ដោយ ហ្សូលី

វៀតណាមៈ ក្រុមហ៊ុនអេឡិចត្រូនិចSamSung កំពុងសាងសង់អគារស្រាវជ្រាវនិងអភិវឌ្ឍន៍ ដោយបោះទុនវិនិយោគប្រមាណ២២០លានដុល្លារអាមេរិក នៅប្រទេសវៀតណាម។

ការដ្ឋានសាងសង់នេះ នឹងស្ថិតនៅចំកណ្តាលទីក្រុងហាណូយ ប្រទេសវៀតណាម និងបញ្ចប់ការសាងសង់ឱ្យបាននៅឆ្នាំ២០២២។ នេះបើតាមសេចក្តីថ្លែងការណ៍របស់ក្រុមហ៊ុន SamSung និងបានបន្ថែមព័ត៌មានថា ខ្លួននឹងរើសបុគ្គលិកប្រមាណជា២០០០ទៅ ៣០០០នាក់ទៀត។

ក្រុមហ៊ុន SamSung គឺជាក្រុមហ៊ុនដ៏ធំមួយ ដែលចាយទុនវិនិយោគច្រើននៅក្នុងប្រទេសវៀតណាម ដែលមានទំហំទឹកប្រាក់ដល់ទៅ១៧ពាន់លានដុល្លារ។

មជ្ឈមណ្ឌលស្រាវជ្រាវមួយនេះ នឹងក្លាយទៅជាអគារស្រាវជ្រាវធំជាងគេ នៅតំបន់អាស៊ីអាគ្នេយ៍។ វានឹងជម្រុញ ពីសមត្ថភាពនៃការសិក្សាស្រាវជ្រាវបន្ថែម របស់ក្រុមហ៊ុននេះដូចជា មនុស្សយន្តសិប្បនិម្មិត បណ្តាញអ៊ីនធឺណែត ទិន្នន័យធំៗ និងប្រព័ន្ធ 5G។

ប្រទេសវៀតណាម គឺជាប្រទេសដែលបណ្តុំទៅដោយរោងចក្រផលិត និងតម្លើងគ្រឿងអេឡិចត្រូនិច ហើយប្រទេសនេះបាននាំចេញនូវទូរសព្ទឆ្លាតវៃ ព្រមទាំងគ្រឿងបន្លា​ស់ជាច្រើនប្រភេទ។

យោងតាមទិន្នន័យពីអគ្គនាយកដ្ឋានគយបានឱ្យដឹងថា កាលពីឆ្នាំ២០១៩ប្រទេ​សវៀតណាម បាននាំចេញគ្រឿងអេឡិចត្រូនិក ក្នុងទឹកប្រាក់រហូតដល់៥០ពាន់លានដុល្លារ៕

(Channel News Asia)

ដោយ ប៊ី

ភ្នំពេញៈ ធនាគារជាតិនៃកម្ពុជានៅថ្ងៃពុធនេះបានអះអាងថា ប្រទេសកម្ពុជាបានជួបនឹងឱនភាពពាណិជ្ជកម្មជាង៣០ភាគរយ ស្មើនឹង៣១,២ពាន់ពាន់លានរៀល (៧,៦៦ ពាន់លានដុល្លារអាមេរិក) នៅក្នុងឆ្នាំ ២០១៩។

យោងតាមរបាយការណ៍របស់ធនាគារជាតិនៃកម្ពុជា ដែលបានចេញផ្សាយនៅថ្ងៃពុធទី៤ មិនានេះបានឲ្យដឹងថា ទំហំនាំចូល និងនាំចេញសរុបមានតម្លៃ ១៤៩,៦ ពាន់ពាន់លានរៀល (៣៦,៧ ពាន់លានដុល្លារអាមេរិក) កាលពីឆ្នាំមុន។

ការនាំចេញបានកើនឡើង១២,៧ភាគរយ ឬ៥៩,២ពាន់ពាន់លានរៀល(១៤,៥៣​ពាន់លានដុល្លារ) ខណៈដែលការនាំចូលកើនឡើង១៨,៦ភាគរយ ដល់៩០,៤ ពាន់ពាន់លានរៀល(២២,១៩ ពាន់លានដុល្លារ) នាំឱ្យមានឱនភាពពាណិជ្ជកម្មចំនួន៣១,២ ពាន់​​ពាន់លានរៀល (៧,៦៦ ពាន់លានដុល្លារ) ។ នេះបើយោងតាមរបាយការណ៍ខាងលើ។

