ក្រុមហ៊ុនតៃវ៉ានគ្រោងបោះទុនវិនិយោគប្រមាណ ២០០០លានដុល្លារនៅខេត្តកំពង់ស្ពឺ

ដោយ ប៊ី

ភ្នំពេញៈ ក្រុមហ៊ុនតៃវ៉ានមានបំណងវិនិយោគ ទឹកប្រាក់ប្រមាណ ២០០០លានដុល្លារក្នុងវិស័យវិស័យកសិកម្ម និងកសិឧស្សាហកម្មនៅខេត្តកំពង់ស្ពឺ។

របាយការណ៍មួយបានបញ្ជាក់កាលពីពេលថ្មីៗនេះថា មានការកើនឡើងនូវភាពជាដៃគូ និងយុទ្ធសាស្រ្ត នៅក្នុងបណ្តាប្រទេសអាស៊ីអាគ្នេយ៍ ក្នុងប៉ុន្មានឆ្នាំថ្មីៗនេះ ខណៈពេលនេះក្រុមហ៊ុនតៃវ៉ាន់ចំនួន១០ ត្រូវបានរាយការណ៍ថា មានចំណងចង់វិនិយោគនៅខេត្តកំពង់ស្ពឺ។

របាយការណ៍បានបង្ហាញថា ចំនួនទឹកប្រាក់វិនិយោគសរុប អាចនឹងមានទំហំទៅដល់២ពាន់លានដុល្លារអាមេរិក សម្រាប់ការវិនិយោគនៅខេត្តកំពង់ស្ពឺ។

អភិបាលនៃគណៈអភិបាលខេត្តកំពង់ស្ពឺ លោក វ៉ី សំណាង ត្រូវបានរាយការណ៍តាមរយៈប្រព័ន្ធផ្សព្វផ្សាយអន្តរជាតិមួយថា ចំនួនទឹកប្រាក់វិនិយោគអតិបរមានេះ នឹងត្រូវទៅចាក់បញ្ចូល នៅក្នុងវិស័យវិស័យកសិកម្ម និងកសិឧស្សាហកម្ម ដែលត្រូវការជាចាំបាច់។

ខណៈកម្ពុជាមានសារៈសំខាន់ខាងសេដ្ឋកិច្ចច្រើន លើវិស័យកសិកម្ម ក្រុមហ៊ុនតៃវ៉ាន់ទាំងនេះ កាន់តែចាប់អារម្មណ៍ក្នុងការដាំដុះស្រូវ កៅស៊ូ និងដូង។

ថ្មីៗនេះការតភ្ជាប់ផ្លូវរវាងរាជធានីភ្នំពេញ និងខេត្តព្រះសីហនុត្រូវបានធ្វើឱ្យប្រសើរឡើង។ នេះអាចជាហេតុផលសម្រាប់ការចាប់អារម្មណ៍ថ្មីៗ សម្រាប់ការវិនិយោគរបស់ក្រុមហ៊ុនជាច្រើន។

លោកសំណាងបន្ថែមថា “នៅថ្ងៃអាទិត្យទី២ ខ្ញុំជួបជាមួយអ្នកវិនិយោគតៃវ៉ាន់១០ នាក់។ ពួកគេបាននិយាយថា ពួកគេចង់វិនិយោគនៅក្នុងខេត្តកំពង់ស្ពឺ។ ការវិនិយោគពីវិនិយោគិនបរទេស មិនត្រឹមតែបង្កើតឱកាសការងារថ្មី សម្រាប់ប្រជាជនកម្ពុជាប៉ុណ្ណោះទេ ប៉ុន្តែថែមទាំងក៏នាំមកនូវបច្ចេកវិទ្យាថ្មីមកកាន់កម្ពុជាផងដែរ”។

លោកក៏បានបន្ថែមទៀតថា ក្រុមហ៊ុនទាំង១០ ដែលបានបង្ហាញចំណាប់អារម្មណ៍ក្នុងការវិនិយោគរួមមានក្រុមហ៊ុនធំៗរបស់តៃវ៉ាន់ ដូចជា China Hainan Natural Rubber Industry Group Co Ltd ក្រុមហ៊ុន Hainan State Farms Holding Group Co Ltd និងក្រុមហ៊ុន Hainan Ruixiang Tropical Economic Investment Group Co Ltd ជាដើម៕

ប្រឡាយមេសំខាន់ៗចំនួន៥ ក្នុងក្រុងព្រះសីហនុ នឹងត្រូវបើកការរដ្ឋាននៅត្រឹមដើមសប្ដាហ៍ក្រោយនេះ

ដោយៈ រ៉ាណេត

ព្រះសីហនុៈ គម្រោងស្ដារប្រឡាយមេសំខាន់ៗចំនួន៥ នៅក្នុងគម្រោងស្ដារ និងស្ថាបនាផ្លូវប្រឡាយទាំង៣៤ខ្សែ នៅទាំងក្រុងព្រះសីហនុ គ្រោងនឹងបើកសម្ពោធការដ្ឋាននៅត្រឹមព្រឹកថ្ងៃទី៩ ខែធ្នូ ឆ្នាំ២០១៩ ខាងមុខនេះហើយ។

ជាការឆ្លើយតប និងអនុវត្តតាមគម្រោងការរបស់ប្រមុខរាជរដ្ឋាភិបាល ក្នុងការអភិវឌ្ឍ និងស្ដារប្រព័ន្ធហេដ្ឋារចនាសម្ព័ន្ធ នៅទូទាំងខេត្តព្រះសីហនុចំនួន៣៤ខ្សែដែលប្រគល់ឱ្យក្រុមហ៊ុនចំនួន៨ ទទួលខុសត្រូវលើការសាងសង់នោះ នៅព្រឹកថ្ងៃ៣ ខែធ្នូ ឆ្នាំ២០១៩ នេះ អភិបាលនៃគណៈអភិបាលខេត្តព្រះសីហនុ លោក គួច ចំរើន បានដឹកនាំកិច្ចប្រជុំស្តីពីការងារស្តារអូរ ប្រឡាយទាំង៥ខ្សែ ក្នុងក្រុងព្រះសីហនុ ដោយគ្រោងយកព្រឹកថ្ងៃទី៩ ដើមសប្ដាហ៍ក្រោយនេះ ជាថ្ងៃបើកការដ្ឋាន។

