ដោយ ប៊ី

ភ្នំពេញៈ របាយការណ៍ពីស្ថានទូតថៃ ប្រចាំនៅភ្នំពេញបង្ហាញថា ពាណិជ្ជកម្មទ្វេភា​គីរវាងកម្ពុជា និងថៃមានតម្លៃប្រហែល៩ពាន់លានដុល្លារកាលពីឆ្នាំមុន កើនឡើង៧,១៤ភាគរយ បើប្រៀបធៀបនឹង៨,៤ពាន់លានដុល្លារក្នុងឆ្នាំ២០១៨។

ស្ថានទូតថៃបានឱ្យដឹងនៅក្នុងសេចក្តីប្រកាសព័ត៌មាន ដែលចេញដោយការសែតអន្តរជាតិមួយបានឲ្យដឹងថា ប្រទេសថៃ និងកម្ពុជាបានរក្សានូវទំនាក់ទំនងដ៏ល្អប្រសើរដូចដែលបានឆ្លុះបញ្ចាំងពីដំណើរទស្សនកិច្ច និងការប្រជុំកម្រិតខ្ពស់ជាទៀងទាត់ ដែលបានជួយលើកកម្ពស់ថែមទៀតនូវការយោគយល់គ្នា និងកិច្ចសហប្រតិបត្តិការរវាងប្រទេ​សទាំងពីរ។

របាយការណ៍បានឱ្យដឹងថា “ការជឿទុកចិត្តគ្នា ផលប្រយោជន៍ និងកិច្ចសហប្រតិ​បត្តិការទៅវិញទៅមក នៅតែជាគោលការណ៍គ្រឹះ ក្នុងការពង្រឹងការពង្រឹងចំណងមិត្តភាពទ្វេភាគីរបស់យើងឱ្យឈានដល់កម្រិតខ្ពស់”។

ប្រទេសកម្ពុជា និងថៃបានសន្យាបង្កើនពាណិជ្ជកម្មទ្វេភាគី កើនដល់១៥ពាន់លានដុល្លារក្នុងឆ្នាំនេះ។

ទិន្នន័យរបស់ក្រុមប្រឹក្សាអភិវឌ្ឍន៍កម្ពុជាបានបង្ហាញថា ប្រទេសថៃស្ថិតក្នុងចំណោ​មប្រទេសចំនួន៩ ដែលបានពង្រីកការវិនិយោគនៅកម្ពុជា នៅចន្លោះឆ្នាំ១៩៩៤ ដល់ចុងត្រីមាសទី៣ ឆ្នាំ២០១៧ ដោយមានតម្លៃវិនិយោគ៩៦៧,៨៩ លានដុល្លារនៅពេលនោះ។

កាលពីពេលថ្មីៗនេះ ប្រទេសថៃនឹងផ្តល់ប្រាក់កម្ចីដល់ប្រទេសកម្ពុជា មីយ៉ាន់ម៉ា និងឡាវ ចំនួន២៨១,៦ លានដុល្លារ សម្រាប់ការសាងសង់ផ្លូវឆ្លងប្រទេសចំនួន៤ ក្រោមគំនិតផ្តួចផ្តើមតភ្ជាប់អាស៊ាន។

កម្ពុជានឹងទទួលបានថវិកាចំនួន៣៩,៧៨លានដុល្លារ ដើម្បីសាងសង់ផ្លូវប្រវែង ១៣១ គីឡូម៉ែត្រទៅកាន់ប្រទេសថៃ តាមរយៈខេត្តសៀមរាប និងស្រុក អន្លង់វែង ខេត្តឧត្តរមានជ័យ៕

ដោយស៊ីវ ម៉េង

ភ្នំពេញៈ ផ្សារហ៊ុនកម្ពុជាត្រៀមស្វាគមន៍ក្រុមហ៊ុនថ្មីៗចន្លោះពី៧ ទៅ៨ទៀតនៅឆ្នាំនេះ ខណៈត​ម្លៃហ៊ុនរបស់ក្រុមហ៊ុនដែលបោះផ្សារលក់ភាគហ៊ុន និងសញ្ញាប័ណ្ណបានកើនឡើងល្អប្រសើរកាលពីឆ្នាំមុន។

