សម្តេចតេជោ៖ស្ពានមិត្តភាពកម្ពុជា-ជប៉ុនអាចប្រើបានរយៈពេល ៥០ឆ្នាំទៅមុខថែមទៀត

April 3, 2019

ដោយ វុត្ថា

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានឪ្យដឹងថា ក្រោយពីការជួសជុលរួចរាល់ដែលបានដាក់ឱ្យប្រជាពលរដ្ឋប្រើប្រាស់នូវស្ពានមិត្តភាពកម្ពុជា-ជប៉ុន នៅថ្ងៃនេះ គឺយើងអាចប្រើបានរយៈពេល ៥០ឆ្នាំទៅមុខថែមទៀត។

សម្តេចសរសេរនៅក្នុងហ្វេសបុកផ្លូវការរបស់សម្តេចបន្ទាប់ពីកាត់ខ្សែបូរសម្ពោធដាក់ឱ្យប្រើប្រាស់ជាផ្លូវការនៅថ្ងៃទី ៣ ខែមេសានេ ថា ដូច្នេះថ្ងៃនេះ ការសម្ពោធដាក់ឱ្យប្រើប្រាស់ឡើងវិញនៃស្ពានជ្រោយចង្វារទី១នេះ ហាក់បីដូចជាសមិទ្ធផលថ្មីមួយទៀតផងដែរ សម្រាប់រាជធានីភ្នំពេញ ក្នុងការបម្រើដល់ការធ្វើដំណើរ និងដឹកជញ្ជូនទំនិញចេញចូលរបស់បងប្អូនប្រជាពលរដ្ឋទូទៅ ជាពិសេសករដាក់ឱ្យប្រប្រាស់ថ្ងៃនេះ ក៏ជាចំណងដៃថ្មីដល់ប្រជាពលរដ្ឋ មុនឱកាសនៃពិធីបុណ្យចូលឆ្នាំប្រពៃណីជាតិខ្មែរដែលនឹងចូលមកដល់ពាក់កណ្តាលខែមេសាខាងមុខនេះ។

សម្តេចបន្តថាសូមបងប្អូនជនរួមជាតិធ្វើដំណើរមានសុខសុវត្ថភាពទាំអស់គ្នា ហើយចេះយោគយល់អធ្យាស្រ័យឱ្យគ្នាទៅវិញទៅមក ជាពិសេស ត្រូវចេះគោរពច្បាប់ចរាចរណ៍ទាំងអស់គ្នា និងសូមអរគុណរដ្ឋាភិបាល និងប្រជាជប៉ុនដែលតែងតែជួយកសាង និងអភិវឌ្ឍន៍ប្រទេសកម្ពុជា។

ប្រវត្តិរបស់ស្ពាន

ស្ពានជ្រោយចង្វារទី១ ដែលក្នុងសម័យសង្គ្រាមក្នុងអំឡុងឆ្នាំ ១៩៧២ ស្ពាននេះត្រូវបានកាត់ផ្តាច់ពីគ្នា ដែលធ្វើឱ្យឱ្យប្រជា ពលរដ្ឋជួបការលំបាកយ៉ាងខ្លាំងក្នុងការធ្វើដំណើរដោយត្រូវជិះទូក និងជិះកាណូតឆ្លងដើម្បីកាត់ទន្លេស្លាបដ៏ធំមួយនេះ។

រហូតដល់ឆ្នាំ១៩៩២ ក្នុងពេលប្រទេសកម្ពុជាស្ថិតក្នុងដំណាក់កាលស្វះស្វែងរកសុខសន្តិភាព ឯកភាពជាតិ រួបរួមគ្នាបញ្ចប់សង្រ្គាម នៅពេលនោះស្ពានជ្រោយចង្វារទី១ ក៏ត្រូវបានជួសជុល និងតភ្ជាប់ឡើងវិញដោយប្រទេសជប៉ុន ហើយក៏បានប្តូរឈ្មោះទៅជាស្ពានមិត្តភាព កម្ពុជា-ជប៉ុន ដោយព្រះមហាវិរៈក្សត្រ ព្រះបរមរតនកោដ្ឋ សម្ដេចព្រះបាទ នរោត្ដម សីហនុ។

នៅចុងឆ្នាំ២០១៧ ដោយសារតែស្ពាននេះមានអាយុកាលច្រើន ហើយស្របពេលកំណើនសេដ្ឋកិច្ច និងលំហូរចរាចរណ៍កើនឡើងជាលំដាប់នោះ ស្ពាននេះតម្រូវឱ្យមានការជួសជុលធានាសុវត្ថិភាពឡើងវិញជាបន្ទាន់។ ការជួសជុលស្ពាននេះ គឺបានចំណាយថវិកាប្រមាណ ៣០លានដុល្លាររអាមេរិក ដែលជាជំនួយឥតសំណងរបស់រាជរដ្ឋាភិបាលជប៉ុន។

ស្ពានដែលត្រូវបានជួសជុលរួចស្រេចជាស្ថាពរនេះ គឺមានគុណភាពរឹងមាំល្អប្រសើរក្រោមការយកចិត្តទុកដាក់ខ្ពស់ពីក្រុមវិស្វករជួសជុលរបស់ប្រទេសជប៉ុន និងកម្ពុជា។ ស្ពានជ្រោយចង្វារទី១ គឺជាស្ពានដ៏សំខាន់ឆ្លងកាត់ទន្លេសាប ដែលជាតម្រូវការចាំបាច់បំផុតរបស់ប្រទេសជាតិ។ស្ពាននេះមានប្រវែង ៩៧១ម៉ែត្រ និងទទឹង ១៣ម៉ែត្រ៕

ទីផ្សារខុនដូនៅក្រុងព្រះសីហនុកំពុងតែទាក់ទាញការវិនិយោគ

April 3, 2019

0

ដោយ រ៉ាណេត

ព្រះសីហនុ៖ នៅក្រុងព្រះសីហនុនាពេលបច្ចុប្បន្ននេះ បានក្លាយទៅជាទីក្រុងដ៏ស៊ីវិល័យដែលលម្អទៅដោយកំណើននៃចំនួនអាគារខ្ពស់ៗយ៉ាងស្អេកស្កះ ដែលបម្រើឱ្យវិស័យផ្សេងៗគ្នា ដែលក្នុងនោះ សំណង់អាគារខុនដូ បានដើរតួយ៉ាងសំខាន់ ស្របទៅនឹងតម្រូវការ និងការវិនិយោគដែលកំពុងតែមានការចាប់អារម្មណ៍យ៉ាងខ្លាំងពីសំណាក់ជនជាតិចិន។