លោកបុរី វង្សសានិត ប្រធានមន្ទីរសាធារណការ និងដឹកជញ្ជូនខេត្តព្រះសីហនុបានធ្វើបទបង្ហាញស្តីពីស្ថានភាពអូរ ប្រឡាយក្នុងក្រុងព្រះសីហនុ ដែលជាគម្រោងការងារស្តារអូរ ប្រឡាយទាំង៥ខ្សែ មានប្រវែង២៦,៥៩៧គីឡូម៉ែត្រ ក្នុងនោះមានដូចជា អូរប្រឡាយអូរឈើទាល មានអូរតូច៥ផ្សេងទៀត ប្រវែងសរុប១៦.៦៣០ម៉ែត្រ។ អូរប្រឡាយអូរអេម៉ារីយូ មានប្រវែង១.៩០០ម៉ែត្រ។ អូរប្រឡាយ អូរសំអាតប្រវែង៣.៧៧៥ម៉ែត្រ។ អូរប្រឡាយស្ពានឆេះ ប្រវែង១.១៧០ម៉ែត្រ និងអូរប្រឡាយ អណ្តូងអ៊ុនតាក់ ប្រវែង ៣.១១៦ម៉ែត្រ ដើម្បីធ្វើការស្តារ រំដោះយកចំណីអូរប្រឡាយមកវិញ។

ការរំលោភបំពានដីចំណីអូរប្រឡាយ ជាមូលហេតុចំបងបណ្តាលឱ្យមានការកកស្ទះទឹកលិចលង់នៅរដូវវស្សា ព្រោះដោយសារមានការសាងសង់សំណង់ខុសច្បាប់រំលោភយកដីចំណីប្រឡាយ អូរទាំង៥ខ្សែ ។ ក្នុងចំណោមអូរ ប្រឡាយទាំង៥ខ្សែខាងលើ និងមានប្រឡាយតូចៗជាច្រើនខ្សែផ្សេងទៀត ដែលមានទទឹងចាប់ពី៣ម៉ែត្រ និងកន្លែងខ្លះទៀត មានទទឹងរហូតដល់ទៅជាង៦០ម៉ែត្រ តាមនិយាមការប្លង់សុរិយោដី។

លោក គួច ចំរើនអភិបាលខេត្តព្រះសីហនុ បានជម្រុញឱ្យមន្ទីរសាធារណការ និងដឹកជញ្ជូន ក៏ដូចជាមន្ទីរដែនដី ត្រូវសហការគ្នា រៀបចំបោះបង្គោលកំណត់និយាមការទីតាំងអូរ ប្រឡាយទាំង៥ខ្សែ ដើម្បីឱ្យក្រុមការងារចុះការស្តារអូរ ប្រឡាយ មានភាពងាយស្រួល ពិសេសអាជ្ញាធរក្រុងចូលរួមសហការ ចុះបាញ់ថ្នាំ និងអប់រំឱ្យប្រជាពលរដ្ឋរុះរើសំណង់ទាំងឡាយណា ដែលប៉ះពាល់ការងារស្តារអូរប្រឡាយរបស់យើង និងងាយស្រួលដល់ក្រុមការងារដាក់គ្រឿងចក្រចុះកាយ ដើម្បីរំដោះជំនន់ទឹកភ្លៀងនៅរដូវវស្សាខាងមុខ ។

លោកអភិបាលខេត្តបានបញ្ជាក់ថា “យើងកំពុងមានការមមាញឹក ក្នុងការស្ថាបនាផ្លូវទាំង៣៤ខ្សែ ដូច្នេះប្រព័ន្ធអូរ ប្រឡាយនៅក្នុងក្រុងព្រះសីហនុ ក៏ត្រូវធ្វើការស្តារឡើងវិញជាមួយគ្នា ដើម្បីចញ្ចៀសនូវជំនន់ទឹកភ្លៀង កុំឱ្យជន់លិចក្នុងរដូវវស្សា នៅឆ្នាំ២០២០ខាងមុខនេះ”៕

ប្រតិភូខេត្តយូណានត្រៀមពន្លឿនការសាងសង់អាកាសយានដ្ឋានថ្មីខេត្តសៀមរាបប្រព្រឹត្តទៅដោយរលូន

ដោយ វុត្ថា

ខេត្តសៀមរាបៈ គណៈប្រតិភូនៃខេត្តយូណាន បានស្នើដល់រដ្ឋបាលខេត្តសៀមរាបជួយសម្របសម្រួលអោយមានការផ្គត់ផ្គង់ទឹក ភ្លើង បណ្តាញលូបង្ហូរទឹកខ្វក់ និងប្រពន្ធទូរគមនាគមន៍ ដើម្បីឱ្យដំណើរការសាងសង់អាកាសយានដ្ឋានសៀមអង្គរថ្មី ប្រព្រឹត្តទៅដោយរលូន។

លោក Zhang Huohua អភិបាលរងខេត្តយូណាន នៃសាធារណៈរដ្ឋ ប្រជាមានិតចិន នៅក្នុងជំនួបពិភាក្សាការងារជាមួយលោក លី សំរិទ្ធ អភិបាលរងខេត្តសៀមរាបនៅថ្ងៃទី៣ ខែធ្នូ ឆ្នាំ ២០១៩ នេះបានឱ្យដឹងថា កិច្ចជំនួបពិភាក្សានេះ រៀបចំឡើងក្នុងគោលបំណងពិភាក្សា អំពីគម្រោងសាងសង់អាកាសយានដ្ឋានអន្តរជាតិសៀមរាប អង្គរ ការពង្រឹង និងពង្រីកចំណងសម្ព័ន្ធមេត្រីភាព និងកិច្ចសហប្រតិបត្តិការរវាងខេត្តទាំងពីរ និងការប្រគល់រថយន្តបោសសំអាតក្រុង ជូនរដ្ឋបាលខេត្តសៀមរាប។

លោកបន្តថា “ក្រៅពីគម្រោងសាងសង់អាកាសយានដ្ឋានអន្តរជាតិ សៀមរាប អង្គរ ជាគម្រោងដែលធំជាងគេ ខេត្តយូណាន តាមរយៈកិច្ចសហប្រតិបត្តិការជាមួយរដ្ឋបាលខេត្តសៀមរាប យើងមានគម្រោងជាច្រើងទៀត ដែលគម្រោងទាំងនេះបាននឹងកំពុងដំណើរការផងដែរ”។

