ដោយ ប៊ី

ភ្នំពេញៈ ការរស់នៅតាមខុនដូនៃអាគារសហកម្មសិទ្ឋ ជាបែបបទជីវិតសម្រាប់មនុស្សសម័យថ្មី ដែលពួកគេរស់នៅលើអាគាររួម បីដូចជាក្នុងសហគមន៍រួមមួយ ដែលមានសេវាកម្មសន្តិសុខ២៤ម៉ោង ក្លឹបហាត់ប្រាណ អាងហែលទឹក ភោជនីយដ្ឋាន សេវាប្រចាំថ្ងៃលើការបោសសំអាត និងអនាម័យ និងសេវាកម្មជាច្រើនទៀត។

តើអ្នកត្រៀមខ្លួនសម្រាប់ជីវិតបែបថ្មី រស់នៅតាមអាគារកប់ពពកបែបនេះឬនៅ? ថ្ងៃនេះគេហទំព័រ Propertyarea.asia សូមលើកយកចំណេះដឹងមួយចំនួនទាក់ទងនឹងជីវិតរស់នៅលើអាគារខុនដូ តើមានលក្ខខ័ណ្ឌត្រូវបំពេញអ្វីខ្លះ និងមានភាពងាយស្រួលយ៉ាងដូចម្តេច?

ការរស់នៅតាមវីឡា ជាការរស់នៅលើលំនៅដ្ឋាន ដែលមានលក្ខណៈដាច់ៗពីគ្នា ផ្ទុយទៅវិញការរស់នៅលើអាគារខុនដូ ជាការរស់នៅបែបជាសហគមន៍ដែលមានម្ចាស់ច្រើន ឬគ្រួសារច្រើននិងមានក្រុមមនុស្សចម្រុះ ដែលត្រូវរស់នៅអាគារជាមួយគ្នា ដូចនេះទើបអ្នកគ្រប់គ្រងអាគារ ត្រូវបានការបែងចែកនូវបទបញ្ជាផ្ទៃក្នុងសម្រាប់អាគារនិមួយៗ។

 ការជួសជុលឬលាបព៌ណអាគារ

អ្នករស់នៅតាមខុនដូ ពេលត្រូវការជួសជុលអ្វីមួយ ត្រូវសុំទៅអ្នកគ្រប់គ្រងអាគារជាមុន ដើម្បីឲ្យអ្នកគ្រប់គ្រងអាគារបានដឹង និងអាចអនុញ្ញាត្តឲ្យធ្វើពេលណាមួយ ដែលមិនបង្កឲ្យមានសម្លេងរំខានច្រើនដល់អ្នកស្នាក់នៅអាគាររួម។ ចំណែកការលាបព៌ណអាគារសម្រាប់ផ្ទៃខាងក្រៅ មិនត្រូវគេអនុញ្ញាត្តនោះទេ ប៉ុន្តែម្ចាស់លំនៅដ្ឋានណាមួយ អាចលាបព៌ណ ឬឌីសាញលើផ្នែកខាងក្នុងលំនៅដ្ឋានរបស់ខ្លួន បានតាមចំណង់ចំណូលចិត្ត។

ការកំណត់ពេលវេលា

ដោយសារអាគារនិមួយៗមានម្ចាស់ស្នាក់នៅច្រើន និងចម្រុះគ្នាបែបនេះហើយ ទើបអ្នកគ្រប់គ្រងអាគារតម្រូវឲ្យអ្នកស្នាក់នៅ មិនត្រូវបង្កសម្លេងរំខានដល់ អ្នកដទៃលើសពីម៉ោង១០យប់នោះទេ ករណីពួកគេជប់លៀងឬចាក់បាស់រាំរែកណាមួយ ប៉ុន្តែការកំណ​ត់ម៉ោងបែបនេះ មិនដូចគ្នានោះទេ វាអាស្រ័យលើអ្នកគ្រប់គ្រងអាគារនិមួយៗ។

មិនអនុញ្ញាត្តឲ្យចិញ្ចឹមសត្វ

ដោយសារឆ្កែ និងឆ្មារជាសត្វមួយ ដែលពូកែព្រុស និងជុះនោម និងជុះអាចម៍គ្មានសណ្តាប់ធ្នាប់ អ្នកគ្រប់គ្រងអាគារ មិនតម្រូវឲ្យអ្នកស្នាក់នៅលើខុនដូចិញ្ចឹមឆ្កែ ឬសុនកនោះទេ លើកលែងតែករណីពិសេស ដែលមានអ្នកមើលថែរសុនកច្បាស់លាស់។

