នៅសល់តែជាងមួយសប្ដាហ៍ទៀត ផ្សារទំនើបដ៏ធំនៅក្រុងព្រះសីហនុ FURI TIMES SQUARE ចាប់បើកដំណើរការហើយ

ដោយ រ៉ាណេត

ក្រុងព្រះសីហនុ៖ គិតត្រឹមថ្ងៃទី១៩ ខែតុលា ឆ្នាំ២០១៩នេះ នៅសល់ត្រឹមតែជាងមួយសប្ដាហ៍ទៀតតែប៉ុណ្ណោះ ផ្សារទំនើបដ៏ធំ និងទាន់សម័យលើកដំបូងគេនៅក្នុងក្រុងព្រះសីហនុ FURI TIMES SQUARE នឹងចាប់ផ្តើមបើកដំណើរការទទួលស្វាគមន៍វត្តមានអតិថិជនរបស់ខ្លួនហើយ។

ជាមួយនឹងការត្រៀមខ្លួនបង្ហាញវត្តមានថ្មី នៃការបើកទំព័រជាប្រវត្តិសាស្ត្រប្រចាំនៅក្នុងក្រុងព្រះសីហនុ ផ្សារទំនើបដ៏ធំលើកដំបូងគេបង្អស់ ប្រចាំនៅក្នុងតំបន់ប៉ូលសេដ្ឋកិច្ចទី២ប្រចាំប្រទេសកម្ពុជា FURI TIMES SQUARE នឹងធ្វើឱ្យមហាជន ក៏ដូចជាអតិថិជនទូទៅមានភាពភ្ញាក់ផ្អើល និងរំភើបយ៉ាងខ្លាំងទៅនឹងទិដ្ឋភាពដ៏អស្ចារ្យ នៃការរចនាម៉ូដផ្សារទំនើបទាំងមូល រាប់ទាំងផ្នែកខាងក្នុង និងខាងក្រៅផងដែរ។

នាយិកាគ្រប់គ្រងទីផ្សារ និងការលក់ ផ្សារទំនើប FURI TIMES SQUARE អ្នកនាងលីម សុខាដាវីន បានប្រាប់ឱ្យដឹងកាលពីម្សិលម៉ិញនេះថា នៅដំណាច់ចុងខែនេះ គឺគ្រាន់តែជាការបើកជំហានដំបូង ដែលស្របទៅនឹងឱកាសនៃថ្ងៃឈប់សម្រាក របស់មន្ត្រីរាជការ និងសាធារណៈជនទូទាំងប្រទេសនៃពិធីបុណ្យអ៊ុទូក បណ្តែតប្រទីប អកអំបុក និងសំពះព្រះខែ ដោយឡែកពិធីបើកសម្ពោធជាផ្លូវការណ៍តែម្ដង គឺនៅដំណាច់ឆ្នាំ២០១៩ឆាប់ៗខាងមុខនេះ។

កញ្ញាបានបន្តទៀតថា “ FURI TIMES SQUARE នឹងក្លាយទៅជាទីតាំងដែលប្រមូលផ្តុំទៅដោយផលិតផល និងសម្ភារៈប្រើប្រាស់ចំរុះ ដែលសុទ្ធតែមានគុណភាពខ្ពស់ មានម៉ាកល្បីៗនៅលើសាកល ក៏ដូចជាចំណីអាហារចំរុះជាតិសាសន៍ផងដែរ ចូលមកបម្រើសេចក្ដីត្រូវការរបស់អតិថិជន នៅក្នុងខេត្តព្រះសីហនុទាំងមូលតែម្ដង”។ កញ្ញាបានបន្តទៀតថា “ក្នុងកិច្ចដំណើរការជាជំហានដំបូងនៅអំឡុងចុងខែនេះ យើងទទួលបានការគាំទ្រពីសំណាក់បណ្តាក្រុមហ៊ុននានាជាច្រើន ដែលសហការជួលទីតាំងលក់ផលិតផលរបស់ខ្លួននៅក្នុងផ្សារទំនើបដ៏អស្ចារ្យមួយនេះ ដែលគិតត្រឹមថ្ងៃទី១៩ នេះយើងសម្រេចបានជាង ៩០ភាគរយរួចទៅហើយ”។

ជាមួយនឹងការបង្ហើបប្រាប់ពីគម្រោង នៃការចាប់បើកដំណើរការជាជំហានដំបូងនៅពេលនេះ កញ្ញា លីម សុខាដាវីន ក៏បានប្រាប់ឱ្យដឹងផងដែរថា ចាប់តាំងពីម៉ោង៩ព្រឹក រហូតដល់ម៉ោង១១យប់នៅផ្សារទំនើប FURI TIMES SQUARE ក្រៅតែពីជាទីកន្លែងលក់ទំនិញ សម្ភារៈប្រើប្រាស់ គ្រឿងបរិក្ខា គ្រឿងអេឡិចត្រូនិក គ្រឿងសម្អាង ចំណីអាហារ ភេសជ្ជៈ និងម៉ូតសម្លៀកបំពាក់យ៉ាងសប្បូរបែបរាប់រយប្រភេទនោះ ថែមទាំងមានរោងភាពយន្តនៅជាន់ខាងលើ ព្រមគ្នាជាមួយនឹងទីកន្លែងទទួលទានភេសជ្ជៈកម្សាន្ត នាពេលរាត្រី (Sky Bar) ផងដែរ ដែលវានឹងក្លាយជាបទពិសោធន៍ សម្រាប់អ្នករស់នៅក្នុងក្រុងព្រះសីហនុ ក៏ដូចជាបណ្តាអ្នកទេសចរ និងអ្នកជំនួញក្នុងតំបន់ផងដែរ។

ផ្សារទំនើប Furi Times Square ដែលមានទីកន្លែងលក់រាយ និងកន្លែងកម្សាន្តចំនួនសរុប៦,០០០ម៉ែត្រការ៉េ ត្រូវបានជ្រើសរើស នៅក្នុងប្រភេទរចនាស្ថាបត្យកម្មល្អបំផុតនៅក្នុងពិធីពានរង្វាន់អចលនទ្រព្យកម្ពុជា។ ផ្សារទំនើប FURI TIMES SQUAREMall មានកំពស់៥ជាន់នេះ ស្ថិតនៅលើផ្លូវឯករាជ្យ ស្ថិតក្នុងសង្កាត់មិត្តភាព ខ័ណ្ឌមិត្តភាព ក្រុងព្រះសីហនុ។

សូមរីករាយទទួលយកនូវបទពិសោធន៍ថ្មី រសជាតិជីវិតថ្មីនៃការរស់នៅតាមបែបទាន់សម័យ ជាមួយនឹងផ្សារទំនើប FURI TIMES SQUARE៕

កម្ពុជាស្ថិតលើលំដាប់កំពូលតារាងក្នុងចំណោម ២០ ប្រទេសនៃទិសដៅទេសចរណ៍ឆ្នាំ ២០២០

ដោយ ប៊ី

ភ្នំពេញ៖ វាជាឆ្នាំ (២០២០) ល្អសម្រាប់កម្ពុជា និងឧស្សាហកម្មទេសចរណ៍។ មិនដល់មួយខែផងបន្ទាប់ពីកម្ពុជាឃើញថាការប្រកួតប្រជែងផ្នែកទេសចរណ៍របស់ខ្លួនបានកើនឡើង ការអបអរសាទរដ៏ធំមួយទៀតបានកើតឡើង។