នាយកផ្នែកលក់ប្រចាំក្រុមហ៊ុន FURI Real Estate កញ្ញា លីម សុខាដាវីន បានប្រាប់ឱ្យដឹងថា នៅពេលបច្ចុប្បន្នចំពោះវិស័យសំណង់ និងអចលនទ្រព្យនៅក្នុងក្រុងព្រះសីហនុ វិស័យខុនដូ បាន និងកំពុងតែដើរតួយ៉ាងសំខាន់ ដែលស្របទៅនឹងតម្រូវការទីផ្សារ ក៏ដូចជាការចាប់អារម្មណ៍ពីសំណាក់អ្នកវិនិយោគជាតិ និងអន្តរជាតិ ជាពិសេសជនជាតិចិនបានឈានមុខគេ។

កញ្ញាបានបញ្ជាក់ទៀតថា ៖ «ក្រុងព្រះសីហនុបច្ចុប្បន្ននេះ ចំពោះវិស័យសំណង់គឺមានការរីកចម្រើនខ្លាំងគួរឱ្យគត់សម្គាល់ ទាំងផ្នែកសណ្ឋាគារ អាផាតមិន មណ្ឌលកម្សាន្ត និងអាគារខុនដូ។ ដោយឡែកចំពោះវិស័យខុនដូ ហាក់មានភាពលេចធ្លោជាងគេ ប៉ុន្តែភាគច្រើនជាប្រភេទខុនដូរតម្លៃមធ្យម ហើយភាគច្រើនជាការវិនិយោគពីសំណាក់ជនជាតិចិន»។

នាយកផ្នែកលក់រូបនេះបានបញ្ជាក់ទៀតថា ៖ «មានហេតុផលជាច្រើនដែលធ្វើឱ្យពួកគេធ្វើការវិនិយោគលើផ្នែកខុនដូតម្លៃមធ្យមនេះ។ ខុនដូតម្លៃមធ្យម មានតម្រូវការនៅលើទីផ្សារច្រើន ហើយចំពោះអ្នកវិនិយោគក៏មានឱកាសទទួលបានភាគចំណេញពីការវិនិយោគច្រើនដែរ ដែលជាបទពិសោធន៍ក្នុងរយៈពេលជាងមួយខែ អាចលក់បានប្រមាណជិត១០០យូនីត នៅក្នុងគម្រោងមួយ។ ខុនដូប្រភេទនេះ ពួកគេអាចទិញហើយ លក់ចេញវិញ ឬអាចជួលបន្តបានទទួលបានប្រសិទ្ធភាពខ្ពស់»។

អ្នកនាង អាន សុធីតា នាយិកាក្រុមហ៊ុន CBRE Cambodia ធ្លាប់បានលើកឡើងថា ទីផ្សារខុនដូនៅខេត្តព្រះសីហនុកំពុងតែមានតម្រូវការខ្លាំង ដោយសារតែកំណើននៃការវិនិយោគពីអ្នកវិនិយោគចិន ស្របពេលដែលវិស័យមួយនេះកំពុងមានតម្រូវការខ្លាំង។

អ្នកនាងបានបន្តទៀតថា ៖ «ទីផ្សារខុនដូនៅក្រុងព្រះសីហនុ គឺជាទីផ្សារថ្មីមួយដែលកំពុងមានការទាក់ទាញយ៉ាងខ្លាំង ហើយការវិនិយោគមានឱកាសទទួលបានចំណេញច្រើនដែលជាមធ្យមមានចន្លោះចាប់ពី៧ភាគរយ ហេតុនេះហើយទើបមានការវិនិយោគលើវិស័យខុនដូច្រើន។

នាយិកាក្រុមហ៊ុន Century21 Cambodia អ្នកនាង Grace Rachny Fong ក៏បានបញ្ជាក់ប្រាប់ពីហេតុផលដែលបណ្តាលឱ្យអ្នកវិនិយោគជនជាតិចិនចាប់អារម្មណ៍មកវិនិយោគនៅកម្ពុជា ជាពិសេសនៅក្រុងព្រះសីហនុផងដែរថា ៖ «ពួកគេមក ក៏ព្រោះតែគេសម្លឹងឃើញភាពល្អប្រសើរដែលទទួលបានពីការវិនិយោគ។ ទីផ្សារនៅកម្ពុជា បើប្រើបធៀបជាមួយទីផ្សារប្រទេសចិន ដូចជាទីក្រុងម៉ាកាវ ទីក្រុងសៀងហៃ ជាដើម គឺនៅមានតម្លៃទាបស្ទើរ១០ដង ដោយឡែកចំពោះទីផ្សារប្រកួតប្រជែងនៅក្នុងប្រទេសចិនក៏មានច្រើន ដែលធ្វើឱ្យភាគរយនៃការទទួលបានជោគជ័យមានអត្រាទាប។

ម៉្យាងវិញទៀត អាស្រ័យដោយតម្លៃនៅលើទីផ្សាររបស់យើងនៅមានកម្រិតទាប ហើយអត្រានៃការទទួលបានចំណេញច្រើនត្រឡប់ទៅវិញ វាគឺជាហេតុផលសមស្របមួយដែលពួកគេសម្រេចចិត្តមកវិនិយោគ»៕

រដ្ឋមន្ត្រីក្រសួងទេសចរណ៍ព្រមានចាត់វិធានការតាមផ្លូវច្បាប់ចំពោះការលក់វត្ថុអនុស្សាវរីយ៍ក្លែងក្លាយជូនភ្ញៀវទេសចរ

April 3, 2019

0

ដោយ វុត្ថា

ភ្នំពេញ៖ រដ្ឋមន្ត្រីក្រសួងទេសចរណ៍បានព្រមានចាត់វិធានការតាមផ្លូវច្បាប់ចំពោះអាជីវកម្មណាមួយលក់វត្ថុអនុស្សាវរីយ៍ក្លែងក្លាយជូនភ្ញៀវទេសចរធ្វើឱ្យខូចនូវភាពជឿជាក់ពីសំណាក់ភ្ញៀវទេសចរ ប៉ះពាល់ធ្ងន់ធ្ងរដល់កិត្តិយស និងកិត្យានុភាពរបស់ជាតិ។

