ដោយ: រ៉ាណេត

ភ្នំពេញៈ រដ្ឋាភិបាលបានចំណាយទឹកប្រាក់៦៦លានដុល្លារនៅក្នុងគម្រោងកាត់បន្ថយភាពក្រីក្រ និងអភិវឌ្ឍន៍កសិកម្មខ្នាតតូច ដែលស្ថិតនៅតំបន់បឹងទន្លេសាបក្នុងនោះ ថវិកាចំនួន៥០លានដុល្លារបានមកពីដៃគូអភិវឌ្ឍន៍ ADB ថវិកាចំនួន១០លានដុល្លារបានមកពី IFAD ហើយថវិកាចំនួន៦លានដុល្លារជាបដិភាគរបស់រដ្ឋាភិបាល។

រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន អនុប្រធានក្រុមប្រឹក្សាស្តារ និងអភិវឌ្ឍន៍វិស័យកសិកម្ម និងជនបទ បានមានប្រសាសន៍នៅក្នុងកិច្ចប្រជុំកាលពីថ្ងៃទី៤ ខែមីនា ឆ្នាំ២០២០ នៅក្នុងទីស្ដីការក្រសួងថា ក្រោមការជួយរបស់រាជរដ្ឋាភិបាល និងធនាគារអភិវឌ្ឍន៍អាស៊ី (ADB) មូលនិធិអន្តរជាតិសម្រាប់ការអភិវឌ្ឍវិស័យកសិកម្ម (IFAD) និងរដ្ឋាភិបាលហ្វាំងឡង់ គម្រោងកាត់បន្ថយភាពក្រីក្រ និងអភិវឌ្ឍន៍កសិកម្មខ្នាតតូចនៅតំបន់ទន្លេសាប (ជំហាន២) នឹងត្រូវប្រើប្រាស់ថវិកាសរុប៦៦លានដុល្លារ។

លោកបានកោតសរសើរ និងវាយតម្លៃខ្ពស់ចំពោះគណៈកម្មការដឹកនាំគម្រោង និងអង្គភាពសម្របសម្រួលគម្រោង ដែលបានសហការយ៉ាងជិតស្និទ្ធ ជាមួយអន្តរស្ថាប័នពាក់ព័ន្ធទាំងអស់ ក្នុងការរួមចំណែកដោះស្រាយបញ្ហាប្រឈមក្នុងវិស័យកសិកម្ម និងជនបទ ធ្វើយ៉ាងណាលើកកម្ពស់ពិពិធកម្មខ្សែសង្វាក់តម្លៃផលិតកម្មកសិកម្ម ប្រកបដោយគុណភាព សុវត្ថិភាព និងការប្រកួតប្រជែង ឆ្លើយតបតាមតម្រូវការទីផ្សារ ដើម្បីរួមគ្នាអភិវឌ្ឍសង្គម-សេដ្ឋកិច្ចជាតិ និងជាពិសេសវិស័យកសិកម្មឲ្យមានការរីកចម្រើន ដោយប្រើប្រាស់ថវិកាបដិភាគរបស់រាជរដ្ឋាភិបាលកម្ពុជា ធនាគារអភិវឌ្ឍន៍អាស៊ី (ADB) មូលនិធិអន្តរជាតិសម្រាប់ការអភិវឌ្ឍវិស័យកសិកម្ម (IFAD) និងរដ្ឋាភិបាលហ្វាំងឡង់ ប្រកប​ដោយតម្លាភាព និងប្រសិទ្ធភាព។

តាមការព្យាករណ៍កំណើនសេដ្ឋកិច្ចកម្ពុជា អាចធ្លាក់ចុះមកនៅក្នុងរង្វង់៦ភាគរយនៅក្នុងឆ្នាំ២០២០ ដោយសារផលប៉ះពាល់ដោយប្រយោល ពីជំងឺផ្លូវដង្ហើមធ្ងន់ធ្ងរ (COVID-19) និងការព្យួរប្រព័ន្ធអនុគ្រោះពន្ធ EBA រួមទាំងការប្រែប្រួលធាតុអាកាស។