សន្ទស្សន៍ភាពប្រកួតប្រជែងទេសចរណ៍ និងការធ្វើដំណើរ (TTCI) បានកើនឡើងគួរឱ្យកត់សម្គាល់មកដល់ចំណាត់ថ្នាក់ ៩៨ បន្ទាប់ពីបានជាប់ចំណាត់ថ្នាក់ទី ១០១ នៅលើពិភពលោកកាលពីឆ្នាំមុន។ កាលពីសប្តាហ៍មុន កម្ពុជាត្រូវបានបញ្ចូលទៅក្នុងបញ្ជីឈ្មោះប្រទេសចំនួន ២០ ដែលនឹងត្រូវទៅទស្សនានៅឆ្នាំ ២០២០ ដោយទស្សនាវដ្តី Conde Nast Traveler ដែលជាទស្សនាវដ្តីឈានមុខគេមួយនៅលើពិភពលោក។

ប៉ុន្តែកម្ពុជាមិនបានជាប់ឈ្មោះក្នុងបញ្ជីប្រទេសកំពូលទាំង ២០ ដែលត្រូវទៅទស្សនានៅឆ្នាំ ២០១៩ នោះទេ។ បញ្ជីឆ្នាំ ២០២០ ត្រូវបានបញ្ចូលបណ្តាប្រទេសមកពីអាស៊ីអាគ្នេយ៍រួមមានឥណ្ឌូណេស៊ី (លេខ ១) ថៃ (លេខ ២) ហ្វីលីពីន (ទី ៨) និងវៀតណាម (ទី ១០) ។

នៅក្រៅតំបន់អាស៊ីអាគ្នេយ៍ប្រទេសដទៃទៀតដែលបានជាប់ចំណាត់ថ្នាក់កំពូលទាំង ២០ គឺព័រទុយហ្កាល់ (ទី ៣) ស្រីលង្កា (ទី ៤) អាហ្វ្រិកខាងត្បូង (ទី ៥) ប៉េរូ (ទី ៦) ក្រិក (ទី ៧) អ៊ីតាលី (ទី ៩) តួកគី (ទី ១១) ) ជប៉ុន (ទី ១២) ម៉ិកស៊ិក (ទី ១៣) តង់ហ្សានី (ទី ១៤) អ៊ីស្រាអែល (ទី ១៥) កូឡុំប៊ី (ទី ១៦) នូវែលសេឡង់ (ទី ១៧) អៀរឡង់ (ទី ១៨) និងក្រូអាស៊ី (ទី ២០)៕

ក្រុមហ៊ុន Prestige Homes Cambodia ទទួលបានពានរង្វាន់ Best Property Agent ប្រចាំឆ្នាំ២០១៩

ដោយ ម៉ូនីកា

ភ្នំពេញៈ ក្រុមហ៊ុន Prestige Homes Cambodia ជាក្រុមហ៊ុនភ្នាក់ងារលក់អចលនទ្រព្យ ដែលមានទីតាំងនៅប្រទេសកម្ពុជា បានទទួលពានរង្វាន់ដែលទទួលស្គាល់ជាក្រុមហ៊ុន ផ្តល់សេវាកម្មអចលនទ្រព្យដ៏ល្អបំផុតជូនអតិថិជន ដោយក្នុងកិត្តនាមជា Best Property Agent (Cambodia) នៅក្នុងកម្មវិធី Squarefoot Best of the Best Awards 2019។

កម្មវិធីនេះ បានប្រព្រឹត្តិឡើងនៅថ្ងៃទី១៨ ខែតុលាឆ្នាំ ២០១៩ នៅសណ្ឋាគារ Rosewood ទីក្រុងហុងកុង។

“Squarefoot Best of the Best Awards” ជាកម្មវិធីពានរង្វាន់ឆ្នើមប្រចាំឆ្នាំលើកទី១០នេះ បានរៀបចំឡើងដោយREA Group ដែលជាក្រុមហ៊ុនផ្សព្វផ្សាយឌីជីថលអន្តរជាតិផ្តោតទៅលើវិស័យអចលទ្រព្យ ។ ពានរង្វាន់នេះ ផ្តល់ជូនក្រុមហ៊ុនអចលនទ្រព្យជាង ១៦០ក្រុមហ៊ុន រួមមានក្រុមហ៊ុនអ្នកអភិវឌ្ឍអចលនទ្រព្យ ភ្នាក់ងារអចលនទ្រព្យ និងក្រុមហ៊ុនរចនាគេហដ្ឋាននៅទីក្រុងហុងកុងនិងប្រទេសមហាអំណាចចិន។

លោក Don Ou ជាប្រធានអភិវឌ្ឍធុរកិច្ចនៃក្រុមហ៊ុន Prestige Homes Cambodia មានប្រសាសន៍ថា“ ពួកយើងមានកិត្តិយស និងសូមថ្លែងអំណរគុណយ៉ាងជ្រាលជ្រៅដែលក្រុមហ៊ុន Prestige Homes Cambodia ត្រូវបានជ្រើសរើសជាភ្នាក់ងារអចលនទ្រព្យដ៏ល្អបំផុតនៅកម្ពុជាឆ្នាំ២០១៩ ជាមូយនឹងការផ្សារភ្ជាប់ការប្តេជ្ញាចិត្ត ក្នុងការផ្តល់នូវសេវាកម្មដែលគ្មានគូប្រៀប ដល់អតិថិជនទាំងនៅក្នុងទីផ្សារកម្ពុជា និងអន្តរជាតិ។

កាលពីខែមិថុនាឆ្នាំ ២០១៩ កន្លងទៅ ក្រុមហ៊ុន Prestige Homes Cambodia និង Urban Village ដែលជាគម្រោងអភិវឌ្ឍរបស់ហុងកុង ធំជាងគេនៅកម្ពុជា បានចូលរួមឧបត្ថមធំក្នុង ពិព័រណ៍ Smart Investment and International Property នៅទីក្រុងហុងកុងដែលរៀបចំឡើងដោយ REA Group។

លោក Andrew Chong នាយកប្រតិបតិ្តក្រុមហ៊ុន Prestige Homes Cambodia មានប្រសាសន៍ថា “កន្លងមកនេះ យើងបានពង្រីកទីផ្សាររបស់យើង មិនត្រឹមតែនៅក្នុងប្រទេសកម្ពុជាប៉ុណ្ណោះទេ ប៉ុន្តែថែមទាំងនៅតាមតំបន់ផ្សេងៗគ្នា ក្នុងអាស៊ីទៀតផង។ កាលពីខែកញ្ញាឆ្នាំ២០១៩ កន្លងទៅ យើងបានចុះកិច្ចព្រមព្រៀងជាមួយ Urban Village ជាភ្នាក់ងារលក់ផ្តាច់មុខលើទីផ្សារតៃវ៉ាន់ ហើយបានចូលរួមពិព័រណ៍ និង ព្រិត្តិការណ៍ផ្សេងៗនៅទីក្រុង ហុងកុង ព្រមទាំងប្រទេសចិនផងដែរ”។ លោកបន្តថា “ការទទួលបានពានរង្វាន់នេះ គឺជាលទ្ធផលនៃការប្តេជ្ញាចិត្តរបស់យើង ក្នុងការផ្តល់ជូននូវសេវាកម្មដែលមានគុណភាពខ្ពស់បំផុត”។

