អ្នកជំនាញ៖ បើមានចំណេះដឹងហិរញ្ញវត្ថុ និងភាពអំណត់ជីវភាពនឹងមិនលំបាកនោះទេ

ដោយៈ រ៉ាណេត

ភ្នំពេញៈ មនុស្សគ្រប់រូបសុទ្ធតែមានក្ដីប្រាថ្នា ចង់រស់នៅប្រកបដោយភាពសុខស្រួល មានភាពកក់ក្ដៅ ព្រមគ្នាមួយនឹងសុវត្តិភាពផ្នែកហិរញ្ញវត្ថុផងដែរ ប៉ុន្តែក្ដីប្រាថ្នាមួយនេះហាក់ពិបាកក្នុងការសម្រេចបានណាស់។

លោកង៉ែត ជូ អ្នកវិភាគសេដ្ឋកិច្ច និងជាអ្នកវិនិយោគនៅក្នុងវិស័យអចលនទ្រព្យផងដែរនោះបានលើកឡើងថា សុវត្ថិភាពហិរញ្ញវត្ថុ អាចកើតមានបានដរាបណាអ្នកចេះអាចមានលទ្ធភាពក្នុងការគ្រប់គ្រងឱកាស ជាពិសេសមានភាពអំណត់ និងចំណេះដឹងពីផ្នែកហិរញ្ញវត្ថុជាមុនសិន។

លោកបានបញ្ជាក់ថា “សំរាប់អ្នកមានចំណេះដឹងហិរញ្ញវត្ថុ គ្រាន់តែអត់ញុំាកាហ្វេ១ថ្ងៃ១កែវ ហើយសន្សំប្រាក់ ដើម្បីវិនិយោគក៏អាចមានភាពជោគជ័យ ផ្នែកហិរញ្ញវត្ថុបានដែរ”។ លោកបន្តទៀតថា “ប្រសិនបើអ្នកសន្សំប្រាក់២ដុល្លារកន្លះ សំរាប់កាហ្វេ១កែវជារៀងរាល់ថ្ងៃ ក្នុង១ឆ្នាំអ្នកអាចសន្សំបាន៩១២,៥ដុល្លារ ហើយបើអ្នកសន្សំបែបនេះជារៀងរាល់ថ្ងៃ និងយកប្រាក់ទៅវិនិយោគជារៀងរាល់ឆ្នាំម្តង ជាមួយនឹងផលចំណេញផ្គូបប្រចាំឆ្នាំ១៥ ភាគរយ នោះអ្នកនឹងទទួលបាន”។

លោកបានលើកជាអនុសាសន៍មួយចំនួនមកបញ្ជាក់ដូចជា ទី១ សំរាប់អ្នកមានអាយុ២០ឆ្នាំ ដល់ពេលអ្នកមានអាយុ៥០ឆ្នាំ អ្នកនឹងមានប្រាក់សរុបជាង៤០ម៉ឺនដុល្លាអាមេរិក។ ទី២ សំរាប់អ្នកមានអាយុ២៥ឆ្នាំ ដល់ពេលអ្នកមានអាយុ៥០ឆ្នាំ អ្នកនឹងមានប្រាក់សរុបជាង១៩ម៉ឺនដុល្លាអាមេរិក។ ទី៣ សំរាប់អ្នកមានអាយុ៣០ឆ្នាំ ដល់ពេលអ្នកមានអាយុ៥០ឆ្នាំ អ្នកនឹងមានប្រាក់សរុបជាង៩ម៉ឺនដុល្លាអាមេរិក។

ប្រសិនបើអ្នកជាអ្នកវិនិយោគពិតប្រាកដ ឱកាសនៃការវិនិយោគដែលទទួលបានផលចំណេញផ្គួបប្រចាំឆ្នាំ១៥ភាគរយ មិនលំបាករកនោះទេ៕

ជប៉ុនឈរនៅលំដាប់ទី២ក្នុងការវិនិយោគពីបរទេសបន្ទាប់ចិននៅកម្ពុជា

ដោយ ម៉ាណេត

ភ្នំពេញៈ ជប៉ុនស្ថិតក្នុងចំណោមវិនិយោគិនធំៗលំដាប់ទី២ នៅក្នុងប្រទេស ខណៈចិនឈរនៅលំដាប់ទី១នៅកម្ពុជា ស្របពេលអ្នកជំនាញអះអាងថា ការវិនិយោគបរទេសនៅកម្ពុជាបានកើនឡើងយ៉ាងឆាប់រហ័ស ក្នុងរយៈពេលប៉ុន្មានឆ្នាំចុងក្រោយនេះ។

យោងតាមរបាយការណ៍ចុងក្រោយ របស់ក្រុមប្រឹក្សាអភិវឌ្ឍន៍កម្ពុជា (CDC) រដ្ឋាភិបាលកម្ពុជា បានអនុម័តគម្រោងវិនិយោគផ្ទាល់ពីបរទេស (FDI) ចំនួន២២២គម្រោងក្នុងរយៈពេល៨ខែដំបូងនៃឆ្នាំ២០១៩ ជាមួយនឹងការវិនិយោគសរុបចំនួន៦ពាន់លានដុល្លារអាមេរិក ដែលកើនឡើងចំនួន៨១គម្រោង ស្មើនឹង៤,១២ពាន់លានដុល្លារ បើប្រៀបធៀបនឹងរយៈពេលដូចគ្នាកាលពីឆ្នាំមុន។

ជប៉ុនគឺជាវិនិយោគិនបរទេសធំជាងគេទី២ ដែលមាន៧.៨ ភាគរយ នៃការវិនិយោគ FDIសរុបនៅកម្ពុជា ខណៈវៀតណាមមាន២,៩ភាគរយ សឹង្ហបូរីមាន១,៨ ភាគរយ សាធារណរដ្ឋកូរ៉េមាន១,៧ ភាគរយ ម៉ាឡេស៊ីមាន ១,៣៦ ភាគរយ និងថៃមាន០,៩ ភាគរយ។

