ដោយ វល័ក្ខ

ភ្នំពេញៈ ទស្សនាវដ្ដីដ៏ល្បីរបស់អាមេរិក បានដាក់ចេញនូវតារាងកំពូលមហាសេដ្ឋីលំដាប់ពិភពលោក ដែលមានលុយច្រើនជាងគេបំផុត សម្រាប់ឆ្នាំ២០១៩ ដោយក្នុងនោះមានកំពូលមហាសេដ្ឋី ​រហូតដល់២១៥៣នាក់ មកពីបណ្ដាប្រទេសផ្សេងៗគ្នា។

សម្រាប់ពេលនេះគេហទំព័រអចលនទ្រព្យ និងសេដ្ឋកិច្ច propertyarea.asia បានលើកយកទីក្រុងទាំង១០ ដែលមានកំពូលមហាសេដ្ឋីរស់នៅច្រើនជាងគេបំផុត។

លោកអ្នកអាចសាកល្បងទាញមើលថា តើទីក្រុងណាមួយដែលមានកំពូលមហាសេដ្ឋី​ច្រើនជាងគេ?។ យោងតាមការចុះផ្សាយពីទស្សនាវដ្តីForbesបានឱ្យដឹងថា ចិនជាប្រទេសមួយដែលមានទីក្រុងចំនួន៣ សម្បូរទៅដោយ​កំពូល​មហាសេដ្ឋីរស់នៅច្រើនជាងគេ ក្នុងនោះរួមមានទីក្រុងប៉េកាំង ទីក្រុងសៀងហៃ និងShenzhen។

ខាងក្រោមនេះគឺជាតារាងទីក្រុងទាំង ១០ ដែលមានកំពូលមហាសេដ្ឋីរស់នៅ​ច្រើន​ជាងគេបំផុតសម្រាប់ឆ្នាំ ២០១៩។

១០)ទីក្រុង Mumbai ប្រទេសឥណ្ឌា

ទីក្រុងមួយឥណ្ឌានេះ មានកំពូលមហាសេដ្ឋីរស់នៅចំនួន៣៧នាក់ បើធៀបនឹងឆ្នាំ ២០១៨ បានថយចុះ៨នាក់។ បើសរុបលុយមហាសេដ្ឋីទាំង៣៧នាក់នោះចូលគ្នា មានលុយប្រមាណ១៨៤.៤ពាន់លានដុល្លារអាមេរិក។ ទីក្រុងមួយនេះផងដែរ ត្រូវបានគេចាត់ទុកថា ជាតំបន់រស់នៅបែបស៊ីវិល័យ និងទំនើប ព្រោះគ្រប់យ៉ាងនៅទីនោះសុទ្ធតែមានតម្លៃថ្លៃៗ។

០៩) ទីក្រុង Seoul ប្រទេសកូរ៉េខាងត្បូង

គិតត្រឹមពាក់កណ្ដាលខែមីនាកន្លងទៅនេះ នៅក្នុងទីក្រុងSeoul មានមហាសេដ្ឋីចំនួន៣៨នាក់ បើធៀបនឹងឆ្នាំ២០១៨ថយចុះ៣នាក់។ ទឹកប្រាក់ដែលពួកមហាសេ​ដ្ឋីទាំង៣៨នាក់មាន បូកសរុបចូលគ្នាមានប្រមាណជា៩៩.៩ពាន់់លានដុល្លារអាមេរិក​។ មហាសេដ្ឋីដែលរស់នៅក្នុងទីក្រុងនេះ ភាគច្រើនគឺកាន់កាប់ក្រុមហ៊ុន​បច្ចេកវិទ្យា ដូចជា Samsung និង Hyundai ជាដើម។ មួយវិញទៀត មានកំពូលមហាសេដ្ឋីមួយចំនួន រកចំណូលបាន តាមរយៈការបង្កើតក្រុមហ៊ុនហ្គេមអនឡាញ (កូរ៉េខាត្បូងជាប់លេខ៤ ជាប្រទេសផលិតហ្គេមអនឡាញធំជាងគេបំផុត)។

