ដោយ ប៊ី

ភ្នំពេញ ៖ អង់គ្លេសនឹងហាមឃាត់ការលក់រថយន្តប្រើសាំង និងម៉ាស៊ូតនៅឆ្នាំ ២០៣៥ រួមទាំងរថយន្តកូនកាត់ផងដែរ។
នាយករដ្ឋមន្រ្តីអង់គ្លេសលោក Boris Johnson នឹងធ្វើការប្រកាសនៅក្នុងព្រឹត្តិការណ៍មួយដែលចាប់ផ្តើមសន្និសីទសន្និសីទស្តីពីការផ្លាស់ប្តូរអាកាសធាតុរបស់អង្គការសហប្រជាជាតិឆ្នាំ ២០១៩ ដែលមានឈ្មោះថា COP26 ដែលនឹងត្រូវធ្វើឡើងនៅទីក្រុង Glasgow នាខែ វិច្ឆិកា។

ការផ្លាស់ប្តូរនាំមកនូវការហាមឃាត់ក្នុងរយៈពេលប្រាំឆ្នាំ ហើយឥឡូវនេះរួមបញ្ចូលទាំងរថយន្តកូនកាត់។
ប្រទេសអង់គ្លេសបានសន្យាកាត់បន្ថយការបំភាយឧស្ម័នផ្ទះកញ្ចក់មកត្រឹមសូន្យត្រឹមឆ្នាំ ២០៥០ ដោយមានការកាត់បន្ថយការបំពុលបរិស្ថាន ដោយការដាំដើមឈើ។

នៅក្នុងព្រឹត្តិការណ៍បើកដំណើរការ COP26 នៅទីក្រុងឡុងដ៍ លោក Johnson នឹងត្រូវបានចូលរួមដោយនាយករដ្ឋមន្រ្តីអ៊ីតាលីលោក Giuseppe Conte និងធម្មជាតិលោក David Attenborough ។

លោក Johnson នឹងជម្រុញឱ្យប្រទេសដទៃទៀតចូលរួមជាមួយអង់គ្លេស ក្នុងការឆ្ពោះទៅរកគោលដៅនៃការបំភាយឧស្ម័នកម្រិតសូន្យនៅ ឆ្នាំ ២០៥០ តាមរយៈការវិនិយោគលើបច្ចេកវិទ្យាស្អាត និងការខិតខំដើម្បីការពារជម្រកធម្មជាតិ។

លោក Edmund King ប្រធានសមាគមម៉ូតូ AA របស់អង់គ្លេស បាននិយាយថា គោលដៅថ្មីលើការលក់រថយន្តគឺពិបាកខ្លាំងណាស់។

លោកបានមានប្រសាសន៍ថា “យើងត្រូវតែមានសំណួរថាតើយើងនឹងមានការផ្គត់ផ្គង់គ្រប់គ្រាន់នៃផ្នែកបំភាយឧស្ម័នសូន្យទាំងស្រុងក្នុងរយៈពេលតិចជាង ១៥ ឆ្នាំដែរឬទេ?”។
លោកក៏បានជំរុញឱ្យរដ្ឋាភិបាលកាត់បន្ថយពន្ធលើការលក់រថយន្តអគ្គិសនីដើម្បីធ្វើឱ្យមានតម្លៃសមរម្យ៕ (AFP)

ដោយហ្សូលី

កោះកុង៖ កម្ពុជាទទួលបានថវិកាប្រមាណ ១១,៦ លានដុល្លាអាមេរិក ពីការលក់ឥណទានកាបូននៅក្នុងឧទ្យានជាតិជួរភ្នំក្រវ៉ាញខាងត្បូង ដែនជម្រកសត្វព្រៃតាតៃក្នុងខេត្តកោះកុង និងដែនជម្រកសត្វព្រៃកែវសីម៉ាក្នុងខេត្តមណ្ឌលគិរី។

នេះបើតាមប្រសាសន៍របស់ លោក សាយ សំអាល់ រដ្ឋមន្ត្រីក្រសួងបរិស្ថាន ក្នុងឱកាសជួបសំណេះសំណាលសាកសួរសុខទុក្ខ និងថ្លែងអំណរគុណដល់មន្ត្រីឧទ្យានុរក្សនៅលើកំពូលភ្នំម្រេចកង្កែប តំបន់អារ៉ែង ស្ថិតក្នុងឧទ្យានជាតិជួរភ្នំក្រវ៉ាញខាងត្បូង ក្នុងភូមិសាស្ត្រស្រុកថ្មបាំង ខេត្តកោះកុង កាលពីថ្ងៃទី ៤ កុម្ភៈ ឆ្នាំ ២០២០។