សម្រាប់វិនិយោគិនធំគេទី១គឺចិន ជាមួយនឹងការវិនិយោគសរុប៧,៨ពាន់លានដុល្លារ ក្នុងរយៈពេល៨ខែដំបូងនៃឆ្នាំនេះ ដែលស្មើនឹង៣៥ភាគរយនៃលំហូរទុនវិនិយោគផ្ទាល់ពីបរទេស (FDI) សរុបនៅកម្ពុជា។

លោក ជា វុទ្ធី អគ្គលេខាធិការរងគណៈកម្មាធិការវិនិយោគកម្ពុជា និងគណៈកម្មាធិការតំបន់សេដ្ឋកិច្ចពិសេសកម្ពុជាមានប្រសាសន៍ថា លំហូរចូលនៃការវិនិយោគមាននិន្នា ការកើនឡើងយ៉ាងខ្លាំងលើវិស័យឧស្សាហកម្ម ផលិតកម្ម និងទេសចរណ៍ដែលបានកើនឡើង ៩៤ ភាគរយ បើប្រៀបធៀបនឹងរយៈពេលដូចគ្នាក្នុងឆ្នាំ ២០១៨ បន្ថែមលើការជំរុញការវិនិយោគនៅក្នុងតំបន់សេដ្ឋកិច្ចពិសេស។

កម្ពុជាបានអនុម័តគម្រោងវិនិយោគផ្ទាល់ ពីបរទេសចំនួន៨៣១ ចាប់តាំងពីឆ្នាំ ២០១៦ ដោយមានទុនវិនិយោគសរុប
២២,៥ពាន់លានដុល្លារអាមេរិក។ ការវិនិយោគលើវិស័យទេសចរណ៍មានចំនួន៤៧ភាគរយ នៃដើមទុនវិនិយោគផ្ទាល់ពីបរទេសសរុប ខណៈការវិនិយោគ លើហេដ្ឋារចនាសម្ព័ន្ធមានចំនួន២៤ភាគរយ ឧស្សាហកម្មមាន២៣ ភាគរយ និងកសិកម្មមាន៦ភាគរយ នៃដើមទុនវិនិយោគផ្ទាល់ពីបរទេស។

លោកជា វុទ្ធី បានឱ្យដឹងថា ការវិនិយោគបានចូលរួមចំណែកយ៉ាងសំខាន់ ដល់កម្ពុជា ក្នុងការរក្សាអត្រាកំណើនសេដ្ឋកិច្ចរបស់ខ្លួន៧ភាគរយ និងបង្កើតការងារប្រមាណ១៥ ម៉ឺននាក់ក្នុងមួយឆ្នាំៗ៕

គំរោងធំៗចំនួន៥នឹងផ្លាស់ប្តូរមុខមាត់ខេត្តកំពង់ស្ពឺយ៉ាងឆាប់រហ័ស

ដោយៈ រ៉ាណេត

កំពង់ស្ពឺៈ គំរោងធំៗចំនួន៤ នឹងផ្លាស់ប្តូរមុខមាត់ខេត្តកំពង់ស្ពឺយ៉ាងឆាប់រហ័ស ប្រសិនជាគំរោងនេះអនុវត្តន៍តាមផែនការ ដែលបានស្នើសុំដោយក្រុមហ៊ុនទាំងនោះ ហើយទទួលបានការអនុម័តយល់ព្រមពីក្រុមប្រឹក្សាអភិវឌ្ឍន៍កម្ពុជា។

លោក វ៉ី សំណាងអភិបាលខេត្តកំពង់ស្ពឺបានមានប្រសាសន៍ឲ្យដឹងតាមទូរស័ព្ទកាលពីរសៀលថ្ងៃទី១៧ តុលាកន្លងមកថា គំរោងសាងសង់់មជ្ឈមណ្ឌលពាណិជ្ជកម្ម លំនៅដ្ឋានប្រណីតចំនួន៤ និងគំរោងសាងសង់ពហុកីឡាដ្ឋានខេត្តលើផ្ទៃដី៤ហិកតា នឹងចូលរួមចំណែកយ៉ាងខ្លាំងក្នុងការអភិវឌ្ឍសេដ្ឋកិច្ច និងលើកកំពស់ជីវភាពរស់នៅរបស់់ប្រជាពលរដ្ឋ។

លោកបន្តថា គំរោងដែលបាននិងកំពុងដំណើរការនីតិវិធី ដូចជាគម្រោងសាងសង់មជ្ឈមណ្ឌលពាណិជ្ជកម្មកម្ពស់៣៤ជាន់ និងគម្រោង៦៤ជាន់ ដែលស្ថិតសង់ខាងផ្លូវ កណ្តាលក្រុងច្បារមន”។ លោកបន្តទៀតថា “នៅក្នុងខេត្តកំពង់ស្ពឺ ក៏មានគម្រោងបង្កើតទីក្រុងវៃឆ្លាតលើដីទំហំ១០០ហិកតា រួមជាមួយការសាងសង់មជ្ឈមណ្ឌលវប្បធម៌ព្រះពុទ្ធសាសនា លើដីទំហំ១២៦ហិកតា ក្នុងទឹកប្រាក់វិនិយោគប្រមាណ១០លានដុល្លារ ស្ថិតក្នុងស្រុកភ្នំស្រួច ដែលរហូតមកដល់ពេលនេះសាងសង់ បានប្រមាណ២០ភាគរយ”។

