[:km]ដោយ វុត្ថា

ភ្នំពេញ៖ ក្រុមប្រឹក្សា​អភិវឌ្ឍន៍​ជាតិ​បាន​បង្ហាញថា  ចាប់ពី​ឆ្នាំ២០១៣-២០១៧ កម្ពុជា​បានទទួល​គម្រោង​វិនិយោគ​ពី​បណ្ដា​ក្រុមហ៊ុន ក្នុងស្រុក និង​បរទេស​សរុប​ប្រមាណ​ជា ៩៧០គម្រោង ដែលមាន​ទុនវិនិយោគ​សរុប​ចំនួន២៣.៤៨០លាន​ដុល្លារ​អាមេរិក។

ទុនវិនិយោគ​នេះ មាន​ទំហំ​ប្រមាណ៤.០០០លាន​ដុល្លារ​អាមេរិក ក្នុង​មួយឆ្នាំ ហើយ​មាន​សក្ដានុពល​បង្កើត​ការងារ​ថ្មី ជូន​ប្រជាពលរដ្ឋ​ជា​មធ្យម​ប្រមាណ២១៩ពាន់​នាក់​ក្នុង​មួយឆ្នាំ។ របាយការណ៍​ដដែល​បាន​បន្តថា ក្នុង​រយៈពេល៥ឆ្នាំ​ខាងលើនេះ (ឆ្នាំ២០១៣-២០១៧) ទុនវិនិយោគ​ផ្ទា​ល់ពី​បរទេស ជា​មធ្យម​ប្រចាំ​ឆ្នាំមាន​ប្រមាណ​ជា៤០% នៃ​ទុនវិនិយោគ​សរុប​ក្នុង​ឆ្នាំនីមួយ។

របា​ការណ៍​ដដែល​បាន​បន្តថា នៅក្នុង​ឆ្នាំ២០១៨ ទុនវិនិយោគ​ផ្ទា​ល់ពី​បរទេស​បាន​កើនឡើង​ជិត៧០% នៃ​ទុនវិនិយោគ​សរុប​ដែល​បាន​កត់ត្រា​នៅ ក.អ.ក. ដែល​នេះ​បាន​ឆ្លុះបញ្ចាំង​ពី​ភាព​កាន់តែ​ជឿទុកចិត្ត​របស់​អ្នកវិនិយោគ​ទាំង​ក្នុង និង​ក្រៅប្រទេស មកលើ​ការដឹកនាំ​របស់​រាជរ​ដ្ឋា​ភិ​បាល​កម្ពុជា ហើយ​ការវិនិយោគ​នេះ​ក៏​រំពឹងថា នឹង​បន្ត​កើនឡើង​នា​ឆ្នាំ​បន្តបន្ទាប់។

កំណើន​នៃ​ការវិនិយោគ​នេះ នឹង​ផ្ដល់នូវ​កាលានុវត្តភាព​ដល់​សហ​គ្រាស​ក្នុងស្រុក​ក្នុងការ​កសាង​ភាពជា​ដៃគូ ជាមួយ​ក្រុមហ៊ុន​វិនិយោគ​ផ្ទាល់​ពី​បរទេស ដើម្បី​បង្កើន​ផលិតភាព សមត្ថភាព​ប្រកួតប្រជែង និង​ការតភ្ជាប់​ទៅនឹង​ទីផ្សារ​តំបន់ និង​សកល៕[:]

[:km]ដោយគង់ សូរិយា

ភ្នំពេញ : ឧបនាយករដ្ឋមន្រ្តី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុលោកអូន ព័ន្ឋមុនីរ័ត្ន បានស្នើឲ្យមន្រ្តីពន្ធដារទាំងអស់ ត្រូវបំពេញការងារកៀរគរ ប្រមូលឱ្យអ្នកជាប់ពន្ធចូលក្នុងប្រព័ន្ធរួមមួយ និងធ្វើឱ្យអ្នកជាប់ពន្ធងាយស្រួលក្នុងការបង់ពន្ធ និងការធានាឱ្យបាននូវការប្រកួតប្រជែងដោយស្មើភាព សមធម៌ក្នុងការបង់ពន្ធ និងយុត្តិធម៌សង្គម។

