ដោយហ្សូ លី

ភ្នំពេញៈ តម្លៃផ្ទះថ្មីនៅក្នុងប្រទេសចិន បានកើនឡើងក្នុងល្បឿនខ្សោយបំផុត ក្នុង  រយៈពេលប៉ុន្មានខែនៅឆ្នាំនេះ ខណៈសេដ្ឋកិច្ចបានធ្លាក់ចុះ ហើយទីផ្សារអចលនទ្រព្យរបស់ប្រទេសនេះឈានដល់កម្រិតមួយគួរឱ្យព្រួយបារម្ភ។

យោងតាមអ្នកស្រាវជ្រាវអចលនទ្រព្យ CRIC បានឱ្យដឹងថា ការលក់អចលនទ្រព្យក្នុងខែមករា ដោយតម្លៃត្រូវបានរាយការណ៍ ដោយអ្នកអភិវឌ្ឍន៍កំពូលៗចំនួន១០០នាក់របស់ចិន បានធ្លាក់ចុះ១២ភាគរយ បើធៀបនឹងរយៈពេលដូចគ្នាកាលពីឆ្នាំមុន។ NBS នឹងចេញផ្សាយតែទិន្នន័យលក់ផ្លូវការ ដែលបានបញ្ចូលគ្នាចាប់ពីខែមករា ដល់ខែកុម្ភៈនិងខែមីនា។

ផ្អែកលើទិន្នន័យការិយាល័យស្ថិតិជាតិ (NBS) នៅថ្ងៃចន្ទនេះថា តម្លៃគេហដ្ឋានថ្មីជាមធ្យមនៅក្នុងទីក្រុងធំៗចំនួន៧០ របស់ប្រទេសចិនបានកើនឡើងត្រឹម០,២ភាគរយប៉ុណ្ណោះនៅក្នុងខែមករា បើធៀបនឹងឆ្នាំមុនវិញគឺទាបជាងការរំពឹងទុក និងបង្ហាញពីកម្រិ​ត​ទាបបំផុតក្នុងខែកុម្ភៈ។

ការលក់ផ្ទះបានធ្លាក់ចុះ ខណៈពេលដែលការផ្ទុះឡើងនៃមេរោគ បានធ្វើឱ្យភ្នា​ក់ងារលក់អចនទ្រព្យបិទ រីឯអ្នកទិញក៏មានភាពភ័យខ្លាច ដោយសារមិនអាចរកស៊ីឬធ្វើការនៅខាងក្រៅបានយូរ។

អ្នកវិភាគនៅមជ្ឈមណ្ឌលពិគ្រោះយោបល់អចលនទ្រព្យ Centaline នៅទីក្រុងប៉េកាំងលោកចាង ដាយវីបាននិយាយថា “ទិន្នន័យតម្លៃនៅក្នុងប្រទេសចិន សម្រាប់ខែកុម្ភៈនេះ មានភាពទូលំទូលាយ និងបានធ្លាក់ចុះ នៅពេលអ្នកអភិវឌ្ឍន៍អចលនទ្រព្យភាគច្រើនសម្រុកទៅរកបន្ទប់លក់”។

ក្រុមហ៊ុនChina Evergrande Group ដែលជាក្រុមហ៊ុនអភិវឌ្ឍន៍ធំលំដាប់ទីបីដោយសារការលក់នៅក្នុងប្រទេស បាននិយាយកាលពីថ្ងៃអាទិត្យទី១៦ កុម្ភៈថា ខ្លួននឹងផ្តល់ការបញ្ចុះតម្លៃដល់ទៅ២៥ ភាគរយ សម្រាប់អចនទ្រព្យទាំងអស់ ចាប់ពីថ្ងៃទី១៨ ដល់ថ្ងៃទី ២៩ ខែកុម្ភៈ ដែលនេះជាការបញ្ចុះតម្លៃដ៏ធំមិនធ្លាប់មានពីមុនមក។

ប៉ុន្តែសេដ្ឋវិទូភាគច្រើនមិនរំពឹងថា ទោះបីជាមានការបន្ធូរបន្ថយតម្លៃ នៅក្នុងការលក់អចនទ្រព្យក៏ដោយ ក៏វាមិនអាចជំរុញដល់អ្នកទិញបានឡើយ ព្រោះបំណុលគ្រួសាររបស់អ្នកទិញមានច្រើនរួចទៅហើយ។