ប្រសិនបើលោកអ្នកមានចំណាប់អារម្មណ៍ ក្រុមហ៊ុន Prestige Homes Cambodia សូមទំនាក់ទំនងមកតាមរយៈវេបសាយ www.prestigehomeskh.com៕

មិនគួរឱ្យជឿសោះថា មានត្រឹម ១០០០ដុល្លារ ក៏អាចក្លាយជាម្ចាស់លំនៅដ្ឋានក្នុងបុរីបានដែរ

ដោយ ៖ រ៉ាណេត

ភ្នំពេញ ៖ ស្ទើរតែមិនគួរឱ្យជឿសោះថា លោកអ្នកមានប្រាក់ត្រឹម ១០០០ដុល្លារតែប៉ុណ្ណោះ ក៏អាចក្លាយជាម្ចាស់ផ្ទះដ៏ស្រស់ស្អាត និងពោរពេញទៅដោយប្រណីតភាពបានដែរ ដែលជាការផ្តល់ជូនយ៉ាងពិសេសពី បុរី ខេ ស៊ី មានទីតាំងស្ថិតនៅក្នុងខណ្ឌព្រែកព្នៅ រាជធានីភ្នំពេញ ដែលកំពុងមានសក្ដានុពល និងការអភិវឌ្ឍន៍ជាងគេក្នុងចំណោមបណ្តាខណ្ឌនានានៃតំបន់ជាយក្រុង។

ស្ថិតនៅក្នុងតំបន់ដែលកំពុងតែមានសក្ដានុពលក្រោមគម្រោងអភិវឌ្ឍធំជាច្រើនរបស់រាជរដ្ឋាភិបាលកម្ពុជាក្នុងការប្រែក្លាយតំបន់ជាយក្រុងរាជធានីភ្នំពេញ ឱ្យទៅជាតំបន់លំនៅដ្ឋានប្រកបដោយផាសុកភាព រួមជាមួយនឹងបណ្តុំឧស្សាហកម្មផងដែរនោះ បុរី ខេ ស៊ី បច្ចុប្បន្ននេះ បាន និងកំពុងតែមានសកម្មភាពយ៉ាងមមាញឹកក្នុងការអភិវឌ្ឍគម្រោងលំនៅដ្ឋានបែបទាន់សម័យ ស៊ីវិល័យ និងប្រណីតភាព ដែលគ្រោងនឹងបញ្ចប់នៅត្រឹមឆ្នាំ២០២១ឆាប់ៗខាងមុខនេះ ។

បុរី ខេ ស៊ី មានទីតាំងល្អ អំណោយផលដល់ការរស់នៅ និងប្រកអាជីវកម្មគ្រប់ប្រភេទ ដោយសារតែស្ថិតនៅជាប់ផ្លូវធំទំហំ ៣០ម៉ែត្រ ជាផ្លូវតភ្ជាប់រវាងផ្លូវជាតិលេខ៥ និងមហាវិថី ឈ្នះ ឈ្នះ នៃទីក្រុងមរតកសម្ដេចតេជោ ឆ្ពោះទៅកាន់ផ្លូវជាតិលេខ៤។ បន្ថែមពីនេះ ទីតាំងរបស់បុរី ខេ ស៊ី មានហ៊ុព័ទ្ធទៅដោយទីប្រជុំជនជាច្រើន ដូចជា ខាងក្រោយមានផ្សារព្រែកព្នៅចាស់ នៅខាងមុខជាប់ផ្លូវ មានផ្សារព្រែកព្នៅ សាលារៀនរដ្ឋ និងឯកជន មណ្ឌលសុខភាព គ្លីនិកឯកជន និងបណ្តាញហេដ្ឋារចនាសម្ព័ន្ធផ្លូវថ្នល់ខ្វាត់ខ្វែងជាច្រើន បន្ថែមដោយគម្រោងអភិវឌ្ឍបឹងតាម៉ោក និងតំបន់អភិវឌ្ឍរមណីយដ្ឋានគំរូនៅតំបន់ជាយក្រុងនៃភ្នំប្រសិទ្ធិ ដែលជាគម្រោងអាទិភាពរបស់រដ្ឋបាលរាជធានីភ្នំពេញផងដែរ។

ចំពោះលក្ខខណ្ឌនៃការក្លាយខ្លួនជាម្ចាស់លំនៅដ្ឋាននៅក្នុងបុរី ខេ ស៊ី គឺមានភាពងាយស្រួលបំផុត ដោយលោកអ្នកគ្រាន់តែមានប្រាក់ដំបូងត្រឹមតែ ១០០០ដុល្លារ តែប៉ុណ្ណោះ រួមជាមួយនឹងការបង់បណ្តាក់ក្នុងរូបភាពជាបង់រំលស់ជាបន្តបន្ទាប់ស្របទៅតាមគោលការណ៍ដែលបានកំណត់ដោយក្រុមហ៊ុនអភិវឌ្ឍលំនៅដ្ឋានតែប៉ុណ្ណោះ ។

តំណាងផ្នែកលក់របស់បុរី ខេ ស៊ី បានបង្ហើបប្រាប់ឱ្យដឹងថា បច្ចុប្បន្ននេះ គម្រោងសំណង់លំនៅដ្ឋានបែបទំនើប និងទាន់សម័យនៅក្នុងបុរីដែលកំពុងតែមានភាពទាក់ទាញមួយនេះ បាន និងកំពុងតែសម្រុកសាងសង់ ដើម្បីបញ្ចប់ទៅតាមគម្រោងទាំងស្រុងនៅត្រឹមឆ្នាំ២០២១ ខាងមុខនេះ ។

ដោយឡែកសម្រាប់បច្ចេកទេសសាងសង់ត្រូវបានធ្វើឡើងយ៉ាងយកចិត្តទុកដាក់ទៅគុណភាពជាចម្បង ការរចនាម៉ូដបែបទាន់សម័យ និងស៊ីវិល័យនៅក្នុងសង្គមនាពេលបច្ចុប្បន្ន និងបន្តទៅអនាគត។ មានពន្លឺ និងខ្យល់ធម្មជាតិចេញចូលគ្រប់គ្រាន់ ដែលជួយសន្សំថវិកាក្នុងការប្រើថាមពលអគ្គិសនីបានយ៉ាងប្រសើរ រួមជាមួយនឹងការដាំដើមឈើបៃតងលម្អនៅពីមុខផ្ទះដែលកាន់តែជួយបន្ថែមភាពត្រជាក់ដល់លំនៅដ្ឋាន។

