ខេត្តមណ្ឌលគីរីប្រែក្លាយពីសមរភូមិប្រយុទ្ធមកជាតំបន់សក្តានុពលអភិវឌ្ឍន៍នាភូមិភាគឦសាន្ត

ដោយ វុត្ថា

ភ្នំពេញ: ខេត្តមណ្ឌលគីរីបានប្រែក្លាយពីសមរភូមិប្រយុទ្ធ មកជាតំបន់អភិវឌ្ឍន៍លើគ្រប់វិស័យ ដោយបានធ្វើឲ្យប្រជាពលរដ្ឋកាន់តែមានជីវភាពស៊ីវីល័យ។

អភិបាលនៃគណៈអភិបាលខេត្តមណ្ឌលគិរី លោកស្វាយ សំអ៊ាង បានមានប្រសាសន៍ឱ្យដឹងកាលពីពេលថ្មីៗនេះថា ក្រោមមហាជ័យជំនះ៧មករា ១៩៧៩ ខេត្តមណ្ឌលគិរី ក៏ដូចជាបណ្តារាជធានីខេត្តដ៏ទៃទៀត បានក្លាយជាតំបន់អភិវឌ្ឍន៍គួរជាទីមោទនៈរបស់កម្ពុជា ដែលមានការអភិវឌ្ឈលើហេដ្ឋារចនាសម្ព័ន្ធជាច្រើន ដូចជា ផ្លូវថ្នល់ ស្ពាន សាលារៀន មន្ទីរពេទ្យជាពិសេសបាន អភិវឌ្ឍន៍វិស័យធំៗបីមានដូចជា វិស័យកសិកម្ម វិស័យទេសចរណ៍ និងវិស័យរ៉ែដែលកំពុងដើរតួយ៉ាងសំខាន់ សម្រាប់ជួយលើកកម្ពស់កំណើនសេដ្ឋកិច្ចជាតិ និងជួយបង្កើនជីវភាពប្រជាពលរដ្ឋផងដែរ។

លោកបញ្ជាក់ថា “ការរក្សាបានសុខសន្តិភាព ដែលបានមកពីការខិតខំប្រឹងប្រែង របស់សម្តេចតេជោហ៊ុន សែន នាយករដ្ឋមន្ត្រីកម្ពុជា គឺបានផ្តល់ឱកាសដល់រាជរដ្ឋាភិបាលក្នុងកសាងជាតិ ហើយប្រជាពលរដ្ឋរស់នៅ ដោយភាពសម្បូរសប្បាយនៅទូទំាង ប្រទេស”។

លោកអភិបាលខេត្តបានបន្តថា មណ្ឌលគិរីមានការអភិវឌ្ឍ ដោយកសាងបាននូវហេដ្ឋារចនាសម្ព័ន្ធតាំងពីឆ្នាំ២០០០ រហូតមកដល់បច្ចុប្បន្ននេះ មានផ្លូវទៅព្រំដែនមានស្ពាន មានទំនប់ មានប្រឡាយ ជាពិសេសពាក់ព័ន្ធនឹងផ្លូវលំតភ្ជាប់ទៅបណ្ដាស្រុក និងបណ្ដាឃុំនានា បានធ្វើការកសាងអភិវឌ្ឍន៍បានរយៈពេលជាង២០ឆ្នាំ ក្រោយយើងមានសុខភាពសុខសន្តិភាពពេញលេញក្នុងប្រទេស។

លោកបន្តថា “នេះគឺជាសមិទ្ធផលមួយដែលរាជរដ្ឋាភិបាល ដែលបានខិតខំប្រឹងប្រែងហើយប្រជាពលរដ្ឋ មានការរីករាយនឹងទទួលយកនូវសមិទ្ធផលនេះ”។

ក្រោយពេលដែលខេត្តមណ្ឌលគីរី ប្រែក្លាយពីសមរភូមិប្រយុទ្ធមកជាតំបន់អភិវឌ្ឍន៍លើគ្រប់វិស័យនេះ បានធ្វើអោយខេត្តនេះ ក្លាយជាតំបន់គោលដៅទេសចរណ៍ប្រកបដោយភាពទាក់ទាញបំផុតក្នុងតំបន់ភូមិភាគឦសាន្ត ដោយមានទេសភាពធម្មជាតិយ៉ាងស្រស់ ស្អាត ជាមួយនឹងផ្លូវគមនាគមន៍ដ៏ល្អឆ្ពោះទៅដល់ខេត្តនេះ។

ខេត្តមណ្ឌលគិរី មានព្រំប្រទល់ខាងជើងជាប់នឹងខេត្តស្ទឹងត្រែង និងខេត្តរតនគិរី ខាងកើតនិងខាងត្បូង ជាប់នឹងសាធារណរដ្ឋសង្គមនិយមវៀតណាម និងខាងលិចជាប់នឹងខេត្តក្រចេះ។

ខេត្តមណ្ឌលគិរី មានចម្ងាយ ៣៨០គីឡូម៉ែត្រ ពីរាជធានីភ្នំពេញ តាមផ្លូវជាតិលេខ៦, ៨ និង៧ កាត់ខេត្តកណ្តាល ខេត្តព្រៃវែង ខេត្តត្បូងឃ្មុំ និងខេត្តក្រចេះ។

ខេត្តមណ្ឌលគិរី មានផ្ទៃដី១៤.២៨៨គីឡូម៉ែត្រការេ ជាប់លំដាប់ទីមួយបណ្តាផ្ទៃដីនៃរាជធានីខេត្តទាំង២៥។ មណ្ឌលគិរី មានក្រុងសែនមនោរម្យ និងស្រុកចំនួនបួន។

ខេត្តមណ្ឌលគិរី ជាតំបន់ទេសចរណ៍ធម្មជាតិដ៏ស្រស់ត្រកាលមួយ។ ខេត្តនេះ ល្បីខាងរសជាតិឆ្ងាញ់ នៃផ្លែអាវូកាដូ និងកាហ្វេ។

មនុស្សម្នា និងទេសចរជាច្រើន ពិតជាចាប់ចិត្តក្រៃលែងនឹងមរតកធម្មជាតិដ៏បវរ សមដូចពាក្យពេចន៍ចុងចួននៃចម្រៀងដ៏ល្បីដូចជា «ទឹកជ្រោះប៊ូស្រា» ដែលបកស្រាយដោយលោក តូច តេង និងអ្នកស្រី ម៉ៅ សារ៉េត, «ជ្រោះពេជ្រចិន្តា” សំនៀងបុប្ផាព្រៃភ្នំ និងសម្ផស្សបុប្ផាព្រៃភ្នំ» ដែលបកស្រាយដោយអ្នកស្រី រស់ សិរីសុទ្ធា និង «បុប្ផាកោះញែក» ដែលបកស្រាយដោយលោក តូច តេង៕

អ្នកជំនាញអះអាងថា តំបន់ភាគខាងត្បូងឈៀងខាងលិចនៃក្រុងភ្នំពេញនឹងមានការរីកចម្រើនខ្លាំងនាឆ្នាំ២០២០

ដោយៈ រ៉ាណេត

ភ្នំពេញៈ ក្រុមអ្នកជំនាញបាននិយាយថា តំបន់ភាគខាងត្បូងឈៀងខាងលិចនៃរាជធានីភ្នំពេញ ដែលភាគច្រើនស្ថិតនៅក្នុងខណ្ឌដង្កោ នឹងមានភាពរីកចម្រើនខ្លាំង ពិសេសវិស័យលំនៅដ្ឋានសំរាប់ឆ្នាំ២០២០ ដែលទើបមកដល់នេះ។

ប្រធានសមាគមអ្នកជំនាញអចលនវត្ថុកម្ពុជា លោកស្រីចេវ សុឃុន ដែលទើបតែឡើងកាន់តំណែងកាលពីពេលកន្លងទៅថ្មីៗនេះ បានមានប្រសាសន៍ប្រាប់តាមប្រព័ន្ធសារអេឡិចត្រូនិកថា នៅក្នុងឆ្នាំ២០២០នេះ តំបន់ដែលមានភាពទាក់ទាញក្នុងការវិនិយោគ និងអភិវឌ្ឍន៍លើវិស័យលំនៅដ្ឋានខ្លាំងជាងគេ គឺនៅតែស្ថិតនៅប៉ែកខាងត្បូងរាជធានីភ្នំពេញដដែល។

លោកស្រីបន្តទៀតថា “តាមការយល់ឃើញរបស់ខ្ញុំតំបន់ ដែលមានសក្ដានុពលក្នុងក្នុងវិនិយោគ គឺនៅតែស្ថិតនៅប៉ែកខាងត្បូង រាជធានីភ្នំពេញដដែល ដែលវានៅមិនទាន់មានអ្វីប្រែប្រួលខុសប្លែកកាលពីឆ្នាំចាស់២០១៩នៅឡយនោះទេ”។ លោកស្រីបានបញ្ជាក់ទៀតថា “ជាក់ស្ដែងគម្រោងវិនិយោគ និងអភិវឌ្ឍន៍ធំៗមួយចំនួនកំពុងតែផ្តោតទៅកាន់តំបន់មួយនេះ ដោយសារតែតំបន់នេះ ភាពល្អប្រសើរអំណោយផលដល់ការវិនិយោគ ជាពិសេសស្ថិតនៅក្បែរគម្រោងធំៗបាននិងកំពុងចាប់ផ្តើមនៅតំបន់នេះ”។

