ដោយវុត្ថា

ភ្នំពេញៈ ក្រសួងសាធារណៈការ និងដឹកជញ្ជូន គ្រោងបើកការរដ្ឋានស្ថាបនាលើកកម្ពស់ផ្លូវជាតិលេខ៤១ តភ្ជាប់ពីផ្លូវជាតិលេខ៤  ទៅកាន់ផ្លូវជាតិលេខ៣នៅឆ្នាំនេះ ឬឆ្នាំក្រោយ ខណៈការចចារប្រាក់កម្ចីយកមកស្ថាបនាផ្លូវនេះ ក៏ត្រូវបានបញ្ចប់ផងដែរ។

លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន បានឱ្យដឹងកាលពីពេលថ្មីៗនេះ ថា សម្រាប់ផ្លូវជាតិលេខ៤១នេះ ក្រសួងបានចរចាប្រាក់កម្ចីរួចហើយ  នៅឡើយតែក្រសួងសេដ្ឋកិច្ច និងហិរញ្ញវត្ថុទៅចុះហត្ថលេខាយកប្រាក់ទាំងនេះ មកស្ថាបនាប៉ុណ្ណោះ ។

លោកទេសរដ្ឋមន្ត្រីថា “ប្រាក់កម្ចីបានចរចារួចហើយ ខ្ញុំសង្ឃឹមថានៅក្នុងឆ្នាំនេះ ឬ ឆ្នាំក្រោយ ទើបអាចបើករដ្ឋានស្ថាបនាបានដោយចាក់ជាប្រភេទAC “។

លោកបន្តថា គម្រោងទាំងបីរួមមានគម្រោងផ្លូវ៤១នេះ តភ្ជាប់ពីផ្លូវជាតិលេខ៤ មកលេខ៣ ។ គម្រោងផ្លូវលេខ៣១ពីតំបន់បាយគូស ចូលមកស្រុកកំពង់ត្រាច។គម្រោងផ្លូវលេខ៣៣ពីកំពត មកខេត្តកែប បានចរចាចប់សព្វគ្រប់អស់ហើយ ត្រៀមតែក្រសួងសេដ្ឋកិច្ច និងហិរញ្ញវត្ថុទៅចុះហត្ថលេខាលើប្រាក់កម្ចីនេះ។

លោកបន្តថា “អញ្ចឹងពេលណាវាអាស្រ័យលើក្រសួងសេដ្ឋកិច្ច និងហិរញ្ញវត្ថុប៉ុណ្ណោះ ពេលចុះហត្ថលេខាហើយទើបបើកការដ្ឋានបាន”។

ផ្លូវជាតិលេខ៤១ ឆ្លងកាត់កំពង់ស្ពឺ តាកែវ និងកំពត កន្លងមកបានរងការខូចខាតដោយសារជំនន់ទឹកភ្លៀង និងការដឹកជញ្ជូនធ្ងន់ៗឆ្លងកាត់ ខណៈដែលផ្លូវជាតិលេខ៤បានផ្អាកចរាចរណ៍ខ្លះៗ ដោយសារការជន់លិចកាលពីឆ្នាំ២០១៨។

ផ្លូវជាតិលេខ៤១ មានប្រវែងជាង៩៥គីឡូម៉ែត្រ ដោយរាប់ចាប់ពីថ្នល់ទទឹងចំណុចប្រសព្វជាមួយផ្លូវជាតិលេខ៤  ដល់ស្រុកជុំគិរីត្រូវបានស្ថាបនាម្តងរួចហើយ កាលពីថ្ងៃទី១៨ ឧសភា ឆ្នាំ២០១១ ជាប្រភេទផ្លូវក្រាលថ្ម ចាក់កៅស៊ូ២ជាន់ប្រភេទDBST ដែលបានចំណាយថវិកាសរុបប្រមាណ៤៦លានដុល្លារអាមេរិក ដោយប្រើរយៈពេលស្ថាបនាចំនួន៤០ខែ បញ្ចប់នៅឆ្នាំ២០១៤ ។