នៅក្នុងគម្រោងបុរី KC ត្រូវបានរៀបចំនូវហេដ្ឋារចនាសម្ព័ន្ធស្របតាមស្ដង់ដារសំណង់ ដូចជាផ្លូវបេតុងមេមានទំហំ១២ម៉ែត្រ ផ្លូវតូចមានទំហំ៨ម៉ែត្រ មានប្រព័ន្ធទឹកស្អាត និងបណ្តាញរំដោះទឹកយ៉ាងត្រឹមត្រូវ និងមានការរៀបចំសាងសង់ជាទីធ្លាសម្រាប់អង្គុយកម្សាន្ត ហាត់ប្រាណសាធារណៈ និងសួនច្បារ ដែលបំពាក់ទៅដោយចង្កៀងអគ្គិសនី LED យ៉ាងភ្លឺច្បាស់ត្រជាក់ភ្នែកផងដែរ។

លំនៅដ្ឋាននៅក្នុង ខេស៊ី ត្រូវបានសាងសង់ឡើងជា៣ប្រភេទ រួមមានប្រភេទ Link House, Shop House និងប្រភេទ Twin Villa ដែលសុទ្ធតែសមស្របទៅនឹងការរស់នៅដែលពោរពេញទៅដោយផាសុកភាពខ្ពស់ទាំងអស់។ ប្រភេទលំនៅដ្ឋាន Link House មានទំហំ ៥ X ៩,៥០ ម៉ែត្រ (Eo, E1) មានបន្ទប់គេងចំនួន២ បន្ទប់ទឹកចំនួន៣ ទីធ្លាក្នុងផ្ទះធំទូលាយ នៅសល់ទីធ្លាខាងមុខ៥ម៉ែត្រ និងខាងក្រោយផ្ទះសល់ ២ម៉ែត្រ ។

ប្រភេទលំនៅដ្ឋាន Shop House មានទំហំ ៥ X ១៥ ម៉ែត្រ ក្នុងនោះរួមមានបន្ទប់គេងចំនួន៤ ទីធ្លាក្នុងផ្ទះធំទូលាយ នៅសល់ទីធ្លាខាងមុខ ៧ម៉ែត្រ និងខាងក្រោយផ្ទះសល់ ៣ម៉ែត្រ ។ ប្រភេទលំនៅដ្ឋាន Twin Valla មានទំហំ ៦ X ១២ ម៉ែត្រ មានបន្ទប់គេងចំនួន៤ បន្ទប់ទឹកចំនួន៥ ទីធ្លាក្នុងផ្ទះធំទូលាយ ជាមួយនឹងការរចនាម៉ូដយ៉ាងល្អវិចិត្រ ហើយនៅសល់ទីធ្លាខាងមុខ៥ម៉ែត្រ និងខាងក្រោយផ្ទះសល់ ២ម៉ែត្រ ។ សម្រាប់ព័ត៌មានបន្ថែម លោកអ្នកអាចទំនាក់ទំនងបានតាមរយៈទូរស័ព្ទលេខ ៖ ០៨៩ ៧៨៧ ៧២១ / ០៨៧ ៣៦ ៩៥ ៣៦ / ០១៦ ៦៨៥ ៨៥៨៕

រដ្ឋបាលធានីភ្នំពេញនឹងសាងសង់ផ្លូវក្រោមដីថ្មីចំនួន ២ ទីតាំងផ្សេងទៀត

ដោយ វុត្ថា

ភ្នំពេញ៖ រដ្ឋាបាលរាជធានីភ្នំពេញ បាននឹងកំពុងចាប់ផ្តើមសិក្សាផែកការស្ថាបនាផ្លូវក្រោមដីថ្មីចំនួន ២ ទីតាំងផ្សេងគ្នា ដើម្បីសម្រួលដល់ការធ្វើដំណើររបស់ប្រជាពលរដ្ឋ សិស្សនិស្សិត និងការកាត់បន្ថយការកកស្ទះចរាចរណ៍នៅក្នុងរាជធានីភ្នំពេញ។

លោក ឃួង ស្រេង អភិបាលរាជធានីភ្នំពេញ បានឱ្យដឹងនៅក្នុងកិច្ចប្រជុំកាលពីពេលថ្មីៗនេះថា គម្រោងស្ថាបនាផ្លូវក្រោមដីថ្មីទំាង២នេះ គឺស្ថិតក្រោមចំណុចផ្លូវសហព័ន្ធរុស្សី នៅខាងមុខវិទ្យាស្ថានភាសាបរទេស និងមួយទៀត នៅខាងមុខចំណុចសួនក្តាន់២ ខណៈតំបន់ទាំង២ នេះ បាននឹងកំពុងប្រឈមការកកស្ទះចរាចរណ៍យ៉ាងខ្លាំងជារៀងរាល់ថ្ងៃ។

លោក ឃួង ស្រេងបន្តថា ការស្ថាបនាផ្លូវក្រោមដីនេះ គឺជាយន្តការដោះស្រយបញ្ហាកកស្ទះចរាចរណ៍ជាលក្ខណៈយូអង្វែងដែលជួយសម្រួលដល់ការចេញចូលរបស់សិស្សនិស្សិតសាកលវិទ្យាល័យភូមិន្ទះភ្នំពេញ ប្រជាពលរដ្ឋ និងភ្ញៀវទេសចរណ៍ ផងដែរ ខណៈដែលចរាចរណ៍នៅតាមបណ្តោយផ្លូវសហព័ន្ធរុស្សីនេះមានស្ថានភាពមមាញឹក និងកកស្ទះខ្លាំង។

លោកបន្តថា “ក្នុងការកកស្ទះចរាចរណ៍នេះ យើងដឹងហើយថា ក្នុងរាជធានីភ្នំពេញនៅតាមផ្លូវរបស់យើង គឺបាត់បង់ចិញ្ចើមផ្លូវដោយរៀបចំចញ្ចើមផ្លូវឡើងវិញ ដើម្បីឱ្យមានការធ្វើដំណើរតាមចិញ្ចើមផ្លូវនេះ បានល្អប្រសើរ ហើយការចតយានយន្តនៅតាមដងផ្លូវត្រូវតែមានរបៀបរៀបរយ នេះជាកិច្ចការងារមួយដែលត្រូវប្រឹងប្រែង ចឹងហើយបានជាយើងត្រូវសិក្សាបញ្ហានេះមួយដូចជា សិក្សាផ្លូវក្រោមដីនៅផ្លូវសហព័ន្ធរុស្សី និងផ្លូវក្រោមដីត្រង់ចំណុចក្តាន់២ចេញពីតំបន់បឹងកក និងកែលម្អផ្លូវថ្មើរជើងនៅមហាសេដ្ឋីម៉ៅសេទុង”។

ចំណែកលោក សាំ ពិសិដ្ឋ ប្រធានមន្ទីរសាធារណៈការ និងដឹកជញ្ជូន បានឱ្យដឹងដែរថាចំពោះគម្រោងស្ថាបនាផ្លូវក្រោមដីត្រង់ចំណុចវិទ្យាស្ថានភាសាបរទេសគឺរត់ពីក្រោមផ្លូវសហព័ន្ធរុស្សី ដោយតភ្ជាប់ផ្លូវលេខ ២៦១ ឆ្ពោះចូលទៅក្នុងវិទ្យាស្ថានភាសាបរទេស ដែលនឹងបង្កភាពងាយស្រួលដល់និស្សិត បានចេញចូលមិនប្រឈមនឹងការកកស្ទះឬ គ្រោះថ្នាក់ចរាចរណ៍ជាដើម។