គម្រោងផ្សារទំនើប AEON3 គម្រោងផ្សារទំនើបជីពម៉ុង គម្រោងផ្សារទំនើបរបស់ក្រុមហ៊ុនប៉េងហួត រួមជាមួយនឹងគម្រោងសាងសង់មជ្ឈមណ្ឌលពាណិជ្ជកម្ម លំដាប់អន្តរជាតិមួយចំនួនទៀតបាននិងកំពុងចាប់ផ្តើម និងត្រៀមនឹងចាប់ផ្តើមសាងសង់នាពេលខាងមុខនេះ។

លោកស្រីចេវ សុឃុនបានបន្តថា “អាស្រ័យដោយគម្រោងវិនិយោគធំជាច្រើនបាន និងកំពុងបាញ់ឆ្ពោះទៅតំបន់នេះ គាប់ជូននឹងវិស័យលំនៅដ្ឋាន ហាក់នៅមានកម្រិតនៅឡើយនោះ វានឹងអំណោយផលដល់វិស័យមួយនេះបន្ថែមទៀត ដែលកាន់តែផ្តល់ឱកាសដល់ការវិនិយោគ និងអភិវឌ្ឍលើវិស័យលំនៅដ្ឋានផងដែរ ហើយមិនយូរមិនឆាប់វានឹងប្រែក្លាយទៅជាទីក្រុងថ្មីមួយទៀត”។

នាយកក្រុមហ៊ុនអចលនទ្រព្យ Easy Property Investment Co,.Ltd លោកម៉ម សិរីបញ្ញាបានមានប្រសាសន៍ថា សម្រាប់តំបន់ភាគខាងត្បូងរាជធានីភ្នំពេញ ក្រៅពីមានទំនោរទៅលើទីផ្សារលំនៅដ្ឋាន នៅក្នុងតំបន់នេះ ក៏មានសួនឧស្សាហកម្មមួយចំនួនផងដែរ រហូតត្រូវបានគេចាត់ទុកថា ជាតំបន់មានការអភិវឌ្ឍចម្រុះ។

ម្យ៉ាងទៀត ចំពោះទិសដៅនៃការអភិវឌ្ឍន៍នាពេលអនាគត វានឹងឆ្ពោះទៅរកតំបន់ជាយក្រុង ដែលស្ថិតនៅជុំវិញរាជធានីភ្នំពេញ ចម្ងាយប្រមាណ៣០គីឡូម៉ែត្រ ព្រោះបច្ចុប្បន្ន តំបន់កណ្ដាលក្រុងភ្នំពេញស្ទើរតែអស់ដី ក្នុងការអភិវឌ្ឍគម្រោងលំនៅដ្ឋានទៅហើយ ដែលធ្វើឱ្យអចលនវត្ថុកាន់តែមានតម្លៃខ្ពស់។

លោកម៉ម សិរីបញ្ញាបានបញ្ជាក់ទៀតថា “អ្វីដែលធ្វើឱ្យខណ្ឌដង្កោ ដែលស្ថិតតំបន់ភាគខាងត្បូងនៃរាជធានីភ្នំពេញមានសក្ដានុពល ក៏ព្រោះតែតំបន់នេះមានប្រព័ន្ធទឹក ភ្លើង និងមានហេដ្ឋារចនាសម្ពន្ធខ្វាត់ខ្វែង ដែលអាចតភ្ជាប់ពីរាជធានីភ្នំពេញទៅតំបន់នេះ ងាយស្រួលក្នុងការធ្វើចរាចរណ៍ អាចកាត់បន្ថយការកកស្ទះបានយ៉ាងប្រសើរផងដែរ”។

អគ្គនាយកក្រុមហ៊ុន ខ្មែរ Khmer Foundation Appraisal លោកឧកញ៉ា នួន រិទ្ធី បានយល់ស្របទៅនឹងការលើកឡើងខាងលើនេះថា ដង្កោ ជាខណ្ឌងាយស្រួលក្នុងការអភិវឌ្ឍ ព្រោះខណ្ឌនេះមានសណ្ឋានដី និងអំណោយផលល្អច្រើន ម្យ៉ាងទៀតវាក៏មានទីតាំងស្ថិតនៅជិតទីប្រជុំជននៃរាជធានីភ្នំពេញ ដែលជាបណ្តុំនៃមណ្ឌលពាណិជ្ជ ហើយវាក៏មានងាយស្រួលក្នុងការពង្រីកខ្លួន ទៅដល់ស្រុកកណ្ដាលស្ទឹង ដែលឃុំមួយចំនួនស្ថិតក្នុងស្រុកមួយនេះ ត្រូវបានកាត់ចូលមកក្នុងខណ្ឌដង្កោ។

លោកបានបន្តទៀតថា “ហេតុផលមួយទៀតដែលធ្វើឱ្យមនុស្សជាច្រើន ក៏ដូចជាបណ្តាអ្នកធ្វើជំនួញ លើវិស័យអចលនទ្រព្យមានទំនោរវិនិយោគក្នុងខណ្ឌដង្កោ ជាពិសេសនៅប៉ែកខាងត្បូងតែម្ដង ក៏ព្រោះវាមានភាពល្អប្រសើរជាច្រើនដូចជា ស្ថិតនៅក្បែរផ្លូវ៦០ម៉ែត្រ ដែលបែងចែកទៅកាន់ផ្លូវជាតិលេខ២ និងផ្លូវជាតិលេខ៣ មានមជ្ឈមណ្ឌលពាណិជ្ជកម្មជាច្រើននៅតំបន់នេះ។

អ្នកវិនិយោគនៅតំបន់នេះផ្ទាល់បានសម្តែងសុទិដ្ឋិនិយមផងដែរ ទាក់ទងនឹងតំបន់នេះនាពេលអនាគត។

លោក ហេង ពិសិដ្ឋ នាយកប្រតិបត្តិគម្រោងបុរីលំនៅដ្ឋាន GALAXY 11 ដែលស្ថិតនៅក្នុងតំបន់ភាគខាងត្បូងនៃរាជធានីភ្នំពេញ និងកំពុងតែសម្រុកដំណើរការសាងសង់ និងគ្រោងបញ្ចប់ក្នុងពេលឆាប់ៗខាងមុខនេះ បានទទួលស្គាល់ថា នៅមួយរយៈពេលចុងក្រោយនេះ ពិតជាមានគម្រោងអភិវឌ្ឍធំៗ ចូលមកកាន់តំបន់នេះប្រាកដមែន ជាពិសេសគម្រោងអភិវឌ្ឍន៍លំនៅដ្ឋានកម្រិតមធ្យមនិងក្រោមមធ្យម។

លោកបានបន្តទៀតថា “សម្រាប់គម្រោងរបស់បុរី GALAXY 11 ដែលកំពុងសាងសង់នៅពេលនេះ គឺជាប្រភេទលំនៅដ្ឋានបែបទំនើប និងទាន់សម័យ ដែលមានចែកចេញជា៣ប្រភេទ រួមមានដូចជា ប្រភេទ Shop House ផ្ទះវីឡាទោល និងវីឡាព្រីនស៍ (Prince) ដោយគ្រប់ប្រភេទនៃផ្ទះទាំងអស់ សុទ្ធតែត្រូវបានរៀបចំរចនាយ៉ាងវិចិត្រពីសំណាក់អ្នកជំនាញ”។

លោកបានបន្តទៀតថា ក្រៅពីយកចិត្តទុកដាក់ទៅលើការរចនាម៉ូត ប្លង់មេរបស់បុរីទាំងមូលដែលធានាថា ស្អាតទំនើបល្អឥតខ្ចោះនោះ នៅក្នុងបុរីក៏មានការស្ថាបនាផ្លូវភ្លោះទំហំ១៣ម៉ែត្រ មានរៀបចំជាកន្លែងកម្សាន្ត សួនច្បារសាធារណៈ មានពិភពបៃតងផ្តល់នូវបរិយាកាសដ៏ល្អ និងខ្យល់ត្រជាក់បក់មកពីស្ទឹង មានអាងហែលទឹក ជាពិសេស មានការរៀបចំជាក្លឹបហាត់ប្រាណបែបទំនើប ដោយមិនចាំបាច់ចំណាយពេលចេញទៅហាត់ប្រាណនៅក្រៅបុរីនោះឡើយ។

គម្រោងបុរី GALAXY 11 នៅក្នុងតំបន់ដ៏មានសក្ដានុពល ជាបណ្តុំនៃទីប្រជុំជន ស្ថិតនៅសង្កាត់ស្ពានថ្ម ខណ្ឌដង្កោ រាជធានីភ្នំពេញដោយចំណាយពេលត្រឹម៥នាទីក្នុងការធ្វើដំណើរពីទីតាំង គម្រោងផ្សារទំនើប AEON3 តែប៉ុណ្ណោះ។ ប្រភេទលំនៅដ្ឋានប្រភេទShop House មានតម្លៃចាប់ពីជាង៨ម៉ឺនដុល្លារឡើងទៅ។

ប្រភេទលំនៅដ្ឋាន វីឡាទោលមានតម្លៃចាប់ពីជាង១៤ម៉ឺនដុល្លារឡើងទៅ ។ ប្រភេទលំនៅដ្ឋាន វីឡា ព្រីនស៍មានតម្លៃចាប់ពីជាង ៣០ម៉ឺនដុល្លារឡើងទៅ ដោយគ្រប់ប្រភេទលំនៅដ្ឋានទាំងអស់ លោកអ្នកគ្រាន់តែកក់ត្រឹម៣០ភាគរយ ជាមួយនឹងការបង់រំលស់រយៈ១៨ខែដោយគ្មានការប្រាក់៕