ស្ថិតក្នុងស្ថានភាពចំពោះមុខសម្តេចតេជោនាយករដ្ឋមន្រ្តី បានដាក់វិធានការជាច្រើនដើម្បីរក្សាសុខភាពសេដ្ឋកិច្ចជាតិ តាមរយ:ទ្រទ្រង់ និងលើកទឹកចិត្តដល់សហគ្រាសធុនតូច និងមធ្យម វិស័យកែច្នៃផលិតផលកសិកម្ម វិស័យកសិ-ឧស្សាហកម្ម និងវិស័យកសិកម្មផងដែរ ដើម្បីអនុញ្ញាតឱ្យសហគ្រាសធុនតូច និងមធ្យម មាន លទ្ធភាពពង្រីក និងធ្វើឱ្យប្រសើរឡើង នូវខ្សែសង្វាក់ផលិតកម្មរបស់ខ្លួន ក្នុងគោលដៅបង្កើតការងារបន្ថែមតាមរយៈការផ្តល់ទឹកប្រាក់រហូតដល់៥០លានដុល្លារ ដល់ធនាគារអភិវឌ្ឍន៍ជនបទនិងកសិកម្ម ដើម្បីផ្តល់កម្ចីមានការប្រាក់ទាប។

គម្រោងកាត់បន្ថយភាពក្រីក្រ និងអភិវឌ្ឍន៍កសិកម្មខ្នាតតូចនៅតំបន់ទន្លេសាប (ជំហាន២) ប្រើប្រាស់ថវិកាសរុប ៦៦លានដុល្លារ ដែលក្នុងនោះជំនួយពី ADBមានចំនួន៥០លានដុល្លារ ជំនួយពី  IFAD ១០ លានដុល្លារ និងថវិការាជរដ្ឋាភិបាលកម្ពុជាចំនួន៦លានដុល្លារ ដោយការអនុវត្តគម្រោងនេះមានរយៈពេល៥ឆ្នាំ ២០១៨ -២០២៣ ដែលមានខេត្តគោលដៅចំនួន៧ គឺខេត្តបាត់ដំបង បន្ទាយមានជ័យ សៀមរាប កំពង់ធំ កំពង់ចាម ត្បូងឃ្មុំ និងខេត្តព្រៃវែង ដែលមានក្រុង-ស្រុក ៣៨ និងឃុំសរុបចំនួន២៧០៕

ដោយវុត្ថា

ភ្នំពេញ: រដ្ឋសភាជាតិកម្ពុជា បាននឹងកំពុងពិភាក្សាសេចក្តីព្រាងច្បាប់ស្តីពី ការអនុម័តយល់ព្រមលើពិធីសារទី១ ធ្វើវិសោធនកម្មកិច្ចព្រមព្រៀងស្តីពី ពាណិជ្ជកម្មទំនិញអាស៊ាន  ដើម្បីលើកកម្ពស់កិច្ចសម្រួលពាណិជ្ជកម្ម និងធុរកិច្ច មុននឹងអនុម័តដាក់ឱ្យប្រើប្រា​ស់ជាផ្លូវការនាពេលខាងមុខ។

លោកជាម យៀប ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា នៅក្នុងកិច្ចប្រជុំថ្ងៃទី៤ ខែមីនា ឆ្នាំ២០២០នេះ ឱ្យដឹងថា សេចក្តីព្រាងច្បាប់ស្តីពីការអនុម័តយល់ព្រមលើពិធីសារទី១ ធ្វើវិសោធនកម្មកិច្ចព្រមព្រៀងស្តីពីពាណិជ្ជកម្មទំនិញអាស៊ាន គឺក្នុងគោលបំណងបើកផ្លូវប្រទេសសមាជិកអាស៊ាន មានមូលដ្ឋានគតិយុត្តិ ក្នុងការអនុវត្តនូវស្វ័យបញ្ជាក់ដើមកំណើតទូទាំងអាស៊ាន( ASEAN Wide Self –Certification – AWSC ) ។

