ដោយវុត្ថា

ភ្នំពេញ៖ រដ្ឋាភិបាលតាមរយៈក្រសួងរ៉ែ និងថាមពល គ្រោងនឹងចាត់វិធានការលើសំណង់ស្ថានីយប្រេងនិងឧស្ម័នឥន្ធនៈដែលកំពុងសាងសង់ដោយគ្មានវិញ្ញាបនបត្របញ្ជាក់បច្ចេកទេសសុវត្ថិភាព នឹងប្រឈមមុខនឹងការពិន័យ ក្រោយថ្ងៃ ៦ ខែកុម្ភៈ ឆ្នាំ២០២០ខាងមុខនេះ ។ នេះ បើយោងតាមសេចក្តីជូនដំណឹងរបស់ក្រសួងរ៉ែ និងថាមពលដែលបានចេញផ្សាយនៅថ្ងៃទី ២៣ ខែមករា ឆ្នាំ ២០២០ នេះ ។

អនុលោមមាត្រា៦៦ នៃច្បាប់ស្តីពីការគ្រប់គ្រងប្រេងកាតនិងផលិតផលប្រេងកាត ចែងថា “បុគ្គលណាដែលធ្វើសកម្មភាពផ្នែកដោនស្រ្ទីមដោយគ្មានវិញ្ញាបនបត្របច្ចេកទេសសុវត្ថិភាពពីក្រសួងរ៉ែនិងថាមពល ដូចមានចែងក្នុងមាត្រា៤២ នៃច្បាប់នេះ មុននឹងចាប់ផ្តើមសាងសង់ហេដ្ឋារចនាសម្ព័ន្ធដើម្បីបម្រើសកម្មភាពដោនស្រ្ទីម ត្រូវផាកពិន័យជាប្រាក់ដូចខាងក្រោម៖
ក. ចំពោះហេដ្ឋារចនាសម្ព័ន្ធដែលមានតម្លៃក្រោម ៨០០ ០០០ ០០០ (ប្រាំបីរយលាន) រៀល ត្រូវផាកពិន័យជាប្រាក់ដោយក្រសួងរ៉ែនិងថាមពល ចំនួន ៤ ០០០ ០០០ (បួនលាន) រៀល និងត្រូវផ្អាកសកម្មភាពសាងសង់នានា។

ខ. ចំពោះហេដ្ឋារចនាសម្ព័ន្ធដែលមានតម្លៃចាប់ពី ៨០០ ០០០ ០០០ (ប្រាំបីរយលាន) រៀល ត្រូវផាកពិន័យជាប្រាក់ដោយក្រសួងរ៉ែនិងថាមពល ចំនួន ១០ ០០០ ០០០ (ដប់លាន) រៀល និងត្រូវផ្អាកសកម្មភាពសាងសង់នានា។
ក្នុងករណីនៅបន្តប្រព្រឹត្តអំពើល្មើសដដែល ត្រូវផាកពិន័យជាប្រាក់ដោយក្រសួងរ៉ែនិងថាមពល ចំនួនទ្វេដង។

ជាមួយគ្នានេះ ក្រសួងរ៉ែ និងថាពលបានអំពាវនាវដល់ម្ចាស់សំណង់ស្ថានីយប្រេងនិងឧស្ម័នឥន្ធនៈ ដែលកំពុងសាងសង់ដោយពុំទាន់មានវិញ្ញាបនបត្របញ្ជាក់បច្ចេកទេសសុវត្ថិភាពពីក្រសួង ត្រូវមកដាក់ពាក្យស្នើសុំវិញ្ញាបនបត្របញ្ជាក់បច្ចេកទេសសុវត្ថិភាពពីក្រសួងរ៉ែនិងថាមពល តាមរយៈមន្ទីររ៉ែនិងថាមពលរាជធានី-ខេត្តដែលស្ថានីយរបស់លោក លោកស្រីស្ថិតនៅ ចាប់ពីកាលបរិច្ឆេទនៃការទទួលសេចក្តីជូនដំណឹងនេះ រហូតដល់ថ្ងៃទី០៦ ខែកុម្ភៈ ឆ្នាំ២០២០៕

