ដោយ ៖ រ៉ាណេត

ភ្នំពេញ ៖ ការអភិវឌ្ឍវិស័យលំនៅដ្ឋានពីឯកជនបានក្លាយទៅជាចំណែកមួយយ៉ាងសំខាន់នៅក្នុងការជួយពង្រឹង និងពង្រីកភាពរីកចម្រើនរបស់ប្រទេសជាតិទាំងមូល ដែលក្នុងនោះក៏មានការចូលរួមអភិវឌ្ឍន៍ទៅលើហេដ្ឋារចនាសម្ព័ន្ធផងដែរ។

លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍នៅក្នុងពិធីសន្និបាតបូកសរុបលទ្ធផលការងារឆ្នាំ២០១៩និងលើកទិសដៅការងារសំរាប់ឆ្នាំ២០២០ កាលពីថ្ងៃទី៤ ខែមីនា ឆ្នាំ២០២០ថា នៅពេលបច្ចុប្បន្ននេះ គិតត្រឹមតែគម្រោងអភិវឌ្ឍន៍បុរីនៃវិស័យលំនៅដ្ឋានមានរហូតដល់ ៣២០ បុរី ខណៈដែលទុនវិនិយោគក្នុងវិស័យសំណង់គិតត្រឹមឆ្នាំ២០១៩ មានរហូតដល់ ១១ ០០០ លានដុល្លារ។

លោកឧបនាយករដ្ឋមន្ត្រីបានកោតសរសើរដល់អ្នកអភិវឌ្ឍន៍បុរីលំនៅស្ថានដែលបានកែច្នៃបុរីនិមួយៗអោយមានសោភណ្ឌភាពនិងរឹងមាំដែលអាចចូលរួមលើកកំពស់បរិស្ថានដោយបានរួមចំណែកបង្កើតផ្ទៃបៃតងសំដៅទប់ស្កាត់បំរែបំរួលអាកាសធាតុ។នៅក្នុងបុរីនិមួយៗយ៉ាងហោចណាស់ក៏មានហេដ្ឋារចនាសម្ព័ន្ធបង្កប់ក្រោមដីប្រវែង៥ទៅ៦km បើមិនមានការស្ថាបនាផ្លូវ លូ រឺភ្លើងបំភ្លឺទេនោះគឺមិនអាចងាយស្រួលលក់ដូរសម្រួលដល់ការរស់នៅរបស់អតិថិជននោះឡើយដូច្នេះយើងទទួលស្គាល់និងអោយតំលៃថានេះគឺជាការរួមចំណែកក្នុងការអភិវឌ្ឍទីក្រុងនិងទីប្រជុំជនដោយឯកឯងហើយវិស័យឯកជនគឺបានរួមចំណែកជាមួយនឹងរដ្ឋ។

លោកបានបញ្ជាក់ថា “យើងបានទទួលស្គាល់ថា ទីណាដែលមានបុរី គឺចាត់ទុកថាជាភូមិមួយ ជាបណ្តុំនៃសហគមន៍មួយដែលប្រជាពលរដ្ឋមានទុនដើម្បីទិញលំនៅស្ថានក្នុងបុរីដែលមានសន្តិសុខប្រចាំការ មានអ្នករៀបចំជួសជុលក្នុងការឆ្លើយតបជាមួយនឹងអតិថិជនរបស់ខ្លួនហើយសន្តិសុខនៅទីនោះត្រូវបានធានាដែលនេះក៏អាចនិយាយបានថាជាការរួមចំណែកនៅក្នុងការអភិវឌ្ឍភូមិឃុំមានសុវត្ថិភាព កាត់បន្ថយបាននូវក្តីកង្វល់រឺការភ័យខ្លាចរបស់ប្រជាពលរដ្ឋរាប់ពាន់គ្រួសារក្នុងបុរីនោះ។ ក្រៅពីនេះក៏យើងវាយតំលៃខ្ពស់ថាដោយសារការអភិវឌ្ឍបែបនេះហើយទើបយុវជនមានការងារធ្វើ បន្ថែមពីនេះចំពោះការអភិវឌ្ឍលំនៅស្ថានរបស់ម្ចាស់បុរីហាក់ដូចជាបានជួយរកការងារធ្វើអោយវិស្វករស្ថាបត្យករ អ្នកសិក្សាគំរោងប្លង់ផងដែរ”។