លោក ថោង ខុន រដ្ឋមន្ត្រីក្រសួងទេសចរណ៍បានថ្លែងនៅក្នុងបើកសន្និបាតផ្ទៃក្នុងក្រសួង ដើម្បីបូកសរុបការងារប្រចាំឆ្នាំ២០១៨ ត្រីមាសទី១ ឆ្នាំ២០១៩ និងលើកទិសដៅបន្តនៅត្រីមាសទី២ និងទី៣ ឆ្នាំ២០១៩ រយៈពេល២ថ្ងៃ ចាប់ពីថ្ងៃទី០២-០៣ ខែមេសា ឆ្នាំ២០១៩នេះ បានបញ្ជា និងជំរុញណែនាំដល់មន្ទីរទេសចរណ៍គ្រប់រាជធានី-ខេត្ត អគ្គាធិការដ្ឋាននៃក្រសួងទេសចរណ៍ (ផ្នែកអធិការកិច្ច) សហការជាមួយក្រសួង-ស្ថាប័ន វិស័យឯកជន និងផ្នែកពាក់ព័ន្ធទាំងអស់ ត្រូវចូលរួមទប់ស្កាត់ ការលក់វត្ថុអនុស្សាវរីយ៍ ឬផលិតផលក្លែងក្លាយ ពិសេសសហការជាមួយក្រសួងពាណិជកម្ម ក្នុងការត្រួតពិនិត្យមូលដ្ឋានអាជីកម្មលក់គ្រឿងអលង្កា ដើម្បីលុបបំបាត់បញ្ហាដ៏អាក្រក់នេះ។

លោករដ្ឋមន្ត្រីថា «ធ្លាប់មានករណីភ្ញៀវទេសចរបានទិញទំនិញពីកម្ពុជា ក្រោយមកក៏ដឹងថា ជាគ្រឿងអលង្ការក្លែងក្លាយ ហើយពួកគេក៏បានប្ដឹងមកក្រសួងការបរទេសយើង តាមរយៈស្ថានទូតគេនៅកម្ពុជា ហើយករណីថ្មីៗនេះ មានការប្តឹងផ្ទាល់ មកអង្គភាពប្រឆាំងអំពើពុករលួយ (ACU) ហើយ ACU បានដាក់លិខិតមកក្រសួងទេសចរណ៍»។

លោករដ្ឋមន្ត្រីក៏បានទទូចដល់ភាគីពាក់ព័ន្ធផងដែរ សូមចូលរួមយកចិត្តទុកដាក់ចំពោះបញ្ហានេះ ពិសេសឯកឧត្តមបានស្នើថា បើរកឃើញមូលដ្ឋានអាជីវកម្មណាលក់ របស់របរក្លែងក្លាយជូនភ្ញៀវទេសចរ សូមមេត្តាចាត់ការតាមនីតិវិធីច្បាប់ភ្លាមៗ។

គ្រប់ភាគីពាក់ព័ន្ធទាំងអស់ត្រូវចូលរួមធ្វើយ៉ាងណាធានាថា គ្រប់គោលដៅទេសចរណ៍របស់កម្ពុជា មានការទទួលបដិសណ្ឋារកិច្ចល្អប្រសើរជូនភ្ញៀវទេសចរ គ្មានការក្លក់ទំនិញក្លែងក្លាយដូចករណីខ្លះៗដែលបានកើតឡើងមកនេះ ដើម្បីស្របតាមការប្រសិទ្ធនាមរបស់រាជរដ្ឋាភិបាលថា «កម្ពុជា៖ ព្រះរាជាណាចក្រអច្ឆរិយៈ ផ្ដល់ភាពកក់ក្ដៅ»៕

មន្ត្រីជាន់ខ្ពស់ក្រសួងរ៉ែ៖ ការធ្វើពាណិជ្ជកម្មប្រេងដំបូងរបស់កម្ពុជានឹងធ្វើនៅឆ្នាំ២០២០

April 2, 2019

0

ដោយ គង់ សូរិយា

ភ្នំពេញ៖ មន្រ្តីជាន់ខ្ពស់ក្រសួងរ៉ែ និងថាមពលបានអះអាងថា ការទាញយកដំណក់ប្រេងដំបូងរបស់កម្ពុជានឹងអាចសម្រេចបាននៅចុងឆ្នាំនេះ តែការធ្វើពាណិជ្ជកម្មប្រេងដែលទាញចេញពីតំបន់ប្លុកអេនេះនឹងរង់ចាំដល់ឆ្នាំ២០២០ខាងមុខ។

អ្នកនាំពាក្យក្រសួងរ៉ែ និងថាមពល លោកជៀប សួរបានឱ្យដឹងកាលពីចុងសប្តាហ៍មុនថា មន្ត្រីជំនាញរបស់ក្រសួងទើបបានប្រជុំជាមួយក្រុមការងាររបស់ ក្រុមហ៊ុន KrisEnergy ដើម្បីពិនិត្យមើលការងាររបស់ក្រុមហ៊ុន ដែលសម្រេចបានថ្មីៗ និងផ្ទៀងផ្ទាត់នឹងផែនការក្នុងការឈាន ដល់ការទាញយកតំណក់ប្រេងលើកដំបូង។ លោកបន្តថា សកម្មភាពការងារ បានឆ្លើយតបនឹងផែនការដែលអាចធ្វើឱ្យ សកម្មភាពទាញយកដំណក់ប្រេងឆៅជាលើកដំបូង នឹងធ្វើឡើងនៅចុងឆ្នាំ២០១៩នេះតាមការគ្រោងទុក។

ទោះជាយ៉ាងណាលោកបញ្ជាក់ថា “ការធ្វើពាណិជ្ជកម្មពីផលិតកម្មប្រេងរបស់ក្រុមហ៊ុននេះនឹងអាចត្រូវ រង់ចាំរហូតឆ្នាំ ២០២០ខាងមុខ”។ លោកបន្តថា “ហេដ្ឋារចនាសម្ព័ន្ធសំខាន់ៗ ដើម្បីឈានដល់ការផលិតប្រេង បានរៀបចំរួចច្រើនហើយអ៊ីចឹងហើយ តាមតារាងពេលវេលា [ក្រុមហ៊ុន KrisEnergy] នឹងអាចផលិតតំណក់ប្រេងដំបូងនៅចុងឆ្នាំ ២០១៩ ហ្នឹង”។

