ដោយ ហ្សូលី

ភ្នំពេញៈ ការផ្គត់ផ្គង់ប្រេង ហាក់បីដូចជាមានការខ្វះខាត ហើយតម្លៃប្រេងក៏ធ្លាក់ចុះ ខណៈការដឹកជញ្ជូន នៅក្នុងប្រទេសចិនមានភាពរអាក់រអួល ដោយសារការរំខាននៃវីរុសកូរ៉ូណា។

យោងតាមកាសែតWall Street Journal បានរាយការណ៍អំពីការកកស្ទះយ៉ាងខ្លាំងនៅកំពង់ផែចិន ដោយមានការលុបចោលនាវាដឹកទំនិញរាប់សិបគ្រឿង។ កប៉ាល់កុងតឺន័រមួយចំនួន កំពុងធ្វើដំណើរទៅប្រទេសចិនត្រឹមតែ១០ភាគរយប៉ុណ្ណោះ ដែលវាមិនគ្រប់គ្រាន់សម្រាប់ចំណាយលើប្រេងឥន្ធនៈនោះទេ។

Dow Jones តួលេខបង្ហាញពីតម្លៃដែលទាក់ទង នៃភាគហ៊ុនបានធ្លាក់ចុះជាង ៩០០ពិន្ទុហើយ រីឯតម្លៃប្រេងបានធ្លាក់ចុះជិត៥ភាគរយ។

រដ្ឋមន្រ្តីហិរញ្ញវត្ថុមកពីក្រុមG20 បានទទួលស្គាល់ការគំរាមកំហែង ដល់សេដ្ឋកិច្ចពិភពលោក នៅពេលពួកគេបានប្រមូលផ្តុំគ្នា នៅទីក្រុងរីយ៉ាដក្នុងសប្តាហ៍នេះ។ មូលនិធិរូបិយវត្ថុអន្តរជាតិ (IMF) បានទម្លាក់ការព្យាករកំណើនរបស់ខ្លួន សម្រាប់ប្រទេសចិនពី ៦ភាគរយ មកនៅត្រឹម៥,៦ភាគរយ។

មូលនិធិនេះ បានកាត់បន្ថយការប៉ាន់ស្មានកំណើនផលិតផល ក្នុងស្រុករបស់ខ្លួនត្រឹម០,១ភាគរយ ប៉ុន្តែបាននិយាយថា ផលប៉ះពាល់អាចមានកាន់តែច្រើន ប្រសិនបើមេរោគនេះឆ្លងនៅតែបន្តរាលដាលឬមានរយៈពេលយូរជាងនេះ។

យ៉ាងណាមិញ ភាគហ៊ុនសកលបានធ្លាក់ចុះយ៉ាងខ្លាំង កាលពីថ្ងៃច័ន្ទនេះ ដោយ​សារតែការភ័យខ្លាច ចំពោះការរីករាលដាលនៃវីរុសកូរ៉ូណា បានកើនឡើងជាថ្មីម្តងទៀត ដោយមានករណីថ្មីរាលដាលហួសព្រំដែនប្រទេសចិន។

ប្រទេសមួយចំនួនបានរាយការណ៍ពីករណីថ្មីរួមមាន អ៊ីរ៉ង់ អ៉ីតាលី និងកូរ៉េខាងត្បូង។ ប្រទេសចំនួន២៩បានរាយការណ៍អំពីករណីនេះ ទោះបីជាមានចំនួនតិចតួចក៏ដោយ។ ប៉ុន្តែអង្គការសុខភាពពិភពលោក (WHO) បានព្រមានថា “ នេះជាបង្អួចនៃឱកាស” ដើម្បីទប់ស្កាត់ការរីករាលដាលដែលអាចនឹងត្រូវបញ្ចប់”។

ការវិវឌ្ឍមួយក្នុងចំនោមបញ្ហាជាច្រើនទៀតថា ករណីឆ្លងវីរុសកំពុងកើតមានចំពោះមនុស្ស ដែលមិនបានធ្វើដំណើរទៅប្រទេសចិន ឬអ្នកដែលពាក់ព័ន្ធនឹងករណី ដែលត្រូវបានបញ្ជាក់ បង្ហាញថា “វាមិនច្បាស់ទេថាតើវីរុសកំពុងរាលដាលយ៉ាងដូចម្តេច” នេះបើតាមអ្នកនាំពាក្យរបស់អង្គការសុខភាពពិភពលោក (WHO) បាននិយាយ។លោកបន្តថា “យើងកំពុងសង្កេតមើលករណីមួយចំនួន ដែលមិនមានទំនាក់ទំនង នឹងរោគរាតត្បាតច្បាស់លាស់” ។