លោកបន្តថា នេះជាការខិតខំរបស់មន្ត្រីឧទ្យានុរក្សទាំងអស់ដែលបានលះបង់កម្លាំងកាយចិត្ត តស៊ូពុះពាររាល់ការលំបាកទាំងឡាយ ដើម្បីការពារ និងអភិរក្សធនធានធម្មជាតិប្រកបដោយប្រសិទ្ធភាព ដែលអាចឱ្យកម្ពុជាទទួលបានថវិកាពីការលក់ឥណទានកាបូនដែលបានមកពីព្រៃឈើ ក្នុងគោលបំណង ជួយអភិវឌ្ឍសេដ្ឋកិច្ចមូលដ្ឋាន ពង្រឹងការងារអភិរក្ស បង្កើតការងារ និងបង្កើនចំណូលជូនប្រជាសហគមន៍មូលដ្ឋានតាមរយៈការអភិវឌ្ឍវិស័យទេសចរណ៍ធម្មជាតិ។

លោក សាយ សំអាល់ បានបញ្ជាក់ថា រហូតមកដល់ពេលនេះ មានតែប្រទេសកម្ពុជានិងប្រទេសឥណ្ឌូនេស៊ីប៉ុណ្ណោះក្នុងចំណោមប្រទេសអាស៊ាន ដែលបានលក់ឥណទានកាបូនក្នុងទីផ្សារកាបូនស្ម័គ្រចិត្ត។

ទន្ទឹមនេះ ថវិកាដែលបានមកពីការលក់ឥណទានកាបូនដែលជាការលក់តួនាទីព្រៃឈើក្នុងការការពារប្រព័ន្ធអេកូឡូស៊ីនេះ ត្រូវបាននិងកំពុងប្រើប្រាស់សម្រាប់ទ្រទ្រង់ដល់ការការពារនិងអភិរក្សធនធានធម្មជាតិដែលកម្ពុជាមាន និងជួយលើកកម្ពស់ជីវភាពរបស់ប្រជាសហគមន៍មូលដ្ឋានដែលឆ្លើយតបទៅគោលការណ៍ ហិរញ្ញប្បទាននិរន្តរភាព៕

ដោយ ៖ រ៉ាណេត

ភ្នំពេញ ៖ គម្រោងសាងសង់ និងបង្កើតស្ថានីយផលិតថាមពលអគ្គិសនី ដើរដោយថាមពលពន្លឺព្រះអាទិត្យ ដែលមានសមត្ថភាពបង្កើតកម្លាំងបាន៣០មេហ្គាវ៉ាត់ ស្ថិតនៅក្នុងខេត្តពោធិ៍សាត់ ត្រូវបានរដ្ឋាភិបាលគាំទ្រ និងជំរុញឱ្យដំណើរការក្នុងពេលដ៏ខ្លីឆាប់ៗខាងមុននេះ ។

នៅទីស្តីការក្រសួងបរិស្ថាន កាលពីល្ងាចថ្ងៃទី៤ ខែកុម្ភៈ ឆ្នាំ២០២០ ក្រោមការដឹកនាំដោយលោក សៅ សុភាព រដ្ឋលេខាធិការនៃក្រសួងបរិស្ថាន បានបើកកិច្ចប្រជុំអន្តរក្រសួង ដើម្បីពិនិត្យ និងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមពេញលេញ សម្រាប់គម្រោងបង្កើតស្ថានីយផលិតថាមពលអគ្គិសនីដើរដោយថាមពលពន្លឺព្រះអាទិត្យកម្លាំង ៣០មេហ្គាវ៉ាត់ ស្ថិតនៅខេត្តពោធិ៍សាត់បន្ថែមមួយទៀត។

គម្រោងថ្មីមួយនេះ នឹងត្រូវធ្វើការអភិវឌ្ឍនៅលើផ្ទៃដីទំហំ ៥៥ហិកតា ដែលមានទីតាំងភូមិសាស្រ្តស្ថិតនៅភូមិអន្សរក្តាម ឃុំស្នាអន្សា ស្រុកក្រគរ ខេត្តពោធិ៍សាត់ របស់ក្រុមហ៊ុន SchneiTech Infinite Co., Ltd ដោយបានសិក្សា និងរៀបចំរបាយការណ៍ដោយក្រុមហ៊ុន ទីប្រឹក្សា Creative Green Design Co., Ltd.។

ជាលទ្ធផលនៃកិច្ចប្រជុំ ក្រោមការចូលរួមពីតំណាងអគ្គលេខាធិការដ្ឋាន ក្រុមប្រឹក្សាជាតិអភិវឌ្ឍន៍ដោយចីរភាព និងអន្តរក្រសួង ស្ថាប័ននានាដែលពាក់ព័ន្ធ ជារួម អង្គប្រជុំបានសម្រេចគាំទ្រ លើគម្រោងឱ្យបង្កើតស្ថានីយផលិតថាមពលអគ្គិសនី ដើរដោយថាមពលពន្លឺព្រះអាទិត្យនេះ ដោយកំណត់ឱ្យក្រុមហ៊ុនសិក្សាលម្អិត ពីលទ្ធភាពជួយជីកយកអាចម៍ដី ដើម្បីស្តារអាងស្តុកទឹកដំណាក់ក្រាញ់ និងជួយអភិវឌ្ឍន៍សហគមន៍មូលដ្ឋាន។