ដោយ ប៊ី

ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ នឹងរៀបចំវេទិកាសាធារណៈស្តីពី គ្រប់គ្រងម៉ាក្រូសេដ្ឋកិច្ច និងថវិកាឆ្នាំ ២០២០ នៅថ្ងៃទី ៣០ ខែមករា ឆ្នាំ២០២០ ខាងមុខនេះ ដើម្បីធ្វើការផ្សព្វផ្សាយឱ្យកាន់តែទូលំទូលាយដល់សាធារណជនទូទៅ បានស្វែងយល់លំអិត អំពីការគ្រប់គ្រងម៉ាក្រូសេដ្ឋកិច្ច និងថវិកាឆ្នាំ២០២០បន្ថែមទៀត ខណៈសេដ្ឋកិច្ចត្រូវបានរំពឹងថានឹងមានកំណើន ៧ ភាគរយនៅឆ្នាំ ២០២០។

វេទិកាសាធារណៈនេះត្រូវបានរំពឹងទុកថានឹងមានអ្នចូលរួមជាង ២០០០ នាក់ដោយមានការចូលរួមតំណាង ក្រសួងស្ថាប័នពាក់ព័ន្ធ ឧត្តមក្រុមប្រឹក្សាពិគ្រោះនិងផ្តល់យោបល់ ដៃគូអភិវឌ្ឍន៍ សង្គមស៊ីវិល ស្ថាប័នស្រាវជ្រាវ គ្រឹះស្ថានឧត្តមសិក្សា វិស័យឯកជន បណ្តាញសារព័ត៌មាន និងអ្នកសារព័ត៌មានជាតិ-អន្តរជាតិ ព្រមទាំងអ្នកសិក្សាស្រាវជ្រាវ និស្សិត និងយុវជន និងគ្រោងនឹងប្រព្រឹត្តទៅក្រោមអធិបតីភាពរបស់លោក វង្សី វិស្សុត រដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុ។

របាយការណ៍របស់ធនគារជាតិនៃកម្ពុជា បានឱ្យដឹងថា កំណើនសេដ្ឋកិច្ចសម្រាប់ឆ្នាំ២០២០ ត្រូវបានរំពឹងថាអាចសម្រេចបានក្នុងរង្វង់ ៧% ជាមួយនឹងកម្រិតអតិផរណាប្រមាណ ២,៣%។

ការរំពឹងទុកនេះ ផ្អែកលើការព្យាករពីការងើបឡើងវិញនៃសេដ្ឋកិច្ចពិភពលោក ដែលនឹងរួមចំណែកផ្តល់ភាពអំណោយផលដល់ការនាំចេញវិនិយោគបរទេស និងវិស័យទេសចរណ៍កម្ពុជា ស្របពេលដែលសេដ្ឋកិច្ចទទួលបានលទ្ធផលជាលំដាប់ពីការធ្វើពិពិធកម្មមូលដ្ឋានកំណើន និងការកែទម្រង់ស៊ីជម្រៅសម្រាប់គាំទ្រដល់ការរីកចម្រើននៃសេដ្ឋកិច្ចប្រកបដោយចីរភាព។

ការនាំចេញរំពឹងថានឹងបន្តមានកំណើនក្នុងអត្រាខ្ពស់ ពិសេសការនាំចេញទំនិញសម្រាប់ធ្វើដំណើរ ទំនិញកម្មន្តសាលផ្សេងៗ ទោះបីជាកំណើនការនាំចេញ សម្លៀកបំពាក់អាចថមថយល្បឿនក៏ដោយ។