លោក ជៀប សួរ ហេដ្ឋារចនាសម្ព័ន្ធដើម្បីដំណើរការទាញយកប្រេងសម្រាប់ផលិតកម្មមានកត្តា៤សំខាន់ៗ។ កត្តាទាំងនោះរួមមានទី ១ ផ្លេតហ្វមក្បាលអណ្តូង (ជាបណ្តាញដើម្បីភ្ជាប់ពីមាត់អណ្តូងទៅក្នុងអណ្តូង) ទី ២ គឺការធ្វើ Drilling Rig (ម៉ាស៊ីនសម្រាប់ភ្ជាប់ទៅផ្លេតហ្វម ដើម្បីធ្វើការខួងអណ្តូងដើម្បីយកប្រេងមក)។ ទីបី Production Barge (ជាកប៉ាល់មានម៉ាស៊ីនសម្រាប់ធ្វើផលិតកម្មញែកប្រេង ទឹក ឧស្ម័នចេញដើម្បីញែកយកប្រេងឆៅ) និង floating production storage and offloading (កប៉ាល់សម្រាប់ស្តុក និងបញ្ជូនប្រេងចេញលក់)។

ក្រុមហ៊ុន KrisEnergy បានជ្រើសរើសក្រុមហ៊ុនជំនាញរួចហើយ សម្រាប់ធ្វើកិច្ចការសាងសង់ ហេដ្ឋារចនាសម្ព័ន្ធទី១ ទី២ និងទី៣ ខណៈ កំពុងបើកឱ្យមានការដេញថ្លៃសម្រាប់ដំណាក់កាលទីបួនដែលរំពឹងថា នឹងជ្រើសបានក្នុងពេលឆាប់ៗ។

ទោះជាយ៉ាងណារដ្ឋមន្រ្តីក្រសួងរ៉ែ និងថាមពលលោកស៊ុយ សែមធ្លាប់បានមានប្រសាសន៍ថា ដំណក់ប្រេងលើកដំបូងរបស់កម្ពុជា នឹងទទួលបាននៅដំណាច់ឆ្នាំ២០១៩នេះ។

យោងតាមសេចក្តីប្រកាសរបស់ក្រុមហ៊ុន KRISENERGY កន្លងមកបានបង្ហាញថា ការទាញយកប្រេងនៅតំបន់ប្លុកអេរបស់កម្ពុជា អាចទទួលបានបរិមាណប្រេង៣ម៉ឺនបារ៉ែលនៅក្នុងមួយថ្ងៃ៕

ចំណេះដឹង! តើពន្ធប្រថាប់ត្រាលើអចលនទ្រព្យត្រូវកំណត់អត្រាប៉ុន្មានភាគរយ?

April 2, 2019

0

ដោយ វុត្ថា

ភ្នំពេញ៖ ពន្ធប្រថាប់ត្រា គឺជាពន្ធដែលជាទូទៅនៅប្រទេសកម្ពុជា រដ្ឋប្រមូលចំពោះការផ្ទេរកម្មសិទ្ធអចលនទ្រព្យ ឬយានយន្ដគ្រប់ប្រភេទ។ ហើយអ្នកជាប់ពន្ធត្រូវមានកាតព្វកិច្ចដាក់លិខិតប្រកាស និងបង់ពន្ធប្រថាប់ត្រាឱ្យបានចប់សព្វគ្រប់ក្នុងរយៈពេល៣ខែ។

ពន្ធប្រថាប់ត្រានេះត្រូវកំណត់តាមអត្រា៤% ចំពោះការផ្ទេរកម្មសិទ្ធិអចលនទ្រព្យ ឬ ការការផ្ទេរសិទ្ធិកាន់កាប់ដី ដែលគ្មានសំណង់ក្រោមរូបភាពជាការលក់ ការដោះដូរ ការទទួលអំណោយ ការដាក់ភាគទុនក្រុមហ៊ុន។

អត្រាពន្ធ និងការកំណត់ពន្ធប្រថាប់ត្រា មានដូចខាងក្រោម៖

១. 4% នៃតម្លៃអចលនទ្រព្យចំពោះការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យជាសំណង់ ឬ/និងដី ឬការដាក់ភាគហ៊ុនជាអចលនទ្រព្យក្នុងក្រុមហ៊ុន។

២. 4% នៃតម្លៃមធ្យោបាយដឹកជញ្ជូនឬយានយន្ដ ចំពោះការផ្ទេរកម្មសិទ្ធិ ឬសិទ្ធិកាន់កាប់មធ្យោបាយដឹកជញ្ជូនឬយានយន្ដគ្រប់ប្រភេទ។

៣. 0.1% នៃតម្លៃភាគហ៊ុន ចំពោះការផ្ទេរចំណែកណាមួយ ឬទាំងស្រុងនៃភាគហ៊ុន ឬការរំលាយក្រុមហ៊ុនបញ្ចូលគ្នា។

៤. 0.1% នៃតម្លៃចុះកិច្ចសន្យាចំពោះកិច្ចសន្យាផ្គត់ផ្គង់ទំនិញ ឬសេវា ដែលប្រើប្រាស់ថវិការដ្ឋ។

៥. 1 លានរៀល ចំពោះលិខិតមានលក្ខណៈគតិយុត្ត ៣ប្រភេទគឺ លិខិតស្ដីពីការបង្កើតក្រុមហ៊ុន លិខិតស្ដីពីការបិទក្រុមហ៊ុន និងលិខិតស្ដីពីការរំលាយក្រុមហ៊ុនបញ្ចូលគ្នា។

ពន្ធប្រថាប់ត្រាត្រូវបានបង់ដោយអ្នកទទួលកម្មសិទ្ធិ ទទួលសិទ្ធិកាន់កាប់ដីធ្លីដែលគ្មានសំណង់ គិតជាសមាមាត្រ លើតម្លៃពិតប្រាកដនៃទ្រព្យសម្បត្តិ នាថ្លៃផ្ទេរកម្មសិទ្ធិនិងសិទ្ធិកាន់កាប់។ ប៉ុន្តែដើម្បីឱ្យមានភាពងាយស្រួល រដ្ឋមន្ត្រីក្រសួង សេដ្ឋកិច្ច និងហិរញ្ញវត្ថុអាចកំណត់តម្លៃ សម្រាប់រយៈកាលនីមួយៗ ដើម្បីធ្វើជាមូលដ្ឋានសម្រាប់ការគិតគួរប្រាក់ពន្ធដែលត្រូវបង់៕