សាលាអចលនទ្រព្យកម្ពុជាបានត្រៀមខ្លួនរួចរាល់សម្រាប់ការជួយដល់អ្នករកស៊ីក្នុងវិស័យអចលនទ្រព្យឲ្យរីកចម្រើនកាន់តែខ្លាំង

ដោយ វិសេស

ភ្នំពេញៈ ថ្នាក់ដឹកនាំសាលាអចលនទ្រព្យកម្ពុជា បានត្រៀមខ្លួនរួចហើយ ដើម្បីជួយដល់អ្នករកស៊ីក្នុងវិស័យនេះឲ្យមានភាពររីកចម្រើនខ្លាំង តាមរយៈការផ្តល់សេវាកម្មបណ្តុះបណ្តាល ប្រឹក្សាយោបល់នានា។

លោក ខាត់ បូរ៉ា នាយកប្រតិបត្តិសាលាអចលនទ្រព្យកម្ពុជាបានមានប្រសាសន៍ឲ្យដឹងកាលពីចុងសប្តាហ៍មុនថា ដើម្បីជួយដល់បងប្អូន ដែលជាសមាជិករបស់សាលអចលនទ្រព្យកម្ពុជា និងអ្នករកស៊ីក្នុងវិស័យអចលនទ្រព្យ សាលាអចលនទ្រព្យកម្ពុជាបានរៀបចំផែនការសម្រាប់ឆ្នាំ២០២០នេះ ក្នុងការជ្រើសរើសសមាជិកសាលាអចលនទ្រព្យកម្ពុជាចំនួន ៤៨០រូប ដើម្បីចូលរួមចំណែកអភិវឌ្ឍន៍វិស័យអចលនទ្រព្យ សំណង់ និងជួយដល់កំណើនសេដ្ឋកិច្ចជាតិ។

លោកបានបន្តដែរថា “សាលាអចលនទ្រព្យកម្ពុជា បានរៀបកម្មវិធីបង្វឹកជាពិសេសជាច្រើនរៀងរាល់ខែ ទាំងនៅរាជធានីភ្នំពេញ និងនៅខេត្តសក្តានុពលពីរគឺ សៀមរាប និងក្រុងប៉ោយប៉ែត ខេត្តបន្ទាយមានជ័យផងដែរ”។ លោកបន្តថា “លើសពីនេះទៅទៀតសាលាបានជ្រើសរើស និងសំរិតសំរាំងគ្រូបណ្តំបណ្តាល និងវាគ្មិនជំនាញ និងមានបទពិសោធន៍ច្រើនផងដែរ”។

សាលាអចលនទ្រព្យកម្ពុជា ជាស្ថាប័នបណ្តុះបណ្តាលជំនាញវិជ្ជាជីវៈផ្នែកអចលនទ្រព្យ ដែលសហការយ៉ាងជិតស្និទជាមួយសមាគមអចលនទ្រព្យ សមាគមអ្នកអភិវឌ្ឍន៍លំនៅដ្ឋានកម្ពុជា ម្ចាស់អចលនទ្រព្យ ធនាគារ ក្រុមហ៊ុនវិនិយោគ អ្នកវិនិយោគ ក្រុមហ៊ុនអភិវឌ្ឍន៍អចលនទ្រព្យ សាលាអចលនទ្រព្យ ក្រុមហ៊ុនវាយតម្លៃអចលនទ្រព្យ ក្រុមហ៊ុនស្ថាបត្យកម្ម ក្រុមហ៊ុនសាងសង់ ក្រុមហ៊ុនភ្នាក់ងារអចលនទ្រព្យ ភ្នាក់ងារអចលនទ្រព្យ ក្រុមហ៊ុនច្បាប់ និងអជ្ញាធរពាក់ព័ន្ធ ដើម្បីបង្កើនគុណភាពធនធានមនុស្សក្នុងវិស័យអចលនទ្រព្យ បង្កើនប្រាក់ចំណូលបានលឿន សម្រាប់អ្នកពាក់ព័ន្ធទាំងអស់ ចូលរួមកសាងសេដ្ឋកិច្ចជាតិឱ្យមានភាពរីកចម្រើន និងកម្ពុជាក្លាយជាប្រទេសអ្នកមានបានឆាប់រហ័ស។ ជាសមាជិកសាលាអចលនទ្រព្យកម្ពុជា បងប្អូននឹងទទួលបាន៖

1. បង្វឹកអោយក្លាយជាអ្នកពូកែរកស៊ីក្នុងវិស័យអចលនទ្រព្យកំរិតកំពូល។

2. ពង្រីកបណ្តាញទិញលក់អចលនទ្រព្យឲ្យកាន់តែទូលាយ និងបង្កើនប្រាក់ចំណូលកាន់តែលឿន។

3. ទទួលបានការបង្វឹកឡើងវិញពេញមួយជីវិតដោយមិនបាច់បង់ថ្លៃសិក្សា។

4. ទទួលបានការប្រឹក្សាពីសាលាជាបន្តបន្ទាប់ដោយឥតគិតថ្លៃសម្រាប់រយៈពេលពេញមួយជីវិត។

5. មានបណ្តាញសមាជិកអ្នករកស៊ីក្នុងវិស័យអចលនទ្រព្យទូទាំងប្រទេស ជួយគាំទ្រជ្រោមជ្រែងគ្នា សហការគ្នាទៅវិញទៅមក។

6. វិនិយោគថវិកាតិច ទទួលបានអត្ថប្រយោជន៍ច្រើនជាងការចូលបង្វឹកតាមវគ្គនីមួយៗ។

7. ក្លាយជាសមាជិកផ្សារណាត់អចលនទ្រព្យ Estate Xchange។

ចំពោះបងប្អូន ដែលមានបំណងចង់ចូលជាសមាជិក របស់សាលាអចលនទ្រព្យកម្ពុជា អាចទំនាក់ទំនងតាមរយៈទូរសព្ទលេខ 077 456 001 / 081 456 001 / 088 2000 168៕

អាមេរិក ចិននឹងចុះហត្ថលេខាលើកិច្ចព្រមព្រៀងបញ្ចប់ពាណិជ្ជកម្មដំណាក់កាលទី១ នៅពាក់កណ្តាលខែមករានេះ

ដោយ ប៊ី

ភ្នំពេញៈ លោកប្រធានាធិបតីអាមេរិក Donald Trump បាននិយាយកាលពីថ្ងៃអង្គារកន្លងមកថា អាមេរិក និងចិននឹងចុះហត្ថលេខាលើកិច្ចព្រមព្រៀងពាណិជ្ជកម្មដ៏ធំ និងទូលំទូលាយមួយ នៅឯសេតវិមាននៅថ្ងៃទី១៥ ខែ មករានេះ ទោះបីជាព័ត៌មានលម្អិតជាក់លាក់នៃកិច្ចព្រមព្រៀងមិនត្រូវបានចេញផ្សាយក៏ដោយ។

ការចុះហត្ថលេខានឹងពង្រឹងដំណាក់កាលទី១ នៃកិច្ចព្រមព្រៀងដែលចំណាយពេលជិត២ឆ្នាំ ដើម្បីចរចាហើយនឹងធ្វើឱ្យមានការបញ្ចប់សង្គ្រាមពាណិជ្ជកម្ម ជាផ្លូវការរវាងសេដ្ឋកិច្ចធំបំផុតទាំង២របស់ពិភពលោក។

ប្រធានាធិបតីអាមរិកប្រកាសពីកាលបរិច្ឆេទនៃពិធីចុះហត្ថលេខា នៅលើបណ្តាញសង្គមធ្វីតទ័របាននិយាយថា “អ្នកតំណាងជាន់ខ្ពស់របស់ចិន នឹងចូលរួមក្នុងពិធីចុះហត្ថលេខា” ហើយលោកគ្រោងនឹងធ្វើដំណើរទៅកាន់ប្រទេសចិននៅថ្ងៃក្រោយ ដើម្បីចាប់ផ្តើមពិភាក្សានៅដំណាក់កាលទី២នៃកិច្ចព្រមព្រៀង”។

លោក Donald J. Trump មិនបាននិយាយថា តើលោកស៊ី ជីនពីងដែលជាមេដឹកនាំចិននឹងចូលរួម ឬដាក់ឈ្មោះតំណាងណាមួយមកពីប្រទេសចិន ដែលអាចចូលរួមក្នុងពិធីនោះទេ។

ខ្លឹមសារនៃកិច្ចព្រមព្រៀង ដែលបានឈានដល់ពាក់កណ្តាលកាលពីខែធ្នូ មិនត្រូវបានផ្សព្វផ្សាយជាសាធារណៈទេ ហើយខ្លឹមសារជាក់លាក់របស់វា មិនទាន់ត្រូវបានត្រួតពិនិត្យដោយអ្នកជំនាញ ឬអាជីវកម្មជាច្រើន ដែលទទួលរងពីការប្រយុទ្ធប្រឆាំងនឹងពាណិជ្ជកម្មជាមួយប្រទេសចិន។

កិច្ចព្រមព្រៀងនេះ នឹងកាត់បន្ថយត្រឹមតែមួយចំណែកតូចនៃពន្ធគយ ដែលលោក Trump បានដាក់លើទំនិញចិនដែលមានតម្លៃ៣៦០ពាន់លានដុល្លារ ដោយទុកឱ្យពន្ធជាច្រើននៅដដែល។

