ដោយៈ រ៉ាណេត

ភ្នំពេញៈ គម្រោងសាងសង់ និងបង្កើតស្ថានីយផលិតថាមពលអគ្គិសនី ដើរដោយពន្លឺព្រះអាទិត្យ ដែលមានសមត្ថភាពបង្កើតកម្លាំងបាន៦០មេហ្គាវ៉ាត់ ស្ថិតនៅក្នុងខេត្តពោធិ៍សាត់ ត្រូវបានរដ្ឋាភិបាលគាំទ្រ និងជំរុញឱ្យដំណើរការក្នុងពេលដ៏ខ្លីឆាប់ៗខាងមុននេះ ដើម្បីចូលរួមបំពេញតម្រូវការជាក់ស្ដែង។

នៅទីស្តីការក្រសួងបរិស្ថាន កាលពីថ្ងៃ៤ខែមករា ឆ្នាំ២០២០ នេះ ក្រោមការដឹកនាំដោយ លោក ផៃ ប៊ុនឈឿន រដ្ឋលេខាធិការប្រចាំការនៃក្រសួងបរិស្ថាន បានបើកកិច្ចប្រជុំអន្តរក្រសួង ដើម្បីពិនិត្យ និងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមពេញលេញ សម្រាប់គម្រោងបង្កើតស្ថានីយផលិតថាមពលអគ្គិសនី ដើរដោ​យថាមពលពន្លឺព្រះអាទិត្យកម្លាំង៦០មេហ្គាវ៉ាត់ ស្ថិតលើផ្ទៃដីទំហំ៨០ហិកតា ដែលមានទីតាំងភូមិសាស្រ្តស្ថិតនៅភូមិអន្សរក្តាម ឃុំស្នាអន្សា ស្រុកក្រគរ ខេត្តពោធិ៍សាត់។

គម្រោងបង្កើតស្ថានីយផលិតថាមពលអគ្គិសនី ដើរដោយពន្លឺព្រះអាទិត្យមួយនេះ គឺជាការវិនិយោគរបស់ក្រុមហ៊ុន ScheiTech Sustainable Co.,Ltd ដោយមានការសិក្សា និងរៀបចំរបាយការណ៍ដោយក្រុមហ៊ុនទីប្រឹក្សា Creative Green Design Co., Ltd.។

ជាលទ្ធផលនៃកិច្ចប្រជុំ ក្រោមការចូលរួមពីតំណាងអគ្គលេខាធិការដ្ឋាន ក្រុមប្រឹក្សាជាតិអភិវឌ្ឍន៍ដោយចីរភាព និងអន្តរក្រសួង ស្ថាប័ននានាដែលពាក់ព័ន្ធ ជារួម អង្គប្រជុំបានសម្រេចគាំទ្រ លើគម្រោងឱ្យបង្កើតស្ថានីយផលិតថាមពលអគ្គិសនី ដើរដោយថាមពលពន្លឺព្រះអាទិត្យនេះ ដោយកំណត់ឱ្យក្រុមហ៊ុនសិក្សាលម្អិត ពីលទ្ធភាពជួយជីកយកអាចម៍ដី ដើម្បីស្តារអាងស្តុកទឹកដំណាក់ក្រាញ់ និងជួយអភិវឌ្ឍន៍សហគមន៍មូលដ្ឋាន។

