ដោយ ប៊ី

ភ្នំពេញៈ ក្រុមហ៊ុនអាមេរិកមួយចំនួន បានផ្លាស់ប្តូរផលិតកម្មចេញពីចិនមកកាន់កម្ពុជា និងវៀតណាម ដើម្បីគេចពីការបិទទ្វារ ដោយសារជំងឺ COVID-19។

ក្រុមហ៊ុនAzazie ដែលលក់រាយសម្លៀកបំពាក់កូនក្រមុំ តាមអ៊ិនធឺរណែតដែលមានទីស្នាក់ការនៅរដ្ឋSan Jose មានរោងចក្រចំនួន៥០ នៅទូទាំងប្រទេសចិន ប៉ុន្តែបានផ្លាស់ប្តូរផលិតកម្មរបស់ខ្លួនមួយចំនួន ទៅកាន់ប្រទេសកម្ពុជា និងប្រទេសវៀតណាមក្នុង រយៈពេលប៉ុន្មានសប្តាហ៍ថ្មីៗនេះ។

លោកស្រី Ranu Coleman ប្រធានផ្នែកទីផ្សាររបស់ក្រុមហ៊ុន Azazie បាននិយាយថា “ខ្ញុំនឹងនិយាយដោយស្មោះត្រង់ វា (ជំងឺ COVID-19) កំពុងជះឥទ្ធិពលដល់យើង។ ភាគច្រើននៃទីផ្សារអាពាហ៍ពិពាហ៍ ទាមទារការធ្វើដោយដៃដែលមានជំនាញ ហើយវាពិតជាលំបាកណាស់ ក្នុងការស្វែងរកវានៅក្រៅប្រទេសចិន”។ លោកស្រីបានបន្ថែមថា “កម្មករចិនមួយចំនួន បានបន្តធ្វើការនៅក្នុងរោងចក្រ បើទោះបីជាមានការបិទទ្វាររោងចក្រ ដោយធ្វើដោយដៃ និងធ្វើការពីផ្ទះក៏ដោយ”។

ប៉ុន្តែក្រុមហ៊ុនពហុជាតិជាច្រើន កំពុងចាក់ឫសយ៉ាងជ្រៅនៅក្នុងផលិតកម្មនៅចិន ធ្វើឱ្យផលិតកម្មរបស់ពួកគេពិបាកក្នុងការផ្លាស់ប្តូរ។ ក្រុមហ៊ុន Apple កាលពីសប្តាហ៍មុនបានព្រមានថាខ្លួនរំពឹងថា នឹងមានការធ្លាក់ចុះនៃគោលដៅប្រាក់ចំណូល នៅក្នុងត្រីមាសបច្ចុប្បន្ន ដោយសារតែការផលិតទូរស័ព្ទ iPhoneនៅប្រទេសចិន និងតម្រូវការទាបពីអតិថិជនចិន។

លោក Mault ជាស្ថាបនិកក្រុមហ៊ុន BioIntelliSense បាននិយាយថា មានការចាប់ផ្តើមពិចារណាផ្លាស់ប្តូរ ការផលិតឧបករណ៍វេជ្ជសាស្រ្តរបស់ខ្លួន ទៅកាន់ទីតាំងមួយផ្សេងទៀតនៅអាស៊ី ម៉ិចស៊ិកូ ឬសហរដ្ឋអាមេរិក។

លោកបានមានប្រសាសន៍ថា “ប៉ុន្តែវាប្រហែលធ្វើឱ្យយើងផ្លាស់ប្តូរទីតាំង ឧបករ​ណ៍ និងទទួលបានខ្សែសង្វាក់ផលិតកម្ម ដែលស្ថិតក្នុងការពិចារណាឥឡូវនេះ យើងកំពុងសម្លឹងមើលសេណារីយ៉ូ ដែលអាចជឿជាក់បានជាងមុន ដើម្បីបន្តធ្វើនៅក្នុងប្រទេសចិន”។

ក្រុមហ៊ុនគ្រោង នឹងចាប់ផ្តើមដឹកជញ្ជូនផលិតផលថ្មីរបស់ខ្លួន ដូចជាឧបករណ៍ចាប់សញ្ញាដើរដោយថាមពលអាគុយ ដែលតាមដានសញ្ញាសំខាន់ៗ របស់អ្នកជំងឺទៅកាន់មន្ទីរពេទ្យនៅចុងខែមីនា ប៉ុន្តែពេលនេះមានទិសដៅដល់ខែ មេសា ឬឧសភា៕

ដោយៈ រ៉ាណេត

ភ្នំពេញៈ អគ្គនាយកដ្ឋានគយ និងរដ្ឋាករកម្ពុជា បានចាប់អនុវត្តការងារបន្ទាន់ ដើម្បីសម្រួលនូវនីតិវិធី និងបែបបទបញ្ចេញទំនិញពីគយ សហការជាមួយសមាគមរោងចក្រកាត់ដេរកម្ពុជា ពិភាក្សាការដឹកជញ្ជូន និងជើងសារគយ។