 ចំណតយានយន្តត្រូវបង់ប្រាក់ប្រចាំខែ

ខុនដូភាគច្រើនតែងមានចំណតយានយន្តផ្ទាល់ខ្លួន ប៉ុន្តែខុនដូខ្លះក៏មានចំណតមិនគ្រប់ ឬសមាមាត្រនឹងចំនួនផ្ទះនៅលើអាគាររួមផងដែរ ដូច្នេះអ្នកស្នាក់នៅខុនដូត្រូវតម្រូវឲ្យបង់ប្រាក់ចន្លោះពី៣០ ទៅ៤០ដុល្លារក្នុងមួយខែៗ អាស្រ័យលើការកំណត់របស់ក្រុមហ៊ុនគ្រប់គ្រងអាគារ។

ការបង់ប្រាក់លើសេវាគ្រប់គ្រងអាគារ

ដោយសារខុនដូជាអាគាររួម និងមានអ្វីៗសម្រាប់ប្រើប្រាស់រួម ដូចជា ជណ្តើរយន្ត អាងហែលទឹក ឬកន្លែងហាត់ប្រាណជា និងថ្លៃសេវាសន្តិសុខជាដើម ទើបក្រុមហ៊ុនគ្រប់​គ្រង តម្រូវឲ្យអ្នកស្នាក់នៅបង់ប្រាក់ចន្លោះ០.៥០ ទៅ១ដុល្លារសម្រាប់ទំហំផ្ទះក្នុងមួយម៉ែត្រការ៉េ។ ប្រាក់ទាំងអស់នេះ នឹងប្រើប្រាស់សម្រាប់ការថែរទាំ និងជួសជុលសម្ភារៈ បរិក្ខារួម ដែលអ្នកស្នាក់នៅអាចប្រើប្រាស់បាន។

ប៉ុន្តែអាគារខុនដូខ្លះ ក៏តម្រូវឲ្យអ្នកស្នាក់នៅបង់ប្រាក់ សម្រាប់សេវាហាត់ប្រាណ អាងហែលទឹក ឬសេវាអនាម័យជាកញ្ចប់ចន្លោះពី២០ ទៅ៣០ដុល្លារក្នុងមួយខែ អាស្រ័យលើគំរោងនិមួយៗ ឬក្រុមហ៊ុនគ្រប់គ្រងអាគារនិមួយៗជាអ្នកកំណត់។

 សេវាសំអាត និងបោកអ៊ុត

ដោយសារវាជាបណ្តុះក្រុមមនុស្សចម្រុះ អ្នកគ្រប់គ្រងអាគារខុនដូនិមួយៗ តែងផ្តល់សេវាអូតសំអាត និងអនាម័យចំនួនបីដងក្នុងមួយសប្តាហ៍ និងផ្តល់សេវាបោកអ៊ុតសម្លៀកបំពាក់ផងដែរ ប្រសិនជាម្ចាស់លំនៅដ្ឋាននិមួយៗ ត្រូវការសេវាបោកគក់សម្លៀកបំពាក់ ដោយសារមិនមានពេលបោកគក់ខ្លួនឯង ព្រោះជាប់រវល់នឹងការបំពេញការងារជាដើម។

សន្តិសុខ

ការរស់នៅតាមខុនដូ មិនមានអ្វីត្រូវព្រួយបារម្ភ ទាក់ទងនឹងសន្តិសុខនោះទេ ដោយសារអាគារខុនដូនិមួយៗ សុទ្ឋតែមានបុគ្គលិក២៤ម៉ោងយាមប្រចាំការ។ ដូចនេះ ម្ចាស់លំនៅដ្ឋានក្នុងអាគារខុនដូ មិនចាំបាច់ជាការបារម្ភពីការទុកផ្ទះចោលនោះទេ ខុសពីផ្ទះល្វែងឬផ្ទះវីឡាពេលម្ចាស់មិននៅ ត្រូវបារម្ភពីពួកជនខិលខូច ឬលោកចោរចូលលួចទ្រព្យសម្បត្តិ។

 សេវាកុំម៉ង់អាហារ

វាអាស្រ័យលើក្រុមហ៊ុនគ្រប់គ្រង ឬអ្នកអភិវឌ្ឍន៍និមួយៗ ដែលបំពាក់សេវាកម្ម សម្រាប់អ្នកស្នាក់នៅ លើអាគារសហកម្មសិទ្ឋរបស់ខ្លួន ប៉ុន្តែសម្រាប់អាគារខុនដូថែលSilver Townគឺមានសេវាកុំម៉ង់អាហារ កុំម៉ង់ភេសជ្ជៈ កុំម៉ង់សេវាបោកអ៊ុតបាន២៤ម៉ោង លើ២៤ម៉ោង ដោយគ្រាន់តែអ្នកស្នាក់នៅទូរស័ព្ទ ទៅកាន់បុគ្គលិកទទួលភ្ញៀវនៅក្នុងអាគារប៉ុណ្ណោះ។

