លោកឃាង ពុទ្ឋីជំរុញឲ្យអ្នកពុះដីឡូត៍គិតពីទំហំដីធំជាងមុន និងផាសុខភាព

October 5, 2018

ដោយគង់ សូរិយា

ភ្នំពេញ: ស្របពេលសកម្មភាពពុះដីឡូត៍លក់កាន់តែមានភាពពុះកញ្រ្ជោល និងមានភាពអសកម្មមួយចំនួន អ្នកជំនាញអចលនទ្រព្យកម្ពុជា បានមើលឃើញភាពវិជ្ជមានចេញពីផ្នែកនេះ តែទាមទារឲ្យអ្នកពុះដីឡូត៍លក់ ចាប់ផ្តើមពង្រីកបទដ្ឋានដីឡូត៍របស់ខ្លួនឲ្យបានធំជាងមុន និងគិតគូរពីផាសុខភាព និងបញ្ហាហេដ្ឋារចនាសម្ព័ន្ឋជាគោល។

ប្រធានសមាគមអ្នកជំនាញអចលនទ្រព្យកម្ពុជា លោកឃាង ពុទ្ឋីបានមានប្រសាសន៍ឲ្យដឹងកាលពីថ្ងៃម្សិលម៉ិញនេះថា ទន្ទឹមនឹងការពុះដីឡូត៍កើនឡើងច្រើន សកម្មភាពនេះក៏ផ្តល់ភាពវិជ្ជមានដល់សេដ្ឋកិច្ចជាតិ ព្រោះដីឡូត៍អាចអនុញ្ញាត្តឲ្យកម្មករ និយោជិត មន្រ្តីរាជការ ដែលមានចំណូលទាបអាចសន្សំលុយទិញបាន និងសន្សំលុយសាងសង់ផ្ទះនាពេលអនាគតនៅលើដីនោះ។ លោកបន្តថា ទោះជាយ៉ាងណា ការពុះដីឡូត៍ ក៏មានផលអវិជ្ជមានមួយចំនួន គឺការទិញដីឡូត៍ហើយ គាត់មិនទទួលបានប័ណ្ណកម្មសិទ្ឋ មិនដឹងទីតាំងដីច្បាស់លាស់ ហេដ្ឋារចនាសម្ព័ន្ឋមិនសមស្របជាដើម។

លោកបន្តថា “ហេតុនេះក្រសួងរៀបចំដែនដី នគរូបនីយកម្ម និងសំណង់ ដែលបានចេញសេចក្តីប្រកាសស្តីពីការអភិវឌ្ឍដីកាលពីពេលថ្មីៗនេះ មានលក្ខណៈការពារអ្នកទិញ និងអ្នកវិនិយោគដីឡូត៍”។លោកបន្តថា “សេចក្តីប្រកាសនេះល្អ មានភាពវិជ្ជមានច្រើនទាំងអ្នកលក់ និងអ្នកទិញ ទោះមិនទាន់គ្រប់ជ្រុងជ្រោយ តែអាចថាល្អលើស៩០ភាគរយ”។

បើសិនជាម្ចាស់គំរោងដីឡូត៍ ឬអ្នកវិនិយោគដីឡូត៍ គោរពនិងអនុវត្តន៍តាមសេចក្តីប្រកាសនេះ និងមានការអនុញ្ញាត្តចេញពីក្រសួងរៀបចំដែនដី នគរូបនីយកម្មនិងសំណង់ ការវិនិយោគដីឡូត៍ មានភាពវិជ្ជមានច្រើន។លោកពុទ្ឋីបញ្ជាក់ឲ្យដឹង។

លោកឃាង ពុទ្ឋីបានបន្តថា លោកសំណូមពរឲ្យអ្នកវិនិយោគពុះដីឡូត៍លក់ ពង្រីក ទំហំដីឡូត៍របស់ខ្លួន ព្រោះដីឡូត៍តូចៗពេលសាងសង់លំនៅដ្ឋាន បានធ្វើឲ្យអ្នករស់នៅមានភាពធុញថប់ ដូចជា តំបន់បឹងកេងកង១ ដីមានលក្ខណៈស្តង់ដាដោយមានទំហំ២០គុណនឹង៣០ម៉ែត្រ និងតំបន់ទួលគោកក៏ទំហំដីល្អក៏ដូចគ្នា ដែលធ្វើឲ្យដីនៅតំបន់នោះឡើងថ្លៃ និងមានតម្លៃខ្ពស់ តែតំបន់ដែលមានដីតូចៗ គឺតម្លៃអចលនទ្រព្យមិនមានតម្លៃថ្លៃនោះទេ។

