) បានផ្តល់ប្រាក់កម្ចីចំនួន ១៨ លានដុល្លារ ដល់ ហត្ថាកសិករលីមីតធីតដែលជាគ្រឹះស្ថានមីក្រូហិរញ្ញវត្ថុ មានទទួលប្រាក់បញ្ញើ។ នេះបើយោងតាមការបង្ហាញ DEG។

យោងតាម DEG ប្រាក់កម្ចីនេះនឹងជួយ គ្រឹះស្ថានមីក្រូហិរញ្ញវត្ថុហត្ថាកសិករផ្តល់មូលនិធិដល់ក្រុមហ៊ុន MSMEs នៅក្នុងប្រទេសកម្ពុជាដែលវិស័យហិរញ្ញវត្ថុនៅមិនទាន់មានការអភិវឌ្ឍនៅឡើយ ជាពិសេសនៅតំបន់ជនបទ ការទទួលបានហិរញ្ញវត្ថុគឺមិនគ្រប់គ្រាន់ទេ។ DEG មានតួនាទីជាអ្នកផ្តល់ប្រាក់កម្ចីរយៈពេលវែង។

យោងតាមព័ត៌មានដែលមាននៅលើគេហទំព័ររបស់ខ្លួនបានឱ្យដឹងថា ប្រតិបត្តិការនេះរួមចំណែកដល់យុទ្ធសាស្រ្តរបស់យើងក្នុងការគាំទ្រដល់ក្រុមហ៊ុន MSME។

ការវិនិយោគនេះគឺជាការលាយបញ្ចូលគ្នារវាងភាគហ៊ុនឯកជន ការវិនិយោគរួមគ្នា និងការផ្តល់ហិរញ្ញប្បទានបំណុល។ កាលពីខែកក្កដាឆ្នាំមុន DEG បានផ្តល់ប្រាក់កម្ចីរយៈពេលវែង ២០ លានដុល្លារអាមេរិកដល់ធនាគារអេស៊ីលីដាដែលជាអង្គការក្រៅរដ្ឋាភិបាលសម្រាប់ការអភិវឌ្ឍ និងផ្តល់ឥណទានសហគ្រាសខ្នាតតូចនិងមធ្យមនៅកម្ពុជា។

គ្រឹះស្ថានមីក្រូហិរញ្ញវត្ថុហត្ថាកសិករ ដែលបង្កើតឡើងក្នុងឆ្នាំ ១៩៩៤ ជាបុត្រសម្ព័ន្ធរបស់ធនាគារអយុធ្យា (ក្រុងស្រី) ដែលជាធនាគារពាណិជ្ជកម្មធំជាងគេទី ៥ នៅប្រទេសថៃ និងជាសមាជិកនៃធនាគារ MUFG ដែលជាក្រុមធនាគារធំជាងគេនៅប្រទេសជប៉ុន។ នៅឆ្នាំ ២០០១ ហត្ថាកសិករទទួលបានអាជ្ញាប័ណ្ណធ្វើប្រតិបត្តិការជាក្រុមហ៊ុនមានកំណត់ក្នុងការផ្តល់សេវាឥណទាន និងសន្សំ ហើយបានប្រែក្លាយជាគ្រឹះស្ថានទទួលប្រាក់កម្ចីមីក្រូហិរញ្ញវត្ថុក្នុងឆ្នាំ ២០១០។

បច្ចុប្បន្ន ក្រុមហ៊ុនមានមូលដ្ឋាននៅភ្នំពេញកំពុងផ្តល់សេវាកម្មហិរញ្ញវត្ថុចម្រុះដល់អាជីវកម្មខ្នាតតូច និងអតិថិជនខ្នាតតូច ដូចជាប្រាក់កម្ចីអាជីវកម្មខ្នាតតូច សហគ្រាសខ្នាតតូច និងមធ្យម ឥណទានគេហដ្ឋាន ប្រាក់កម្ចីកែលម្អគេហដ្ឋាន សន្សំ និងដាក់ប្រាក់ផ្ទេរប្រាក់ និងសេវាកម្មហិរញ្ញវត្ថុផ្សេងទៀត។