បច្ចុប្បន្ននេះ រដ្ឋបាលសាលាខេត្ត បានកំណត់ទីតាំងរួចរាល់សម្រាប់សាងសង់កីឡាដ្ឋានថ្នាក់ខេត្ត នៅលើផ្ទៃដីទំហំ៤ហិកតា។ ស្ថិតនៅគីឡូលេខ៤ ចេញពីក្រុងច្បារមន ឆ្ពោះទៅភ្នំឱរ៉ាល់ ដើម្បីត្រៀមខ្លួនក្នុងព្រឹត្តិការណ៍ប្រកួតកីឡា SEA Games លើកទី៣២ ខាងមុខនេះ ក្រោមជំនួយរបស់សប្បុរសជន ដែលមានប្រធានសភាពសហព័ន្ធយុវជនកម្ពុជា ជាអ្នកទទួលខុសត្រូវថវិកាសាងសង់ទាំងស្រុង។

ពីខេត្តដែលធ្លាប់តែក្រីក្រជាងគេនៅទូទាំងប្រទេស ប៉ុន្តែបច្ចុប្បន្នកំពង់ស្ពឺ បានកែប្រែមុខមាត់យ៉ាងប្រសើរ ជាមួយនឹងសន្ទុះនៃការអភិវឌ្ឍវិស័យហេដ្ឋារចនាសម្ព័ន្ធ និងវិស័យឧស្សាហកម្មចំរុះយ៉ាងសម្បូរបែប ជាពិសេស គម្រោងសាងសង់សំណង់អគារមជ្ឈមណ្ឌលពាណិជ្ជកម្មកម្ពស់កបពពក រួមជាមួយនឹងគម្រោងសាងសង់កីឡាដ្ឋាននៅលើផ្ទៃដីទំហំ៤ហិកតា ដែលកំពុងតែមានសកម្មភាព។

លោកវ៉ី សំណាងបានបន្តថា គម្រោងអភិវឌ្ឍធំៗជាច្រើននៅក្នុងខេត្តកំពង់ស្ពឺ បានធ្វើឱ្យបណ្តាអ្នកវិនិយោគផ្នែកវិស័យអចលនទ្រព្យទាំងក្នុង និងក្រៅស្រុក បង្ហាញពីចំណាប់អារម្មណ៍ជាខ្លាំង ជាពិសេសក្រោយពេលដែលរដ្ឋាភិបាល បានដាក់ចេញផែនការបង្កើតតំបន់ឧស្សាហកម្ម នៅតាមបណ្តាយផ្លូវជាតិលេខ៤ ឆ្ពោះទៅក្រុងព្រះសីហនុ។

លោកបន្តថា “បច្ចុប្បន្ននេះខេត្តកំពង់ស្ពឺ បាននិងកំពុងតែមានសកម្មភាពអភិវឌ្ឍលើគ្រប់វិស័យ ដែលធ្វើឱ្យសេដ្ឋកិច្ចនៅក្នុងខេត្ត ក៏ដូចជាកម្រិតជីវភាពរបស់ប្រជាពលរដ្ឋ ក្នុងតំបន់មានភាពល្អប្រសើរជាងមុន”។

បច្ចុប្បន្ននេះវិស័យឧស្សាហកម្ម បាននិងកំពុងតែដើរឈានមុខគេនៅក្នុងខេត្តកំពង់ស្ពឺ ដោយមានរោងចក្រ សហគ្រាសសរុបចំនួន២៦១គម្រោង ផ្តល់ឱកាសការងារជូនប្រជាពលរដ្ឋទូទៅប្រមាណជាង១២ម៉ឺននាក់ ខណៈខេត្តនេះមានប្រជាជនសរុប មានចំនួនជាង៨៧ម៉ឺននាក់ ហើយគម្រោងប្រមាណ១០០ទៀត កំពុងតែដើររៀបចំតាមនីតិវិធី និងត្រៀមដំណើរការក្នុងពេលខាងមុខនេះ៕

ចំណេះដឹង! តើតំបន់ពាណិជ្ជកម្មសេរី និងសហភាពសេដ្ឋកិច្ចមានភាពខុសគ្នាដូចម្តេច?

ដោយ វុត្ថា

ភ្នំពេញៈ នៅពេលយើងនិយាយពីសេដ្ឋកិច្ច មានច្រើនរបៀប និងច្រើនទម្រង់សម្រាប់ការអនុវត្ត ទៅតាមប្រភេទនីមួយៗ ដែលត្រូវបានដាក់ចេញសេដ្ឋវិទូ ឬរដ្ឋាភិបាល សម្រាប់អនុវត្តតាមកិច្ចព្រមព្រៀងនៅក្នុងតំបន់ និងអន្តរជាតិ។

គេហទំព័រ Propertyarea.asia នឹងលើកយកភាពខុសគ្នា រវាងតំបន់ពាណិជ្ជកម្មសេរី និងសហភាពសេដ្ឋកិច្ចមកបង្ហាញជូនមិត្តអ្នកអាន និងតើតំបន់ទាំងពីរនេះមានន័យយ៉ាងដូចម្តេច?។

យោងតាមឯកសាររបស់ក្រសួងពាណិជ្ជកម្មបានពន្យល់ថា ភាពខុសគ្នារវាងតំបន់ពាណិជ្ជកម្មសេរី និងសហភាពសេដ្ឋកិច្ច គឺស្ថិតនៅត្រង់ថា តំបន់ពាណិជ្ជកម្មសេរីគឺជាប្រភេទសមាហរណកម្មសេដ្ឋកិច្ចកម្រិតស្រាល ដែលត្រូវបានបង្កើតឡើង ដើម្បីកាត់បន្ថយឬលុបចោលពន្ធនាំចូល និងរបាំងមិនមែនពន្ធគយសំដៅជំរុញពាណិជ្ជកម្ម។