ក្រៅពីនេះក្រុមហ៊ុនក៏ត្រូវសិក្សា និងរៀបចំប្រព័ន្ធដោះទឹកភ្លៀងនៅតំបន់គម្រោងឱ្យបានត្រឹមត្រូវ ចៀសវាងការជន់លិចដីស្រែរបស់ប្រជាពលរដ្ឋនៅក្នុងតំបន់ ត្រូវសិក្សាបន្ថែមពីការប្រែប្រួលអាកាសធាតុ ដែលអាចជះឥទ្ធិពលទៅលើគម្រោង និងឥទ្ធិពលនៃការបំលែងពីដីកសិកម្ម ទៅជាស្ថានីយផលិតថាមពលដើរ ដោយថាមពលព្រះអាទិត្យ។ បន្ថែមពីនេះ ក្រុមហ៊ុនអភិវឌ្ឍន៍ ក៏ត្រូវមានកិច្ចសហការជាមួយអាជ្ញាធរមូលដ្ឋាន ឱ្យបានជិតស្និទ្ធ ព្រមទាំងផ្តល់ឱកាសការងារដល់ប្រជាពលរដ្ឋ នៅមូលដ្ឋានឱ្យចូលបម្រើការក្នុងក្រុមហ៊ុនឱ្យអស់លទ្ធភាព ជាពិសេសត្រូវមានផែនការ និងគ្រប់គ្រងសំណល់ផ្ទាំងសូឡា ឱ្យបានច្បាស់លាស់៕

ដោយវុត្ថា

ភ្នំពេញៈ ក្រុមហ៊ុនOCIC និងក្រុមហ៊ុនវិនិយោគព្រលានយន្តហោះកម្ពុជាSCA  នឹងចុះកិច្ចអនុស្សរណៈយោគយល់គ្នា(MOU) ដើម្បីសហការគ្នាចូលរួមគូរប្លង់រចនាបទ អាកា​សយានដ្ឋានអន្ដរជាតិភ្នំពេញថ្មី ដែលស្ថិតខេត្ដកណ្ដាល និងតាកែវ។

នេះបើយោងតាមកិច្ចប្រជុំរវាងក្រុមហ៊ុន Vinci Airports តំណាងដោយលោក Emmanuel MENANTEAU ក្រុមហ៊ុនសម្បទាន អាកាសយានដ្ឋាន SCA តំណាងដោយលោក Alain BRUN និងក្រុមហ៊ុន OCIC តំណាងដោយលោក វ៉ាន់ ឆាលហ៍ជួន នៅថ្ងៃទី ៤ ខែកុម្ភៈ ឆ្នាំ ២០២០ នេះ ក្រោមកិច្ចសម្របសម្រួល ដោយលោកនាយឧត្តមសេនីយ៍ បណ្ឌិតម៉ៅ ហាវណ្ណាល់ រដ្ឋមន្រ្តី ទទួលបន្ទុក រដ្ឋលេខាធិការដ្ឋានអាកាសចរស៊ីវិល។

លោកនាយឧត្តមសេនីយ៍ បណ្ឌិតម៉ៅ ហាវណ្ណាល់ រដ្ឋមន្រ្តីប្រតិភូអមនាយករដ្ឋមន្រ្តី ទទួលបន្ទុករដ្ឋលេខា​ធិការដ្ឋានអាកាសចរស៊ីវិល បានបញ្ជាក់ជូនអង្គប្រជុំដោយផ្អែកតាមប្រសាសន៍ ណែនាំដ៏ខ្ពង់ខ្ពស់របស់សម្ដេចតេជោនាយករដ្ឋមន្ដ្រី នៃព្រះរាជាណាចក្រកម្ពុជា ក្នុងការអនុញ្ញាត្ដជូនដល់លោកបណ្ឌិតរដ្ឋមន្ដ្រី ជាអ្នកសម្របសម្រួលដឹកនាំប្រជុំលើកិច្ចសហការ រវាងក្រុមហ៊ុនOCIC និងក្រុមហ៊ុន SCA ជាពិសេស ការចូលរួមជាប្លង់រចនាបទនៃការសាងសង់អាកាសយានដ្ឋានអន្ដរជាតិភ្នំពេញថ្មី។