អគ្គនាយកក្រុមហ៊ុនផ្សារមូលបត្រកម្ពុជា លោកហុង សុហួរបានមានប្រសាសន៍ឲ្យដឹងតាមទូរស័ព្ទឲ្យដឹងនារសៀលថ្ងៃទទី២៨ មករានេះថា បច្ចុប្បន្នមានក្រុមហ៊ុនចន្លោះពី៧ទៅ៨ត្រៀមបោះផ្សាយលក់មូលបត្រ និងសញ្ញាប័ណ្ណឬប័ណ្ណបំណុលនៅឆ្នាំនេះ ខណៈបច្ចុប្បន្នផ្សារហ៊ុនកម្ពុជាមានក្រុមហ៊ុនចំនួន៥ បាននិងកំពុងបោះផ្សារលក់ភាគហ៊ុន និងបីទៀតបាននិងកំពុងបោះផ្សាយលក់សញ្ញាប័ណ្ណរួចហើយ។

លោកបន្តថា “តម្លៃហ៊ុនដែលបានលក់ក្នុងផ្សារហ៊ុន បានកើនឡើងជាមធ្យមចំនួន៥០ភាគរយជាង(គិតជាមធ្យម)ដែលនេះជាសញ្ញាល្អប្រសើរ ដោយសារទំហំជួញដូរបានកើនឡើង”។លោកបន្តថា “កត្តាជំរុញឲ្យតម្លៃហ៊ុនកើនឡើង ដោយសារសាធារណៈជនស្គាល់កាន់តែច្បាស់ពីផ្សារហ៊ុន និងក៏អាចដោយសារយុទ្ឋនាការ​ផ្សព្វផ្សាយ ពីផ្សារហ៊ុនកើនឡើង ពិសេសធនាគារអេស៊ីលីដា ដែលត្រៀមចូលបោះផ្សារលក់មូលបត្រ ឬភាគហ៊ុននាពេលខាងមុខនេះ”។

លោកហុង សុហួរបានបន្តថា ជាមួយនឹងភាគវិវត្តន៍កាន់តែប្រសើរនេះ ក្រុមហ៊ុនផ្សារមូលបត្រ ក៏ដូចជាគណកម្មការមូលបត្រកម្ពុជាបាន និងកំពុងធ្វើការជាមួយក្រុមហ៊ុន​មួយចំនួនទៀត ដើម្បីដំណើរការលក់ភាគហ៊ុ​ន និងប័ណបំណុលឬសញ្ញាប័ណ្ណនៅឆ្នាំនេះ ដែលធ្វើឲ្យទីផ្សារនេះកាន់តែមានផលិតផលច្រើនជាងមុន។

លោកបន្តដោយសុទិដ្ឋិនិយមថា “នៅពេលមានក្រុមហ៊ុនចូលបោះផ្សាយលក់សញញាប័ណ្ណ និងភាគហ៊ុនកាន់តែច្រើន មានន័យថាផ្សាររបស់យើងមានផលិតផលកាន់តែច្រើន ហើយនឹងទាក់ទាញសារធាណៈជនកាន់តែច្រើនចូលមកកាន់ផ្សារនេះ”៕

ដោយវុត្ថា

ភ្នំពេញៈ កម្ពុជា-ចិនបានចាប់ផ្តើមចរចា កិច្ចព្រមព្រៀងពាណិជ្ជកម្មសេរី ដើម្បីពង្រីកការធ្វើពាណិជ្ជកម្មវិនិយោគ សេវា និងកិច្ចសហប្រតិបត្តិការឲ្យកាន់តែស៊ីជម្រៅជាងមុន សំដៅសម្រេចឲ្យបានទំហំពាណិជ្ជកម្ម១០ពាន់លានដុល្លារអាមេរិក នៅឆ្នាំ២០២៣ តាមការកំណត់។

យោងតាមសេចក្តីប្រកាសព័ត៌មានរបស់ក្រសួងពាណិជ្ជកម្ម ដែលចេញផ្សាយនៅថ្ងៃទី ២៨ ខែមករាឆ្នាំ ២០២០ នេះឱ្យដឹងថា កម្ពុជា និងចិននៅថ្ងៃទី២០-២១ ខែមករា ឆ្នាំ២០២០កន្លងមកនេះ បានបើកការចរចាជុំទីមួយលើកិច្ចព្រមព្រៀង ពាណិជ្ជកម្មសេរីទ្វេភាគី នៅទីក្រុងប៉េកាំង ប្រទេសចិន ។