លោកបន្ថែមថា ចំណែកផ្លូវក្រោមដីនៅចំណុចក្តាន់ ២ វិញ ក៏ត្រូវរត់ក្រោមផ្លូវសហព័ន្ធរុស្សីផងដែរដោយភ្ជាប់ពីផ្លូវ ១៦៩ ឆ្ពោះទៅផ្លូវបឹងកក់ដើម្បីរំដោះការកកស្ទះចរាចរណ៍នៅតំបន់នេះ។ រដ្ឋបាលរាជធានីភ្នំពេញនឹងបន្តសិក្សាគម្រោងស្ថាបនាផ្លូវក្រោមដីនេះ ឱ្យមានលក្ខណៈលម្អិតបន្ថែមទៀត ដើម្បីឈានទៅស្ថាបនាជាផ្លូវការនាពេលខាងមុខឆាប់ៗនេះ ដើម្បីប្រយោជន៍ដល់សង្គមជាតិ៕

អ្នកជំនាញ៖ ពន្ធប្រថាប់ត្រា និងបញ្ហាផ្លូវពាក់ព័ន្ធនឹងប្លង់គោលប្រើប្រាស់ដី

ដោយ ៖ វុត្ថា

ភ្នំពេញ ៖ អ្នកជំនាញបានអះអាងថា ពន្ឋប្រថាប់ត្រាលើអចលនទ្រព្យកើតចេញពីការគិតគូរ និងទទួលខុសត្រូវរបស់រដ្ឋាភិបាល ដើម្បីជំរុញកំណើនសេដ្ឋកិច្ចជាតិ ប៉ុន្តែការអនុវត្តកន្លងមក នៅមិនទាន់មានភាពច្បាស់លាស់ និងឯកភាពគ្នាទាំងស្រុងនៅឡើយ ជាពិសេសពាក់ព័ន្ធនឹងបញ្ហាជាប់ផ្លូវ ឬមិនជាប់ផ្លូវនៃអចលនទ្រព្យ (ដីធ្លី) ពេលកំណត់ពន្ធប្រថាប់ត្រា។

យោងតាមខ្លឹមសារលិខិតលេខ ២២០៤៤ អពដ របស់អគ្គនាយកដ្ឋានពន្ធដារ ចុះថ្ងៃទី៤ ខែតុលា ឆ្នាំ ២០១៩ ស្តីអំពីពន្ធប្រថាប់ត្រានៃការអនុវត្ត និងចរន្តការអចលនទ្រព្យ (ដីធ្លី) ពាក់ព័ន្ធប្លង់ហេដ្ឋារចនាសម្ព័ន្ធអនាគត និងផ្លូវនេះ កើតចេញពីការគិតគូរ និងទទួលខុសត្រូវរបស់រដ្ឋ ដោយមានការពាក់ព័ន្ធសាម៉ីក្រសួងរៀបចំដែនដី នគរូបនីយកម្ម និងសំណង់ (ដ.ន.ស) និងក្រសួងសេដ្ឋកិច្ចនិងហិរញ្ញវត្ថុ ដែលជាអ្នកដឹកនាំ និងគ្រប់គ្រងជំនាញផ្ទាល់។

លោកបណ្ឌិត វ៉ាន់ វ៉ាត អនុប្រធានមន្ទីររៀបចំដែនដី នគរូបនីយកម្ម សំណង់ និងសូរិយោដី បានមានប្រសាសន៍ឲ្យដឹងថា ខ្លឹមសារលិខិតបានឆ្លើយតបទៅនឹងចម្ងល់ជាច្រើន ព្រមទាំងជួយសម្រួលដល់ក្តីកង្វល់ទាំងឡាយរបស់ប្រជាពលរដ្ឋ ជុំវិញការរៀបចំដែនដី (ប្លង់គោល) ការគ្រប់គ្រងដីធ្លី និងការអនុវត្តប្រព័ន្ធពន្ធដារនាពេលកន្លងមក ឱ្យបានធូរស្រាល និងបានយល់ដឹងបន្ថែមកាន់តែច្បាស់លាស់ ដើម្បីរួមចំណែកការអភិវ ឌ្ឍសេដ្ឋកិច្ច សង្គម និងបរិស្ថាន ជាពិសេសការរៀបចំ និងអនុវត្តគម្រោងនានារបស់រដ្ឋ និងឯកជន ដែលមាននៅក្នុងផែនការហេដ្ឋារចនាសម្ព័ន្ធ (ប្លង់ហេដ្ឋារចនាសម្ព័ន្ធអនាគត) និងប្លង់គោលប្រើប្រាស់ដីនៅគ្រប់តំបន់ គ្រប់កម្រិតថ្នាក់នៃព្រះរាជាណាចក្រកម្ពុជាយើង។

លោកបន្ថែមទៀតថា “លិខិតនេះ គឺជារូបភាព ជាតឹកតាងមួយនៃការខិតខំប្រឹងប្រែង និងយកចិត្តទុកដាក់របស់ប្រមុខដឹកនាំជាតិ សម្តេចតេជោ ហ៊ុន សែន និងការដឹកនាំនៅគ្រប់លំដាប់ថ្នាក់ និងកម្រិតជំនាញដែលពាក់ព័ន្ធវិស័យអចលនទ្រព្យ (ដីធ្លី) ផ្អែកតាមគោលការណ៍កំណែទម្រង់ស៊ីជម្រៅរបស់រាជរដ្ឋាភិបាល សំដៅធានាបាននូវការកាន់កាប់ ការប្រើប្រាស់និងគ្រប់គ្រងដីធ្លីប្រកបដោយសុវត្ថិភាព តម្លាភាព និងប្រសិទ្ធភាព ដោយផ្សាភ្ជាប់ជាមួយគម្រោងដីធ្លីទាំងអស់ ដែលមានផែនការអភិវឌ្ឍច្បាស់លាស់ (ហេដ្ឋារចនាសម្ព័ន្ធ និងប្លង់គោល) សម្រាប់ពេលបច្ចុប្បន្ន និងទៅអនាគត”។

លោកបន្ថែមថា រួមសេចក្តីមក អត្ថន័យលិខិតរបស់អគ្គនាយកពន្ធដារចង់បញ្ជាក់ឱ្យមានភាពច្បាស់លាស់នៅពេលអនុវត្តន៍ និងចរន្តការឯកសារដីធ្លីដែលពាក់ព័ន្ធនឹងការកាន់កាប់អាស្រ័យផល (ភោគៈ) ឬមានកម្មសិទ្ធិស្របច្បាប់រួចរាល់ ព្រមទាំងដីនោះស្ថិតនៅជាប់ ៖ ប្រឡាយទឹក ទំនប់ ភ្លឺស្រែ ផ្លូវរទេះ ផ្លូវរថភ្លើង និងផ្លូវក្នុងផែនការហេដ្ឋារចនាសម្ព័ន្ធនៃប្លង់គោលអនាគតដែលមិនទាន់ត្រូវបានកសាងឡើង និងមានរូបរាងជាផ្លូវច្បាស់លាស់សមស្រប គឺត្រូវបានចាត់ទុកថាជាដីគ្មានផ្លូវ នៅពេលអង្គភាពពន្ធដារកំណត់ពន្ធប្រថាប់ត្រា។