លោកបន្ថែមថា ម្យ៉ាងវិញទៀតប្រតិភូខេត្តយូណាន ក៏បានស្នើរដ្ឋបាលខេត្តសម្របសម្រួល ដល់ការនាំចូលសម្ភារៈផ្សេងៗ និងការផ្ទេរទីតាំងពីអាកាសយានដ្ឋានចាស់ មកអាកាសយានដ្ឋានថ្មីផងដែរ”។

លោកលី សំរិទ្ធ អភិបាលរងខេត្តសៀមរាបបានមានប្រសាសន៍ថា សំណើរបស់គណៈប្រតិភូមមួយចំនួន គឺស្ថិតក្នុងសមត្ថកិច្ចរបស់ថ្នាក់ជាតិ និងខ្លះទៀតជាសមត្ថកិច្ចរបស់ថ្នាក់ក្រោមជាតិ (ថ្នាក់ខេត្ត) តែទោះជាយ៉ាងណា រាជរដ្ឋាភិបាលបានបង្កើតគណៈកម្មការតម្រង់ទិស ការងារសាងសង់អាកាសយានដ្ឋានអន្តជាតិសៀមរាប អង្គរ ដែលគណៈកម្មការនេះបាន និងកំពុងសិក្សាលើគម្រោងនេះយ៉ាងសកម្ម។ ទន្ទឹមនឹងនេះ រដ្ឋបាលខេត្តក៏បានបង្កើតអនុគណៈកម្មការថ្នាក់ខេត្តមួយផងដែរ ដើម្បីសហការធ្វើកិច្ចការនេះ។

លោកបន្តថា “នេះជាគម្រោងមួយដែលប្រជាពលរដ្ឋកម្ពុជាបានដឹង ហើយពួកគាត់ក៏បានអបអរសាទរយ៉ាងខ្លាំង ដែលគម្រោងនេះ នឹងជួយជម្រុញដល់ការលើកកម្ពស់សេដ្ឋកិច្ចសង្គម ដើម្បីអភិវឌ្ឍន៍ខេត្ត ក៏ដូចជាទូទាំងព្រះរាជានាចក្រកម្ពុជា”។

លោក Zhang Huohua បានបន្តឲ្យដឹងទៀតថា គម្រោងនេះក៏ជាគម្រោងមួយដ៏មានសារសំខាន់ សម្រាប់ប្រជានជនខេត្តយូណានផងដែរ ហើយនឹងខិតខំគៀងគរវិនិយោគិន និងក្រុមហ៊ុន សហគ្រាស ទាំងធំទាំងតូច ដើម្បីមកធ្វើការវិនិយោគនៅខេត្តសៀមរាបនេះ៕

រដ្ឋាភិបាលជំរុញឱ្យក្រុមហ៊ុនចិនពន្លឿនការសិក្សាបញ្ចប់គម្រោងប្លង់មេហេដ្ឋារចនាសម្ព័ន្ធនៅតាមតំបន់ឆ្នេរ

ដោយ វត្ថា

ភ្នំពេញៈ រដ្ឋាភិបាលតាមរយៈអន្តរក្រសួងស្ថាប័ន បានជំរុញឱ្យក្រុមហ៊ុនវិស្វកម្មសៀងហៃ (Shanghai Engineering Co., Ltd) ដែលជាក្រុមហ៊ុនចិន ពន្លឿនការសិក្សាបញ្ចប់ ផែនការមេអភិវឌ្ឍន៍បណ្តាញលូទឹកកខ្វក់ និងលូទឹកភ្លៀងក្នុងក្រុងជាប់មាត់សមុទ្រមានក្រុងកំពត និងក្រុងកែប ឱ្យបានលឿន ដើម្បីឆ្លើយតបទៅនឹងការរីកចំរើននៃក្រុងទាំងពីរនេះ។

យោងតាមកិច្ចប្រជុំអន្តរក្រសួង និងតំណាងក្រុមហ៊ុនវិស្វកម្មសៀងហៃនៅថ្ងៃទី ២ ខែធ្នូ ឆ្នាំ ២០១៩កន្លងមកនេះ អង្គប្រជុំបង្ហាញការពេញចិត្តគាំទ្រលើលទ្ធផលការសិក្សាគម្រោង និងស្នើពន្លឿនការសិក្សាផែនការមេបញ្ចប់ ដោយយោងតាមផែនទីប្លង់គោលប្រើប្រាស់ដីក្រុងចក្ខុវិស័យឆ្នាំ២០៣០ ដើម្បីឈានដល់ការសាងសង់ ព្រោះបញ្ហាទឹកកខ្វក់ និងការអភិវឌ្ឍប្រព័ន្ធលូ ស្ថានីយប្រព្រឹត្តកម្មទឹកកខ្វក់ ជាកិច្ចការអាទិភាពខ្ពស់របស់រដ្ឋាភិបាលអណត្តិទី៦។

កិច្ចប្រជុំនេះបានផ្តោតលើការត្រួតពិនិត្យ ពិភាក្សាផ្តល់យោបល់ លើលទ្ធផលបឋម “គម្រោងសិក្សាសមិទ្ធិលទ្ធភាព និងផែនការមេអភិវឌ្ឍបណ្តាញលូទឹកកខ្វក់ និងលូទឹកភ្លៀងក្នុងក្រុងកំពត ខេត្តកំពត និងក្រុងកែប ខេត្តកែប ” សិក្សាដោយក្រុមហ៊ុនវិស្វកម្មសៀងហៃ (Shanghai Engineering Co., Ltd) សហការជាមួយនាយកដ្ឋានសំណង់ប្រព័ន្ឋចម្រោះទឹកកខ្វក់ (SMCD/MPWT) នៃអគ្គនាយកដ្ឋានសាធារណការ ក្រសួងសាធារណការ និងដឹកជញ្ជូន។

ការសិក្សាសមិទ្ធិលទ្ធភាព និងការរៀបចំផែនការគម្រោងចាប់ផ្តើមតាំងពីពាក់ណ្តាលឆ្នាំ២០១៩កកន្លងមកនេះ មាន៥ដំណាក់កាលផ្សេងៗ ដោយចាប់ផ្តើមពីការប្រមូលទិន្នន័យពីបណ្តាមន្ទីរខេត្ត និងក្រសួងពាក់ព័ន្ឋ ហើយការសិក្សាត្រូវចំណាយពេលសិក្សា៥ ទៅ៧ខែ។ ក្នុងនោះ ក្រុមការងារបានចុះទស្សនកិច្ចទីតាំងមួយចំនួន ដូចជាទីតាំងគ្រោងសាងសង់ស្ថានីយប្រព្រឹត្តកម្មទឹកកខ្វក់ ស្ថានីយបូមទឹកឆៅក្រុងកំពត បណ្តាញលូបង្ហូរ ប្រភពបំពុលមួយចំនួនដែលបណ្តាលមកពីទឹកកខ្វក់ ស្ថានីយផ្គត់ផ្គង់ទឹកស្អាតខេត្តកំពត និងពិនិត្យស្ថានីយប្រព្រឹត្តកម្មទឹកកខ្វក់នៅផ្សារក្តាមខេត្តកែប។