លោកបណ្ឌិតសភាចារ្យ អូន ព័ន្ធមុនីរ័ត្ន បានថ្លែងបែបនេះក្នុងកិច្ចប្រជុំបូកសរុបលទ្ធផលប្រមូលចំណូលពន្ធប្រចាំខែធ្នូ ក្នុងឆ្នាំ២០១៨ និងសមិទ្ធផលរយៈពេល៥ឆ្នាំ របស់អគ្គនាយកដ្ឋានពន្ធដារនៅថ្ងៃទី២៩ ខែមករា ឆ្នាំ២០១៩កន្លងមកនេះ។ លោកបន្តថា មន្រ្តីជំនាញរបស់អង្គភាពពន្ធដារទាំងអស់ ត្រូវបំពេញនូវបេសកកម្មប្រមូលចំណូលពន្ធ និងខិតខំពង្រឹងនូវអភិបាលកិច្ចល្អ ដោយផ្ដោតជាសំខាន់លើ៖ រដ្ឋបាលកិច្ចល្អ ប្រសិទ្ធភាពនៃភាពជាអ្នកដឹកនាំ ជាពិសេសត្រូវគោរពតាមអភិក្រមការងារទាំង៥ របស់សម្តេចតេជោ ហ៊ុន សែន នាយករដ្ឋមន្រ្តី រួមមាន ឆ្លុះកញ្ចក់, ងូតទឹក, ដុសក្អែល, ព្យាបាល, និងវះកាត់។

ជាមួយគ្នានេះមន្រ្តីពន្ឋដា ត្រូវគោរពអនុវត្តស្របតាមអភិក្រមការងារទាំង៤ របស់ក្រសួងសេដ្ឋកិច្ច និងហិរញ្ញវត្ថុ គឺការអនុវត្តការងារប្រកបដោយវិជ្ជាជីវៈ និងគោរពក្រមសីលធម៌វិជ្ជាជី ការអនុវត្តការងារជាក្រុម ការអនុវត្តការងារដោយប្រកាន់ខ្ជាប់ស្មារតីបុរេសកម្ម និងការមិនត្រូវមើលរំលងកំហុសខ្លួនឯង។

លោកបានផ្តាំផ្ញើបន្ថែមដល់ ថ្នាក់ដឹកនាំ និងមន្ត្រីពន្ធដារគ្រប់លំដាប់ ត្រូវប្រកាន់ខ្ជាប់នូវបាវចនាជាគោលការណ៍៤ផ្សេងទៀត គឺការកៀរគរប្រមូលឱ្យអ្នកជាប់ពន្ធចូលក្នុងប្រព័ន្ធរួមមួយ ការធ្វើឱ្យអ្នកជាប់ពន្ធងាយស្រួលក្នុងការបង់ពន្ធ ការរៀបចំប្រព័ន្ធការងារ ឱ្យលំបាកសម្រាប់ការគេចវេះពន្ធ និងការធានាឱ្យបាននូវការប្រកួតប្រជែងដោយស្មើភាព និងត្រូវបន្តនូវយុទ្ធសាស្ត្រកៀរគរចំណូល ឆ្នាំ២០១៩-២០២៣ ដែលមានគោលបំណងជាយុទ្ធសាស្រ្ត៣ គឺការបង្កើនអនុលោមភាពតាមច្បាប់ដោយស្ម័គ្រចិត្ត និងកាត់បន្ថយជាអតិបរមានូវបន្ទុកអ្នកជាប់ពន្ធ ដោយផ្តល់សេវាប្រកបដោយគុណភាព ការធានាថា អ្នកជាប់ពន្ធបានបំពេញកាតព្វកិច្ចសារពើពន្ធត្រឹមត្រូវ តាមរយៈការពង្រឹងការអនុវត្តច្បាប់ និងបទប្បញ្ញត្តិស្តីពីពន្ធដារ ប្រកប ដោយភាពម៉ឺងម៉ាត់ ស្មើភាព និងការអនុវត្តការងារឱ្យមានប្រសិទ្ធភាពខ្ពស់៕[:]

[:km]ដោយស៊ីវ ម៉េង

ភ្នំពេញ: មន្រ្តីជាន់ខ្ពស់សភាពពាណិជ្ជកម្មកម្ពុជា បានសម្តែងនូវការអបអរសាទរ ចំពោះគោលនយោបាយកាត់បន្ថយស្ថាប័ន្ធពាក់ព័ន្ធ និងការអនុវត្តន៍នីតិវិធីផ្សេងៗ របស់រាជរដ្ឋាភិបាល ដែលជាផ្នែកមួយជួយពន្លឿនដល់វិស័យឯកជន និងការផ្តល់លក្ខណៈកាន់តែងាយស្រួល ជាពិសេសជាចំណុចទាក់ទាញដល់អ្នកវិនិយោគទុនបន្ថែម។