តម្លៃអចលនទ្រព្យ ត្រូវបានគេរំពឹងថានឹងធ្លាក់ចុះនៅឆ្នាំនេះ ខណៈកំណើនសេដ្ឋកិច្ចធ្លាក់ចុះយ៉ាងខ្លាំង៕

(The New York Times)

ដោយ ៖ រ៉ាណេត

ភ្នំពេញ ៖ សម្រាប់តែខែមករា ឆ្នាំ២០២០ អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ ប្រមូលចំណូលពន្ធអាករគ្រប់ប្រភេទបានមានចំនួន៩៥៦.៧៦ប៊ីលានរៀល ស្មើនឹងប្រមាណជា ២៣៩.១៩លានដុល្លារអាមេរិក កើនឡើង១៤.៧៤ភាគរយបើធៀបរយៈពេលដូចគ្នាឆ្នាំ២០១៩។

ថ្លែងក្នុងកិច្ចប្រជុំបូកសរុបលទ្ធផល ប្រមូលចំណូលពន្ធប្រចាំខែមករា ឆ្នាំ២០២០ ព្រមទាំងទិសដៅសម្រាប់អនុវត្តបន្តរបស់អគ្គនាយកដ្ឋានពន្ធដារ លោក គង់ វិបុល ប្រតិភូរាជរដ្ឋាភិបាលទទួលបន្ទុក ជាអគ្គនាយកនៃអគ្គនាយកដ្ឋានពន្ធដារ បានបញ្ជាក់ថា ចំណូលកត់ត្រាតាមប្រភេទ អ្នកជាប់ពន្ធក្នុងខែមករា ឆ្នាំ២០២០នេះ មានការកើនឡើង គួរឱ្យកត់សម្គាល់ផងដែរក្នុងនោះ អ្នកជាប់ពន្ធធំកើនឡើង ១២.៩៨ភាគរយ អ្នកជាប់ពន្ធមធ្យមកើនឡើង ៣៩,១២ភាគរយ និងជាពិសេស អ្នកជាប់ពន្ធតូច កើនឡើង៦០៧,៩៧ភាគរយ។