នៅក្នុងពិធីបើកការចរចាជាផ្លូវការ ភាគីទាំងពីរបានវាយតម្លៃខ្ពស់អំពីទំនាក់ទំនងទ្វេភាគីកម្ពុជា-ចិន និងកត់សម្គាល់សារៈសំខាន់ នៃការចរចាកិច្ចព្រមព្រៀងពាណិជ្ជកម្មរសរីកម្ពុជា-ចិនក្នុងការពង្រឹងទំនាក់ទំនង និងកិច្ចសហប្រតិបត្តិការសេដ្ឋកិច្ចទ្វេភាគី។ ឆ្លងកាត់ការចរចារយៈពេលពីរថ្ងៃ ប្រធានក្រុមចរចានៃប្រទេសទាំងពីរ បានកត់សម្គាល់លទ្ធផលជាវិជ្ជមានរបស់ក្រុមការងារចរចាទាំង១០ក្រុម ដោយបានផ្លាស់ប្តូរមតិ និងគោលជំហ​រទៅវិញទៅមក ព្រមទាំងឯកភាពលើមាត្រាមួយចំនួននៅក្នុងជុំចរចានេះផងដែរ។

ជាជំហានបន្ទាប់ ភាគីទាំងពីរនឹងជំរុញឲ្យបានកាន់តែឆាប់រហ័ស នូវការលើកឡើងចំណុច ឬសំណើផ្សេងៗ តាមក្រុមការងារនីមួយៗ សំដៅឈានទៅរកការឯកភាពលើកិច្ចព្រមព្រៀង ក្នុងពេលឆាប់ៗខាងមុខនេះ។ ជាមួយនោះដែរប្រធានក្រុមចរចា នៃប្រទេសទាំងពីរ បានឯកភាពជំរុញកិច្ចពិគ្រោះយោបល់ និងសម្របសម្រួលក្នុងប្រទេសរៀងៗខ្លួន ឲ្យបានមុនជុំទីពីរនៃការចរចា ដែលគ្រោងនឹងធ្វើនៅប្រទេសកម្ពុជា ក្នុងឆមាសទីមួយនៃឆ្នាំ២០២០នេះ។

យោងសេចក្តីណែនាំរបស់ សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងឯកឧត្តម លី ឃឺជាំង (Li Keqiang) នាយករដ្ឋមន្ត្រីនៃសាធារណរដ្ឋប្រជាមានិតចិន នៅក្នុងជំនួបទ្វេភាគីនាថ្ងៃទី២០-២៣ ខែមករា ឆ្នាំ២០១៩ នៅទីក្រុងប៉េកាំង ប្រមុខមេដឹកនាំប្រទេសទាំងពីរ បានជំរុញឲ្យក្រុមការងារនៃប្រទេសទាំងពីរ រៀបចំសិក្សាពីលទ្ធភាពបង្កើតកិច្ច ព្រមព្រៀងពាណិជ្ជកម្មសេរឺទ្វេភាគីកម្ពុជា-ចិនភាគីទាំងពីរបានចាប់ផ្តើមសិក្សា និងរាយការណ៍ពីអត្ថប្រយោជន៍នៃការបង្កើតកិច្ចព្រមព្រៀងពាណិជ្ជកម្មទ្វេភាគី ព្រមទាំងទទួលបានអាណត្តិពីរដ្ឋាភិបាល នៃប្រទេសទាំងពីរឲ្យដំណើរការចរចាលើកិច្ចព្រមព្រៀងនេះ ដើម្បីពង្រីកការធ្វើពាណិជ្ជកម្មវិនិយោគ សេវា និងកិច្ចសហប្រតិបត្តិការឲ្យកាន់តែស៊ីជម្រៅជាងមុន សំដៅសម្រេចឲ្យបានគោលដៅពាណិជ្ជកម្មសរុបចំនួន១០ ពាន់លានដុល្លារអាមេរិកនៅឆ្នាំ២០២៣ តាមការកំណត់។

អ្នកនាំពាក្យក្រសួងពាណិជ្ជកម្មកម្ពុជា លោក ស៊ាង ថៃ ឱ្យដឹងថា ក្រសួងពាណិជ្ជកម្ម បានរៀបចំប្រតិភូ ដើម្បីចេញទៅរាជធានីប៉េកាំង ប្រទេសចិន បើកការចរចាជាផ្លូវការ ពាក់ព័ន្ធកិច្ចព្រមព្រៀងពាណិជ្ជកម្មសេរីរួចរាល់ហើយ ដែលដឹកនាំដោយរដ្ឋលេខាធិការមួយរូប។