គណកម្មការមូលបត្រចេញប្រកាសលើកទឹកចិត្តក្រុមហ៊ុនដើម្បីចេញលក់មូលបត្រ

April 2, 2019

0

ដោយ គង់ សូរិយា

ភ្នំពេញ៖ បានចេញសេចក្តីថ្លែងការណ៍រួមស្តីពីការលើកទឹកចិត្ត ដល់ក្រុមហ៊ុនចុះបញ្ជីនៅផ្សារមូលបត្រកម្ពុជា ពីភ្នាក់ងារទូទាត់សាច់ប្រាក់ពាក់ព័ន្ធនឹងមូលបត្រ។

ថ្លែងក្នុងពិធីប្រកាសសេចក្តីថ្លែងការណ៍រួមស្តីពី ការលើកទឹកចិត្តដល់ក្រុមហ៊ុនចុះបញ្ជីនៅផ្សារមូលបត្រកម្ពុជា ពីភ្នាក់ងារទូទាត់សាច់ប្រាក់ពាក់ព័ន្ធនឹងមូលបត្រ កាលពីថ្ងៃទី២៩មីនា លោក ស៊ូ សុជាតិ អគ្គនាយកគណកម្មការមូលបត្រកម្ពុជាបញ្ជាក់ឱ្យដឹងនាព្រឹកថ្ងៃទី២ មេសានេះថា ទីផ្សារមូលបត្របង្កើនជាយន្តការមួយ ដើម្បីកសាងនូវទំនុកចិត្តនិងអនុញ្ញាតឱ្យទីផ្សារធនគារកាន់តែមានភាពរឹងមាំ។ ទីផ្សារធនាគារប្រសិនកម្ចីថយ ការដាក់ប្រាក់បញ្ញើថយវានឹងដោយខ្លួនឯង ដូច្នេះការបង្កើននូវកម្ចីនិងការដាក់ប្រាក់បញ្ញើ គឺជាចំណុចធ្វើធនាគារកាន់តែរឹងមំា។ ដូចនេះវាចំណុចមួយវាមានទំនាក់ទំនងរវាងគ្នាទៅវិញទៅមកជាមួយវិស័យមូលបត្រ។

លោកលើកឡើងថា “អ្វីដែលជាគោលបំណងរបស់រាជរដ្ឋាភិបាល ដែលបានបង្កើតឡើងទីផ្សារមូលធន ដើម្បីផ្តល់ជម្រើសបន្ថែម យើងមិនមែនបង្កើតឱ្យមានការប្រកួតប្រជែងគ្នានោះទេ”។ លោកបន្តថា “យើងបង្កើតនូវជម្រើសបន្ថែម ដើម្បីឱ្យក្រុមហ៊ុននានាអាចរកហិរញ្ញប្បទានពីទីផ្សារមូលបត្រ និងពីយន្តការដែលមានស្រាប់”។

លោកស៊ូ សុជាតិបានបន្តថា នៅពេលមុនគេតែងតែនំាគ្នាគិតថាទីផ្សារមូលធនឬទីផ្សារមូលបត្រ ជាដៃគូប្រកួតប្រជែងជាមួយទីផ្សារធនាគារ ប៉ុន្តែផ្ទុយមកវិញគឺជាទីផ្សារពីរជួយគំាំទ្រគ្នាទៅវិញទៅមក។ ទីផ្សារមូលបត្របង្កើននូវទំនុកចិត្តអនុញ្ញាតឱ្យទីផ្សារធនគារកាន់តែមានភាពរឹងមាំ។ លោកបញ្ជាក់ថា នៅលើសកលលោកនេះ មិនដែលមានទីផ្សារតែម្ខាងនោះទេ គឺមានទីផ្សារពីរ ហើយលោកក៏មិនទាន់ឃើញទីផ្សារមូលបត្ររីកចម្រើនទីផ្សារធនាគារដួលរលំដែរ។

លោកបន្តថា “ខ្ញុំធ្លាប់ឃើញតែទីផ្សារមូលបត្រកាន់តែរឹងមំា ធនាគារគឺកាន់តែខ្លំាង ព្រោះទីផ្សារទំាងពីរវិស័យនេះ ជួយពង្រឹងឱ្យគ្នាទៅវិញទៅមក បង្កើនទំនុកចិត្តឱ្យគ្នា ហើយក្រុមហ៊ុន ដែលអាចបោះផ្សាយភាគហ៊ុនបាន ជាក្រុមហ៊ុនដែលធនាគារទុកចិត្ត”។

ជាមួយគ្នានេះ លោកហុង សុហួរ អគ្គនាយកក្រុមហ៊ុនផ្សារមូលបត្រកម្ពុជាមានប្រសាសន៍ថា នៅពេលខាងមុខនេះ យើងនឹងមានធនាគារច្រើនទៀត ដែលខ្លះជាភ្នាក់ងារទូទាត់សាច់ប្រាក់ពាក់ព័ន្ធនឹងមូលបត្រ និងខ្លះទៀតមិនពាក់ព័ន្ធ។ ដូចនេះក្រុមហ៊ុនចុះបញ្ជីមានជម្រើសកាន់តែច្រើន ក្នុងការសម្រេចចិត្តទទួលសេវាកម្មរបស់ធនាគារ។

លោកបញ្ជាក់ថា “វិស័យធនាគារដែលរីកចម្រើន នឹងនាំឱ្យវិស័យមូលបត្រអាចរីកចម្រើនពីព្រោះគ្រឹះស្ថានធនាគារ មានប្រាក់ចំណេញច្រើន នឹងទទួលការចាប់អារម្មណ៍ពីអ្នកវិនិយោគភាគហ៊ុន“។ លោកបន្ថែមថា “បញ្ច្រាសមកវិញពេលដែលវិស័យមូលបត្ររីកចម្រើននោះធនាគារអាចផ្តល់កម្ចីកាន់តែច្រើនជាងមុន គុណភាពកម្ចីកាន់តែល្អជាងមុន ហើយធនាគារកាន់តែមានជម្រើសបង្កើតចំណូលបានច្រើនជាងមុន”។

យោងតាមសេចក្តីប្រកាសព័ត៌មានក្រុមហ៊ុនផ្សារមូលបត្របង្ហាញថា មកដល់បច្ចុ ប្បន្ននេះ ទីផ្សារមូលបត្រកម្ពុជា មានក្រុមហ៊ុនចុះបញ្ជីមូលបត្រកម្មសិទ្ធិចំនួន៥ ដែលមានមូលបត្រទីផ្សារប្រមាណជាង២,១៣ទ្រីលានរៀល ឬស្មើប្រមាណ៥៣៤,៣៤លានដុល្លារអាមេរិក ប្រៀបធៀបនិងចុងឆ្នំា២០១៨ មូលធនទីផ្សារមានប្រមាណ១,២១ទ្រីលានរៀលស្មើប្រមាណ៣០៤,៧៦លានដុល្លារ៕