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានមានប្រសាសន៍ឲ្យដឹងក្នុងកិច្ចប្រជុំក្រុមការងារ ផ្នែកនីតិកម្ម ពន្ធដារ និងអភិបាលកិច្ច នៃវេទិការរាជរដ្ឋាភិបាល និងផ្នែកឯកជននៅព្រឹកថ្ងៃទី៣០ ខែមករា ឆ្នាំ២០១៩ នេះថា ជាការពិតណាស់ ការកាត់បន្ថយស្ថាប័នពាក់ព័ន្ធ និងការអនុវត្តន៍នីតិវិធីផ្សេងៗមួយចំនួនទៀត ពិតជាធ្វើឲ្យចំណូលរដ្ឋមានការបាត់បង់ ប៉ុន្តែវាបានចូលរួមមួយចំណែកយ៉ាងធំនៅក្នុងវិស័យឯកជន និងជាផ្នែកមួយជួយពន្លឿនដល់វិស័យឯកជន ការផ្តល់លក្ខណៈកាន់តែងាយស្រួល ជាពិសេសជាការទាក់ទាញដល់អ្នកវិនិយោគទុនក្រៅ និងក្នុងប្រទេសបន្ថែម។

លោកបន្តថា “កិច្ចប្រជុំថ្ងៃនេះទទួលបាននូវលទ្ធផលយ៉ាងល្អប្រសើរ ក្នុងនោះអ្វីដែលជាការរីករាយ គឺរាជរដ្ឋាភិបាលបានដាក់ចេញនូគោលនយោបាយជាច្រើនចំណុច ដែលចាត់ទុកជាផ្នែកមួយជួយដល់វិស័យឯកជន ក្នុងការរកស៊ីទទួលទាន មិនថាអ្នកវិនិយោគបរទេស ឬក្នុងស្រុកឡើយ ចំពោះបញ្ហានេះលោកចាត់ទុកថា ជាដំណឹងដែលល្អបំផុតសម្រាប់វិស័យឯកជន”។

ឧបនាយករដ្ឋមន្រ្តី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោកបណ្ឌិតអូន ព័ន្ឋមុនីរ័ត្នបានមានប្រសាសន៍ថា កាលពីពេលថ្មីៗនេះសម្តេចតេជោ នាយករដ្ឋមន្រ្តី បានដាក់ចេញផែនការនាពេលកន្លងមក និងក្នុងពេលបច្ចុប្បន្ន ដោយបានកែទម្រង់ចំនួនពីរផ្នែកធំៗ មានការកែទម្រង់ខាងក្នុង និងការកសាងមិត្តខាងក្រៅ ដើម្បីពង្រឹងភាពប្រកួតប្រជែងរបស់កម្ពុជា ដែលជាវិធានការសំដៅលើកស្ទួយ ការជួយសម្រួលដល់វិស័យដែលកំពុងអនុវត្តន៍ជាក់ស្តែងមួយចំនួនផងដែរ។

លោកបន្តថា វិធានការចង្អុលបង្ហាញរបស់សម្តេចតេជោ រួមមាន ការកាត់បន្ថយថ្លៃអគ្គិសនី ការលុបចោលការចេញC.O សម្រាប់ប្រទេស ការបញ្ចប់តួនាទីអគ្គនាយកដ្ឋានកាំកុងត្រូល ការលុបចោលអង្គភាពកាំសាប ការដោះស្រាយកង្វល់វិស័យឯកជន និងការណែនាំរបស់ក្រសួងសេដ្ឋកិច្ច និងហិរញ្ញវត្ថុ ទៅអគ្គនាយកដ្ឋានពន្ធដារនូវប្រព័ន្ធអនឡាញសម្រាប់គ្រប់គ្រង់អាករលើតម្លៃបន្ថែម។ ចំពោះនីតិវិធីខាងលើទាំងអស់នេះ រាជរដ្ឋាភិបាលបានកំពុងអនុវត្តន៍ និងរៀបចំដោយបន្ថែមលើកិច្ចការកែទម្រង់ ដែលបានដាក់ចេញរួច នឹងមានការកែទម្រងបន្តបន្ទាប់ទៀតផងដែរ៕[:]

[:km]​ដោយស៊ីវ ម៉េង
ភ្នំពេញ៖ បញ្ហាកង្វះបន្ទប់សណ្ឋាគារនឹងលែងចោទជាបញ្ហាបណ្តើរៗហើយ នៅក្រុងព្រះសីហនុខណៈសណ្ឋាគារប្រណីតកំពស់៣៦ជាន់ មានបន្ទប់ចំនួន៦០៦បន្ទប់ បានបើកដំណើរការអាជីវកម្មរបស់ខ្លួនហើយ នៅក្នុងភូមិ១សង្កាត់លេខ៣ ក្រុង/ខេត្ដព្រះសីហនុ។