លោកបន្តថា “ការចរចាពាណិជ្ជកម្មសេរីនេះ គឺជាការខិតខំប្រឹងប្រែងរបស់រាជរដ្ឋាភិបាលកម្ពុជា ដើម្បីបើកច្រកកាន់តែធំសម្រាប់ផលិតផលរបស់កម្ពុជា អាចនាំចេញទៅកាន់ប្រទេសចិន ដែលប្រជាជនជាង១ពាន់លាននាក់”។ លោកថា “វិស័យដែលនឹងធ្វើការចរចានោះ គឺមានវិស័យពាណិជ្ជកម្ម វិស័យសេវាកម្ម វិស័យវិនិយោគ និងវិស័យមួយចំនួនទៀត”។

លោកបន្ថែមថា ការពិបាកនាំចេញទៅប្រទេសចិន មានជាប់ពាក់ព័ន្ធជាមួយនឹងលក្ខខណ្ឌអនាម័យ និងភូតគាមអនាម័យ ដែលរហូតមកដល់ពេលនេះ កសិផលមាន៤មុខប៉ុណ្ណោះ ដែលចិនអនុញ្ញាតឲ្យកម្ពុជា នាំចេញទៅប្រទេសរបស់ខ្លួនរួមមាន ពោត ដំឡូងមី អង្ករ និងចេក ខណៈដែលកម្ពុជាកំពុងចរចានាំចេញផលិតផលផ្សេងៗទៀតដូចជា ស្វាយ ម្រេច ផ្លែស្រកានាគ ទឹកមាត់ត្រចៀកកាំ ផ្លែមានប៉ៃលិន និងដូងក្រអូបជាដើម៕

ដោយ Donald Lee

ភ្នំពេញៈ ផ្សាហ៊ុននៅទូទាំងតំបន់អាស៊ីប៉ាស៊ីហ្វិកកំពុងធ្លាក់ចុះ ខណៈវីរុស Corona ដូចដែលទិន្នន័យថ្មីបានចេញផ្សាយកាលពីថ្ងៃ អង្គារបានបង្ហាញថា មនុស្សជាង១០០ នាក់បានស្លាប់នៅក្នុងប្រទេសចិន និងជាង៤,៥០០នាក់បានឆ្លងវីរុសនៅទូទាំងពិភពលោក។

សន្ទស្សន៍ក្រុមហ៊ុន Nikkei 225 និង Topix របស់ជប៉ុនបានធ្លាក់ចុះប្រហែលមួយភាគរយ ខណៈក្រុមហ៊ុនKospi របស់កូរ៉េខាងត្បូងធ្លាក់ចុះ៣ភាគរយ និងសន្ទស្សន៍ Straits Times របស់សិង្ហបុរីធ្លាក់ចុះ២,៨៥ ភាគរយ។ ក្រុមហ៊ុន S&P របស់អូស្រ្តាលីបានធ្លាក់ចុះ១,៤ភាគរយ។ ផ្សារហ៊ុននៅក្នុងប្រទេសចិនដីគោក និងហុងកុងត្រូវបានបិទ ដោ​យសារតែថ្ងៃឈប់សម្រាកបុណ្យចូលឆ្នាំចិន។

អ្នកវិភាគសេដ្ឋកិច្ចភ័យខ្លាចថា វីរុសដ៏គ្រោះថ្នាក់នេះ នឹងបន្ថយល្បឿនកំណើនសេដ្ឋ​កិច្ច បន្ទាប់ពីឆ្នាំ២០១៩ដ៏លំបាក និងពោរពេញទៅដោយសង្គ្រាមពាណិជ្ជកម្ម និងការធ្លាក់ចុះនៃកំណើនសេដ្ឋកិច្ចពិភពលោក។

អាជ្ញាធរកំពុងប្រយ័ត្នប្រយែង ដោយសារតែការភ្ជាប់វីរុសនេះ ទៅនឹងជំងឺSARS (រោគសញ្ញាផ្លូវដង្ហើមធ្ងន់ធ្ងរ) ដែលបានបំផ្លាញអាស៊ីនៅចន្លោះឆ្នាំ២០០២ និង២០០៣ ហើយបានសម្លាប់មនុស្ស៨០០នាក់ នៅចិនដីគោក ហុងកុង និងអាស៊ីអាគ្នេយ៍។

