កិច្ចប្រជុំកំពូលអាស៊ាន-សហរដ្ឋអាមេរិកលើកទី៧ផ្តោតសំខាន់លើការជំរុញកំណើនសេដ្ឋកិច្ចក្នុងតំបន់អាស៊ាន

ដោយៈ រ៉ាណេត

បាងកកៈ បន្ទាប់ពីកិច្ចប្រជុំកំពូលអាស៊ានបូក៣ លើកទី២២ត្រូវបានបញ្ចប់ នៅព្រឹកថ្ងៃទី៤ ខែវិច្ឆិកា ឆ្នាំ២០១៩នេះ នៅទីក្រុងបាងកកប្រទេសថៃ ប្រមុខរដ្ឋ ប្រមុខរដ្ឋាភិបាលអាស៊ាន បានអញ្ជើញចូលរួមបើកកិច្ចប្រជុំកំពូលអាស៊ាន-សហរដ្ឋអាមេរិក លើកទី៧ ជាមួយនឹងលោក ; រ៉ូប៊ែរ អូប្រៀន បេសកជនពិសេសរបស់ប្រធានាធិបតីសហរដ្ឋអាមេរិក ដូណាល់ ត្រាំ។

នៅក្នុងកិច្ចប្រជុំកំពូលប្រចាំឆ្នាំអាស៊ាន-សហរដ្ឋអាមេរិកលើកទី៧ ប្រមុខរដ្ឋ ប្រមុខរដ្ឋាភិបាលអាស៊ាន និងតំណាងប្រធានាធិបតីសហរដ្ឋអាមេរិក បានធ្វើការពិភាក្សាគ្នាយ៉ា ងយកចិត្តទុកដាក់ ទៅលើរបៀបវារ:ដែលបានគ្រោងទុក ពិសេសបានធ្វើការពិនិត្យ និងពិភាក្សាគ្នាយ៉ាងយកចិត្តទុកដាក់ ទៅលើការជំរុញទំនាក់ទំនងកិច្ចសហប្រតិបត្តិការរវាងអាស៊ាន និងសហរដ្ឋអាមេរិកឲ្យកាន់តែរឹងមាំរីកចម្រើនទ្វេឡើងថែមទៀត។

នៅក្នុងកិច្ចប្រជុំកំពូលនោះដែរ មេដឹកនាំអាស៊ាន និងសហរដ្ឋអាមេរិក បានធ្វើការវាយតម្លៃខ្ពស់ចំពោះ វឌ្ឍនភាពនៃទំនាក់ទំនងរវាងអាស៊ាន និងសហរដ្ឋអាមេរិក។ មេដឹកនាំអាស៊ាន សហរដ្ឋអាមេរិក ក៏បានសង្កត់ធ្ងន់នូវសារ:សំខាន់ នៃការជំរុញភាពជាដៃគូជាមួយដៃគូសន្ទនា ដៃគូសន្ទនាតាមវិស័យ ដៃគូអភិវឌ្ឍ និងភាគីខាងក្រៅដទៃទៀត តាមរយ:ក្របខណ្ឌនិមួយៗ និងការអនុវត្តផែនការសកម្មភាពទាំងឡាយ នៃកិច្ចសហប្រតិបត្តិការនានា។

មេដឹកនាំអាស៊ាន បានលើកទឹកចិត្តឲ្យសហរដ្ឋអាមេរិក ឱ្យបន្តគាំទ្រការអនុវត្តផែនការមេស្តីពី ការតភ្ជាប់អាស៊ាន ឆ្នាំ២០២៥ និងគំនិតផ្តួចផ្តើមសមាហរណកម្មអាស៊ាន ដំណាក់កាលទី៣ ដែលផ្តោតសំខាន់លើការតភ្ជាប់ ដើម្បីជួយកាត់បន្ថយគម្លាតអភិវឌ្ឍន៍រវាងប្រទេស សមាជិកអាស៊ាន និងជំរុញការតភ្ជាប់តំបន់សំដៅសម្រេចឲ្យបាននូវចក្ខុវិស័យសហគមន៍អាស៊ាន ឆ្នាំ២០២៥។

មេដឹកនាំអាស៊ានក៏បានវាយតម្លៃខ្ពស់ ចំពោះកម្មវិធីជំនួយបច្ចេកទេសថ្មី រវាងអាស៊ាន និង ភ្នាក់ងារអភិវឌ្ឍន៍អន្តរជាតិ សហរដ្ឋអាមេរិក ស្តីពីកំណើនសេដ្ឋកិច្ចប្រកបដោយបរិយាប័ន្ន ក្នុងតំបន់អាស៊ាន តាមរយ:នវានុវត្តន៍ពាណិជ្ជកម្ម និងពាណិជ្ជកម្មអេឡិចត្រូនិក សម្រាប់ឆ្នាំ២០១៩-២០២៣ ដែលនឹងបន្តជួយលើកកម្ពស់ការកសាងសហគមន៍អាស៊ាន។

នៅក្នុងកិច្ចប្រជុំកំពូលនេះដែរ មេដឹកនាំអាស៊ាន សហរដ្ឋអាមេរិក បានឈានទៅចេញផ្សាយសេចក្តីប្រកាសរបស់ ប្រធានកិច្ចប្រជុំកំពូលអាស៊ាន សហរដ្ឋអាមេរិក លើកទី៧ និងបានអនុម័តសេចក្តីប្រកាសរបស់ថ្នាក់ដឹកនាំអាស៊ាន សហរដ្ឋអាមេរិក ស្តីពីសន្តិសុខថាមពល៕

មន្ត្រីជាន់ខ្ពស់ធនាគារពិភពលោកអបអរសាទរកម្ពុជាដែលមានសេដ្ឋកិច្ចរីកចម្រើនគួរជាទីមោទនៈ

ដោយគង់ សូរិយា

ភ្នំពេញៈ លោកស្រី Dina Umali Deininger ប្រធានប្រតិបត្តិគម្រោងនៃការិយាល័យធនាគារពិភពលោក ប្រចាំទីក្រុងវ៉ាស៊ិនតោន សហរដ្ឋអាមេរិកបានសម្តែងការអបអរសាទរចំពោះការរីកចម្រើនសេដ្ឋកិច្ចកម្ពុជាគួរជាទីមោទនៈ។