នៅតាមបណ្តោយផ្លូវជាតិលេខ៤១ នាពេលបច្ចុប្បន្ននេះ កំពុងតែបង្ហាញពីសក្ដានុពល និងកំពុងទាក់ទាញលើការវិនិយោគលើគម្រោងជាច្រើន រួមមាន គម្រោងបង្កើតរោងចក្រ សហគ្រាស សិប្បកម្ម ឃ្លាំង និងគម្រោងដីឡូតិ៍ ដែលស្របតាមការកំណត់ទីតាំងរបស់រដ្ឋាភិបាល ហើយក៏មានគម្រោងអភិវឌ្ឍន៍ វិស័យលំនៅដ្ឋានតម្លៃកម្រិតមធ្យម និងក្រោមមធ្យមផងដែរ។

អភិបាលខេត្តកំពង់ស្ពឺ លោក វ៉ី សំណាង បានទទួលស្គាល់ពីតម្រូវការនៃការប្រើប្រាស់ដីនៅតំបន់ស្ថិតតាមបណ្តោយផ្លូវជាតិ៤១ ដោយលោកបានអះអាងថា ភាគច្រើនគម្រោងនៅតំបន់នេះ ជាគម្រោងបង្កើតទីតាំងរោងចក្រច្រើនជាងលំនៅដ្ឋាន។  លោកបន្តថា នៅតំបន់ហ្នឹងភាគច្រើនជាគម្រោងរោងចក្រ និងសិប្បកម្មកម្រិតតូច និងមធ្យម ហើយចំពោះគម្រោងអភិវឌ្ឍលំនៅដ្ឋាន នៅមិនទាន់មានលក្ខណៈធំដុំនៅឡើយនោះទេ។

លោកបានបន្តទៀតថា តាមការស្នើសុំពីសំណាក់ក្រុមហ៊ុនអភិវឌ្ឍន៍ ក៏ដូចជាការសម្រេចអនុម័តរបស់រដ្ឋាភិបាល តាមរយៈក្រុមប្រឹក្សាអភិវឌ្ឍន៍កម្ពុជា CDC កាលពីពេលកន្លងទៅនេះ ភាគច្រើនរោងចក្រ ដែលទៅតាំងនៅតាមតំបន់ផ្លូវលេខ៤១ ជារោងចក្រផលិតស្បែកជើង រោងចក្រផលិតកាបូប រោងចក្រផលិតគ្រឿងបង្គុំ និងរោងចក្រផលិតគ្រឿងបរិក្ខាអគ្គិសនី ហើយក្រៅពីនេះជាប្រភេទសិប្បកម្មកម្រិតតូច និងមធ្យម៕

ដោយវុត្ថា

ភ្នំពេញ៖ លោក ជាម ច័ន្ទសោភ័ណ អភិបាលខេត្តត្បូងឃ្មុំ បានប្តេជ្ញាជំរុញការអភិវឌ្ឍក្រុងសួងឱ្យក្លាយជាទីក្រុងស្អាតចំណាត់ថ្នាក់លេខ១ ខណៈសង្កាត់ និងឃុំទាំង៦៣ទៀត ក្នុងខេត្តត្បូងឃ្មុំ មានការអភិវឌ្ឍន៍រីកចម្រើនដែលធ្វើឲ្យកម្រិតជីវភាពពលរដ្ឋធូរធារ។