០៨) ទីក្រុង Shenzhen ប្រទេសចិន

ទីក្រុងមួយនេះត្រូវបានគេកំណត់ថាជា «តំបន់សេដ្ឋកិច្ចពិសេស» នៅក្នុងអំឡុងពេលកំណែទម្រង់សេដ្ឋកិច្ច​ របស់ប្រទេសចិននៅទសវត្សរ៍ឆ្នាំ១៩៨០ ហើយបច្ចុប្បន្នមានមហាសេដ្ឋីរស់នៅចំនួន៣៩នាក់ ធៀបនឹងឆ្នាំ២០១៨ ថយចុះ៥នាក់ បើគិតជាទឹកប្រាក់សរុបដែលពួកមហាសេដ្ឋីមានគឺ១៩០.៥ពាន់លានដុល្លារអាមេរិក។

ដោយឡែកគ្រាន់តែលោកMa Huateng ស្ថាបនិក និងជានាយកប្រតិបត្តិក្រុមហ៊ុន Tencent មានលុយរហូតដល់៣៨.៨ពាន់លានដុល្លារអាមេរិក។ មហាសេដ្ឋីនៅក្នុងទីក្រុងមួយនេះភាគច្រើនគឺរកចំណូលបានឱ្យខ្លួនឯង មិនពឹងផ្អែក​លើ​ទ្រព្យសម្បត្តិគ្រួសារ ដោយក្នុងនោះពួកគេរកស៊ីនៅក្នុងវិស័យបច្ចេកវិទ្យា ​​និងអចលនទ្រព្យ។

០៧) ទីក្រុង Sam Francisco សហរដ្ឋអាមេរិក

ទីក្រុងមួយនេះ ជាបេះដូងនៃបដិវត្តន៍បច្ចេកវិទ្យារបស់អាមេរិក ព្រោះវាជាផ្ទះរបស់ក្រុមហ៊ុនបច្ចេកវិទ្យាធំៗដូច​ជា Uber, Airbnb និង Pinterest ជាដើម។ យោងតាមការបញ្ជាក់ពី Forbes បានឱ្យដឹងថា ទីក្រុងមួយនេះមានមហាសេដ្ឋីរស់នៅ៤២នាក់ បើធៀបនឹងឆ្នាំ២០១៨ កើនឡើង៨នាក់ ហើយបើសរុបជាលុយវិញមានចំនួន១០៩.២ពាន់លានដុល្លារ។ ក្នុងចំណោមមហាសេដ្ឋីទាំងអស់ គឺមានលោកDustin Moskovitz សហស្ថា​បនិកFacebook ដោយបច្ចុប្បន្នលោកមានលុយ១១.១ពាន់លានដុល្លារអាមេរិក។

ការហូរចូលនៃក្រុមហ៊ុនឌីជីថល បានប្រែក្លាយទីក្រុងមួយដែលទំនើប និងស៊ីវិល័យ របស់គ្រប់យ៉ាងបានឡើងថ្លៃ។

០៦) ទីក្រុង Shanghai ប្រទេសចិន

បើធៀបនឹងឆ្នាំ២០១៨ ទីក្រុងមួយនេះបានថយចុះមហាសេដ្ឋី មកនៅត្រឹម៤៥នាក់ និងមានលុយសរុបប្រមាណ១១០.៧ពាន់លានដុល្លារអាមេរិក។ ក្រៅពីជាទីក្រុងស៊ីវិល័យហើយនោះ Shanghai គឺជាទីក្រុងដែលមានភាពមម៉ាញឹកជាងគេ ក្នុងវិស័យដឹកជញ្ជូន។

០៥) ទីក្រុង London ប្រទេសអង់គ្លេស

Londonជាប្រទេសមួយ ដែលមានសណ្ឋគារលំដាប់ផ្កាយ៥ច្រើនជាងគេ នៅក្នុងពិភពលោក ហើយក៏ជាទីក្រុងដែលសម្បូរដោយមហាសេដ្ឋីរស់នៅផងដែរ បើតាមរបាយការណ៍គិតត្រឹមពេលនេះ គឺមានមហាសេដ្ឋី៥៥នាក់ កំពុងរស់នៅក្នុងទីក្រុងដ៏ស្រស់ស្អាតមួយនេះ។