ប្រធានសភាពាណិជ្ជកម្ម ខេត្ដព្រះសីហនុលោកឧកញ៉ាឡាវ កាងបានមានប្រសាសន៍ឲ្យដឹងក្នុងពិធីក្រុងពាលីសម្ពោធបើកដំណើរការអាជីវកម្មNanhai Pearl Hotel Apartment នាព្រឹកថ្ងៃទី៣០ មករានេះថា កត្ដាសន្ដិភាព ស្ថេរ​ភាពនយោបាយ និងច្បាប់វិនិយោគបើកទូលាយរបស់កម្ពុជា បានធ្វើឲ្យអ្នកវិនិយោគមានជំនឿមកលើរាជរដ្ឋាភិបាលកម្ពុជាក្នុងការដាក់ទុនវិនិយោគ ជាពិសេសខេត្ដព្រះសីហនុ។ អាគារខ្ពស់ៗជាង៣០ជាន់ នឹងលេចធ្លោដំណើរការអាជីវកម្មរបស់ខ្លួនជាបន្ដបន្ទាប់ចាប់ពីពេលនេះតទៅ តាមរយៈគំរោងនេះអ្នកវិនិយោគបានផ្តល់ការងារឲ្យប្រជាពលរដ្ឋក្នុងខេត្ដ និងខេត្ដជិតខាងប្រមា​ណ៣.០០០នាក់ និងផ្តល់នូវពន្ធអាករផ្សេងៗដល់សេដ្ឋច្ចជាតិ។

លោកបន្តថា “អ្នកវិនិយោគជាតិ និងអន្ដរជាតិ និងគម្រោងសំណង់អាគារស្នាក់នៅ អាគារពាណិជ្ជកម្មតូច ធំ បានលេចធ្លោជាបន្ដបន្ទាប់ ធ្វើឲ្យខេត្ដព្រះសីហនុរីកមុខមាត់ និងសេដ្ឋកិច្ចខេត្ដល្អប្រសើរ ហើយរយៈពេលប្រ​មាណពីរទៅបីឆ្នាំទៀត កន្លែងស្នាក់នៅខេត្ដព្រះសីហនុ នឹងលែងចោទជាបញ្ហាទៀតហើយ”។

លោកឫទ្ធី រស្មី អគ្គនាយកក្រុមហ៊ុន K99 Group បានមានប្រសាសន៍ឲ្យដឹងថា ការវិនិយោគនៅកម្ពុជា ដោយសារលោកមានការជឿជាក់លើគោលនយោបាយរបស់រាជរដ្ឋាភិបាលកម្ពុជា ក្រោមការដឹកនាំដ៏ឆ្លៀសវៃរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានច្បាប់ជាគោល ជាពិសេសសន្ដិភាព ដែលធ្វើឲ្យមានការអភិវឌ្ឍជាបន្ដបន្ទាប់។ ក្រោមដំបូលសន្ដិភាព និងច្បាប់របស់ប្រទេសកម្ពុជា លោកនឹងបន្ដពង្រីកការវិនិយោគពាណិជ្ជកម្ម របស់លោកឲ្យកាន់តែធំទូលាយ និងបន្ដព្យាយាមទាក់ទងអ្នកវិនិយោគ ពីក្រៅប្រទេសឲ្យចូលមកដាក់ទុនរកស៊ីនៅខេត្ដព្រះសីហនុឲ្យបានច្រើនថែមទៀត។

រយៈកាល២ឆ្នាំចុងក្រោយនេះ ខេត្តព្រះសីហនុ បានក្លាយទៅជាគោលដៅយ៉ាងសំខាន់របស់អ្នកវិនិយោគមកពីតំបន់ផ្សេងៗ ហើយសព្វថ្ងៃនេះបាននឹងកំពុ​ងធ្វើឲ្យខេត្តព្រះសីហនុ មានការអភិវឌ្ឍយ៉ាងលឿនទៅមុខ។ ខេត្ដព្រះសីហនុ ពិតជាកន្លែងស័ក្តិសមក្នុងការដាក់ទុនវិនិយោគ។

ម្យ៉ាងវិញទៀអ្វីដែលសំខាន់បំផុតនោះ គឺប្រទេសកម្ពុជាមានសុខសន្ដិភាពពេញលេ​ញ ក្នុងនោះខេត្ដព្រះសីហនុ ក៍ធានាបាននូវសន្ដិសុខ សុវត្ថិភាពខ្ពស់ដែរ ជាមួយនិងធនធានធម្មជាតិសម្បូរបែប ផ្ទៃដីនៅទំនេរធំទូលាយ​រួមទាំងកោះល្អៗ៣២ ជាពិសេសនោះ គឹប្រព័ន្ធគមនាគមន៍សម្បូរបែប ផ្លូវដែក ទឹក គោគ ផ្លូវអាកាសជាដើម ។ល។៕[:]