លោកបន្តថា ដូច្នេះដើម្បីមានមូលដ្ឋានជាក់លាក់ ក្នុងការរាយការណ៍ជូនសម្ដេចតេជោនាយករដ្ឋមន្ដ្រី លោកបានស្នើសុំឱ្យភាគីនីមួយៗ បញ្ជាក់អំពីជំហររៀងៗខ្លួនឱ្យបានច្បាស់លាស់អំពីកិច្ចសហប្រតិបត្ដិការនេះ។

ជាការឆ្លើយតបភាគីទាំងពីរបានបញ្ជាក់លើដំណើរការ និងនិតិវិធីការងារនេះដូចជា ទី១– ក្រុមហ៊ុន Vinci Airports និងក្រុមហ៊ុន SCA មានសេចក្ដីរីករាយក្នុងកិច្ចសហការឈរលើមិត្ដភាពជាមួយនឹងក្រុមហ៊ុនOCIC ក្នុងគម្រោងរៀបចំប្លង់រចនាបទ ការផ្ដល់ប្រភ​ព​ហិរញ្ញប្បទាន ការសាងសង់រចនាសម្ព័ន្ធសំណង់ និងធ្វើអាជីវកម្ម ជាពិសេសបើអាច យើងពិភាក្សាគ្នាអំពីការបង្កើតក្រុមហ៊ុនរួមគ្នារវាង OCIC និងSCA ដូចដែលក្រុមហ៊ុន SCA ធ្លាប់មានបទពិសោធន៍ជាមួយ ក្រុមហ៊ុនMohiba ក្នុងការអភិវឌ្ឍន៍សាងសង់អាកាសយានដ្ឋានអន្ដរជាតិភ្នំពេញបច្ចុប្បន្ន។

ទី២  ក្រុមហ៊ុន OCIC បានបញ្ជាក់ថា ខ្លួនក៏មានការរីករាយក្នុងការសហការជាមួយក្រុមហ៊ុន SCA ដែរ។ ប៉ុន្ដែបានស្នើសុំឱ្យភាគីក្រុមហ៊ុន SCA ជួយរៀបចំកិច្ចព្រមព្រៀង ឬ អនុស្សរណៈ យោគយល់គ្នាពិសេសមួយ ក្នុងលក្ខខណ្ឌកិច្ចសហប្រតិបត្ដិការ ដែលអាចទទួលយកបានក្នុង គម្រោងអភិវឌ្ឍន៍សាងសង់អាកាសយានដ្ឋាន អន្ដរជាតិភ្នំពេញថ្មី ហើយនឹងទទួលយកការណែនាំលោកនាយកឧត្តមសេនីយ៍ម៉ៅ ហាវណ្ណាល់។

ជាលទ្ធផលអង្គប្រជុំបានសម្រេចលើការងារសំខាន់ៗ ដែលត្រូវធ្វើចំពោះមុខដូចជា– ឱ្យក្រុមហ៊ុនSCAរៀបចំសេចក្ដីព្រាងកិច្ចព្រមព្រៀង ឬអនុស្សរណៈយោគយល់គ្នាពិសេសមួយស្ដីពី កិច្ចសហប្រតិបត្ដិការ រវាងOCIC និងSCAស្ដីពី គម្រោងអភិវឌ្ឍន៍សាងសង់អាកាស យានដ្ឋានអន្ដរជាតិភ្នំពេញថ្មី ផ្ញើមករដ្ឋលេខាធិការដ្ឋានអាកាសចរស៊ីវិលឱ្យបានមុនថ្ងៃទី១៣ ខែកុម្ភៈ ឆ្នាំ២០២០។

– ក្នុងករណីចាំបាច់ ពាក់ព័ន្ធនឹងការបច្ចេកទេសភាគីទាំងពី រត្រូវផ្ដល់ជំនាញការ ពិភាក្សាជា លក្ខណៈទ្វេភាគីក្រោមការសម្របសម្រួលពី រដ្ឋលេខាធិការដ្ឋានអាកាសចរស៊ីវិល៕