លោកស្រីបានមានប្រសាសន៍បែបនេះ ក្នុងជំនួបជាមួយលោកឧបនាយករដ្ឋមន្រ្តីជា សុផារ៉ារដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់នាព្រឹកថ្ងៃទី៤ វិច្ឆិកានេះ។លោកស្រីបន្តថា ប្រទេសកម្ពុជាមានសេដ្ឋកិច្ចរីកចម្រើនគួរជាទីមោទន និងបានប្រែក្លាយខ្លួនទៅជាប្រទេស មានប្រាក់ចំណូលមធ្យមកាលពីឆ្នាំ២០១៥។

លោកស្រី Dina Umali Deininger បានមានប្រសាសន៍ថា “កម្ពុជាបានកាត់បន្ថយកម្រិតភាពក្រីក្រ ព្រមទាំងបង្កើនកម្រិតជីវភាពរស់នៅល្អប្រសើរ”។

លោកស្រីក៏បានកើតសរសើរពីការអនុវត្តគម្រោងកន្លងមក និងកិច្ចសហប្រតិបត្តិការរួមគ្នានាពេលខាងមុខផងដែរ”។ ជាមួយនេះ លោកស្រីបានថ្លែងអំណរគុណចំពោះកិច្ចសហការល្អរវាងក្រសួងរៀបចំដែនដី នគរូបនីយកម្ម និងសំណង់ ជាមួយធនាគារពិភពលោក ដោយធានាបានូវការអនុវត្តសកម្មភាពការងាររបស់គម្រោងបែងចែកដី ដើម្បីសង្គមកិច្ច និងការអភិវឌ្ឍសេដ្ឋកិច្ចទទួលបានជោគជ័យទាន់ពេល ដែលគម្រោងនេះ គឺជាផ្នែកមួយគាំទ្រនឹងកម្មវិធីសម្បទានដី សង្គមកិច្ចរបស់រាជរដ្ឋាភិបាលកម្ពុជា ។

ក្នុងជំនួបនេះ លោកស្រី Dina Umali Deininger ប្រធានប្រតិបត្តិគម្រោងនៃការិយាល័យធនាគារពិភពលោក ប្រចាំទីក្រុងវាស៊ិនតោន សហរដ្ឋអាមេរិកបានឱ្យដឹងថា ការដែលលោកស្រី ដឹកនាំគណៈប្រតិភូធនាគារពិភពលោក ចូលជួបសម្ដែងការគួរសមជាមួយ ឯកឧត្តមឧបនាយករដ្ឋមន្រ្តី ជា សុផារ៉ា នាពេលនេះ គឺក្នុងគោលបំណងដើម្បីសួរសុខទុក្ខ និងស្វែងយល់ពីគម្រោងវិនិយោគហិរញ្ញប្បទានដោយធនាគារពិភពលោក ដែលកំពុងដំណើរការអនុវត្តជាទូទៅនៅកម្ពុជា និងស្វែងរកយោបល់អនុសាសន៍ជុំវិញការត្រៀមរៀបចំអនុវត្តគម្រោង LASED III នាពេលខាងមុខ។

ជាការឆ្លើយតប លោកជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ មាន ប្រសាសន៍ថា ក្រសួងប្តេជ្ញាអនុវត្តគម្រោងសម្បទានហិរញ្ញប្បទាន របស់ធនាគារពិភពលោក ឱ្យមានប្រសិទ្ធភាពនិងបញ្ចប់ទៅតាមផែនការគ្រោងទុកនៅបំណាច់ឆ្នាំ២០២១។ បច្ចុប្បន្នក្រសួងកំពុងបន្តកំណត់លទ្ធភាពដី និងកំណត់អត្តសញ្ញាណប្រជាពលរដ្ឋក្រីក្រ ដើម្បីអនុវត្តកម្មវិធីសម្បទានដីសង្គមកិច្ច ជាមួយនេះ ក៏ត្រូវត្រួតពិនិត្យមើល ពីការចែកដីហើយសម្បទានិក មិនបានយកទៅប្រើប្រាស់ផងដែរ។

ម៉្យាងទៀតក្រសួងក៏ត្រូវការហិរញ្ញប្បទាន លើសកម្មភាពអាទិភាពមួយចំនួនដូចជា រៀបចំកសាងផែនការប្រើប្រាស់ដី ឃុំ សង្កាត់ ស្រុក ខណ្ឌ ដោយបច្ចុប្បន្ន ធនាគារពិភពលោកបានជួយ ចំនួន៩០ឃុំ ប៉ុន្តែរាជរដ្ឋាភិបាលត្រូវការជំនួយយ៉ាងតិច៩០០ឃុំ នៅឆ្នាំក្រោយ។ ផែនការប្រើប្រាស់ដីនេះ នឺងជួយពន្លឿនកំណើនសេដ្ឋកិច្ចខ្លាំងនៅជនបទនិងកាត់បន្ថយភាពក្រីក្រផងដែរ។

លោកឧបនាយករដ្ឋមន្រ្តីបានបន្តថា ការចុះបញ្ជីដីសហគមន៍ជនជាតិដើមភាគតិច និងចុះបញ្ជីដីរដ្ឋ ហិរញ្ញប្បទានគាំទ្រលំនៅឋានសមរម្យ ធន់នឹងអាកាសធាតុសម្រាប់ជួយប្រជាពលរដ្ឋក្រីក្ររងគ្រោះ ដោយគ្រោះធម្មជាតិ ដូចជាបាក់ច្រាំង លិចទឹក ខ្យល់ព្យុះជាដើម។ ក្រសួងបានរៀបចំមន្រ្តីអនុវត្តគម្រោងចំនួន២៧រូប ដែលសុទ្ធសឹងតែជាមន្រ្តីសកម្ម និងជួយឱ្យគម្រោងទទួលបានជោគជ័យ ។ ប្រសិនបើមានការខ្វះខាតបុគ្គលិក រឺសម្ភារៈផ្សេងទៀត ក្រសួងត្រៀមនឹងគាំទ្របន្ថែមទៀត។