០៤) ទីក្រុង Beijing ប្រទេសចិន

ជាទីក្រុងមួយដែលមានសេដ្ឋីវ័យក្មេងច្រើនជាងគេ នៅក្នុងប្រទេសចិន ដោយពួកសេដ្ឋីទាំងនោះ ភាគច្រើនរកស៊ីក្នុងវិស័យបច្ចេកវិទ្យា និងអចលនទ្រព្យ។ គិតត្រឹមពេលនេះ Beijing មាន​មហាសេដ្ឋីរហូតដល់៦១នាក់ ថយចុះ៣នាក់ បើធៀបឆ្នាំមុន ប៉ុន្តែបើសរុបទឹកប្រាក់វិញ គឺមានរហូតដល់១៩៣.៣ពាន់លានដុល្លារអាមេរិក ហើយកំពូលមហាសេដ្ឋីដែលឈរជើងនៅទីក្រុងនេះយូរ និងមានជាងគេគឺលោកWang Jianlin ជាម្ចាស់ក្រុមហ៊ុនអភិវឌ្ឍន៍ អចលនទ្រព្យធំបំផុតរបស់ចិន ដែលមានឈ្មោះថាDalian Wanda Group។

០៣) ទីក្រុង Moscow ប្រទេសរុស្ស៊ី

មហាសេដ្ឋីដែលរស់នៅក្នុងទីក្រុងនេះ មានរហូតដល់៧១នាក់ ដោយបានថយចុះ ៦នាក់ បើធៀបនឹងឆ្នាំ២០១៨។ យោងតាមរបាយការណ៍បានបង្ហាញថា ជិត៨០ភាគរយនៃមហាសេដ្ឋីរុស្ស៊ីទាំងអស់ គឺរស់នៅក្នុង​ទីក្រុងមួយនេះ ព្រោះវាជាទីក្រុងស៊ីវិល័យជឿនលឿន។ មហាសេដ្ឋីភាគច្រើននៅក្នុងទីក្រុងនេះ គឺមានប្រភពចំណូលបានមកពីឧស្ម័នធម្មជាតិ ជាពិសេសគឺលោក Leonid Mikhelson ដែលជាស្ថាបនិក និងជាម្ចាស់ភាគហ៊ុនដ៏ធំរបស់ក្រុមហ៊ុនឧស្ម័នរុស្ស៊ី Novatek។

០២) ទីក្រុង Hong Kong

ទីក្រុងមួយនេះ មានមហាសេដ្ឋីរស់នៅ៧៩នាក់ បើធៀននឹងឆ្នាំ២០១៨ កើនឡើង ២នាក់។ ប្រហែលជា​ទីក្រុង​មួយនេះ សម្បូរទៅដោយពួកមហាសេដ្ឋីរស់នៅបែបនេះហើយ ទើបតម្លៃផ្ទះនៅក្នុងទីក្រុងនេះកើនឡើង៤ដង ចាប់តាំងពីវិបត្តិសេដ្ឋកិច្ចថយចុះ ប៉ុន្តែតាមការប៉ាន់ប្រមាណ តម្លៃផ្ទះនឹងធ្លាក់ចុះបន្តិចវិញនៅឆ្នាំ២០១៩នេះ។ មហាសេដ្ឋីជាស្ដេចក្រាញ់ប្រចាំទីក្រុងនេះ គឺលោក Li Ka-shing។

០១) ទីក្រុង New York សហរដ្ឋអាមេរិក

ជាទីក្រុងប្រជុំទៅដោយក្រុមហ៊ុនធំៗ និងការរស់នៅបែបស៊ីវិល័យ ដែលគិតត្រឹមពេលនេះមានមហាសេដ្ឋីរស់នៅ​៨៤នាក់ កើនឡើង១នាក់បើធៀបនឹងឆ្នាំមុន។ លោក Michael Bloomberg គឺជាអ្នកមានលុយច្រើនជាងគេប្រចាំទីក្រុងមួយនេះ ដែលបច្ចុប្បន្នគាត់មានលុយរហូតដល់៥៥.៥ពាន់លានដុល្លារអាមេរិក។ មហាសេដ្ឋីដែល​រស់នៅទីក្រុងនេះគឺចម្រុះជាតិសាសន៍ និងចម្រុះជំនួញ៕

