ដោយ ហ្សូលី

ថៃ៖ មហាសេដ្ឋី Charoen Sirivadhanabhakdi ដែលគេស្គាល់ថា ជាអ្នកដែលមានទ្រព្យសម្បត្តិច្រើនជាងគេប្រចាំប្រទេសថៃ ចំណាយទុនវិនិយោគប្រមាណ ៩៤៨លានដុល្លារ សាងសង់អគារខ្ពស់ជាងគេមួយនៅក្នុងទីក្រុងបាងកក។

តាមរយៈអង្គភាពអចលនទ្រព្យដែលបានចុះបញ្ជីថ្មីៗនេះរបស់លោកដែលមានឈ្មោះថា Asset World Corp មានចក្ខុវិស័យគ្រោងនឹងកសាងអាគារខ្ពស់ជាងគេបំផុតក្នុងប្រទេសថៃ ដែលស្ថិតតាមបណ្តោយទន្លេចៅប្រាយ៉ា ទីក្រុងបាងកក។ ទីតាំងនេះគឺជានិមិត្តរូបនៃទ្រព្យ យុទ្ធសាស្រ្តកំណើនពិភពលោកមួយផងដែរ។

Asset World កំពុងចាប់ដៃគូជាមួយក្រុមហ៊ុនស្ថាបត្យកម្ម Adrian Smith + Gordon Gill ដែលជាក្រុមហ៊ុននៅពីក្រោយអគារខ្ពស់ជាងគេនៅលើពិភពលោកគឺ Burj Khalifa ។

បើទោះបីជាអគារខ្ពស់កប់ពពកមួយនេះមិនទាន់មានការកំណត់ពីកម្ពស់ក៏ពិតមែន តែក្រុមហ៊ុនរំពឹងថានឹងវ៉ាដាច់កំណត់ត្រាបច្ចុប្បន្នរបស់ប្រទេសថៃ គឺអគារ Magnolias Waterfront Residences នៅ Iconsiam ដែលមានកម្ពស់ប្រមាណ ៣១៨ម៉ែត្រ និងបានសាងសង់រួចរាល់កាលពីឆ្នាំ ២០១៨ ។ គម្រោងអគារនេះនឹងត្រូវបានសាងសង់នៅជាប់នឹងផ្សារមាត់ទន្លេដ៏ល្បីល្បាញរបស់ក្រុមហ៊ុន មានសណ្ឋាគារហាងលក់ទំនិញ និងការិយាល័យ។

គោលបំណងគឺដើម្បីសាងសង់សណ្ឋាគារសន្និបាតធំបំផុតរបស់ប្រទេសថៃ និងក្លាយជាសណ្ឋាគារធំជាងគេរបស់ប្រទេសនៅឆ្នាំ ២០២៥ ដែលមានបន្ទប់ដល់ទៅ ៤.០០០ បន្ទប់។

លោកស្រី Wallapa Traisorat ប្រធាននាយកប្រតិបត្តិរបស់ក្រុមហ៊ុន Asset World និងជាកូនស្រីរបស់មហាសេដ្ឋី Charoen បានមានប្រសាសន៍ថា“ អគារខ្ពស់កប់ពពកនេះនឹងក្លាយជា“ ប្រវត្តិសាស្ត្រថ្មី” និងទាក់ទាញភ្ញៀវទេសចរមកទស្សនាប្រទេសថៃកាន់តែច្រើន។”

គម្រោងនៃការស្ថាបនាសំណង់អគារមូុយនេះ បានគ្រោងឡើងនៅចំពេលដ៏លំបាកសម្រាប់ទីផ្សារអចលនទ្រព្យនិងទេសចរណ៍របស់ប្រទេសអាស៊ីអាគ្នេយ៍មួយនេះ។ វិស័យទេសចរណ៍ក្នុងប្រទេសថៃ ដែលមានប្រហែល ២០ ភាគរយនៃផលិតផលក្នុងស្រុកសរុប ក៏កំពុងទទួលរងផលប៉ះពាល់ផងដែរ។

បើយោងតាមចំណាត់ថ្នាក់ក្រុមហ៊ុនម៉ាស្ទ័រ (Master Inc)ឆ្នាំ ២០១៩ ទីក្រុងបាងកកត្រូវបានជាប់ឈ្មោះជាទីក្រុងដែលមានភ្ញៀវទេសចរច្រើនបំផុតនៅលើពិភពលោកក្នុងឆ្នាំ ២០១៨ រយៈពេល ៤ ឆ្នាំជាប់ៗគ្នា នាំមុខទីក្រុងប៉ារីស ទីក្រុងឡុងដ៍ ឌូបៃ និងសិង្ហបុរី ។