លោកឧបនាយករដ្ឋមន្ត្រីបានបញ្ជាក់ថា ក្រោមការដឹកនាំ និងចង្អុរបង្ហាញពីសម្តេចតេជោ ហ៊ុន សែន នាយករដ្ឋមន្ត្រីកម្ពុជា ក្នុងការគាំទ្រ និងបើកទូលាយដល់វិស័យឯកជនដែលជាគំនាស់សេដ្ឋកិច្ចបន្ថែមទៀត ដែលការផ្តល់ការគាំទ្រដល់វិស័យឯកជននេះ។ រាជរដ្ឋាភិបាលនឹងទទួលបានផលប្រយោជន៍មកវិញតាមរយះការបង់ពន្ធ ការលក់ដូរអចលនទ្រព្យជាដើម។ ជាមួយនេះលោកក៏បានកោតសរសើរដល់សហគ្រិនវ័យក្មេងដែលមានសេចក្តីក្លាហាន និងកិត្តិយសចំពោះការប្រកាសពន្ធដោយត្រឹមត្រូវប្រកបដោយឆន្ទះនិងមានមោទនភាពហើយរីករាយក្នុងការរួមចំណែកដោយមិនមានការលួចលាក់ពន្ធដែលសហគ្រិនវ័យក្មេងជំនាន់ថ្មីទាំងនេះជាធនធានមនុស្សក្រោមការបណ្តុះបណ្តាលរបស់រាជរដ្ឋាភិបាលដែលពួកគាត់មានសីលធម៌ខ្ពស់ និងវិជ្ជាជីវៈពិតប្រាកដ៕

ដោយៈ រ៉ាណេត

ភ្នំពេញៈ ប្រធានសមាគមអ្នកអភិវឌ្ឈន៍លំនៅដ្ឋានកម្ពុជាលោកឧកញ៉ាលី ហួរបានមានប្រសាសន៍ថា  សំណង់លំនៅស្ថាន នៅតែជាតម្រូវការយ៉ាងខ្ពស់ទៅថ្ងៃអនាគត ដូច្នេះសមាគមក៏ត្រូវតែបន្តការខិតខំទៅមុខយូរអង្វែង និងបន្តពង្រីកសក្តានុពលរបស់ខ្លួនឈរលើចក្ខុវិស័យនិងទិសដៅវែងឆ្ងាយ ក្នុងការចូលរួមជាមួយរាជរដ្ឋាភិបាលកម្ពុជា។

លោកឧកញ៉ាលី ហួរបានមានប្រ​សា​សន៍ នៅក្នុងពិធីសន្និបាតបូកសរុបលទ្ធផលការងារឆ្នាំ២០១៩ និងលើកទិសដៅការងារសំរាប់ឆ្នាំ២០២០កាលពីថ្ងៃទី៤ មិនាកន្លងមកថា បច្ចុប្បន្នសមាគមរបស់លោក មានសមាជិកសរុប៥៨ក្រុមហ៊ុន សុទ្ធសឹងជាក្រុមហ៊ុនអភិវឌ្ឍលំនៅឋាន និងមានការគាំទ្រយ៉ាងពេញទំហឹង ពីអ្នកវិនិយោគលើវិស័យអចលនទ្រព្យជាតិ និងអន្តរជាតិព្រមទាំងរដ្ឋាភិបាលកម្ពុជាផងដែរ។

លោកឧកញ៉ាបានបន្តទៀតថា សមាគមមានទស្សនវិស័យមួយទៀត គឺលើកកំពស់ស្តង់ដាវិស័យអចលនទ្រព្យនៅកម្ពុជាអោយកាន់តែខ្ពស់ ដោយមិនមែនផ្តោតសំខាន់លើតែសំណង់លំនៅស្ថាន រឺបុរីប៉ុណ្ណោះទេតែក៏ផ្តោតលើអគារខុនដូ មជ្ឈមណ្ឌលពាណិជ្ជកម្ម អគារទំនើបខ្ពស់ៗជាសំខាន់ព្រោះថា អគារខ្ពស់ៗទាំងនោះគឺជាប៉ូលដ៏សំខាន់ នៃទំនាក់ទំនងសេដ្ឋកិច្ច ពាណិជ្ជកម្មកម្ពុជា ជាមួយពាណិជ្ជកម្មអន្តរជាតិ និងដើរតួនាទីយ៉ាងសំខាន់ក្នុងការធ្វើសេវាពាណិជ្ជកម្មអន្តរជាតិ ព្រមទាំងចូលរួមចំណែកលើកស្ទួយកំណើនសេដ្ឋកិច្ចជាតិផងដែរ។