 សេវាអគ្គិភ័យឬការសង្រ្គោះ

នៅកម្ពុជា មិនទាន់មានអាគារខុនដូកប់ពពកណាមួយ មានករណីអគ្គិភ័យនៅលើអាកាសនៅឡើយទេ ហើយករណីនេះ គឺជាអ្វីដែលប្រជាពលរដ្ឋខ្មែរភាគច្រើនបានគិត និងបារម្ភ ប៉ុន្តែវាមិនមែនជារឿងធ្ងន់ធ្ងរនោះទេ ព្រោះអ្នកវិនិយោគអាគារខុនដូដែលចំណា​យប្រាក់រាប់លានដុល្លារ ពួកគេសុទ្ឋតែបានគិតគូរួចហើយ ពីការបំពាក់ឧបករណ៍ការពារអគ្គិភ័យ ប្រព័ន្ឋទឹកសម្រាប់បាញ់ និងជណ្តើរជើង ឬជណ្តើរសុវត្ថិភាពដែលអាចជម្លៀសមនុស្សចេញបាន ក្នុងករណីមានអគ្គិភ័យកើតឡើងជាយថាហេតុណាមួយផងដែរ។

ជាមួយគ្នានេះ រាជរដ្ឋាភិបាលក៏មិនព្រងើយកន្តើយនឹងបញ្ហាបង្ការជាមុននោះដែរ ជាក់ស្តែងខាងនគរបាលពន្លត់អគ្គិភ័យ ក៏ទទួលបានការបណ្តុះបណ្តាល ដើម្បីជម្លៀសមនុស្សចេញពីអាគារ ព្រមទាំងមានរថយន្តបាញ់ទឹក ដើម្បីត្រៀមបង្ការ និងអន្តរាគមន៍ឲ្យបានទាន់ពេលវេលាផងដែរ៕

ដោយស៊ីវ ម៉េង

        ភ្នំពេញ មុនវិនិយោគលើវិស័យអចលនទ្រព្យ ការពិនិត្យទៅលើមូលដ្ឋាននិងព៌តមានសំខាន់ៗមួយចំនួន ពិតជាមានសារៈសំខាន់ណាស់ ដើម្បីឲ្យការវិនិយោគរបស់អ្នកទទួលបានជោគជ័យ។

អគ្គនាយកក្រុមហ៊ុនCentury21 Dream Propertyលោកគាម សៀកឡុងបានមានប្រសាសន៍ក្នុងវគ្គបណ្តុះបណ្តាលស្តីពី” តើធ្វើដូចម្តេចដើម្បីវិនិយោគអចលនទ្រព្យឲ្យ​ទទួលបានផលចំណេញកាលពីពេលថ្មីៗនេះថា ការវិនិយោគលើវិស័យអចល​នទ្រព្យ ដើម្បីទទួលបានផលចំណេញ ពិតជាមានសារៈសំខាន់ណាស់ ប៉ុន្តែដើម្បីទទួ​ល​បានផលចំណេញ អ្នកវិនិយោគត្រូវពិនិត្យទៅលើមូលដ្ឋានមួយចំនួនដូចជា កត្តាផ្លូវច្បាប់ ការលក់ក្តីស្រម័យ និងមូលដ្ឋានព៌តមានជាក់លាក់នានា ដើម្បីធ្វើឲ្យប្រាកដថាការវិនិយោគរបស់លោកអ្នកទទួលបានជោគជ័យ។