ម្យ៉ាងវិញទៀត ទីក្រុងបាងកកកំពុងប្រឈមនឹងការគាំងក្នុងការលក់ខុនដូសល់ដល់ទៅ ១០០,០០០ យូនីត និងរំពឹងទុកថាសល់ច្រើនជាងនេះទៀត។ ចំណែកវិនិយោគិនចិនដែលបានបង្កើនវិស័យអចលនទ្រព្យអស់រយៈពេលជាច្រើនឆ្នាំ ត្រូវស្នាក់នៅឆ្ងាយដោយសារតែការទប់ស្កាត់ការធ្វើដំណើរនិងការបំផ្លិចបំផ្លាញសេដ្ឋកិច្ចដែលបណ្តាលមកពីវីរុសកូរ៉ូណា។

យ៉ាងណាមិញ លោកស្រីអគ្គនាយក Wallapa មិនមានការព្រួយបារម្ភទេនិងព្យាយាមទប់ស្កាត់ផលប៉ះពាល់ដែលមានរយៈពេលខ្លីនេះ៕
(BloomBerg)

ដោយ រ៉ាណេត

ភ្នំពេញៈ នៅក្នុងស្ថានភាពនាពេលបច្ចុប្បន្ននេះ មានមនុស្សជាច្រើនបានទាញយកការវិនិយោគនៅក្នុវិស័យអចលនទ្រព្យ ភ្ជាប់ទៅនឹងព្រឹត្តិការណ៍អវិជ្ជមានសង្គម ជាពិសេ​ស ពាក់ព័ន្ធទៅនឹងវិបត្តិសេដ្ឋកិច្ចប្រទេសចិន ដែលជាទីផ្សារអចលនទ្រព្យមួយចំណែកធំនៅកម្ពុជា។

មិនថាទោះជាស្ថានភាពសេដ្ឋកិច្ច នៅក្នុងប្រទេសកម្ពុជា ដែលមានការអភិវឌ្ឍយ៉ាងឆាប់រហ័សលើវិស័យអចលនទ្រព្យ រួមជាមួយនឹងតម្រូវការនៃវិស័យលំនៅដ្ឋានកំពុងតែមានតម្រូវខ្ពស់ បណ្តាអ្នកជំនាញបានអះអាងបញ្ជាក់ថា មិនថាឆ្នាំនេះឬបន្តទៅឆ្នាំខាងមុខនោះទេ ការវិនិយោគនៅក្នុងវិស័យអចនទ្រព្យ នៅតែមានសកម្មភាព សំខាន់គឺអាស្រ័​យទៅលើភាពចាំបាច់ និងធនធានតែប៉ុណ្ណោះ។

អគ្គនាយកក្រុមហ៊ុន Cam Top Property Group លោកខាត់ សុវណ្ណ បានមានប្រសាសន៍ប្រាប់តាមទូរស័ព្ទកាលពីល្ងាចថ្ងៃទី២៦ ខែកុម្ភៈ ឆ្នាំ២០២០កន្លងមកថា ការសម្រេចចិត្តវិនិយោគ ឬមិនគួរមិនគួរគឺអាស្រ័យទៅលើភាពចាំបាច់ នៃតម្រូវការជាក់ស្ដែងតែប៉ុណ្ណោះ ប៉ុន្តែសម្រាប់ក្រុមហ៊ុនអភិវឌ្ឍន៍ធំៗ ដែលមានធនធានច្បាស់លាស់គឺពួកគេនៅតែបន្តសកម្មភាពដដែល។

លោកបានបញ្ជាក់ថា “ភាគច្រើនពេលនេះគេតែងនិយាយថា ទីផ្សារដីធ្លីមិនសូវល្អដែលបណ្តាលមកពីកត្តាសេដ្ឋកិច្ចសង្គម ដែលកំពុងកើតមាន ហើយគាប់ជូនអ្នកខ្លះគាត់មានធុរៈ មានតម្រូវការថវិកា ដូច្នេះ បើទោះជាតម្លៃដីទាបជាងទីផ្សារជាក់ស្ដែង ២០-៣០ភាគរយ ក៏គាត់នៅតែលក់”។ លោកបន្តថា “ការលក់នេះមិនមែនមានន័យថា ទីផ្សារដីធ្លីធ្លាក់នោះទេ ប៉ុន្តែក្នុងលក្ខខណ្ឌនេះ សម្រាប់អ្នកដែលមានលុយទិញដី ដែលមានតម្លៃទាបជាងទីផ្សារ គឺពួកគេមានឱកាសទទួលបានចំណេញខ្ពស់នៅថ្ងៃខាងមុខ”។