លោកឧកញ៉ាលី ហួរបានបន្តថា ឈរលើភាពរីកចំរើននៃវិស័យអភិវឌ្ឍលំនៅស្ថានឥតឈប់ឈរ ដែលជាផ្នែកមួយនៃឆ្អឹងខ្នងសេដ្ឋកិច្ចជាតិនោះ សមាគមបានរួមចំណែកអភិវឌ្ឍវិស័យអចលនទ្រព្យមិនថា នៅរាជធានីភ្នំពេញទេ សូម្បីតែនៅតាមបណ្តាខេត្តផងដែរ ដោយបានប្រែក្លាយដី អោយមានតំលៃពោរពេញទៅដោយសំណង់អគារទំនើប បុរីលំនៅស្ថាន មជ្ឈមណ្ឌលពាណិជ្ជកម្ម  អគារការិយាល័យ ផ្សារទំនើបនិងសំណង់បែបទំនើបៗមានបណ្តាញហេដ្ឋារចនាសម្ព័ន្ធ បណ្តាញផ្លូវ បណ្តាញទឹកនិងមានប្រព័ន្ធអគ្គិសនី លើកកំពស់ជីវភាពរស់នៅរបស់ប្រជាពលរដ្ឋ បានសមរម្យផ្តល់អោយពួកគាត់មានការងារធ្វើ រួមចំណែកជួយដល់រាជរដ្ឋាភិបាលតាមរយះការបង់ពន្ធ ជម្រុញកំណើនសេដ្ឋកិច្ចជាតិនិងលើកកំពស់កិត្តិយសកិត្យានុភាពជាតិកម្ពុជា ចំពោះអន្តរជាតិផងដែរក្រោមការដឹកនាំរបស់សម្តេចអគ្គមហាសេនាបតីតេជោហ៊ុន សែននាយករដ្ឋមន្រ្តីនៃកម្ពុជា ដែលអន្តរជាតិទទួលស្គាល់ថា កម្ពុជាមានសន្តិភាពស្ថេរភាព និងការអភិវឌ្ឍលើគ្រប់វិស័យគួរជាទីមោទនៈ។

លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ បានកត់សម្គាល់ថា វិស័យអចលនវត្ថុជាវិស័យមួយដែលជំរុញសេដ្ឋកិច្ចជាតិក្នុងឆ្នាំ២០១៩ ដោយក្នុងនោះឃើញមានការវិនិយោគលើវិស័យនេះ ក្នុងព្រះរាជាណាចក្រកម្ពុជាមានរហូតដល់១១,០០០លានដុល្លារសហរដ្ឋអាមេរិកក្នុងឆ្នាំ២០១៩ បើប្រៀបធៀបនឹងឆ្នាំ២០១៨ មានទំហំទុនវិនិយោគតែ៥៥០០លានដុល្លារ សហរដ្ឋអាមេរិកប៉ុ​ណ្ណោះ គឺមានការកើនឡើងរហូតដល់៩០ភាគរយ។

ការវិវត្តរីកចម្រើននៃវិស័យសំណង់ស្រប នឹងឱកាសដែលសមាគមអ្នកអភិវឌ្ឍន៍លំនៅស្ថានកម្ពុជា បានរៀបចំសន្និបាតបូកសរុបលទ្ធផលការងាររបស់ខ្លួននេះ ក៏អាចនិយាយបានថា នេះគឺជាការផ្លាស់ប្តូរនូវបទពិសោធន៍កម្រិតជំនាញ ការយល់ដឹងនិងគិតគូរអំពីគំនិតយោបល់សំរាប់ជំរុញនូវការអភិវឌ្ឍ បើគ្មានការរៀបចំបូកសរុបលទ្ធផលការ​ងារប្រចាំឆ្នាំទេ នោះវាមិនបានចងក្រងជាដុំឯកភាពគ្នាតែមួយ ហើយនេះក៏ជាផែនមួយសំរាប់ផ្លាស់ប្តូរបទពិសោធន៍គ្នាទៅវិញ ទៅមកដែលកាលពីមុនយើង នៅដាច់ដោយឡែកពីគ្នាហើយទុន ក៏នៅមានការខ្វះចន្លោះមិនទាន់គ្រប់គ្រាន់ ក្រោយពេលដែលយើងមានបទពិសោធន៍ និងរកបានដៃគូហើយនោះរហូតមកទល់ពេលនេះ យើងឃើញថាការវិវត្តន៍រីកចំរើន មានកំណើនកាន់តែកើនឡើងថែមទៀត ដោយបច្ចុប្បន្នមានសំណង់លំនៅដ្ឋានល្អទំនើបខ្ពស់ៗ រីឯសំណង់បុរីមានរហូតដល់៣២០បុរី ដែលកាលពីមុនមិនមានបុរីបែបនេះឡើយ៕