ក្រសួងសេដ្ឋកិច្ច និងហិរញ្ញវត្ថុ បានចេញសេចក្តីជូនដំណឹងអំពីការអនុវត្តន៍វិធានការសម្រួលផលប៉ះពាល់លើសេដ្ឋកិច្ចកម្ពុជា ពាក់ព័ន្ធសមត្ថកិច្ចរបស់អគ្គនាយកដ្ឋានគយ និងរដ្ឋាករកម្ពុជា ដើម្បីគាំទ្រដល់វិស័យកាត់ដេរ ដែលកំពុងជួបភាពប្រឈមក្នុងការផ្គត់ផ្គង់វត្ថុធាតុដើម ក៏ដូចការកាត់បន្ថយបន្ទុកចំណាយដឹកជញ្ជូនរបស់អ្នកវិនិយោគជាដើម ។

អគ្គនាយកដ្ឋានគយ និងរដ្ឋាករកម្ពុជា ត្រូវអនុវត្តន៍ការងារបន្ទាន់ចំពោះមុខមួយចំនួនដូចជា ធ្វើប្រព្រឹត្តកម្មច្រកបៃតង លើការនាំចូលវត្ថុធាតុដើមកាត់ដេរ ព្រមទាំងគ្រឿងបំណែក និងគ្រឿងបង្គំ បម្រើផលិតកម្ម នៃគម្រោងវិនិយោគ ដោយត្រូវសម្រួលឱ្យបានជាអតិបរមា នូវនីតិវិធី និងបែបបទបញ្ចេញទំនិញគយ។

ក្រៅពីការអនុវត្តខាងលើ អគ្គនាយកដ្ឋានគយ និងរដ្ឋាករកម្ពុជា ត្រូវសហការជាមួ​យសមាគមរោងចក្រកាត់ដេរកម្ពុជា ដើម្បីពិភាក្សាលើការដឹកជញ្ជូនទំនិញ និងជើងសារគយ រួមជាមួយការរកដំណោះស្រាយ លើការយកកម្រៃសេវាឱ្យមានតម្លាភាព។ ក្រៅពីនេះ អគ្គនាយកដ្ឋានគយ និងរដ្ឋាករកម្ពុជា ត្រូវសហការជាមួយភាគីពាក់ព័ន្ធ ដូចជាអាជ្ញាធរស្វយ័តកំពង់ផែអន្តរជាតិ និងក្រុមហ៊ុនដឹកជញ្ជូនជាដើម ដើម្បីធានាថា ការផ្តល់សេវាមានលក្ខណៈពិសេស ប្រព្រឹត្តទៅដោយរលូនស៊ីសង្វាក់ ហើយក្នុងករណីចាំបាច់អាចឯកភាពគ្នាបន្ថែមម៉ោងរដ្ឋបាល ដើម្បីអនុវត្តការងារឱ្យបានឆាប់រហ័ស៕

ដោយៈ រ៉ាណេត

ភ្នំពេញៈ រដ្ឋាភិបាលបានអនុម័ត គំរោងវិនិយោគរបស់ក្រុមហ៊ុនចំនួន៥ នៅក្នុងវិស័យផ្សេងគ្នា ដែលមានទំហំទុនសរុបចំនួន១១២,៩លានដុល្លារ គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនប័ត្រចុះបញ្ជីជាស្ថាពរ និងគាំទ្រទៅលើគម្រោងទាំងស្រុង។

គម្រោងវិនិយោគដែលបានស្នើសុំឡើង ដោយក្រុមហ៊ុនចំនួន៥ ដែលមានទីតាំងស្ថិតនៅរាជធានី ខេត្តផ្សេងគ្នាចំនួន៤ រួមមានដូចជា ទី១- “ JOVIAL CHARM CO., LTD” គម្រោងបង្កើតរោងចក្រចាក់ និងកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិកំពង់ព្រីង សង្កាត់សិត្បូ ក្រុងតាខ្មៅ ខេត្តកណ្តាល មានទុនវិនិយោគប្រមាណ២,២លានដុល្លារអាមេរិក និងអាចបង្កើតការងារបានចំនួន៩០៩កន្លែង។

ទី២“PINYTEX CO., LTD” គម្រោងបង្កើតរោងចក្រកាត់ដេរសម្លៀកបំពាក់ ត្បាញក្រណាត់ និងជ្រលក់ពណ៌ ដែលមានទីតាំងវិនិយោគស្ថិតនៅភូមិតាំងស្នោ ឃុំទំព័រមាស ស្រុកសំរោងទង ខេត្តកំពង់ស្ពឺ មានទុនវិនិយោគប្រមាណ៨,៣លានដុល្លារអាមេរិក និងអាចបង្កើតការងារបានចំនួន១.៥១៤កន្លែង។