មន្ត្រីមកពីប្រទេសទាំងពីរបាននិយាយថា កិច្ចព្រមព្រៀងនេះ រួមមានការប្តេជ្ញាចិត្តពីប្រទេសចិន ក្នុងការបង្កើនការទិញផលិតផលកសិកម្ម និងថាមពលរបស់អាមេរិក ការដាក់កម្រិតលើសមត្ថភាពរបស់ក្រុងប៉េកាំង ក្នុងការធ្វើឱ្យរូបិយប័ណ្ណរបស់ខ្លួនចុះខ្សោយ និងផ្តល់ការការពារដល់ក្រុមហ៊ុនអាមេរិក ដែលធ្វើជំនួញនៅក្នុងប្រទេសចិន។

កិច្ចព្រមព្រៀងនេះ ក៏នឹងកាត់បន្ថយពន្ធគយលើទំនិញ ប្រមាណ១២០ពាន់លានដុល្លារផងដែរ ហើយបានលុបចោលពន្ធគយថ្មី ដែលត្រូវបានគ្រោងធ្វើនៅថ្ងៃទី១៥ ខែធ្នូ។

នៅក្នុងការប្រកាសអំពីកិច្ចព្រមព្រៀងនេះ អាមេរិកបាននិយាយថា ការទិញកសិផលរបស់ប្រទេសចិនត្រូវបានរំពឹងថា នឹងកើនឡើងដល់យ៉ាងហោចណាស់៤០ពាន់លានដុល្លារជារៀងរាល់ឆ្នាំ ក្នុងរយៈពេលពីរឆ្នាំហើយការនាំចេញស្បៀងអាហារ ថាមពល ផលិតទំនិញ និងសេវាកម្មទៅកាន់ប្រទេសចិន នឹងកើនឡើងសរុប២០០ពាន់លានដុល្លារ៕ (New York Times)

ខុនដូ ដឹស្តា ប៉ូឡារីស ២៣ ផ្តល់ជូនលោកអ្នកនូវការរស់នៅបែបសម័យថ្មី

ដោយ រតនៈ

ភ្នំពេញ៖ ខុនដូ ដឹស្តាប៉ូឡារីស ២៣ ជាខុនដូដែលមានទីតាំងស្ថិតនៅចំកណ្តាល និង ជាបេះដូង នៃក្នុងគម្រោងបុរី ប៉េង ហួត ហ្គ្រេនស្តាផ្លាទីនីម (បឹងស្នោ) តាមបណ្តោយផ្លូវជាតិលេខ១ ប្រមាណជា ៥នាទី ពីស្ពានព្រះមុនីវង្ស។

ខុនដូនេះ សាងសង់ឡើងលើផ្ទៃដីប្រមាណជា១.២ ហិចតា ដែលមានកំពស់២៦ ជាន់ចែកចេញជា៤ប្រភេទផ្សេងៗគ្នា ដែលមាន បន្ទប់គេង ១ មាន២ប្រភេទ និងបន្ទប់គេង ២ មាន២ ប្រភេទ អមជាមួយបរិវេណទទួលភ្ញៀវ បរិវេណទទួលទានអាហារ បរិវេណចម្អិនអាហារ និងបរិវេណបោកសម្លៀកបំពាក់ ក្នុងនោះក៏មាន គ្រឿងសង្ហារឹមទំនើបគ្រប់ប្រភេទ បំពាក់ជូនរួចជាស្រេច សំរាប់អតិថិជនផងដែរ។

ខុនដូដឹស្តាប៉ូឡារីស ២៣ បានសាងសង់ឡើងនៅកណ្តាលទីប្រជុំជន ដែលព័ទ្ធជុំវិញ ដោយផ្សារទំនើបកំរិតស្តង់ដារអន្តរជាតិ PH ECO Mall សាលារៀនអន្តរជាតិ ក្លឹបហាត់ប្រាណ អាងហែលទឹក កីឡដ្ឋាន ទីលានហាត់វាយកូនហ្គោល សួនកំសាន្តបែបអឺរ៉ុប សាលមហោស្រពសម្រាប់ប្រារព្ធពិធីផ្សេងៗ ដែលនឹងធ្វើឲ្យការរស់នៅរបស់លោកអ្នកកាន់តែសម្បូរបែប និងមានភាពងាយស្រួល។

អ្វីដែលពិសេសនោះ គឺ លោកអ្នកអាចកំសាន្ត និង ស្រូបយកខ្យល់អាកាស នៅក្នុងសួនច្បារលើអាកាសបែបឯកជន ជាន់ទី២៦ នៃអគារ ដែលមានបរិយាកាសស្រស់ស្រាយ ជាមួយនឹងទេសភាពដ៏ល្អឥតខ្ចោះ អមដោយទន្លេសងខាង។ នៅតំបន់ជុំវិញខុនដូនេះ ទៀតសោត ក៏មានលក្ខណៈអំណោយផលផងដែរ ដែលប្រមូលផ្តុំ ទៅដោយផ្សារសហគមន៍ នាយកដ្ឋានលិខិតឆ្លងដែន នៃក្រសួងមហាផ្ទៃ ធនាគារ មណ្ឌលសុខភាព ចំណតឡានក្រុងសាធារណៈ និងស្ថាប័នផ្សេងៗ ដែលជាផ្នែកមួយបន្ថែមទៀត ក្នុងការបំពេញតម្រូវការដល់ការរស់នៅរបស់លោកអ្នក។

សូមប្រញាប់រួសរាន់ឡើងសម្រាប់លោកអ្នកដែលមានបំណងចង់ក្លាយជាម្ចាស់ខុនដូ ជាមួយនឹង ការបង់រំលស់រហូតដល់១៧ឆ្នាំ ដោយគ្មានប្រាក់កក់ ព្រមទាំងផ្តល់ជូននូវគ្រឿងសង្ហារិម គ្រប់ប្រភេទផងដែរ។

សូមមកទទួលយកការផ្តល់ជូនដ៏ពិសេសនេះ ព្រោះចំនួនមានកំណត់សម្រាប់ពត៌មានបន្ថែម សូមលោកអ្នកធ្វើការទំនាក់ទំនងតាមរយៈទូរសព្ទ៖ 015 90 6789៕

ការសិក្សា ៖ សេដ្ឋកិច្ចកម្ពុជានឹងមានកំណើនខ្ពស់ជាងគេធៀបជាមួយបណ្តាប្រទេសក្នុងតំបន់នាឆ្នាំ២០២០ខាងមុខ

ដោយ ប៊ី

ភ្នំពេញ៖ កម្ពុជានឹងរក្សាបាននូវកំណើនសេដ្ឋកិច្ចពី ៦,៨ ភាគរយនៅឆ្នាំ ២០២០ ដោយសារពាណិជ្ជកម្មពិភពលោកធ្លាក់ចុះ ខណៈសេដ្ឋកិច្ចរបស់កម្ពុជានៅឆ្នាំ ២០២០ មានកំណើនខ្ពស់ជាងឡាវ មីយ៉ាន់ម៉ា និងវៀតណាម។ នេះរបាយការណ៍ចុងក្រោយរបស់មជ្ឈមណ្ឌលសេដ្ឋកិច្ចនៃធនាគារពាណិជ្ជកម្ម Siam Commercial Bank។

សេដ្ឋកិច្ចកម្ពុជា ឡាវ មីយ៉ាន់ម៉ា និងវៀតណាម (CLMV) នឹងមានកំណើនចន្លោះពី ៦ ទៅ៧ ភាគរយនៅឆ្នាំ ២០២០ ខណៈឧបសគ្គពីភាពមិនប្រាកដប្រជានៃពាណិជ្ជកម្មដែលអូសបន្លាយពេល និងការថយចុះកំណើនសេដ្ឋកិច្ចសំខាន់ៗប៉ះពាល់ដល់ចក្ខុវិស័យសេដ្ឋកិច្ចតាមរយៈការធ្លាក់ចុះនៃការនាំចេញ និងការមកដល់នៃភ្ញៀវទេសចរ។

ទោះយ៉ាងណាផលិតកម្មក្នុងតំបន់ដែលសម្របខ្លួននឹងផ្តល់ផលប្រយោជន៍ខ្លះដល់ប្លុកនេះ ជាពិសេសវៀតណាមយ៉ាងហោចណាស់ក្នុងរយៈពេលខ្លី ដោយសារក្រុមហ៊ុនចិន និងសាជីវកម្មពហុជាតិមួយចំនួនប្តូរផលិតកម្មរបស់ខ្លួនទៅកម្ពុជា ឡាវ មីយ៉ាន់ម៉ា និងវៀតណាមដើម្បីគេចពន្ធពីអាមេរិក។

មជ្ឈមណ្ឌលនេះ បានឱ្យដឹងថា ជាលទ្ធផលការវិនិយោគផ្ទាល់ពីបរទេសនៅក្នុងសេដ្ឋកិច្ចកម្ពុជា ឡាវ មីយ៉ាន់ម៉ា និងវៀតណា នៅក្នុងប៉ុន្មានឆ្នាំខាងមុខនេះនឹងតែបន្តកើនឡើង។

លើសពីនេះទៅទៀត ការប្រើប្រាស់នៅក្នុងប្លុក និងការកើនឡើងនៃទីផ្សារអ្នកប្រើប្រាស់ត្រូវបានរំពឹងថានឹងការពារការជះឥទ្ធិពលអវិជ្ជមានពីការធ្លាក់ចុះខាងក្រៅ។