លោកបានណែនាំបន្ថែម ដល់គ្រប់អង្គភាព ឱ្យបន្តឱ្យបន្តខិតខំពង្រឹងការអនុវត្តច្បាប់ វិន័យការងារ និងត្រូវមានភាពទន់ភ្លន់តែម៉ឺងម៉ាត់ ដោយផ្អែកលើទិដ្ឋភាពច្បាប់ ក្នុងការផ្តល់សេវាជូនអ្នកជាប់ពន្ធ និងការគ្រប់គ្រងប្រមូលចំណូល។ ក្នុងស្មារតីបុរេសកម្ម និងអនុវត្តតាមអនុសាសន៍ណែនាំរបស់អគ្គបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ អគ្គនាយកដ្ឋានពន្ធដារនឹងបន្តតាមដាន និងយកចិត្តទុកដាក់ខ្ពស់ចំពោះហានីភ័យនៃម៉ាក្រូសេដ្ឋកិច្ចសាកល និងក្នុងតំបន់ ក្នុងកាលៈទេសៈដែលស្ថានភាពនៃការប្រកួតប្រជែង នៃពាណិជ្ជកម្មអន្តរជាតិ និងបម្រែបម្រួលនៃភូមិសាស្ត្រនយោបាយផងដែរ ព្រមទាំងត្រូវគិតគូរទាំងទិដ្ឋភាព (១) ការបង្កើនប្រសិទ្ធភាពនៃការគ្រប់គ្រងប្រមូលចំណូលពន្ធ និង (២) វិធានការជំរុញកំណើនសេដ្ឋកិច្ចនិងលើកកម្ពស់សកម្មភាពសេដ្ឋកិច្ចក្នុងស្រុក ដែលផ្តល់នូវស្ថានភាពអំណោយផលនិងទាក់ទាញការវិនិយោគ។
សម្រាប់ឆ្នាំ២០២០នេះ ដើម្បីធានានូវប្រសិទ្ធភាពក្នុងការអនុវត្តការប្រមូលចំណូលពន្ធ បានគ្រប់តាមផែនការច្បាប់ ចំនួនប្រមាណ១១,៥៤៣.៣១ប៊ីលានរៀល (ប្រមាណ២ ៨៨៥.៨៣លានដុល្លារអាមេរិក) អគ្គនាយកដ្ឋានពន្ធដារ នឹងបន្តអនុវត្តយ៉ាងម៉ឺងម៉ាត់ និងប្រកបដោយប្រសិទ្ធភាពខ្ពស់ថែមទៀត នូវគោលនយោបាយកែទម្រង់ស៊ីជម្រៅ របស់រាជរដ្ឋាភិបាល ព្រមទាំងដាក់ចេញនូវវិធានការមួយចំនួន ដូចខាងក្រោម ៖
* បន្តពង្រឹងការអនុវត្តវិធាននៃការប្រើប្រាស់វិក្កយបត្រថ្មី ស្របតាមប្រកាសលេខ ៧២៣ សហវ.ប្រក ចុះថ្ងៃទី១៤ ខែសីហា ឆ្នាំ២០១៩ ស្ដីពីវិធាននៃការប្រើប្រាស់វិក្កយបត្រ។
* បន្តរៀបចំយន្តការពិនិត្យ និងតាមដានការគេចវេះពន្ធ ចំពោះប្រភេទទំនិញដែលមានហានិភ័យដល់ចំណូលពន្ធមួយចំនួន ជាអាទិ៍ សម្ភារសំណង់ ស៊ីម៉ង់តិ៍ បេតុងនិងប្រេងឥន្ទនៈ ព្រមទាំងបន្តពង្រឹងយន្តការពិនិត្យ និងតាមដាន ការអនុវត្តការបិទតែមប្រិ៍អាករលើផលិតផលបារី និងរៀបចំអនុវត្តការបិទតែមប្រិ៍អាករ លើផលិតផលស្រាបៀរ ដើម្បីឱ្យការបង់ពន្ធមានតម្លាភាព និងធានាការប្រកួតប្រជែងដោយស្មើភាព។
* បន្តពង្រឹងការងារចុះបញ្ជីពន្ធដារ ឱ្យមានប្រសិទ្ធភាពនិងតម្លាភាព ដើម្បីធានាការផ្ដល់សេវាឱ្យបានល្អប្រសើរ និងការគ្រប់គ្រងចំណូលពន្ធ មានប្រសិទ្ធភាពខ្ពស់។
* បន្តការរៀបចំកម្មវិធី “ពន្ធដារកម្ពុជា” ដោយផ្សព្វផ្សាយនិងជួបជជែកជាមួយអ្នកជាប់ពន្ធផ្ទាល់ (GDT Facebook Live)។
* បន្តពង្រឹងការងារចាត់ចែងលិខិតប្រកាស ដោយត្រៀមដាក់ឱ្យអនុវត្តប្រព័ន្ធគ្រប់គ្រង ការដាក់លិខិតប្រកាសពន្ធតាមអនឡាញ (E-Filing), កម្មវិធីប្រកាសពន្ធសម្រាប់អ្នកជាប់ពន្ធតូច និងទម្រង់លិខិតប្រកាសពន្ធប្រចាំខែថ្មី។
* ត្រៀមអនុវត្តដាក់ឱ្យប្រើប្រាស់ នូវកម្មវិធីវិក្កយបត្រនាំសំណាង (Invoice Lucky Draw App) ដើម្បីពង្រឹងអនុលោមភាពសារពើពន្ធ និងតម្លាភាព ក្នុងការកំណត់ហានិភ័យដើម្បីធ្វើសវនកម្មពន្ធដារ។
* បន្តពង្រឹងប្រសិទ្ធភាព នៃត្រួតពិនិត្យការតាមដានឯកសារ និងផ្តល់លទ្ធភាពជូនអ្នកជាប់ពន្ធ ឬសាធារណជនមានភាពងាយស្រួល ក្នុងការតាមដានពីវឌ្ឍនភាព នៃឯកសាររបស់ខ្លួន ដែលបានដាក់មកកាន់ អគ្គនាយកដ្ឋានពន្ធដារដោយប្រើប្រាស់នូវកម្មវិធីត្រួតពិនិត្យ និងតាមដានឯកសារ (Document Checking and Tracking App)។
* ដាក់ឱ្យអនុវត្តនូវគោលការណ៍ នៃកម្មវិធីកែទម្រង់ធនធានមនុស្ស ជាពិសេសគោលការណ៍កំណត់ចំណាត់ថ្នាក់ នៃកម្រិតប្រសិទ្ធភាពក្នុងការគ្រប់គ្រង និងការទទួលខុសត្រូវរបស់ ប្រធានអង្គភាព (Merit and Demerit System)។
* បន្តលើកកម្ពស់និងបញ្ជ្រាបវប្បធម៍បង់ពន្ធ និងពង្រឹងការអនុវត្តច្បាប់ស្តីពីសារពើពន្ធ ជាពិសេស សម្រាប់រយៈពេលនៃការប្រកាសពន្ធ លើប្រាក់ចំណូលប្រចាំឆ្នាំ ដោយបន្តពង្រឹងការរៀបចំសិក្ខាសាលាផ្សព្វផ្សាយ និងបណ្តុះបណ្តាលជូនមន្ត្រីអនុវត្តផ្ទាល់ និងជូនអ្នកជាប់ពន្ធ។
* ពង្រឹងកិច្ចសហការជាមួយក្រសួងរៀបចំដែនដី នគរូបនីយកម្ម សំណង់ ដោះស្រាយករណីឯកសារចុះបញ្ជីដីមានលក្ខណៈជាប្រព័ន្ធកកស្ទះនៅមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត បន្តចុះយុទ្ធនាការជួយខេត្តដែលបានការកកស្ទះឯកសារ និងបន្តអនុវត្តយន្តការដោះស្រាយដូចភ្លៀងរលឹម។