ដៃគូពាណិជ្ជកម្មសំខាន់ៗរបស់ប្រទេសកម្ពុជាគឺចិន សហរដ្ឋអាមេរិក អឺរ៉ុប ថៃ វៀតណាម ម៉ាឡេស៊ី សឹង្ហបូរី កូរ៉េខាងត្បូង និងជប៉ុន។

ផលិតផលចម្បងរបស់ខ្លួនសម្រាប់ការនាំចេញរបស់កម្ពុជា រួមមានសម្លៀកបំពាក់ ស្បែកជើង អង្ករ និងកង់ ខណៈដែលប្រទេសនេះដឹកជញ្ជូនចូលវត្ថុធាតុដើម សម្រាប់ស  ម្លៀកបំពាក់ រថយន្ត ប្រេងឥន្ធនៈ សម្ភារៈសំណង់ និងផលិតផលប្រើប្រាស់ប្រចាំថ្ងៃ៕

ដោយវុត្ថា

ភ្នំពេញៈ ធនាគារជាតិនៃកម្ពុជា បានបើកកិច្ចប្រជុំជាមួយគ្រឹះស្ថានធនាគារ និងគ្រឹះស្ថានមីក្រូហិរញ្ញវត្ថុទទួលប្រាក់បញ្ញើ ក្នុងគោលបំណងពិភាក្សា និងស្វែងរកយន្តការការពារផលប៉ះពាល់ជាសក្តានុពល ដែលបណ្តាលមកពីការរីករាលដាលជាសកល នៃវីរុស Covid-19 មកលើវិស័យធនាគារនិងហិរញ្ញវត្ថុនៅកម្ពុជា។

នៅក្នុងកិច្ចប្រជុំកាលពីរសៀលថ្ងៃទី៣ ខែមីនា ឆ្នាំ២០២០ម្សិលមិញនេះ តំណាងធនាគារ និងគ្រឹះស្ថានមីក្រូហិរញ្ញវត្ថុទទួលប្រាក់បញ្ញើ បានបង្ហាញពីវិធានការផ្ទៃក្នុងរបស់ខ្លួន ដែលបានត្រៀមរួចជាស្រេច ក្នុងការទប់ទល់ការរីករាលដាលនៃវីរុសCovid-19 និងផលអវិជ្ជមានជាយថាហេតុផ្សេងទៀត។

ជាមួយគ្នានេះផងដែរធនាគារជាតិនៃកម្ពុជា បានណែនាំដល់គ្រឹះស្ថានធនាគារ និងគ្រឹះស្ថានមីក្រូហិរញ្ញវត្ថុទទួលប្រាក់បញ្ញើ លើចំណុចមួយចំនួនដូចជា ទី១ ត្រូវបន្តផ្តល់ឥណទានឱ្យបានកាន់តែសកម្មដល់វិស័យអទិភាព ដើម្បីធានានិរន្តភាពអាជីវកម្មទាំងនោះ ទី២ រក្សាភាពទន់ភ្លន់តាមលទ្ធភាពជាក់ស្តែង តាមរយៈការពិនិត្យលទ្ធភាពក្នុងការបន្ធូរបន្ថយ និងពន្យារពេលនៃការសងប្រាក់ដើម និងការប្រាក់ ជាពិសេសចំពោះម្ចាស់អាជីវកម្មក្នុងវិស័យសណ្ឋាគារ និងផ្ទះសំណាក់ និងវិស័យពាក់ព័ន្ធទេសចរណ៍ ជាដើម។

ទី៣ បន្តតាមដាន និងដាក់ចេញវិធានការការពារការរីករាលដាលនៃវីរុស Covid-19 ទៅលើបុគ្គលិក និងអតិថិជន ដើម្បីធានាឱ្យបាននិរន្តរភាពប្រតិបត្តិកា ររបស់គ្រឹះស្ថានធនាគារនិងហិរញ្ញវត្ថុជាប្រក្រតី៕

ដោយនៅ ស៊ីវុត្ថា

ព្រះសីហនុៈ រដ្ឋមន្ត្រីក្រសួងបរិស្ថាន លោកសាយ សំអាល់បានមានប្រសាសន៍ឱ្យដឹងថា ខេត្តព្រះសីហនុនឹងក្លាយជាខេត្តទំនើប ស៊ីវិល័យ និងជាគោលដៅវិនិយោគលើពហុវិស័យដ៏ទាក់ទាញបំផុត ខណៈខេត្តមួយនេះ រាជរដ្ឋាភិបាលបានបោះទុនស្តារ និងស្ថាបនាហេដ្ឋារសម្ព័ន្ធនៅក្នុងក្រុងឱ្យមានភាពទាក់ទាញ និងបរិស្ថានស្អាត។