ក្រៅពីនេះក្រុមហ៊ុនក៏ត្រូវសិក្សា និងរៀបចំប្រព័ន្ធដោះទឹកភ្លៀងនៅតំបន់គម្រោងឱ្យបានត្រឹមត្រូវ ចៀសវាងការជន់លិចដីស្រែរបស់ប្រជាពលរដ្ឋនៅក្នុងតំបន់ ត្រូវសិក្សាបន្ថែមពីការប្រែប្រួលអាកាសធាតុ ដែលអាចជះឥទ្ធិពលទៅលើគម្រោង និងឥទ្ធិពលនៃការបំលែងពីដីកសិកម្ម ទៅជាស្ថានីយផលិតថាមពលដើរ ដោយថាមពលព្រះអាទិត្យ។ បន្ថែមពីនេះ ក្រុមហ៊ុនអភិវឌ្ឍន៍ ក៏ត្រូវមានកិច្ចសហការជាមួយអាជ្ញាធរមូលដ្ឋាន ឱ្យបានជិតស្និទ្ធ ព្រមទាំងផ្តល់ឱកាសការងារដល់ប្រជាពលរដ្ឋ នៅមូលដ្ឋានឱ្យចូលបម្រើការក្នុងក្រុមហ៊ុនឱ្យអស់លទ្ធភាព ជាពិសេសត្រូវមានផែនការ និងគ្រប់គ្រងសំណល់ផ្ទាំងសូឡា ឱ្យបានច្បាស់លាស់៕

ដោយវុត្ថា
សេអ៊ូល៖ តាមគម្រោងនៅថ្ងៃទី៥ កុម្ភៈនេះ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងចាកចេញពីប្រទេសកូរ៉េខាងត្បូងឆ្ពោះទៅទីក្រុងវូហាន ខេត្តហ៊ូប៉ីប្រទេសចិន ដើម្បីទៅសួរសុខទុក្ខកូនក្មួយនិស្សិតខ្មែរ ២៣ នាក់ដែលកំពុងសិក្សានៅទីនោះ តែរដ្ឋាភិបាលចិនអនុញ្ញាតឱ្យធ្វើដំណើរទៅកាន់ទីក្រុងប៉េកាំងវិញ ។

សម្តេចតេជោ ហ៊ុន សែន បានសរសេរនៅក្នុងហ្វេសបុកផ្លូវការនៅព្រឹកថ្ងៃទី ៥ ខែកុម្ភៈ ឆ្នាំ ២០២០នេះថា មកទល់ម៉ោង១១:០០យប់ម៉ិញ ទើបក្រសួងការបរទេសចិនឆ្លើយតបថាមិនអាចរៀបចំជូនដល់ការធ្វើដំណើររបស់ខ្ញុំ ព្រោះទីក្រុងនេះបានប្រកាសភាពអាសន្នបិទមិនឲ្យមានចរាចរណ៍ឆ្លងកាត់នៅក្នុងតំបន់នេះនៅឡើយ ហើយចំពោះនិស្សិតវិញក៏មិនត្រូវបានអនុញ្ញាតឲ្យចេញក្រៅពីទីកន្លែងរស់នៅបានដែរ។

លោកសរសេរបន្តថា “ដោយសារមិត្តចិនយល់អំពីការព្រួយបារម្ភរបស់ខ្ញុំចំពោះពលរដ្ឋ និងនិស្សិតខ្មែរដែលកំពុងរស់នៅក្នុងប្រទេសចិន នៅព្រឹកម៉ិញនេះ ខាងរដ្ឋាភិបាលចិនបានអនុញ្ញាតឲ្យខ្ញុំធ្វើដំណើរទៅកាន់ទីក្រុងប៉េកាំង ដើម្បីបានជួបសម្តែងការគួរសមជាមួយភាគីមិត្តចិន និងបានស្វែងយល់អំពីការយកចិត្តទុកដាក់របស់រដ្ឋាភិបាលចិនចំពោះបងប្អូននិងកូនក្មួយសិស្សនិស្សិតខ្មែរយើងដែលកំពុងរស់នៅនឹងសិក្សានៅក្នុងទីក្រុងវូហាន ក៏ដូចជានៅទូទាំងប្រទេសចិន”។

សម្តេចបន្ថែមថា “ដូច្នេះនៅរសៀលនេះ ខ្ញុំនឹងដឹកនាំគណប្រតិភូកម្ពុជាចាកចេញពីប្រទេសកូរ៉េខាងត្បូង ឆ្ពោះទៅកាន់ទីក្រុងប៉េកាំង មុននឹងធ្វើដំណើរវិលត្រឡប់ទៅកាន់ប្រទេសកម្ពុជាវិញ។ ខ្ញុំសូមអរគុណបងប្អូនជនរួមជាតិ និងកូនក្មួយដែលគោរពស្រឡាញ់ខ្ញុំ និងចង់អោយខ្ញុំមានសុខភាពល្អ”។