ក្រុមអ្នកជំនាញបានរកឃើញថា ផលប៉ះពាល់សេដ្ឋកិច្ច ដោយសារជំងឺរាតត្បាតមេរោគ កូរ៉ូណាក្នុងរយៈពេលពីរឆ្នាំនេះ គឺខ្ពស់រហូតដល់រាប់ពាន់លានដុល្លារ។

របាយការណ៍មួយ ដែលបានបង្ហាញដោយវិទ្យាស្ថានសិក្សាអាស៊ីអាគ្នេយ៍ ដែលមានមូលដ្ឋាននៅប្រទេសសឹង្ហបូរីបានលើកឡើងថា “ឧទាហរណ៍ កំណើនផលិតផលសរុបក្នុងស្រុកនៅក្នុងប្រទេសចិន ហាក់ដូចជាត្រូវបានកាត់បន្ថយ៣,១ភាគរយ នៅក្នុងត្រីមាសទី២ នៃឆ្នាំ២០០៣ នៅពេលដែលការផ្ទុះឡើងជំងឺ SARS ដល់កម្រិតកំពូល។

ការខាតបង់នៅហុងកុង ត្រូវបានប៉ាន់ប្រមាណថា មានចំនួនជិត៣,៧ពាន់លានដុល្លារ តិចជាងការខាតបង់របស់សឹង្ហបូរីជិត៥ពាន់លានដុល្លារអាមេរិក។

របាយការណ៍បានបន្ថែមទៀតថា “ការចំណាយបានពង្រីកដល់តំបន់អាស៊ីផងដែរដែលបង្ហាញពីផលប៉ះពាល់ច្រើន ជាង៤ពាន់លានដុល្លារអាមេរិក ទៅលើប្រទេសកាណាដាដែលបណ្តាលឱ្យបាត់បង់ការងារប្រមាណ២៨,០០០នាក់”។

វីរុសដូចជំងឺកូរ៉ូណានេះ បច្ចុប្បន្នមានប្រភពដើមនៅទីក្រុង Wuhan ភាគកណ្តាលប្រទេសចិន។

អង្គការសុខភាពពិភពលោក (WHO) បានចេញផ្សាយព័ត៌មាន នៅយប់ថ្ងៃច័ន្ទ ដោយបញ្ជាក់ថា ប្រភពវីរុសទំនងជាមកពីប្រភពសត្វ។

អង្គការសុខភាពពិភពលោក បានសរសេរលើបណ្តាញសង្គម Twitter ថា “ប្រភពវីរុសនេះ ដែលកើតចេញមកពីសត្វ ហាក់ដូចជាប្រភពចម្បងបំផុតនៃវីរុសកូរ៉ូណា ដែលផ្ទុះឡើងជាមួយនឹងការឆ្លងពីមនុស្សទៅមនុស្សដោយ កើតឡើងរវាងទំនាក់ទំនងជិតស្និទ្ធ”។

អង្គការសុខភាពពិភពលោក បានណែនាំដល់អ្នកដែលមានហានិភ័យ នៃការឆ្លងវីរុសកូរ៉ូណាត្រូវលាងដៃជាមួយសាប៊ូ និងទឹកបរិភោគ អាហារ និងស៊ុតដែលចម្អិនឱ្យបានឆ្អិនល្អ និងជៀសវាងការទាក់ទងជាមួយសត្វព្រៃ ឬសត្វចិញ្ចឹមក្នុងផ្ទះ៕

ដោយវុត្ថា

ភ្នំពេញៈ លោកស្រី Liurka Rodriguez Barrias ឯកអគ្គរដ្ឋទូតគុយបាថ្មីប្រចាំនៅកម្ពុជា បានសន្យាខិតខំប្រឹងប្រែងជំរុញ កិច្ចសហប្រតិបត្តិការឱ្យមានសភាពកាន់តែសកម្មបន្ថែមទៀត ជាពិសេសលើវិស័យសុខាភិបាល វិស័យអប់រំ វិស័យសេដ្ឋកិច្ច ពាណិជ្ជកម្ម និងវិស័យផ្សេងៗទៀតជាមួយប្រទេសកម្ពុជា។