លោកបន្តថា សេចក្តីព្រាងច្បាប់នេះ សំដៅរួមចំណែកក្នុងការលើកកម្ពស់កិច្ចសម្រួ​លពាណិជ្ជកម្ម និងបង្កលក្ខណៈងាយស្រួលបន្ថែមទៀតដល់ពាណិជ្ជករ និងវិនិយោគិន ពិសេសសហគ្រាសធុនតូច និងមធ្យម តាមរយៈការធ្វើសាមញ្ញកម្ម លើនីតិវិធីនៃការបញ្ជា​ក់ដើមកំណើត ដែលកត្តានេះនឹងរួមចំណែកជម្រុញពាណិជ្ជកម្ម តាមតំបន់អាស៊ានតាម    រយៈការបង្កើនការប្រើប្រាស់កិច្ចព្រមព្រៀងស្តីពី ពាណិជ្ជកម្មទំនិញអាស៊ាន ស្របតាមផែនការមេ សហគមន៍សេដ្ឋកិច្ចអាស៊ានឆ្នាំ២០២៥។

សមាជិកអាស៊ានទាំងអស់ បានឯកភាពចាប់ផ្តើមអនុវត្តជាផ្លូវការAWSC ក្នុងតំបន់អាស៊ានចាប់ខែមីនា ឆ្នាំ២០២០ បន្ទាប់ពីការផ្តល់សច្ចាប័នលើពិធីសារនេះ ត្រូវបានបំពេ​ញរួចរាល់ដោយសមាជិកអាស៊ានទាំងអស់៕

ដោយ ហ្សូលី

ភ្នំពេញៈ គម្រោងកែលម្អផ្លូវជាតិលេខ៥ ព្រែកក្តាម-ធ្លាម្អមភាគខាងត្បូង ដែលមានប្រវែងសរុប១៣៥.២៤គីឡូម៉ែត្រ នឹងត្រូវបញ្ចប់ការសាងសង់នៅខែមេសា ឆ្នាំ២០២២ ខាងមុខ។

ផ្លូវជាតិលេខ៥ ព្រែកក្តាម-ធ្លាម្អមភាគខាងត្បូងនេះ គឺជាកិច្ចសហការជាមួយទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន(JICA) បានស្ថាបនាតាំងពីខែមេសា ឆ្នាំ ២០១៨ មកម្ល៉េះ ដែលមកទល់ពេលនេះសម្រេចបាន១៥%ហើយ។

គម្រោងកែលម្អផ្លូវជាតិលេខ៥នេះ បានពង្រីកទទឹងផ្លូវពី២គន្លងទៅ៤គន្លង មានសួនពុះចែកទ្រូងផ្លូវ៣ម៉្រែត ជាមួយរនាំងដែកពុះចែកទ្រូងផ្លូវ បរិក្ខារសុវត្ថិភាពជាច្រើនផ្សេង​ៗទៀត និងមានសាងសង់ផ្លូវវាងចំនួន២ រួមមានទី១ ផ្លូវវាងក្រុងឧត្តុងមានប្រវែង២៣.៩២គីឡូម៉្រែត នឹងទី២ ផ្លូវវាងក្រុងកំពង់ឆ្នាំង មានប្រវែង១២.០៧គីឡូម្រ៉ែត និងបានសាងសង់ស្ពានថ្មីចំនួន២។

បន្ថែមពីនេះ មានការជួសជុលពង្រីកស្ពានចាស់ចំនួន១៣កន្លែង និងសាងសង់ជំនួ​សស្ពានចាស់ចំនួន១៨កន្លែង សាងសង់ប្រអប់លូ១១៥នឹងលូមូលចំនួន១២១តម្លើងប   ង្គោ​លភ្លើង LED នៅផ្លូវប្រសព្វសំខាន់ៗក្នុងទីប្រជុំជន ។

ការកែលម្អផ្លូវជាតិនេះ ដើម្បីសម្រួលដល់ការធ្វើចរាចរណ៍ ធានាសុវត្ថិភាពនៃការធ្វើដំណើររបស់ប្រជាពលរដ្ឋ និងដើរតួនាទីយ៉ាងសំខាន់ ក្នុងការផ្សារភ្ជាប់សកម្មភាពក្នុងតំបន់ ព្រោះថាផ្លូវនេះ នឹងក្លាយជាលូវហាយវ៉េមួយក្នុងតំបន់អាស៊ាន និងជាផ្នែកមួយនៃច្រករបៀងសេដ្ឋកិច្ចភាគខាងត្បូង។