ទី៣ “BRANWELL INDUSTRIAL (CAMBODIA) COMPANY LIMITED” គម្រោងបង្កើតរោងចក្រផលិតសម្ភារៈបរិក្ខាអគ្គិសនី (ជើងក្រានដុតសាច់-ដុតនំ, ប្រដាប់ផ្លុំសក់-មូរសក់-សំងួតសក់, ប្រដាប់កោររោម, ជក់សម្អាតផ្ទៃមុខ, សម្ភារៈម៉ាស្សាដងខ្លួន-មុខ-ជើង និងត្រាំជើង) ដែលមានទីតាំងវិនិយោគស្ថិតនៅភូមិផ្តៅពេននិងភូមិសន្តិភាព ឃុំត្រាំងក្រូច ស្រុកសំរោងទង ខេត្តកំពង់ស្ពឺ មានទុនវិនិយោគប្រមាណ ៧,១លានដុល្លារអាមេរិក និងអាចបង្កើតការងារបានចំនួន ៣៤៣កន្លែង។

ទី៤- “CRYSTAL RICE (KAMPUCHEA) CO., LTD” គម្រោងសាងសង់ និងអាជីវកម្មកំពង់ផែអន្តរជាតិ ដែលមានទីតាំងវិនិយោគស្ថិតនៅភូមិព្រែកគ្រែង ឃុំព្រែកត្នោត ស្រុកទឹកឈូ ខេត្តកំពត មានទុនវិនិយោគចំនួន ៣៤លានដុល្លារអាមេរិក និងអាចបង្កើតការងារបានចំនួន ២៥២កន្លែង និងទី៥- “WON MAJESTIC (CAMBODIA) CO., LTD” គម្រោងសាងសង់ និងអាជីវកម្មសណ្ឋាគារថ្នាក់ផ្កាយ៥ ចំនួន ៣៧៣បន្ទប់ និងមជ្ឈមណ្ឌលពាណិជ្ជកម្ម ដែលមានទីតាំងវិនិយោគស្ថិតនៅភូមិ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ មានទុនវិនិយោគប្រមាណ ៦១,៣លានដុល្លារអាមេរិក និងអាចបង្កើតការងារបានចំនួន ៥៥៨កន្លែង៕

ដោយវុត្ថា

ភ្នំពេញៈ អភិបាលរាជធានីភ្នំពេញ លោកឃួង ស្រេង បានដាក់ចេញគម្រោងអភិវឌ្ឍន៍ជាច្រើន ក្នុងការស្ថាបនាកែលម្អ សោភ័ណភាពទីក្រុង ឲ្យកាន់តែមានភាពស្រស់ស្អាត ប្រកបដោយការទាក់ទាញ កាត់បន្ថយការកកស្ទះ និងផ្តល់ភាពងារស្រួលដល់ជីវភា​ពរស់នៅរបស់ប្រជាពលរដ្ឋអោយកាន់តែល្អប្រសើរឡើងថែមទៀត។

លោកឃួង ស្រេង អភិបាលរាជធានីភ្នំពេញ ក្នុងពិធីសន្និបាតបូកសរុបការងាឆ្នាំ ២០១៩ និងលើកទិសដៅបន្ត ឆ្នាំ២០២០ នាថ្ងៃទី ២៦ ខែកុម្ភៈនេះឱ្យដឹងថា រដ្ឋបាលរាជ ធានីភ្នំពេញមានគម្រោងអភិវឌ្ឍន៍ និងកែលម្អហេដ្ឋារចនាសម្ព័ន្ធនានា នៅក្នុងរាជធានីភ្នំពេញជាច្រើន ដើម្បីសម្រួលដល់ការធ្វើដំណើររបស់ប្រជាពលរដ្ឋ ពិសេសការលើកកម្ព​ស់សោភ័ណភាព ទីក្រុងឲ្យកាន់តែស្រស់ស្អាត។

លោកបន្តថា សាលារាជធានីភ្នំពេញបានដាក់ចេញ នូវគម្រោងសំខាន់ដូចជាការធ្វើអោយប្រសើឡើង នូវស្ថានភាពចរាចរក្នុងរាជធានីភ្នំពេញ និងកំពុងបន្តយកចិត្តទុកដាក់ កសាងហេដ្ឋារចនសម្ព័ន្ធរូបវន្ត ដូចជា គម្រោងរថភ្លើងអាកាស ប្រភេទ AGT ជាមួយក្រុមហ៊ុនជប៉ុន និងបានសិក្សាស្វែងយល់អំពីប្រព័ន្ធផ្លូវឯកទិស និងធ្វើការស្ថាបនាស្ពានអាកា​ស និងផ្លូវក្រោមដីរួមមាន ស្ថាបនាស្ពានអាកាស និងផ្លូវក្រោមដីត្រង់រង្វង់មូលចោមចៅ សិក្សាស្ពានអាកាស និងផ្លូវក្រោមដីកាត់មហាវិថីសហព័ន្ធរុស្សី តភ្ជាប់ទៅផ្លូវលេខ៨៦ មកកាន់តំបន់អភិវឌ្ឍន៍បឹងកក់ សិក្សាផ្លូវក្រោមដី និងតស្ពានភ្ជាប់ក្នុងខណ្ឌច្បារអំពៅសិក្សាផ្លូវក្រោមដីក្នុងខណ្ឌឫស្សីកែវ និងគម្រោងផ្លូវអមសងខាង ផ្លូវរថភ្លើងឆ្ពោះទៅរកអាកាសយន្តដ្ឋានភ្នំពេញ និងឆ្ពោះទៅដល់មហាវិថីឈ្នះៗ។