លោកបន្តថា ក្រសួងមានមោទនាភាព ដែលបានទទួលការគាំទ្រពីធនាគារពិភពលោកទាំងបច្ចេកទេស និងហិរញ្ញប្បទាន ប៉ុន្តែកន្លងមកឃើញថា មានមន្រ្តីធនាគារពិភពលោកផ្នែកសុវត្ថិភាពសង្គម ជួយមិនទាន់បានគ្រប់គ្រាន់ ដោយសារតែមានពេលវេលាមមាញឹកពេក ដូចនេះការរៀបចំឯកសារសុវត្ថិភាពសង្គមមានការយីតយ៉ាវ មិនទាន់សភាពការណ៍វិវត្តន៍របស់គម្រោង ដែលត្រៀមទទួលហិរញ្ញប្បទានបន្ថែមសម្រាប់គម្រោង LASED III ដូចនេះសូមជួយណែនាំមន្រ្តីរដ្ឋាភិបាលបន្ថែមឱ្យបានគ្រប់គ្រាន់ ដើម្បីសម្រេចបានការបង្កើតឯកសារគម្រោង LASED III ឱ្យបានទាន់ពេលវេលា៕

អាមេរិកប្តេជ្ញានឹងបន្តធ្វើជាវិនិយោគិនធំជាងគេនៅតំបន់ឥណ្ឌូប៉ាស៊ីហ្វិក

ដោយ Donald Lee

បាងកកៈ រដ្ឋមន្ត្រីក្រសួងពាណិជ្ជកម្មអាមេរិក បាននិយាយនៅក្នុងសុន្ទរកថាមួយ ក្នុងអំឡុងពេលកិច្ចប្រជុំកំពូលអាស៊ាន ដែលត្រូវបានធ្វើឡើងនៅទីក្រុងបាងកកនៅសប្តាហ៍នេះថា អាមេរិកប្តេជ្ញាថានឹងនៅតែ ជាប្រភពវិនិយោគទុនផ្ទាល់ពីបរទេស (FDI) កំពូលនៅក្នុងតំបន់ឥណ្ឌូប៉ាស៊ីហ្វិក។

លោក Wilbur Ross រដ្ឋមន្ត្រីក្រសួងពាណិជ្ជកម្មអាមេរិកបានថ្លែងនៅក្នុងវេទិកាធុរកិច្ចឥណ្ឌូ ប៉ាស៊ីហ្វិកដែលឧបត្ថម្ភ ដោយអាមេរិកនៅទីក្រុងបាងកកនៅថ្ងៃនេះថា “អាមេរិកបានចូលរួម និងប្តេជ្ញាចិត្តយ៉ាងពេញលេញចំពោះតំបន់នេះ”។

លោករដ្ឋមន្ត្រីក្រសួងពាណិជ្ជកម្មអាមេរិករូបនេះបាននិយាយថា អាមេរិកកំពុងដឹកនាំប្រទេសទាំងអស់ នៅក្នុង FDI នៅក្នុងតំបន់ជាពិសេសចិន។

របាយការណ៍របស់ក្រសួងការបរទេសអាមេរិក ចេញផ្សាយនៅថ្ងៃអាទិត្យនេះបានឱ្យដឹងថា “ការវិនិយោគរបស់អាមេរិកនៅអាស៊ាន បានកើនឡើងដល់២៧១ពាន់លានដុល្លារក្នុងឆ្នាំ ២០១៨ ដែលច្រើនជាងការដែលអាមេរិក បានដឹកនាំទៅចិន និងជប៉ុន។

រដ្ឋាភិបាលសហរដ្ឋអាមេរិក បានមកដល់កិច្ចប្រជុំកំពូលអាស៊ាន ដោយមានប្រតិភូជាមួយនឹងក្រុមហ៊ុនអាមេរិកជាច្រើន ដែលចង់ភ្ជាប់បណ្តាញអាជីវកម្មនៅទូទាំងតំបន់។

មន្ត្រីមកពីក្រុមហ៊ុនអាមេរិកតំណាងឱ្យក្រុមហ៊ុន ដែលមានប្រាក់ចំណូលប្រចាំឆ្នាំសរុបជាង២,៨ទ្រីលានដុល្លារ។ នេះបើយោងតាមការចេញផ្សាយ របស់ក្រសួងការបរទេសអាមេរិក។

ក្រុមហ៊ុនអាមេរិក រួមមានក្រុមហ៊ុន AES Corporation ក្រុមហ៊ុន Baxter International ក្រុមហ៊ុន Bechtel ក្រុមហ៊ុន Bell Textron ក្រុមហ៊ុន Boeing ក្រុមហ៊ុន Capstone Turbine ក្រុមហ៊ុន Cheniere Energy ក្រុមហ៊ុន Citi ក្រុមហ៊ុន Honeywell International ក្រុមហ៊ុន LNG Limited/Magnolia LNG ក្រុមហ៊ុន Lockheed Martin ក្រុមហ៊ុន Qualcomm ក្រុមហ៊ុន Securiport ក្រុមហ៊ុន Sierra Nevada ក្រុមហ៊ុន Tellurian ក្រុមហ៊ុន Tesla និងក្រុមហ៊ុន Varian Medical Systems និងក្រុមប្រឹក្សាវិស្វកម្មអាមេរិកនៃក្រុមហ៊ុនវិស្វកម្ម៕

កម្ពុជាបានទទួលភ្ញៀវទេសចរអន្តរជាតិចំនួន ៤,៨១លាននាក់ក្នុងរយៈពេល៩ខែឆ្នាំនេះ

ដោយ ប៊ី

ភ្នំពេញៈ កម្ពុជាបានទទួលភ្ញៀវទេសចរអន្តរជាតិចំនួន ៤,៨១លាននាក់ ក្នុងរយៈពេល៩ ខែឆ្នាំ២០១៩ កើនឡើង ១០ភាគរយ បើធៀបនឹងរយៈពេលដូចគ្នាកាលពីឆ្នាំមុន។ នេះបើតាមប្រសាសន៍លោកលោកថោង ខុន រដ្ឋមន្រ្តីក្រសួងទេសចរណ៍ នៅថ្ងៃចន្ទនេះ។

លោកបានថ្លែងថា ប្រហែល ៧០,៥ ភាគរយនៃភ្ញៀវទេសចរបានមកដល់កម្ពុជាតាមផ្លូវអាកាស ២៧,៤ភាគរយតាមផ្លូវ គោក និង២,១ភាគរយតាមផ្លូវទឹក។ លោកបានបន្ថែមថា ចិន វៀតណាម និងឡាវគឺជាប្រភពធំបំផុតបរទេសនៅកម្ពុជា។