ដោយ ហ្សូលី

សិង្ហបុរីៈ ក្រុមហ៊ុនCBREបានបង្ហាញសញ្ញាសុទិដ្ឋិនិយមថា ទីផ្សារអចលនទ្រព្យរបស់ប្រទេសសឹង្ហបូរីនៅតែអាចទ្រទ្រង់បាន ទោះបីមានម៉ាក្រូសេដ្ឋកិច្ចមិនល្អក៏ដោយ។ នេះត្រូវបានគូសបញ្ជាក់នៅក្នុងរបាយការណ៍របស់ CBRE“ ទស្សនវិស័យទីផ្សារអចលនទ្រព្យ២០២០សិង្ហបុរី” ដែលផ្តល់ការព្យាករណ៍សម្រាប់វិស័យអចលនទ្រព្យ លំនៅដ្ឋាន ការិយាល័យលក់រាយភ័ស្តុភារ និងទីផ្សារមូលធន។

កាលពីឆ្នាំ២០១៩ មានការកត់ត្រាចំនួនពីការបើកដំណើរការអភិវឌ្ឍន៍ មានចំនួន៥២គំរោង ។ ការលក់ថ្មីបានគ្របដណ្ដប់លើទីផ្សារលំនៅដ្ឋានឯកជន ដោយមានលំនៅ  ដ្ឋានឯកជនចំនួន៩.៩១២ ត្រូវបានលក់។ វាតំណាងឱ្យការកើនឡើង១២,៧% ដែលជាសញ្ញាបង្ហាញនូវភាពប្រសើរឡើង ដល់អារម្មណ៍អ្នកទិញ ទោះបីជាមានវិធានការណ៍បានបន្ឋូរបន្ថយក៏ដោយ។

មានគម្រោងចំនួន៤០ គ្រោងនឹងដាក់ឱ្យដំណើរការ និងស្តុកបន្ថែម៣០.៤៧៣ យូនីតក្នុងឆ្នាំ២០២០។ គម្រោងដែលមកពីតំបន់ស្នូលកណ្តាល នឹងបន្តមានតំរូវការខ្ពស់ដែ​លធ្វើឱ្យជិត៤០% នៃយូនីត អាចរកបានសម្រាប់បើកដំណើរការក្នុងឆ្នាំនេះ។

អ្នកទិញជនជាតិចិនបានគេរំពឹងថា នឹងត្រឡប់មកវិញនៅពាក់កណ្តាលឆ្នាំនេះ ខណៈកាលពីឆ្នាំ២០១៩ ជនជាតិចិនមានរហូតដល់ចំនួន១៩,៣% នៃការទិញផ្ទះសរុបដោយមិនរាប់បញ្ចូលការទិញរបស់ជនជាតិសិង្ហបុរី។

បើនិយាយពីតម្លៃអចលនទ្រព្យវិញ មិនមានសម្ពាធអ្វីគួរឱ្យកត់សម្គាល់ ក្នុងការកាត់បន្ថយថ្លៃដើម ឬផ្តល់ការបញ្ចុះតម្លៃនោះទេ ដោយសារកម្រិតនៃអចលនទ្រព្យមិនទាន់លក់នៅតែអាចគ្រប់គ្រងបាន។

ក្រុមហ៊ុនស្រាវជ្រាវ CBRE រំពឹងថា តម្លៃនឹងមានស្ថេរភាពហើយអាចសម្រេចបានកំណើនពី០% ទៅ១% ក្នុងឆ្នាំ២០២០ ដោយសារថ្លៃដើមខ្ពស់។ សម្រាប់ឆ្នាំនេះក្រុមហ៊ុន CBRE គ្រោងថាតម្លៃ២លានដុល្លារក្នុងមួយយូនីត នឹងបន្តក្លាយជាចំណុចដ៏ល្អសម្រាប់វិនិយោគិន៕