លោកស្រី Liurka Rodriguez Barrias នៅក្នុងជំបជាមួយសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជានាថ្ងៃទី ២៨ ខែមករា ឆ្នាំ ២០២០នេះថា បេសកកម្មរបស់លោកស្រីមកកាន់ប្រទេសកម្ពុជានាពេលនេះ គឺធ្វើយ៉ាងណាដើម្បីពង្រីក និងពង្រឹងចំណ​ងមិត្តភាពទំនាក់ទំនង និងកិច្ចសហប្រតិបត្តិការរវាងកម្ពុជា និងគុយបាកាន់តែរឹងមាំបន្ថែមទៀត ដើម្បីទទួលបាននូវភាពជោគជ័យក្នុងការពង្រីក និងពង្រឹងកិច្ចសហប្រតិបត្តិការ ជាពិសេសទំនាក់ទំនងជាប្រវត្តិសាស្រ្តរវាងប្រទេសទាំងពីរ។

លោកស្រីថា “ទំនាក់ទំនងរវាងកម្ពុជា និងគុយបា ជាទំនាក់ទំនងជាប្រវត្តិសាស្រ្តជាមិត្តភាពជិតស្និទ្ធ ហើយជាទំនាក់ទំនាងមួយ ដែលមានអាយុកាលជាង៦០ឆ្នាំហើយនៅឆ្នាំនេះ”។

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានយល់ស្របទៅនឹងការលើកឡើងរបស់លោកស្រី ជាមួយនឹងការវាយតំលៃលើទំនាក់ទំនង រវាងប្រទេសទាំងពីរតាមរយៈ ជំរុញនូវកិច្ចសហប្រតិបត្តិការនូវវិស័យផ្សេងៗ ដែលប្រទេសទាំងពីរមានស្រាប់មកហើយ។

សម្ដេចតេជោក៏បានស្នើឱ្យធ្វើយ៉ាងណា ពិនិត្យលើកិច្ចព្រមព្រៀងដែលប្រទេសទាំងពីរបានចុះហត្ថលេខារួចហើយ ហើយជំរុញការអនុវត្តនេះ តាមកិច្ចព្រមព្រៀងទាំងនោះ ហើយនៅពេលនេះសូមពិនិត្យទៅលើអ្វីផ្សេងៗទៀត ដែលប្រទេសទាំងពីរអាចសហការគ្នាបាន៕

ដោយៈ រ៉ាណេត

ភ្នំពេញៈ លោកឧបនាយករដ្ឋមន្ត្រីជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ថ្មី បានអញ្ជើញជាអធិបតីដ៏ខ្ពង់ខ្ពស់ ក្នុងបើកសម្ពោធការដ្ឋានសាងសង់សំណង់អគារទីស្ដីការក្រសួងថ្មី។

អាគារទីស្តីការក្រសួងថ្មីនេះ ស្ថិតក្នុងសង្កាត់ឃ្មូញ ខណ្ឌសែនសុខ មានកម្ពស់៥ជាន់ ក្រោមការរចនាតាមបែបស្ថាបត្យកម្មខ្មែរ និងមានវិសាលភាពធំទូលាយជាងអគារទីស្ដីការក្រសួងចាស់ស្ថិតនៅបណ្តោយផ្លូវព្រះមុនីវង្សនាពេលបច្ចុប្បន្ន។

គំរោងសាងសង់អាគារទីស្តីការក្រសួងថ្មីនេះ គ្រោងចំណាយពេលសាងសង់យ៉ាងយូរត្រឹមរយៈពេល២ឆ្នាំ។

សំណង់អគារទីស្ដីការថ្មីមួយនេះមានកម្ពស់៥ជាន់ សាងសង់នៅលើផ្ទៃដីសរុបចំនួន៣ហិកតា ដោយមានទំហំផ្ទៃអគារប្រើប្រាស់ជិត៥ម៉ឺនម៉ែត្រការ៉េ។ គម្រោងអគារថ្មីនេះ ក៏ត្រូវបានបែងចែកចេញជា២ផ្នែកផងដែរ រវាងអគារទីស្តីការ និងអគារពិសោធន៍សំណង់ ដោយរួមបញ្ចូលនូវចំណែកនៃសាលសម្រាប់បណ្តុះបណ្តាលមន្ត្រីជាន់ក្រោម និងផ្នែកសម្រាប់ទុកដាក់ឯកសារផងដែរ។

អគារទីស្តីការក្រសួងថ្មីនេះនឹងបង្ហាញពីរចនាបថខ្មែរ និងត្រូវបានចាត់ទុកថា ជាផ្នែកមួយដ៏សំខាន់ ក្នុងការបង្ហាញអត្តសញ្ញាណខ្មែរ ដែលអាចមានលទ្ធភាពគ្រប់គ្រាន់ក្នុងកិច្ចជំនួបប្រជុំធំៗ ដែលមានចំនួនសមាជិកច្រើន ហើយថែមទាំងមានទីធ្លាសម្រាប់ទុក​ដាក់យានយន្តផងដែរ៕