រីឯសហភាពសេដ្ឋកិច្ចវិញ គឺជាប្រភេទនៃសមាហរណកម្មសេដ្ឋកិច្ច ដែលជ្រាលជ្រៅ មានលក្ខណៈផ្សេងទៀតបន្ថែមពីលើការកាត់បន្ថយ ឬលុបចោលពន្ធនាំចូល និងរបាំងមិនមែនពន្ធគយ ដូចជាការដាក់ពន្ធនាំចូលតាមអត្រាដូចគ្នា ទៅលើផលិតផលនាំចូលពីប្រទេសទីបីទៅក្នុងតំបន់។ ការចល័តដោយសេរីនូវផលិតកម្ម រួមមាន ទំនិញ សេវាកម្ម កំលាំងពលកម្ម មូលធន និងការធ្វើសុខដុមកម្មនៃស្តង់ដារ និងការចេញនូវវិញ្ញាបនប័ត្រ គោលនយោបាយរូបិយវត្ថុ សារពើពន្ធ សង្គម និងច្បាប់។

ជាឧទាហរណ៍ខ្លី បន្ទាប់ពីការបង្កើតកិច្ចព្រមព្រៀង អនុគ្រោះពាណិជ្ជកម្មនៅឆ្នាំ១៩៧៧ ដែលផ្តល់ការអនុគ្រោះតាមការស្ម័គ្រចិត្ត ចំពោះផលិតផល៧១មុខ និងបានបង្កើនដល់១២,៦៤៧មុខ នៅឆ្នាំ១៩៨៦ អាស៊ានបានធ្វើសមាហរណកម្មសេដ្ឋកិច្ចកាន់ តែជ្រាលជ្រៅជាងមុន ដោយបង្កើតតំបន់ពាណិជ្ជកម្មសេរីនៅឆ្នាំ១៩៩២ ដែលលុបពន្ធនាំចូលស្ទើរតែគ្រប់ផលិតផលទាំងអស់ និងរបាំងមិនមែនពន្ធនាំចូលទៀត និងមានគោលដៅបង្កើតជាសហគមន៍សេដ្ឋកិច្ចអាស៊ាននៅឆ្នាំ២០១៥។

សមាហរណកម្មសេដ្ឋកិច្ច តាមបែបសហភាពអឺរ៉ុប គឺមានលក្ខណៈជ្រាលជ្រៅខ្លាំង ពីព្រោះថាក្រៅពីលុបពន្ធនាំចូល និងរបាំងមិនមែនពន្ធនាំចូល សហភាពអឺរ៉ុបបានអនុវត្តន៍នូវគោលនយោបាយដាក់អត្រាពន្ធនាំចូលដូចគ្នា ចំពោះផលិតផលនាំចូលពីក្រៅតំបន់ គោលនយោបាយរូបិយវត្ថុ និងសារពើពន្ធរួម ដូចជាមានរូបិយប័ណ្ណរួម (អឺរ៉ូ) អនុញ្ញាតឱ្យចល័តដោយសេរីនូវទំនិញ សេវាកម្ម កំលាងពលកម្ម និងមូលធន ព្រមទាំងធ្វើសុខដុមកម្មនូវស្តង់ដា នីតិវិធី បែបបទ និងការអនុវត្តផ្សេងៗ៕

ក្រុមហ៊ុនយក្សបារាំងបង្ហាញការសោកស្តាយដែលមិនរួមបញ្ចូលតៃវ៉ាន់ដែលជាផ្នែកមួយនៃប្រទេសចិន

ដោយ Donald Lee

ភ្នំពេញៈ ក្រុមហ៊ុនដ៏ល្បីឈ្មោះរបស់បារាំង LVMH បង្ហាញសោកស្តាយជាមួយអតិថិជនចិន ព្រោះការធ្វើបទបង្ហាញរបស់ខ្លួនមិនរាប់បញ្ចូលតៃវ៉ាន់ ជាផ្នែកមួយនៃប្រទេសចិន។

ក្នុងអំឡុងពេលនៃការបង្រៀន កម្មវិធីហាត់ការក្រុមហ៊ុន Dior បានធ្វើឡើងនៅសាកលវិទ្យាល័យ Zhejiang Gongshang University ក្នុងទីក្រុងហាំងចូវ បទបង្ហាញត្រូវបានបង្ហាញ និងបង្ហោះលើវេទិកាប្រព័ន្ធផ្សព្វផ្សាយសង្គមយក្ស Weibo ដែលបង្ហាញពីចំនួនហាងដែលក្រុមហ៊ុនមាននៅក្នុងប្រទេសចិន។

នៅក្នុងវីដេអូដែលបានបង្ហោះ អ្នកតំណាងយីហោនេះ បានឆ្លើយដែលអ្នកហាត់ការម្នាក់ដែលសួរថា ហេតុអ្វីបានជាហាងតៃវ៉ាន់ មិនត្រូវបានគេបង្ហាញក្នុងបទបង្ហាញ។

បុគ្គលិក Dior បានឆ្លើយថា “ដោយសារតែយើងនៅក្នុងប្រទេសចិន យើងមើលថែរក្សាប្រទេសចិនដីគោក”។

បុគ្គលិករូបនោះបានបន្ថែមទៀតថា “តៃវ៉ាន់ និងហុងកុង ត្រូវបានចាត់ថ្នាក់ជាផ្នែកមួយនៃតំបន់អាស៊ីប៉ាស៊ីហ្វិក”។

អ្នកចូលរួមធ្វើបទបង្ហាញ បានរុញច្រានយ៉ាងលឿន ទៅកាន់អ្នកធ្វើបទបង្ហាញ Dior ហើយបាននិយាយថា តៃវ៉ាន់គួរតែត្រូវបានបញ្ចូលទៅក្នុងផែនទីប្រទេសចិន។