[:km]​ដោយគង់ សូរិយា
​ភ្នំពេញ៖​ ក្រុមហ៊ុនក្នុងស្រុកមួយគ្រោងវិនិយោគ ទឹកប្រាក់២០០០លានដុល្លារដើម្បី​សាងសង់មជ្ឈមណ្ឌលពាណិជ្ជកម្ម និងឆ្នេរកំសាន្តលើផ្ទៃដីប្រមាណ២០០ហិកតាក្នុងខេត្តកំពត។

អ្នកគ្រប់គ្រងគម្រោងរៀបចំអភិវឌ្ឍន៍តំបន់ឆ្នេរកំសាន្តនេះ លោក គង់ សំណាងបា​ន​ឲ្យដឹងកាលពីព្រឹកថ្ងៃទី៣០ មករានេះថា តំបន់ឆ្នេរកម្សាន្តនេះ នឹងរៀបចំនៅឡើងលើផ្ទៃដីប្រមាណ២០០ហិកតា ក្នុងភូមិកែបថ្មី ឃុំបឹងទូក ស្រុកទឹកឈូ ខេត្តកំពត។ លោកបន្តថា ជាគោលការណ៍ឆ្នេរមួយនេះ នឹងត្រូវធ្វើឲ្យចប់មុនថ្ងៃបុណ្យសមុទ្រមកដល់ បើទោះមិនទាន់រួចរាល់មួយរយភាគរយ ក៏ត្រូវតែធ្វើឲ្យមានឆ្នេរសម្រាប់ទេសចរកម្សាន្ត។

លោកបន្តថា “តាមគម្រោងតំបន់ឆ្នេរនេះ នឹងមានការសាងសង់អគារខ្ពស់ៗ ស ណ្ឋា​គារផ្តាយប្រាំ កំពង់ផែ ផ្សារលក់ផលិតផលសមុទ្ររបស់អ្នកភូមិ ។ល។”។

ទោះជាយ៉ាងណាលោកគង់ សំណាងមិនបញ្ជាក់ឲ្យដឹងពីក្រុមហ៊ុនវិនិយោគគំរោងនេះ និងគំរោងទាំងមូលបញ្ចប់នៅពេលណានោះទេ។

ខេត្តកំពត នឹងធ្វើជាម្ចាស់ផ្ទះវិលជុំនៃបុណ្យសមុទ្រ នៅឆ្នាំនេះ ដែលក្នុងកំឡុងពិធីបុណ្យនេះ ស្រប ពេលដែលមានឆ្នេរកម្សាន្តថ្មីមួយទៀតផងនោះ រដ្ឋបាលខេត្ត រំពឹងថានឹងអាចទាក់ទាញទេសចរបានកាន់ តែច្រើនជាងបណ្ដាឆ្នាំមុនៗជាក់ជាមិនខាន។
​

កំពតជាខេត្តទេសចរណ៍ជាប់មាត់សមុទ្រ ក្នុងភាគនិរិតីនៃប្រទេសកម្ពុជាដ៏មានប្រ​ជាប្រិយភាព ដោយសារតែអំណោយផលពីធម្មជាតិ។ ខេត្តនេះ មានតំបន់ទេសចរណ៍ ចំនួន១៧កន្លែងសំខាន់ៗ ដែលស្រូបយកភ្ញៀវទេសចរណ៍ជាតិ អន្តរជាតិជិតពីរលាននាក់ ក្នុងមួយឆ្នាំ២០១៨។ ប៉ុន្តែខេត្តជាប់សមុទ្រមួយនេះ នៅមិនទាន់មានឆ្នេខ្សាច់សម្រាប់ងូតទឹកកម្សាន្តនៅឡើយទេ ទើបតែដើមឆ្នាំ២០១៩នេះរដ្ឋបាលខេត្ត ដោយមានការគាំទ្រពីក្រសួងទេសចរណ៍ បានចាប់ផ្តើមរៀបចំអភិវឌ្ឍតំបន់ឆ្នេរខ្សាច់ កម្សាន្តដ៏ស្រស់ស្អាតមួយ ដែលមានទាំងផ្សារទំនើប និងសណ្ឋាគារផ្កាយប្រាំផង។