ទោះបីជាសហភាពអឺរ៉ុបនឹងអាចសម្រេចដក EBA ពីកម្ពុជា នៅខែកុម្ភៈ ឆ្នាំ២០២០ ក៏ដោយ ការនាំចេញសម្លៀកបំពាក់របស់កម្ពុជានៅតែរំពឹងថាបន្តមានកំណើន ដោយសារយន្តការនៃការដក EBA ពេញលេញនឹងត្រូវអនុវត្តនៅ ៦ខែ ក្រោយពីការសម្រេច កម្ពុជានៅតែអាចនាំចេញទៅសហភាពអឺរ៉ុបបាន ទោះបីជា EBA ត្រូវបានដក ក៏ដោយ ពីព្រោះការបាត់បង់ EBA គ្រាន់តែ អាចបង្កើនថ្លៃ ទំនិញនាំចេញរបស់កម្ពុជាទៅសហភាពអឺរ៉ុប ដោយសារការដាក់ពន្ធក្នុងរង្វង់ ០,១% ទៅ ១២,៥% ទៅតាមប្រភេទទំនិញ។

ប៉ុន្តែប្រសិនបើតម្រូវការរបស់សហភាពអឺរ៉ុបមកលើទំនិញនាំចេញពីកម្ពុជានៅតែមាន នោះការនាំចេញរបស់កម្ពុជាទៅសហភាពអឺរ៉ុប ក៏នៅតែមានកំណើន ផងដែរ ជាពិសេសក្រោយពីការចាកចេញរបស់អង់គ្លេសពីសហភាពអឺរ៉ុប ដោយសារទំនិញកម្ពុជានាំចេញទៅអង់គ្លេសមានចំនួន ២០% នៃការនាំចេញទៅសហភាពអឺរ៉ុប។

កំណើនប្រាក់ឈ្នួលអប្បបរមានៅកម្ពុជា មិនទាន់មានផលប៉ះពាល់ទៅលើការប្រកួតប្រជែងរបស់កម្ពុជានោះទេ ដោយសារការបង្កើនមានលក្ខណៈសន្សឹមៗ ស្របពេលដែលផលិតភាពក៏បានកើនឡើងផងដែរ និងរាជរដ្ឋាភិបាលបានដាក់ចេញនូវវិធានការ ជាបន្តបន្ទាប់ ដើម្បីកាត់បន្ថយថ្លៃដើមផលិតកម្ម, អភិវឌ្ឍសហគ្រាសធុនតូចនិងមធ្យម, និងសម្រួលការធ្វើពាណិជ្ជកម្ម ព្រមទាំងបានអនុវត្តការកែទម្រង់ចាំបាច់នានា សំដៅបង្កើតបរិយាកាសកាន់តែអំណោយផលដល់ការវិនិយោគ ជំរុញផលិតកម្មក្នុងស្រុក និងលើកកម្ពស់ការធ្វើពិពិធកម្មផលិតផល និងទីផ្សារនាំចេញជាដើម។

កំណើនសេដ្ឋកិច្ចកម្ពុជាក៏នឹងត្រូវគាំទ្រដោយលំហូរវិនិយោគផ្ទាល់បរទេសដែលរំពឹងថាបន្តមានកំណើនរឹងមាំ ជាមួយនឹងការបង្កើនការវិនិយោគ នៃប្រទេសក្នុងតំបន់ ដែលអំណោយផលដោយសក្តានុពលនៃសេដ្ឋកិច្ចកម្ពុជា និងការបង្វែរទិសដៅវិនិយោគមកតំបន់អាស៊ីរួមមានកម្ពុជា ផងដែរ៕

ដោយ ប៊ី

ភ្នំពេញ៖ ការវិនិយោគលើគម្រោងហេដ្ឋារចនាសម្ព័ន្ធធំៗគឺជាយុទ្ធសាស្ត្រសំខាន់មួយរបស់ប្រទេសកម្ពុជាដើម្បីជំរុញកំណើនសេដ្ឋកិច្ច ស្របពេលការខិតខំរបស់រដ្ឋាភិបាលក្នុងការកែលំអហេដ្ឋារចនាសម្ព័ន្ធរបស់ប្រទេសដើម្បីទ្រទ្រង់កំណើនក្នុងវិស័យផលិតកម្ម និងពង្រីកឧបករណ៍ប្រើប្រាស់ក្រុងនឹងរួមចំណែកដល់កំណើនចំណាយក្នុងវិស័យសំណង់។

