ដោយ វុត្ថា
ភ្នំពេញ៖ បើមិនមានអ្វីប្រែប្រួលនោះទេ ផ្លូវជាតិលេខ៤ នឹងត្រូវចាប់ផ្តើមពង្រីកឱ្យបានទទឹងផ្លូវ ១១ម៉ែត្រ នៅចុងឆ្នាំនេះបន្ថែមទៀត ខណៈផ្លូវមួយនេះជាផ្លូវសេដ្ឋកិច្ចដ៏សំខាន់ដែលបាននិងកំពុងមមាញឹកចរចរណ៍ឆ្លងកាត់ច្រើន។
លោក វ៉ា ស៊ិមសូរិយា អ្នកនាំពាក្យក្រសួងសាធរណៈការ និងដឹកជញ្ជូនបានឱ្យដឹងតាមទូរស័ព្ទនៅថ្ងៃទី ៣០ ខែកក្កដាឆ្នាំ ២០១៩ នេះថា គម្រោងធ្វើឱ្យប្រសើរឡើងវិញនេះ ទទួលបានថវិកាពីធនាគារអភិវឌ្ឍន៍អាស៊ី (ADB) និងថវិការបស់រដ្ឋាភិបាលប្រមាណ ១១០លានដុល្លារក្នុងពង្រីកទទឹងផ្លូវឱ្យបាន ១១ម៉ែត្រ ដើម្បីជួយសម្រួលដល់ចរាចរណ៍។
លោកបន្តទៀតថា “បច្ចុប្បន្ន ផ្លូវជាតិលេខ ៤នេះ មានទទឹងប្រមាណ ១១ម៉ែត្ររួចហើយ តែយើងគ្រាន់តែចាក់កៅស៊ូឱ្យបានពេញនៅអមសងខាងផ្លូងដោយចាក់កៅស៊ូប្រភេទ AC” ។
ផ្លូវជាតិលេខ ៤ នេះគឺជាផ្លូវសេដ្ឋកិច្ច និងជាសរសៃឈាមក្នុងការដឹកជញ្ជូន ហើយការកែលម្អផ្លូវនេះ គឺមិនប៉ះពាល់ដល់ការស្ថាបនាផ្លូវល្បឿនលឿននោះទេ ដោយសារតែផ្លូវល្បឿនលឿនជាការវិនិយោគរបស់ក្រុមហ៊ុនចិនទៅលើខ្សែផ្លូវថ្មីផ្សេងមួយទៀត។
គម្រោងនេះ នឹងចាប់ផ្តើមធ្វើការកែលម្អឡើងវិញ និងជួសជុលតាមកន្លែងដែលមានការខូចខាតខ្លាំងនៅដើមឆ្នាំ២០១៩ ដែលត្រូវចំណាយពេលរយៈពេល ១៨ខែ ហើយពង្រឹងទៅលើខឿនផ្លូវដែលមានស្រាប់ក្នុងផ្លូវចាស់ និងចាក់អ៊ុតកៅស៊ូបន្ថែមនៅលើចិញ្ចើមផ្លូវ។
ការកែលម្អផ្លូវជាតិលេខ៤នេះ នឹងមិនមានការពង្រីកបន្ថែមថ្មីទៀតទេ ប៉ុន្ដែអាចពង្រីកអ៊ុតកៅស៊ូនៅលើចិញ្ចើមផ្លូវក្រួសក្រហមខ្លះៗដែរ ជាពិសេសការកសាងស្ពានបន្ថែម ឬបើកមុខទឹកឱ្យបានធំជាងមុន ខណៈពេលដែលបច្ចុប្បន្នមានការលិចទឹកហូរកាត់តាមដងផ្លូវនៅកន្លែងមួយចំនួន និងបានកើតឡើងជារៀងរាល់ឆ្នាំក្នុងពេលកន្លងមក។
កាលពីដើមខែកក្កដា ឆ្នាំ២០១៨នេះ ធនាគារពិភពលោក និងរាជរដ្ឋាភិបាលកម្ពុជាបានចុះហត្ថលេខាលើកិច្ចព្រមព្រៀងផ្ដល់កម្ចីឥណទានសម្បទាន សម្រាប់គម្រោងគ្រប់គ្រងសម្បត្តិផ្លូវថ្នល់ ជំហានទី២ ជាហិរញ្ញប្បទានបន្ថែមលើគម្រោងបច្ចុប្បន្ន ដែលគ្រោងចំណាយថវិកា សរុបចំនួន ១១៣លានដុល្លារ។
ក្នុងនោះឥណទានសម្បទានពីធនាគារពិភពលោកចំនួន ១១០លានដុល្លារ និងថវិកាបដិភាគរាជរដ្ឋាភិបាលចំនួន ៣លានដុល្លារ សម្រាប់វិនិយោគលើការស្តារ និងពង្រីកផ្លូវជាតិលេខ៤ ពីរាជធានីភ្នំពេញ ដល់ទីរួមខេត្តព្រះសីហនុ ក្នុងប្រវែងសរុប២០៦គីឡូម៉ែត្រ ដោយពង្រីកតួផ្លូវ បច្ចុប្បន្នពីទំហំ ៧ម៉ែត្រ ឱ្យដល់ ១១ម៉ែត្រ និងចាក់អ៊ុតកៅស៊ូប្រភេទ Asphalt Concret – AC ៕