​អភិបាលខេត្តកំពតលោកជាវ តាយបានមានប្រសាសន៍ឲ្យដឹងតាមទូរស័ព្ទនាព្រឹកនាព្រឹកថ្ងៃដដែលនេះថា គំរោងនេះបានទទួលការអនុម័ត ពីក្រុមប្រឹក្សាអភិវឌ្ឍន៍កម្ពុជារួច​ហើយ ប៉ុន្តែគំរោងនេះបានផ្អាកម្តងរួចមកហើយ តែពេលនេះបានចាប់ផ្តើមឡើងវិញដោយ​សារការជំរុញពីអាជ្ញាធរខេត្ត។

លោកបន្តថា បើទុកគំរោងនេះចោល វានឹងធ្វើឲ្យខូច​ផែនការអភិវឌ្ឍន៍របស់ខេត្ត ហេតុនេះទើបលោកជំរុញឲ្យអ្នកអភិវឌ្ឍន៍គំរោងនេះចាប់ផ្តើម​ដំណើរការឡើងវិញ។

​លោកបន្តថា “ដីក្នុងគំរោងនេះ៤០ភាគរយបានមកខេត្ត និង៦០ភាគរយជាដីរបស់​ក្រុមហ៊ុន ដែលអភិវឌ្ឍន៍លើឆ្នេរទំហំ២០០ហិកតា”។

លោកអភិបាលខេត្តមិនបញ្ជាក់ឲ្យដឹងពីក្រុមហ៊ុនអភិវឌ្ឍន៍គំរោងនេះទេ គ្រាន់តែបញ្ជាក់ថាគំរោងនេះជាកម្មសិទ្ឋរបស់លោក ជា សុខហេង៕[:]

[:km]​ដោយគង់ សូរិយា
បាត់ដំបងៈ អាជ្ញាធរខេត្តបាត់ដំបង និងមន្ទីរពាក់ព័ន្ធបាននិងកំពុងធ្វើពិពិធកម្ម(ធ្វើឲ្យកាន់តែសម្បូរបែប) ដោយគ្រោងបង្កើតឲ្យមានសហគមន៍ទេសចរណ៍បន្ថែមទៀត នៅ តាមបណ្ដាស្រុកមានសក្ដានុពលលើវិស័យទេសចរណ៍ ដើម្បីក្នុងការទាក់ទាញភ្ញៀវទេស​ចរឱ្យកាន់តែច្រើន ដើម្បីជួយបង្កើនប្រាក់ចំណូលដល់ពលរដ្ឋតាមមូលដ្ឋាន។

​អនុរដ្ឋលេខាធិការក្រសួងទេសចរណ៍ លោកតុប សុភ័ក្របានមានប្រសាសន៍ឲ្យដឹង ក្នុងសិក្ខាសាលាផ្សព្វផ្សាយស្ដង់ដាសហគមន៍ទេសចរណ៍កម្ពុជា និងសហគមន៍ទេសចណ៍អាស៊ាន កាលពីថ្ងៃទី២៩ មករាកន្លងមកថា ការបង្កើតឲ្យមានសហគមន៍ទេស​ចរណ៍ថ្មី មន្ទីរជំនាញ នឹងបណ្ដុះបណ្ដាលពលរដ្ឋនៅតាមសហគមន៍ទាំងនោះ ឲ្យចេះពីរបៀបទាក់ទាញភ្ញៀវ រៀបចំទីតាំងឲ្យមានសោភ័ណភាព តាមលក្ខណៈស្ដង់ដាយូរអង្វែង ជាប្រយោជន៍ដល់ពួកគេ។

លោកបន្តថា “ការរៀបចំបែបនេះជាការផ្តល់ប្រាក់ចំណូលប្រចាំថ្ងៃ ហើយយើងអញ្ជើញអ្នកមានបទពិសោ​ធន៍ទទួលជោគជ័យ តាមសហគមន៍ទេសចរណ៍ក្នុងខេត្តផ្សេងៗ ធ្វើបទបង្ហាញពីរបៀបរៀបចំឲ្យមានការចាប់អារម្មណ៍ពីភ្ញៀវ”។