ទេសចរណ៍គឺជាវិស័យធំមួយនៃវិស័យទាំងបួន ដែលគាំទ្រសេដ្ឋកិច្ចកម្ពុជា។

កាលពីឆ្នាំមុន កម្ពុជាទទួលបានភ្ញៀវទេសចរបរទេសចំនួន៦,២លាននាក់ ក្នុងនោះមានជនជាតិចិន២លាននាក់ និងទទួលបានប្រាក់ចំណូលសរុបចំនួន៤,៣៥ ពាន់លានដុល្លារអាមេរិក។ នេះបើយោងតាមក្រសួងទេសចរណ៍។

វិស័យនេះបានចូលរួមចំណែក១២,៧ភាគរយ ដល់ផលិតផលក្នុងស្រុកសរុបកម្ពុជា។

កម្ពុជាមានភាពល្បីល្បាញ ដោយមានតំបន់បេតិកភណ្ឌពិភពលោកចំនួន៣ គឺអង្គរវត្ត ព្រះវិហារ និងតំបន់សំបូរព្រៃគុហ៍។

ក្រៅពីនេះ កម្ពុជាមានឆ្នេរសមុទ្រលាតសន្ធឹងលាតសន្ធឹង ចម្ងាយ៤៥០គីឡូម៉ែត្រក្នុងខេត្តចំនួន៤នៅប៉ែកនិរតី ដែលមានខេត្តកោះកុង ព្រះសីហនុ កំពត និងកែប៕ (ប្រភព Xinhua)៕

សម្តេចតេជោនឹងសម្ពោធដាក់ឲ្យដំណើរការជាផ្លូវការរោងចក្រស៊ីម៉ងតិ៍ ថៃ ប៊ុនរ៉ុងនៅខេត្តកំពតនៅថ្ងៃទី១៤ ខែវិច្ឆិកា

ដោយ វុត្ថា

ខេត្តកំពតៈ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន អញ្ជើញសម្ពោធដាក់ឲ្យដំណើរការជាផ្លូវការរោងចក្រស៊ីម៉ងតិ៍ ថៃ ប៊ុនរ៉ុង ស្ថិតនៅក្នុងឃុំល្អាង ស្រុកដងទង់ ខេត្តកំពតនៅថ្ងៃទី ១៤ ខែវិច្ឆិកា ឆ្នាំ ២០១៩ ខាងមុខនេះ។

លោក ជាវ តាយ អភិបាលខេត្តកំពត នៅថ្ងៃទី៤ ខែវិច្ឆិកា ឆ្នាំ ២០១៩ នេះ បើកកិច្ចប្រជុំផ្សព្វផ្សាយសេចក្ដីសម្រេចស្ដីពី ការបង្កើតគណៈកម្មការ និងអនុគណៈកម្មការ ដើម្បីរៀបចំបដិសណ្ឋារកិច្ច សម្ដេចអគ្គមតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន អញ្ជើញជាអធិបតីដ៏ខ្ពង់ខ្ពស់ក្នុងពិធីសម្ពោធដាក់ឲ្យដំណើរការជាផ្លូវការរោងចក្រស៊ីម៉ងតិ៍ ថៃ ប៊ុនរ៉ុង និងបញ្ជាក់អំពីការអញ្ជើញសមាសភាពចូលរួម និងការទទួលខុសត្រូវ។

ក្រុមហ៊ុន ថៃប៊ុនរ៉ុង បានចំណាយដើមទុនវិនិយោគ ទឹកប្រាក់សរុប១២០លានដុល្លារអាមេរិក សម្រាប់ការកសាងរោងចក្រស៊ីម៉ងតិ៍នេះ និងគម្រោងកំណែទម្រង់បច្ចេកវិទ្យាផលិតកម្ម ។ ខ្សែសង្វាក់ផលិកម្មថ្មីនេះ បំពាក់ទៅដោយបច្ចេកវិទ្យាទំនើប ដែលមានសមត្ថភាពផលិតស៊ីម៉ងតិ៍ បានប្រមាណ២លានតោនក្នុង១ឆ្នាំ និងផ្តល់ឪកាសការងារដល់ពលរដ្ឋកម្ពុជាបានចំនួន៣០០នាក់។

សម្តេចតេជោហ៊ុន សែន នាយករដ្ឋមន្ត្រីនៃកម្ពុជា ធ្លាប់មានប្រសាសន៍កន្លងមកនេះថា រោងចក្រស៊ីម៉ង់តិ៍នៅកម្ពុជា នឹងចូលរួមចំណែកច្រើន ក្នុងការផ្គត់ផ្គង់សភារៈសំណង់ នៅកម្ពុជា និងកាត់បន្ថយការនាំចូលស៊ីម៉ងតិ៍មកពីបរទេស។ ជាមួយគ្នានេះ សម្តេចតេជោ ក៏បានលើកទឹកចិត្តឱ្យធ្វើលំនៅឋាន និងសំណង់ផ្សេងៗដោយប្រើដែក និងស៊ីម៉ងតិ៍ ព្រោះវាបានរួមចំណែកទប់ស្កាត់ការកាប់ឈើដើម្បីធ្វើលំនៅឋាន។

រោងចក្រផលិតស៊ីម៉ង់ត៍ថៃប៊ុនរ៉ុងនេះគឺស្ថិតនៅក្នុងភូមិល្អាង ឃុំល្អាង ស្រុកដងទង់ ខេត្តកំពត អាចមានសមត្ថភាពផលិតបាន ប្រមាណ៣០០០តោនក្នុងមួយថ្ងៃ ខណៈដែលរោងចក្រផលិតស៊ីម៉ង់ត៍ផ្សេងទៀតក្នុងខេត្តកំពត អាចផលិតបានក្នុងរង្វង់លើសខ្វះគ្នាបន្តិចបន្តួច។

ខេត្តកំពតគឺជាខេត្តមានសកត្តានុពល ក្នុងវិស័យឧស្សាហកម្ម ក្នុងនោះមានរោងចក្រផលិតស៊ីម៉ង់ត៍ចំនួន៣កន្លែង រួមមានរោងចក្រជីពម៉ុង រោងចក្រចក្រីទីង និងរោងចក្រខេស៊ីម៉ិន ដែលអាចផ្គត់ផ្គង់ស៊ីម៉ង់ត៍តម្រូវការប្រើប្រាស់ ក្នុងប្រទេសបានជាង៧០% នៅក្នុងឆ្នាំ២០១៨កន្លងមកនេះ៕