ការកើនឡើងនូវកម្រិតប្រាក់ចំណូលផ្ទាល់ខ្លួន កំណើនគ្រួសារ និងការធ្វើចំណាកស្រុករបស់ប្រជាជនពីតំបន់ជនបទមកតំបន់ទីក្រុងនឹងជួយបង្កើនតម្រូវការកន្លែងសាងសង់ល្អ និងការអភិវឌ្ឍន៍ហេដ្ឋារចនាសម្ព័ន្ធ ផ្លូវ ថ្នល់ល្អប្រសើរជាងនៅក្នុងប្រទេស។

ការបង្កើនការវិនិយោគសាធារណៈទៅក្នុងវិស័យសំណង់ពាណិជ្ជកម្មនៅកម្ពុជានឹងក្លាយជាឱកាសទីផ្សារដ៏សំខាន់សម្រាប់ក្រុមហ៊ុនដែលប្រតិបត្តិការនៅក្នុងវិស័យសំណង់ និងហេដ្ឋារចនាសម្ព័ន្ធ។ វត្តមានរបស់អ្នកប្រើប្រាស់ដ៏ច្រើនកំពុងបណ្តាលឱ្យមានលំហូរវិនិយោគផ្ទាល់ពីបរទេស (វិនិយោគផ្ទាល់ពីបរទេស) ចូលមកក្នុងប្រទេសនេះ។ លើសពីនេះទៅទៀត ការបង្កើនការវិនិយោគលើវិស័យអចលនទ្រព្យ និងហេដ្ឋារចនាសម្ព័ន្ធនាំឱ្យមានការរីកចម្រើននៃសកម្មភាពសំណង់។

របាយការណ៍នៃការស្រាវជ្រាវទីផ្សារសំណង់ និងហេដ្ឋារចនាសម្ព័ន្ធឆ្នាំ ២០១៩ បញ្ជាក់ថា ការប្រកួតប្រជែងនៅតែបន្តកាន់តែខ្លាំងពីមួយឆ្នាំទៅមួយឆ្នាំជាមួយនឹងការដាក់ពាក្យសុំសាងសង់មានការកើនឡើង។ របាយការណ៍ LNGAnalysis នេះនិយាយអំពីសេណារីយ៉ូឆ្នាំ ២០១៩ និងចក្ខុវិស័យកំណើននៃទីផ្សារសំណង់ និងហេដ្ឋារចនាសម្ព័ន្ធកម្ពុជាសម្រាប់ឆ្នាំ ២០២០-២០២៦ ។ ដើម្បីគណនាទំហំទីផ្សារ ប្រាក់ចំណូលពី ការលក់ទីផ្សារនៃសំភារៈសំណង់ និងហេដ្ឋារចនាសម្ព័ន្ធដល់អ្នកលក់រាយ អ្នកលក់ដុំ និងអ្នកទិញស្ថាប័នត្រូវបានយកពិចារណា។

ទីផ្សារសំណង់និងហេដ្ឋារចនាសម្ព័ន្ធសកលកំពុងត្រៀមខ្លួនកើនឡើងយ៉ាងខ្លាំងក្នុងរយៈពេលនៃការព្យាករណ៍ ២០២០-២០២៦ ។ និន្នាការដែលកំពុងបន្តឆ្ពោះទៅរកទំនើបភាវូបនីយកម្មសំណង់ និងហេដ្ឋារចនាសម្ព័ន្ធតាមរយៈគម្រោងកែលម្អសំណង់អគារថ្មី និងគម្រោងស៊ីវិលកំពុងគាំទ្រដល់ប្រទេសកម្ពុជាក្នុងការពង្រឹងទំហំសំណង់ និងហេដ្ឋារចនាសម្ព័ន្ធ។

របាយការណ៍បង្ហាញពីការវិភាគដ៏ទូលំទូលាយនៃសកម្មភាពសំណង់ និងហេដ្ឋារចនាសម្ព័ន្ធនៅកម្ពុជា។ និន្នាការសំខាន់ៗ និងការយល់ដឹងទូលំទូលាយអំពីទីផ្សារសំណង់ និងហេដ្ឋារចនាសម្ព័ន្ធនៅកម្ពុជា រួមជាមួយកត្តាជំរុញគន្លឹះការរឹតត្បិត និងឱកាសរីកចម្រើនត្រូវបានបង្ហាញនៅក្នុងរបាយការណ៍។