ប្រធានមន្ទីរទេសចរណ៍ខេត្តបាត់ដំបង លោកអ៊ុច អ៊ុភីនីស្សារ៉ា បានមានប្រសាសន៍ឲ្យដឹងថា បច្ចុប្បន្នបាត់ដំបង មានសហគមន៍ទេសចរណ៍បីកន្លែង ទី១- សហគមន៍ទេសច​រណ៍ព្រែកទល់ ស្ថិតក្នុងស្រុកឯកភ្នំ ជាទីអភិរក្សសត្វស្លាបដ៏ធំប្រចាំប្រទេស រួមទាំងភូមិបណ្ដែតទឹករបស់ពលរដ្ឋ នៅជាប់នឹងបឹងទន្លេសាប ទី២សហគមន៍ទេសចរណ៍វត្តគរ ស្ថិតក្នុងក្រុងបាត់ដំបង មានផ្ទះបុរាណជាច្រើនខ្នង និងទី៣សហគមន៍ ទេសចរណ៍អូរជាំ ទើបនឹងបង្កើតថ្មី ស្ថិតក្នុងស្រុកសំឡូត មានទឹកដ៏ស្រស់ស្អាត។

លោក សឿម ប៊ុនរិទ្ធ អភិបាលរងខេត្តបាត់ដំបង បានអំពាវនាវឱ្យអាជ្ញាធរ នៅតាមតំបន់ទេស ចរណ៍នានា ខិតខំជួយសម្រួល និងរក្សាសុវត្ថិភាពជូនភ្ញៀវទេសចរ ឲ្យបានល្អប្រសើរ ដើម្បីឲ្យភ្ញៀវមានភាពកក់ក្ដៅ និងជាការទាក់ទាញចិត្តភ្ញៀវ។ ចំពោះអ្នកលក់ចំណីអាហារនៅតាមទីកន្លែងទេសចរណ៍ និងម្ចាស់សណ្ឋាគារ ផ្ទះសំណាក់ សូមកុំដំឡើងថ្លៃនៅពេលមានបុណ្យទានធំៗម្ដងៗផងដែរ។

យោងតាមរបាយការណ៍របស់មន្ទីរទេសចរណ៍ខេត្តបានឲ្យដឹងថា កាលពីឆ្នាំ២០១៨​កន្លងមកនេះ ខេត្តបាត់ដំបងទទួលបានភ្ញៀវទេសចរជាតិ អន្តរជាតិចំនួនជាង៦៦,៨០0០នាក់ កើនឡើងចំនួនជាង៨ភាគរយ ធៀបនឹងឆ្នាំ២០១៧ ក្នុងនោះភ្ញៀវទេស​ចរអន្តរជាតិចំនួនជាង១០ម៉ឺននាក់៕[:]

[:km]ដោយវុត្ថា
ភ្នំពេញ៖ ប្លង់រឹង គឺរឹងទាំងក្រដាស រឹងទាំងប្រសិទ្ធភាពតាមផ្លូវច្បាប់។ ឯកសារប្លង់រឹងអាចជាប័ណ្ណសម្គាល់សិទ្ធិកាន់កាប់អចលនវត្ថុ ប័ណ្ណសម្គាល់សិទ្ធិកាន់កាប់ប្រើប្រាស់ដីធ្លី ឬវិញ្ញាបនបត្រសម្គាល់ម្ចាស់អចលនវត្ថុ ដែលបានបញ្ជាក់អំពីការចុះបញ្ជីអចលនវត្ថុនៅរដ្ឋបាលសុរិយោដី។

ប្លង់ទន់លើអចលនវត្ថុ គឺជាឯកសារប្រភេទក្រដាសទន់ ឬគុណភាពទាប ដែលអាចមានជាច្រើនទម្រង់ ហើយអាចធ្វើជាសក្ខីភាពនៃការកាន់កាប់ ក្នុងនោះអាចមានជាការបញ្ជាក់ដោយអាជ្ញាធរមូលដ្ឋាន (ភូមិ ឃុំ ឬអាចដល់ថ្នាក់ស្រុក) ឬអាចជាលិខិតទិញលក់ ឬកិច្ចសន្យាផ្ទេរសិទ្ធិយ៉ាងសាមញ្ញដែលពុំមានអាជ្ញាធរដឹងឮឡើយ។

បើទោះបីជាច្បាប់ភូមិបាលត្រូវបានអនុម័តចាប់តាំងពីឆ្នាំ២០០១ ព្រមទាំងមានលិ​ខិ​តបទដ្ឋានក្រោមច្បាប់ ដែលរាជរដ្ឋាភិបាលបានចេញជាបន្តបន្ទាប់ក៏ពិតមែន ប៉ុន្តែក្បាលដី​ភាគច្រើននៅក្នុងព្រះរាជាណាចក្រកម្ពុជា នៅតែមិនទាន់បានចុះបញ្ជីត្រឹមត្រូវនៅឡើយ។ ហេតុនេះទើបមានក្បាលដីមួយចំនួនមានត្រឹមប្លង់ទន់ ដែលទន់ទាំងក្រដាស ហើយទន់ទាំងប្រសិទ្ធភាពក្នុងផ្លូវច្បាប់។ អ្នកដែលមានប្លង់ទន់ ត្រូវបានទទួលស្គាល់ថាជាអ្នករស់នៅ (ឬកាន់កាប់) លើទីតាំងអចលនវត្ថុតែប៉ុណ្ណោះ ដែលទាមទារឲ្យមានការវិនិច្ឆ័យ និងការបញ្ជាក់តាមផ្លូវច្បាប់ថា គាត់ពិតជាភាគីដែលបំពេញលក្ខខណ្ឌគតិយុត្តិ សម្រាប់ការទទួលបានសិទ្ធិភោគៈ និងកម្មសិទ្ធិជាស្ថាពរ។