លោកបន្តថា ជាមួយគ្នានេះ រដ្ឋបាលរាជធានីភ្នំពេញ ក៏សម្រេចបានសមិធិផលធំៗ ជាច្រើនទៀត ដូចជាការផ្តល់សេវាសាធារណៈ សន្តិសុខ សណ្តាប់ធ្នាប់សាធារណៈ ការរីកលូតលាស់សំណង់អគារហេដ្ឋារចនាសម័ន្ធ ដែលបំរើដល់ជីវភាពរស់នៅរបស់ប្រជាពលរដ្ឋ។

រាជធានីភ្នំពេញមានខណ្ឌ សរុបចំនួន១៤ខណ្ឌ មាន១១៥សង្កាត់ ៩៥៣ភូមិ និងមានប្រជាពលរដ្ឋរស់នៅអចិន្ត្រៃយ៍ជាង២លាន២សែននាក់៕

ដោយ ប៊ី

ភ្នំពេញៈ ធនាគារអភិវឌ្ឍន៍អាស៊ី(ADB)បានផ្តល់ហិរញ្ញប្បទានដល់កម្ពុជា សម្រា​ប់ហិរញ្ញប្បទានគម្រោងអភិវឌ្ឍន៍ចំនួន១៧២ ដែលមានទឹកប្រាក់សរុបចំនួនប្រមាណ ៣៤៨៥លានដុល្លារក្នុងរយៈពេល២៨ឆ្នាំ។

ក្នុងចំណោមជំនួយទាំងនោះ មានឥណទានសម្បទានចំនួនប្រមាណ២៩៨៣លានដុល្លារ និងហិរញ្ញប្បទានឥតសំណងចំនួនប្រមាណ៥០២លានដុល្លារ គិតចាប់ពីឆ្នាំ១៩៩២ រហូតមកដល់ខែមករា ឆ្នាំ២០២០។ នេះបើយោងតាមការលើកឡើងរបស់មន្រ្តីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ។

ការផ្តល់ហិរញ្ញប្បទានត្រូវបានលើកឡើងដោយ លោក វង្សី វិស្សុត រដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ ក្នុងកិច្ចពិភាក្សាការងារជាមួយគណៈប្រតិភូធនាគារអភិវឌ្ឍន៍អាស៊ី (ADB) ដឹកនាំដោយ លោក អាន់តូនី ម៉ាក់ដូណាល (Mr. Anthony McDonald) នាយកប្រតិបត្តិ នៃធនាគារអភិវឌ្ឍន៍អាស៊ី ដែលបានមកបំពេញទស្សនកិច្ចនៅកម្ពុជា នាល្ងាចថ្ងៃទី២៥ ខែកុម្ភៈ ឆ្នាំ២០២០។

លោក វង្សី វិស្សុត បានសម្តែងនូវកិច្ចស្វាគមន៍យ៉ាងកក់ក្តៅចំពោះដំណើរបំពេញទស្សនកិច្ចការងារនៅកម្ពុជា របស់គណៈប្រតិភូ ADB ហើយបានសម្តែងនូវអំណរគុណចំពោះ ADB ដែលបានអនុម័តឯកសារយុទ្ធសាស្រ្ត ភាពជាដៃគូសម្រាប់អភិវឌ្ឍន៍កម្ពុជាឆ្នាំ២០១៩-២០២៣ (CPS)។

ឯកសារយុទ្ធសាស្រ្តភាពជាដៃគូ សម្រាប់អភិវឌ្ឍន៍កម្ពុជាឆ្នាំ២០១៩-២០២៣ ជាក្របខ័ណ្ឌយុទ្ធសាស្រ្តរួមមួយ ដែលមានទឹកប្រាក់ប្រមាណ១៤៥០លានដុល្លារ សម្រាប់    រយៈពេល៥ឆ្នាំ ដែលឆ្លើយតបកាន់តែប្រសើរឡើង ទៅនឹងតម្រូវការនៃកិច្ចអភិវឌ្ឍរបស់កម្ពុជា ពិសេសក្នុងការសម្រេចបាននូវគោលដៅក្លាយ ជាប្រទេសចំណូលមធ្យមកម្រិតខ្ពស់ នៅឆ្នាំ២០៣០ និងជាប្រទេសចំណូលខ្ពស់នៅឆ្នាំ២០៥០ ហើយយុទ្ធសាស្រ្តនេះក៏ស្របជាមួយនឹងក្របខ័ណ្ឌយុទ្ធសាស្រ្តរយៈពេលវែង២០៥០ របស់ ADB ផងដែរ។