អ្នកជំនាញ៖ ការផ្សព្វផ្សាយតាមបច្ចេកវិទ្យាមានប្រសិទ្ធភាពខ្ពស់សម្រាប់មុខជំនួញ

ដោយៈ រ៉ាណេត

ភ្នំពេញៈ ការផ្សព្វផ្សាយតាមបែបបច្ចេកវិទ្យា (Digital Marketing) គឺសំដៅទៅលើការធ្វើទីផ្សារទាំងឡាយណា ដែលប្រើប្រាស់ប្រព័ន្ធបច្ចេកវិទ្យានិង អ៊ីនធើណេត។

Digital Marketing បានចាប់ផ្តើមមានភាពសុះសាយ ចាប់តាំងពីអំឡុងឆ្នាំ២០០៩ ខណៈពេលដែលវត្តមាន នៃបណ្តាញទំនាក់ទំនងសង្គម Facebook ចូលមកកាន់ទីផ្សារកម្ពុជា ជាពិសេសនៅត្រឹមឆ្នាំ២០១២ ដែលប្រជាជនខ្មែរមួយចំនួនបានស្គាល់ និងយល់កាន់តែច្បាស់ពីការធ្វើទីផ្សារ ដោយបច្ចេកវិទ្យាដើម្បីទាញយកផលប្រយោជន៍។

លោក ទ្បេង ឃេរី នាយកប្រតិបត្តិផ្នែកទីផ្សារឌីជីថលរបស់ក្រុមហ៊ុន រ៉ិច មី (Riich Me Co., Ltd) ដែលទទួលបានសិទ្ធិក្នុងការគ្រប់គ្រងទីផ្សារ នៃមជ្ឈមណ្ឌលពាណិជ្ជកម្ម និងពិព័រណ៍ B2B Park បានមានប្រសាសន៍ថា ការធ្វើទីផ្សារលើប្រព័ន្ធ Digital វាមិនមែនមានត្រឹមតែនៅលើបណ្តាញ ទំនាក់ទំនងសង្គម Facebook ប៉ុណ្ណោះទេ ប៉ុន្តែនៅមានប ណ្តាញផ្សេងៗជាច្រើនទៀត ដូចជា ការធ្វើទីផ្សារតាមរយៈបណ្តាញ SMS, Email Marketing, Website, Google, YouTube, Twitter, LinkedIn, Telegram, Instagram ដែលជាប្រព័ន្ធ Social Media ដែលសុទ្ធតែជាផ្នែកមួយយ៉ាងសំខាន់របស់ Digital Marketing ដែលត្រូវបានកំណត់ប្រើប្រាស់ និងគ្រប់គ្រងដោយក្រុមហ៊ុនជំនាញ។

លោកបានបន្តទៀតថា “ការធ្វើទីផ្សារដោយប្រព័ន្ធ Digital Marketing គឺមានអត្រាជោគជ័យខ្ពស់សម្រាប់បណ្តាអាជីវកម្ម និងមុខជំនួញផ្សេងៗ និងការជំរុញប្រភេទផលិតផល សេវាកម្មរបស់ក្រុមហ៊ុនទៅកាន់ទីផ្សារតាមរយៈការផ្សព្វផ្សាយ”។ លោកបញ្ជាក់ថា “បច្ចុប្បន្ននេះ ការផ្សព្វផ្សាយពីព័ត៌មានរបស់ក្រុមហ៊ុន ក៏ដូចជាផ្សព្វផ្សាយពីប្រភេទសេវាកម្ម ឬផលិតផលនានា គេមិនប្រើវិធីសាស្ត្របែបប្រពៃណី ដូចជា ការបោះពុម្ពខិតប័ណ្ណដើរចែកតាមទីប្រជុំជន ឬតាមតំបន់ភ្លើងស្តុបនោះទៀតហើយ គឺគេបានងាកមកប្រើប្រព័ន្ធ Digital Marketing ដែលចំណាយលុយតិច ងាយស្រួលក្នុងការប្រើប្រាស់សម្រាប់ផ្សព្វផ្សាយ ហើយទទួលបានលទ្ធផលល្អ មានប្រសិទ្ធភាពខ្ពស់ ចំគោលដៅដែលចង់បាន”។

លោក ឡេង ឃេរី បានមានប្រសាសន៍បន្តទៀតថា ជាការជួយជំរុញ និងគាំទ្រដល់បណ្តាក្រុមហ៊ុនខ្នាតតូច និងមធ្យម (SME) នៅកម្ពុជា ជាមួយនឹងកិច្ចដំណើរការទៅលើប្រព័ន្ធ Digital Marketing នេះ ក្រុមហ៊ុន Riich Me Cambodia បានបង្កើតជា E-commerce Platform ដើម្បីផ្តល់ភាពងាយស្រួល និងលទ្ធភាពដល់ក្រុមហ៊ុននានាសម្រាប់ដំណើរការអាជីវកម្ម ក៏ដូចជាជំរុញផលិតផលទីកាន់ទីផ្សារឱ្យបានទូលាយ ជាពិសេសមានឱកាសក្នុងការអភិវឌ្ឍក្រុមហ៊ុនឱ្យកាន់តែមានភាពល្អប្រសើរ”។

លោកបញ្ជាក់ថា “តាមរយៈ E-commerce Platform មួយនេះ ក្រៅពីអាចជួយចូលរួមអភិវឌ្ឍន៍ ក្រុមហ៊ុនឱ្យមានភាពរីកចម្រើន ថែមទាំងអាចជំរុញផលិត និងសេវាកម្មរបស់ក្រុមហ៊ុន ចេញទៅកាន់ទីផ្សារអន្តរជាតិបានទៀតផង”៕

អាមេរិកប្តេជ្ញាបន្តលើកកម្ពស់ទំនាក់ទំនងសេដ្ឋកិច្ច និងពាណិជ្ជកម្មជាមួយកម្ពុជាបន្ថែមទៀត

ដោយ វុត្ថា

ភ្នំពេញៈ ឯកអគ្គរដ្ឋទូតសហរដ្ឋអាមេរិក លោក Patrick Murphy បានវាយតម្លៃខ្ពស់ចំពោះកិច្ចសហកិច្ចសហប្រតិបត្តិការ រវាងភាគីកម្ពុជា-អាមេរិក និងបានប្តេជ្ញាបន្តលើកកម្ពស់ទំនាក់ទំនងសេដ្ឋកិច្ច និងពាណិជ្ជកម្មបន្ថែមទៀត។