ទីផ្សារសំណង់ និងហេដ្ឋារចនាសម្ព័ន្ធនៅប្រទេសកម្ពុជាត្រូវបានប្រៀបធៀបទៅនឹងទីផ្សារប្រកួតប្រជែងចំនួន ៥ របស់ខ្លួននៅក្នុងតំបន់ដើម្បីវិភាគតួនាទីរបស់ប្រទេសកម្ពុជានៅលើតំបន់ និងគោលនៃប្រតិបត្តិការរបស់ខ្លួន៕

ដោយវុត្ថា

បាត់ដំបង៖ ស្ពានស្ទឹងសង្កែ ដែលជាគម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ ភាគខាងជើង (បាត់ដំបង-សិរីសោភ័ណ្ឌ) ត្រូវបានធ្វើពិធីតភ្ជាប់ជាផ្លូវការ ក្រោមអធិបតីភាព លោក ងួន រតនៈ អភិបាល នៃគណៈអភិបាលខេត្ត និងប្រធាននាយកដ្ឋានផ្លូវថ្នល់ និងប្រធានគម្រោងផ្លូវជាតិលេខ៥ និងអ្នកពាក់ព័ន្ធជាច្រើននាក់ទៀត។

លោក ងួន រតនៈ អភិបាល នៃគណៈអភិបាលខេត្ត និងប្រធាននាយកដ្ឋានផ្លូវថ្នល់ និងប្រធានគម្រោងផ្លូវជាតិលេខ៥ ពិធីតភ្ជាប់កាលពីថ្ងៃទី២២ ខែមករា ឆ្នាំ២០២០ម្សិលមិញនេះ ឱ្យដឹងថា ស្ពានតភ្ជាប់ស្ទឹងសង្កែ មានប្រវែង ១៥៧ ម៉ែត្រ ជាស្ពានភ្លេះ មានចំនួន ២ ស្ពាន ដោយស្ពាននីមួយៗ មានទទឹង ប្រមាណជិត ១១ ម៉ែត្រ ដែលជាគម្រោងកំណាត់ផ្លូវជាតិលេខ៥ ។

កំណាត់ផ្លូវជាតិលេខ៥ ភាគខាងជើង (បាត់ដំបង-សិរីសោភ័ណ្ឌ) ដែលមានប្រវែង ៨៦,៧ គីឡូម៉ែត្រ ។ បើតាមការឱ្យដឹងពីក្រសាធារណៈការ និងដឹកជញ្ជូនកាលពីឆ្នាំ ២០១៩ កន្លងមក គម្រោងធ្វើឲ្យប្រសើរឡើងវិញកំណាត់ផ្លូវជាតិលេខ៥ ភាគខាងជើង (បាត់ដំបង-សិរីសោភ័ណ្ឌ) សម្រេចបានច្រើនហើយ។

គម្រោងនេះ ទទួលបានឥណទានសម្បទានពីរដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិជប៉ុនប្រចាំកម្ពុជា (JICA) នូវទឹកប្រាក់១៩,២០៨លានយេន ស្មើនឹង១៦១.៩០លានដុល្លារ។ បើតាមផែនការគម្រោងនេះ ប្រើរយៈពេល ៣៦ខែ ចាប់ផ្ដើមសាងសង់ពីខែកុម្ភៈ ឆ្នាំ២០១៧ និងគ្រោងបញ្ចប់នៅខែមីនា ឆ្នាំ២០២០៕

ដោយវុត្ថា

ភ្នំពេញៈ អ្នកនាំពាក្យក្រសួងសាធារណៈការ និងដឹកជញ្ជូនបានឱ្យដឹងថា ក្រសួងបាននឹងកំពុងរៀបចំលិខិតស្នើរគោលការណ៍ អនុញ្ញាត្តិពីប្រមុខរាជរដ្ឋាភិបាល សម្តេចតេជោហ៊ុន សែន ក្នុងការកំណត់ពេលវេលា បើកការរដ្ឋានពង្រីកផ្លូវជាតិលេខ២នាពេលខាងមុខនេះ។