ទន្ទឹមនេះ រដ្ឋលេខាធិការប្រចាំការ ក៏បានជម្រាបគណៈប្រតិភូ ADB អំពីស្ថានភាពសេដ្ឋកិច្ចកម្ពុជា ដែលត្រូវបានប៉ាន់ស្មានថា នឹងអាចសម្រេចបានកំណើនក្នុងរង្វង់ប្រមា​ណ ៦% នៅ ក្នុងឆ្នាំ២០២០ ព្រមទាំងអំពីក្របខ័ណ្ឌម៉ាក្រូសេដ្ឋកិច្ចឆ្នាំ២០២០ ដែលនៅតែមានលក្ខណៈរឹងមាំ ទោះបីសេដ្ឋកិច្ចកម្ពុជា ត្រូវបានជួបប្រទះបញ្ហាប្រឈម និងហានិភ័យកាន់តែច្រើនពីខាងក្រៅក្តី។

ក្នុងក្របខ័ណ្ឌខាងលើនេះ រាជរដ្ឋាភិបាលបានត្រៀមខ្លួនរួចជាស្រេច និងបានដាក់ចេញនូវវិធានការជាបន្តបន្ទាប់ ដូចដែលសម្តេចតេជោនាយករដ្ឋមន្រ្តីបានប្រកាស កាលពីថ្ងៃទី២៤ ខែកុម្ភៈ ឆ្នាំ២០២០ កន្លងទៅនេះ អំពីវិធានការរបស់រារដ្ឋាភិបាល ដើម្បីគ្រប់គ្រងផលប៉ះពាល់ពីជំងឺ Covid-19 និងការព្យួរភាពអនុគ្រោះពន្ធលើទំនិញមួយចំនួន ក្រោមកម្មវិធីទំនិញគ្រប់មុខលើកលែងតែអាវុធ (EBA)។

ការដាក់ចេញនូវវិធានការជុំទី១នេះ ដើម្បីជួលសម្រាលផលប៉ះពាល់ និងគាំទ្រដល់វិស័យដែលប៉ះពាល់ខ្លាំង ដូចជាវិស័យទេសចរណ៍ វិស័យកាត់ដេរ និងវិស័យអចលនទ្រព្យ និងដើម្បីការពារការងារ ចំពោះអ្នកដែលមានការងារធ្វើស្រាប់ បន្តខិតខំបង្កើតកា​រ​ងារថ្មីៗចំពោះអ្នកដែលមិនទាន់មានការងារធ្វើ និងជួយដល់អ្នកដែលអាចបាត់បង់ការងារធ្វើ ព្រមទាំងដើម្បីទ្រទ្រង់កំណើនផងដែរ។

រាជរដ្ឋាភិបាលនឹងបន្តតាមដានកិច្ចការនេះជាប់ជាប្រចាំ ដើម្បីធានាឱ្យបាននូវស្ថិរភាពម៉ាក្រូសេដ្ឋកិច្ច និងកំណើនសេដ្ឋកិច្ចសម្រាប់ឆ្នាំ២០២០ ពោលគឺធ្វើយ៉ាងណាឱ្យកំណើនមានចិរភាព សេដ្ឋកិច្ចកម្ពុជានៅតែខ្លាំង ហើយបើទោះបីជាសេដ្ឋកិច្ចកម្ពុជាអាចនឹងថមថយខ្លះនៅក្នុងរយៈពេលខ្លី តែសេដ្ឋកិច្ចកម្ពុជានឹងងើបឡើងវិញកាន់តែខ្លាំងជាងមុន នៅក្នុងរយៈពេលវែង។

លោក អាន់តូនី ម៉ាក់ដូណាល បានវាយតម្លៃខ្ពស់ ចំពោះកិច្ចខិតខំប្រឹងប្រែងរបស់រាជរដ្ឋាភិបាល និងអបអរសាទរ ចំពោះជោគជ័យដ៏ធំធេងរបស់កម្ពុជាក្នុងការបន្តរក្សា និងជំរុញកំណើនសេដ្ឋកិច្ចប្រកប ដោយចីរភាព ពោលគឺរាជរដ្ឋាភិបាល កម្ពុជាមានគោលនយោបាយត្រឹមត្រូវ ក្នុងការអភិវឌ្ឍន៍ប្រទេស និងការកាត់បន្ថយភាពក្រីក្រ។

លោកក៏បានជម្រាបថា ADB កំពុងអនុវត្តយុទ្ធសាស្រ្ត២០៣០ តាមរយៈការដាក់ឱ្យអនុវត្តនូវផែនការសកម្មភាពអាទិភាពមួយចំនួន ក្នុងនោះ រួម មាន ទី១ ការពង្រឹងគុណភាពហេដ្ឋារចនាសម្ព័ន្ធ ទី២ ការកសាងធនធានមនុស្ស តាមរយៈការវិនិយោគលើវិស័យអប់រំ និងសុខាភិបាល ពុទ្ធិ និងភាពច្នៃប្រឌិត និងទី៣ ការពង្រីកកិច្ចសហប្រតិបត្តិការ និងសមាហរណកម្មក្នុងតំបន់ ដូចជាមហាអនុតំបន់មេគង្គ។