បច្ចុប្បន្ននេះសម្រាប់ដីដែលស្ថិតនៅតំបន់ជាយក្រុង ក៏ដូចជាការអភិវឌ្ឍលំនៅដ្ឋានតម្លៃក្រោម១០ម៉ឺនដុល្លារ គឺនៅតែជាឱកាសល្អសម្រាប់ការវិនិយោគ”។

អគ្គនាយកក្រុមហ៊ុន Daily Realty Group លោក ហៃ រ៉ាវី ក៏បានបង្ហាញពីទស្សនៈស្រដៀងគ្នា ទៅនឹងការលើកឡើងខាងលើនេះផងដែរ ដោយលោកបានបញ្ជាក់ថា “បើស្ថិតនៅក្នុងស្ថានភាពប្រ ឈមដែលធ្វើឱ្យប៉ះពាល់ដល់វិស័យអចលនទ្រព្យ វាមានហេតុការណ៍២កើតឡើង គឺហេតុការណ៍អាក្រក់ និងហេតុការណ៍ល្អ។

លោកបន្តថា “ត្រង់ន័យខ្ញុំចង់បញ្ជាក់ថា ហេតុការណ៍អាក្រក់ គឺកើតមាននៅពេលដែលមានទ្រព្យ ឬដីធ្លី ហើយមានតម្រូវការចាំបាច់ក្នុងការលក់បានតម្លៃទាប ដែលវាធ្វើឱ្យបាត់បង់ផលប្រយោជន៍ ឬខាតបង់ទ្រព្យ”។លោកបន្តថា “ប៉ុន្តែហេតុការណ៍ល្អ គឺសម្រាប់អ្នកមានលុយទិញដីទុកលក់ចំណេញ”។

លោកបន្ថែមថា ដូច្នេះមុនពេលសម្រេចចិត្តលក់ ក៏គួរតែសិក្សា និងពិចារណាពីតម្លៃទីផ្សារជាមុនសិន ឬបើអាចមានដំណោះស្រាយគួរកុំលក់ក្នុងពេលមិនអំណោយផល។

អ្នកវិភាគសេដ្ឋកិច្ចឯករាជ្យកម្ពុជា លោក ង៉ែត ជូ ធ្លាប់បានលើកឡើងថា ការចូលខ្លួនមកធ្វើជំនួញ នៅក្នុងវិស័យអចលនទ្រព្យ ជាការសម្រេចចិត្តដ៏ត្រឹមត្រូវ ប៉ុន្តែមុនពេ​លចូលមករកចំណូលនៅលើទីផ្សារមួយនេះ ចាំបាច់ត្រូវតែស្វែងយល់ឱ្យបានលម្អិតពីព័ត៌មា​នផ្សេងៗ ដែលពាក់ព័ន្ធទៅនឹងវិស័យអចលនទ្រព្យ។

លោកបានបន្តទៀតថា មុនពេលសម្រេចចិត្តទិញ ឬវិនិយោគទៅលើអចលនទ្រព្យណាមួយ អ្នកគួរតែសិក្សាស្វែងយល់ឱ្យបានលម្អិត និងប្រមូលព័ត៌មានឱ្យបានគ្រប់ជ្រុងជ្រោយជាមុនសិន ចៀសវាងការទិញទាំងភាពប្រថុយប្រថាន ឬជឿតាមពាក្យគេនិយាយដោយគ្មានមូលដ្ឋានច្បាស់លាស់”។ លោកបានបញ្ជាក់ថា “ភាពជោគជ័យទៅលើការវិនិយោគ មិនមែនកើតឡើងដោយសារតែព្រេងសំណាងនោះទេ ប៉ុន្តែវាកើតចេញពីភាពវ័យឆ្លាត ចេះក្ដាប់ឱកាស និងវិនិយោគត្រូវតាមកាលៈទេសៈ៕