លោក សាយ សំអាល់  នៅក្នុងសន្និបាតបូកសរុបលទ្ធផលការងារឆ្នាំ២០១៩ និងលើកទិសដៅការងារឆ្នាំ២០២០ របស់រដ្ឋបាលខេត្តព្រះសីហនុនាថ្ងៃទី៣ ខែមីនា ម្សិលមិញនេះឱ្យដឹងថា បច្ចប្បន្ននេះ តាមរយៈគោលការណ៍ស្លឹកត្នោតខ្ចប់ស្ករត្នោត របស់រដ្ឋាភិបាល  កញ្ចប់ថវិកាជាតិប្រមាណ៣០០លានដុល្លាអាមេរិក ត្រូវបានអនុម័តដើម្បីស្តារហេដ្ឋារចនាសម្ព័ន្ធ ផ្លូវ បណ្តាញលូ ប្រឡាយបង្ហូរទឹកនិងបរិស្ថាន។

លោកបន្តថា “ស្របជាមួយគ្នានេះផ្លូវជាតិលេខ៤ ផ្លូវល្បឿនលឿន និងផ្លូវដែកពីរាជធានីភ្នំពេញចូលមកកាន់ក្រុងព្រះសីហនុ ការអភិវឌ្ឍព្រលានយន្តហោះអន្តរជាតិ កំព​ង់ផែទឹកជ្រៅ បណ្តាញទឹកស្អាត អគ្គីសនី ប្រពន្ធ័ចម្រោះទឹកកខ្វក់ ការកែលម្អតំបន់ឆ្នេរខ្សាច់ តំបន់រម្យណីដ្ឋាននានាក្នុងខេត្ត…។ល។ បាននឹងកំពុងធ្វើការស្តារឡើងវិញជាអាទិភាពនិងធ្វើឡើងព្រមគ្នាដែរ”។

លោកសាយ សំអាល់បានបន្តថា ខេត្តព្រះសីហនុ នឹងក្លាយជាខេត្តទំនើប ស៊ីវិស័យ និងជាគោលដៅវិនិយោគពហុវិស័យដ៏ទាក់ទាញបំផុត។ ប្រជាជនទូទៅជាពិសេសអ្នកខេត្តព្រះសីហនុ ផ្ទាល់មានឱកាសទទួលបានផ្លែផ្កានៃការអភិវឌ្ឍនេះច្រើន ដើម្បីធ្វើអោយមានជីវភាពល្អប្រសើរឡើង។

លោកសាយ អាល់បានស្នើអោយមន្ទីរអង្គភាពពាក់ពន្ធ័ទាំងអស់ ពង្រឹងការផ្សព្វ​ផ្សាយពីសក្តានុពលទេសចរណ៍របស់ខេត្តឲ្យបានខ្លាំងក្លា ដោយជម្រុញអោយបង្កើតព្រឹត្តិការណ៍សង្រ្កានសមុទ្រ រៀបចំកម្មវិធីកំសាន្តសប្បាយផ្សេងៗ ដើម្បីអោយប្រជាជនបានចូលរួមសប្បាយ និងជាការទាក់ទាញភ្ញៀវទេសចរជាតិ និងអន្តរជាតិមកលេងខេត្តព្រះសីហនុអោយបានច្រើនផង។

លោកគួច ចំរើន អភិបាលខេត្តព្រះសីហនុ ឱ្យដឹងដែរថា ដោយមានការចូលរួមមន្ត្រីរាជការគ្របជាន់ថ្នាក់ ខេត្តព្រះសីហនុ ធានាបាននិរន្តរភាព នៃការអភិវឌ្ឍខេត្តព្រះសីហនុ ឱ្យបានយូរអង្វែង ក្នុងគោលដៅប្រែក្លាយខេត្តព្រះសីហនុ ជាប៉ូលអភិវឌ្ឍមួយយ៉ាងសំខាន់ទៅជាទីក្រុងឆ្លាតវៃ និងជាតំបន់សេដ្ឋកិច្ចគំរូពហុបំណង។

សម្តេចតេជោនាយករដ្ឋមន្ត្រី បានសម្រេចដកថវិកាសន្សំរបស់ជាតិ ស្ថាបនាហេដ្ឋារចនាសម្ព័ន្ធផ្លូវក្នុងក្រុង៣៤ខ្សែ ប្រវែង៨៤,៥០៥ម៉ែត្រ និងការស្តារអូរប្រឡាយទាំង៥ខ្សែ ព្រមទាំងស្ថាបនាផ្លូវបន្ថែម ចំនួន១១ខ្សែ មានប្រវែង១៦,៣៧៤ម៉ែត្រ។