សំលេងរបស់សិស្សនៅក្នុងបន្ទប់ ដែលមានអ្នកគាំទ្រជាច្រើន បាននិយាយថា “ត្រូវហើយ ខ្ញុំដឹងថាអ្នកគ្រប់គ្រងប្រទេសចិន ប៉ុន្តែផែនទីរបស់អ្នកនិយាយថា ចិន។ ខ្ញុំនៅតែជឿជាក់ថា អ្នកត្រូវការបញ្ចូលតៃវ៉ាន់នៅក្នុងផែនទីរបស់អ្នក”។

ចិនចាត់ទុកកោះតៃវ៉ាន់ជាផ្នែកមួយនៃ“ ប្រទេសចិនតែមួយ” ហើយបានព្រមានក្រុមហ៊ុនលោកខាងលិចជាច្រើន ចំពោះការមិនធ្វើតាមការដឹកនាំរបស់មជ្ឈឹមបូព៌ា លើបញ្ហាទឹកដីនេះ។

ខ្សែវីដេអូនេះបានក្លាយទៅជារឿងអាក្រក់ នៅលើប្រព័ន្ធផ្សព្វផ្សាយសង្គមចិន ដែលបង្ខំឱ្យក្រុមហ៊ុន Dior ចេញមកធើ្វការសុំទោស។ ភាពចម្រូងចម្រាសបានកើតឡើង ខណៈ “សេចក្តីថ្លែងការណ៍ក្រុមហ៊ុន Dior” មានទស្សនៈចំនួន១០០លានដង គិតត្រឹមថ្ងៃ ព្រហស្បតិ៍។

សេចក្តីថ្លែងការណ៍របស់ Dior បានសរសេរថា “ក្រុមហ៊ុន Dior សូមលើកយកការសុំទោសដ៏ជ្រាលជ្រៅរបស់យើង ចំពោះសេចក្តីថ្លែងមិនត្រឹមត្រូវ និងការបង្ហាញខុសដែលធ្វើឡើងដោយបុគ្គលិក Dior នៅឯបទបង្ហាញនៅបរិវេណសាលា”។

សេចក្តីប្រកាសនោះបានបន្ថែមទៀតថា “ក្រុមហ៊ុន Dior តែងតែគោរព និងប្រកាន់ខ្ជាប់នូវគោលការណ៍ចិនតែមួយ ការពារដាច់ខាតនូវអធិបតេយ្យភាព និងបូរណភាពទឹកដីរបស់ចិន និងគោរពអារម្មណ៍របស់ប្រជាជនចិន”៕

គេហទំព័រ Propertyarea.asia សហការជាមួយ Realestate.com.kh លក់់អចលនទ្រព្យតាមអនឡាញ

ដោយគង់ សូរិយា

ភ្នំពេញៈ គេហទំព័រ Propertyarea.asia បានសហការជាមួយគេហទំព័រ realestate.com.kh ក្នុងការដាក់លក់អចលនទ្រព្យតាមប្រព័ន្ឋអនឡាញ ដែលវាជាផ្នែកដ៏សំខាន់នៃការពង្រីកការធ្វើអាជីវកម្មតាមប្រព័ន្ឋឌីជីថល។

ការធ្វើពាណិជ្ជកម្មតាមប្រព័ន្ឋបច្ចេកវិទ្យា បានក្លាយជាម៉ូដែលថ្មីមួយនៃបដិវត្តន៍ឧស្សាហកម្មទី៤ ដែលកំពុងពង្រីកការគ្របដណ្តប់ទូទាំងសាកលលោក។

អតិថិជនចាប់អារម្មណ៍ទិញ ជួល លក់អចលនទ្រព្យអាចចូលមើល តាមរយៈវេបសាយ Propertyarea.asia បានជារៀងរាល់ថ្ងៃ។

លោកយិន លាងគង់ស្ថាបនិកនិងជាអគ្គនាយកគេហទំព័រ Propertyarea.asia និងលោក Tom Osullivanអគ្គនាយកនៃគេហទំព័រ Realestate.com.kh បានសម្តែងនូវក្តីសាទរចំពោះកិច្ចសហការនេះ ដែលធ្វើឡើងក្នុងរូបភាពឈ្នះ ឈ្នះទាំងអស់គ្នា។

លោកយិន លាងគង់បានបន្តថា “បច្ចេកវិទ្យាជាផ្នែកមួយយ៉ាងសំខាន់នៅតាមបណ្តាប្រទេសរីកចម្រើននានា ក្នុងការផ្តល់សេវាកម្មទិញលក់ ជួលអចលនទ្រព្យ ពិសេសការបង្ហាញពីគម្រោងនានា”។ លោកបន្តថា “ការទាន់សម័យកាលស៊ីវិល័យនៃប្រព័ន្ឋបច្ចេកវិទ្យា នឹងជួយឲ្យក្រុមហ៊ុនឬភ្នាក់ងារអចលនទ្រព្យនានា ទទួលបានជោគជ័យលើសេវាកម្មរបស់ខ្លួន”៕

កូរ៉េខាងត្បូងពង្រីកទំនាក់ទំនងជាមួយបណ្តាប្រទេសអាស៊ាន ខណៈកិច្ចប្រជុំកំពូលចាប់ផ្តើមនៅខែក្រោយ

ដោយ ប៊ី

ភ្នំពេញៈ មន្ត្រីជាន់ខ្ពស់មកពីប្រទេសកូរ៉េខាងត្បូងបានឱ្យដឹងថា កូរ៉េខាងត្បូងកំពុងយកចិត្តទុកដាក់កាន់តែខ្លាំង ក្នុងការពង្រឹងចំណងទាក់ទងជាមួយបណ្តាប្រទេស ជាសមាជិកអាស៊ានក្រោមគោលនយោបាយថ្មី ឆ្ពោះមកភាគខាងត្បូងរបស់ខ្លួន ខណៈប្រទេសនេះ នឹងធ្វើជាម្ចាស់ផ្ទះនៃកិច្ចប្រជុំកំពូលពិសេសចំនួនពីរ ជាមួយមេដឹកនាំអាស៊ាននៅខែក្រោយ។ នេះបើយោងតាមការសែតបាងកកប៉ុស្តិ៍ចុះផ្សាយនេះថ្ងៃនេះ។