ដោយគង់ សូរិយា

ភ្នំពេញ៖ លំនៅដ្ឋានបែបសហកម្មសិទ្ឋ(ខុនដូ)ជាប្រភេទលំនៅដ្ឋានថ្មីមួយ ដែលប្រជាពលរដ្ឋខ្មែរមួយចំនួន មិនទាន់បានយល់ដឹងលំអិតនៅឡើយ ហេតុនេះដើម្បីទិញលំនៅដ្ឋានក្នុងខុនដូ មិនមានហានិភ័យទៅថ្ងៃអនាគត អ្នកមានបំណងចង់ទិញខុនដូត្រូវ​ស្វែងយល់ពីបញ្ហាពាក់ព័ន្ឋមួយចំនួន។

ថ្ងៃនេះគេហទំព័រPropertyarea.asia សូមលើកយកនូវសម្រង់ចំណេះដឹងខ្លះៗ ដើម្បីផ្តល់ជូនអ្នកអាន និងអ្នកចង់ទិញខុនដូជ្រាបពីបញ្ហានេះមុនសម្រេចចិត្តទិញខុនដូ។

ជាប្រភេទលំនៅដ្ឋានថ្មីមួយ

ខុនដូជាផ្នែកថ្មីមួយក្នុងវិស័យអចលនទ្រព្យកម្ពុជា ដែ​លបាននិងកំពុងរីកចម្រើនយ៉ាងខ្លាំង បន្ទាប់ពីរាជរដ្ឋាភិបាលបានអនុម័តច្បាប់ស្តីពី សហ​កម្មសិទ្ឋឆ្នាំ២០១០ ដែលអនុញ្ញាត្តឲ្យជនបរទេសអាចមានសិទ្ឋ ទិញអាគារបែបនេះចាប់ពី​ជាន់ទី១ឡើងទៅ។ អ្នក​រស់នៅតាមខុនដូ មិនអាចចិញ្ចឹមសត្វ និងជួសជុលលំនៅដ្ឋានរបស់ខ្លួន ឬបង្កសម្លេងរំខា​នណាមួយដល់អ្នកជិតខាងនោះទេ ដោយសារវាជាការរស់នៅបែបសហគមន៍លើអាគារ  ​រួម។

ការបង់ប្រាក់

អ្នករស់នៅខុនដូត្រូវបង់ប្រាក់ជាប្រចាំ ដល់ក្រុមហ៊ុនគ្រប់គ្រងអាគារ ដែលការបង់​ប្រាក់នេះមានតម្លៃចន្លោះពី០,៥០ ទៅ១ដុល្លារអាមេរិក(អាស្រ័យលើគំរោង)និមួយៗ។ ការ​បង់ប្រាក់នេះ សម្រាប់ឲ្យក្រុមហ៊ុនចំណាយទៅលើសេវាកម្មគ្រប់គ្រងអាគារទាំងមូល​និងសេវាកម្មអនាម័យ សន្តិសុខជាដើម។

ការទិញធានារ៉ាប់រង

តាមធម្មតាអ្នកអភិវឌ្ឍន៍ តែងទិញសេវាកម្មធានារ៉ាប់រងអាគារខុនដូរបស់ខ្លួន ប៉ុន្តែអ្នក​អភិវឌ្ឍន៍មួយចំនួនមិនបានទិញនោះទេ ហេតុនេះអ្នកមានបំណងចង់រស់នៅខុនដូ ត្រូវសិក្សាពី​អ្នកអភិវឌ្ឍន៍គំរោងនោះថា បានទិញធានារ៉ាប់រងឬទេ? ព្រោះតាមធម្មតាអ្នកអភិវឌ្ឍន៍តែងតែទិញសេវាធានារ៉ាប់រង ប៉ុន្តែអ្នកអភិវឌ្ឍន៍មួយចំនួនមិនបានទិញនោះទេ។

ការមានសេវាកម្មធានារ៉ាប់រងមានសារៈសំខាន់ណាស់ ដើម្បីការពារ​ពេលមានហានិភ័យកើតឡើង ឧទាហរណ៍មានករណីអគ្គិភ័យឆេះអាគារ អ្នកវិនិយោគនឹង​ទទួលបានសំណងវិញ ហើយអ្នកទិញខុនដូក៏ទទួលបានសំណងផងដែរ”។លោកបន្តថា “ករណីអាគារខុនដូឆេះអស់ ការសាងសង់ឡើងវិញនឹងធ្វើឡើងវិញអាស្រ័យលើការចចា និងការឯកភាពរួមរបស់ម្ចាស់ចំណែកកម្មសិទ្ឋនិមួយៗ”។