ជាមួយគ្នានេះ សម្តេចជោ ហ៊ុន សែនក៏បានពរបងប្អូនជនរួមជាតិ និងកូនក្មួយសិស្សនិស្សិតដែលកំពុងរស់នៅក្នុងទីក្រុងវូហាន និងនៅក្នុងប្រទេសចិនទាំងអស់ជួបតែសេចក្តីសុខ សំណាងល្អ និងចៀសផុតពីជំងឺទាំងឡាយ៕

ដោយ ប៊ី

ភ្នំពេញៈ ធនាគារ Goldman Sachs ដែលមានមូលដ្ឋាននៅអាំមេរិកបានព្យាករណ៍ថា ការផ្ទុះឡើងនៃជំងឺកូរ៉ូណាវីរុស នឹងមានឥទ្ធិពលអវិជ្ជមានទៅលើកំណើនសេដ្ឋកិច្ចពិភពលោកនៅឆ្នាំនេះ ដោយសារឥទ្ធិពលនៃការគ្រប់គ្រង ការសាយភាយជំងឺឆ្លងកូរ៉ណាវីរុសពីប្រទេសចិនទៅកាន់ពិភពលោក។

ធនាគារអាមេរិកនេះប៉ាន់ស្មានថា នឹងមានការធ្លាក់ចុះ០,១ ដល់០,២ភាគរយចំពោះកំណើនផលិតផល ក្នុងស្រុកសរុបសកលនៅឆ្នាំ២០២០ ក្រោមសេណារីយ៉ូមូលដ្ឋានដែលសន្មត់ថា អត្រាឆ្លងមានការថយចុះគួរឱ្យកត់សម្គាល់ក្នុងខែ កុម្ភៈ និងមីនា ដោ​យ​សារការឆ្លើយតបដ៏ខ្លាំងក្លាពីអាជ្ញាធរចិន។

ទោះបីជាយ៉ាងក៏ដោយ ធនាគារGoldmanបានឱ្យដឹងថា ខ្លួនរំពឹងថាសេដ្ឋកិច្ចពិភពលោកនឹងកើនឡើងប្រហែល៣,២៥ ភាគរយនៅឆ្នាំនេះដែលជាការកើនឡើង តិចតួចពីអត្រា៣,១ភាគរយកាលពីឆ្នាំមុន។

លោកJan Hatzius ប្រធានសេដ្ឋវិទូរបស់ធនាគារ Goldman បានប្រាប់អតិថិជននៅក្នុងសន្និសីទខ្លីមួយកាលពីថ្ងៃចន្ទថា “ផលប៉ះពាល់រយៈពេលខ្លីគឺធំណាស់។ តើមានអ្វីកើតឡើងដល់ឆ្នាំ២០២០ ទាំងមូលគឺអាស្រ័យទៅលើពេលវេលា ដែលត្រូវបានគ្រប់គ្រងយ៉ាងរហ័ស”។

នៅក្នុងសេណារីយ៉ូនេះដែលពាក់ព័ន្ធ នឹងអត្រានៃការឆ្លងនឹងកើនឡើង រហូតត្រីមា​សទី២ ធនាគារGoldmanគិតថា ផលប៉ះពាល់នឹងកើនឡើងដល់០,៣ភាគរយ នៃផលិត​ផលក្នុងស្រុកសរុប។

លោក Hatzius បានមានប្រសាសន៍ថា “ក្នុងករណីនេះ យើងត្រូវរង់ចាំរហូតដល់ឆ្នាំ២០២១ មុនពេលដែលយើងមើលឃើញការកើនឡើង នៃកំណើនសេដ្ឋកិច្ចពិភពលោ​ក”។

ធនាគារGoldman ប៉ាន់ប្រមាណថា ការខូចខាតភាគច្រើននឹងកើតឡើង ក្នុងត្រីមាសទី ១ ដោយមាន២ភាគរយកាត់បន្ថយ កំណើនសេដ្ឋកិច្ចពិភពលោក ក្នុងអត្រាប្រចាំឆ្នាំ តាមរយៈការប៉ះពាល់ដោយផ្ទាល់ដល់សេដ្ឋកិច្ចចិន ដែលមានតម្លៃមួយភាគរយ ហើយផលប៉ះពាល់ នៃការសាយភាយកាត់បន្ថយចំនួនភាគរយបន្ថែមទៀត៕

ដោយៈ រ៉ាណេត

ភ្នំពេញៈ ទំហំទ្រព្យសកម្មគ្រឹះស្ថានមីក្រូហិរញ្ញវត្ថុ នៅកម្ពុជាមានចំនួនសរុប ៣៤,៨ ទ្រីលានរៀល ស្មើនឹង ៨,៥ ពាន់លានដុល្លារ ដោយក្នុងនោះប្រាក់កម្ចីសរុបមាន ២៩,៤ ទ្រីលានរៀល ស្មើនឹង ៧,២ ពាន់លានដុល្លារ ផ្តល់កម្ចីដល់អតិថិជនចំនួន ២,១លាននាក់។