លោក Koo Hong-seok អគ្គនាយកនៃនាយកដ្ឋានអាស៊ាន និងកិច្ចការអាស៊ីអាគ្នេយ៍ ភ្ជាប់ជាមួយក្រសួងការបរទេសកូរ៉េខាងត្បូងបាននិយាយថា កូរ៉េខាងត្បូងមានគោលនយោបាយ ស្វែងរកកិច្ចសហប្រតិបត្តិការបន្ថែមទៀត ជាមួយអាស៊ានដើម្បីលើកកម្ពស់ឧស្សាហកម្ម និងជំនួយមនុស្សធម៌ និងប្រតិបត្តិការជួយសង្គ្រោះគ្រោះមហន្តរាយ។

លោកបន្តថា “ទោះយ៉ាងណា កូរ៉េខាងត្បូងមិនទាន់មានផែនការណាមួយ សម្រាប់សមយុទ្ធយោធារួមគ្នាជាមួយប្លុកអាស៊ាននៅឡើយទេ”។

លោកបានបន្ថែមថា កូរ៉េខាងត្បូងនឹងធ្វើជាម្ចាស់ផ្ទះ នៃកិច្ចប្រជុំកំពូលអាស៊ាន-សាធារណរដ្ឋកូរ៉េ នៅទីក្រុងប៊ូសាននៅថ្ងៃទី២៥ និង២៦ ខែ វិច្ឆិកា ដើម្បីប្រារព្ធខួបលើកទី ៣០ នៃការបង្កើតទំនាក់ទំនងសន្ទនារវាងប្រទេស និងតំបន់។ នៅថ្ងៃទី ២៧ ខែ វិច្ឆិកា ទីក្រុងប៊ូសាន ក៏នឹងធ្វើជាម្ចាស់ផ្ទះនៃកិច្ចប្រជុំកំពូលមេគង្គ- សាធារណរដ្ឋកូរ៉េដែលបានចូលរួមសម្ភោធដោយមានការចូលរួម ពីមេដឹកនាំនៃបណ្តាប្រទេសទន្លេមេគង្គ ឡាវ កម្ពុជា មីយ៉ាន់ម៉ា វៀតណាម និងថៃផងដែរ។

លោក Koo Hong-seok បាននិយាយថា លោកនាយករដ្ឋមន្រ្តីប្រាយុធ ចានអូចា ក្នុងឋានៈជាប្រធានអាស៊ានបច្ចុប្បន្ន ក៏នឹងចូលរួមក្នុងកិច្ចប្រជុំកំពូលនេះដែរ នៅថ្ងៃទី ២ ដល់ថ្ងៃទី៤ ខែវិច្ឆិកា។

លោក Park So-Yeon អគ្គនាយកផ្នែកការិយាល័យរៀបចំពិធី និងការិយាល័យរៀបចំពិធីការបាននិយាយថា អ្នកចូលរួមជាង១ម៉ឺននាក់ រួមទាំងមេដឹកនាំ និងគណៈប្រតិភូអាស៊ាន សាធារណៈ និងធុរកិច្ចត្រូវបានរំពឹងថា នឹងចូលរួមនៅក្នុងកិច្ចប្រជុំកំពូល និងព្រឹត្តិការណ៍ពាក់ព័ន្ធដទៃទៀត។

មេដឹកនាំកូរ៉េខាងជើងគីម ជុងអ៊ុន ត្រូវបានគេអញ្ជើញឱ្យចូលរួមកិច្ចប្រជុំកំពូលនេះ ប៉ុន្តែការចូលរួមរបស់លោកមិនត្រូវបានបញ្ជាក់ទេ៕

ក្រុមហ៊ុនលំដាប់យក្សក្នុងស្រុកបានទិញយកអាជីវកម្មនិងទ្រព្យសម្បត្តិទាំងអស់របស់ក្រុមហ៊ុនហ្គ្រែនភ្នំពេញ

ដោយៈ រ៉ាណេត

ភ្នំពេញៈ ក្រុមហ៊ុនលំដាប់យក្សក្នុងស្រុកគឺ CHIP MONG Land ដែលជាបុត្រសម្ព័ន្ឋរបស់ក្រុមហ៊ុន CHIP MONG GROUP បានសម្រេចចិត្តទិញយកអាជីវកម្ម និងទ្រព្យសម្បត្តិទាំងអស់របស់ក្រុមហ៊ុនហ្រ្គែនភ្នំពេញ។ នេះបើតាមសេចក្តីជូនដំណឹងរបស់ក្រុមហ៊ុន Grand Phnom Penh International City។

ក្រុមហ៊ុន Grand Phnom Penh international City កាលពីថ្ងៃទី១៦ ខែតុលា ឆ្នាំ២០១៩ម្សិលមិញនេះបានបញ្ជាក់ថា ក្រុមមួយនេះបានប្រគល់សិទ្ធិគ្រប់គ្រងនូវរាល់អាជីវកម្ម និងទ្រព្យសម្បត្តិសកម្មទាំងអស់ទៅឱ្យក្រុមហ៊ុន ជីព ម៉ុង លែន (Chip Mong Co., Ltd) ដោយមានសុពលភាពចាប់ពីថ្ងៃជូនដំណឹងតទៅ ។