ជាមួយគ្នានេះអ្នកទិញខុនដូ ក៏គួរសិក្សាពីប្រព័ន្ឋសុវត្ថិភាព ការសិក្សាពីចំណតយា​ន​​យន្ត​ សិក្សាពីជណ្តើរយន្ត និងជណ្តើរសង្រ្គោះករណីមានអគ្គិភ័យ ឬហេតុការណ៍ណា​មួយកើតឡើងផងដែរ៕

ដោយៈ រ៉ាណេត

ភ្នំពេញៈ ស្ថិតនៅលើទីតាំងដ៏ល្អដែលមានសក្ដានុពល ងាយស្រួលក្នុងការរស់នៅ និងផ្ដល់ភាពល្អប្រសើរ ដល់ការធ្វើអាជីវកម្មលក្ខណៈគ្រួសារ បុរី ខេស៊ី បាន និងកំពុងតែបង្ហាញពីភាពទាក់ទាញ និងចាប់អារម្មណ៍ពីសំណាក់អតិថិជនយ៉ាងច្រើន ជាមួយនឹងការផ្ដល់ជូននូវលក្ខខណ្ឌដ៏ល្អក្នុងការបង់រំលោះថែមទៀតផង។

បុរី ខេ ស៊ី ត្រូវបានហ៊ុព័ទ្ធទៅដោយបណ្តុំលំនៅដ្ឋាន ដែលជាមានការអភិវឌ្ឍស្រាប់នាតំបន់ជាយក្រុង ស្ថិតក្នុងខណ្ឌព្រែកព្នៅ រាជធានីភ្នំពេញ និងមានសំណង់លំនៅដ្ឋានដ៏ទំនើបៗ និងទាន់សម័យដែលកំពុងតែទទួលបានការចាប់អារម្មណ៍ និងគាំទ្រពីសំណាក់អតិថិជនយ៉ាងច្រើន ជាមួយនឹងតម្លៃទាប គុណភាពសំណង់ខ្ពស់ និងងាយស្រួលក្នុងការប្រកបអាជីវកម្មបានយ៉ាងប្រសើរ។

ជាមួយនឹងទីតាំងដ៏ល្អ ស្ថិតនៅកណ្តាលទីប្រជុំជនដ៏មានសក្ដានុពល បុរីលំនៅដ្ឋានទាន់សម័យខេស៊ី ដែលកំពុងតែសម្រុកសាងសង់ ដើម្បីបញ្ចប់ទៅតាមគម្រោង និងបំពេ​ញតម្រូវការរបស់អតិថិជន បានបង្កើតកម្មវិធីដ៏ពិសេស ដោយការផ្ដល់ជូននូវលក្ខខណ្ឌបង់ប្រាក់កាន់តែងាយស្រួល និងច្រើនជម្រើស ដែលស្របទៅតាមលទ្ធភាពរបស់អតិថិជន។

អ្វីដែលជាលក្ខណៈពិសេសរបស់បុរី លំនៅដ្ឋាន ខេស៊ី ក្រៅពីមានម៉ូដរចនាដ៏ស្រស់ស្អាត និងទាន់សម័យគួរជាទីទាក់ទាញ គុណភាពសំណង់ខ្ពស់ ដែលផ្តល់ផាសុកភាពដល់ការរស់នៅ ថែមទាំងមានហេដ្ឋារចនាសម្ព័ន្ធជាច្រើនទៀតនៅអមសងខាង ដូចជានៅខាងក្រោយមានផ្សារព្រែកព្នៅចាស់ នៅខាងមុខជាប់ផ្លូវ មានផ្សារព្រែកព្នៅ សាលារៀនរដ្ឋ និងឯកជន មណ្ឌលសុខភាព គ្លីនិកឯកជន និងបណ្តាញហេដ្ឋារចនាសម្ព័ន្ធផ្លូវថ្នល់ខ្វាត់ខ្វែងជាច្រើន នៅជាប់ផ្លូវ៣០ម៉ែត្រ តភ្ជាប់ពីមហាវិថីឈ្នះ ឈ្នះ នៃទីក្រុងមរតកតេជោ ឆ្ពោះទៅផ្លូវជាតិលេខ៥។