លោកបន្តថា “លំហូរសាច់ប្រាក់ក៏ពិតជាមានសារៈសំខាន់មិនអាចខ្វះបាន ប៉ុន្តែអ្នក​វិនិយោគត្រូវប្រាកដថា ការប្រើប្រាស់សាច់ប្រាក់របស់អ្នកធ្វើឡើងយ៉ាងដូចម្តេច ហើយបើ​វាមានបញ្ហា តើលោក អ្នកមានវិធីសាស្រ្តឬមូលដ្ឋានសាច់ប្រាក់បែបណា ដើម្បីប្រាសចាក​ហានិភ័យ”។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានមានប្រសាសន៍ឲ្យដឹងផងដែរ ពីដំណើរវិវត្តន៍ក្នុងវិស័យអចលនវត្ថុកម្ពុជា ដែលវិស័យ​នេះនៅតែមានភាពរ៉ឹងមាំ ដោយផ្អែកលើមូលដ្ឋានជាច្រើនដូចជា កត្តាសុខសន្តិភាព ស្ថេរ​ភាពនយោបាយ និងកំនើនសេដ្ឋកិច្ចដ៏រ៉ឹងមាំរបស់កម្ពុជា។លោកបន្តថា ជាមួយនឹងកាលា​នុវត្តន៍ភាពនេះ ការវិនិយោគលើវិស័យអចលនទ្រព្យ អ្នកវិនិយោគគួរប្រឹក្សាជាមួយអ្នកជំ​នាញ ដើម្បីពួកគេអាចប្រមូលព៌តមាននានា និងទទួលបានដំបូន្មានពីអ្នកជំនាញ ក្នុងការ​ចង្អុលបង្ហាញមូលដ្ឋាននៃអចលនទ្រព្យ ឳកាសចំណេញ និងមូលហេតុដែលគួរឬមិនគួរ​វិនិយោគក្នុងវិស័យអចលនទ្រព្យ។

លោកបន្តថា “លំហូរសាច់ប្រាក់ និងការប្រើប្រាស់សាច់ប្រាក់ឲ្យបានត្រឹមត្រូវ មាន​សារៈសំខាន់ណាស់ ដើម្បីធ្វើឲ្យប្រាកដថាការវិនិយោគរបស់យើងមានសុវត្ថិភាព”។លោក​បន្តថា “ជាមួយគ្នានេះ ការប្រើប្រាស់ប្រាក់ធនាគារ ក៏មិនមានបញ្ហានោះដែរ ប្រសិនជា​យើងមានលំហូរសាច់ប្រាក់ អាចទប់ទល់នឹងភាពជាប់គាំងនៅពេលណាមួយបាន”។

ជាមួយនេះ លោកច្រឹក សុខនីមក៏បានលើកឡើងពីទិដ្ឋភាពផ្លូវច្បាប់ ដែលអ្នកវិនិយោគគួរសិក្សាស្វែងយល់ ដើម្បីធ្វើយ៉ាងណាកុំឲ្យមានបញ្ហាទាក់ទងនឹងប័ណ្ណកម្មសិទ្ឋ មានជម្លោះទាក់ទងនឹងបញ្ហាអចលនទ្រព្យ ដែលយើងបានវិនិយោគផងដែរ ព្រោះការមាន​បញ្ហា ជារឿងឈឺក្បាលនិងធ្វើឲ្យយើងជាប់រវល់ជាមួយនឹងស្ថាប័នតុលាការ ដែលនាំ​ឲ្យខាតទាំងពេលវេលា និងប្រាក់កាសផងដែរ៕

ដោយវុត្ថា

ត្បូងឃ្មុំៈ រដ្ឋមន្ដ្រីក្រសួងសុខាភិបាល លោកម៉ម ប៊ុនហេង បានថ្លែងថា មន្ទីរពេទ្យមិត្តភាពកម្ពុជា-ចិន ត្បូងឃ្មុំ ដែលមានតម្លៃប្រមាណ៥០លានដុល្លារ ត្រូវបានសាងសង់សម្រេចបាន៤៥%ហើយ នឹងបញ្ចប់ការសាងសង់ ជាស្ថានពរនាចុងខែតុលា ឆ្នាំ២០២១ខាងមុខ។

លោក ម៉ម ប៊ុនហេង រដ្ឋមន្ដ្រីក្រសួងសុខាភិបាល ក្នុងឱកាសចុះទៅត្រួតពិនិត្យវឌ្ឍនៈភាព ដំណើរការសាងសង់មន្ទីរពេទ្យនាថ្ងៃទី២៧ ខែកុម្ភៈ ឆ្នាំ២០២០នេះ បានឱ្យដឹងថា មន្ទីរពេទ្យថ្មីនេះ នឹងក្លាយជាមន្ទីរពេទ្យប្រចាំតំបន់ គ្រប់ដណ្តប់ប្រជាជនក្នុងខេត្តត្បូងឃ្មុំ និងមួយចំនួននៃខេត្តក្រចេះ រតនគិរី ស្ទឹងត្រែង និងមណ្ឌលគិរី