ដោយវុត្ថា

សេអ៊ូលៈ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានឱ្យដឹងថា នៅថ្ងៃស្អែកទី៥កុម្ភៈនឹង ទៅសួរសុខទុក្ខនិស្សិតកម្ពុជា ដែលកំពុងសិក្សានៅទីក្រុងវូហាន ដើម្បីបង្ហាញពីភាពកក់ក្តៅ និងដើម្បីកុំឲ្យនិស្សិតខ្មែរ នៅទីក្រុងវូហានមានការភ័យខ្លាច ចំពោះការឆ្លងរីករាលដាល នៃជំងឺប្រភេទថ្មីកូរ៉ណាវីរ៉ុស។

សម្តេចតេជោ ហ៊ុន សែន នៅក្នុងជំនួបពិភាក្សាជាមួយ លោកស្រី Hak Ja Han Moon ស្ថាបនិកអង្គការ សហព័ន្ធសន្តិភាពសកលនាថ្ងៃទី៤ ខែកុម្ភៈ ឆ្នាំ ២០២០ នេះ ថា នៅពេលនេះសម្តេចតេជោ កំពុងរង់ចាំការបញ្ជាក់ និងសម្រេចពីភាគីមិត្តចិនថា តើអនុញ្ញាត្តិអោយទៅសួរសុខទុក្ខ ឬមិនអនុញ្ញត្តិអោយទៅក្នុងពេល ដែលទីក្រុងនេះត្រូវបានដាក់អោយនៅដាច់ក្នុងសភាពប្រកាសអាសន្ន មិនអោយមានចរាចរចេញចូលទាំងនៅក្នុងប្រទេសចិន និងពីក្រៅប្រទេសចូលមក។

សម្តេចតេជោបន្តថា “បញ្ហានៃការបម្រែបម្រួលអាកាសធាតុ និងការផ្ទុះឡើងនៃជំងឺប្រភេទថ្មី កូរ៉ណាវីរ៉ុស គឺមិនមែនតែជាកង្វល់របស់ប្រទេសចិននោះទេ”។សម្តេចបន្តថា “វាជាកង្វល់របស់យើងទាំងអស់គ្នា ពោលគឺយើងត្រូវរួមគ្នារិះរកវិធីសាស្រ្តក្នុងការដោះស្រាយ និងមិនត្រូវបង្កនូវការភ័យខ្លាចសម្រាប់មនុស្សជាតិនោះទេ”។

សម្តេចតេជោបន្ថែមថា សម្តេចមិនបានចាត់ទុកថាការផ្ទុះនៃជំងឺប្រភេទថ្មី មិនមែនជាឧបសគ្គសម្រាប់សម្តេចនោះទេ ប៉ុន្តែផ្ទុយទៅវិញសម្តេចមានឆន្ទៈពិតប្រាកដជាមួយមេដឹកនាំពិភពលោក ក្នុងការរួមគ្នាដោះស្រាយលើបញ្ហា ដែលកើតមានឡើង ចំពោះសន្តិភាព សន្តិសុខមនុស្សជាតិ ការប្រែប្រួលអាកាសធាតុ និងបញ្ហាប្រឈមដទៃទៀត ដែលពិភពលោកកំពុងប្រឈម និងរួមគ្នាដោះស្រាយ។

សម្តេចបន្ថែមថា កាលពីឆ្នាំ២០១៣–២០១៤ កន្លងទៅ នៅពេលដែលប្រទេសកូរ៉េខាងជើង គំរាមធ្វើសង្រ្គាមមកលើសាធារណរដ្ឋកូរ៉េ គេបានទាមទារឲ្យសម្តេចអន្តរាគមន៍ជន្លៀសជនជាតិកម្ពុជា នៅសាធារណរដ្ឋកូរ៉េ វិលត្រឡប់មកកាន់កម្ពុជាវិញ តែសម្តេចយល់ពីអារម្មណ៍ និងភាពភ័យខ្លាចដែលថ្នាក់ដឹកនាំ និងពីប្រជាជនមួយចំនួន៕