លោក ជាម ច័ន្ទសោភ័ណ អភិបាលខេត្តត្បូងឃ្មុំ នៅក្នុងពិធីសម្ពោធសាលាសង្កាត់វិហារលួង នៅថ្ងៃទី ២៥ កុម្ភៈ ២០២០នេះ ឱ្យដឹងថា សង្កាត់វិហារលួង និងសង្កាត់សួង ក្នុងក្រុងសួង បាននឹងកំពុងកសាងហេដ្ឋារចនាសម្ព័ន្ធនានា កែលម្អសោភ័ណ្ឌភាពក្រុង ដោយស្ថាបនាផ្លូវ ពីផ្លូវដីមកក្រាលគ្រួសក្រហម ដោយបន្តចាក់បេតុងនិងអ៊ុតកៅស៊ូ ធ្វើនិងជួសជុលប្រព័ន្ធលូ ដាំបង្គោលបំពាក់អំពូលភ្លើងបំភ្លឺផ្លូវ លម្អសោភ័ណ្ឌភាពនាពេលរាត្រី ធ្វើសួនច្បារផ្កាចម្រុះពណ៍ ពិសេសថែរក្សាអនាម័យបរិស្ថានឲ្យបានស្អាតល្អ។

លោកបញ្ជាក់ថា ចំនុចទាំងអស់ខាងលើនេះហើយដែលត្រូវបន្តកសាង និងកែលម្អដោយប្តេជ្ញាជំរុញការអភិវឌ្ឍក្រុងសួង ឲ្យក្លាយជាទីក្រុងស្អាតចំណាត់ថ្នាក់លេខ១ តែថាបើចង់សម្រេចទៅបាននោះ គឺត្រូវមានការចូលរួមពីគ្រប់ភាគី ទាំងមន្ត្រីរាជការ និងប្រជាពលរដ្ឋដែលរស់នៅទីនេះ រួមគ្នាចាត់ទុកគ្រប់កន្លែងទាំងអស់នៅទីក្រុងសួង ឲ្យដូចជានៅកន្លែងធ្វើការ និងផ្ទះរបស់ខ្លួនដូចគ្នា។

យោងតាមរបាយការណ៍របស់រដ្ឋបាលខេត្តត្បូងឃ្មុំ បានផ្សព្វផ្សាយកន្លងមកនេះបង្ហាញថា ក្រុងសួង ជាក្រុងមួយស្ថិតនៅក្នុងចំណោម ក្រុងស្រុកទាំង៧ នៃខេត្តត្បូងឃ្មុំ ដែលជាខេត្តថ្មី ទើបតែបំបែក ចេញពីខេត្តកំពង់ចាម។ ក្រុងសួង ព័ទ្ធជុំវិញដោយបណ្តាឃុំនៃស្រុកត្បូងឃ្មុំ មាន២សង្កាត់ មានភូមិចំនួន៣០ និងមានផ្ទៃដីសរុបចំនួន ៨,២៨០.៦៤ ហិចតា មានប្រជាពលរដ្ឋរស់នៅចំនួន ៨,១៧៧ គ្រួសារ ស្មើនឹង ៣៧,៥៥១ នាក់ ស្រី ១៨,៧៣៥ នាក់ ប្រជាពលរដ្ឋប្រកបមុខរបរ កសិកម្មជាចំបង ប្រមាណ៧០% ក្រៅពីនេះ ប្រកបមុខរបរលក់ដូរ សិប្បកម្ម សេវាកម្ម មន្រ្តីរាជការ និងកម្មករ៕

ដោយ ប៊ី

ភ្នំពេញ៖ វិនិយោគិនមហាសេដ្ឋី Warren Buffett និយាយថា ការផ្ទុះឡើងនៃជំងឺ COVID-19 នៅចិនបានធ្វើឱ្យកំណើនសេដ្ឋកិច្ចធ្លាក់ចុះ និងបង្កឱ្យមានការខាតបង់ទីផ្សារភាគហ៊ុន ប៉ុន្តែលោកនៅតែមានទំនុកចិត្តលើអនាគតរយៈពេលវែងនៃអាជីវកម្មអាមេរិក។