លោកបន្តថា “មកទល់នឹងពេលនេះ មន្ទីរពេទ្យមិត្តភាពកម្ពុជា-ចិនត្បូងឃ្មុំ សាងសង់បាន៤៥%ហើយ”។ លោកបន្តថា “ក្រសួងសុខាភិបាល នឹងខិតខំប្រឹងប្រែងពង្រឹងចំណេះជំនាញ និងបច្ចេកទេសដល់ក្រុមគ្រូពេទ្យ ដើម្បីត្រៀមផ្ដល់សេវាសុខភាពជូនពលរដ្ឋនៅខេត្ដត្បូងឃ្មុំនេះ ប្រកបដោយប្រសិទ្ធិភាពខ្ពស់”។

លោកបន្ថែមថា ចំពោះការវិវឌ្ឍការសាងសង់បាន៤៥%នេះ ក្នុងនោះរួមមាន៖ សាងសង់អគារអ្នកជម្ងឺ ត្រូវបានចាក់ប្លង់សេជាន់ទី៥រួចរាល់ ការងាររៀបឥដ្ឋជញ្ជាំងខណ្ឌសម្រេចបាន៥០%  រចនាសម្ពន្ធ័ និងការងារគ្រោងរបស់អគារត្រូវបានបញ្ចប់ ការងាររៀបឥដ្ឋជញ្ជាំងខណ្ឌបានសម្រេច៩០% ប្រពន័្ធទឹកកខ្វក់សម្រេចបាន៧៨% ប្រពន័្ធទឹកភ្លៀងសម្រេចបាន៦៨% ប្រព័ន្ធរូងអគ្គិសនីក្រោមដីសម្រេចបាន៩០% ផ្លូវនៅខាងក្រៅការដ្ឋានធ្វើរួចជាស្ថាពរ រីឯផ្លូវនៅខាងការដ្ឋានវិញសម្រេចបាន៥០% ការងារកាយដីក្នុងដំណើរការសាងសង់រនាំងទប់ដីជម្រាលសម្រេចបាន៩០% និងសសរនៃរបងពទ្ធ័ជុំវិញមន្ទីរពេទ្យត្រូវបានសាងសង់រួចរាល់។

មន្ទីរពេទ្យមិត្តភាព កម្ពុជា-ចិន ត្បូងឃ្មុំនេះ បានសាងសង់ឡើង នាថ្ងៃទី១ ខែមីនា ឆ្នាំ២០១៩ ដោយសម្ពោធបើកការដ្ឋានសាងសង់ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងបញ្ចប់ការសាងសង់សម្រេចជាស្ថាពរ ទៅវិញនៅចុងខែតុលា ឆ្នាំ២០២១ ដែលសាងសង់លើផ្ទៃដីទំហំ២៤,៣០០ម៉ែត្រការ៉េ លើទំហំផ្ទៃដីសរុប ៥៥,៨១៥ម៉ែត្រការ៉េ។ គម្រោងនេះសាងសង់ក្នុងរយ:ពេល៤០ខែ។ មន្ទីរពេទ្យធំថ្មីនេះ មានតំរូវការបុគ្គលិកជំនាញប្រមាណ៤៥៦នាក់បន្ថែមទៀត។

ដោយឡែក មន្ទីរពេទ្យនេះ នឹងបំពាក់នូវឧបករណ៍ទំនើបៗ និងមានគ្រែសរុបចំនួន៣០០គ្រែ រួមទាំងមានទទួលព្យាបាលជំងឺដូចជា ផ្នែកជំងឺទូទៅ ផ្នែកជំងឺកុមារ ផ្នែកជំងឺឆ្លង ផ្នែកពិគ្រោះជំងឺក្រៅ ផ្នែកប្រពោធនកម្ម (ICU) ផ្នែកសង្គ្រោះបន្ទាន់ ផ្នែកវះកាត់ ផ្នែករោគស្ត្រី និងសម្រាលកូន ផ្នែករូបភាពវេជ្ជសាស្ត្រ និងEndoscopy ផ្នែកមន្ទីរពិសោធន៍ ឱសថស្ថាន បន្ទប់រំងាប់មេរោគ ផ្នែកប្រព័ន្ធព័ត៌មាន និងបច្ចេកទេសវេជ្ជសាស្ត្រ និងផ្នែកគាំទ្រ មានដូចជា រដ្ឋបាលនិងប្រព័ន្ធសុវត្ថិភាព បន្ទប់បង្កើត និងផ្ទុកអុកស៊ីសែន បន្ទប់សំអាតទឹកកខ្វក់ បន្ទប់ដាក់កាកសំណល់វេជ្ជសាស្ត្រ និងសាលដាក់សាកសព៕