យុទ្ធសាស្រ្ត២០៣០នេះ មានលក្ខណៈស្របគ្នា ទៅនឹងយុទ្ធសាស្ត្រចតុកោណ ដំណាក់កាលទី៤ ផែនការយុទ្ធសាស្ត្រអភិវឌ្ឍន៍ជាតិ ២០១៩-២០២៣ និងយុទ្ធសាស្រ្តស្តីពីការកែទម្រង់ប្រព័ន្ធ គ្រប់គ្រង ការវិនិយោគសាធារណៈ២០១៩-២០២៥ របស់រាជរដ្ឋាភិបាល។

រដ្ឋលេខាធិការប្រចាំការ បានកោតសរសើរ និងវាយតម្លៃខ្ពស់ចំពោះ ADB ដែលជាដៃគូដ៏ស្មោះត្រង់ និងមានតួនាទីដ៏សំខាន់ នៅក្នុងការចូលរួមចំណែកដល់កិច្ចអភិវឌ្ឍនៅកម្ពុជា និងជូនពរលោកអាន់តូនី ម៉ាក់ដូណាល និងសហការីឱ្យទទួលបានជោគជ័យក្នុងបេសកកម្មការងាររបស់ខ្លួន៕

ដោយវុត្ថា

ភ្នំពេញៈ កន្រ្ដកវិលធំមួយដែលមានកម្ពស់ជិត៩០ម៉ែត្រ និងចំណាយទុនប្រមាណជាង៧លានដុល្លារបានដាក់ឱ្យដំណើរការ ដើម្បីទាក់ទាញភ្ញៀវទេសចរជាតិ និងអន្តរជាតិ ឲ្យមកលេងខេត្តសៀមរាបឲ្យបានកាន់ច្រើនបន្ថែមទៀត។

លោក Take Shinomiya នាយកប្រតិបត្តិនៃក្រុមហ៊ុន CQ Amenic Co បានឲ្យដឹងនៅក្នុងពិធីសន្និសីទសារព័ត៌មា នកាលពីពេលថ្មីៗនេះឱ្យដឹងថា ការដាក់ឱ្យដំណើរកសារកន្ត្រក់វិលនេះ គឺដើម្បីផ្តល់ភាពរីករាយដល់កុមារ និងប្រជាជនកម្ពុជា និងភ្ញៀវទេសចរបរទេសដែលមកលេងខេត្តសៀមរាប ។

លោកថា  “ជាគោលដៅរបស់ខ្ញុំ គឺធ្វើការអភិវឌ្ឍន៍អាជីវកម្ម សួនកម្សាន្តនៅអាស៊ី ដើម្បីផ្តល់ភាពរីករាយដល់កុមារ កន្លងមកខ្ញុំបានទៅកាន់ប្រទេសអាស៊ីជាច្រើន ដើម្បីស្វែងរកទីតាំងដ៏សមស្រប”។ លោកបន្តថា “ជាការកត់សម្គាល់ខ្ញុំរកឃើញថា នៅកម្ពុជាពុំទាន់មាន សេវាកម្សាន្តគ្រប់គ្រាន់សម្រាប់កុមារ និងមនុស្សវ័យក្មេងនៅឡើយទេ ដូច្នេះខ្ញុំបានចាប់ផ្តើមគិត អំពីការផ្តល់សេវាសួនកម្សាន្តនៅកម្ពុជា ដែលអាជីវកម្ម ទេសចរណ៍គឺជាឧស្សាហកម្មដ៏សំខាន់មួយ”។

លោកបានបន្ដថា យើងធ្លាប់បានធ្វើការវិនិយោគលើកដំបូង នៅប្រទសកម្ពុជា លើគម្រោងសួនកម្សាន្តផ្សារអ៊ីអនម៉លសែនសុខ ហើយក៏បានសម្រេចការសាងសង់ ក្នុងទឹកដីអង្គរ ដែលមានភាពល្បីល្បាញលើសាកលលោកក្នុងឆ្នាំនេះ។

លោកTake Shinomiya បានថ្លែងថា បច្ចប្បន្ននេះក្រុមហ៊ុនមានកន្រ្តកវិល១៣កន្លែង ហើយគម្រោងកន្ត្រកវិលអង្គរអាយជាគ្រោងទី១៤ ដែលក្រុមហ៊ុនទទួលបានឱកា​ស​វិនិយោគ។ កន្រ្តកវិលអង្គអាយនឹងទាកទាញភ្ញៀវជាតិ និងអន្តរជាតិមកទស្សនាទីក្រុងសៀមរាប យ៉ាងច្រើនកុះករ។

លោកបញ្ជាក់ទៀតថា “គម្រោងកន្ត្រកវិលអង្គរអាយ មានកម្ពស់៨៥ម៉ែត្រផុសពីដី អាចផ្ទុកមនុស្សបាន១៩២នាក់ និងមានរយៈពេល១៨នាទីក្នុងមួយជុំ”។