ក្រោយរយៈពេល៣ខែ ក្រុមការងារសិក្សាគម្រោង នឹងដាក់ជូននូវពង្រាងការសិក្សារៀបចំផែនការមេអភិវឌ្ឍបណ្តាញលូទឹកកខ្វក់ និងទឹកភ្លៀង ដល់ស្ថាប័នថ្នាក់ក្រោមជាតិដើម្បីពិនិត្យ និងផ្តល់យោបល់កែលម្អបន្ថែម។

លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូនធ្លាប់បានឱ្យដឹងថា ក្រសួងសាធារណការ និងដឹកជញ្ជូន បានកំពុងតែសិក្សាផែនការមេ និងការសិក្សាសមិទ្ធិលទ្ធភាព គម្រោងអភិវឌ្ឍន៍ប្រព័ន្ធទឹកកខ្វ ក់នៅតាមបណ្តាខេត្តដូចជា កំពត កែប កោះកុង បាត់ដំបង កំពង់ចាម និងខេត្តផ្សេងៗទៀតផងដែរ ដែលជាក់ស្តែងខេត្តកំពង់ស្ពឺ បានធ្វើការសិក្សាផែនការមេនេះរួចហើយ ហើយនឹងបន្តធ្វើផែនការមេនេះ ឱ្យគ្រប់២៥ខេត្តក្រុងតែម្តង។

លោកបន្ថែមថា “នៅពេលដែលការសាងសង់ប្រព័ន្ធលូទាំងនេះ រួចជាស្រេចនៅថ្ងៃខាងមុខ យើងនឹងលែងមានទឹកកខ្វក់ហូរចូលសមុទ្រទៀតឡើយ ព្រោះមុននឹងបង្ហូរទៅសមុទ្រ យើងនឹងចម្រោះវាឱ្យស្អាតជាមុនសិន តែបើសិនជាការប្រើប្រាស់ទឹកកាន់តែច្រើន ទឹកកខ្វក់ហូរចេញពីផ្ទះពលរដ្ឋ អគារសណ្ឋាគារផ្សេងក៏កាន់តែច្រើន ដូច្នេះហើយត្រូវការសាងសង់ប្រព័ន្ធលូ និងអាងចម្រោះជាបន្តបន្ទាប់ទៀតផងដែរ”៕

សម្តេចតេជោ៖ រាជធានីភ្នំពេញកំពុងប្រឈមបញ្ហាធំៗចំនួន៤ ដែលត្រូវដោះស្រាយ

ដោយៈ រ៉ាណេត

ភ្នំពេញៈ សម្ដេចតេជោ ហ៊ុន សែននាយករដ្ឋមន្រ្តីកម្ពុជាបានមានប្រសាសន៍ថា រាជធានីភ្នំពេញនៅពេលបច្ចុប្បន្ននេះ កំពុងតែប្រឈមជាមួយនឹងបញ្ហាធំៗចំនួន៤ ដែលត្រូវតែព្យាយាមដោះស្រាយជាចាំបាច់ ក្នុងនោះរួមមានបញ្ហាកកស្ទះចរាចរណ៍ បញ្ហាសំរាម ភាពកង្វះចំណតយានយន្ត និងបញ្ហាប្រពន្ធរំដោះទឹកកខ្វក់។

ការលើកឡើងរបស់សម្ដេចតេជោ ដែលបង្ហាញពីបញ្ហាកំពុងប្រឈមសំខាន់ៗនៅក្នុងរាជធានីភ្នំពេញខាងលើនេះ ត្រូវបានធ្វើឡើងនៅព្រឹកថ្ងៃទី៣ខែវិច្ឆិកា ឆ្នាំ២០១៩ នៅក្នុងឱកាសអនុញ្ញាតឱ្យគណៈប្រតិភូ បណ្តាអភិបាលក្រុងនិយាយភាសាបារាំង ដែលដឹកនាំដោយលោក គ្រីស្យង់ រ៉ូហ្សេ អូគេមបា (Christiant Roger Okemba) អភិបាលក្រុងប្រាហ្សាវិល នៃប្រទេសកុងហ្គោ ;និងជាអនុប្រធានសមាគមអន្តរជាតិអភិបាលក្រុងប្រើប្រាស់ភាសាបារាំងចូលសម្ដែងការគួរសម។

លោកអ៊ាង សុផល្លែត ជំនួយការផ្ទាល់របស់សម្តេចតេជោ ហ៊ុន សែន បានឱ្យដឹងថា នៅក្នុងជំនួបនាព្រឹកមិញនេះ សម្តេចតេជោបានមានប្រសាសន៍ថា រាជធានីភ្នំពេញបានកសាងឡើងក្នុងសម័យអាណានិគមបារាំង ហើយក៏បានកសាងឡើងថែមទៀត ក្រោយកម្ពុជាទទួលបានឯករាជ្យ ក្នុងសម័យសង្គមរាស្ត្រនិយមរបស់សម្តេច ព្រះបរមរតនកោដ្ឋ នរោត្តម សីហនុ។ ប៉ុន្តែរាជធានីភ្នំពេញបានរងនូវភាពខ្ទេចខ្ទាំ និងបំផ្លាញខ្ទេចខ្ទី ដោយរបបប្រល័យពូជសាសន៍ប៉ុលពត។