ប្រសិនបើអចលនវត្ថុមានតែប្លង់ទន់ ហានិភ័យមួយដែលអាចកើតមានឡើង គឺការទាមទារពីសំណាក់ភាគីផ្សេងៗគ្នា ដោយរាប់បញ្ចូលទាំងរដ្ឋផងដែរ។ បញ្ហាដែលតែងតែកើតមានឡើងញឹកញាប់មួយទៀត គឺព្រំប្រទល់មិនច្បាស់លាស់ និងអាចមានចំណែកដីដែលអ្នកជាប់ព្រំទាមទារ។

ក្នុងករណីខ្លះទីតាំងដីដែលបុគ្គលឯកជនកាន់កាប់ ដោយមានប្លង់ទន់ តាមពិតជាដីសាធារណៈរបស់រដ្ឋ ដែលមិនអាចឲ្យបុគ្គលណាម្នាក់ចាប់យក ឬចុះបញ្ជីកម្មសិទ្ធិបាននោះឡើយ៕[:]

ដោយវុត្ថា
ភ្នំពេញ៖​ ទេសរដ្ឋមន្ត្រីស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន បានឪ្យដឹងថា ក្រសួងបាននឹងកំពុងរៀបចំផែនការមេជាតិភស្តុភាកម្ម ដែលដើរតួយ៉ាងសំខាន់ក្នុងការរក្សា កំណើនសេដ្ឋកិច្ចជាតិប្រកបដោយនិរន្តរភាព។

ថ្លែងនៅក្នុងកិច្ចប្រជុំពិនិត្យ និងកែលំអផែនការមេថ្នាក់ជាតិស្ដីពី ការដឹកជញ្ជូន និងភស្តុភារកម្ម កាលពីថ្ងៃទី២៩ ខែមករា ឆ្នាំ២០១៩ ម្សិលមិញនេះ លោកទេសរដ្ឋមន្ត្រី ស៊ុន ចាន់ថុល បានជំរុញឱ្យមន្ត្រីជំនាញសិក្សាផែនការមេថ្នាក់ជាតិនេះ ឱ្យបានគ្រប់ជ្រុងជ្រោយ ជាពិសេស បណ្ដាញផ្លូវថ្នល់ ផ្លូវដែក ផ្លូវទឹក និងផ្លូវអាកាស ដើម្បីឱ្យការងារដឹកជញ្ជូនមានលក្ខណៈ ងាយស្រួល រហ័ស និងចំណាយតិច។

លោកបន្តថា “ផែនការជាតិភស្តុភារកម្មនេះ នឹងដើរតួយ៉ាងសំខាន់ក្នុងការរក្សាកំ​នើនសេដ្ឋកិច្ចជាតិប្រកបដោយនិរន្តរភាព និងជំរុញកម្ពុជាឱ្យសម្រេចបាននូវមហិច្ឆតារបស់ខ្លួន ក្នុងការប្រែក្លាយពីប្រទេសដែលមានចំណូលមធ្យមកម្រិតទាបទៅជាប្រទេស ដែលមានចំណូលមធ្យមកម្រិតខ្ពស់នៅឆ្នាំ២០៣០”។

កិច្ចប្រជុំស្ដីពីការដឹកជញ្ជូន និងភស្តុភារកម្មនេះ ធ្វើឡើងដើម្បីពិនិត្យ កែលំអ ក៏ដូចជាប្រមូលធាតុចូលថែមទៀតពីសំណាក់ថ្នាក់ដឹកនាំ និងមន្ត្រីជំនាញ សំដៅឱ្យផែនការមេនេះមានលក្ខណៈគ្រប់ជ្រុងជ្រោយ និងបម្រើឱ្យសេដ្ឋកិច្ចជាតិ ស្របតាមផែនការគោលនយោបាយរបស់រាជរដ្ឋាភិបាល៕[:]