លោក Buffett បានបង្ហាញខ្លួននៅស្ថានីយទូរទស្សន៍ CNBC កាលពីថ្ងៃ ចន្ទ បន្ទាប់ពីបានចេញលិខិតប្រចាំឆ្នាំរបស់លោកទៅម្ចាស់ភាគហ៊ុន Berkshire Hathaway Inc។ លោក Buffett បាននិយាយថារ បាយការណ៍ដែលលោកទទួលបានពី Berkshire Hathaways ការធ្វើជំនួញជាង ៩០ និងការវិនិយោគភាគហ៊ុនបង្ហាញថា ជំនួញមានសភាពទន់ខ្សោយជាងពេលបច្ចុប្បន្ននេះ ជាងកាលពី ៦ ខែមុន ប៉ុន្តែលោកនៅតែមានសុទិដ្ឋិនិយម។

លោក បាននិយាយថា “២០ ឬ ៣០ ឆ្នាំចាប់ពីពេលនេះ អាជីវកម្មអាមេរិក ប្រហែលជានៅពាសពេញពិភពលោកនឹងប្រសើរជាងសព្វថ្ងៃ”។

ភាគច្រើននៃហាងប្រហែល ១០០០ របស់ក្រុមហ៊ុន Berkshire Hathaway នៅក្នុងប្រទេសចិនត្រូវបានបិទទ្វារក្នុងកំឡុងពេលផ្ទុះនៃជំងឺCOVID-19 ហើយក្រុមហ៊ុនជាច្រើនទៀតកំពុងរងនូវបញ្ហាខ្សែសង្វាក់ផ្គត់ផ្គង់ទាក់ទងនឹងការធ្លាក់ចុះនៃអាជីវកម្ម ក្នុងពេលមានវិបត្តិសុខភាពសាធារណៈ។

ទីផ្សារភាគហ៊ុនសហរដ្ឋអាមេរិកមានការធ្លាក់ចុះយ៉ាងខ្លាំងកាលពីថ្ងៃចន្ទ ដោយសារជំងឺឆ្លងវីរុសនេះឆ្លងរាលដាលហួសពីប្រទេសចិនក្នុងប៉ុន្មានថ្ងៃថ្មីៗនេះ ដោយបង្កើនការភ័យខ្លាចអំពីផលប៉ះពាល់ផ្នែកសេដ្ឋកិច្ចរបស់ខ្លួននៅលើទ្វីបមួយចំនួន។ អាជ្ញាធរនៅក្នុងប្រទេសអ៊ីតាលីកំពុងប្រយុទ្ធប្រឆាំងនឹងការផ្ទុះឡើងនៃជំងឺដ៏ធំលើកដំបូងរបស់អឺរ៉ុប ខណៈប្រធានាធិបតីកូរ៉េខាងត្បូងបាននិយាយថា លោកបានដាក់ប្រទេសរបស់ខ្លួនឱ្យមានការប្រុងប្រយ័ត្នខ្ពស់បំផុតដើម្បីប្រយុទ្ធប្រឆាំងនឹងការឆ្លងរាលដាលនេះ។

នៅទីផ្សារហ៊ុន Wall Street ផ្សារហ៊ុនរបស់ក្រុមហ៊ុន Dow Jones បានធ្លាក់ចុះច្រើនជាង ១,០០០ ពិន្ទុកាលពីថ្ងៃច័ន្ទ ឬប្រហែល ៣,៦% ដល់ ២៧,៩៦១ ។ សន្ទស្សន៍ផ្សេងទៀតបានឃើញការធ្លាក់ចុះគួរឱ្យកត់សម្គាល់ស្រដៀងគ្នានេះដែររួមមានក្រុមហ៊ុន Nasdaq ធ្លាក់ចុះ ៣,៧% និងសន្ទស្សន៍ភាគហ៊ុនរបស់ក្រុមហ៊ុន S&P 500-stock ធ្លាក់ចុះ ៥,៦ ភាគរយ៕