ទោះយ៉ាងណា ហានិភ័យក៏កំពុងកើនឡើង ខណៈដែលប្រទេសនីមួយៗបច្ចុប្បន្នប្រឈមនឹងហានិភ័យបុគ្គលដែលកើតចេញពីប្រភពទាំងក្នុង និងក្រៅ។

កម្ពុជា និងមីយ៉ាន់ម៉ាប្រឈមនឹងហានិភ័យនៃការដកប្រព័ន្ធៗអនុគ្រោះពន្ធទាំងអស់លើកលែងតែអាវុធ (EBA) ពីសំណាក់សហគមន៍អឺរ៉ុប ហើយអាចនឹងបាត់បង់ការប្រកួតប្រជែងក្នុងការនាំចេញក្នុងរយៈពេលមធ្យម។

កំណើនសេដ្ឋកិច្ចរបស់កម្ពុជាត្រូវបានរំពឹងថានឹងមានការកើនឡើងមធ្យមទៅ ៦,៨ ភាគរយនៅក្នុងឆ្នាំ ២០២០ ដោយសារតែពាណិជ្ជកម្មពិភពលោកធ្លាក់ចុះ។ វិស័យទេសចរណ៍ និងការវិនិយោគផ្ទាល់ពីបរទេសបានកើនឡើងក្នុងអត្រាទាបជាងមុន ប៉ុន្តែស្ថានភាពសារពើពន្ធ និងការនាំចេញរបស់ប្រទេសនេះនៅតែរឹងមាំដដែល។

ទោះយ៉ាងណា ហានិភ័យនៃការប្រឈមនឹងការដក EBA នៅតែមានកម្រិតខ្ពស់ ហើយអាចប៉ះពាល់ដល់ការនាំចេញទៅកាន់សហគមន៍អឺរ៉ុបដែលជាទីផ្សារនាំចេញធំបំផុតរបស់កម្ពុជា។ មីក្រូហិរញ្ញវត្ថុដែលមានការរីកចម្រើនយ៉ាងខ្លាំងនៅក្នុងប្រាក់កម្ចីក្នុងគ្រួសារក៏អាចនឹងធ្វើឱ្យប៉ះពាល់ស្ថិរភាពហិរញ្ញវត្ថុ និងទស្សនវិស័យនៃការប្រើប្រាស់នាពេលអនាគតផងដែរ។

ឡាវនៅតែប្រឈមនឹងហានិភ័យនៃភាពតានតឹងផ្នែកខាងបំណុល ខណៈពេលដែលវៀតណាមអាចប្រឈមនឹងការចាត់វិធានការរបស់អាមេរិកបន្ថែមទៀត ប្រសិនបើវៀតណាមរៀបឧបាយករូបិយវត្ថុលើអាមេរិក។កំណើនសេដ្ឋកិច្ចវៀតណាមត្រូវបានរំពឹងថានឹងកើនឡើងដល់ ៦,៧ ភាគរយនៅក្នុងឆ្នាំ ២០២០ ដែលគាំទ្រទាំងតម្រូវការក្នុងស្រុក និងការនាំចេញ។

ជាមួយនឹងការធ្លាក់ចុះនៃការនាំចេញ និងការបង្កើនហានិភ័យខាងក្រៅពីគោលនយោបាយគាំពារនិយមអាមេរិក ការប្រើប្រាស់ឯកជនគួរតែគាំទ្រដល់កំណើនពីទីផ្សារការងារខ្លាំង និងអតិផរណាកម្រិតមធ្យម។ ទន្ទឹមនឹងនេះ ការបន្តកែទម្រង់រចនាសម្ព័ន្ធគួរតែជួយជំរុញទាំងការវិនិយោគឯកជន និងបរទេសនៅក្នុងប្រទេសនេះ។

សេដ្ឋកិច្ចរបស់ឡាវត្រូវបានព្យាករថានឹងងើបឡើងវិញដល់ ៦,៥ ភាគរយនៅឆ្នាំ ២០២០។ សកម្មភាពសេដ្ឋកិច្ចជារួមមានការថមថយ ដោយសារផលប៉ះពាល់នៃគ្រោះមហន្តរាយធម្មជាតិក្នុងឆ្នាំ ២០១៨ សង្គ្រាមពាណិជ្ជកម្ម និងការធ្លាក់ចុះនៃប្រទេសចិន។

ទន្ទឹមនឹងនេះ ភាពងាយរងគ្រោះរយៈពេលខ្លីរបស់ឡាវ រួមមានប្រាក់បំរុងបរទេសមានកម្រិត និងភាពតានតឹងផ្នែកសារពើពន្ធពីប្រាក់ចំណូលទាបក្នុងការប្រមូលពន្ធ។ ទោះយ៉ាងណាហេដ្ឋារចនាសម្ព័ន្ធ និងគម្រោងវារីអគ្គិសនីនាពេលអនាគត និងកំណែទម្រង់គោលនយោបាយគួរតែជំរុញសេដ្ឋកិច្ចក្នុងរយៈពេលមធ្យម។

សេដ្ឋកិច្ចរបស់ប្រទេសមីយ៉ាន់ម៉ាត្រូវបានរំពឹងថានឹងកើនឡើង ៦,៣ ភាគរយនៅក្នុងឆ្នាំ ២០២០ ចំពេលមានហានិភ័យក្នុងស្រុក មុនពេលការបោះឆ្នោតនៅឆ្នាំក្រោយ។ការវិនិយោគផ្ទាល់ពីបរទេសបានធ្លាក់ចុះគួរឱ្យកត់សម្គាល់ ប៉ុន្តែការធ្វើកំណែទម្រង់គោលនយោបាយដែលកំពុងបន្តធ្វើសេរីភាវូបនីយកម្មហិរញ្ញវត្ថុ និងការវិនិយោគបរទេសពីបណ្តាប្រទេសអាស៊ីដទៃទៀតគួរតែគាំទ្រដល់ការស្តារសេដ្ឋកិច្ចរបស់ខ្លួនឡើងវិញ។

ប៉ុន្តែហានិភ័យធ្លាក់ចុះកើតឡើងពីវិបត្តិរ៉ូហ៊ីងយ៉ាដែលមិនទាន់ដោះស្រាយ ខណៈមីយ៉ាន់ម៉ាក៏មានហានិភ័យផងដែរក្នុងករណីមានការដក EBA៕

ផ្សារទំនើបFURI Times Square ផ្តល់កាដូពិសេសសំរាប់អតិថិជននៅថ្ងៃឆ្លងឆ្នាំសាកល

ដោយៈ រ៉ាណេត

ភ្នំពេញៈ ជាការអបអរសាទរនៅក្នុងឱកាសឆ្លងឆ្នាំសកល ឆ្នាំ២០១៩-២០២០ នៅរាត្រីថ្ងៃទី៣១ ខែធ្នូ ឆ្នាំ២០១៩ នេះ ផ្សារទំនើប FURI Times Square នៅក្រុងព្រះសីហនុ មានការរៀបចំយ៉ាងពិសេសសម្រាប់អតិថិជនរបស់ខ្លួន ជាមួយនឹងការតុបតែងលម្អយ៉ាងស្រស់ស្អាតសម្រាប់ការថតផ្តិតរូបភាព ធ្វើជាអនុស្សាវរីយ៍ប្រចាំឆ្នាំ រួមជាមួយនឹងការចាប់ឆ្នោតយករង្វាន់ផងដែរ។

បន្ទាប់ពីបើកដំណើរការសាកល្បងកាលពីថ្ងៃទី៩ ខែធ្នូ ឆ្នាំ២០១៩ កន្លងទៅ ផ្សារទំនើបលើកដំបូងប្រចាំនៅក្នុងក្រុងព្រះសីហនុ ទទួលបានការគាំទ្រពីសំណាក់អតិថិជនជាតិ និងអន្តរជាតិយ៉ាងលើសលប់។

ដោយឡែកនៅក្នុងឱកាសពិធីឆ្លងឆ្នាំសកល ឆ្នាំ២០១៩-២០២០ នេះ ផ្សារទំនើប FURI Times Square បានរៀបចំតុបតែងលម្អយ៉ាងពិសេស សម្រាប់អបអរសាទរាត្រីឆ្លងឆ្នាំ ប្រកបដោយភាពទាក់ទាញ រួមជាមួយនឹងការរៀបចំកម្មវិធីកម្សាន្តជាច្រើន ដូចជាការប្រគំតន្ត្រី និងការចាប់ឆ្នោតយករង្វាន់ជាវត្ថុអនុស្សាវរីយ៍ផងដែរ។

គណៈគ្រប់គ្រងផ្សារទំនើប FURI Times Square បានបញ្ជាក់ថា នៅក្នុងឱកាសនៃការអបអរសាទរនារាត្រីឆ្លងឆ្នាំសាកល ២០១៩-២០២០ គ្រប់អតិថិជនទាំងអស់ដែលចំណាយចាប់ពី១៥ដុល្លារឡើងទៅ នឹងមានឱកាសចូលរួមចាប់ឆ្នោតផ្សងសំណាងយករង្វាន់អនុស្សាវរីយ៍ ដែលរួមមានដូចជា អាវយឺត FURI Times Square មួកសុវត្ថិភាព និងឆ័ត្រយ៉ាងស្រស់ស្អាត។ បន្ថែមពីនេះ ផ្សារទំនើបនេះ ក៏មានកម្មវិធីប្រគំតន្ត្រីសម័យពីសំណាក់តារាចម្រៀងប្រុស -ស្រីល្បីឈ្មោះជាច្រើនរូបទៀត រហូតដល់រំលងអធ្រាត្រឆ្លងចូលឆ្នាំ២០២០។