ដោយ ហ្សូលី

ភ្នំពេញៈ រោងចក្រកាត់ដេរ ដែលកំពុងដំណើរការនៅក្នុងប្រទេសកម្ពុជា និងវៀតណាម កំពុងជួបហានិភ័យជាច្រើន ដូចជា ផ្អាកអាជីវកម្ម បិទដំណើរការ ខ្វះខាតធនធាន ជាដើម ដែលបង្កឱ្យមានការប៉ះពាល់ដល់វិស័យសេដ្ឋកិច្ចរបស់ប្រទេសទាំងពីរ។

រោងចក្រកាត់ដេរសម្លៀកបំពាក់ តម្លៃរាប់ពាន់លានដុល្លារនៅកម្ពុជា កំពុងប្រឈមនឹងហានិភ័យ និងការរំខានខ្សែសង្វាក់ផលិតកម្ម ដោយសារការផ្ទុះឡើងនៃមេរោគកូរ៉ូណា ខណៈការរាលដាលនេះ ធ្វើឱ្យឧស្សាហកម្មក្នុងអាស៊ីអាគ្នេយ៍ជាប់គាំង ដែលជាហេតុប ណ្តាលឱ្យពាណិជ្ជកម្មព្រំដែនមានការរអាក់រអូល។

ប្រទេសកម្ពុជាកំពុងមានភាពតានតឹង ជាមួយនឹងវិស័យកាត់ដេរ ដែលមានទឹកប្រាក់សរុបចំនួន៧ពាន់លានដុល្លារអាមេរិក ដែលពឹងផ្អែកលើវត្ថុធាតុដើមប្រទេសចិនដល់ទៅ៦០%។

កាលពីសប្តាហ៍មុន ក្រសួងការងារបានប្រកាសថា រោងចក្រចំនួន១០បានកាត់បន្ថយផលិតកម្មរបស់ខ្លួន និងរោងចក្រជិត២០០ ត្រូវបានគេរំពឹងថា នឹងអស់ស្តុកវត្ថុធាតុដើម។ នេះអាចបង្កហានិភ័យដល់កម្មករ និងនិយោជិក១៦០.០០០នាក់ ដែលច្រើនជាង ២០ភាគរយ នៃកម្លាំងពលកម្ម៧០០.០០០នាក់នៅក្នុងវិស័យនេះ។

រីឯវៀតណាមវិញក៏នឹងខាតបង់ទឹកប្រាក់ចំនួន២ពាន់លានដុល្លារដែរ ប្រសិនបើវត្ថុធាតុដើម ដែលមានប្រភពមកពីប្រទេសចិន ត្រូវបានពន្យាពេលសម្រាប់មួយសប្តាហ៍ទៀត។

ដូចប្រទេសកម្ពុជាដែរ ឧស្សាហកម្មរបស់ប្រទេសនេះ បានពឹងផ្អែកលើប្រទេសចិនសម្រាប់ក្រណាត់ចំនួន៦០ភាគរយ ដើម្បីជម្រុញខ្សែសង្វាក់ផលិតកម្ម សម្លៀកបំពាក់រប​ស់​ខ្លួន។

រហូតមកដល់ពេលនេះ ការនាំចេញសម្លៀកបំពាក់របស់វៀតណាម បានធ្លាក់ចុះ ១,៧ភាគរយស្មើនឹង៤,៥ពាន់លានដុល្លារ ក្នុងរយៈពេលពីរខែដំបូងនៃឆ្នាំនេះ។

សូម្បីតែប្រព័ន្ធដឹកជញ្ជូនក៏មានភាពយឺតយ៉ាវដែរ ដែលជាហេតុធ្វើឱ្យមានការប៉ះពាល់ដល់ដំណើរការផលិតកម្ម និងរាំងស្ទះដល់ចរន្តសេដ្ឋកិច្ចរបស់ប្រទេសនេះ៕

(AFP)

ដោយៈ រ៉ាណេត

ភ្នំពេញៈ រដ្ឋាភិបាលកម្ពុជាបាន និងកំពុងបង្កើនថាមពលអគ្គិសនី ដោយបំលែងចេញពីពន្លឺព្រះអាទិត្យឱ្យបាន៤១០មេហ្គាវ៉ាត់ នៅត្រឹមឆ្នាំ២០២២  ដើម្បីឆ្លើយតបទៅនឹងតម្រូវការប្រើប្រាស់របស់ប្រជាជននៅទូទាំងប្រទេស។