នៅឆ្នាំ ២០១៨ ហត្ថាកសិករក៏ទទួលបានទឹកប្រាក់ ២០ លានដុល្លារជារូបិយប័ណ្ណក្នុងស្រុកក្នុងមូលបត្របំណុលពីសាជីវកម្មហិរញ្ញវត្ថុអន្តរជាតិ (IFC) ដែលជាផ្នែកមួយនៃក្រុមធនាគារពិភពលោក។ គម្រោងនេះព្យាយាមកសាងសមត្ថភាពរបស់ហត្ថាកសិករដើម្បីបង្កើនហិរញ្ញប្បទានរូបិយប័ណ្ណក្នុងស្រុក។ Deal Street Asia/DEG

ដោយ ហ្សូលី

ភ្នំពេញ៖ គម្រោងអភិវឌ្ឍផ្លូវជាតិសំខាន់ៗមួយចំនួននៅក្នុងប្រទេសកម្ពុជាដែលមានតម្លៃរាប់លានដុល្លារ ត្រៀមបើកការដ្ឋានសាងសង់នៅពេលឆាប់ៗខាងមុខនេះ។

ផែនការអភិវឌ្ឍផ្លូវជាតិនោះមានដូចជា ទីមួយគឺ ផ្លូវជាតិលេខ ៤១ ចាប់ពីផ្លូវជាតិលេខ ៤រហូតដល់ផ្លូវជាតិលេខ៣ ដែលជាផ្លូវដ៏មានសារៈសំខាន់ក្នុងការទាក់ទាញលើការវិនិយោគដូចជា គម្រោងរោងចក្រ សហគ្រាស សិប្បកម្ម ឃ្លាំង គម្រោងដីឡូតិ៍ និងគម្រោងអភិវឌ្ឍលើវិស័យលំនៅដ្ឋានតម្លៃកម្រិតមធ្យមនិងក្រោមមធ្យម។

ទី២ គឺ ផ្លូវជាតិលេខ ៧១សេ ចាប់ពីក្រុងសួងរហូតដល់ចំការលើ ដែលមានប្រវែង១១០គីឡូម៉ែត្រ ធ្លាប់ត្រូវបានរងគ្រោះដោយសារគ្រោះទឹកជំនន់ និងសិក្សាដោយក្រុមហ៊ុនសៀងហៃ។

មួយទៀត គឺផ្លូវជាតិលេខ ៥០ ចាប់ពីខេត្តកំពង់ឆ្នាំងរហូតដល់ខេត្តកំពង់ធំ ដែលជាសរសៃឈាមដ៏សំខាន់រវាងខេត្តទាំងពីរ និងជាប្រយោជន៍សេដ្ឋកិច្ចជាតិមួយផ្នែកផងដែរ។

គម្រោងអភិវឌ្ឍផ្សេងបន្ថែមទៀតនោះគឺមានផ្លូវជាតិលេខ ៧១ ចាប់ពីត្រើងរហូតដល់កំពង់ថ្ម (ចាប់ពីផ្លូវជាតិលេខ៧រហូតដល់ផ្លូវជាតិលេខ៦ និងផ្លូវជាតិលេខ១៤៨បេ ចាប់ពីផ្លូវជាតិលេខ៤ រហូតដល់កំពង់ផែស្វយ័តក្រុងព្រះសីហនុ។

ផ្លូវជាតិទាំងអស់នេះនឹងត្រូវធ្វើឱ្យប្រសើរឡើងនូវហេដ្ឋារចនាសម្ព័ន្ធដឹកជញ្ជូនដើម្បីលើកកម្ពស់សេដ្ឋកិច្ចជាតិ និងការតភ្ជាប់ ពង្រឹងសុវត្ថិភាពចរាចរណ៍ផ្លូវគោក កាត់បន្ថយការចំណាយលើការដឹកជញ្ជូន/ភស្តុភារ និងចូលរួមចំណែកនៅក្នុងការសម្រួលដល់ការធ្វើដំណើររបស់ប្រជាពលរដ្ឋ៕