សូមរីករាយជាមួយកម្មវិធី ដ៏រីករាយប្រចាំឆ្នាំនៅផ្សារទំនើប FURI Times Square ក្រុងព្រះសីហនុទាំងអស់គ្នា ៕

ភ្ញៀវទេសចរណ៍ជាតិ និងអន្តរជាតិជាច្រើនបានសម្រុកទៅលេងកំសាន្តតាមបណ្តាខេត្តមានសក្តានុពលទេសចរណ៍នានា

ដោយ វុត្ថា

ភ្នំពេញៈ ភ្ញៀវទេសចរណ៍ជាតិ និងអន្តរជាតិ ជាច្រើនបាននឹងកំពុងសម្រុកទៅលេងកម្សាន្ត នៅតាមរមណីយដ្ឋាននានានៅទូទាំងប្រទេស សម្រាប់ឪកាសចូលឆ្នាំសកល ឆ្នាំ ២០២០ នេះ ខណរដ្ឋបាលខេត្តក្រុងរបស់ប្រទេសកម្ពុជា បានរៀបចំពិធីឆ្លងឆ្នាំយ៉ាងជូនភ្ញៀវទេសចរណ៍កម្សាន្ត។

លោកតាំង សុចិត្រក្រិស្នា ប្រធានមន្ទីរទេសចរណ៍ខេត្តព្រះសីហនុ បានប្រាប់គេហទំព័រ propertyarea.asia នៅថ្ងៃទី ៣១ ខែធ្នូនេះ ឱ្យដឹងថា មកដល់ពេលនេះ មានភ្ញៀវទេសចរណ៍ជាតិ និងអន្តរជាតិបានកក់បន្ទប់សណ្ឋាគារ និងផ្ទះសំណាក់ជាច្រើន ដែលមកលេងកំសាន្តក្នុងពិធីឆ្លងឆ្នាំ សកល២០២០។

លោកបន្តថា “ភាគច្រើនពួកគេទៅលេងនៅលើកោះ ដែលធ្វើកក់បន្ទប់សណ្ឋាគារ និងផ្ទះសំណាក់អស់ហើយ ដែលត្រូវមានការបោះតង់បន្ថែមទៀត”។

លោកបន្តថា សម្រាប់បន្ទប់សណ្ឋាគារ និងផ្ទះសំណាក់ នៅក្នុងក្រុងព្រះសីហនុ គឺមិនទាន់អស់នៅឡើយទេ ពីព្រោះភាគច្រើនគេទៅលេងកោះ ជាពិសេសរមណីយដ្ឋានកោះរ៉ុង។

ចំណែកលោកសយ ស៊ីណុល ប្រធានមន្ទីរទេសចរណ៍ខេត្តកំពត បានឱ្យដឹងដែរថា សម្រាប់បន្ទប់សណ្ឋាគារ និងផ្ទះសំណាក់នៅក្នុងខេត្តកំពតនេះ មានការកក់បណ្តើរៗហើយ ចាប់តាំងពីម្សិលមិញមកមកម្លេះ ខណៈខេត្តក៏បានត្រៀមស្វាគមន៍ទទួលភ្ញៀវទេសចរណ៍ដោយមានការរៀបចំពិធីឆ្លងឆ្នាំសាកល២០២០ នេះ។

លោកបន្តថា “ការត្រៀមរៀបចំទទួលនេះ មានទាំងការប្រគុំតន្ត្រី និងកាំជ្រួចសម្រាប់បាញ់នាពេលរាត្រី ដើម្បីឱ្យភ្ញៀវទេសចរណ៍ជាតិ និងអន្តរជាតិបានកម្សាន្តរីករាយ”។

ងាកទៅកាន់ភូមិភាគឥសាន្តវិញ លោក ង៉ែត វិទូ ប្រធានមន្ទីរទេសចរណ៍ខេត្តរតនគិរី បានឱ្យដឹងដែរថា សម្រាប់ខេត្តភូមិភាគឥសាន្តនេះ គឺមានភ្ញៀវទេសចរណ៍ដែលមកពីភ្នំពេញ និងតាមបណ្តាខេត្តនានា បានកក់បន្ទប់សណ្ឋាគារ និងផ្ទះសំណាក់បានប្រមាណ ៦០ ភាគរយហើយមកដល់ពេលនេះ និងបន្តកក់បន្ថែមទៀត។

លោកបន្តថា នៅឆ្នាំនេះខេត្តរតនគិរី ក៏មានរៀបចំពិធីឆ្លងឆ្នាំសកល២០២០ផងដែរ ដោយមានការប្រគុំតន្ត្រី និងបាច់កាំជ្រូច ជាច្រើនគ្រាប់ផងដែរដើម្បីស្វាគមន៍ឆ្នាំថ្មី ឆ្នាំ សកល២០២០នេះ ។

ចំណែក លោកង៉ូវ សេងកាក់ ប្រធានមន្ទីរទេសចរណ៍ខេត្តសៀមរាប មិនបានប្រាប់ពីចំនួនភ្ញៀវទេសចរណ៍ដែលកក់បន្ទប់នោះទេ ដោយលោកថា មិនទាន់ទទួលរបាយកាណ៍ពីតាមបណ្តាសណ្ឋាគារ និងផ្ទះសំណាក់។

បើតាមរដ្ឋបាលខេត្តសៀមរាបបានឲ្យដឹងថា អាជ្ញាធរខេត្តបានរៀបចំ តុបតែង និងកែលម្អសោភ័ណភាពក្រុងសៀមរាបរួចរាល់ ដើម្បីអបអរសាទរបុណ្យឆ្លងឆ្នាំសកល ឆ្នា២០២០នាពេលខាងមុខនេះ។

ជាមួយគ្នានេះ ភ្ញៀវទេសចរជាតិ អន្តរជាតិ ចូលរួមរាប់ថយក្រោយទាំងអស់គ្នានារាត្រីថ្ងៃទី៣១ ខែធ្នូ ឆ្នាំ២០១៩ ឈានចូលថ្ងៃទី១ ខែមករា ឆ្នាំ២០២០ នៅសួនច្បារខាងជើងព្រះរាជដំណាក់ខេត្តសៀមរាបឱ្យបានច្រើនកុះករ៕

អគ្គនាយកក្រុមហ៊ុន KW Cambodia លោកឧកញ៉ាបណ្ឌិតគីម ហ៊ាងផ្ញើសារជូនពរដល់ញាតិមិត្ត បងប្អូន និងជាប្រជាពលរដ្ឋនៅលើពិភពលោកក្នុងឱកាសឆ្នាំថ្មី

ដោយគង់់ សូរិយា

ភ្នំពេញៈ អគ្គនាយកក្រុមហ៊ុន KW Cambodia លោកឧកញ៉ាបណ្ឌិតគីម ហ៊ាងបានសម្តែងនូវក្តីរីករាយ ជាមួយនឹងសមិទ្ឋផលទទួលបាន និងភាពជោគជ័យដ៏ត្រចះត្រចង់កាលពីឆ្នាំចាស់ និងជូនពរខ្លួនឯង សាច់ញាតិ អតិថិជនក្នុងឳកាសឆ្នាំថ្មីឆ្នាំ២០២០ឲ្យសម្រេចបាននូវជោគជ័យថ្មីៗបន្ថែមទៀត។

លោកឧកញ៉ាបណ្ឌិតគីម ហ៊ាងបានមានប្រសាសន៍ឲ្យដឹងតាមបណ្តាញទំនាក់ទំនងសង្គមនាព្រឹកថ្ងៃទី៣១ ធ្នូនេះថា សូមជូនពរឲ្យខ្លួនឯង គ្រួសារ សាច់ញាតិ មិត្តភ័ក្ត ប្រជាជជនកម្ពុជា និងប្រជាជនទាំងអស់នៅលើពិភពលោក សូមឲ្យមានសុខភាពល្អ រកស៊ីមានបាន មានសុភមង្គលក្នុងក្រុមគ្រួសារ អ្វីៗអាក្រក់សូមចេញឲ្យអស់ ហើយអ្វីដែលល្អៗ ចូលមកច្រើនក្នុងឆ្នាំ២០២០។

រីករាយឆ្នាំថ្មី ឆ្នាំ២០២០ទៅកាន់ប្រជាពលរដ្ឋទាំងអស់នៅលើពិភពលោក។

គោរពជូនពីរលោកឧកញ៉ាបណ្ឌិតគីម ហ៊ាងអគ្គនាយកក្រុមហ៊ុន KW Cambodia៕

រដ្ឋាភិបាលអនុម័គម្រោងវិនិយោគចំនួន៣១មានទុនជាង២,០០០លានដុល្លារក្នុងខែធ្នូ

ដោយវុត្ថា

ភ្នំពេញៈ គិតត្រឹមខែធ្នូឆ្នាំ២០១៩នេះ រដ្ឋាភិបាលតាមរយៈក្រុមប្រឹក្សាអភិវឌ្ឍន៍កម្ពុជា(CDC)បានអនុម័តគម្រោងចំនួន៣១ មានទឹកប្រាក់ជាង២,០៦៥លានដុល្លារអាមេរិក លើកគម្រោងជាច្រើនដែលអាចផ្តល់ឪកាសការងាររាប់ម៉ឺនកន្លែងដល់ប្រជាជនកម្ពុជា។

យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា សម្រាប់ពេញមួយខែធ្នូ ឆ្នាំ២០១៩ នេះ ឱ្យដឹងថា តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនប័ត្រចុះបញ្ជីជាស្ថាពរ ជូនដល់ក្រុមហ៊ុនដូចជា ទី១ក្រុមហ៊ុន “QUAN MING HANDBAG (CAMBODIA) INDUSTRIAL CO., LTD.” គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅផ្លូវជាតិលេខ៦ ភូមិឬស្សីជ្រោយ ឃុំឬស្សីជ្រោយ ស្រុកមុខកំពូល ខេត្តកណ្តាល មានទុនវិនិយោគប្រមាណ៣លានដុល្លារអាមេរិក និងអាចបង្កើតការងារបានចំនួន ១.២៤៤នាក់។

ទី២ ក្រុមហ៊ុន“GD NEW SKY LEATHER PRODUCTS CO., LTD.” គម្រោងបង្កើតរោងចក្រផលិតកាបូប និងខ្សែក្រវាត់ ដែលមានទីតាំងវិនិយោគស្ថិតនៅភូមិព្រៃថ្កូវ ឃុំព្រះនិព្វាន្ត ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ ៣,៨លានដុល្លារអាមេរិក និងអាចបង្កើតការងារបានចំនួន ១.៥០៦នាក់។

ទី៣ ក្រុមហ៊ុន “TAO AND KIVEN GARMENT CO., LTD.” គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិកន្ទោកជើង សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ២លានដុល្លារអាមេរិក និងអាចបង្កើតការងារបានចំនួន៦៩៨នាក់។ ទី៤-ក្រុមហ៊ុន“S W J (CAMBODIA) GARMENT CO., LTD”គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិភូមិបូរីកម្មករ សង្កាត់ច្បារមន ខណ្ឌច្បារមន ខេត្តកំពង់ស្ពឺ មានទុនវិនិយោគប្រមាណ៤,៤លានដុល្លារអាមេរិក និងអាចបង្កើតការងារបានចំនួន ១.៦៥៥កន្លែង។

ទី៥-ក្រុមហ៊ុន “LEADING STAR (CAMBODIA) GARMENT CO., LTD” គម្រោងបង្កើតរោងចក្រកាត់ដេរ និងចាក់សម្លៀកបំពាក់ ដែលមានទីតាំងវិនិយោគស្ថិតនៅភូមិព្រៃសលិច សង្កាត់ព្រៃស ខណ្ឌដង្កោ រាជធានីភ្នំពេញ មានទុនវិនិយោគប្រមាណ៥លានដុល្លារអាមេរិក និងអាចបង្កើតការងារបានចំនួន១.៨៨១កន្លែង។

ទី៦-ក្រុមហ៊ុន“JAM STAR PACKAGING TECHNOLOGY CO.,LTD.”គម្រោងបង្កើតរោងចក្រផលិតកេសកាតុង ប្រអប់ និងបោះពុម្ពគ្រប់ប្រភេទ ដែលមានទីតាំងវិនិយោគស្ថិតនៅភូមិទួលសាលា ឃុំព្រៃពួច ស្រុកអង្គស្នួល ខេត្តកណ្តាល មានទុនវិនិយោគប្រមាណ២,៤លានដុល្លារអាមេរិក និងអាចបង្កើតការងារបានចំនួន១៧៩កន្លែង។ ទី៧ ក្រុមហ៊ុន-“CHEN BROTHERS LIGHTING CO., LTD.”:គម្រោងបង្កើតរោងចក្រផលិតអំពូលភ្លើងលំអ ផ្លិតទឹកជូតកញ្ចក់រថយន្ត និងតម្រង់ខ្យល់, មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសស្វាយរៀងហ្គីហ្គា រីសស៍ ខេត្តស្វាយរៀង, មានទុនវិនិយោគប្រមាណ១,៧១លានដុល្លារអាមេរិក និងអាចបង្កើតការងារបានចំនួន៣៤០កន្លែង។

ទី៨ក្រុមហ៊ុន-“QUNYOU (CAMBODIA) ELECTRIC APPLIANCE CO., LTD.”:គម្រោងបង្កើតរោងចក្របង្គុំ និងតម្លើងសម្ភារៈអេឡិចត្រូនិកប្រើប្រាស់ក្នុងផ្ទះ, មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសស្វាយរៀងហ្គីហ្គា រីសស៍ ខេត្តស្វាយរៀង, មានទុនវិនិយោគប្រមាណ៩,០៧លានដុល្លារអាមេរិក និងអាចបង្កើតការងារបានចំនួន១.៥០០កន្លែង។

ទី៩-ក្រុមហ៊ុន“JIANGSHANG (CAMBODIA) SPORT & STATIONERY CO., LTD.”: គម្រោងបង្កើតរោងចក្រតំឡើងស៊ុរូបថត និងលាបពណ៌ក្រណាត់ឱ្យរឹង មានទីតាំងវិនិយោគស្ថិតនៅក្នុងតំបន់សេដ្ឋកិច្ច ពិសេសក្រុងព្រះសីហនុ ខេត្តព្រះសីហនុ មានទុនវិនិយោគចំនួន១លានដុល្លារអាមេរិក និងអាចបង្កើតការងារបានចំនួន៤៥កន្លែង។

ទី១០-ក្រុមហ៊ុន“ KING SHORE GLASS (CAMBODIA) CO., LTD.”: គម្រោងបង្កើតរោងចក្រផលិតសម្ភារៈសំណង់ មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសក្រុងព្រះសីហនុ ខេត្តព្រះសីហនុ មានទុនវិនិយោគចំនួន២លានដុល្លារអាមេរិក និងអាចបង្កើតការងារបានចំនួន៦០០កន្លែង។

ទី១១-ក្រុមហ៊ុន“OPTIMUS BUILDING MATERIALS MANUFACTURING CO., LTD.”: គម្រោងបង្កើតរោងចក្រផលិតសម្ភារៈសំណង់ មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសក្រុងព្រះសីហនុ ខេត្តព្រះសីហនុ មានទុនវិនិយោគចំនួន១លានដុល្លារអាមេរិក និងអាចបង្កើតការងារបានចំនួន៤៤កន្លែង។

ទី១២ ក្រុមហ៊ុន “Gelatine Granule”របស់ក្រុមហ៊ុន “KUBON (CAMBODIA) BIOTECHNOLOGY CO.,LTD.” គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជាបានសម្រេចចេញ “វិញ្ញាបនប័ត្រចុះបញ្ជីជាស្ថាពរ” ជូនដល់ក្រុមហ៊ុនខាងលើ ដែលមានទីតាំងវិនិយោគស្ថិតនៅភូមិតាអោងធំ ឃុំសាមគ្គី ស្រុកព្រៃនប់ ខេត្តព្រះសីហនុ មានទុនវិនិយោគប្រមាណ៤,៧លានដុល្លារអាមេរិក និងអាចបង្កើតការងារបានចំនួន២៧០កន្លែង។

ទី១៣ ក្រុមហ៊ុន- “SCHNEITEC POWER CO., LTD”គម្រោងសាងសង់ខ្សែបណ្តាញបញ្ជូន និងអនុស្ថានីយអគ្គិសនី ដែលមានទីតាំងវិនិយោគស្ថិតនៅសង្កាត់លេខ៤ ក្រុងព្រះសីហនុ ខេត្តព្រះសីហនុ មានទុនវិនិយោគប្រមាណ ៧១លានដុល្លារអាមេរិក និងអាចបង្កើតការងារបានចំនួន ៧០កន្លែង។

ទី១៤-ក្រុមហ៊ុន “SCHNEITEC INFINITE CO., LTD”គម្រោងសាងសង់ស្ថានីយផលិតថាមពលអគ្គិសនីដើរដោយពន្លឺព្រះអាទិត្យ កម្លាំង៣០មេហ្គាវ៉ាត់ ដែលមានទីតាំងវិនិយោគស្ថិតនៅភូមិអន្សក្តាម ឃុំស្នាអន្សា ស្រុកក្រគរ ខេត្តពោធិ៍សាត់ មានទុនវិនិយោគប្រមាណ ២៩លានដុល្លារអាមេរិក និងអាចបង្កើតការងារបានចំនួន៣៥កន្លែង។

ទី១៥ក្រុមហ៊ុន- “DE HEUS TMH CO., LTD” គម្រោងបង្កើតរោងចក្រផលិតចំណីសត្វ ដែលមានទីតាំងវិនិយោគស្ថិតនៅផ្លូវជាតិលេខ៥១ ភូមិក្បាលអូរ ឃុំព្រះស្រែ ស្រុកឧដ្តុង្គ ខេត្តកំពង់ស្ពឺ មានទុនវិនិយោគប្រមាណ ១១,២លានដុល្លារអាមេរិក និងអាចបង្កើតការងារបានចំនួន១៥៥កន្លែង។

ទី១៦-ក្រុមហ៊ុន“MILLPLAN INDUSTRIES (CAMBODIA) CO.,LTD.”គម្រោងបង្កើតរោងចក្រផ្គុំដំឡើងសម្ភារៈ អេឡិចត្រូនិក ដែលមានទីតាំងវិនិយោគស្ថិតនៅប្លុក I-J ផ្លូវជាតិលេខ៤១ ភូមិវាលវង់ ឃុំសែនដី ស្រុកសំរោងទង ខេត្តកំពង់ស្ពឺ មានទុនវិនិយោគប្រមាណ ៧លានដុល្លារអាមេរិក និងអាចបង្កើតការងារបានចំនួន៧៣០កន្លែង។