ពិព័រណ៍លំនៅដ្ឋានកម្ពុជាឆ្នាំ២០១៩ ផ្តល់អត្ថប្រយោជន៍ចំនួន៤ ដល់អ្នកចូលរួម

April 2, 2019

0

ដោយ វិសាល

ភ្នំពេញ៖ ពិព័រណ៍លំនៅដ្ឋានលើកដំបូងនៅកម្ពុជា នឹងចាប់ផ្តើមនៅរយៈពេល១ខែទៀត ដែលវានឹងក្លាយជាព្រឹត្តិការណ៍មួយ ផ្តល់ឱ្យអ្នកចូលរួមនូវអត្ថប្រយោជន៍សំខាន់ៗចំនួន៤។

យោងតាមសេចក្តីប្រកាសព៌តមានរបស់ក្រុមហ៊ុន Realestate.com.kh បានឱ្យដឹងនៅថ្ងៃទី២ មេសានេះថា ពិព័រណ៍ម្តងនេះជាវេទិការធំជាងមុខ ប្លែកជាងមុន និងមានជម្រើសលំនៅដ្ឋានច្រើនជាងមុន។ ពិព័រណ៍នេះផ្តល់ឱ្យអ្នកចូលរួមនូវអត្ថបហរយោជន៍ចំនួន៤សំខាន់ៗ ទី១ វេទិកានេះល្អបំផុតសម្រាប់អ្នកមានបំណង ចង់ទិញលំនៅដ្ឋានមិនថាផ្ទះ ដី ខុនដូ បុរី និងមានជម្រើសផ្សេងៗដូចជារថយន្តម៉ាកល្បីៗ គ្រឿងសង្ហារិម ដេគ័រ ទី២ ល្អបំផុតសម្រាប់អ្នកដែលមានបំណងចង់ស្វែងយល់អំពីភាពរីកចម្រើនទីផ្សារលំនៅដ្ឋាន កម្ពុជា។

ទី៣ ល្អបំផុតសម្រាប់អ្នក ដែលចង់ស្វែងរកគម្រោងលំនៅដ្ឋានជាច្រើន ក្នុងពេលតែមួយ។ និងទី៤ ល្អបំផុតសម្រាប់អ្នកចង់ចូលរួមស្វែងយល់ ជាមួយវគ្គសិក្ខាសាលាអប់រំអំពីវិស័យអចលនទ្រព្យ ជាមួយប្រធានបទល្អៗ ធ្វើបទបង្ហាញដោយវាគ្មិនល្បីៗ។

ជាវេទិការទិញលក់អចលនទ្រព្យដ៏មានប្រសិទ្ធភាព និងជោគជ័យ បំផុតនៅក្នុងប្រវត្តិនៃទីផ្សារអចលនទ្រព្យកម្ពុជា។ ជាការពិតក្នុងពិព័រណ៍លើទី១ មានការទិញលក់ នៅនៅនឹងកន្លែងគិតជាទឹកប្រាក់ជាង៣លានដុល្លារ លើកទី២បានជាង២០លានដុល្លារ និងលើកទី៣ លក់បានជាង២០លានដុល្លារ។

សេចក្តីប្រកាសព៌តមានដដែលបានឱ្យដឹងថា ក្នុងពិព័រណ៍នីមួយៗមានការចូលរួមយ៉ាងខ្លាំងពីសំណាក់អ្នកអ្នកវិនិយោគ ម្ចាស់គម្រោង អ្នកអភិវឌ្ឍន៍ និងអ្នកចូលរួមរាប់ពាន់នាក់បានចូលរួមនៅក្នុងវេទិកាដ៏អស្ចារ្យនេះ។ ;ដោយសំឡឹងឃើញពីសក្តានុពលនៃទីផ្សារ និងតម្រូវការអចលនទ្រព្យដ៏ច្រើនពីអ្នកទិញក្នុងស្រុក និង អន្តរជាតិ។ Realestate.com.kh នឹងនៅតែបន្តជំរុញការទិញ លក់លំនៅដ្ឋាននៅកម្ពុជា តាមរយៈពិរព័រណ៍ដ៏ធំនេះ។

ពិព័រណ៍លំនៅដ្ឋានកម្ពុជាសម្រាប់ឆ្នាំ ២០១៩ នៅសល់ពេលតែមួយខែទៀតតែប៉ុណ្ណោះ គឺនឹងធ្វើនៅថ្ងៃ ទី២៦ ដល់ថ្ងៃទី ២៧ ខែមេសា ឆ្នាំ ២០១៩ នៅបន្ទាប់ពីបុណ្យចូលឆ្នាំប្រពៃណីខ្មែររួច៕

;

រដ្ឋមន្ត្រីពាណិជ្ជកម្មស្នើធនាគារចិនគាំទ្រការទូទាត់រូបិយប័ណ្ណខ្មែរតាមប្រព័ន្ធអេឡិចត្រូនិក

April 2, 2019

0

ដោយ នៅ វឌ្ឍនា

ភ្នំពេញ៖ រដ្ឋមន្ត្រីក្រសួងពាណិជ្ជកម្មលោក ប៉ាន សូរស័ក្តិ បានស្នើតំណាងធនាគារចិន ប្រចាំនៅកម្ពុជាគាំទ្រការប្រើប្រាស់ និងទូទាត់រូបិយប័ណ្ណខ្មែរ (ប្រាក់រៀល) តាមរយៈប្រព័ន្ធអេឡិចត្រូនិក (E-Payment) ជាពិសេស QR Code ដែលជាមធ្យោបាយទូទាត់សាច់ប្រាក់ដ៏ពេញនិយមនៅក្នុងប្រទេសចិន ដើម្បីជំរុញកិច្ចសម្រួលពាណិជ្ជកម្ម និងពង្រឹងទំនាក់ទំនងសេដ្ឋកិច្ច និងវិនិយោគនៃប្រទេសទាំងពីរ។