ក្រុមហ៊ុន CHIP MONG GROUP អាចចាត់ទុកជាក្រុមហ៊ុនយក្សមួយ ដោយសារក្រុមហ៊ុននេះ បានពង្រីកការវិនិយោគលើវិស័យជាច្រើនរួមមានផ្សារទំនើប បុរី ខុនដូ រោងចក្រស៊ីម៉ងត៍ រោងចក្រផលិតសម្ភារៈសំណង់ រោងចក្រផលិតស្រាបៀរជាដើម។

CHIP MONG ត្រួវបានគេស្គាល់ថាជាក្រុមហ៊ុនដ៏ធំ និងមានបទពិសោធន៍ខ្ពស់ក្នុងការអភិវឌ្ឍវិស័យសំណង់នៅកម្ពុជា បានទទួលទិញយកទ្រព្យសម្បត្តិ ព្រមទាំងអាជីវកម្មនានារបស់ក្រុមហ៊ុន ហ្គ្រែន ភ្នំពេញ ដែលកំពុងមានដំណើរការនៅលើផ្ទៃដីទំហំ២៦០ហិកតា ស្ថិតនៅក្នុងខណ្ឌសែនសុខ រាជធានីភ្នំពេញ។

នៅក្នុងសេចក្ដីជូនដំណឹងខាងលើនេះ គណៈគ្រប់គ្រងក្រុមហ៊ុន Grand Phnom Penh International Co, Ltd មានកិត្តិយសសូមជូនដំណឹងជាផ្លូវការ ដល់ម្ចាស់លំនៅដ្ឋាន ដែលជាអតិថិជនទាំងអស់ឱ្យបានជ្រាបថា ថ្មីៗនេះក្រុមហ៊ុនបានលក់ទ្រព្យសកម្ម និងអាជីវកម្មទាំងអស់ទៅឱ្យក្រុមហ៊ុន ជីប ម៉ុងលែន ខូអិលធីឌី ហើយយើងខ្ញុំបានរៀបចំផ្ទេរសិទ្ធិគ្រប់គ្រងក្រុមហ៊ុនទាំងអស់ទៅឱ្យក្រុមហ៊ុនថ្មី គឺក្រុមហ៊ុន ជីប ម៉ុងលែន ខូអិលធីឌី ដែលតំណាងដោយ លោកឧកញ៉ា លាង ឃុន និងលោក ឧកញ៉ា លាង ម៉េង ចាប់ពីថ្ងៃចុះហត្ថលេខាលើលិខិតជូនដំណឹងនេះតទៅ៕

ក្រុមហ៊ុនកូរ៉េបោះទុន ១០លានដុល្លាររវិនិយោគលើពាណិជ្ជកម្មឌីជីថលនៅខេត្តសៀមរាប

ដោយ វុត្ថា

សៀមរាបៈ ក្រុមហ៊ុនទាំងពីរ គឺក្រុមហ៊ុន SOL Media Company និងក្រុមហ៊ុន SEo Dansan Digital Company នៃសាធារណកូរ៉េ បានប្រកាសបោះទុនប្រមាណ១០លានដុល្លារអាមេរិក គ្រោងវិនិយោគលើអាជីវកម្ម ឌីជីថល ដែលមានឈ្មោះថា Angkor Digital Theme Park នៅក្នុងខេត្តសៀមរាប។

យោងតាមកិច្ចប្រជុំរវាតំណាក្រុមហ៊ុនទាំងពីរ និងមន្ត្រីរដ្ឋបាលខេត្តសៀមរាបនៅថ្ងៃទី១៧ ខែតុលាឆ្នាំ ២០១៩នេះបានឱ្យដឹងថា គម្រោង Angkor Digital Theme Park នៅក្នុងខេត្តសៀមរាបនេះជាផ្នែកមួយ នៃការបន្ថែមលើការបម្រើសេវាកម្ម ផ្នែកទេសចរណ៍ បន្ទាប់ពីការទស្សនាប្រាង្គប្រាសាទក្នុងតំបន់អង្គរ និងតំបន់ទេសចរណ៍នានាក្នុងខេត្តសៀមរាប។

កិច្ចប្រជុំនេះក៏បានបង្ហាញដែរថា ការរៀបចំគម្រោងនេះ ជាការបង្ហាញអំពីរមណីយដ្ឋានអង្គរ និងទេសភាពនានា ព្រមទាំងប្រវិត្តសាស្រ្ត តាមរយៈទស្សនីយភាពឌីជីថល ដោយការសាងសង់របស់គម្រោង នឹងបំពាក់ប្រព័ន្ធឌីជីថលទំនើប 3D និង4D ដែលគម្រោងអាជីវកម្មនេះ នឹងចំណាយទឹកប្រាក់ប្រមាណ១០លានដុល្លារ សហរដ្ឋអាមេរិក ក្នុងការសាងសង់អគារ និងបំពាក់សម្ភារៈបច្ចេកទេស និងគ្រោងចំណាយរយៈពេលសាងសង់ប្រហែល២០ខែ។

ខេត្តសៀមរាប គឺជាមជ្ឈមណ្ឌលសេដ្ឋកិច្ចដ៏សំខាន់ របស់ព្រះរាជាណាចក្រកម្ពុជា ដោយផ្អែកលើសក្តានុពលទេសចរណ៍ រួមទាំងសម្បត្តិបេតិកភណ្ឌវប្បធម៌ ដ៏សម្បូរបែប តំបន់ប្រវត្តិសាស្ត្រធម្មជាតិ ដែលមានប្រាសាទបុរាណរាប់រយគ្របដណ្តប់ លើផ្ទៃដីទំហំ ៤០១គីឡូម៉ែត្រការ៉េ ជាពិសេសប្រាសាទអង្គរវត្ត ដែលជាតំបន់បេតិកភណ្ឌពិភពលោក។ លើសពីនេះទៀតខេត្ត សៀមរាប ត្រូវបានគេស្គាល់ថា ជាតំបន់បេតិកភណ្ឌពិភពលោក ដែលបានក្លាយទៅជាតំបន់ទេសចរណ៍ដ៏ល្បីល្បាញបំផុតមួយ។