ជាពិសេស ដើម្បីចូលរួមចំណែកការរីកចម្រើន ដល់វិស័យសេដ្ឋកិច្ចនៅប្រទេសកម្ពុជា និងការអភិវឌ្ឍព្រមទាំងទាក់ទាញភ្ញៀវទេសចរជាតិ នឹងអន្តរជាតិផងដែរ៕

ដោយ ហ្សូលី

ភ្នំពេញៈ សម្តេចតេជោហ៊ុន សែននាយករដ្ឋមន្ត្រីនៃកម្ពុជាបានបង្ហើបពីផែនការ     សង្គ្រោះសេដ្ឋកិច្ចកម្ពុជា អំឡុងពេលដែលសេដ្ឋកិច្ចពិភពលោកធ្លាក់ចុះ ដោយសារការវាយឡុកនៃវីរុសកូរ៉ូណាឬហៅថាកូវីដ១៩។

សម្តេចមានប្រសាសន៍ ក្នុងឱកាសអញ្ជើញបិទសន្និបាតបូកសរុប ការងារឆ្នាំចាស់ និងលើកទិសដៅការងារឆ្នាំថ្មី របស់ក្រសួងសុខាភិបាល នារសៀលថ្ងៃទី៤ ខែមីនា ឆ្នាំ២០២០នេះថា យើងបានដាក់ចេញនូវគោលនយោបាយមួយចំនួនគាំទ្រ ទៅលើវិស័យដែលមានផលប៉ះពាល់ដូចជា វិស័យទេសចរណ៍ និងវិស័យកាត់ដេរ ហើយក៏បានជម្រុញ ឱ្យគណៈកម្មការគោលនយោបាយសេដ្ឋកិច្ច ជាមួយក្រសួងសេដ្ឋកិច្ចនិងហិរញ្ញវត្ថុ រៀបចំនូវផែនការ ដើម្បីឆ្លើយតបជាមួយបញ្ហាសេដ្ឋកិច្ច នៅក្នុងបដិវត្តដែលកូវីដ១៩កំពុងរីករាលដាល។

សម្តេចបន្តថា “ស្ថាប័នទាំងអស់ ត្រូវកាត់បន្ថយការចំណាយរហូតទៅ៥០% លើកលែងតែក្រសួងពាណិជ្ជកម្ម ក្រសួងការបរទេស និងទីស្តីការគណៈរដ្ឋមន្ត្រីទេ ដែលនឹងត្រូវកាត់បន្ថយការចំណាយត្រឹម២៥ភាគរយ”។ សម្តេចបានសង្កត់ធ្ងន់ថា “មានតែចំណា​យលើបៀរវត្ស តែប៉ុណ្ណោះដែលគ្មានការកាត់បន្ថយ ទាក់ទងនឹងចំណាយចរន្តដែលមួយខែត្រូវចាយជាង៤០០លានដុល្លារ”។

ទន្ទឹមនេះ ចំពោះគម្រោងវិនិយោគផ្ទាល់របស់កម្ពុជា ការដ្ឋានណាដែលមិនទាន់បា​ន​បើកការដ្ឋានទេ ត្រូវផ្អាកការបើកការដ្ឋានសិន លើកលែងតែការដ្ឋានដែលមានហិរញ្ញប្បទានពីបរទេសដោយមានថវិការបដិភាគរបស់កម្ពុជា។

ជាមួយគ្នា សម្តេចតេជោ ហ៊ុន សែន បានមានប្រសាសន៍ថា “រង់ចាំឆ្នាំក្រោយក៏មិនហូសពេលដែរ រង់ចាំកូវីដហ្នឹងទៅឱ្យផុតសិន ដើម្បីយើងដឹងច្បាស់ថាទុកយើងមានប៉ុន្មានពិតប្រាកដ”៕