សម្តេចតេជោហ៊ុន សែនបានលើកឡើងទៀតថា ការអភិវឌ្ឍ និងវិវឌ្ឍរបស់រាជធានីភ្នំពេញនាពេលបច្ចុប្បន្ននេះ បានធ្វើឲ្យមានបញ្ហាប្រឈមមួយចំនួន ដែលទាមទារឱ្យមានការដោះស្រាយ។ រាជធានីភ្នំពេញបច្ចុប្បន្ន ប្រឈមនឹងបញ្ហាចរាចរណ៍ និងគ្រោះថ្នាក់ចរាចរណ៍ ដែលនាំទៅដល់ការស្លាប់ប្រជាជនច្រើន ហើយការធ្វើដំណើរមានការយឺតយ៉ាវផងដែរ។ កង្វះចំណតរថយន្តសាធារណៈ ក៏ជាបញ្ហាប្រឈមរបស់រាជធានីភ្នំពេញផងដែរ ដែលជំរុញឱ្យមានការវិនិយោគ ទៅលើការបង្កើតចំណតរថយន្ត នៅក្រោមសួនច្បារនានា ដើម្បីដោះស្រាយបញ្ហានេះ។

សម្ដេចបានមានប្រសាសន៍ទៀតថា ក្រៅពីបញ្ហាចរាចរណ៍ និងចំណតរថយន្តហើយនោះ បញ្ហាសំរាម និងទឹកកខ្វក់ ក៏ជាបញ្ហាប្រឈមរបស់រាជធានីភ្នំពេញនាពេលបច្ចុប្បន្នផងដែរ។ រាជធានីភ្នំពេញ មានសំរាមប្រមាណ៣ពាន់តោនក្នុងមួយថ្ងៃ ហើយបើប្រមូលមិនទាន់ទេ សំរាមនឹងពូនឡើង ធ្វើឱ្យមានបញ្ហាដល់សោភណភាពផង និងអនាម័យក្នុងរាជធានីភ្នំពេញផងដែរ។

ពាក់ព័ន្ធបញ្ហាសំរាមនេះ សម្ដេចតេជោ បានបានថ្លែងថា សម្តេចបានជំរុញឱ្យមានការចូលរួមពីវិស័យផ្សេងៗ ក៏ដូចជាវិស័យឯកជនដែរ ដើម្បីធ្វើយ៉ាងណា កែប្រែសំរាមនេះ ឱ្យទៅជាថាមពលអគ្គិសនី យកមកប្រើប្រាស់ឡើងវិញ។

ដោយឡែកបញ្ហាសំណល់រាវវិញ សម្តេចតេជោ ហ៊ុន សែន បានលើកឡើងថា រាជធានីភ្នំពេញ គឺជារាជធានីមួយដែលមានកំពស់ទាប ហើយពីដើមឡើយសុទ្ធសឹងតែបឹងបួរ ដូច្នេះការបង្ហូរសំណល់រាវទៅទន្លេ ទៅបឹងបួរនោះ ពុំទាន់មានការធ្វើអាងប្រព្រឹត្តិកម្ម ឬក៏អាងចម្រោះឱ្យបានត្រឹមត្រូវនៅឡើយនោះទេ៕

ជប៉ុនផ្តល់ជំនួយឥតសំណងប្រមាណ២២លានដុល្លារដើម្បីពង្រីកប្រព័ន្ធផ្គត់ផ្គង់ទឹកស្អាតនៅខេត្តពោធិ៍សាត់

ដោយ វុត្ថា

ភ្នំពេញៈ រដ្ឋាភិបាលជប៉ុន តាមរយៈស្ថានទូតរបស់ខ្លួនប្រចាំនៅកម្ពុជា បានប្រកាស ផ្តល់ហិរញ្ញប្បទានឥតសំណង ដែលមានទឹកប្រាក់សរុបចំនួន ២.៤០៥.០០០.០០០ យ៉េន ស្មើនឹងប្រមាណ២២លានដុល្លារអាមេរិក សម្រាប់អនុវត្តគម្រោង “ពង្រីកប្រព័ន្ធផ្គត់ផ្គង់ទឹកស្អាតនៅខេត្តពោធិ៍សាត់” ។

យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិបានឱ្យដឹងនៅថ្ងៃទី ៣ ខែធ្នូ ឆ្នាំ ២០១៩ នេះបានឱ្យដឹងថា លោកប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាត និងលោក មិកាមិ ម៉ាសាស៊ីរ៉ូ ឯកអគ្គរាជទូតជាប៉ុនប្រចាំនៅកម្ពុជា នឹងចុះហត្ថលេខាលើលិខិតប្តូរសារនៃការផ្តល់ហិរញ្ញប្បទានឥតសំណងនេះ នៅព្រឹកថ្ងៃទី៤ ខែធ្នូឆ្នាំ ២០១៩ ស្អែកនេះ ។

បើតាមសេចក្តីប្រកាសព័ត៌មានដដែលបន្តថា ការផ្តល់ហិរញ្ញប្បទានឥតសំណងនេះ គឺជាការបង្ហាញអំពីការប្តេជ្ញាចិត្តរបស់ប្រទេសជប៉ុន ក្នុងការរួមចំណែកធ្វើឱ្យប្រសើរឡើងនូវបរិស្ថានរស់នៅក្នុងប្រទេសកម្ពុជាជាពិសេសទឹស្អាត៕

ការបង្កើតដៃគូសេដ្ឋកិច្ចគ្រប់ជ្រុងជ្រោយទំនងជាបរាជ័យបន្ទាប់់ពីជប៉ុនពិចារណាដកខ្លួនចេញពីកិច្ចព្រមព្រៀងនេះ

ដោយ Donald Lee

ភ្នំពេញៈ ភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) កំពុងស្ថិតក្នុងភាពប្រាកដប្រជា ដែលអាចឈានដល់ការដួលរលំ បន្ទាប់ពីជប៉ុនបានបង្ហាញសញ្ញាថា ខ្លួននឹងដកខ្លួនចេញ ប្រសិនបើឥណ្ឌាដកខ្លួនចេញពីប្លុកពាណិជ្ជកម្មនៃ RCEP នេះ។

ប្លុកពាណិជ្ជកម្មដែលមានអាស៊ាន និងប្រទេសមានសេដ្ឋកិច្ចធំបំផុតនៅអាស៊ីប៉ាស៊ីហ្វិកត្រូវបានកំណត់ថា ធំជាងសហភាពអឺរ៉ុបនិងមានចំនួនប្រជាជនពាក់កណ្តាល នៃចំនួនប្រជាជនពិភពលោក និងរួមបញ្ចូលជាង៣០ ភាគរយនៃផលិតផលសរុបក្នុងស្រុក (GDP)លើពិភពលោក។