មជ្ឈមណ្ឌលប្រយុទ្ឋជំងឺឆ្លងសហរដ្ឋអាមេរិក(CDC) បានព្រមានថា “ករណី​ជាច្រើ​ន​ ទំនងជាត្រូវបានគេកំណត់អត្តសញ្ញាណនៅថ្ងៃខាងមុខ”។ នៅក្នុងសហរដ្ឋអាមេរិកទោះបីជាវាបាននិយាយថា “ហានិភ័យសុខភាពភ្លាមៗ” គឺមានកម្រិតទាប។ ទោះយ៉ាងណា CDC បាននិយាយថា ប្រសិនបើវីរុសចាប់ផ្តើមរីករាលដាលយ៉ាងខ្លាំង នៅសហរដ្ឋអាមេរិក“ ប្រព័ន្ធសុខភាពសាធារណៈអាចនឹងលើសកម្រិត”៕

ដោយ ប៊ី

ភ្នំពេញៈ ការថែរក្សាអាគារចាស់គឺជាឱកាសមួយ សម្រាប់បង្កើតតម្លៃសម្រាប់ភ្នំពេ​ញ សង្គម និងវិស័យទេសចរណ៍។ នេះបើយោងតាមអ្នកជំនាញផ្នែកអាជីវកម្មសំណង់។

លោកVasu Poshyanandana ប្រធានក្រុមហ៊ុន Achitect’20 ដែលមានមូលដ្ឋាននៅទីក្រុងបាងកក នៅឯកិច្ចប្រជុំមួយនៅសណ្ឋាគារ Palace Gate Hotel កាលពីម្សិលមិញ ដើម្បីឆ្លើយតបទៅនឹងការរីកដុះដាលនៃអាគារ ដែលកំពុងរីកចម្រើននៅក្នុងរាជធានីនៃកម្ពុជាកាលពីម្សិលម៉ិញថា ការអភិរក្ស និងថែរក្សារមណីយដ្ឋានបេតិកភណ្ឌគឺជាឱកាសមួយ ដើម្បីបង្កើតអគារទាក់ទាញថ្មីដោយប្រើបច្ចេកវិទ្យាទំនើប និងសម្ភារៈដើមទំនើប។

លោកVasu បានថ្លែងថា “ការកែច្នៃអាគារចាស់ៗគឺដើម្បីបង្កើតឱកាសអាជីវកម្មថ្មី និងអាចបង្កើតតម្លៃសម្រាប់សហគមន៍ និងសង្គម”។លោកបន្តថា “សំណង់របស់ប្រទេសកម្ពុជាមានការរីកចម្រើនយ៉ាងខ្លាំង ជាពិសេសនៅក្នុងទីក្រុងភ្នំពេញ ដែលមានអាគារថ្មីៗ អាគារខ្ពស់ៗ ផ្សារទំនើប កាស៊ីណូ បុរី និងលំនៅដ្ឋានលំដាប់ប្រណីតក្នុងរយៈពេលពីរទសវត្សចុងក្រោយនេះ”។

បច្ចុប្បន្នក្រសួងទេសចរណ៍ និងក្រសួងវប្បធម៌ និងវិចិត្រសិល្បៈកំពុងធ្វើការរួមគ្នាដើម្បីអប់រំប្រជាជន នៅលើអាគារសម័យអាណានិគម ដើម្បីរក្សានូវលក្ខណៈប្លែកៗរបស់ពួកគេ។

នៅក្នុងសិក្ខាសាលាដែលរៀបចំឡើងកាលពីសប្តាហ៍មុន លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បានអំពាវនាវឲ្យគម្រោងសាងសង់ថ្មី ត្រូវភ្ជាប់គ្នាជាមួយស្ថាបត្យកម្ម ដែលមានលក្ខណៈជាខ្មែរដើម្បីបង្ហាញពីអត្តសញ្ញាណជាតិនៅក្នុងវិស័យសំណង់៕