* បន្តជំរុញបញ្ចប់ការរៀបចំធ្វើបច្ចុប្បន្នភាព ច្បាប់ស្ដីពីសារពើពន្ធ និងបទប្បញ្ញត្តិស្ដីពីពន្ធដារនានា ជូនក្រសួងសេដ្ឋកិច្ចនិងហិរញ្ញវត្ថុពិនិត្យសម្រេច។
* បន្តអនុវត្តវិធានការចាំបាច់នានាដូច ដែលមានកំណត់ក្នុងសារាចរណែនាំ ស្តីពីការអនុវត្តច្បាប់ស្ដីពីហិរញ្ញវត្ថុឆ្នាំ២០២០ និងយុទ្ធសាស្រ្តកៀគរចំណូល ឆ្នាំ២០១៩-២០២៣៕

កាលពីព្រឹកមិញថ្ងៃទី ១៧ ខែកុម្ភ: ២០២០ នៅក្នុងពិធីបូកសរុបការងាររបស់ «ក្រុមប្រឹក្សាជាតិកម្ពុជាដើម្បីស្ត្រី» នៅវិមានសន្តិភាព សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានមានប្រសាសន៍អំពី ជំងឺ COVID-19 (ឈ្មោះផ្លូវការនៃមេរោគកូរ៉ូណាថ្មី) ដែលកំពុងញាំញី និងអង្រួនសភាពការណ៍នៅក្នុងប្រទេសក្នុងតំបន់ និងពិភពលោកអោយមានការភ័យតក់ស្លុតរហូតបាត់អស់នូវគុណធម៌ សីលធម៌ មនុស្សធម៌ និងមិត្តភាពល្អជាមួយគ្នា។

សម្តេចតេជោនាយករដ្ឋមន្រ្តី បានបញ្ជាក់ថាជំងឺពិតប្រាកដដែលយើងកំពុងប្រឈមមុខជាក់ស្តែងនាពេលនេះ គឺជាជំងឺភ័យខ្លាចជ្រុល និងអំពើរើសអើងជាតិសាសន៍ជ្រុល រហូតដល់បោះបង់ពលរដ្ឋខ្លួនឯងចោល។ ជាក់ស្តែងដូចជាករណីនាវាទេសចរណ៍ MS Westerdam ដែលមានអ្នកធ្វើដំណើរចម្រុះជាតិសាសន៍ជាង២២០០ នាក់ដែលបានបដិសេធដោយប្រទេសនិងកោះចំនួន៦ មិនអោយចុះចត ដែលនៅក្នុងនាវាដ៏ធំនេះក៏មានពលរដ្ឋអាមេរិកជាង៦០០នាក់ផងដែរ ដែលបានសុំចុះចតនៅកោះ Guam ដែលជាទឹកដីកោះមួយផ្នែករបស់សហរដ្ធអាមេរិក ក៏មិនត្រូវបានអនុញ្ញាត្តិអោយចុះចតដែរ។ តើយ៉ាងម៉េចបានជាសាម៉ីប្រទេស និងសាម៉ីកោះទាំងនោះសម្រេចបែបនេះទៅរួច? ពិភពលោកអាចនឹងបែកបាក់ ហើយតម្លៃមនុស្សនៅត្រង់ណា បើសិទ្ឋិរស់រានមានជីវិតគ្មានផងនោះ?