ប្រព័ន្ធផ្សព្វផ្សាយរដ្ឋចិន បានចេញផ្សាយរបាយការណ៍មួយដោយបញ្ជាក់ថា អ្នកចរចាពាណិជ្ជកម្មជប៉ុន សុខចិត្តដកខ្លួនចេញពីប្លុកពាណិជ្ជកម្ម ប្រសិនបើឥណ្ឌាមិនត្រូវបានរាប់បញ្ចូល។

របាយការណ៍នេះបានឱ្យដឹងថា “ជោគវាសនារបស់RCEP អាចនឹងផ្លាស់ប្តូរជាថ្មីម្តងទៀត ជាមួយអ្នកចរចាកំពូលរបស់ជប៉ុននិយាយ កាលពីថ្ងៃសុក្រថា ប្រទេសខ្លួនមិនបានពិចារណា ចុះកិច្ចព្រមព្រៀងពាណិជ្ជកម្មសេរី ដោយគ្មានប្រទេសឥណ្ឌានោះទេ”។

ប្រទេសឥណ្ឌាបានដកខ្លួនចេញពីការចរចារ RCEP កាលពីខែ វិច្ឆិកា ដោយបញ្ជាក់ថា កិច្ចព្រមព្រៀងពាណិជ្ជកម្មសេរីក្នុងតំបន់នេះ នឹងធ្វើឱ្យអន្តរាយដល់សេដ្ឋកិច្ចរបស់ខ្លួន។

នាយករដ្ឋមន្រ្តីឥណ្ឌាលោក Narendra Modi បានជឿជាក់ថា ការចូលរួមក្នុងប្លុកពាណិជ្ជកម្មនេះ មិនសមស្របនឹងផលប្រយោជន៍របស់ប្រទេសលោកទេ។ ក្តីបារម្ភចំបងគឺផ្តោតជុំវិញទំនិញចិន ដែលមានតម្លៃថោកជន់លិចទីផ្សារឥណ្ឌា និងធ្វើឱ្យក្រុមហ៊ុនផលិតក្នុងស្រុករងផលប៉ះពាល់។

នៅក្នុងបទសម្ភាសន៍ជាមួយទូរទស្សន៍ NDTV ដែលមានមូលដ្ឋាននៅឥណ្ឌាកាលពីខែ វិច្ឆិកា លោក Modi បាននិយាយថា “នៅពេលដែលខ្ញុំគិតគូទំហំប្រយោជន៍ នៃកិច្ចព្រមព្រៀង RCEP របស់ប្រជាជនឥណ្ឌាទាំងអស់ ខ្ញុំមិនទទួលបានចម្លើយវិជ្ជមានទេ។ ដូច្នេះមនសិការផ្ទាល់ខ្លួនមិនអនុញ្ញាតឱ្យខ្ញុំចូលរួមជាមួយ RCEP ឡើយ”។

រដ្ឋាភិបាលក្រុងប៉េកាំងបានរិះគន់ការជឿជាក់ថា ទំនិញចិននឹងជន់លិចទីផ្សាររបស់សមាជិក នៅពេលចិនបានអនុវត្តតាមច្បាប់ពាណិជ្ជកម្មទាំងអស់ ក្រោមគោលការណ៍ណែនាំរបស់អង្គការពាណិជ្ជកម្មពិភពលោក។ ទីក្រុងប៉េកាំងក៏បានកត់សម្គាល់ផងដែរថា បណ្តាប្រទេស ដូចជា ឥណ្ឌាមើលស្រាលចំពោះសក្តានុពល នៃការទទួលបានទីផ្សារដ៏ធំរបស់ចិន។

របាយការណ៍របស់ Global Times បានលើកឡើងថា “ការយល់ឃើញថានៅពេលដែលកិច្ចព្រមព្រៀងត្រូវបានចុះហត្ថលេខា ផលិតផលចិននឹងហូរចូលទៅក្នុងប្រទេសផ្សេងទៀតគឺជាជំហរតែម្ខាង ឬជារោគសញ្ញានៃជំងឺរវើរវាយ”។ របាយការណ៍ដដែលបានកត់សំគាល់ថា “បន្ទាប់ពីនេះ ចិនចាំបាច់ត្រូវគោរពតាមគោលការណ៍ពាណិជ្ជកម្មដូចគ្នាដើម្បីបើកទីផ្សាររបស់ខ្លួនបន្ថែមទៀត។ គ្មាននរណាម្នាក់ជំទាស់ថា ចិនមានទីផ្សារសក្តានុពលដ៏ធំមួយ ដែលជាចំណុចលក់ដ៏សំខាន់មួយសម្រាប់ RCEP ដែលស្នើឡើងដោយអាស៊ាននោះទេ”។

យោងតាមទិន្នន័យរបស់រដ្ឋាភិបាលជប៉ុនបានបង្ហាញថា ជប៉ុនដែលជាប្រទេសមានសេដ្ឋកិច្ចធំលំដាប់ទី៣នៅលើពិភពលោក បានចាប់ផ្តើមធ្លាក់ចុះនៅក្នុងត្រីមាសទី៣ ដោយមានអត្រាកំណើនផលិតផលក្នុងស្រុកសរុប០,២ ភាគរយ។

យោងតាមមូលនិធិរូបិយវត្ថុអន្តរជាតិ IMF បានអោយដឹងថា សេដ្ឋកិច្ចជប៉ុននឹងត្រូវបានជាប់គាំងនៅឆ្នាំ២០២០ ខណៈដែលប្រទេសនេះ បន្តកំណើនយឺតនៅចុងឆ្នាំនេះ។

IMF បានទម្លាក់ការព្យាករណ៍ កំណើនសេដ្ឋកិច្ចរបស់ជប៉ុនម្តងទៀតនៅឆ្នាំនេះ ដោយថយចុះពីកំនើន,៩ភាគរយ មកនៅត្រឹម០,៨ភាគរយ។

IMF បានណែនាំជប៉ុនឱ្យកាត់បន្ថយភាពតានតឹង ពាណិជ្ជកម្មបច្ចុប្បន្នជាមួយកូរ៉េខាងត្បូង ដើម្បីកាត់បន្ថយផលប៉ះពាល់អវិជ្ជមានដល់សេដ្ឋកិច្ចជប៉ុន ដែលធ្វើឱ្យប៉ះពាល់ដល់សង្វាក់តម្លៃសកលថែមទៀត។