ដោយវុត្ថា

ភ្នំពេញៈ សម្តេចតេជោហ៊ុន សែន នាយករដ្ឋមន្ត្រីនៃកម្ពុជាបានឱ្យដឹងថា ហេដ្ឋារច​នាសម្ព័ន្ធចំនួន៣២ខ្សែ ដែលបាននិងកំពុងស្ថាបនា និងស្ថាបនារួចរាល់នៅទូទាំងប្រទេសកម្ពុជា ទទួលបានហិរញ្ញប្បទាន និងជំនួយឥតសំណងពីប្រទេសចិន ខណៈឆ្នាំនេះគឺជាខួបទី១០ នៃភាពជាដៃគូរយុទ្ធសាស្ត្រគ្រប់ជ្រុងជ្រោយរវាងកម្ពុជា និងចិន បន្ទាប់ពីចុះហត្ថលេខាកាលពីឆ្នាំ២០១០។

សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា នៅក្នុងពិធីសម្ពោធដាក់ឱ្យប្រើប្រាស់ផ្លូវជាតិលេខ៥៨ តភ្ជាប់ពីខេត្តបន្ទាយមានជ័យ ទៅខេត្តឧត្តរមានជ័យនាថ្ងៃទី ២៦ ខែកុម្ភៈ ឆ្នាំ ២០២០ នេះ ឱ្យដឹងថា  មកដល់បច្ចុប្បន្នគម្រោងហេដ្ឋារចនាសម្ព័ន្ធផ្លូវថ្នល់ប្រើប្រាស់ហិរញ្ញប្បទាន និងជំនួយឥតសំណងរបស់មិត្តចិន បានសាងសង់រួចរាល់មានចំនួន ២៧ខ្សែ មានប្រវែងសរុប២,៧៧៩គីឡូម៉ែត្រ ។ ចំណែក គម្រោងកំពុងសាងសង់មានចំនួន៥ខ្សែ មានប្រវែងប្រមាណ៤៩៧,២០គីឡូម៉ែត្រ។

ចំណែកស្ពានធំៗ ដែលបានសាងសង់រួចមានចំនួន៨ មានប្រវែងសរុប៧,៤៣៤ ម៉ែត្រ និងស្ពានកំពុងសាងសង់ ដូចជា ស្ពានមិត្តភាពកម្ពុជា-ចិន ក្នុងខេត្តកំពងចាម ស្ទឹងត្រង់-ក្រូចឆ្មារ និងស្ពានឆ្លងកាត់ទន្លេបាសាក់ (សិត្បូ) នៃគម្រោងខ្សែក្រវាត់ក្រុងទី៣ ជាដើម។

សម្តេចតេជោហ៊ុន សែនបានថ្លែងបន្តថា “សមិទ្ធផលស្ពានថ្នល់ ដ៏ធំសម្បើមនៅក្នុងប្រទេសកម្ពុជា គឺភាគច្រើនបានមកពីជំនួយរបស់ចិន បើមិនដូច្នេះទេ មិនអាចកើតឡើងបានឡើយ”។សម្តេចបន្ថែមថា “បើចិនមិនជួយទេ តើនរណាជួយ? ចុះអាអ្នកវិភាគឡប់ៗនេះ បានដឹងទេ?។ បើអ្នកមិនឃើញគម្រោងខាងមុខនេះទេ តែអ្នកកំពុងដើរលើផ្លូវចិនជួយ”។

សម្តេចតេជោបន្តថា រាជរដ្ឋាភិបាលកម្ពុជាមិនមែនត្រូវការតែជំនួយពីចិនទេ ប៉ុន្តែស្វាគមន៍គ្រប់ជំនួយពីប្រទេសជាមិត្ត ដើម្បីយកអភិវឌ្ឍរចនាសម្ព័ន្ធ នៅក្នុងប្រទេសកម្ពុជា។ កម្ពុជាត្រូវការរឹតបន្តឹងមិត្តភាព និងលើកកម្ពស់ចំណងសហប្រតិបត្តិការជាមួយគ្រប់បណ្តាប្រទេសនៅលើពិភពលោក៕

ដោយវុត្ថា

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បានបញ្ជាក់ថា រាជរដ្ឋាភិបាលកម្ពុជាដឹកនាំដោយ គណបក្សប្រជាជនកម្ពុជា មិនយកពន្ឋដីកសិកម្ម ១០០ឆ្នាំតទៅមុខទៀត ព្រោះសុខទុក្ខប្រជាពលរដ្ឋ គឺជាសុខទុក្ខផ្ទាល់របស់ សម្តេច។

សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា នៅក្នុងពិធីសម្ពោធដាក់ឱ្យប្រើប្រាស់ផ្លូវជាតិលេខ៥៨ តភ្ជាប់ពីខេត្តបន្ទាយមានជ័យទៅខេត្តឧត្តរមានជ័យ នាថ្ងៃទី ២៦ ខែកុម្ភៈ ឆ្នាំ ២០២០ នេះ បានឱ្យដឹងថា ប្រសិនបើប្រជាពលរដ្ឋខ្មែរនៅតែបន្តគាំទ្រ និងបោះឆ្នោតអោយ គណបក្សប្រជាជនកម្ពុជា ដឹកនាំប្រទេសជាតិតទៅមុខទៀត គឺរាជរដ្ឋាភិបាលកម្ពុជា គឺប្តេជ្ញាមិនយកពន្ធដីកសិកម្មពីប្រជាពលរដ្ឋខ្មែរ រយៈពេល ១០០ ឆ្នាំតទៅមុខទៀត។

សម្តេចតេជោ បានសម្តែងការអរគុណដល់បងប្អូនប្រជាពលរដ្ឋក្នុងខេត្តបន្ទាយមានជ័យទាំងអស់ និងបងប្អូនប្រជាពលរដ្ឋខ្មែរទូទាំងប្រទេសដែលបានគាំទ្រ និងបោះឆ្នោតអោយ គណបក្សប្រជាជនកម្ពុជា ដើម្បីមានឱកាសកសាងអភិវឌ្ឍន៍ប្រទេសកម្ពុជាអោយកាន់តែរីកចម្រើនជឿនលឿនទៅមុខ

វត្តមានសម្តេចតេជោ ហ៊ុន សែន នាយករដ្ឋមន្រ្តីកម្ពុជា នៅលើទឹកដីនៃខេត្តបន្ទាយមានជ័យថ្ងៃនេះ គឺបាននាំមកនូវក្តីសប្បាយរីករាយ និងក្តីសង្ឃឹមប្រកបដោយជំនឿជឿជាក់លើការដឹកនាំរបស់ សម្តេចប្រមុខដឹកនាំដែលបាននឹងកំពុងធ្វើអោយកម្ពុជាកាន់តែរីកចម្រើនទៅមុខពិតប្រាកដ។

ប្រជាពលរដ្ឋទូទាំងខេត្តបន្ទាយមានជ័យ បានអរគុណ សម្តេចតេជោនាយករដ្ឋមន្រ្តី ដែលបានកសាងផ្លូវជាតិលេខ ៥៨ ១ខ្សែ មានប្រវែង ១៧៤គីឡូម៉ែត្រ ដែលជាផ្លូវក្រវ៉ាត់ព្រំដែនកម្ពុជា និងថៃ ដ៏មានសក្តានុពល តភ្ជាប់ពីក្រុងប៉ោយប៉ែត ខេត្តបន្ទាយមានជ័យ ឆ្ពោះទៅកាន់ក្រុងសំរោង ខេត្តឧត្តរមានជ័យ ដែលបានចំណាយទឹកប្រាក់អស់ប្រមាណ ១៧១ លានដុល្លារអាមេរិក៕

ដោយវុត្ថា

ភ្នំពេញ៖ រដ្ឋាភិបាលតាមរយៈរដ្ឋលេខាធិការដ្ឋានអាកាសចរស៊ីវិល បានជំរុញឱ្យក្រុមហ៊ុន Cambodia Airport ពន្លឿនការការសាងសង់អាកាសយានដ្ឋានអន្តរជាតិក្រុងព្រះសីហនុ ធ្វើយ៉ាងណាឱ្យចប់នៅពាក់កណ្តាលឆ្នាំ២០២២ ខាងមុខនេះ ខណៈក្រុមហ៊ុនមួយនេះ បាននឹងកំពុងសាងសង់យ៉ាងសកម្ម។

នេះ បើយោងតាមកិច្ចប្រជុំមន្ត្រីជំនាញបច្ចេកទេសនាថ្ងៃទី ២៥ ខែកុម្ភៈ ឆ្នាំ ២០២០ នេះ រវាង លោក នាយឧត្តមសេនីយ៍ បណ្ឌិត ម៉ៅ ហាវណ្ណាល់ រដ្ឋមន្រ្តី ទទួលបន្ទុក រដ្ឋលេខាធិការដ្ឋានអាកាសចរស៊ីវិល និង លោក Alain Brun នាយកប្រតិបត្តិក្រុមហ៊ុនសម្បទានអាកាសយានដ្ឋានកម្ពុជានិងសហការី ។