ដោយ ហ្សូលី

ភ្នំពេញ៖ មូលនិធិរូបិយវត្ថុអន្តរជាតិ (IMF) បានផ្តល់ហិរញ្ញប្បទានចំនួន ១០ពាន់លានដុល្លារ ទៅដល់បណ្តារប្រទេសដែលមានប្រាក់ចំណូលទាប ក្នុងគោលបំណងជួយទប់ស្កាត់ផលប៉ះពាល់សេដ្ឋកិច្ច ដោយសារការវាយលុកនៃវីរុសកូរ៉ូណាធ្ងន់ធ្ងរ។

នាយកគ្រប់គ្រងមូលនិធិរូបិយវត្ថុអន្តរជាតិ (IMF) លោកស្រី Kristalina Georgina បានប្រកាសកាលពីថ្ងៃទី ០៤ មីនា ឆ្នាំ២០២០ ម្សិលមិញ ក្នុងសន្និសិទសារព័ត៌មានមួយនៅទីក្រុងវ៉ាស៊ីនតោន សហរដ្ឋអាមេរិក ដោយមានការចូលរួមពីប្រធានធនាគារពិភពលោក (World Bank) ផងដែរ។

មូលនិធិបានរៀបចំគោលនយោបាយនិងសន្យាថាផ្តល់ការគាំទ្រជាចាំបាច់ដើម្បីកាត់បន្ថយផលប៉ះពាល់សេដ្ឋកិច្ចនិងហិរញ្ញវត្ថុ ដោយផ្តល់ហិរញ្ញប្បទានបន្ទាន់របស់ខ្លួនជូនទៅប្រទេសដែលមានប្រាក់ចំណូលទាបចំនួន ១០ពាន់លានដុល្លារ។

លោកស្រី Kristalina បានមានប្រសាសន៍ថា «ខ្ញុំមានការព្រួយបារម្ភខ្លាំង ជាពិសេសចំពោះសមាជិកដែលមានប្រាក់ចំណូលទាបនិងងាយរងគ្រោះ នូវការប៉ះទង្គិចសេដ្ឋកិច្ច និងការកើនឡើងនៃមនុស្សឆ្លងវីរុសកូរ៉ូណានេះ។»

យោងតាមលោកស្រីបានឱ្យដឹងទៀតថា សម្រាប់ប្រទេសដែលមានប្រាក់ចំណូលទាប IMF បានផ្តល់ហិរញ្ញប្បទានបន្ទាន់ (៥០ភាគរយ នៃកូតាសមាជិកដែលមានសិទ្ធិទទួលបាន) ដែលអាចទទួលបានដោយមិនចាំបាច់មានកម្មវិធី IMF ពេញលេញ។

កាលពីខែមករា IMF បានព្យាករណ៍ថា កំណើនសេដ្ឋកិច្ចពិភពលោកនឹងកើនឡើងពី ២,៩ភាគរយ កាលពីឆ្នាំមុន ដល់ ៣,៣ភាគរយនៅក្នុងឆ្នាំនេះ។ បន្ទាប់មកនៅក្នុងខែកុម្ភៈ បានកែសម្រួលថា កំណើនសេដ្ឋកិច្ចពិភពលោកឆ្នាំ ២០២០ មានត្រឹម ៣,២ភាគរយប៉ុណ្ណោះ៕

(Xinhua News)

ដោយៈរ៉ាណេត

ភ្នំពេញៈ ក្រសួងសេដ្ឋកិច្ច និងហិរញ្ញវត្ថុ បានត្រៀមកញ្ចប់ថវិកាចំនួន៣០លានដុល្លារ សម្រាប់វិធានការការពារមេរោគឆ្លងនានា ជាពិសេសវីរុសCovid-19 ដែលកំពុងរាតត្បាតនៅលើសាកលលោកក្នុងរយៈពេល៦ខែ។