IMF បានណែនាំថា “ភាពតានតឹងពាណិជ្ជកម្មសកល ដែលកំពុងបន្ត និងការកើនឡើងបន្ថែមទៀត អាចកាត់បន្ថយការនាំចេញការវិនិយោគ និងកំណើនសុទ្ធរបស់ជប៉ុន រួមទាំងផលប៉ះពាល់ដោយផ្ទាល់ និងប្រយោល តាមរយៈខ្សែសង្វាក់តម្លៃពិភពលោក និងការជះឥទ្ធិពលមិនល្អដល់វិស័យហិរញ្ញវត្ថុរបស់ជប៉ុន”៕

ក្រុមហ៊ុនសំណង់ជាង២០០ នឹងចូលរួមនៅក្នុងពិព័រណ៍ឧស្សាហកម្មសំណង់កម្ពុជា-អន្តរជាតិនៅសប្តាហ៍នេះ

ដោយ វុត្ថា

ភ្នំពេញៈ ក្រុមហ៊ុនពាក់ព័ន្ធនឹងវិស័យសំណង់ ដែលមានវត្តមាននៅក្នុងប្រទេសកម្ពុជា និងអន្តរជាតិចំនួន២០៧ នឹងចូលរួមក្នុងព្រឹត្តិការណ៍ពិព័រណ៍ ឧស្សាហកម្មសំណង់នៅកម្ពុជា-អន្តរជាតិលើកទី៦ រយៈពេល៣ថ្ងៃគឺចាប់ពីថ្ងៃទី ៥-៧ ខែធ្នូ ឆ្នាំ ២០១៩ នៅសប្តាហ៍នេះ នៅមជ្ឈមណ្ឌលពិព័រណ៍កោះពេជ្រ។

លោកជីវ ស៊ីវផេង លេខាផ្ទាល់អ្នកឧកញ៉ា ពុង ឃាវសែ ប្រធានសមាគមអ្នកសាងសង់កម្ពុជា បានប្រាប់គេហទំព័រ propertyarea.asia នៅថ្ងៃទី ៣ ខែធ្នូ ឆ្នាំ ២០១៩ នេះថា មកដល់ពេលនេះមានក្រុមហ៊ុនជាតិ និងអន្តរជាតិ ស្ទើរតែគ្រប់ប្រភេទពាក់ព័ន្ធក្នុងវិស័យសំណង់មានចំនួនប្រមាណ២០៧ ក្រុមហ៊ុនដែលមានប្រភេទជាសម្ភារៈជិត១០០០ ; នឹងចូលរួមដាក់តាំងបង្ហាញ នូវផលិតផលរបស់ខ្លួនៅក្នុងព្រឹត្តិការណ៍ពិព័រណ៍នេះ ។

លោកបន្តថា “ការចូលរួមរបស់ក្រុមហ៊ុន នៅក្នុងព្រឹត្តិការណ៍តាំងពិព័រណ៍នៅក្នុងឆ្នាំនេះ មានការកើនឡើងជាងឆ្នាំមុនពោលកាលពីឆ្នាំ២០១៨ មានចំនួន១៨៦ ក្រុមហ៊ុនដោយសារការរីកចម្រើនដ៏ឆាប់រហ័ស នៃវិស័យសំណង់នៅកម្ពុជាពីមួយឆ្នាំៗទៅមួយឆ្នាំ”។

លោកបន្ថែមថា វិស័យសំណង់នៅក្នុងប្រទេសកម្ពុជា មានការកើនឡើងគួរឱ្យកត់សម្គាល់ ដោយក្នុងរយៈពេលជិតដាច់ឆ្នាំ២០១៩នេះ យោងតាមទិន្នន័យរបស់ក្រសួងរៀបចំដែនដី មានទុនវិនិយោគលើវិស័យសំណង់ជាង៥០០០លានដុល្លារអាមេរិក។

យោងតាមសេចក្តីជូនដំណឹងរបស់សមាគមអ្នកសាងសង់កម្ពុជា បានឱ្យដឹងថា ការចូលរួមនៅក្នុងព្រឹត្តិការណ៍ពិព័រណ៍ឧស្សាហកម្មសំណង់កម្ពុជា អន្តរជាតិដែលមានការគាំទ្រដោយក្រសួងរៀបចំដែនដីនគរូបនីយកម្ម និងសំណង់ នឹងទទួលបានផលប្រយោជន៍ដូចជា ទី១ទទួលបានព័ត៌មានអំពីការវិនិយោគ និងការអភិវឌ្ឍន៍វិស័យសំណង់របស់កម្ពុជាបច្ចុប្បន្ន ទី២ អាចស្វែងរកដៃគូរសម្រាប់ធ្វើការវិនិយោគ និងអភិវឌ្ឍន៍ទាំងអ្នកក្នុងប្រទេស និងមកពីបរទេស ទី៣ អាចស្វែងរកអាជីវកម្មសម្រាប់ផ្តល់ឱ្យក្រុមគ្រសារមានមុខរបរ។

ទី៤ អាចស្វែងយល់ និងស្គាល់សម្ភារៈ បរិក្ខារ ឧបករណ៍ និងគ្រឿងចក្រ និងបច្ចេកវិទ្យាសំណង់គ្រប់ប្រភេទេ ដែលសុទ្ធសឹងតែមានគុណភាពល្អៗ ទំនើបៗ មានដាក់លក់នៅក្នុងទីផ្សារកម្ពុជា និងពិភពលោក ទី៥ អាចស្វែងរកកម្ចីប្រាក់ពីធនាគារ ដើម្បីទិញអចលនទ្រព្យដែលមានការប្រាក់ទាបសមរម្យ និងទី៦ អាចរកទិញលំនៅឋានមានតម្លៃសមរម្យ និងមានការបញ្ចុះតម្លៃជាច្រើន៕

ក្រុមហ៊ុនទូរគមនាគមន៍ខ្នាតយក្សរបស់ចិនបានឈានជើងចូលកម្ពុជា

ដោយ ប៊ី

ភ្នំពេញៈ ក្រុមហ៊ុនផ្តល់សេវាទូរគមនាគមន៍ ដែលគ្រប់គ្រងរដ្ឋរបស់ចិន China Unicom បានបង្កើតសាខានៅកម្ពុជា ដោយបង្កើនចំនួនអង្គភាពខ្លួនជាច្រើននៅក្នុងប្រទេស និងតំបន់តាមរយៈគម្រោងខ្សែក្រវាត់ និងផ្លូវ។ នេះបើតាមយោងតាមក្រុមហ៊ុន។