កិច្ចប្រជុំផ្តោតលើការពន្លឿនការសាងសង់តាមផែនការរបស់អាកាសយានដ្ឋានអន្តរជាតិក្រុងព្រះសីហនុ ធ្វើយ៉ាងណាឱ្យចប់នៅពាក់កណ្តាលឆ្នាំ២០២២ តាមផែនការសកម្មភាពដូចខាងក្រោម៖

១. ការរៀបចំស្ថានីយ៍អ្នកដំណើរថ្មី

-ដំណាក់កាលទី១ គឺសម្រាប់ផែនការឆ្នាំ២០២០ ដល់២០៣០ ដែលអាចទទួលអ្នកដំណើរបាន ៣, ៦ លាននាក់
-ដំណាក់កាលទី២ គឺសម្រាប់ផែនការ សម្រាប់ឆ្នាំ ២០៣០ ដល់ ២០៤០ គឺសម្រាប់ទទួលអ្នកដំណើរឱ្យបាន៥ លាននាក់តែបើប្រទេសកម្ពុជាមានការរីកចម្រើន និងមានអ្នកដំណើរច្រើន ក្រុមហ៊ុននឹងពង្រីករហូតដល់អាចទទួលអ្នកដំណើរ ១០ លាននាក់។

២. ការពង្រីក និងពង្រឹងផ្លូវរត់ Runway ផ្លូវរត់ពី ចំងាយ២៥០០ មែត្រ ទៅ ៣៣០០ មែត្រ
៣. ការពង្រីក និងពង្រឹងផ្លូវបរ Taxi ways ចំងាយ ៤២០ មែត្រ
៤. ការសាងសង់ចំណតយន្តហោះ សម្រាប់ដំណាក់កាលទី១ អាចមានសមត្ថភាពចតបាន ១៣ យន្តហោះ និងដំណាក់កាលទី២ អាចចតបាន១៩ យន្តហោះ៕

ដោយ ៖ រ៉ាណេត

ភ្នំពេញ ៖ នៅព្រឹកថ្ងៃទី២៦ ខែកុម្ភៈ ឆ្នាំ២០២០នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង លោក វ៉ាង វិនធៀន (Wang Wentian) ឯកអគ្គរដ្ឋទូតចិនប្រចាំកម្ពុជា បានអញ្ជើញ ជាអធិបតីដ៏ខ្ពង់ខ្ពស់ សម្ពោធដាក់ឱ្យ ប្រើប្រាស់ផ្លូវជាតិ លេខ៥៨ ដែលជាផ្លូវក្រវ៉ាត់ព្រំដែនកម្ពុជា និងថៃ មានប្រវែងជាង ១៧៤គីឡូម៉ែត្រ តភ្ជាប់ពីក្រុងប៉ោយប៉ែត ខេត្តបន្ទាយមានជ័យ ទៅដល់ក្រុងសំរោង ខេត្តឧត្តរមានជ័យ។

ផ្លូវនេះបានចំណោយថវិកាសាងសង់១២២.៩៨ លានដុល្លារអាមេរិក ដែលជាហិរញ្ញប្បទានពីរដ្ឋាភិបាលចិន រួមជាមួយថវិកាបដិភាគរបស់រាជរដ្ឋាភិបាលកម្ពុជា សម្រាប់ដោះស្រាយបញ្ហាផលប៉ះពាល់នានា ការបោសសម្អាតគ្រាប់មីន និងយុទ្ធភ័ណ្ឌមិនទាន់ផ្ទុះ និងពន្ធអាករជាដើម។