ដោយវុត្ថា

ទីក្រុងសេអ៊ូលៈ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានថ្លែងថា រាជរដ្ឋាភិបាល នឹងបន្តពង្រឹង និងអភិវឌ្ឍកម្រិតឧត្ដមសិក្សាឲ្យឆ្ពោះទៅរកការស្រាវជ្រាវ និងនាវានុវត្តដើម្បីពង្រឹងសមត្ថភាព និងជំនាញរបស់ធនធានមនុស្សនៅកម្ពុជា ឲ្យសមស្របទៅនឹងបរិបទថ្មីនៃការអភិវឌ្ឍ ជាពិសេសការពង្រឹងសហគ្រិនភាព ក្នុងការរៀបចំម៉ូដែលធុរកិច្ចថ្មីៗ និងដើម្បីចាប់យកកាលានុវត្តភាពពីបដិវត្តន៍ឧស្សាហកម្មទី៤ និងសេដ្ឋកិច្ចឌីជីថលដែលកំពុងផុសផុលឡើង។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅក្នុងឪកាសអញ្ជើញចូលរួមថ្លែងសុន្ទរកថា ក្នុងកិច្ចប្រជុំកំពូលពិភពលោកឆ្នាំ២០២០ នៅសាធារណរដ្ឋកូរ៉េនាថ្ងៃទី៤ ខែកុម្ភៈ ឆ្នាំ២០២០នេះបញ្ជាក់ថា ចាប់តាំងពីកម្ពុជាទទួលបាននូវសន្តិភាពពេញលេញទូទាំងប្រទេសក្នុងឆ្នាំ១៩៩៨មក រាជរដ្ឋាភិបាលកម្ពុជាតែងតែផ្ដោតយកចិត្តទុកដាក់ ដល់ការអភិវឌ្ឍធនធានមនុស្ស ដោយចាត់ទុកការអភិវឌ្ឍធនធានមនុស្សជាអាទិភាពមួយ ក្នុងចំណោមអាទិភាពចម្បងៗទាំងបួន។

សម្តេចបន្តថា “ឈរលើមូលដ្ឋាននេះរាជរដ្ឋាភិបាលកម្ពុជា បានធ្វើការកែទម្រង់ស៊ីជម្រៅលើវិស័យអប់រំ សំដៅពង្រឹងគុណភាព និងពង្រីកសេវាអប់រំដើម្បីទទួលបានធនធា​នមនុស្សប្រកបដោយគុណភាព សម្រាប់គាំទ្រការសម្រេចចិត្ត នៅចក្ខុវិស័យរយៈពេលវែងរបស់កម្ពុជា”។

សម្តេចជោបន្ថែមទៀតថា រាជរដ្ឋាភិបាលនឹងបន្តចាត់ទុកវិស័យអប់ រំជាវិស័យដែលមានអាទិភាពខ្ពស់ ហើយនឹងបន្តបង្កើនថវិកាចំណាយជូនដល់វិស័យនេះ បន្ថែមទៀតជាបន្តបន្ទាប់។ ថវិការចំណាយនេះ គឺផ្ដោតទៅលើការសាងសង់សាលារៀន ដំណើរការសាលារៀន ការពង្រឹងគុណភាពនៃការប្រឡងនៅគ្រប់កម្រិត ការពង្រឹងគុណភាពសាលារៀនជំនាន់ថ្មី ការពង្រឹងការសិក្សាជំនាញបច្ចេកទេស នៅតាមវិទ្យាល័យចំណេះទូទៅនិងបច្ចេកទេសការស្រាវជ្រាវ លើមុខវិជ្ជាវិទ្យាសាស្ត្រពិត បច្ចេកទេស វិស្វកម្ម និងគណិតវិទ្យា និងផ្ដល់អាហារូបករណ៍ដល់សិស្សនិស្សិតក្រីក្រគ្រប់កម្រិត។