ទេសាភិបាលរងធនាគារជាតិនៃកម្ពុជា លោក ស៊ុ សន្និសិទ្ធបានមានប្រសាសន៍ក្នុងកម្មវិធីសិក្ខាសាលាផ្សព្វផ្សាយស្តីពី «វិស័យមីក្រូហិរញ្ញវត្ថុនៅកម្ពុជា» នៅខេត្តមណ្ឌលគីរី នៅថ្ងៃទី៤ ខែកុម្ភៈ ឆ្នាំ២០២០ថា វិស័យមីក្រូហិរញ្ញនៅកម្ពុជា ដើរតួជាសារវ័ន្ត ក្នុងការរួមចំណែកអភិវឌ្ឍសេដ្ឋកិច្ច និងសង្គមពិសេសការកាត់បន្ថយភាពក្រីក្រ របស់ប្រជាពលរដ្ឋនៅតាមតំបន់ជនបទ។ ប៉ុន្តែទោះបីជាបច្ចុប្បន្នវិស័យនេះ ទទួលបានការរីកចម្រើនគួរជាទីមោទនៈមែន ក៏មានជនឱកាសនិយមមួយចំនួន បានយកវិស័យនេះជាឧបករណ៍ ដើម្បីកេងចំណេញផលប្រយោជន៍ផ្ទាល់ខ្លួន ផលប្រយោជន៏ហិរញ្ញវត្ថុ និងនយោបាយ។

កន្លងមកនេះការបោកប្រាស់ របស់ជនខិលខូចនេះ បានធ្វើឲ្យកូនបំណុលធ្លាក់ ក្នុងគ្រោះអាសន្នរើមិនរួចហើយ ធ្វើឲ្យគ្រួសារខ្លះព្រាត់ប្រាស់ និងហិនហោចទ្រព្រសម្បត្តិ។ ដូចនេះអាជ្ញាធរមូលដ្ឋានចាំបាច់ត្រូវចូលរួម សហការគ្នាអនុវត្តច្បាប់ និងចាត់វិធានការចំពោះជនឆ្លៀតឱកាសមួយចំនួន ដែលប្រើរូបភាពឲ្យខ្ចីប្រាក់ ដើម្បីបោកប្រាស់ប្រជាពលរដ្ឋ។ ដូច្នេះ  ដើម្បីបង្កើនលទ្ធភាព ក្នុងការទទួលបានសេវាហិរញ្ញវត្ថុផ្លូវការ ដែលមានគុណភាព និងមានការគ្រប់គ្រងពីច្បាប់ និងបទប្បញ្ញត្តិច្បាស់លាស់ ដើម្បីអាចឲ្យប្រជាពលរដ្ឋពុំទទួលបាន ឬកំពុងប្រើប្រាស់សេវាហិរញ្ញវត្ថុក្រៅផ្លូវការ ឲ្យងាកមកប្រើប្រាស់សេវាហិរ​ញ្ញ​វត្ថុ ក្នុងប្រព័ន្ធដែលមានការត្រួតពិនិត្យត្រឹមត្រូវ ពីធនាគារជាតិនៃកម្ពុជា។

លោក រ័ត្ន សុវណ្ណនរៈ អគ្គនាយកត្រួតពិនិត្យនាគារជាតិនៃកម្ពុជា បានបញ្ជាក់ថា រាជរដ្ឋាភិបាលកម្ពុជា ដឹកនាំដោយសម្ដេចតេជោហ៊ុន សែន បានយកចិត្តទុកដាក់ ក្នុងការបង្កើនលទ្ធភាពទទួលបានសេវាហិរញ្ញវត្ថុសមស្រប និងមានតម្លៃសមរម្យសម្រាប់ប្រជាពលរដ្ឋទូទៅ តាមរយៈការកំណត់គោលដៅ លើកកម្ពស់បរិយាប័ន្នហិរញ្ញវត្ថុសំដៅឱ្យប្រ​ជា​ពលរដ្ឋមានលទ្ធភាពទទួលបាន និងប្រើប្រាស់សេវាកម្មហិរញ្ញវត្ថុផ្លូវការទាន់ពេលវេលា សមស្របតាមតម្រូវការ មានតម្លៃសមរម្យ និងមានកិច្ចការពារតាមផ្លូវច្បាប់។