យោងតាមរបាយការណ៍ដែលបង្ហាញដោយក្រសួងរ៉ែ និងថាមពលបានឱ្យដឹងថា គម្រោងទាញយកថាមពលពីពន្លឺព្រះអាទិត្យនេះ បានចាប់ផ្តើមតាំងពីគម្រោងមួយ ដែលមានថាមពលត្រឹមតែ១០មេហ្គាវ៉ាត់ ក្នុងឆ្នាំ២០១៨ ហើយឥឡូវនេះសមត្ថភាពផលិតបានកើនឡើងដល់៩០មេហ្កាវ៉ាត់ ។

ក្រសួងរ៉ែ និងថាមពលបានបង្ហាញថា គម្រោងកែច្នៃថាមពលពន្លឺព្រះអាទិត្យ ទៅជាថាមពលអគ្គិសនីនេះ ជាគំរោងចំនួន៧ផ្សេងទៀត ដែលត្រូវបានអនុម័តហើយរហូតដល់ឆ្នាំ២០២២ ដោយសមត្ថភាពបន្ថែមរហូតដល់ទៅ៤១០មេហ្គាវ៉ាត់ ហើយប្រសិនបើគេប្រៀបធៀបជាមួយនឹងថាមពលអគ្គិសនី ដែលមានកាលពីឆ្នាំ២០១៩ ដែលកម្ពុជាមានអនុភាពថាមពលអគ្គិសនី២.៦៥០មេហ្កាវ៉ាត់ គឺប្រភពថាមពលពីពន្លឺព្រះអាទិត្យនឹងគ្របដណ្តប់ជិត២០ភាគរយ។

ការស្រូបទាញថាមពលពន្លឺព្រះអាទិត្យ មកធ្វើជាថាមពលអគ្គិសនី ត្រូវបានអនុម័តចាប់តាំងពីរាជរដ្ឋាភិបាលព្យាយាម បំពេញតម្រូវការថាមពលសម្រាប់ប្រជាជន និងការអភិវឌ្ឍថ្មីៗបន្ថែម ទៅលើគម្រោងផែនការដែលមានដូចជា ទំនប់វារីអគ្គីសនី រោងចក្រថាមពលដើរដោយធ្យួងថ្ម។

ដោយឡែក គម្រោងថាមពលពន្លឺព្រះអាទិត្យចំនួន៧ ដែលទទួលបានការអនុម័ត និងកំពុងសាងសង់ រួមមាននៅក្នុងខេត្តកំពង់ឆ្នាំង បាត់ដំបង ស្វាយរៀង ពោធិ៍សាត់ និងខេត្តបន្ទាយមានជ័យ។

បច្ចុប្បន្ននេះ ស្ថានីយស្រូបទាញថាមពលពន្លឺព្រះអាទិត្យ កម្លាំង១០មេហ្គាវ៉ាត់ មាននៅក្រុងបាវិតនិងឧទ្យានសូឡា មានកម្លាំង៨០មេហ្គាវ៉ាត់ ស្ថិតនៅក្នុងខេត្តកំពង់ស្ពឺ ហើយក្នុងកំឡុងពេលសាងសង់ ជាការលើកទឹកចិត្តដល់បណ្តាអ្នកវិនិយោគ ក្រុមប្រឹក្សាអភិវឌ្ឍន៍កម្ពុជា មិនបានគិតពន្ធលើការនាំចូលវត្ថុធាតុដើម នាំចូលពីក្រៅប្រទេសរយៈពេល៩ឆ្នាំ ជាពិសេសក្នុងគោលបំណងជំរុញ ឱ្យការធ្វើពិពិធកម្មបង្កើនថាមពលអគ្គិសនី បានគ្រប់តាមផែនការដែលមានកម្លាំង៤១០មេហ្គាវ៉ាត់៕