លោកឯកអគ្គរដ្ឋទូតរូបនេះ បានមានប្រសាសន៍បែបនេះ នៅក្នុងជំនួបពិភាក្សាការងារជាមួយ លោកប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មនៅព្រឹកថ្ងៃទី៤ ខែវិច្ឆិកា ឆ្នាំ២០១៩នេះ នៅមុនកិច្ចប្រជុំកំពូលអាស៊ាន-អាមេរិកលើកទី៧ (7th ASEAN-US Summit) ដែលរៀបចំឡើងនៅមជ្ឈមណ្ឌលពិព័រណ៍ និងសន្និសីទ IMPACT Muang Thong Thani ប្រទេសថៃ។

លោកប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានសម្តែងការអបអរសាទរជូន លោក W. Patrick Murphy ក្នុងឱកាសដែលត្រូវបានតែងតាំង ជាឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា។ ជាមួយគ្នានេះលោករដ្ឋមន្រ្តី ប៉ាន សូរស័ក្តិបានជំរុញឱ្យវិស័យធុរកិច្ចអាមេរិកមកវិនិយោគនៅកម្ពុជាឱ្យកាន់តែច្រើន ក៏ដូចជាចូលរួមក្នុងពិព័រណ៍ពាណិជ្ជកម្ម និងការផ្គូផ្គងធុរកិច្ច ដើម្បីជំរុញវិស័យពាណិជ្ជកម្មឱ្យកាន់តែរីកចម្រើន។

ទំហំពាណិជ្ជកម្មរវាងកម្ពុជា និងសហរដ្ឋអាមេរិក បានឈានដល់៣៤៣៨លានដុល្លារអាមេរិក ក្នុងឆ្នាំ២០១៨ ដែលក្នុងនោះកម្ពុជានាំចេញទៅកាន់សហរដ្ឋអាមេរិក មានចំនួន៣,០៥១ លានដុល្លារ ខណៈកម្ពុជាចូលមកវិញមានចំនួន៣៨៧ លានដុល្លារអាមេរិក៕

ឯកអគ្គរាជទូតជប៉ុននឹងផ្សព្វផ្សាយពីសក្តានុពលខេត្តព្រះសីហនុដល់ប្រជាជនរបស់ខ្លួន

ដោយវុត្ថា

ភ្នំពេញៈ ឯកអគ្គរដ្ឋទូតជាប៉ុនប្រចាំនៅកម្ពុជា លោក MIKAMI MASAHIRO បានសន្យាជួយផ្សព្វផ្សាយពីសក្តានុពលខេត្តព្រះសីហនុ ដល់ប្រជាជនជប៉ុនមកកាន់ខេត្តព្រះសីហនុកន្លងមកប្រជាជនជប៉ុនស្គាល់តែអង្គរ ខេត្តសៀមរាប។

មានប្រសាសន៍នៅក្នុងជំនួបជាមួយលោក គួច ចំរើនអភិបាលខេត្តព្រះសីហនុនៅព្រឹកថ្ងៃទី៤ ខែវិច្ឆិកា ឆ្នាំ២០១៩នេះឯកអគ្គរាជទូចជាប៉ុនប្រចាំនៅកម្ពុជា លោក MIKAMI MASAHIRO បានឱ្យដឹងថា នេះជាលើកទីមួយដែលលោកមកទស្សនកិច្ច នៅខេត្តព្រះសីហនុ បន្ទាប់ពីមកធ្វើការនៅរាជធានីភ្នំពេញ។

លោកបន្តថា កាលពីឆ្នាំមុន លោកក៏បានមកភ្នំពេញចូលរួមកិច្ចប្រជុំអាស៊ាន ហើយមកដល់បច្ចុប្បន្នកម្ពុជាមានការអភិវឌ្ឍខ្លាំង។ កម្ពុជាឆ្លងកាត់សង្គ្រាមជាច្រើនឆ្នាំ កម្ពុជាសម្រេចបាននូវសុខសន្តិភាព ស្ថេរភាពនយោបាយ ខេត្តព្រះសីហនុមានអគារខ្ពស់ៗជាច្រើនកំពុងមានការអភិវឌ្ឍខ្លាំងគួរឱ្យចាប់អារម្មណ៍។

ឯកអគ្គរាជទូតរូបនេះបន្ថែមថា រាជរដ្ឋាភិបាលជប៉ុន មានកិច្ចសហប្រតិបត្តិការល្អជាមួយកម្ពុជា ពិសេសជនជាតិជប៉ុន ដែលមករកស៊ីនៅខេត្តព្រះសីហនុ រងគ្រោះដោយសារការរលំបាក់អគារកាលពីកន្លងមក ហើយរដ្ឋបាលខេត្ត ក៏ដូចជារាជរដ្ឋាភិបាលបាន យកចិត្តទុកដាក់ដោះស្រាយបានទាន់ពេលវេលា។

ជាមួយគ្នានេះ លោកឯកអគ្គរាជទូតជប៉ុន ចង់ដឹងពីការអភិវឌ្ឍខេត្ត លើបញ្ហាផ្លូវ លូរទឹកស្អុយ មានបញ្ហាប្រឈមអ្វីខ្លះនិងមានគម្រោងអភិវឌ្ឍខេត្តបែបណា និងថ្លែងអំណរគុណរដ្ឋបាលខេត្ត បានសហការ នៃកាចូលចតនាវាកងកងទ័ពជើងទឹកជប៉ុននៅខេត្តព្រះសីហនុ នៅពេលខាងមុខនឹងមាននាវាជាច្រើនទៀត ចូលចតនៅកំពង់ផែក្រុងព្រះសីហនុ។

លោកគួច ចំរើន អភិបាលខេត្តព្រះសីហនុ បានថ្លែងអំណរគុណរាជរដ្ឋា ភិបាលជប៉ុន គាំទ្រការអភិវឌ្ឍន៏នៅកម្ពុជា ការអភិវឌ្ឍនាពេលបច្ចុប្បន្នធ្វើឱ្យផ្លូវក្នុងក្រុងមានការខូចខាតយ៉ាងធ្ងន់ធ្ងរ ឈានទៅខូចខាតទាំងស្រុង បើយើងមិនបានស្ថាបនាជួសជុលនោះទេ ។