ដោយៈ រ៉ាណេត

ភ្នំពេញៈ ជាមួយនឹងការចូលរួម និងគាំទ្រកំណើនសេដ្ឋកិច្ចកម្ពុជា បច្ចុប្បន្ននេះមានសហគ្រាសធុនតូច និងមធ្យម ចំនួន៥៣ម៉ឺនសហគ្រាស កំពុងតែធ្វើប្រតិបត្តិការលើសង្វា​ក់ផលិតកម្មនានា ដែលកំពុងតែជួបប្រទះផលលំបាកលើបញ្ហាបច្ចេកទេស ទីផ្សារ និងការគាំទ្រផ្នែកហិរញ្ញវត្ថុ។

ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា លោកឧកញ៉ា តែ តាំងប៉ បានមានប្រសាសន៍កាលពីថ្ងៃទី៤ ខែមីនា ឆ្នាំ២០២០កន្លងមកថា សហគ្រាសធុនតូច និងមធ្យម ដែលកពុងប្រតិបត្តិការអាជីវកម្ម ចំនួន៥៣ម៉ឺនសហគ្រាស។

លោកឧកញ៉ាបន្តថា“សេដ្ឋកិច្ចកម្ពុជាសព្វថ្ងៃបានពឹងផ្អែកយ៉ាងខ្លាំងលើពួកគេ ប៉ុន្តែសហគ្រាសធុនតូច និងមធ្យម កំពុងជួបប្រទះបញ្ហាលំបាកជាច្រើន ដូចជាបញ្ហាបច្ចេក​ទេស បញ្ហាហិរញ្ញវត្ថុ បញ្ហាទីផ្សារ ក៏ដូចជាបញ្ហាសហគ្តិនភាព ដែលជាចំណុះខ្សោយរបស់ពួកគេ”។

លោកឧកញ៉ាបានមានប្រសាសន៍បន្តទៀតថា រយៈពេលកន្លងមកនេះ សម្ព័ន្ធសមា​គមសហគ្រាសធុនតូច និងមធ្យមកម្ពុជា បានបង្កើតកម្មវិធីជាច្រើនជាមួយដៃគូសហការ ក៏ដូចជាក្រសួងពាក់ព័ន្ធនានា ដើម្បីជំរុញវិស័យសហគ្រាសធុនតូច និងមធ្យម ក៏ប៉ុន្តែនៅតែមានចំណុចជាច្រើនទៀត យើងត្រូវការដៃគូសហការ ក៏ដូចជា រកដំណោះស្រាយបន្ថែមទៀត និងមធ្យម។ អ្វីដែលជាចំណុចដែលសហគ្រាសធុនតូច និងមធ្យមចង់បាន និងត្រូវការបំផុតនោះ គឺការគាំទ្រហិរញ្ញវត្ថុ សង្វាក់ផលិតកម្មរបស់ពួកគេ ប៉ុន្តែពួកគាត់ក៏ត្រូវការចំណេះ​ដឹងផ្នែកហិរញ្ញវត្ថុផងដែរ ដើម្បីអោយប្រភពហិរញ្ញវត្ថុដែលត្រូវទទួលបាននោះ នឹងត្រូវប្រើប្រាស់ទទួលបានប្រសិទ្ធភាព។

ជាមួយនឹងភាពប្រឈម និងមានតម្រូវការចាំបាច់ក្នុងការគាំទ្រផ្នែកហិរញ្ញវត្ថុ ដើម្បីជួយជំរុញឱ្យវិស័យសហគ្រាសធុនតូច និងមធ្យម មានដំណើរការដោយរលូន និងចូលរួមជួយដល់កំណើនសេដ្ឋកិច្ចជាតិកម្ពុជា ធនាគារចិនដ៏ធំព្រីនស៍ បានចូលខ្លួនសហការយ៉ាងជិតស្និទ្ធជាមួយសម្ព័ន្ធសមាគមសហគ្រាសធុនតូច និងមធ្យម ដោយការចុះអនុស្សារណៈយោគយល់ ដោយធ្វើការបង្កើនការយល់ដឹងបន្ថែមលើ ការគ្រប់គ្រងហិរញ្ញវត្ថុ ការប្រើប្រាស់ធនធានហិរញ្ញវត្ថុ ឲ្យមានប្រសិទ្ធភាព ជាពិសេសនោះក៏ធ្វើការសហការ ដើម្បីទាញយកប្រភពហិរញ្ញវត្ថុពីខាងក្រៅបន្ថែមទៀត៕