យោងតាមសេចក្ដីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ ស្តីពីលទ្ធផលនៃកិច្ចប្រជុំ ក្រុមការងារផ្នែកនីតិកម្ម ពន្ធដារ និងអភិបាលកិច្ច (ក្រុម ឃ) នៃវេទិការាជរដ្ឋាភិបាល-ផ្នែកឯកជន ដើម្បីបន្តពិនិត្យដោះស្រាយ បញ្ហារបស់វិស័យឯកជនបានបញ្ជាក់ថា ការរីករាលដាលនៃវីរុស Covid-19  នៅក្នុងពិភពលោក និងក្នុងតំបន់បានជះឥទ្ធិពលដល់សេដ្ឋកិច្ចកម្ពុជា។

ដោយឡែក ផ្នែកឯកជនបានស្នើសុំការផ្តល់ព័ត៌មាន វិធានការរបស់រដ្ឋាភិបាលលើបញ្ហានេះ ដូចជាការរៀបចំជាច្បាប់បទប្បញ្ញត្តិ និងគោលនយោបាយសម្រាប់ប្រយុទ្ធប្រ​ឆាំងនឹងវីរុស Covid-19 ប្រសិនបើវីរុសរីករាលដាលនៅប្រទេសកម្ពុជា និងផលប៉ះពាល់ដល់សេដ្ឋកិច្ចកម្ពុជា។

ឆ្លើយតបទៅនឹងបញ្ហានេះ ក្រសួងសុខាភិបាលបានចាត់វិធានការណ៍ លើកពីការការ​ពារការរីករាលដាលនៃវីរុស Covid-19 ព្រមទាំងគិតគូររកវិធានការជាប្រព័ន្ធ ដើម្បីទប់ស្កាត់បញ្ហានេះពីគ្រប់ក្រសួង ស្ថាប័នពាក់ព័ន្ធ តាមរយៈការរៀបចំផែនការយុទ្ធសាស្ត្រ វិធានការឆ្លើយតបបន្ទាន់ រៀបចំគោលការណ៍ណែនាំ ចុះធ្វើការផ្សព្វផ្សាយនៅហ្នឹងកន្លែង និងវិធានការអប់រំដល់ប្រជាពលរដ្ឋ ដើម្បីដោះស្រាយ និងបង្ការបញ្ហាដែលអាចកើតមានជាយថាហេតុឱ្យ បានទាន់ពេលវេលាក្នុងស្មារតីបុរេសកម្ម ក៏ដូចជាពង្រឹង និងបង្កើនធនធា​នបន្ថែម ទាំងផ្នែកគ្រូពេទ្យ សម្ភារៈពេទ្យ រៀបចំឧបករណ៍ស្គេនកម្តៅ ប្រព័ន្ធគ្រប់គ្រង និងភ្នាក់ងារចាំទទួលព័ត៌មាន ពាក់ព័ន្ធវីរុសតាមរយៈលេខទំនាក់ទំនង បន្ទាន់លេខ ១១៥ ព្រមទាំងពង្រឹងកិច្ចសហការជាមួយ អង្គការសុខភាពពិភពលោក (WHO) ជាដើម។

ជាមួយគ្នានេះ ក្រសួងសេដ្ឋកិច្ច និងហិរញ្ញវត្ថុ បាននិងកំពុងសហការជាមួយក្រសួងសុខាភិបាល និងដៃគូពាក់ព័ន្ធ ដើម្បីរៀបចំក្របខណ្ឌ រួមជាវិធានការ និងយន្តការជាកញ្ចប់ពាក់ព័ន្ធ នឹងការការពារវីរុសCovid-19 និងមេរោគឆ្លងនានា សម្រាប់រយៈពេល៦ខែ ដោយគ្រោងចំណាយថវិកាជាង៣០លានដុល្លារអាមរិក តាមរយៈការរៀបចំបង្កើតប្រព័ន្ធការពារ និងឧបករណ៍តាមដាន, រៀបចំទីកន្លែងដើម្បីទទួលដោះស្រាយ ក៏ដូចជាស្វែងរកអ្នកដែ​លមានលទ្ធភាពឆ្លងកុំឱ្យមានការរីករាលដាល សំដៅបង្ការ ការពារ និងព្យាបាលក្នុងករណីមានការឆ្លងវីរុស៕