លោកបន្តថា  “រដ្ឋបាលខេត្តនឹងបន្តរួមគ្នាគិត រួមគ្នាធ្វើ និងរួមគ្នាដោះស្រាយ ដើម្បីបង្ការទប់ស្កាត់ និងកាត់បន្ថយបទល្មើសគ្រប់ប្រភេទនៅទូទាំងខេត្ត ពិសេសការអនុវត្តច្បាប់ចរាចរណ៍ផ្លូវគោក”។

ខេត្តព្រះសីហនុ គឺជាខេត្តមានទីតាំងជាប់មាត់សមុទ្រ នៅភាគនិរតីនៃប្រទេសកម្ពុជា ពោរពេញដោយសក្តានុពលសម្រាប់ការអភិវឌ្ឍពហុវិស័យ។ ដោយសារកត្តាសក្តានុពលដ៏ខ្លាំងសំបើម ខេត្តនេះត្រូវបានរាជរដ្ឋាភិបាលកម្ពុជា បានចាត់ទុកថាជាប៉ូលសេដ្ឋកិច្ចដ៏សំខាន់មួយ នឹងជាខេត្តនៃកំណើនសេដ្ឋកិច្ចជាតិរបស់កម្ពុជា៕

ដោយវុត្ថា

ភ្នំពេញ៖ ក្នុងឆ្នាំ២០១៩ ប្រទេសកម្ពុជាបាននាំចេញទំនិញចំនួន ៥៩,២ទ្រីលានរៀល (កើន ១២,៧% ធៀបឆ្នាំ២០១៨) ដោយឡែកបាននាំចូលទំនិញ ចំនួន ៩០,៤ទ្រីលានរៀល (កើន ១៨,៦%)។ ជាលទ្ធផលឱនភាពគណនីទំនិញមានចំនួន ៣១,២ទ្រីលានរៀល។ នេះ បើយោងតាមរបាយការណ៍របស់ធនាគារជាតិនៃកម្ពុជាដែលបង្ហាញកាលពីថ្ងៃទី ៣ ខែមីនា ម្សិលមិញនេះ ។

របាយការណ៍ដដែលបន្តថា ផលិតផលសំខាន់ៗ ៥ ប្រភេទ ដែលប្រទេសកម្ពុជានាំចេញទៅអន្តរជាតិគិតជាភាគរយនៃការនាំចេញសរុបរួមមាន៖ សម្លៀកបំពាក់ ៥៦,៦៧ % ផលិតផលវាយនភ័ណ្ឌ ៨,៩១ % ស្បែកជើង ៨,៧២ % អង្ករ ២,៨៩ % និង ទោចក្រយាន ២,៨៨ % ។

សម្រាប់ផលិតសំខាន់ៗ ៥ប្រភេទ ដែលប្រទេសកម្ពុជានាំចូលពីអន្តរជាតិគិតជាភាគរយនៃការនាំចូលសរុបរួមមាន៖ វត្ថុធាតុដើមសម្រាប់វិស័យកាត់ដេរ ២០,២០ % រថយន្ត ១០,៥៣ % ប្រេងឥន្ទនៈ ៨,៥២ % សម្ភារៈ និងបរិក្ខាសំណង់ ៧,៥៣ % និងម្ហូបអាហារ ៤,៤៤% ។

ប្រទេសដៃគូពាណិជ្ជកម្មសំខាន់ៗរបស់ប្រទេសកម្ពុជា ក្នុងនាំទំនិញចេញរួមមានប្រទេសអាមេរិក ២៩,៦% ប្រទេសជប៉ុន ៧,៧ % ប្រទេសអាល្លឺម៉ង់ ៧,២ % ប្រទេសចិន ៦,៩ % និងចក្រភពអង់គ្លេស ៦,៦ % ។ ចំណែកប្រទេសដៃគូពាណិជ្ជកម្មសំខាន់ៗរបស់ប្រទេសកម្ពុជាក្នុងនាំចូលរួមមាន៖ ប្រទេសចិន ៤៣,១ % ប្រទេសថៃ ១៥,៥ % ប្រទេសវៀតណាម ១៣,៦ % ប្រទេសជប៉ុន ៤,៧ % និងប្រទេសកូរ៉េខាងត្បូង ៣,៤ % ៕