ដោយវុត្ថា

ភ្នំពេញៈ សហព័ន្ធស្រូវអង្ករកម្ពុជាបង្ហាញរបាយការណ៍ថា ក្នុងរយៈពេល២ខែ នៃឆ្នាំ ២០២០ នេះ កម្ពុជាបាននាំចេញអង្ករបានចំនួន១៣៦,៤៩៩តោន កើនជាង២២% បើធៀបទៅ២ខែដើមឆ្នាំ២០១៩។

ការនាំចេញអង្កររបស់កម្ពុជា ក្នុងខែកុម្ភៈបាននាំចេញជាង៨៦,០០០តោន ដែលកើនជាង៣៥,០០០តោន ធៀបទៅខែមករាឆ្នាំ២០២០។

របាយការណ៍ដដែលបានផ្សព្វផ្សាយ កាលនៅក្នុងដើមខែមីនា ឆ្នាំ ២០២០នេះ បង្ហាញថា   ក្នុងរយះពេល២ខែដើមឆ្នាំនេះគឺ ប្រទេសចិនបានស្រូបយក៣៧% សហគមន៍អឺរ៉ុបរួមទាំងអង់គ្លេស៣០% ប្រទេសនៅក្នុងបណ្តារសហគមន៍អាស៊ាន១៨% និងបណ្តាគោលដៅផ្សេងមានជាង១៤%។

របាយការណ៍ដដែលបញ្ជាក់ទៀតថា បើធៀបខែកុម្ភៈ២០២០ ជាមួយ២០១៩ ឃើញថា កំនើនទៅអ៊ឺរ៉ុបកើនឡើង១២៦% ដោយកើនពី១០០៨០ តោន ទៅ២២៧៥៣តោន។ ទីផ្សារប្រទេសចិនកើន៣៣% ដោយកើនពី២៧១៨៦តោន ទៅ៣៦០៨៥តោន ទីផ្សារក្នុងប្រទេសអាស៊ាន១១៩% កើនពី៨៨២៥តោន ទៅ១៩៣៤៧តោន និងទីផ្សារផ្សេងកើនពី៦៧៧០តោន ដល់ចំនួន៧៨៦៤តោន។ ជារួមសំរាប់ខែកុម្ភៈ២០២០កើន ៦៣% ធៀបទៅខែកុម្ភៈ២០១៩។

សហព័ន្ធស្រូវអង្ករកម្ពុជាពន្យល់ថា មានកក្តាជាច្រើនដែលជំរុញអោយមានការបញ្ជារទិញកើនឡើងដែលក្នុងនោះរួមមាន ទី១ ទីផ្សារសហគមន៍អឺរ៉ុប អាត្រាពន្ធនាំចូលបានធ្លាក់ចុះពី ១៧៥ អឺរ៉ូ មក ១៥០អឺរ៉ូ។ ទី២ កេរ្តិ៍ឈ្មោះអង្ករកម្ពុជាបានកំពុងកើនឡើង ក្រោយកិច្ចផ្សព្វផ្សាយ និងយុទ្ធនាការណ៍នានា លើការប្រឹងប្រែងរបស់កសិករកម្ពុជា លើកាផលឹតស្រូវសរីរាង្គ ការផលឹតស្រូវដែលមាននិរន្តភាព ការផលឹតស្រូវដែលគោរពតាមគោលការណ៍សមធម៌ពាណិជ្ជកម្មជាដើម។

ទី៣ ការធ្វើពិពិធកម្ម ប្រភេទទំនិញអង្ករពីអង្ករ សំរិត មកត្រឹមអង្ករសំរូប ដែលមិនជាប់ពន្ធនាំចូល និងទី៤ ទីផ្សារប្រទេសចិន ដោយសារភាពអស្ចារ្យ របស់សម្តេចអគ្គមហាសេនាធិបតីតេជោហ៊ុនសែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានទៅទស្សនៈកិច្ចក្នុងពេលថ្មីៗនេះ បានអង្រួនបេះដូងប្រជាជនចិន ហើយចាប់ផ្តើមស្គាល់កម្ពុជាកាន់តែខ្លាំង ដែលធ្វើអោយតម្រូវការអ្នកប្រើប្រាស់ និងសួររកអង្ករកម្ពុជានៅតាមទីផ្សារកាន់តែខ្លាំងឡើង(យោងតាមព័ត៌មានពីអ្នកបញ្ជារទិញអង្ករ)៕