លោកម៉េង ហៀង អគ្គនាយកក្រុមហ៊ុនអង្គរអាយ បានសម្តែងការរីករាយដែលប្រទេសកម្ពុជាមានកន្ត្រក់វិល និងជាពិសេសមាននៅក្នុងទីក្រុងសៀមរាប ដែលជាទីកន្លែ​ងប្រវត្តិសាស្ត្រសម្រាប់ទេសចរណ៍មកកម្សាន្ត។

លោកបន្តថា “ខ្ញុំមានមោទនភាពយ៉ាងខ្លាំង ដែលបាននាំមកការចាប់ផ្តើម ភាពទាក់ទាញថ្មីប្លែក ដើម្បីចូលរួមចំណែកក្នុងការអភិវឌ្ឍន៍ វិស័យទេសចរណ៍ ក្នុងខេត្តសៀមរាប”។លោកបន្ថែមថា “ខ្ញុំមានជំនឿយ៉ាងមុតមាំថា កន្ត្រកវិលអង្គរអាយ នឹងក្លាយជានិមត្តរូបមួយ ដើម្បីលើកស្ទួយភាពទាក់ទាញ ជាប្រវត្តិសាស្ត្រផ្សេងៗ ក្នុងខេត្តសៀមរាប”។

លោកបន្តថា កន្ត្រកវិលនេះធ្វើឡើង ដោយសហការជាមួយជប៉ុន ហើយជប៉ុនជាអ្នកវិនិយោគដ៏ត្រឹមត្រូវ និងបានគិតគូរពីសុវត្ថិភាពជាចម្បង ជាក់ស្ដែងកន្ត្រកវិលដ៏ធំមួយនេះក៏ត្រូវបានធានាសុវត្ថិភាព១០០ភាគរយ ដែលវាអាចទប់ទល់បានជាមួយនឹងគ្រោះរញ្ជួយផែនដីបានទៀតផង ៕

ដោយ ប៊ី

ភ្នំពេញៈ ទីភ្នាក់ងារសហប្រតិបត្តិការអន្តរជាតិកូរ៉េ (កយកា-KOICA) គ្រោងនឹងផ្តល់កញ្ចប់ថវិកាប្រមាណ២៤,៥លានដុល្លារសហរដ្ឋអាមេរិក ដល់ប្រទេសកម្ពុជានៅឆ្នាំ ២០២០ នេះ សម្រាប់កិច្ចសហប្រតិបត្តិការរវាងសាធារណរដ្ឋកូរ៉េ និងកម្ពុជា។

យោងតាមសេចក្តីប្រកាសព័ត៌មានរបស់ទីភ្នាក់ងារ KOICAបានឱ្យដឹងនៅថ្ងៃទី ២៥ ខែកុម្ភៈ ឆ្នាំ ២០២០កន្លងមកថា នៅឆ្នាំ២០២០នេះ KOICAគ្រោងនឹងផ្តល់កញ្ចប់ថវិកាប្រមាណ២៤,៥ លានដុល្លារសហរដ្ឋអាមេរិកដល់ប្រទេសកម្ពុជា។ កិច្ចសហប្រតិបត្តិការអភិវឌ្ឍន៍ ដែលផ្តល់ដោយរដ្ឋាភិបាលនៃសាធារណរដ្ឋកូរ៉េ បានកើនឡើងគួរឱ្យកត់សម្គា ល់ និងបានចូលរួមចំណែកយ៉ាងសំខាន់ ដល់ការអភិវឌ្ឍសេដ្ឋកិច្ចសង្គម របស់ប្រទេសកម្ពុជា។

លោក រ៉ូ ហ្យន់ជូន (Rho Hyun-Jun) ប្រធានតំណាងរបស់ទីភ្នាក់ងារសហប្រតិបត្តិការអន្តរជាតិនៃប្រទេសកូរ៉េ (KOICA) ប្រចាំការិយាល័យប្រទេសកម្ពុជា បានជួបពិភាក្សាការងារជាមួយ លោកឈៀង យ៉ាណារ៉ា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការគណៈកម្មាធិការនីតិសម្បទា និងអភិវឌ្ឍន៍កម្ពុជា នៃក្រុមប្រឹក្សាអភិវឌ្ឍន៍កម្ពុជា ដើម្បីពិភាក្សាអំពីជំនួយអភិវឌ្ឍន៍ផ្លូវការរបស់កូរ៉េសម្រាប់ប្រទេសកម្ពុជា។

ក្នុងអំឡុងពេលនៃកិច្ចប្រជុំនេះ ភាគីទាំងពីរបានពិភាក្សា និងផ្លាស់ប្តូរយោបល់គ្នា លើរបៀបវារៈរួមមាន ទី១ កម្មវីធីទស្សនកិច្ចផ្លូវការមកប្រទេសកម្ពុជា របស់លោកស្រីប្រធានKOICA ទី២ ផែនការសហប្រតិបត្តិការរបស់KOICA សម្រាប់ប្រទេសកម្ពុជាក្នុងឆ្នាំ២០២០ ទី៣ គម្រោងថ្មីរបស់កយកាសម្រាប់ប្រទេសកម្ពុជា ក្នុងឆ្នាំ២០២១ និងទី៤គម្រោងថ្មីរបស់KOICAសម្រាប់ប្រទេសកម្ពុជាក្នុងឆ្នាំ២០២២៕