ទី១៧- ក្រុមហ៊ុន “FHL INDUSTRIES CO., LTD” គម្រោងបង្កើតរោងចក្រផ្គុំដំឡើងគ្រឿងបរិក្ខាអគ្គិសនី និងគ្រឿង អេឡិចត្រូនិកគ្រប់ប្រភេទ ដែលមានទីតាំងវិនិយោគស្ថិតនៅភូមិចំបក់ ឃុំវល្លិសរ ស្រុកសំរោងទង ខេត្តកំពង៉ស្ពឺ មានទុនវិនិយោគប្រមាណ ២,៤លានដុល្លារអាមេរិក និងអាចបង្កើតការងារបានចំនួន ៧៣៤កន្លែង។

ទី១៨ក្រុមហ៊ុន -“CXD INDUSTRY CO.,LTD.”គម្រោងបង្កើតរោងចក្រផ្គុំដំឡើងរថយន្តគ្រប់ប្រភេទ និងគ្រឿងម៉ាស៊ីន សម្ភារៈបរិក្ខាផ្សេងៗ ដែលមានទីតាំងវិនិយោគស្ថិតនៅភូមិគ្រួស សង្កាត់សំរោង ខណ្ឌព្រែកភ្នៅ រាជធានីភ្នំពេញ មានទុនវិនិយោគប្រមាណ ៦លានដុល្លារអាមេរិក និងអាចបង្កើតការងារបានចំនួន ៧៣០កន្លែង។

ទី១៩-ក្រុមហ៊ុន “AEON MALL (CAMBODIA) CO.,LTD.”គម្រោងសាងសង់ផ្សារទំនើប ដែលមានទីតាំងវិនិយោគស្ថិតនៅភូមិព្រែកតាឡុង៣ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ មានទុនវិនិយោគប្រមាណ ២៨៩,៦លានដុល្លារអាមេរិក និងអាចបង្កើតការងារបានចំនួន ៤៧កន្លែង។

ទី២០-ក្រុមហ៊ុន “XIN DA SHI JIE INTERNATIONAL HOTEL CO.,LTD.”គម្រោងសាងសង់ និងអាជីវកម្មសណ្ឋាគារថ្នាក់ផ្កាយ៥ចំនួន១.៥០០បន្ទប់ និងមជ្ឈមណ្ឌលពាណិជ្ជកម្ម ដែលមានទីតាំងវិនិយោគស្ថិតនៅភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ មានទុនវិនិយោគប្រមាណ ៣៣១,៥លានដុល្លារអាមេរិក និងអាចបង្កើតការងារបានចំនួន ២.៥០៩កន្លែង។

ទី២១ ក្រុមហ៊ុន-“BOCC DEVELOPMENT CO.,LTD.”គម្រោងសាងសង់ និងអាជីវកម្មសណ្ឋាគារថ្នាក់ផ្កាយ៥ ចំនួន៥០០បន្ទប់, Service Hotel Apartment ថ្នាក់ផ្កាយ៤ ចំនួន ១.៦០០ units និងមជ្ឈមណ្ឌលពាណិជ្ជកម្ម ដែលមានទីតាំងវិនិយោគស្ថិតនៅសង្កាត់ទន្លេបាសាក់ ខណ្ឌចំការមន រាជធានីភ្នំពេញ “លើកោះពេជ្រ” មានទុនវិនិយោគប្រមាណ ១.១៨១លានដុល្លារអាមេរិក និងអាចបង្កើតការងារបានចំនួន ៦.៣៧០កន្លែង។

ទី២២-ក្រុមហ៊ុន “FUJIAN MEILIDA SHOES DEVELOPMENT CO., LTD” គម្រោងបង្កើតរោងចក្រផលិតស្បែកជើង ដែលមានទីតាំងវិនិយោគស្ថិតនៅដីឡូតិ៍លេខ២៧៨៧ ភូមិទួលក្រសាំង សង្កាត់រកាខ្ពស់ ក្រុងតាខ្មៅ ខេត្តកណ្តាល មានទុនវិនិយោគប្រមាណ ៨,៤លានដុល្លារអាមេរិក និងអាចបង្កើតការងារបានចំនួន២.៥២៥កន្លែង។

ទី២៣ ក្រុមហ៊ុន- “SHENG RONG ZHI YI (CAMBODIA) CO., LTD” គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅសួនឧស្សាហកម្មចុងយ៉ា ភូមិចុងថ្នល់ខាងកើត សង្កាត់ទឹកថ្លា ខណ្ឌសែនសុខ រាជធានីភ្នំពេញ មានទុនវិនិយោគប្រមាណ ២,២លានដុល្លារអាមេរិក និងអាចបង្កើតការងារបានចំនួន ៧៧៧កន្លែង។

ទី២៤ -ក្រុមហ៊ុន “CENTURY CREATION LIGHTING (CAMBODIA) CO., LTD” គម្រោងបង្កើតរោងចក្រ ផលិត និងផ្គុំដំឡើងអំពូលភ្លើងពណ៌លម្អគ្រប់ប្រភេទ ដែលមានទីតាំងវិនិយោគស្ថិតនៅភូមិទួលធ្នង់ ឃុំព្រះនិព្វាន្ត ស្រុងគងពិសី ខេត្តកំពង់ស្ពឹ មានទុនវិនិយោគប្រមាណ ៥,២លានដុល្លារអាមេរិក និងអាចបង្កើតការងារបានចំនួន៥១០កន្លែង។

២៥ -ក្រុមហ៊ុន “NINGBO DONGXING (CAMBODIA) ELECTRIC CO., LTD” គម្រោងបង្កើតរោងចក្រ ផ្គុំដំឡើងអំពូលភ្លើងគ្រប់ប្រភេទ ដែលមានទីតាំងវិនិយោគស្ថិតនៅភូមិចមពល ឃុំពពេល ស្រុកត្រាំកក់ ខេត្តតាកែវ មានទុនវិនិយោគប្រមាណ ៣,៤លានដុល្លារអាមេរិក និងអាចបង្កើតការងារបានចំនួន២៩៤កន្លែង។

ទី២៦-ក្រុមហ៊ុន “KAMYUM FOOD (CAMBODIA) CO., LTD” គម្រោងបង្កើតរោងចក្រផលិតនំកញ្ចប់ និងស្ករគ្រាប់ ដែលមានទីតាំងវិនិយោគស្ថិតនៅភូមិតាពៅ ឃុំតានៃ ស្រុកព្រៃនប់ ខេត្តព្រះសីហនុ មានទុនវិនិយោគប្រមាណ ៣,៧លានដុល្លារអាមេរិក និងអាចបង្កើតការងារបានចំនួន ២៧២កន្លែង។

ទី២៧-ក្រុមហ៊ុន “JIN THAI FONG (CAMBODIA) NEW BUILDING MATERIALS CO., LTD” គម្រោងបង្កើតរោងចក្រផលិតឥដ្ឋគ្រប់ប្រភេទ ដែលមានទីតាំងវិនិយោគស្ថិតនៅផ្លូវជាតិលេខ៦A ភូមិជ្រោយមេត្រីក្រោម ឃុំឫស្សីជ្រោយ ស្រុកមុខកំពូល ខេត្តកណ្តាល មានទុនវិនិយោគប្រមាណ ៦លានដុល្លារអាមេរិក និងអាចបង្កើតការងារបានចំនួន ៤៨៤កន្លែង។

ទី២៨-ក្រុមហ៊ុន “ET SOLAR TECHNOLOGY (CAMBODIA) CO., LTD”គម្រោងបង្កើតរោងចក្រផលិត និងផ្គុំដំឡើងបន្ទះសូឡា ដែលមានទីតាំងវិនិយោគស្ថិតនៅផ្លូវលេខ៥១ ភូមិដំណាក់ព្រីង ឃុំទំនប់ធំ ស្រុកពញាឮ ខេត្តកណ្តាល មានទុនវិនិយោគប្រមាណ ៥,៧លានដុល្លារអាមេរិក និងអាចបង្កើតការងារបានចំនួន ៣០៨កន្លែង។

ទី២៩ ក្រុមហ៊ុន- “JINTEK PHOTOVOLTAIC TECHNOLOGY CO., LTD”គម្រោងបង្កើតរោងចក្រផលិត និងផ្គុំដំឡើងបន្ទះសូឡា ដែលមានទីតាំងវិនិយោគស្ថិតនៅភូមិព្រៃសាលា សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ ១២,៥លានដុល្លារអាមេរិក និងអាចបង្កើតការងារបានចំនួន ២៨៨កន្លែង។

ទី៣០-ក្រុមហ៊ុន “CHIP MONG RETAIL CO., LTD” គម្រោងសាងសង់ផ្សារទំនើប ដែលមានទីតាំងវិនិយោគស្ថិតនៅភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ មានទុនវិនិយោគប្រមាណ ៤១,៥លានដុល្លារអាមេរិក និងអាចបង្កើតការងារបានចំនួន៣៣៨កន្លែង។

ទី៣១ ក្រុមហ៊ុន- “OUTDOOR GEAR (CAMBODIA) CO.,LTD.” គម្រោងបង្កើតរោងចក្រផលិតកាបូបគ្រប់ប្រភេទ និងកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិស្រង៉ែ ឃុំឧត្តមសុរិយា ស្រុកត្រាំកក់ ខេត្តតាកែវ មានទុនវិនិយោគប្រមាណ ៧,៥លានដុល្លារអាមេរិក និងអាចបង្កើតការងារបានចំនួន២.០០៩កន្លែង៕