ដោយ ៖ រ៉ាណេត

ភ្នំពេញ ៖ តបទៅនឹងតម្រូវការជាក់ស្ដែងរបស់ប្រជាពលរដ្ឋខ្មែរមួយចំនួនដែលតែងចាកចេញទៅស្វែងរកសេវាព្យាបាល និងថែទាំសុខភាពនៅតាមបណ្តាប្រទេសជឿនលឿន ក៏ដូចជាប្រទេសជិតខាងនោះ នៅពេលឆាប់ៗខាងមុខនេះ វត្តមានមន្ទីរពេទ្យអន្តរជាតិដ៏ធំមួយ ដែលមានដើមទុនវិនិយោគជិត៥០០លានដុល្លារ នឹងបង្ហាញវត្តមាននៅក្នុងរាជធានីភ្នំពេញ។

ក្រោមការមើលឃើញពីភាពជាក់ស្ដែងពីសន្តិសុខសង្គម ស្ថិរភាពនយោបាយ និងកំណើនសេដ្ឋកិច្ច ជាពិសេសតម្រូវការរបស់ប្រជាពលរដ្ឋកម្ពុជា ក្រុមហ៊ុន ROYAL CAMBODIA HOSPITAL Co,.Ltd បានសម្រេចបណ្តាក់ទុនវិនិយោគចំនួន ៤៧៨លានដុល្លារសហរដ្ឋអាមេរិក ដើម្បីបង្កើតមន្ទីរទេព្យលំដាប់អន្តរជាតិ ដែលមានទ្រង់ទ្រាយ ផ្ទុករហូតដល់ប្រមាណ១៥០០គ្រែ និងអាចផ្តល់ឱកាសការងារចំរុះបានជាង១៥០០កន្លែង។

គម្រោងសាងសង់ និងអាជីវកម្មមន្ទីរពេទ្យអន្តរជាតិ ROYAL CAMBODIAN HOSPITAL CO., LTD ដែលទើបទទួលបានការគាំទ្រ និងអនុម័តពីសំណាក់រដ្ឋាភិបាលមួយនេះ មានទីតាំងស្ថិតនៅតាមបណ្តោយមហាវិថីសម្តេចតេជោ ហ៊ុន សែន ភូមិស្រុកចេក និងភូមិព្រែកថ្លឹង សង្កាត់ជើងឯក ខណ្ឌដង្កោ រាជធានីភ្នំពេញ ដែលជាបណ្តុំមជ្ឈមណ្ឌលពាណិជ្ជកម្មទំនើប និងលំនៅដ្ឋានកម្រិតអភិជន។

បច្ចុប្បន្ន វិស័យសុខាភិបាលកម្ពុជាបានបង្ហាញពីឧត្តមភាព និងការរីកចម្រើនជាបន្តបន្ទាប់ ដែលក្នុងនោះបានបង្កើនទំនុកចិត្តដល់បណ្តាអ្នកវិនិយោគក្នុងវិស័យពាក់ព័ន្ធឱ្យចូលមកបង្កើតអាជីវកម្មផ្នែកសុខាភិបាលជាបន្តបន្ទាប់។ ជាក់ស្ដែង ការវិនិយោគលើវិស័យសុខាភិបាលបង្កើតមន្ទីរពេទ្យលំដាប់អន្តរជាតិនៅកម្ពុជាកាន់តែមានកំណើនជាបន្តបន្ទាប់ ដូចជាមន្ទីរពេទ្យជោរៃ មន្ទីរពេទ្យ រ៉ូយ៉ាល់រតនៈ មន្ទីរពេទ្យរ៉ូយ៉ាល់ភ្នំពេញ មន្ទីរពេទ្យពហុព្យាបាល អន្តរជាតិ ខេមា មន្ទីរពេទ្យ សាន់រ៉ាយ និងមន្ទីរពេទ្យអន្តរជាតិ សែនសុខ ជាដើម៕