ការសម្រេចចិត្តរបស់កម្ពុជាក្នុងការទទួលនាវាទេសចរណ៍ MS Westerdam អោយចុះចតនៅក្រុងព្រះសីហនុក្នុងទឹកដីកម្ពុជា គឺជាកាយវិការមនុស្សធម៍ដោយគ្មានការរើសអើងជាតិសាសន៍ ក្នុងការលើកស្ទួយ ការគោរពសិទ្ធិមនុស្សតាមរយៈការជួយផ្តល់នូវសិទ្ឋិរស់រានមានជីវិតដល់មនុស្សជាតិដែលជាប់គាំងនៅក្នុងនាវាទាំងអស់។ ការសម្រេចចិត្តត្រឹមត្រូវរបស់កម្ពុជា គឺមនុស្សភាគច្រើននៅទូទាំងពិភពលោកបានគាំទ្រនូវកាយវិកាមនុស្សធម៌របស់កម្ពុជា ហើយក្នុងនោះក៏មានការគាំទ្រពី អង្គការសុខភាពពិភពលោក (World Health Organization) អង្គការទេសចរណ៍ពិភពលោក ( World Tourism Organization) អង្គការឆ្នេរស្អាតបំផុតពិភពលោក ( The World’s Most Beautiful Bay) និង ពីលោក Donald Trump ប្រធានាធិបតីសហរដ្ឋអាមេរិកផងដែរ។ នៅពេលនេះចំនួនអ្នកទេសចរចម្រុះជាតិសាសន៍ ៥០០ នាក់ក្រោយពីបានត្រួតពិនិត្យសុខភាពថាគ្មានសញ្ញាវិជ្ជមាននៃមេរោគកូវីដ១៩ទេ (កូរ៉ូណា) គឺត្រូវបានផ្តល់កន្លែងស្នាក់នៅបណ្តោះអាសន្ននៅសណ្ឋាគារសុខាក្នុងរាជធានីភ្នំពេញ។ ច្បាស់ណាស់ បើសាម៉ីប្រទេសគេមិនគិតដល់ពលរដ្ឋគេទេ គឺកម្ពុជានឹងទទួលខុសត្រូវ ព្រោះពេលនេះបានមកទីសុវត្ថិភាពក្នុងប្រទេសយើងហើយ។

សម្តេចតេជោ ហ៊ុន សែន បានបញ្ជាក់ច្បាស់ហើយក្នុងពេលអញ្ជើញទទួលអ្នកដំណើរទេសចរទាំងអស់នៅខេត្តព្រះសីហនុថា បើមានអ្នកទេសចរណាម្នាក់ មានឆ្លងឬផ្ទុកមេរោគកូវីដ-១៩ គឺ សម្តេចតេជោ អនុញ្ញត្តិអោយចូលកម្ពុជាអោយបានលឿនមុនគេបំផុត ហើយនាំទៅកន្លែងមានសុវត្ថិភាពដើម្បីផ្តល់ការមើលថែនិងព្យាបាលអោយបានទាន់ពេលវេលាដែលអាចធ្វើទៅបាន។ ការធ្វើបែបនេះគឺដើម្បីទប់ស្កាត់មិនអោយមេរោគឆ្លងរាលដាលទៅអ្នកដទៃទៀតដូចដែលបានកើតឡើងនៅក្នុងនាវាទេសចរណ៍ Diamond Princess ដែលពេលថ្មីៗនេះគឺទើបសម្រេចយកអ្នកទេសចរចេញពីនាវាដោយសារមានអ្នកឆ្លងមេរោគកូវីដ១៩ ពីម្នាក់ទៅម្នាក់កាន់តែច្រើនឡើងៗរហូតដល់៣៥៦ នាក់។