លោករដ្ឋមន្ត្រីក្រសួងពាណិជ្ជកម្ម នៅក្នុងជំនួបពិភាក្សាជាមួយប្រតិភូធនាគារចិន រវាង លោក WANG Bing នាយកប្រតិបត្តិរងនៃធានាគារចិន ប្រចាំទីក្រុងហុងកុង នៅថ្ងៃទី ២ ខែមេសា ឆ្នាំ២០១៩ នេះ បានមានប្រសាសន៍ជំរុញតំណាងធនាគារចិន ទទួលយកការទូទាត់ប្រាក់រៀល ឱ្យបានកាន់តែទូលំទូលាយ សម្រាប់សកម្មភាពធុរកិច្ច និងវិនិយោគទ្វេភាគី ជាពិសេសការដោះដូរពាណិជ្ជកម្មតាមប្រព័ន្ធអេឡិចត្រូនិក ឬហៅថា E-Commerce ដោយប្រើប្រាស់បច្ចេកវិទ្យា E-Payment និង QR Code ដូចគ្នាជាមួយកម្មវិធីទូរស័ព្ទដៃ WeChat ឬ Alipay ជាដើម។

លោករដ្ឋមន្ត្រីប៉ាន សូរស័ក្តិ បានសំណូមពរ លោក WANG Bing នាយកប្រតិបត្តិរងនៃធានាគារចិន ប្រចាំទីក្រុងហុងកុង ពិនិត្យលទ្ធភាពចូលរួមវិនិយោគសាងសង់ឡសម្ងួត (សៃឡូ) នៅតាមបណ្តាខេត្តសំខាន់ៗ ក្នុងប្រទេសកម្ពុជា ដើម្បីរក្សា ទុកកសិផលក្នុងរយៈពេលយូរ និងផ្ដល់ឥណទានដល់ប្រជាកសិករ ជាពិសេសសហគ្រាសខ្នាតតូច និងមធ្យម ដើម្បីពង្រឹងការអភិវឌ្ឍខ្សែចង្វាក់តម្លៃផលិតផល ដែលមានសក្តានុពលនានា សំដៅបង្កើតតម្លៃបន្ថែម និងធ្វើពិពិធកម្មការនាំចេញ។

លោក WANG Bing បានថ្លែងអំណរគុណដល់លោករដ្ឋមន្ត្រីកម្ពុជា ដែលបានគាំទ្រប្រតិបត្តិការរបស់ធនាគារចិន នៅក្នុងប្រទេសកម្ពុជា តួយ៉ាងដូចជាការប្រើប្រាស់ប្រាក់យ័ន តាមរយៈប្រព័ន្ធធនាគារ ដើម្បីសម្រួលការធ្វើពាណិជ្ជកម្ម វិនិយោគ និងទេសចរណ៍ ព្រមទាំងការបង្កើតការិយាល័យចិនមួយ (Chinese Desk) នៅក្រសួងពាណិជ្ជកម្ម ដើម្បីសម្រួលដល់ធុរជនចិន ក្នុងការធ្វើប្រតិបត្តិការពាណិជ្ជកម្ម។ល។

លោកក៏បានណែនាំអំពីសមាសភាពថ្នាក់ដឹកនាំថ្មីរបស់ធនាគារចិន និងបានជម្រាបជូនលោករដ្ឋមន្ត្រី អំពីការរៀបចំយុទ្ធសាស្ត្រមួយចំនួន ដើម្បីទាក់ទាញការវិនិយោគបន្ថែមពីប្រទេសចិន មកកាន់ប្រទេសកម្ពុជា ស្របតាមគំនិតផ្តួចផ្តើម «ផ្លូវ និងខ្សែក្រវាត់» របស់លោក ស៊ី ជិនពីងប្រធានាធិបតីចិន៕

ក្រុមហ៊ុនបុរីប៉េង ហួតស្នើសុំអាជ្ញាធរក្រុងភ្នំពេញធ្វើផ្លូវក្រោមដីនៅផ្លូវជាតិលេខ១

April 2, 2019

0

ដោយ រ៉ាណេត

ភ្នំពេញ៖ ក្រុមហ៊ុនបុរីប៉េង ហួតបានស្នើសុំថ្នាក់ដឹកនាំរដ្ឋបាលក្រុងភ្នំពេញ ដើម្បីសាងសងស់ផ្លូវក្រោមដី ស្ថិតនៅតាមបណ្តោយផ្លូវជាតិលេខ១ ដើម្បីកាត់បន្ថយការកកស្ទះចរាចរណ៍នៅតំបន់នេះ។

នៅក្នុងកិច្ចប្រជុំកាលពីព្រឹកថ្ងៃទី២ ខែមីនានេះ លោក ឃួង ស្រេង អភិបាលរដ្ឋបាលរាជធានីភ្នំពេញបានមានប្រសាសន៍ឱ្យដឹងថា គម្រោងនេះមានការស្នើពីលោកឧកញ៉ាថៃ ជាហ៊ួត ដើម្បីស្ថាបនាផ្លូវក្រោមដី ដោយភ្ជាប់ពីទីតាំងផ្សារទំនើប PH ECO MALL ទៅផ្លូវជាតិលេខ១ ផ្នែកក្រោមដីស្ថិតនៅភូមិបឹងឈូក សង្កាត់និរោធ ខណ្ឌច្បារអំពៅ។ ផ្លូវនេះមានប្រវែង១៩៥ម៉ែត្រ និងទទឹង៧ម៉ែត្រ ហើយការសិក្សាត្រូវធ្វើជាកញ្ចប់សម្រាប់តំបន់បឹងឈូកទាំងមួលតែម្តង ទៅលើផលប៉ះពាល់ ជាពិសេសប្រព័ន្ធចរាចរណ៍លើកំណាត់ផ្លូវជាតិលេខ១តែម្ដង។

តាមរយៈកិច្ចប្រជុំនេះ លោកឃួង ស្រេង បានបានណែនាំមានឱ្យការបង្កើតក្រុមការងារបច្ចេកទេស ដែលមានសមាសភាពជាស្ថាប័នពាក់ព័ន្ធ ដើម្បីធ្វើការសិក្សាជាកញ្ចប់ឱ្យបានម៉ត់ចត់ មុននឹងធ្វើការសាងសង់ផ្លូវក្រោមដី កាត់ផ្លូវជាតិលេខ ១ដោយត្រូវគិតពីផលប៉ះពាល់សណ្តាប់ធ្នាប់ និងការកកស្ទះចរាចរជាដើម។