លោកបន្តថា ខេត្តព្រះសីហនុ ជាខេត្តមានសក្តានុពលលើវិស័យទេសចរណ៍ ហើយការអភិវឌ្ឍក្នុងរយៈពេលប៉ុន្មានឆ្នាំចុងក្រោយនេះ ធ្វើឱ្យខេត្តព្រះសីហនុ ក្លាយជាតំបន់សេដ្ឋកិច្ចពហុបំណង មានវិស័យសំខាន់ៗដូចជា វិស័យសំណង់ឧស្សាហកម្ម ពាណិជ្ជកម្ម ដឹកជញ្ជូន និងទេសចរណ៍ ។ ខេត្តមានកំពង់ផែអន្តរជាតិទឹកជ្រៅ ព្រលានយន្តហោះ ផ្លូវដែក ផ្លូវគោកដោយសារកំណើន នៃការដឹកជញ្ជូនមានការកើនឡើង ក្នុងមួយថ្ងៃមានកុងតឺន័រប្រមាណ៧០០ ដឹកចេញទៅកាន់រាជធានីភ្នំពេញ និងបណ្តាខេត្តផ្សេងទៀត ។

លោកអភិបានលខេត្តរូបនេះបន្តថា កាលពីថ្ងៃទី៣០ខែសីហា ២០១៩កន្លងមក ក្នុងកិច្ចប្រជុំគណ:រដ្ឋមន្ត្រី សម្តេចតេជោ បានបញ្ចេញកញ្ចប់ថវិកាសាងសង់ផ្លូវក្នុងក្រុងព្រះសីហនុ៣៤ខ្សែ គ្រោងនឹងបើកការដ្ឋាននៅថ្ងៃទី១៦ វិច្ឆិកាខាងមុខនេះ។

លោកបានបញ្ជាក់ទៀតថា ខេត្តមានសក្តានុពលលើគ្រប់វិស័យ ក្នុងនោះរាជរដ្ឋាភិបាលបាន និងកំពុងសាងសង់ផ្លូវល្បឿនលឿន ពីរាជធានីភ្នំពេញ មកខេត្តព្រះសីហនុ ផ្តល់ភាពអនុគ្រោះដល់វិស័យទេសចរណ៍ និងវិនិយោគនៅពេលខាងមុខ៕

ក្រសួងបរិស្ថានលក់ឥណទានកាបូនក្នុងខេត្តស្ទឹងត្រែងបាន១១លានដុល្លារ

ដោយៈ រ៉ាណេត

ភ្នំពេញៈ ក្រសួងបរិស្ថានបានលក់ឥណទានកាបូន ក្នុងដែនជម្រកសត្វព្រៃ ព្រៃឡង់ ស្រុកកែវសីមា ខេត្តស្ទឹងត្រែង បានចំនួន១១លានដុល្លារ សម្រាប់ទ្រទ្រង់ដល់ការការពារ និងអភិរក្ស ក៏ដូចជាជួយលើកកម្ពស់ជីវភាពរបស់ប្រជាសហគមន៍មូលដ្ឋាន ដែលឆ្លើយតបទៅនឹងគោលការណ៍ហិរញ្ញប្បទាននិរន្តរភាព ( Sustainable Financing )។

រដ្ឋមន្ត្រីក្រសួងបរិស្ថាន លោកសាយ សំអាល់ បានមានប្រសាសន៍នៅក្នុងពិធីបើកសន្និបាតបូកសរុបលទ្ធផលការងារបរិស្ថាន ឆ្នាំ២០១៩ និងទិសដៅការងារ ឆ្នាំ២០២០» នៅទីស្តីការក្រសួងបរិស្ថាន នាព្រឹកថ្ងៃទី៤ ខែវិច្ឆិកា ឆ្នាំ២០១៩នេះថា ចំពោះចំណូលបានមកពីឥណទានកាបូន ប្រមាណ១១លានដុល្លារអាមេរិកនេះ គឺជាអត្ថប្រយោជន៍ជាក់ស្តែង កើតចេញពីកិច្ចខិតខំប្រឹងប្រែង ក្នុងការគ្រប់គ្រងតំបន់ការពារធម្មជាតិបានល្អប្រសើរ។

លោកបានលើកឡើងថា ដោយមានកិច្ចសហប្រតិបត្តិការល្អ ជាមួយអង្គការ WCS អង្គការCI និងអង្គការ Wildlife Alliance ក្រសួងបរិស្ថាន បានលក់ឥណទានកាបូននៅក្នុងដែនជម្រកសត្វព្រៃកែវសីមា ដែនជម្រកសត្វព្រៃព្រៃឡង់ (ក្នុងភូមិសាស្ត្រខេត្តស្ទឹងត្រែង) ដែនជម្រកសត្វព្រៃក្រវ៉ាញខាងត្បូង និងដែនជម្រកសត្វព្រៃតាតៃ ក្រោមក្របខណ្ឌទីផ្សារស្ម័គ្រចិត្ត ដោយទទួលបានថវិកាសរុបប្រមាណ១១លានដុល្លារអាមេរិក សម្រាប់ទ្រទ្រង់ដល់ការការពារ និងអភិរក្ស ក៏ដូចជាជួយលើកកម្ពស់ជីវភាពរបស់ប្រជាសហគមន៍មូលដ្ឋាន ដែលឆ្លើយតបទៅនឹងគោលការណ៍ហិរញ្ញប្បទាននិរន្តរភាព ( Sustainable Financing )។

ផ្អែកតាមឯកសារបានបង្ហាញថា កាលពីឆ្នាំ២០០៩ អង្គការ Pact Cambodia បានវិនិយោគ នៅក្នុងកម្មវិធីកាត់បន្ថយការបំភាយឧស្ម័ន គាំទ្រដោយអង្គការសហប្រជាជាតិ មិនឲ្យមានការកាប់ព្រៃឈើ ដែលត្រូវបានគេស្គាល់ថាជាកម្មវិធី REDD+។ កម្មវិធី REDD+ ដែលទទួលបានចំណាត់ថ្នាក់ «មាស ៣» ពីសហគមន៍សម្ព័ន្ធបរិយាកាស និងជីវៈចម្រុះ មានគោលបំណងដើម្បីលក់ឥណទានកាបូន ជាថ្នូរនឹងការកាត់បន្ថយការកាប់ព្រៃឈើ នៅក្នុងខេត្តឧត្តរមានជ័យ។