លោកបានបន្តថា “បរិយាប័ន្នហិរញ្ញវត្ថុនេះ ដើរតួនាទីសំខាន់ណាស់ ក្នុងការជំរុញកំណើនសេដ្ឋកិច្ច កាត់បន្ថយវិសមភាព និងកាត់បន្ថយភាពក្រីក្រនៅកម្ពុជា”។ លោកបន្តថា “បច្ចុប្បន្ននេះប្រជាពលរដ្ឋពេញវ័យ នៅកម្ពុជាដែលទទួលបានសេវាហិរញ្ញវត្ថុផ្លូវការ មានកម្រិតប្រមាណ៥៩ភាគរយ ក្នុងនោះ១៧ភាគរយ ផ្តល់ដោយគ្រឹះស្ថានធនាគារ៤២ ភាគរយ ផ្តល់ដោយគ្រឹះស្ថានហិរញ្ញវត្ថុ មិនមែនធនាគារដូចជា គ្រឹះស្ថានមីក្រូហិរញ្ញវត្ថុ និងគ្រឹះស្ថានផ្តល់សេវាទូទាត់សងប្រាក់”។

លោកបន្ថែមថា ដោយសារចំណេះដឹងផ្នែកហិរញ្ញវត្ថុ របស់ប្រជាពលរដ្ឋនៅមានកម្រិតបូកផ្សំ នឹងកត្តាប្រាក់ចំណូល និងទីកន្លែងស្នាក់នៅដាច់ស្រយាល ប្រជាពលរដ្ឋពេញវ័យ ដែលពុំបានទទួលសេវាហិរញ្ញវត្ថុ ឬកំពុងប្រើប្រាស់សេវាហិរញ្ញវត្ថុក្រៅផ្លូវការ នៅតែមានកម្រិតខ្ពស់រហូតដល់៤១ភាគរយ ដែលនេះជាក្ដីកង្វល់មួយ ហើយធនាគារជាតិនៃកម្ពុជា ត្រូវគិតគូរដោះស្រាយ តាមរយៈការអប់រំតាមគ្រប់រូបភាព រួមទាំងសិក្ខាសា​លាដូចពេលនេះផងដែរ៕

ដោយៈ រ៉ាណេត

កូរ៉េខាងត្បូងៈ សម្ដេចតេជោ ហ៊ុន សែន បានស្នើដល់រដ្ឋាភិបាលកូរ៉េខាងត្បូងជួយសាងសង់ស្ពានឆ្លងកាត់ទន្លេមេគង្គនៅកម្ពុជា ដូចគ្នាទៅនឹងស្ពានជំនួយរបស់រដ្ឋាភិបាល​ចិន និងជប៉ុននៅពេលបច្ចុប្បន្ននេះ។

នៅក្នុងជំនួបជាមួយប្រធានាធិបតីកូរ៉េខាងត្បូង លោកម៉ូន ជេអ៊ីនកាលពីរសៀលថ្ងៃទី៤ ខែកុម្ភៈ ឆ្នាំ២០២០កន្លងមក សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានបង្ហាញអំពីបំណងរបស់សម្តេច ដែលចង់ឃើញមានវត្តមានស្ពានកូរ៉េខាងត្បូង ស្ថិតនៅលើទឹកដីកម្ពុជា ដូចទៅនឹងស្ពានរបស់ចិន និងជប៉ុន នាពេលបច្ចុបន្ននេះដែរ។

រដ្ឋមន្រ្តីប្រតិភូអមនាយករដ្ឋមន្រ្តី លោក កៅ គឹមហួន បានបញ្ជាក់ក្រោយកិច្ចជំនួបរវាងសម្តេចតេជោ ហ៊ុន សែន និង លោក មូន ជេអ៉ីន ប្រធានាធិបតីសាធារណរដ្ឋកូរ៉េ នៅប្រទេសកូរ៉េខាងត្បូងថា នៅក្នុងជំនួបនោះ សម្តេចតេជោ ចង់ឃើញស្ពានរបស់កូរ៉េ ឆ្លងកាត់ទន្លេមេគង្គ។

លោកបានបញ្ជាក់ថា ពាក់ព័ន្ធនឹងកិច្ចសហប្រតិបត្តិការនេះ គឺសម្តេចតេជោចង់ឃើញ ដោយសារតែប្រទេសចិន ជប៉ុន បានជួយសាងសង់ស្ពាននៅក្នុងប្រទេសកម្ពុជា ហើយសម្តេចក៏ចង់ឃើញស្ពាន ដែលធ្វើដោយប្រទេសកូរ៉េ នៅប្រទេសកម្ពុជាផងដែរ ជាពិសេសស្ពានឆ្លងកាត់ទន្លេមេគង្គ។ ក្នុងន័យនេះសម្តេច ក៏បានស្នើឱ្យកូរ៉េពិចារណាក្នុងការសាងសង់ស្ពាន នៅពេលខាងមុខនេះ”។

ទោះជាយ៉ាងណាលោកៅ កឹមហួនមិនបញ្ជាក់ថា ភាគីកូរ៉េនឹងឆ្លើយតបសំណើរសម្តេច ដើម្បីជួយសាងសង់ស្ពានឬអត់នៅឡើយទេ។