លោកបន្តថា “ក្រុមការងារបច្ចេកទេសត្រូវតែសិក្សាឱ្យបានត្រឹមត្រូវ មុនចាប់ផ្តើម និងការសុំគោលការណ៍ពីរាជរដ្ឋាភិបាល ដោយត្រូវសិក្សាជាកញ្ចប់តែម្តង ហើយក្រុមការងារបច្ចេកទេសនេះ មានតំណាងមកពីក្រសួងរៀបចំដែនដី ក្រសួងសាធារណការ និងដឹកជញ្ជូន, រដ្ឋាករទឹកស្វយ័តក្រុងភ្នំពេញ និងអង្គការ JICA ជាដើម”៕

សម្ដេចតេជោ៖ ខេត្តកំពតនឹងកាន់តែមានភាពរីកចម្រើនថែមទៀតដោយសារកត្តាជាច្រើន

April 2, 2019

0

ដោយ រ៉ាណេត

កំពត៖ សម្ដេចតេជោ ហ៊ុន សែននាយករដ្ឋមន្រ្តីកម្ពុជាបានមានប្រសាសន៍ថា នៅពេលខាងមុខដ៏ខ្លីនេះ ខេត្តកំពតនឹងកាន់តែមានការរីកចម្រើន និងអភិវឌ្ឍកាន់តែខ្លាំង ខណៈដែលពេលបច្ចុប្បន្ននេះ គម្រោងជាច្រើនបាននិងកំពុងអនុវត្តយ៉ាងសកម្ម ជាពិសេសពិសេសកំពង់ផែទឹកជ្រៅ ដែលនឹងជួយជំរុញដល់វិស័យសេដ្ឋយ៉ាងសំខាន់ ក្នុងការដឹកជញ្ជូនផលិតផលរវាងប្រទេសកម្ពុជា និងបណ្តាប្រទេសមួយចំនួនទៀត។

មានប្រសាសន៍នៅក្នុងពិធីបើកសម្ពោធ ដាក់ឱ្យប្រើប្រាស់ជាផ្លូវការនូវប្រព័ន្ធផ្គត់ផ្គង់ទឹកស្អាតខេត្តកំពតក្រោមជំនួយរបស់រដ្ឋាភិបាលជប៉ុន កាលពីព្រឹកថ្ងៃទី២ ខែមេសានេះ សម្តេចតេជោ ហ៊ុន សែនបានលើកឡើងថាកំពត ជាខេត្តមួយដែលមានការអភិវឌ្ឍន៍ក្រោយគេ ប៉ុន្តែនឹងមានភាពរីកចម្រើនខ្លាំងនៅពេលដ៏ខ្លីខាងមុខនេះ។

សម្តេចបន្តថា “ក្រៅពីមានការអភិវឌ្ឍន៍ទៅលើប្រព័ន្ធហេដ្ឋារចនាសម្ព័ន្ធ ដូចជាផ្លូវផ្នល់សំខាន់ៗរបស់ខេត្ត ការបង្កើនសោភ័ណភាព ជាពិសេសមានកំពង់ផែទឹកជ្រៅ ដែលកំពុងដំណើរការសាងសង់នោះ នៅមានបណ្តាក្រុមហ៊ុនជាតិ អន្តរជាតិមួយចំនួនទៀតចូលមកវិនិយោគនៅក្នុងខេត្តមួយនេះ”។

ចំពោះគម្រោងនៃការវិនិយោគនានា របស់ក្រុមហ៊ុនជាច្រើននៅក្នុងខេត្តមួយនេះបច្ចុប្បន្នត្រូវបានមន្ត្រីជាន់ខ្ពស់ ប្រចាំខេត្តបង្ហើបប្រាប់ឱ្យដឹងថា មានក្រុមហ៊ុនជាច្រើន ដែលកំពុងតែព្យាយាម និងសិក្សាលម្អិតពីស្ថានភាពជាក់ស្ដែង នៅក្នុងខេត្តមួយនេះ ជាក់ស្ដែងដូចជា គម្រោងសាងសង់អាគារភ្លោះកម្ពស់៤៥ជាន់ របស់ក្រុមហ៊ុន ថៃប៊ុនរ៉ុង ជាដើម។

អភិបាលនៃគណៈអភិបាលខេត្តកំពត លោក ជាវ តាយ ធ្លាប់បានមានប្រសាសន៍ឱ្យដឹងតាមរយៈទូរស័ព្ទកាលពីពេលកន្លងទៅនេះថា បច្ចុប្បន្ននេះមានក្រុមហ៊ុន ចិន កូរ៉េ តៃវ៉ាន់ ជប៉ុន និង ក្រុមហ៊ុនបរទេសជាច្រើនទៀត បានចូលមកស្វែងរកឳកាសវិនិយោគនៅក្នុងខេត្តកំពត ប៉ុន្តែគម្រោងណាមួយជាក់លាក់មិនទាន់ បានចាប់ផ្តើមនៅឡើយទេ។ លោកបន្តថា ពួកគេកំពុងសិក្សា និងស្វែងយល់ពីសក្តានុពលរបស់ខេត្ត ដែលកំពុងមានសក្តានុពលជាច្រើន ដែលបាននិងកំពុងទាក់ទាញអ្នកវិនិយោគជាតិ អន្តរជាតិ។

លោកបន្តថា “ខ្ញុំគិតថានៅចុងឆ្នាំនេះ ឬដើមឆ្នាំ២០២០ខាងមុខ វិស័យសំណង់ និងអចលនទ្រព្យ នឹងរីកចម្រើនខ្លាំងនៅក្នុងខេត្តនេះ ដោយសារខេត្តកំពតមានសក្តានុពលជាច្រើន” ។លោកបន្តថា “ខេត្តកំពត មានសក្តានុពលជាច្រើន ដោយមានកំពង់ផែទឹកជ្រៅ មានតំបន់សេដ្ឋកិច្ចពិសេស ធនធានធម្មជាតិ និងរមណីយដ្ឋានធម្មជាតិជាច្រើនសម្រាប់បម្រើវិស័យទេសចរណ៍”។

ការពង្រីកផ្លូវជាតិលេខ៣ ដែលមានសួនច្បារកណ្តាល និងអាចឱ្យរថយន្តបើកបរបានពីរគន្លងទៅ ពីរគន្លងមកបាននិងកំពុងជំរុញ និងពង្រីកសក្តានុពលវិនិយោគនៅក្នុង ខេត្តជាប់មាត់សមុទ្រនេះផងដែរ៕