ដោយៈរ៉ាណេត
ភ្នំពេញៈ ស្របពេលដែលវិស័យអចលនទ្រព្យនៅកម្ពុជា កំពុងតែមានភាពពុះកញ្ជ្រោលខ្លាំង បច្ចុប្បន្នក្រៅពីមានអ្នកជំនួញធំៗកំពុងតែសម្រុកវិនិយោគ ដើម្បីទាញយកផលប្រយោជន៍ ក៏មានអ្នកសិល្បៈល្បីៗជាច្រើននាក់កំពុងតែចាប់អារម្មណ៍ និងចូលខ្លួនមកប្រឡូកនៅក្នុងវិស័យមួយនេះផងដែរ។
នៅក្នុងចំណោមអ្នកសិល្បៈល្បីៗ មានសិល្បៈករចំនួន១០រូបកំពុងលេចធ្លោក្នុងការវិនិយោគលើវិស័យនេះ រួមមានដូចជា លោកព្រាប សុវត្ថិ លោកខេមរៈ សេរីមន្ត លោកឆាយ វីរៈយុទ្ឋ អ្នកនាងខាត់ សុឃីម លោកហេង ដារី តារាកំប្លែងនាយ ពែកមី លោក អី ណូ តារាសម្ដែង លោក ប៉ែន ចំរ៉ុង និងលោកសាហ្វិន ហ្វីលីព រួមជាមួយនឹងតារាជាច្រើននាក់ទៀតកំពុងតែបង្ហាញពីសកម្មភាពយ៉ាងមមាញឹក នៅក្នុងការប្រកបមុខជំនួញលើវិស័យអចលនទ្រព្យ ដើម្បីរកចំណូលបន្ថែមពីលើអាជីពរបស់ខ្លួន។
អ្នកនាង ខាត់ សុឃីម ដែលកំពុងតែជំរុញការលក់ដីឡូតិ៍ ស្ថិតនៅស្រុកព្រៃនប់ ខេត្តព្រះសីហនុ រហូតដល់ប្រមាណជាង១០ហិកតា បានប្រាប់តាមទូរស័ព្ទកាលពីព្រឹកថ្ងៃទី១២ ខែកក្កដា ឆ្នាំ២០១៩នេះថា ការចូលខ្លួនប្រឡូកនៅក្នុងវិស័យអចលនទ្រព្យដោយការទិញ-លក់ដីឡូតិ៍ មិនមែនទើបតែចាប់ផ្តើមនោះទេ ពោលគឺអ្នកនាងបានប្រកបមុខជំនួញមួយនេះជាច្រើនឆ្នាំមកហើយ។
អ្នកនាងបានបន្តទៀតថា “កាលពីមុនខ្ញុំទិញ-លក់ក្នុងរូបភាពបែបធម្មតាដែលមានទំហំតូច ប៉ុន្តែពេលនេះគឺធ្វើគម្រោងធំជាងពេលមុន”។ អ្នកនាងបន្តទៀតថា “សព្វថ្ងៃនេះខ្ញុំកំពុងកាន់គម្រោងដីឡូតិ៍ទំហំជាង១០ហិកតា នៅអូរឧកញ៉ាហេង ស្ថិតនៅក្នុងស្រុកព្រៃនប់ ខេត្តព្រះសីហនុ ហើយគម្រោងនេះក៏ទទួលបានជោគជ័យ លើការលក់ជាងពាក់កណ្តាលហើយ”។
អ្នកខាត់ សុឃីមបានបន្តថា បន្ទាប់ពីគម្រោងនេះ អ្នកនាងមានគម្រោងវិនិយោគលើការអភិវឌ្ឍវិស័យលំនៅដ្ឋានកម្រិតមធ្យមវិញម្ដង ដែអាចធ្វើនៅក្នុងខេត្តព្រះសីហនុ ឬខេត្តដទៃទៀតដែលមានសក្ដានុពលល្អ។
ស្រដៀងគ្នានឹងការលើកឡើងខាងលើ កំពូលតារាចម្រៀងសម្លេងស្រទន់ លោក ឆាយ វីរៈយុទ្ធ ដែលកំពុងធ្វើការវិនិយោគទៅលើការទិញ-លក់ លើវិស័យដីធ្លី នៅក្នុងខេត្តព្រះសីហនុដែរនោះ ក៏បានបង្ហាញពីភាពសុទិដ្ឋិនិយមផងដែរថា “ខ្ញុំមើលឃើញថា វិស័យអចលនទ្រព្យនៅកម្ពុជា កំពុងតែមានភាពពុះកញ្ជ្រោលខ្លាំង ដែលវាជាឱកាសសម្រាប់អ្នកវិនិយោគនៅក្នុងវិស័យមួយនេះ។
លោកបន្តទៀត “អាជីពជាអ្នកសិល្បៈវាជាការងារមួយ ដែលអាចរកចំណូលបានច្រើនគួរសម ប៉ុន្តែចំពោះមុខជំនួញផ្នែកអចលនទ្រព្យ វាកាន់តែផ្តល់ឱកាសឱ្យយើងអាចរកចំណូលបានកាន់តែច្រើនក្នុងរយៈពេលដ៏ខ្លី ប្រសិនបើមុខជំនួញមួយនេះជោគជ័យ”។ លោកបានបញ្ជាក់ទៀតថា “បន្ទាប់ពីគម្រោងដីឡូតិ៍ក្នុងខេត្តព្រះសីហនុបញ្ចប់ ខ្ញុំនឹងបោះជំហានទៅកាន់ខេត្តផ្សេងទៀតដែលមានសក្ដានុពល ដូចជាកំពត កំពង់ចាម ជាដើម”។
ជាមួយគ្នានេះលោក ខេមរៈ សេរីមន្ត កំពូលតារាចម្រៀងដ៏ល្បីឈ្មោះប្រចាំនៅកម្ពុជា ដែលបានសហការចាប់ដៃជាមួយ ឧកញ៉ា ឡេង ណាវ៉ាត់ត្រា ទៅលើគម្រោងពុះដីឡូតិ៍នៅក្នុងស្រុកអង្គស្នួល ខេត្តកណ្តាល និងតំបន់ជាប់ព្រំដែនកម្ពុជា-ថៃ ក្រុងប៉ោយប៉ែត ក៏បានលើកឡើងពីចំណុចវិជ្ជមាន នៃការវិនិយោគក្នុងវិស័យអចលនទ្រព្យផងដែរ។
លោកបានបញ្ជាក់ថា “មិនថាគម្រោងទីមួយនៅក្នុងខេត្តកណ្តាល ឬគម្រោងនៅក្នុងក្រុងប៉ោយប៉ែតនោះទេ គឺសុទ្ធតែទទួលបានជោគជ័យ។ លោកបន្តទៀតថា “ពេលនេះគម្រោងទី២នៅក្រុងប៉ោយប៉ែត ត្រូវបានលក់ចេញជិត ១០០ភាគរយហើយ ហើយខ្ញុំកំពុងតែសម្លឹងមើលពីសក្ដានុពល នៅតាមបណ្តាខេត្តមួយចំនួនទៀត ដូចជាខេត្តបាត់ដំបង កំពង់ចាម កំពត ជាដើម ប៉ុន្តែខ្ញុំនៅមិនទាន់ប្រាកដថាឆ្ពោះទៅកាន់ខេត្តណាមួយឱ្យច្បាស់នៅឡើយ”៕