ជាការឆ្លើយតប លោកប្រធានាធិបតីកូរ៉េ បានអះអាងថា លោកនឹងខិតខំជំរុញឱ្យក្រុមហ៊ុនកូរ៉េ មកបណ្តាក់ទុននៅក្នុងប្រទេសកម្ពុជា ហើយនឹងចាប់យកឱកាសនៃកសាងគម្រោងហេដ្ឋារចនាសម្ព័ន្ធ នៅក្នុងប្រទេសកម្ពុជាផងដែរ។ ជាមួយគ្នានេះ លោកប្រធា​នាធិបតីក៏បានថ្លែងអំណរគុណរដ្ឋាភិបាលកម្ពុជា ដែលបានគាំទ្រគោលការណ៍ទាំង៣ របស់រដ្ឋាភិបាលកូរ៉េ ពិសេសគឺការប្រែក្លាយឧបទ្វីបកូរ៉េ ជាតំបន់សន្តិភាព។ នេះបើតាមប្រសា​សន៍របស់ លោក កៅ គឹមហួន៕

ដោយម៉ាណេត

ភ្នំពេញៈ ប្រធានាធិបតីកូរ៉េខាងត្បូង លោកម៉ូន ជេអ៊ីន សន្យាជាមួយសម្តេចតេជោ ហ៊ុន សែន នាយករដ្ឋមន្ត្រីកម្ពុជាថា នឹងជំរុញអ្នកវិនិយោគកូរ៉េខាងត្បូង មកបណ្តាក់ទុន នៅកម្ពុជាឱ្យបានកាន់តែច្រើនថែមទៀត។

ការសន្យារបស់លោក ម៉ូន ជេអ៉ីន ត្រូវបានធ្វើឡើងនៅក្នុងជំនួបស្វាគមន៍ និងពិ​ភាក្សាការងារជាមួយសម្តេចតេជោ ហ៊ុន សែន នៅរសៀលថ្ងៃទី៤ ខែកុម្ភៈ ឆ្នាំ២០២០នេះ នៅទីក្រុងសេអ៊ូល ទីដែលសម្តេចតេជោ អញ្ជើញចូលរួមកិច្ចប្រជុំកំពូលពិភពលោកឆ្នាំ២០២០របស់អង្គការសហព័ន្ធសន្តិភាពសកល។

លោកមូន ជេអ៉ីន បានស្វាគមន៍យ៉ាងកក់ក្តៅបំផុត ចំពោះវត្តមានរបស់សម្តេចតេ​ជោហ៊ុន សែន។ វត្តមានរបស់សម្តេចតេជោ នៅចំពេលមានព្រិលធ្លាក់ ជាហេតុនាំឱ្យ​លោក មូន ចាត់ទុកវត្តមានសម្តេចតេជោជាភ្ញៀវដ៏ពិសេសសម្រាប់លោក។

លោកកៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រីបានថ្លែងឱ្យដឹងថា ក្នុងជំនួបពិភាក្សាការងារសម្តេចតេជោ ហ៊ុន សែន និងលោកប្រធានាធិបតី បានកត់សម្គាល់ពីការរីកចម្រើននូវទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ដែលបានឈានដល់ដំណាក់ដ៏ល្អប្រសើរនាពេលបច្ចុប្បន្ន។

ក្រៅពីការគូសបញ្ជាក់ពីវឌ្ឍនភាពនៃទំនាក់ទំនងហើយនោះ ក្នុងជំនួបនេះសម្តេចតេជោ ហ៊ុន សែន ក៏បានស្នើដល់លោកប្រធានាធិបតីកូរ៉េ ជំរុញអ្នកវិនិយោគកូរ៉េខាងត្បូងមកបណ្តាក់ទុននៅកម្ពុជា ឱ្យបានកាន់តែច្រើនថែមទៀត។

ឆ្លើយតបសំណើនេះ លោកប្រធានាធិបតី មូន ជេអ៉ីន បានសន្យាប្រឹងប្រែងជំរុញអ្នកវិនិយោគរបស់ខ្លួនមកកម្ពុជា ជាពិសេសចាប់ឱកាសវិនិយោគ លើវិស័យហេដ្ឋារចនាសម្ព័ន្ធ។

គិតចាប់ពីឆ្នាំ១៩៩៤ ដល់ឆ្នាំ២០១៩ គម្រោងវិនិយោគរបស់កូរ៉េខាងត្បូង ដែលចុះបញ្ជីទៅក្រុមប្រឹក្សាអភិវឌ្ឍន៍កម្ពុជា មានចំនួន ២១៥គម្រោង ក្នុងទំហំទឹកប្រាក់ជិត៥ពាន់លានដុល្លារអាមេរិក។ ក្នុងនោះមាន១២៣គម្រោងវិនិយោគ លើរោងចក្រជាមួយទុនវិនិយោគ៤៨៦លានដុល្លារ បង្កើតការងារប្រមាណ៨ម៉ឺនកន្លែង៕