ដោយៈ រ៉ាណេត

ភ្នំពេញៈ  គម្រោងសាងសង់ស្ពានឆ្លងទន្លេមេគង្គ ដែលរាជរដ្ឋាភិបាលកំពុងស្នើសុំការជួយជ្រោមជ្រែងពីសំណាក់ប្រទេសកូរ៉េ កាលពីពេលថ្មីៗនេះ លោកទេសរដ្ឋមន្ត្រី ស៊ុន ចាន់ថុលបានបង្ហើបប្រាប់ថា ទំហំនៃការចំណាយលើការសាងសង់ស្ពាននេះ អាចកើនឡើងជិត១០០លានដុល្លារ ដើម្បីធ្វើយ៉ាងណាឱ្យមានគុណភាព និងសោភ័ណភាពគួរជាទីទាក់ទាញ។

លោកទេសរដ្ឋន្ត្រីស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានបង្ហើបក្រុមអ្នកសារព័ត៌មានកាលពីពេលកន្លងទៅថ្មីៗនេះថា បន្ទាប់ពីមានការស្នើសុំពីរាជរដ្ឋាភិបាលកម្ពុជា ទៅលើគម្រោងសាងសង់ស្ពានឆ្លងទន្លេមេគង្គ តភ្ជាប់ពីតំបន់ជ្រោយចង្វារទៅតំបន់ស្វាយជ្រុំ មន្ត្រីជំនាញបច្ចេកទេសរបស់ប្រទេសកូរ៉េ បានធ្វើការចុះមកសិក្សាពីទំហំនៃការចំណាយលើការចំណាយ និងទំហំនៃផលប៉ះពាល់ផងដែរ។

លោកបន្តថា “កាលពីពេលកន្លងទៅ ក្រុមអ្នកជំនាញបច្ចេកទេសកូរ៉េ KOICA ធ្លាប់បានចុះមកធ្វើសិក្សាជាជំហានដំបូងរួចហើយ ប៉ុន្តែនៅមិនទាន់សម្រចជារបាយការណ៍នៅឡើយទេ”។ លោកបានបន្តទៀតថា “ប្រសិនបើសាងសង់ត្រឹមតែជាស្ពាសម្រាប់ឆ្លងធម្មតាដូចស្ពានមួយចំនួនទៀតនោះ ទំហំនៃការចំណាយអាចស្ថិតនៅក្នុងរង្វង់៥០លានដុល្លារតែប៉ុណ្ណោះ ប៉ុន្តែដោយសារតែខាងកូរ៉េ គេចង់សាងសង់ស្ពានថ្មី និងលើកដំបូងនៅកម្ពុជា (ស្ពានមិត្តភាពកម្ពុជា-កូរ៉េ) ឱ្យមានគុណភាពខ្ពស់ និងមានភាពទាក់ទាញខ្លាំង ដូច្នេះខ្ទង់ចំណាយអាចនឹងកើនឡើងជិត១០០លានដុល្លារ”។

តាមគំរោងក្រោយពេលសាងសង់បញ្ចប់ ស្ពានមិត្តភាពកម្ពុជា កូរ៉េនឹងមានភាពលេចធ្លោមិនចាញ់ស្ពានមិត្តភាពកម្ពុជា-ចិន និងស្ពានមិត្តភាព-ចិន នោះទេ។

លោកស៊ុន ចាន់ថុលបានបង្ហើបប្រាប់ថា “បើតាមអ្នកជំនាញ និងបច្ចេកទេសភាគីកូរ៉េបានបង្ហើបថា គេចង់សងស្ពាននេះធ្វើជានិមិត្តរូបដែលមានភាពអស្ចារ្យ ប៉ុន្តែនៅមិនទាន់កំណត់ថា ជាប្រភេទស្ពានដែលមានខ្សែកាបដូចស្ពានអ្នកលឿង ឬជាស្ពានកោងខ្ពស់នោះ ដែលពេលនេះកំពុងតែស្ថិតនៅក្នុងការសិក្សាបន្ថែមនៅឡើយ”។

សម្ដេចតេជោ ហ៊ុន សែន ធ្លាប់បានមានប្រសាសន៍ដោយអះអាងថា ក្រោយពេលតភ្ជាប់ស្ពានរឆ្លងកាត់ទន្លេមេគង្គមួយខ្សែនេះ តំបន់ដែលស្ថិតនៅត្រើយខាងកើតរាជធានីភ្នំពេញមួយនេះ ជាពិសេសតំបន់អារិយក្សត្រ នឹងអាចកែប្រែមុខមាត់អភិវឌ្ឍន៍ក្លាយជាក្រុងរណបដ៏ទាក់ទាញ ដែលមានហេដ្ឋារចនាសម្ព័ន្ធជាច្រើនកើតមានឡើង និងកាន់តែជួយជំរុញតម្លៃដីធ្លីឱ្យកើនឡើងផងដែរ៕