ផ្លូវជាតិលេខ៥៨ ដែលមានប្រវែងសរុប ១៧៤.១៦គីឡូម៉ែត្រ តភ្ជាប់ពីក្រុងប៉ោយប៉ែត ខេត្តបន្ទាយមានជ័យរហូតដល់ក្រុងសំរោង ខេត្តឧត្តរមានជ័យ គឺក្នុងនោះផ្លូវមេមានប្រវែង ១៦៥.១៨គីឡូម៉ែត្រ។ ផ្លូវនេះឆ្លងកាត់ខេត្តបន្ទាយមានជ័យប្រវែង ៩២គីឡូម៉ែត្រ និងខេត្តឧត្តរមានជ័យប្រវែង ៧៣.១៨គីឡូម៉ែត្រ និងផ្លូវខ្នែងចំនួន ០៤ខ្សែ មានប្រវែងសរុប ៨.៩៨គីឡូម៉ែត្រ បំបែកចេញពីផ្លូវជាតិលេខ៥៨ ចូលទៅច្រកទ្វារព្រំដែនកម្ពុជា-ថៃ អូរបីជាន់, បឹងត្រកួន, ជប់គរគី និងថ្មដូន៕

ដោយៈ រ៉ាណេត

ភ្នំពេញៈ មនុស្សគ្រប់រូបសុទ្ធតែមានក្ដីប្រាថ្នា ចង់រស់នៅប្រកបដោយភាពសុខស្រួល មានភាពកក់ក្ដៅ ព្រមគ្នាមួយនឹងសុវត្តិភាពផ្នែកហិរញ្ញវត្ថុផងដែរ ប៉ុន្តែក្ដីប្រាថ្នាមួយនេះហាក់ពិបាកក្នុងការសម្រេចបានណាស់។

លោកង៉ែត ជូ អ្នកវិភាគសេដ្ឋកិច្ច និងជាអ្នកវិនិយោគនៅក្នុងវិស័យអចលនទ្រព្យផងដែរនោះបានលើកឡើងថា សុវត្ថិភាពហិរញ្ញវត្ថុ អាចកើតមានបានដរាបណាអ្នកចេះអាចមានលទ្ធភាពក្នុងការគ្រប់គ្រងឱកាស ជាពិសេសមានភាពអំណត់ និងចំណេះដឹងពីផ្នែកហិរញ្ញវត្ថុជាមុនសិន។

លោកបានបញ្ជាក់ថា “សំរាប់អ្នកមានចំណេះដឹងហិរញ្ញវត្ថុ គ្រាន់តែអត់ញុំាកាហ្វេ១ថ្ងៃ១កែវ ហើយសន្សំប្រាក់ ដើម្បីវិនិយោគក៏អាចមានភាពជោគជ័យ ផ្នែកហិរញ្ញវត្ថុបានដែរ”។លោកបន្តទៀតថា “ប្រសិនបើអ្នកសន្សំប្រាក់២ដុល្លារកន្លះ សំរាប់កាហ្វេ១កែវជារៀងរាល់ថ្ងៃ ក្នុង១ឆ្នាំអ្នកអាចសន្សំបាន៩១២,៥ដុល្លារ ហើយបើអ្នកសន្សំបែបនេះ ជារៀងរាល់ថ្ងៃ និងយកប្រាក់ទៅវិនិយោគជារៀងរាល់ឆ្នាំម្តង ជាមួយនឹងផលចំណេញផ្គូបប្រចាំឆ្នាំ១៥ ភាគរយ នោះអ្នកនឹងទទួលបាន”។

លោកបានលើកជាអនុសាសន៍មួយចំនួនមកបញ្ជាក់ ដូចជា ទី១ សំរាប់អ្នកមានអាយុ២០ឆ្នាំ ដល់ពេលអ្នកមានអាយុ៥០ឆ្នាំ អ្នកនឹងមានប្រាក់សរុបជាង៤០ម៉ឺនដុល្លាអាមេរិក។ ទី២ សំរាប់អ្នកមានអាយុ២៥ឆ្នាំ ដល់ពេលអ្នកមានអាយុ៥០ឆ្នាំ អ្នកនឹងមានប្រាក់សរុបជាង១៩ម៉ឺនដុល្លាអាមេរិក។ ទី៣ សំរាប់អ្នកមានអាយុ៣០ឆ្នាំ ដល់ពេលអ្នកមានអាយុ៥០ឆ្នាំ អ្នកនឹងមានប្រាក់សរុបជាង៩ម៉ឺនដុល្លាអាមេរិក។

ប្រសិនបើអ្នកជាអ្នកវិនិយោគពិតប្រាកដ ឱកាសនៃការវិនិយោគដែលទទួលបានផលចំណេញផ្គួបប្រចាំឆ្នាំ១៥ភាគរយមិនលំបាករកនោះទេ៕