បើកម្ពុជាមិនទទួលនាវានេះអោយចុះចតទេ ម៉្លេះមកទល់ពេលនេះមិនដឹងជារសាត់អណ្តែតទៅដល់ទីណាទេ ព្រោះស្បៀងអាហារក៏ជិតអស់ រីឯប្រេងក៏ជិតអស់ទៀត។ តើចុងបញ្ចប់នៃជីវិតពួកគេនឹងត្រូវបូជានៅលើកប៉ាល់ ឬបោះទម្លាក់ចោលក្នុងទឹកសមុទ្រ? បើគ្រប់គ្នាបដិសេធមិនទទួលពួកគេអោយចុះចត? តែកម្ពុជាមិនអាចបិទភ្នែកទុកអោយពលរដ្ឋទាំងនោះស្លាប់ទេ ព្រោះកម្ពុជាក៏ធ្លាប់ត្រូវបានគេមើលងាយនិងរើសអើងពីមុន ហើយកម្ពុជាយល់ច្បាស់ណាស់អំពីអារម្មណ៍បែបនេះចំពោះអ្នកទេសចរទាំងអស់នោះ។ យើងទាំងអស់គ្នានិយាយពីសិទ្ធិមនុស្ស តែពេលនេះការរើសអើងគឺមានទំហំធំធេងណាស់ ដែលបង្ហាញច្បាស់ថាជំងឺរើសអើង និងការភ័យខ្លាចជ្រុលហួសហេតុកំពុងនាំទៅដល់ការបំផ្លាញសិទ្ធិមនុស្សពិតប្រាកដ។

បើតាមគម្រោងដែលបានគិតក្នុងការជួយដល់អ្នកទេសចរទាំងអស់ គឺក្រោយពេលអ្នកទេសចរវគ្គទី១ដែលកំពុងស្នាក់នៅបណ្តោះអាសន្នក្នុងទីក្រុងភ្នំពេញបានចាកចេញពីកម្ពុជាហើយ គឺនឹងដឹកអ្នកដែលកំពុងរង់ចាំនៅក្នុងនាវាទេសចរណ៍ក្នុងខេត្តព្រះសីហនុមកកាន់រាជធានីភ្នំពេញជាបន្តទៀតរហូតដល់អស់។ អ្នកដំណើរទាំងអស់នឹងត្រូវដាក់អោយពិនិត្យសុខភាពយ៉ាងហ្មត់ចត់បំផុត មុននឹងអនុញ្ញាត្តិអោយមកស្នាក់នៅតាមសណ្ឋាគារ។ បើទោះបីត្រូវការចតរយៈពេលវែងយ៉ាងណាក្តី ក៏កម្ពុជាផ្តល់ឱកាសអោយនាវាទេសចរណ៍នេះបន្តស្នាក់នៅកម្ពុជាដោយមិនគិតពីថ្លៃចត និងថ្លៃសេវាផ្សេងៗនៅក្នុងដែនសមុទ្រកម្ពុជាដែរ។

កម្ពុជាទទួលខុសត្រូវលើកិច្ចការដែលខ្លួនកំពុងធ្វើអោយបានហ្មត់ចត់និងល្អបំផុត ហើយបន្តសហការជាមួយអង្គការដៃគូនានា និងសហគមន៍អន្តរជាតិដើម្បីរួមគ្នាដោះស្រាយបញ្ហាប្រឈមជាសកលនេះ។ ទន្ទឹមនឹងនេះដែរ គឺដើម្បីលុបបំបាត់ជំងឺភ័យខ្លាចជ្រុល និងជំងឺរើសអើងជ្រុល ដើម្បីលើកស្ទួយតម្លៃសីលធម៌ គុណធម៌ឡើងវិញ និងដើម្បីសិទ្ឋិរស់រានមានជីវិត និងសេចក្តីសុខរបស់មនុស្សជាតិទូទាំងពិភពលោក។

សម្តេចតេជោ ហ៊ុន សែន បានបញ្ជាក់ជូនផងដែរថាទោះបីនៅប្រទេសណាក៏ដោយ មិនថាតែប្រទេសចិនទេប្រសិនបើត្រូវការកម្ពុជា គឺ សម្តេចតេជោ នឹងចូលរួមដោយមិនរារែកឡើយ៕