ដោយ ប៊ី

ភ្នំពេញ៖ មជ្ឈមណ្ឌលគ្រប់គ្រង និងបង្ការជំងឺរបស់អង្គការសហប្រជាជាតិ (CDC) បានឱ្យដឹងថា អ្នកជំងឺដែលផ្ទុកវីរុស ប្រភេទ Coronavirus នេះ ត្រូវបានរាយការណ៍ថាមានជំងឺផ្លូវដង្ហើមដែលមានភាពធ្ងន់ធ្ងរដែលមានរោគសញ្ញារួមមាន គ្រុនក្តៅ ក្អក និងដង្ហើមខ្លី ឬពិបាកដកដង្ហើម។

ខណៈ CDC បាននិយាយថា ខ្លួនមិនទាន់ដឹងថាតើការឆ្លងមេរោគឆ្លងនេះងាយនឹងរាលដាលយ៉ាងដូចម្តេចទេដោយកត់សម្គាល់ថា វីរុសខ្លះឆ្លងរាលដាលជាងអ្នកដទៃ – អ្នកជំងឺជាច្រើននៅវ៉ូហានទំនងជាមានទំនាក់ទំនងជាមួយទីផ្សារសត្វ និងអាហារសមុទ្រ ហើយការឆ្លងរាលដាលក្រោយមក ត្រូវបានរីករាលដាលពីមនុស្សម្នាក់ទៅមនុស្សម្នាក់ក្នុងចំណោមអ្នកជំងឺដែលមិនទៅទីផ្សារទាំងនេះ។

CDC បានឱ្យដឹងនៅលើគេហទំព័រខ្លួណថា “នៅពេលការឆ្លងពីមនុស្សម្នាក់ទៅមនុស្សម្នាក់បានកើតឡើងជាមួយជំងឺ MERS និង SARS វាត្រូវបានគេគិតថា កើតឡើងតាមរយៈដំណក់ទឹកផ្លូវដង្ហើមដែលត្រូវបានផលិតនៅពេលមនុស្សឆ្លងក្អក ឬកណ្តាស់ ស្រដៀងទៅនឹងការរីករាលដាលនៃជំងឺផ្តាសាយ និងភ្នាក់ងារបង្កជំងឺដទៃទៀត។ ការរីករាលដាលនៃជំងឺ SARS និង MERS រវាងមនុស្សទូទៅបានកើតឡើងរវាងមនុស្សជិតស្និទ្ធ”។

ដូច្នោះហើយ ម៉ាសបានលក់អស់ដែលត្រូវបានគេរាយការណ៍ថាបានជំរុញឱ្យរោងចក្របើកទ្វារវិញនៅមុនថ្ងៃបុណ្យចូលឆ្នាំចិន។ លោក Cao Jun អគ្គនាយកក្រុមហ៊ុន Lanhine ដែលជាក្រុមហ៊ុនផលិតម៉ាសបាំងមុខនៅប្រទេសចិនបានប្រាប់សារព័ត៌មានរ៉យទ័រនៅសប្តាហ៍នេះថា តម្រូវការរបស់អតិថិជនបានកើនឡើងដល់ ២០០ លានម៉ាសក្នុងមួយថ្ងៃ ហើយកង្វះម៉ាសនៅទូទាំងប្រទេសគឺ “ធ្ងន់ធ្ងរជាងអ្វីដែលសាធារណជនបានដឹង”។

លោកបាននិយាយថា រោងចក្រប្រចាំថ្ងៃធម្មតាផលិតបានចំនួន ៤០០,០០០ ម៉ាស។

លោកបន្តថា “នៅពេលនេះ យើងមានមនុស្ស ២០ នាក់នៅក្នុងរោងចក្រធ្វើការ ២៤ ម៉ោងដើម្បីផលិតម៉ាស។ យើងកំពុងផ្តល់ប្រាក់ឈ្នួលដល់ពួកគេដល់ទៅបួនដងក្នុងមួយថ្ងៃ។ យើងមានបំណងបង្កើនទិន្នផលនៅថ្ងៃទី ២៧ ខែ មករា និងមានសមត្ថភាពពេញលេញនៅថ្ងៃទី ១ ខែកុម្ភៈនៅពេលដែលយើងមានកម្មករជិត ២០០ នាក់”។