សម្តេចបញ្ជាក់ទៀតថា “ផ្អែកទៅលើបទពិសោធន៍ជាក់ស្ដែងនេះ និងក្នុងនាមថ្នាក់ដឹកនាំកម្ពុជា ដែលបានឆ្លងកាត់សង្រ្គាមផ្ទាល់ និងបានខិតខំប្រឹងប្រែងស្វែងរកសន្តិភាពជូនប្រទេសតូចមួយនេះ ការកសាង និងថែរក្សាសន្តិភាព មានតម្លៃមិនអាចកាត់ថ្លៃបាន ហើយសន្តិភាព គឺជាមូលដ្ឋានគ្រឹះក្នុងការអភិវឌ្ឍសេដ្ឋកិច្ចសង្គម ការពង្រឹងសន្តិសុខ និង អភិវឌ្ឍន៍មនុស្សជាតិ”៕

ដោយៈ រ៉ាណេត

ភ្នំពេញ៖ ក្រសួងអភិវឌ្ឍន៍ជនបទ បានប្រកាសដាក់ឱ្យដំណើរការជាផ្លូវការ គម្រោងគាំទ្រនិរន្តរភាព ហេដ្ឋារចនាសម្ព័ន្ធជនបទ ដើម្បីទីផ្សារកសិករ និងពាណិជ្ជូបនីយកម្មកសិកម្ម ហៅកាត់ថា សម្បត្តិ (SAAMBAT) ក្រោមហិរញ្ញប្បទានសហប្រតិបត្តិការរបស់រាជរដ្ឋាភិបាលកម្ពុជា និងដៃគូអភិវឌ្ឍន៍ ដែលមានទំហំទឹកប្រាក់សរុប១២៤លានដុល្លារ។

ការប្រកាសដាក់ឱ្យដំណើរការជាផ្លូវការនូវគម្រោង “គាំទ្រនិរន្តរភាពហេដ្ឋារចនាសម្ព័ន្ធជនបទ ដើម្បីទីផ្សារកសិករ និងពាណិជ្ជូបនីយកម្មកសិកម្ម” នេះ ត្រូវបានធ្វើឡើងនៅសណ្ឋាគារភ្នំពេញ កាលពីថ្ងៃទី៣ ខែកុម្ភៈ ឆ្នាំ២០២០ម្សិលមិញនេះ ក្រោមវត្តមានរបស់លោក សួស គង់ រដ្ឋលេខាធិការប្រចាំការក្រសួងអភិវឌ្ឍន៍ជនបទ ។

លោក សួស គង់ បានលើកឡើងថា ទីផ្សារកសិករ និងពាណិជ្ជូបនីយកម្មកសិកម្ម ហៅកាត់ថា សម្បត្តិ (SAAMBAT) នេះ ធ្វើឡើងក្រោមហិរញ្ញប្បទានសហប្រតិបត្តិការរបស់រាជរដ្ឋាភិបាលកម្ពុជា មូលនិធិអន្តរជាតិអភិវឌ្ឍន៍វិស័យកសិកម្ម (IFAD) ធនាគារវិនិយោគអឺរ៉ុប (EIB) និង សហគមន៍អឺរ៉ុប (EU) សរុបចំនួនជាង១២៤លានដុល្លារ ដែលចាប់ផ្ដើមអនុវត្តក្នុងរយៈពេល៦ឆ្នាំ ចាប់ពី២០១៩ ដល់២០២៥។