ដោយ ប៊ី

ភ្នំពេញៈ ធនាគារ Woori បានឱ្យដឹងកាលពីថ្មីៗនេះថា ខ្លួនបានដាក់បញ្ចូលក្រុមហ៊ុនបុត្រសម្ព័ន្ធចំនួនពីររបស់ខ្លួននៅក្នុងប្រទេសកម្ពុជា ជាមធ្យោបាយដើម្បីរីកចម្រើនទៅជាក្រុមហ៊ុនហិរញ្ញវត្ថុឈានមុខគេមួយ នៅក្នុងប្រទេសអាស៊ីអាគ្នេយ៍មួយនេះ។

ធនាគារបានទទួលការយល់ព្រម ពីអាជា្ញធរហិរញ្ញវត្ថុកម្ពុជា ដើម្បីច្របាច់បញ្ចូល Woori Finance Cambodia ដែលជាគ្រឹះស្ថានមីក្រូហិរញ្ញវត្ថុ ជាមួយនឹងគ្រឹះស្ថានមីក្រូហិរញ្ញវត្ថុ WB Finance ដែលជាអង្គភាពធនាគារសន្សំនៅកម្ពុជា។

ការរួមបញ្ចូលគ្នានេះ បានធ្វើឱ្យអង្គភាពនៅកម្ពុជាធនាគារWoori ក្លាយជាលំដាប់ទី ៥ ក្នុងចំណោមអង្គភាពសន្សំ ក្នុងប្រទេសអាស៊ីអាគ្នេយ៍នេះ ទាក់ទងនឹងទ្រព្យសម្បត្តិ និងប្រាក់ចំណូលសរុប។ ធនាគារ Woori គ្រោងប្រែក្លាយគ្រឹះស្ថានមីក្រូហិរញ្ញវត្ថុWB ឱ្យក្លាយជាធនាគារពាណិជ្ជកម្មក្នុងរយៈពេលវែង។

មន្រ្តីធនាគារ Woori បាននិយាយថា “នៅក្នុងពេលមធ្យម និងវែង យើងគ្រោងនឹងធ្វើឱ្យគឹ្រះស្ថានមីក្រូហិរញ្ញវត្ថុ WB Finance ក្លាយជាធនាគារពាណិជ្ជកម្ម ដែលផ្តល់ជូននូវសេវាកម្មហិរញ្ញវត្ថុដ៏ទូលំទូលាយនៅក្នុងប្រទេសកម្ពុជា”។

ធនាការ Woori បានឱ្យដឹងថា ខ្លួនគ្រោងនឹងពង្រីកការលក់រាយ ដោយផ្អែកលើការរួមបញ្ចូលគ្នា។ ធនាគារគ្រោងនឹងបង្កើតភាពជាដៃគូជាមួយអាជីវកម្ម បច្ចេកវិទ្យាហិរញ្ញវត្ថុ (Fintech) និងវេទិកា ដើម្បីផ្តល់ជូនអតិថិជននូវភាពងាយស្រួល ក្នុងការទទួលបានសេវាកម្មហិរញ្ញវត្ថុ និងបង្កើតប្រព័ន្ធវាយតម្លៃឥណទាន ដើម្បីផ្តល់ជូនផលិតផល តាមរយៈសេវាកម្មមិនមែនទល់មុខគ្នា។

ធនាគារWoori បានចូលមកប្រទេសកម្ពុជា ដោយទិញយកគ្រឹះស្ថានមីក្រូហិរញ្ញវត្ថុម៉ាលីសនៅខែ កក្កដា ឆ្នាំ២០១៤ ហើយប្តូរឈ្មោះវាទៅជា Woori Finance Cambodia ។ ប្រាក់ចំណេញសុទ្ធរបស់អង្គភាពបានកើនឡើង១៤ ដងក្នុងរយៈពេល៥ឆ្នាំ ចាប់តាំងពីការទិញយក។

ប្រាក់ចំណេញសុទ្ធរបស់ធនាគារ Woori នៅកម្ពុជាបានកើនឡើងពី៤លានដុល្លារនៅឆ្នាំ២០១៧ ដល់១៧លានដុល្លារនៅឆ្នាំ២០១៩៕