ប៉ុន្តែអង្គការ Pact បានចាកចេញពីគម្រោងនេះ កាលពីខែកក្កដា ឆ្នាំ២០១៣ នៅពេលការលក់មានតម្លៃរហូតដល់
១,២លានដុល្លារ ពីការលក់ឥណទានកាបូនកកើតឡើងវិញ។

កាលពីថ្ងៃទី១១ ខែសីហា ឆ្នាំ២០១៦ ក្រុមហ៊ុន ឌីសនី (Disney) របស់សហរដ្ឋអាមេរិក បានសម្រេចចុះហត្ថលេខាទិញកាបូន រេដបូក (Carbon Redd+) នៅដែនជម្រកសត្វព្រៃកែវសីមាចំនួន ២,៦លានដុល្លារ។ កិច្ចសន្យានេះ ត្រូវបានធ្វើឡើង នៅក្រសួងបរិស្ថាន ក្នុងកិច្ចសន្យារយៈពេល២ឆ្នាំ៕

សម្តេចតេជោស្នើនាយករដ្ឋមន្ត្រីរុស្ស៊ីជួយជំរុញវិនិយោគិនរុស្ស៊ីឲ្យមកវិនិយោគលើវិស័យមួយចំនួនទៀតនៅប្រទេសកម្ពុជា

ដោយ វុត្ថា

ភ្នំពេញៈ សម្តេចតេជោ ហ៊ុន សែននាយករដ្ឋមន្ត្រីនៃកម្ពុជា បានស្នើសុំឱ្យលោក នាយករដ្ឋមន្ត្រីរុស្ស៊ី ជួយជំរុញវិនិយោគិនរុស្ស៊ី ឲ្យមកវិនិយោគបន្ថែមទៀតនៅប្រទេសកម្ពុជា ក្នុងវិស័យមួយចំនួនដូចជា វិស័យកែច្នៃម្ហូបអាហារ កសិឧស្សាហកម្ម ឧស្សាហកម្ម Electronic, ឧស្សាហកម្មបង្គំ និងឧស្សាហកម្មផលិតគ្រឿងម៉ាស៊ីនជាដើម។

សម្ដេចតេជោ នៅក្នុងជំនួបជាមួយលោក Dmitry Medvedev នាយករដ្ឋមន្រ្តីនៃប្រទេសរុស្ស៊ី កាលពីថ្ងៃទី៣ ខែវិច្ឆិកា ឆ្នាំ ២០១៩ ម្សិលមិញនេះ បានឱ្យដឹងថា សម្ដេចពិតជារីករាយអំពីទំហំពាណិជ្ជកម្ម រវាងប្រទេសទាំងពីរ ដែលមានការកើនឡើងកន្លងមកនេះ ហើយក្នុងន័យនេះ គឺដើម្បីពង្រឹងទំហំពាណិជ្ជកម្មបន្ថែមទៀតរវាងប្រទេសទាំងពីរ។

ជាមួយគ្នានេះ សម្ដេចក៏បានស្នើភាគីរុស្ស៊ីពិនិត្យលទ្ធភាព ចាប់ផ្ដើមអនុវត្តន៍គម្រោងទំនើបកម្ម មន្ទីពេទ្យមិត្តភាពខ្មែរសូវៀតនៅក្នុងពេលឆាប់ៗខាងមុខនេះ ព្រោះមន្ទីរពេទ្យនេះជានិមិត្តរូបនៃមិត្តភាព រយៈពេលយូរអង្វែងរវាងប្រទេសយើងទាំងពីរ។

ដោយឡែក ពាក់ព័ន្ធនឹងការចរចាកិច្ចព្រមព្រៀងពាណិជ្ជកម្មសេរីរវាងកម្ពុជា និងសហភាពសេដ្ឋកិច្ចអឺរ៉ាស៊ី កម្ពុជាអរគុណចំពោះការគាំទ្រជាគោលការណ៍របស់រុស្ស៊ីចំពោះកិច្ចប្រឹងប្រែង ឲ្យមានការចរចាកិច្ចព្រមព្រៀងពាណិជ្ជកម្មសេរីរវាងកម្ពុជា និងសហភាពសេដ្ឋកិច្ចអឺរ៉ាស៊ីនេះ។

លោក Dmitry Medvedev នាយករដ្ឋមន្ត្រីរុស្ស៊ីបានឱ្យដឹងដែរថា ប្រទេសរុស្សីចង់សហការជាមួយកម្ពុជា លើវិស័យជាច្រើនរួមទាំងវិស័យឧស្សាហកម្ម ហើយចង់បន្តផ្ដល់ការគាំទ្រទៅដល់កម្ពុជានៅក្នុង កិច្ចសហការលើវិស័យថាមពល ដូចជាវិស័យប្រេង វិស័យទូរគមនាគមន៍ ខាងជលផល និងការបង្កើតកិច្ចសហប្រតិបត្តិការផ្សេងៗទៀត នៅកម្ពុជា។

លោកបន្តថា ចំពោះពាណិជ្ជកម្មសេរីរវាងកម្ពុជា និងសហភាពសេដ្ឋកិច្ចអឺរ៉ាស៊ី នេះជាកិច្ចការមានសារៈសំខាន់ណាស់ ហើយជាគំនិតផ្ដួចផ្ដើមដ៏ល្អ ដែលយើងអាចចុះកិច្ចព្រមព្រៀងនៅពេលខាងមុខនេះក្រោយពីការចរចារួចហើយនោះ។

លោកនាយករដ្ឋមន្ត្រីរុស្ស៊ីបានបញ្ជាក់ទៀតថា យើងអាចមានកិច្ចសហសកាយ៉ាងល្អលើវិស័យឧស្សាហកម្ម វិទ្យាសាស្រ្ត និងវិស័យផ្សេងៗទៀតជាពិសេសនៅក្នុងការដោះមីននៅក្នុងវិស័យការពារជាតិ ដែលប្រទេសរុស្ស៊ីចង់បន្តក្នុងការបណ្ដុះបណ្ដាលមន្ត្រីយោធាកម្ពុជា។

លោកបន្ថែមថា ក្រៅពីនេះទៀត ពាក់ព័ន្ធនឹងមន្ទីរពេទ្យជាគម្រោងដ៏សំខាន់ ហើយយើងនឹងខិតខំប្រឹងប្រែង នៅក្នុងការធ្វើការងារនេះឲ្យបានឆាប់កាន់តែល្អ៕