លោកវ៉ាស៊ីម សូរិយា អ្នកនាំពាក្យក្រសួងសាធារណៈការ និងដឹកជញ្ជូនបានប្រាប់គេហទំពរ propertyarea.asia នៅថ្ងៃទី២២ ខែមករា ឆ្នាំ ២០២០កន្លងមកថា ក្រសួងកំពុងរៀបចំលិខិ ស្នើសុំគោលការណ៍ពីសម្តេចតេជោ ដើម្បីកំណត់ថ្ងៃបើករដ្ឋានផ្លូវជាតិលេខ២ និងបើកឱ្យដំណើរផ្លូវជាតិលេខ២១ព្រមជាមួយគ្នា។

លោកបន្តថា “ក្រសួងនឹងជូនដំណឹង នៅពេលវេលាជាក់លាក់បន្ថែមទៀតជុំវិញការបើកការដ្ឋានផ្លូវជាតិលេខ២នេះ បន្ទាប់ពីក្រសួងទទួលបានការអនុញ្ញាត ពីសម្តេចតេ​ជោ ហ៊ុនសែន”។

លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន ធ្លាប់បានឱ្យដឹងកន្លងមកនេះថា ផ្លូវជាតិលេខ២ នឹងចាប់ផ្តើមបើកការដ្ឋានស្ថាបនានៅក្នុងឆ្នាំ២០២០ខាងមុខនេះ ខណៈគ្រឿងចក្របានដឹកមកដល់ប្រទេសកម្ពុជារួចហើយ ហើយថវិកាក៏មានគ្រប់គ្រាន់ ដោយត្រៀមពេលវេលាសមស្រប ស្នើសុំសម្តេចតេជោហ៊ុន សែន រកពេលវេលាអញ្ជើញបើកការដ្ឋានជាផ្លូវការ។

លោកទេសរដ្ឋមន្ត្រីបញ្ជាក់ថា “ស្របជាមួយគ្នានេះ ក៏នឹងរៀបចំបើកសម្ពោធឱ្យដំណើរជាផ្លូវការនូវផ្លូវជាតិលេខ២១ ពីក្រុងតាខ្មៅទៅស្រុកកោះធំ ហើយជាមួយគ្នានោះនឹងបើករដ្ឋានស្ថាបនាផ្លូវជាតិលេខ២ និង ផ្លូវជាតិលេខ២២ នៅឆ្នាំ២០២០នេះផងដែរ” ។

ការស្ថាបនាឡើងវិញនូវផ្លូវជាតិលេខ២ ដោយរាប់ចាប់ពីតាខ្មៅ ដល់អូរចំបក់ និងផ្លូវជាតិលេខ២២ ពីអូរចំបក់ដល់ទីប្រជុំជនអង្គតាសោម គឺស្ថិតក្រោមគម្រោងឥណទានសម្បទានចំនួន៤៥លានដុល្លារអាមេរិក ដែលជាហិរញ្ញប្បទានសប្បទានពីរដ្ឋាភិបាលកូរ៉េ ។

គម្រោងផ្លូវជាតិលេខ២ មានប្រវែង៦៦គីឡូម៉ែត្រ ដោយក្នុងនោះចាប់ពីរង្វង់មូលតាខ្មៅ រហូតដល់រង្វង់មូលអូរចំបក់មានប្រវែង៥៧គីឡូម៉ែត្រ និង៩គីឡូម៉ែត្រនៅលើផ្លូវជាតិលេខ២២គ្រោងក្រាលកៅស៊ូAC សង់ស្ពានថ្មី និងពង្រីកទទឹងផ្លូវឲ្យបាន១៣ម៉ែត្រ តាមទំហំចរាចរណ៍ និងតាមដំណាក់កាល។

រីឯចាប់ពីរង្វង់មូលគួរស្រូវ ទៅទិសខាងត្បូងប្រវែង៨គីឡូម៉ែត្រ គ្រោងនឹងសាងសង់ជា៤គន្លង៕