បន្ថែមពីនេះ នៅមានគម្រោងអភិវឌ្ឍបឹងតាម៉ោក និងតំបន់អភិវឌ្ឍរមណីយដ្ឋានគំរូនៅតំបន់ជាយក្រុងនៃភ្នំប្រសិទ្ធិ ដែលជាគម្រោងអាទិភាពរបស់រដ្ឋបាល រាជធានីភ្នំពេញផងដែរ។

គម្រោងសំណង់លំនៅដ្ឋាន ដែលកំពុងតែមានភាពទាក់ទាញមួយនេះ បច្ចុប្បន្ន បាន និងកំពុងតែសម្រុកសាងសង់យ៉ាងមមាញឹក ដើម្បីបញ្ចប់ទៅតាមគម្រោងទាំងស្រុងនៅត្រឹមឆ្នាំ២០២១។ ចំពោះលក្ខខណ្ឌនៃការក្លាយខ្លួន ជាម្ចាស់លំនៅដ្ឋាននៅក្នុងបុរី ខេ ស៊ី គឺមានភាពងាយស្រួលបំផុត ដោយលោកអ្នកគ្រាន់តែមានប្រាក់ដំបូងត្រឹមតែ១០០០ដុល្លារតែប៉ុណ្ណោះ ដើម្បីក្លាយជាម្ចាស់កម្មសិទ្ធិ ហើយបង់បណ្តាក់ក្នុងរូបភាពជារំលស់ ជាបន្តបន្ទាប់ស្របទៅតាមគោលការណ៍ ដែលបានកំណត់ដោយក្រុមហ៊ុនអភិវឌ្ឍលំនៅដ្ឋានតែប៉ុណ្ណោះ។

ក្រុមហ៊ុនអភិវឌ្ឍន៍បុរីលំនៅដ្ឋានដ៏ទាន់សម័យមួយនេះ បានយកចិត្តទុកដាក់ និង  ផ្តោតសំខាន់ទៅលើសំណង់់បែបបៃតង ដែលជាការជួយសន្សំសំចៃថាមពលអគ្គិសនី ដោយធ្វើឱ្យលំនៅដ្ឋានក្នុងគំរោងនេះទទួលពន្លឺ និងលំហូរខ្យល់ធម្មជាតិចេញចូលគ្រប់គ្រាន់ រួមជាមួយនឹងការដាំដើមឈើបៃតងលម្អនៅពីមុខផ្ទះ ដែលកាន់តែជួយបន្ថែមភាពត្រជាក់ដល់លំនៅដ្ឋាន។

ដោយឡែកនៅក្នុងគម្រោងបុរីខេស៊ី ត្រូវបានរៀបចំនូវហេដ្ឋារចនាសម្ព័ន្ធ ស្របតាមស្ដង់ដារសំណង់ ដូចជា ផ្លូវបេតុងមេមានទំហំ១២ម៉ែត្រ ផ្លូវតូចមានទំហំ៨ម៉ែត្រមានប្រព័ន្ធទឹកស្អាត និងបណ្តាញរំដោះទឹកយ៉ាងត្រឹមត្រូវ និងមានការរៀបចំសាងសង់ជាទីធ្លាសម្រា​ប់អង្គុយកម្សាន្ត ហាត់ប្រាណសាធារណៈ និងសួនច្បារ ដែលបំពាក់ទៅដោយចង្កៀងអគ្គិសនី LED យ៉ាងភ្លឺច្បាស់ត្រជាក់ភ្នែកផងដែរ។

លោកអ្នកអាចធ្វើការសម្រេចចិត្តប្រភេទលំនៅដ្ឋាននៅក្នុង ខេស៊ី បានតាមសេចក្ដីប្រាថ្នា ទៅលើកលំនៅដ្ឋាន៣ប្រភេទខុសគ្នា រួមមានប្រភេទ Link House, Shop House និងប្រភេទ Twin Villa ដែលសុទ្ធតែសមស្របទៅនឹងការរស់នៅដែលពោរពេញទៅដោយផាសុកភាពខ្ពស់ទាំងអស់។

សម្រាប់ព័ត៌មានបន្ថែម លោកអ្នកអាចទំនាក់ទំនងបាន តាមរយៈទូរស័ព្ទលេខ ៖ ០៧៨ ៩៥ ៩៥ ៦៧ / ០៨៧ ៣៦៩ ៥៣៦ / ០៨៩ ៧៨ ៧៧ ២១ ៕