ដោយវុត្ថា

ភ្នំពេញៈ ក្រុមហ៊ុន ZHENGHAINA INDUSTRY CO，. LTD. នៃសាធារណរដ្ឋប្រជាមានិតចិន គ្រោងចាប់ផ្តើមលើការវិនិយោគលើការកែច្នៃសំរាម ជាថាមពលអគ្គិសនីនៅខេត្តបាត់ដំបង បន្ទាប់មានការសិក្សារួចរាល់។

លោកសឿម ប៊ុនរិទ្ធិ អភិបាលរងខេត្តបាត់ដំបង នៅក្នុងជំនួបពិភាក្សាជាមួយលោ​ក GU CHUNYAO និង លោក HE YUNLU តំណាងក្រុមហ៊ុន ZHENGHAINA INDUSTRY CO，. LTD. នៃសាធារណរដ្ឋប្រជាមានិតចិន កាលពីថ្ងៃទី៣ ខែមីនា ឆ្នាំ ២០២០កន្លងមក​ នេះ បានសម្តែងនូវការសប្បាយរីករាយ ក្នុងការរៀបចំអនុវត្តគម្រោងប្រមូលសំរាមនៅក្រុង​បាត់ដំបង។

លោកបន្តទៀតថា “បច្ចុប្បន្នយើងក្រុមហ៊ុនប្រមូលសំរាកក៏ពិតមែន ប៉ុន្តែក្រុមហ៊ុនមួយនេះ មិនមានលទ្ធភាពក្នុងការកែច្នៃសំរាមទេ។ ក្រុមហ៊ុនជាអ្នកប្រមូលសំរាមដឹកយកមកចាក់ទុកនៅទីលានចាក់សំរាម រួចក៏ធ្វើដុតកំទេច ដែលធ្វើឱ្យផ្សែងបក់ចូលមកក្រុងបាត់ដំបង និងធ្វើឱ្យមានការរអ៊ួរទ្រាំពីប្រជាពលរដ្ឋផងដែរ”។

ក្រុមហ៊ុន ZHENGHAINA INDUSTRY CO，. LTD. នៃសាធារណរដ្ឋប្រជាមានិតចិន កាលពីថ្ងៃទី២៤ ខែធ្នូ ឆ្នាំ២០១៩ មុន បានទទួលជួបពិភាក្សាជាមួយ លោកងួន រតនៈ អភិបាល នៃគណៈអភិបាលខេត្តរួចម្តងមកហើយ និងមានការគាំទ្រនចំពោះការចុះសិក្សារបស់ក្រុមហ៊ុន ដែលចង់ធ្វើការវិនិយោគប្រមូល ការកែច្នៃសំរាម និងការបំឡែងសំរាមជាថាមពលអគ្គិសនីផងដែរ។

លោក ងួន រតនៈ អភិបាល នៃគណៈអភិបាលខេត្ត ក្រុមហ៊ុនបានចុះធ្វើការសិក្សាតាមបណ្តាក្រុង ស្រុកចំនួន១២ អំពីការយល់ដឹង ការទុកដាក់សំរាមនៅតាមទីប្រជុំជនផងដែរ។

យោងតាមរបាយការណ៍របស់ក្រសួងបរិស្ថានបានបង្ហាញឲ្យដឹងថា តាមបណ្តាខេត្ត-រាជធានីធំៗ ដែលផលិតបរិមាណសំរាមច្រើនក្នុងនោះ រាជធានីភ្នំពេញ ប្រមាណជាង៣ពាន់តោនក្នុង១ថ្ងៃ។ ក្រុងព្រះសីហនុប្រមាណ៧០០តោនក្នុង១ថ្ងៃ។ ក្រុងសៀម​រាប៣៨០តោនក្នុង១ថ្ងៃ។ ដោយឡែកនៅក្នុងក្រុងបាត់ដំបង ប្រមាណពី១៣០ទៅ១៥០តោនក្នុងមួយថ្ងៃ។ សំរាមទាំងនោះ៦៥% ជាសំណល់សរីរាង្គ និង៣៥%គឺជាសំណល់ប្លាស្ទិក៕