លោកបានបញ្ជាក់ថា ខេត្តគោលដៅទាំង១២ ដែលត្រូវអនុវត្តរួមមាន ខេត្តកណ្តាល ស្វាយរៀង កំពង់ចាម កំពង់ឆ្នាំង ពោធិ៍សាត់ បាត់ដំបង បន្ទាយមានជ័យ កំពង់ធំ ព្រះវិហារ ស្ទឹងត្រែង តាកែវ និងខេត្តកំពត នឹងទទួលបានការកែលម្អផ្លូវជនបទ ប្រវែងសរុប៤៥០គីឡូម៉ែត្រ ផ្សារជនបទ៥០កន្លែង និងហេដ្ឋារចនាសម្ព័ន្ធសម្រួល ដល់ច្រវាក់ផលិ​តកម្ម កសិកម្មផ្សេងៗទៀតពីគម្រោងនេះ។

គម្រោង SAAMBATនេះ ជាគម្រោងថ្មីមួយ ដែលទទួលការគាំទ្រហិរញ្ញវត្ថុពហុភាគី រួមមាន បដិភាគពីរដ្ឋាភិបាលកម្ពុជា មូលនិធិអន្តរជាតិអភិវឌ្ឍន៍វិស័យកសិកម្ម (IFAD) ធនាគារវិនិយោគអឺរ៉ុប (EIB) និងសហគមន៍អឺរ៉ុប ដែលត្រូវបានរៀបចំឡើង ក្រោមកម្មវិធីសហប្រតិបត្តិការបំពេញបន្ថែម ទៅលើគម្រោងកំពុងដំណើរការ ក្រោមហិរញ្ញប្បទានរបស់ IFAD ដូចជាគម្រោង ASPIRE អនុវត្តដោយក្រសួងកសិកម្ម រុក្ខាប្រមាញ់ និងនេសាទ គម្រោង AIMS ដែលអនុវត្តដោយក្រសួងពាណិកម្ម ដើម្បីបង្កើតឲ្យមានការគាំទ្ររួមគ្នា ដល់ការអភិវឌ្ឍកសិកម្មខ្នាតតូច នៅកម្ពុជា។

លោក សួស គង់ បានមានប្រសាសន៍សង្កត់ធ្ងន់ថា “គម្រោងគាំទ្រនិរន្តរភាពហេដ្ឋារចនាសម្ព័ន្ធជនបទ ដើម្បីទីផ្សារកសិករ និងពាណិជ្ជូបនីយកម្មកសិកម្ម”។

សមាសភាគសំខាន់ៗដែលត្រូវធ្វើ រួមមានទី១   អនុវត្តដោយក្រសួងអភិវឌ្ឍន៍ជន​បទ ផ្នែកហេដ្ឋារចនាសម្ព័ន្ធសម្រាប់គាំទ្រច្រវាក់ផលិតកម្ម ដែលគ្រោងនឹងកែលម្អផ្លូវជនប​ទប្រវែង ៤៥០គីឡូម៉ែត្រ ផ្សារជនបទចំនួន៥០ និងហេដ្ឋារចនាសម្ព័ន្ធ សម្រួលដល់ច្រវាក់ផលិតកម្មកសិកម្មផ្សេងៗទៀត នៅក្នុងខេត្តគោលដៅ។ ទី២ – អនុវត្តដោយក្រសួងសេដ្ឋកិច្ច និងហិរញ្ញវត្ថុផ្នែក ជំនាញបច្ចេកវិទ្យា និងសហគ្រិនភាពដែលគ្រោងបណ្តុះបណ្តាលជំនាញ ដល់សហគ្រិនជនបទ និងការរៀបចំបង្កើតឱ្យមានប្រព័ន្ធឌីជីថល ដើម្បីសេដ្ឋកិច្ចជនបទ។

ជាមួយគ្នានេះ យុវជននៅជនបទជិត៧ ០០០នាក់ នឹងទទួលបានការបណ្តុះបណ្តាលជំនាញ និង៥០០សហគ្រាស អាជីវកម្មធុនតូច និងមធ្យម នឹងបានភ្ជាប់ទៅនឹងកម្មវិធីបណ្តុះបណ្តាលផងដែរ៕