ការបញ្ជាក់ក្តីមន្ទិលត្រង់ចំនុចនេះ បានធ្វើឱ្យពលរដ្ឋមានទំនុកចិត្ត និងមិនមានការខាតបង់នូវផលប្រយោជន៍របស់ខ្លួន ដូចការកំណត់ពន្ធប្រថាប់ត្រា ដែលមានការមិនឯកភាពគ្នាជាក់លាក់ក្នុងរយៈពេលកន្លងមក។

លោកក៏បានស្នើដល់មន្ត្រីជំនាញខាងកសាង គ្រប់គ្រងឯកសារដីធ្លី និងផ្នែកពន្ធដារ ត្រូវមានការយកចិត្តទុកដាក់ខ្ពស់ និងខិតខំប្រឹងប្រែងអនុវត្តតាមនីតិវិធី និងគោលការណ៍ច្បាប់ពាក់ព័ន្ធជាធរមាន ដើម្បីបំពេញការងារជូនប្រជាពលរដ្ឋឱ្យបានល្អ ត្រឹមត្រូវ កាត់បន្ថយនូវបញ្ហាប្រឈម និងវិវាទផ្សេងៗ ដែលអាចកើតមានឡើងជាយថាហេតុ។

ក្រៅពីនេះ ខាងជំនាញដីធ្លី និងអង្គភាពពន្ធដារ ចាំបាច់រួមគ្នាធ្វើការផ្សព្វផ្សាយដល់មហាជនឱ្យបានទូលំទូលាយ និងរៀបចំឯកសារបច្ចេកទេសណែនាំគំរូឱ្យបានច្បាស់លាស់ ដើម្បីឱ្យប្រជាពលរដ្ឋងាយយល់ និងមន្ត្រីជំនាញងាយអនុវត្តការងារបានល្អប្រសើរ ជួយពន្លឿនការបម្រើសេវាសាធារណៈបានរលូន និងទាន់ពេលវេលា៕

រដ្ឋាភិបាលចិនអះអាងថាគ្មានកិច្ចព្រមព្រៀងពាណិជ្ជកម្មណាមួយទេរហូតទាល់តែពន្ធទាំងអស់ត្រូវបានលុបចោល

CHINA-DIPLOMACY-TRADE — China's President Xi Jinping attends a summit at the Belt and Road Forum in Beijing on May 15, 2017. Chinese President Xi Jinping urged world leaders to reject protectionism on May 15 at a summit positioning Beijing as a champion of globalisation, as some countries raised concerns over his trade ambitions. / AFP PHOTO / POOL / THOMAS PETER (Photo credit should read THOMAS PETER/AFP/Getty Images)

ដោយ Donald Lee

ភ្នំពេញៈ ទោះបីជាប្រធានាធិបតីអាមេរិកលោក Donald Trump អះអាងថា ភាគីទាំងពីរនៃសង្គ្រាមពាណិជ្ជកម្មអាមេរិក និងចិន បានឈានដល់កិច្ចព្រមព្រៀងលើកិច្ចព្រមព្រៀងពាណិជ្ជកម្ម ដំណាក់កាលមួយក៏ដោយ ក៏ទីក្រុងប៉េកាំងបានសង្កត់ធ្ងន់ថា ជំហររបស់ខ្លួននៅតែរក្សាដដែលថា គ្មានកិច្ចព្រមព្រៀងពាណិជ្ជកម្មណាមួយ នឹងត្រូវឈានដល់ ទាល់តែពន្ធទាំងអស់របស់អាមេរិកលើការនាំចូលត្រូវបានលុបចោល។

អ្នកនាំពាក្យក្រសួងពាណិជ្ជកម្មចិន លោក Gao Feng បាននិយាយនៅក្នុងសន្និសីទសារព័ត៌មានកាលពីថ្ងៃព្រហស្បតិ៍ថា “ជំហរគោលការណ៍ និងគោលដៅរបស់ចិន សម្រាប់ចិន – សហរដ្ឋអាមេរិក និងការចរចាពាណិជ្ជកម្មមិនដែលផ្លាស់ប្តូរទេ”។

លោកបានបន្ថែមថា “គោលដៅចុងក្រោយរបស់ភាគីទាំងពីរ សម្រាប់ការចរចាគឺដើម្បីបញ្ចប់សង្គ្រាមពាណិជ្ជកម្ម លុបចោលពន្ធគយបន្ថែមទាំងអស់”។

លោក Trump បានប្រកាសយ៉ាងឆាប់រហ័សថា “កិច្ចព្រមព្រៀងមួយដំណាក់កាលដ៏សំខាន់បំផុត” ត្រូវបានរៀបចំឡើង បន្ទាប់ពីអនុរដ្ឋមន្រ្តីចិនលោក Liu He បានជួបជាមួយតំណាងពាណិជ្ជកម្មអាមេរិកលោក Robert Lighthizer និងរដ្ឋមន្រ្តីក្រសួងរតនាគារលោក Steven Mnuchin នៅទីក្រុងវ៉ាស៊ីនតោនកាលពីសប្តាហ៍មុន”។

លោក Trump បាននិយាយថាកិច្ចព្រមព្រៀង “ដំណាក់កាលមួយ” នឹងរួមបញ្ចូលការនាំចេញកសិផល ដែលមានតម្លៃដល់ទៅ៥០ពាន់លានដុល្លារទៅកាន់ប្រទេសចិន។ ប៉ុន្តែទីក្រុងប៉េកាំង មិនទាន់បានទទួលស្គាល់ ការទិញដែលបានគ្រោងទុក ឬចំនួនទឹកប្រាក់ដែលក្រុមហ៊ុនចិននឹងនាំចូលនៅឡើយទេ។

ក្រុមហ៊ុនឧស្សាហកម្មកសិកម្មអាមេរិក មានការងឿងឆ្ងល់ចំពោះការអះអាងរបស់លោក Trump លើការទិញកសិកម្មដែលបានគ្រោងទុករបស់ចិន។

ក្រុមកសិករបានសរសេរលើបណ្តាញសង្គម Twitter ថា“ពិតជាភ្ញាក់ផ្អើល! អ្នកមានន័យថា ចិននឹងមិនទិញផលិតផលកសិកម្មចំនួន៤០ ទៅ៥០ពាន់លានដុល្លារទេរហូតទាល់តែពន្ធរបស់យើងត្រូវបានដក? វានឹងមិនកើតឡើងទេ!”៕

សម្តេចតេជោនឹងអញ្ជើញទៅចូលរួមពិធីស្បថចូលកាន់តំណែងថ្មីរបស់ប្រធានាធិបតីឥណ្ឌូនេស៊ី

ដោយ វុត្ថា

ភ្នំពេញៈ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងដឹកនាំគណៈប្រតិភូជាន់ខ្ពស់ អញ្ជើញទៅចូលរួមជាភ្ញៀវកិត្តិយស ក្នុងពិធីស្បថចូលកាន់តំណែងថ្មី របស់លោក Joko Widodo ជាប្រធានាធិបតី និងលោក Ma ruf Amin ជាអនុប្រធានាធិបតី នៃសាធារណរដ្ឋឥណ្ឌូនេស៊ី នៅថ្ងៃទី២០ ខែតុលា ឆ្នាំ២០១៩ នៅទីក្រុងហ្សាការតា។

យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិអោយដឹងនៅថ្ងៃទី១៨ ខែតុលា នេះថា ក្នុងពិធីស្បថចូលកាន់តំណែងនេះ នឹងមានការអញ្ជើញចូលពីសំណាក់ ប្រមុខរដ្ឋ/រដ្ឋាភិបាល និងតំណាងប្រទេសសមាជិកអាស៊ានឯទៀតផងដែរ។

ក្រសួងការបរទេសបន្តថា គណៈប្រតិភូ ដែលនឹងអញ្ជើញអមដំណើរសម្តេចតេជោ ទៅកាន់ប្រទេសឥណ្ឌូនេស៊ី រួមមាន លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ លោក អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស ព្រមទាំងឥស្សរៈជនជាន់ខ្ពស់ នៃរាជរដ្ឋាភិបាលមួយចំនួនផងដែរ។

ក្រសួងការបរទេសបន្ថែមថា សម្តេចតេជោនាយករដ្ឋមន្ត្រី ហ៊ុន សែន នៅប្រទេសឥណ្ឌូនេស៊ី នឹងជួបដោយឡែកជាមួយលោក ចូកូ វីដូដូ ដើម្បីជូនពរជ័យដល់លោក ដែលបានបន្តជាប់ឆ្នោតជាប្រធានាធិបតីឥណ្ឌូនេស៊ី នៅអាណត្តិទី២ ហើយនិងធ្វើការផ្លាស់ប្តូរយោបល់ អំពីកិច្ចសហប្រតិបត្តិការទ្វេភាគី និងពហុភាគី និងបញ្ហានានាដែលមាន ការចាប់អារម្មណ៍ដូចគ្នា។

ក្រសួងបញ្ជាក់ថា ការបោះឆ្នោត នៅប្រទេសឥណ្ឌូនេស៊ី កាលពីថ្ងៃទី១៧ ខែមេសា ឆ្នាំ២០១៩ បង្ហាញថា លោកចូកូ វីដូដូ បានជាប់ឆ្នោត ជាប្រធានាធិបតីនៅអាណត្តិទី២ ចាប់ពីឆ្នាំ២០១៩-២០២៤៕

ក្រុមហ៊ុនដឹកជញ្ជួនម៉ាឡេស៊ីចាប់អារម្មណ៍ក្នុងការវិនិយោគនៅកម្ពុជា

ដោយ ប៊ី

ភ្នំពេញៈ ក្រុមហ៊ុនដឹកជញ្ជួន GDEx ដែលមានមូលដ្ឋាននៅប្រទេសម៉ាឡេស៊ីគ្រោងនឹងមើលលទ្ធភាពវិនិយោគក្នុងវិស័យដឹកជញ្ជួននៅកម្ពុជា និងបណ្តាប្រទេសអាស៊ានផ្សេងទៀត ខណៈក្រុមហ៊ុនមើលឃើញពីសក្តានុពល និងឱកាសវិនិយោគក្នុងប្រទេសទាំងនេះ។

ក្រុមហ៊ុននេះបានឱ្យដឹងថា “ក្រុមហ៊ុន GDEx នឹងមើលពីលលទ្ធភាពក្នុងចូលទៅក្នុងបណ្តាប្រទេសអាស៊ានផ្សេងទៀតដូចជា វៀតណាម និងកម្ពុជា ដែលមានបណ្តាញចែកចាយ និងសេវាកម្មលក់រាយខ្លាំង និងការអភិវឌ្ឍតំបន់ពាណិជ្ជកម្មសេរីឌីជីថល ការធ្វើពាណិជ្ជកម្មតាមប្រព័ន្ធអេឡិចត្រូ និកទំនងជានឹងជំរុញកំណើនតម្រូវការសម្រាប់ទំនិញដឹកទំនិញតាមផ្លូវអាកាស និងភស្ដុភារដឹកជញ្ជូនតាមផ្លូវគោក ជាពិសេសសេវាកម្មដឹកជញ្ជូនចុងក្រោយ។

ថ្មីៗនេះ ក្រុមហ៊ុន GDEx បានជាវភាគហ៊ុនចំនួន៤៤.៥៦ភាគរយ នៃក្រុមហ៊ុនឥណ្ឌូនេស៊ី SAP Express ដែលផ្តល់ជូនជាសាធារណៈក្នុងតម្លៃ ២៥,៨ លានរីងហ្គីត។

ក្រុមហ៊ុនបានឱ្យដឹងថា “យើងជឿជាក់ថា ឥណ្ឌូនេស៊ីផ្តល់នូវឱកាសរីកចម្រើនយ៉ាងធំធេងសម្រាប់អាជីវកម្ម ដោយមានការគាំទ្រពីកំណើនពាណិជ្ជកម្មអេឡិចត្រូនិច ក៏ដូចជាអាជីវកម្មធម្មតា”។

ក្រុមហ៊ុន បានបន្តថា “ការបន្តភាពជាដៃគូរបស់ក្រុមហ៊ុន ជាមួយក្រុមហ៊ុន SAP Express នឹងជួយឱ្យក្រុមហ៊ុនផ្តល់ដំបូន្មាន និងការគាំទ្រក៏ដូចជាការផ្ទេរចំណេះដឹងរវាងក្រុមហ៊ុនទាំងពីរ”។

ក្រុមហ៊ុន SAP Express ដែលមានទីស្នាក់ការកណ្តាលនៅទីក្រុងហ្សាកាតា ផ្តល់ជូនសេវាកម្មយ៉ាងសំខាន់ នៅក្នុងផ្នែកដឹកជញ្ជូនរហ័ស ក៏ដូចជាការដឹកជញ្ជូនការចែកចាយ និងឃ្លាំង៕

រដ្ឋាភិបាលបានអនុម័តគំរោងសាងសង់ផ្លូវជាតិលេខ៧១C ជាផ្លូវការហើយ

ដោយៈ រ៉ាណេត

ភ្នំពេញៈ ក្រោយពីបានបញ្ចប់ការសិក្សា និងឆ្លងកាត់កិច្ចប្រជុំពិភាក្សាលម្អិតរបស់អន្តរក្រសួងស្ដីពី ផលប៉ះពាល់នៃការសាងសង់ផ្លូវជាតិថ្មីមួយខ្សែទៀតលេខ៧១C តភ្ជាប់ពីខេត្តកំពង់ចាមទៅកាន់ខេត្តត្បូងឃ្មុំ ពេលនេះត្រូវបានសម្រេច និងអនុញ្ញាតឱ្យដំណើរការសាងសង់ហើយ ក្រោមការរៀបចំរបាយការណ៍ដោយក្រុមហ៊ុនទីប្រឹក្សា PPIC Co,.Ltd ។