លោក ត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍បានមានប្រសាសន៍នៅក្នុងសេចក្តីថ្លែងការណ៍មួយថា “ប្រតិបត្តិករចិន និងកម្ពុជា នឹងធ្វើឱ្យភាពជាដៃគូកាន់តែស៊ីជម្រៅ និងផ្តល់ឱ្យក្រុមហ៊ុនកម្ពុជា និងក្រុមហ៊ុនមូលធនចិនវិនិយោគនៅកម្ពុជាឱ្យកាន់តែប្រសើរឡើងជាមួយសេវាបណ្តាញទូរគមនាគមន៍”។

លោកបានបន្តថា “យើងទន្ទឹងរង់ចាំក្រុមហ៊ុន China Unicom នឹងចូលរួមកាន់តែស៊ីជម្រៅការចូលរួមរបស់ខ្លួន នៅក្នុងកម្មវិធីឌីជីថលនៅកម្ពុជា”។

អ្នកនាំពាក្យក្រុមហ៊ុនមិនបានផ្តល់ព័ត៌មានលម្អិតបន្ថែម លើគម្រោងរបស់ក្រុមហ៊ុននោះទេ។ ក្រុមហ៊ុនកម្ពុជានេះ មានឈ្មោះថាក្រុមហ៊ុន China Unicom (Cambodia) Operations Co. Ltd។

យោងតាមគេហទំព័ររបស់ក្រុមហ៊ុនបុត្រសម្ព័ន្ធ Unicom Global របស់ខ្លួនដែលមានមូលដ្ឋាននៅហុងកុង ក្រុមហ៊ុន China Unicom មានសាខា និងទីតាំងរាប់សិបកន្លែងរួមមានទីក្រុងវ៉ាស៊ីនតោន អង់គ្លេស ហូឡង់ អាល្លឺម៉ង់ អូស្រ្តាលី ជប៉ុន មីយ៉ាន់ម៉ា ម៉ាឡេស៊ី ថៃ សឹង្ហបូរីប្រេស៊ីល និងអាហ្វ្រិកខាងត្បូង៕

លោកឧបនាយករដ្ឋមន្ត្រី ជា សុផារ៉ា ចុះពិនិត្យការដ្ឋាន និងដាក់បញ្ជាពន្លឿនការស្ថាបនាផ្លូវខេត្តព្រះសីហនុឱ្យមានគុណភាពខ្ពស់

ដោយៈ រ៉ាណេត

ព្រះសីហនុៈ អនុវត្តន៍តាមគោលការណ៍ និងបទបញ្ជារបស់ប្រមុខរាជរដ្ឋាភិបាលកម្ពុជា លោកឧបនាយករដ្ឋមន្ត្រីជា សុផារ៉ារដ្ឋមន្រ្តីក្រសួងរៀបចំដែនដី នគរូបនីយកម្មនិងសំណង់ បានដឹកនាំកម្លាំងមន្ត្រីជំនាញ ចុះពិនត្យមើលការដ្ឋានសាងសង់បណ្តាញហេដ្ឋារចនាសម្ព័ន្ធនៅទូទាំង ខេត្តព្រះសីហនុជាប់ជាប្រចាំដើម្បីឱ្យប្រាកដថា ការសាងសង់នឹងត្រូវបានធ្វើតាមគម្រោង និងបញ្ចប់ទៅតាមផែនការ។

កាលពីរសៀលថ្ងៃទី២ ខែវិច្ឆិកា ឆ្នាំ២០១៩ម្សិលមិញនេះ លោកឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ជា សុផារ៉ា ដែលអមដំណើរដោយលោកគួច ចំរើន អភិបាលនៃគណៈអភិបាលខេត្តព្រះសីហនុ ព្រមទាំងមន្ត្រីជំនាញចុះត្រួតពិនិត្យការដ្ឋាននានា ដែលកំពុងតែមានសកម្មភាពយ៉ាងសកម្ម ក្នុងការឈូសឆាយ កាយដីស្អុយ ដើម្បីស្ដារនិងស្ថាបនាហេដ្ឋារចនាសម្ព័ន្ធនៅទូទាំងខេត្ត ដើម្បីប្រាកដថា មានគុណភាពខ្ពស់ និងត្រូវបានបញ្ចប់ទៅតាមគម្រោងដែលគ្រោងទុក។

អ្នកនាំពាក្យរដ្ឋបាលខេត្តព្រះសីហនុ លោកឃាង ភារម្យបានមានប្រសាសន៍ប្រាប់តាមបណ្តាញសារអេឡិចត្រូនិចកាលព្រឹកថ្ងៃទី៣ ខែវិច្ឆិកា ឆ្នាំ២០១៩នេះថា “នៅរសៀលថ្ងៃទី២ ខែធ្នូ ម្សិលមិញនេះ ឯកឧត្តមឧបនាយករដ្ឋមន្ត្រី ជា សុផារ៉ា លោកបានដឹកនាំកម្លាំងជំនាញដែលពាក់ព័ន្ធ ចុះត្រួតពិនិត្យមើលពីវឌ្ឍនភាពការងារ នៃការអនុវត្តស្ថាបនាផ្លូវទាំង ៣៤ខ្សែ ជាមួយនឹងការណែនាំដល់អ្នកជំនាញសាងសង់ ត្រូវតែមានគុណភាព ធានាការប្រើប្រាស់បានយូរ និងបង្កើនសោភ័ណភាព បរិស្ថានខេត្តព្រះសីហនុ ដើម្បីទាក់ទាញអ្នកវិនិយោគ និងទេសចរណ៍មកខេត្តមាត់សមុទ្រកាន់តែច្រើនឡើង។

លោកបានបន្តទៀតថា “បច្ចុប្បន្ននេះរាជរដ្ឋាភិបាល និងរដ្ឋបាលខេត្តបាននិងកំពុងបន្តខិតខំកសាងហេដ្ឋារចនាសម្ព័ន្ធផ្លូវ ថ្នល់ ទូទាំងខេត្តព្រះសីហនុ ដែលមានចំនួន ៣៤ខ្សែ ប្រវែងសរុបចំនួន ៨៤.៥០៥គីឡូម៉ែត្រ ដោយផ្លូវទាំងអស់នេះ ត្រូវតែប្រាកដថាការស្ថាននា ឡើងប្រកបដោយគុណភាព និងសោភ័ណភាព ដើម្បីបម្រើឱ្យវិស័យទេសចរណ៍ និងសេដ្ឋកិច្ចរបស់យើង៕