ខេត្តសៀមរាបជាទីរមណីដ្ឋាន ដែលសំបូរទៅដោយមានប្រាង្គប្រាសាទបុរាណជាច្រើន ហើយត្រូវបានភ្ញៀវទេសចរគ្រប់ជាតិសាសន៍ចាត់ទុកថា គឺកន្លែងមានភាពទាក់ទាញមួយយ៉ាងសំខាន់ សំរាប់ភ្ញៀវទេសចរទូទៅឲ្យមកកម្សាន្ត ហើយក៏មិនអាចបំភ្លេចពីវប្បធម៌ដ៏ផូផង់មួយនេះ។ រដ្ឋាភិបាលកម្ពុជាបានចាត់ទុកខេត្តសៀមរាប ជាប៉ូលទេសចរណ៍ទី១ នៅក្នុងប្រទេស និងជាចំណុចទាញ់ទាញភ្ញៀវទេសចរយ៉ាងសំខាន់បំផុត៕

ធនាគារចំនួន៩ នឹងដៃគូជាមួយក្រសួងសាធារណៈការ ក្នុងការទូទាត់និងប្រមូលចំណូលសេវាសាធារណៈ

ដោយ វុត្ថា

ភ្នំពេញៈ គ្រឹះស្ថានធនាគារ និងហិរញ្ញវត្ថុចំនួន៩ បានក្លាយដៃគូជាមួយក្រសួងសាធារណៈការ និងដឹកជញ្ជូន ក្នុងការទូទាត់ និងប្រមូលចំណូលសម្រាប់សេវាសាធារណៈរបស់ក្រសួង ជាពិសេសសេវាលេខពិសេសផ្ទាល់ខ្លួន ដើម្បីឱ្យប្រជាពលរដ្ឋកាន់តែមានជម្រើសច្រើនក្នុងការមកទទួលសេវានេះ។

យោងតាមរបារណ៍របស់ក្រសួងសាធារណៈការ និងដឹកជញ្ជូនបានបង្ហាញកាលពីពេលថ្មីៗនេះថា គ្រឹះស្ថានទាំង៩នោះ រួមមាន៖1. ធនាគារ ABA 2. ធនាគារ វឌ្ឍនៈ 3. ធនាគារ កាណាឌីយ៉ា ក.អ 4. ធនាគារ ព្រីនស៍ 5. ធនាគារ ហុង លីអុង 6. ធនាគារ កម្ពុជាអាស៊ី 7. ធនាគារ ស្ថាបនា 8. ធនាគារ អាយស៊ីប៊ីស៊ី និង 9. ធនាគារ ស៊ីអាយអិមប៊ី ភីអិលស៊ី។

ក្រសួងសាធារណៈការបានស្វាគមន៍ ចំពោះវត្តរបស់គ្រឹះស្ថានទាំង៩នេះ ដែលមានបំណងចង់ចូលរួម ជំរុញការផ្តល់សេវាសាធារណៈ របស់ក្រសួងសាធារណការ និងដឹកជញ្ជូនឱ្យកាន់តែមានជម្រើសសំបូរបែបបន្ថែមទៀត។

ក្រសួងពន្យល់ថា ការយកចិត្តទុកដាក់របស់រាជរដ្ឋាភិបាល ក្រោមការដឹកនាំរបស់ សម្តេចតេជោនាយករដ្ឋមន្ត្រី និងលោកទេសរដ្ឋមន្ត្រីស៊ុន ចាន់ថុលបានបង្កើតប្រព័ន្ធបច្ចេកវិទ្យាក្នុងការផ្ដល់សេវាសាធារណៈ ជូនប្រជាពលរដ្ឋ ដើម្បីសម្រួលដល់ការកាត់បន្ថយពេលវេលាផ្តល់សេវា កាត់បន្ថយចំណាយក្រៅផ្លូវការ ក៏ដូចជាបង្ខិតសេវាកាន់តែជិតប្រជាពលរដ្ឋ។

ក្រសួងបញ្ជាក់ដល់គ្រឹះស្ថានហិរញ្ញវត្ថុ អំពីគំនិតផ្តួចផ្តើមថ្មីរបស់ក្រសួងក្នុងការផ្តល់សេវាលេខពិសេសផ្ទាល់ខ្លួន ដែលជាបង្គំ អក្សរ និងលេខឡាតាំងមិនលើសពី៨ខ្ទង់ ដើម្បីបំពេញតម្រូវការប្រជាពលរដ្ឋ ក្នុងនោះផងដែលក្រសួង ក៏មានបំណងផ្ដល់ជម្រើសក្នុងការបង់ប្រាក់បញ្ជាទិញ និងការចូលរួមដេញថ្លៃ ដោយប្រើប្រាស់បច្ចេកវិទ្យាទំនើប។ គំនិតផ្តួចផ្តើមទាំងនេះអាចដំណើរការទៅបាន លុះត្រាតែមានការសហការពីគ្រឹះស្ថានហិរញ្ញវត្ថុ ដែលកំពុងប្រើប្រាស់បច្ចេកវិទ្យា ក្នុងការចរាចរណ៍សាច់ប្រាក់នៅកម្ពុជា។

ក្នុងរយៈពេល៩ខែ ឆ្នាំ២០១៩នេះក្រសួងសាធារណៈការ និងដឹកជញ្ជូន បានសហរការជាមួយគ្រឹះស្ថានដៃគូរចំនួន៦ បានប្រមូលចំណូលដុលបានសរុប ប្រមាណជាង ១១៤ ពាន់លានរៀល និងមានប្រមាណ១លានប្រតិបត្តការ៕