គម្រោងសាងសង់ផ្លូវជាតិលេខ៧១C ត្រូវបានកិច្ចប្រជុំអន្តរក្រសួង ដែលដឹកនាំដោយលោក សាបូ អូហ្សាណូ រដ្ឋលេខាធិការក្រសួងបរិស្ថាន ពិនិត្យ និងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមពេញលេញ (ESIA) រួចរាល់ហើយកាលពីថ្ងៃទី១៧ ខែតុលា ឆ្នាំ២០១៩ នៅទីស្តីការក្រសួងបរិស្ថាន។

ផ្លូវជាតិមួយខ្សែនេះមានប្រវែង១១៤,៦២គីឡូម៉ែត្រ ស្ថិតនៅក្នុងភូមិសាស្រ្តក្រុងសួង ស្រុកត្បូងឃ្មុំ ស្រុកក្រូចឆ្មារ ខេត្តត្បូងឃ្មុំ និងស្រុកស្ទឹងត្រង់ ស្រុកចំការលើ ខេត្តកំពង់ចាម របស់ក្រសួងសាធារណការ និងដឹកជញ្ជូន ។ កិច្ចប្រជុំនេះ មានការចូលរួមពីតំណាងអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព អគ្គនាយកដ្ឋានពាក់ព័ន្ធនៃក្រសួងបរិស្ថាន អន្តរក្រសួងពាក់ព័ន្ធ ក្រសួងសាធារណការ និងដឹកជញ្ជូន (ម្ចាស់គម្រោង) ក្រុមប្រឹក្សាអភិវឌ្ឍន៍កម្ពុជា រដ្ឋបាលខេត្តត្បូងឃ្មុំ មន្ទីរបរិស្ថានខេត្តត្បូងឃ្មុំ មន្ទីរបរិស្ថានខេត្តកំពង់ចាម នាយកដ្ឋានវាយតម្លៃ ហេតុប៉ះពាល់ បរិស្ថាន និងក្រុមហ៊ុនទីប្រឹក្សាផងដែរ។

ក្រោយពីបានធ្វើការពិនិត្យរួចមកកិច្ចប្រជុំ បានសម្រេចលទ្ធផល ដូចខាងក្រោម ៖

១-អង្គប្រជុំគាំទ្រគម្រោងផ្លូវជាតិលេខ ៧១C ។

២-ម្ចាស់គម្រោងត្រូវសហការជាមួយក្រុមហ៊ុនម៉ៅការសាងសង់ ដើម្បីសិក្សា និងរចនាផ្លូវឡើងវិញឱ្យបានត្រឹមត្រូវ ជៀសវាងការប៉ះពាល់លើទីតាំងកប់សពរបស់ប្រជាពលរដ្ឋ ដោយសហការជាមួយអាជ្ញាធរមូលដ្ឋាន។

៣-ម្ចាស់គម្រោង ត្រូវសហការជាមួយក្រុមហ៊ុនម៉ៅការសាងសង់ក្នុងការរចនាផ្លូវឱ្យទៅតាមលក្ខណៈបច្ចេកទេស ដើម្បីឱ្យមានភាពធន់នឹងការប្រែប្រួលអាកាសធាតុ។

៤-ម្ចាស់គម្រោងត្រូវរចនាប្រព័ន្ធដោះទឹកភ្លៀងនៅតាមផ្លូវមេ និងផ្លូវរងនីមួយៗឱ្យបានត្រឹមត្រូវជៀសវាងការហូរច្រោះ ការជន់លិចដីស្រែ-ចម្ការ និងផ្ទះសម្បែងរបស់ប្រជាពលរដ្ឋ ។

៥-ម្ចាស់គម្រោង ត្រូវសហការជាមួយក្រសួងសេដ្ឋកិច្ច និងហិរញ្ញវត្ថុ ដើម្បីធ្វើការដោះស្រាយផលប៉ះពាល់ដោយ សារសកម្មភាពគម្រោងឱ្យបានរួចរាល់ មុននឹងអនុវត្តន៍គម្រោង។

៦-ម្ចាស់គម្រោងត្រូវស្រោចទឹកជាប្រចាំ ដើម្បីកាត់បន្ថយការហុយធូលី ព្រមទាំងកាត់បន្ថយសំឡេង និងរំញ័រនៅតាមទីប្រជុំជនសាលារៀន មណ្ឌលសុខភាព វត្តអារាមជាដើម។

៧-ត្រូវរៀបចំស្លាកសញ្ញាចរាចរណ៍ និងភ្លើងបំភ្លឺនៅតាមដងផ្លូវឱ្យបានត្រឹមត្រូវ ដើម្បីកាត់បន្ថយគ្រោះថ្នាក់ចរាចរ។

៨-ម្ចាស់គម្រោងត្រូវមានផែនការដាំឈើ និងដាំស្មៅតាមជើងទេរ ដើម្បីបន្សាំទៅនឹងការប្រែប្រួលអាកាសធាតុ។

៩-ក្រុមហ៊ុនទីប្រឹក្សាត្រូវសហការជាមួយម្ចាស់គម្រោង ដើម្បីបញ្ចូលនូវអនុសាសន៍ ដែលអង្គប្រជុំបានលើកឡើងនូវចំណុចវិជ្ជមាន ទៅក្នុងរបាយការណ៍ ESIA ឱ្យបានត្រឹមត្រូវ។

១០-ម្ចាស់គម្រោង និងក្រុមហ៊ុនទីប្រឹក្សា ត្រូវអនុវត្តន៍ឱ្យបានត្រឹមត្រូវ ដូចបានរៀបរាប់នៅក្នុងរបាយការណ៍ ESIA នេះ។

បើតាមការឱ្យដឹងពីលោក ទី សេងដឿន មន្ត្រីសាលាស្រុកក្រូចឆ្មារ ខេត្តត្បូងឃ្មុំ បានបង្ហើបប្រាប់ឱ្យដឹងថា នៅក្នុងគម្រោងនៃការសាងសង់ផ្លូវជាតិមួយខ្សែ ខាងលើនេះ នឹងត្រូវស្ថាបនាទ្រូងផ្លូវទំហំ១២ម៉ែត្រ ខណៈដែលផ្លូវរងឬផ្លូវបំបែកចូលភូមិ ឃុំនឹងត្រូវស្ថាបនាទំហំ៩ម៉ែត្រ។ លោកបានបន្តទៀតថា តាមការសិក្សា គម្រោងសាងសង់ផ្លូវជាតិលេខ៧១C នឹងត្រូវចំណាយពេលប្រមាណ៣៦ខែ នៅក្នុងខ្ទង់ថវិកាចំណាយសរុបប្រមាណ១០០លានដុល្លារ ។

សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ថ្លែងកាលពីពេលកន្លងទៅថ្មីៗនេះថា ពិធីបើកការដ្ឋានសាងសង់ផ្លូវជាតិមួយខ្សែនេះ នឹងត្រូវធ្វើឡើងតំណាលគ្នា នឹងការតភ្ជាប់ស្ពានឆ្លងទន្លេរវាងស្រុកក្រូចឆ្មារ ខេត្តកំពង់ចាម និងស្រុកក្រូចឆ្មារ ខេត្តត្បូងឃ្មុំ ក្នុងពេលឆាប់ៗខាងមុខនេះ៕