ដោយវុត្ថា

ភ្នំពេញៈ ការបុកគ្រឹះសាងសង់ស្ពានបេតុង ឆ្លងកាត់ទន្លេសាបថ្មីមួយទៀត ស្របតាមស្ពានបាឡេដែលជាស្ពានដែកចេញ ពីចំណុចឃ្លាំងសាំងសូគីមិច គីឡូម៉ែត្រលេខ៦ ក្នុងខណ្ឌឬស្សីកែវ ឆ្ពោះទៅតំបន់អភិវឌ្ឍន៍ជ្រោយចង្វារ ក្នុងសង្កាត់ព្រែតាសេក ខណ្ឌជ្រោយចង្វារមកដល់ពេលនេះ សម្រេចបានប្រមាណ៧០ភាគរយ ខណៈក្រុមការងារសា​ងសង់បានឹងកំពុងមមាញឹកក្នុងការចាក់បេតុងគ្រឹះទ្រសរសរស្ពាន។

លោកម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ បានប្រាប់គេហទំព័រ Propertyarea.asia នៅថ្ងៃទី៤ ខែកុម្ភៈ ឆ្នាំ ២០២០កន្លងមកឱ្យដឹងថា  តាមគម្រោងនេះស្ពាននេះ នឹងត្រូវសាងសង់រយៈពេល៣០ខែ  ដែលមកដល់ពេលនេះ គឺសម្រេចបានរយៈពេល១០ខែ ពោលគឺមកដល់ពេលនេះ ជាលទ្ធផលសម្រេចបានប្រមាណ៧០ភាគរយហើយនៃការបុកគ្រឹះ ។

លោកថា “ការចាក់បេតុងគ្រឹះទ្រសរសរស្ពានក្នុងទន្លេរ នៅការដ្ឋានសាងសង់ស្ពានឫស្សីកែវ សម្រេចបាន៤០ដើម លើចំនួន៥២ដើម ស្មើ៧៧%”។

លោកបន្ថែមថា ស្ពានដែលរដ្ឋបាលរាជធានីភ្នំពេញ ដែលបាននិងកំពុងសាងសង់នៅក្បែស្ពានបាឡេនេះ គឺជាប្រភេទស្ពានបេតុង ដូចទៅនឹងស្ពានមិត្តភាពកម្ពុជា-ចិន និងស្ពានមិត្តភាពកម្ពុជា-ជប៉ុន ដើម្បីសម្រួលចរាចរណ៍នៅតំបន់នេះ ជាពិសេសសម្រួលដល់ការធ្វើដំណើរមកពីតំបន់អភិវឌ្ឍន៍OCIC នៅត្រើយខាងកើត មកត្រើយខាងលិច។

ស្ពានថ្ម ដែលបាននឹងកំពុងស្ថាបនានេះ ទទួលបានថវិកាប្រមាណ៣៥លានដុល្លារអាមេរិក ពីក្រុមហ៊ុនវិនិយោគOCIC មានប្រវែងសរុប៩២២ម៉ែត្រ។ ទទឹង២០.៥ម៉ែត្រ ចិញ្ចើមស្ពានសម្រាប់ថ្មើរជើង១.២៥ម៉ែត្រ សងខាងកំពស់សរសរស្ពាន សម្រាប់ព្យួរខ្សែកាប ធៀបនឹងកម្រាលស្ពាន៣៤ម៉ែត្រ សរសរសម្រាប់ព្យួរខ្សែកាប មានចំនួន៤សរសរ គម្លាតពីគ្នា១២០ម៉ែត្រ។ គន្លងខ្សែយានយន្តទទឹង៣.៧៥ម៉ែត្រ គន្លងធ្វើចរាចរចំនួន ២ខ្សែ ទៅ២ខ្សែមក ល្បឿនសុវត្ថិភាព៤០គម ក្នុង១ម៉ោង កំពស់នាវាចរក្រោមស្ពានអតិបរមា នៅរដូវវស្សា១០.៥ម៉ែត្រ។ កំពស់នាវាចរក្រោមស្ពាន អប្បបរមានៅរដូវប្រាំង២០.៥ម៉ែត្រ បំពាក់បង្គោលភ្លើងបំភ្លឺដាក់ស្លាកសញ្ញាចរាចរផងដែរ។

ជាមួយវត្តមានស្ពានបេតុង ដែលមានរូបរាងស្រដៀងនឹងងស្ពានអ្នកលឿង ជាប្រភេ​ទស្ពានមានខ្សែកាបខាងលើនេះ អភិបាលខណ្ឌជ្រោយចង្វារ លោក ឃ្លាំង ហួត ក្នុងនាមជាអាជ្ញាធរស្ថិតនៅទីតាំងនោះ បានសម្ដែងការស្វាគមន៍ និងអបអរសាទរ ដែលធ្វើឲ្យបញ្ហាចរាចរណ៍ ត្រូវបានកាត់បន្ថយមួយចំណែកយ៉ាងធំ ហើយជីវភាពប្រជាពលរដ្ឋដែលទទួលបាន ផលប្រយោជន៍មួយនេះកាន់តែខ្លាំង៕