អ្នកលក់រាយ Taobao -៣,៨៧% របស់ក្រុមហ៊ុន Alibaba បានលក់ម៉ាស ៨០ លាននៅថ្ងៃ ច័ន្ទ និងថ្ងៃ អង្គារ កន្លងមកនេះ និងបានព្រមានអ្នកលក់ប្រឆាំងនឹងការឡើងថ្លៃ បន្ទាប់ពីមានរបាយការណ៍ថា ប្រជាជនបិទរបាំងមុខដើម្បីប្រាក់ចំណេញ។

អ្នកនាំពាក្យអោយក្រុមហ៊ុន Honeywell HON -២.០៣% ដែលជាក្រុមហ៊ុនផលិតម៉ាសការពារមុខឈានមុខគេបានប្រាប់ MarketWatch ថា ក្រុមហ៊ុននេះកំពុងតែមានតម្រូវការកើនឡើង នៅអាមេរិកខាងជើងអឺរ៉ុប និងចិន។ លោកបានបដិសេធមិនបង្ហាញតួលេខលក់ជាក់លាក់ទេ។

អ្នកនាំពាក្យរូបនេះបាននិយាយថា “យើងកំពុងបង្កើនផលិតកម្មនៅតាមរោងចក្រជាច្រើននៅទូទាំងពិភពលោក ហើយយើងកំពុងបំពេញការបញ្ជាទិញបច្ចុប្បន្នទាំងអស់។ នៅក្នុងប្រទេសចិន ផលិតផលរបស់យើងអាចរកបានពី JD.com និង TMALL.com និងនៅអាមេរិក និងអឺរ៉ុបពួកគេអាចរកបាននៅអ្នកលក់រាយមួយចំនួនរួមទាំង Amazon ផងដែរ”។

អ្នកនាំពាក្យក្រុមហ៊ុនបានប្រាប់ MarketWatch ថា “ក្រុមហ៊ុន 3MMM កំពុងតែមានការកើនឡើងនូវតម្រូវការសំរាប់ផលិតផលការពារដង្ហើមក្នុងប្រទេសចិន បន្ទាប់ពីមានការផ្ទុះឡើងនៃមេរោគថ្មីនេះ។ លោកស្រីបានមានប្រសាសន៍ថា “ជាការឆ្លើយតបក្រុមហ៊ុន 3M កំពុងបង្កើនផលិតកម្មម៉ាស៊ីនដកដង្ហើមដើម្បីជួយបំពេញតម្រូវការ និងធ្វើការជាមួយអ្នកចែកចាយដើម្បីជួយធានាថាពួកគេមានស្តុកដើម្បីឆ្លើយតបនឹងអ្នកប្រើប្រាស់ចុងក្រោយ៕

ដោយឡែក នាយកដ្ឋានប្រយុទ្ធនឹងជំងឺឆ្លងរបស់កម្ពុជាក៏បានលើកឡើងពី កូរ៉ូណាវីរុសប្រភេទថ្មីនេះ
១. ឧស្សាហ៏លាងដៃ ដោយអាល់កុល ហ្សែល ឬសាប៊ូនិងទឹក
២. ពេលក្អក និងកណ្តាស ខ្ទប់មាត់និងច្រមុះ ដោយកែងដៃ ឬក្រដាស ឬកន្សែង ក្រមា និងលាងដៃ
៣. ជៀសវាងប៉ះពាល់ជាមួយបុគ្គលទាំងឡាយណាដែលមាន រោគសញ្ញាគ្រុនក្តៅ និងក្អក
៤. បេីអ្នកមានគ្រុនក្តៅ ក្អក និងពិបាកដកដង្ហេីម សូមរកការព្យាបាលឱ្យឆាប់ និងប្រាប់ពីប្រវត្តិនៃការធ្វើដំណើរដល់គ្រូពេទ្យ
៥. សូមកុំប៉ះពាល់សត្វរស់ និងផ្ទៃទាំងឡាយមានដាក់សត្វរស់
៦. សូមកុំបរិភោគសាច់ឆៅ និងស៊ុតឆៅ
៧. អនុវត្ត៏អនាម័យខ្ជាប់ខ្ជួន ក្នុងការសំលាប់សត្វចំអិនសាច់ និងដាក់ដោយឡែកអាហារឆៅ និងអាហារឆ្អិន។