លោកបន្តថា “ហេតុនេះអ្នកវិនិយោគពុះដីឡូត៍លក់ គួរធ្វើដីឡូត៍ដែលមានទំហំធំ ដើម្បីឲ្យអ្នកទិញមានភាពងាយស្រួលសាងសង់ ហើយអ្នកទិញគួរសិក្សាទិដ្ឋភាពផ្លូវច្បាប់ ដូចជា ក្រុមហ៊ុនដែលខ្លួនចង់វិនិយោគជាមួយមានច្បាប់ឬទេ? មានដីច្បាស់លាស់ឬទេ? និងស្ថិតនៅទីតាំងណាពិតប្រាកដ? ពិសេសត្រូវសិក្សាពីហេដ្ឋារចនាសម្ព័ន្ឋ និងប្រព័ន្ឋលូឲ្យបានច្បាស់លាស់មុនសម្រេចចិត្តទិញ”។

លោកបន្តថា ដីឡូត៍មកដល់បច្ចុប្បន្នបានឈានដល់ដំណាក់កាលថ្មី ដែលអ្នកវិនិយោគពុះដីឡូត៍លក់ ត្រូវបង្កើនគុណភាពគំរោងរបស់ខ្លួន ដោយត្រូវគិតពីទំហំដីឲ្យបានធំជាងមុន គិតពីហេដ្ឋារចនាសម្ព័ន្ឋធំជាងមុន និងគិតគូរពីផាសុខភាពរបស់អ្នករស់នៅនាពេលអនាគត៕

សម្តេចតេជោៈប្រាក់ចំណូលប្រជាជនកម្ពុជានឹងកើនឡើងដល់ជាង២ពាន់ដុល្លារនៅឆ្នាំ២០២៣

October 5, 2018

0

ដោយ យិន លាងគង់

ភ្នំពេញ: សម្តេចអគ្គមហាសេនាបតីតេជោហ៊ុន សែននាយករដ្ឋមន្រ្តីកម្ពុជាបានថ្លែងថា ប្រាក់ចំណូលប្រជាពលរដ្ឋកម្ពុជាម្នាក់ៗ នឹងកើនដល់ជាង២០០០ដុល្លារអាមេរិកក្នុងមួយឆ្នាំនៅឆ្នាំ២០២៣ខាងមុខនេះ។

អញ្ជើញចូលរួមក្នុងទិវាគ្រូបង្រៀននាព្រឹកថ្ងៃទី៥ តុលានេះ សម្តេចតេជោបានថ្លែងថា នៅឆ្នាំ២០២៣ប្រាក់ចំណូលប្រជាជនខ្មែរម្នាក់ៗ នឹងកើនដល់ជាង២០០០ដុល្លារអាមេរិកក្នុងមួយឆ្នាំ ហើយសម្តេចរំពឹងថា ប្រទេសផ្តល់កម្ចីនឹងមិនដំឡើងអត្រាការប្រាក់នោះទេ បើទោះបីសេដ្ឋកិច្ចកម្ពុជាសម្រេចបានកំនើនខ្ពស់ក្តី។សម្តេចបន្តថា សុខសន្តិភាពនៅកម្ពុជាបានផ្តល់ផ្លែផ្កាច្រើនណាស់ សម្រាប់សង្គមជាតិ។

សម្តេចតេជោបានបន្តថា រាជរដ្ឋាភិបាលនឹងវិនិយោគកាន់តែច្រើនទៀត លើវិស័យអប់រំ ជាពិសេសការកសាងគុណភាពអប់រំ តាមរយៈការពង្រឹងសមត្ថភាពគ្រូបង្រៀន និងកសាងហេដ្ឋារចនាសម្ព័ន្ឋអប់រំនានា។

តាមការព្យារណ៍របស់ក្រសួងសេដ្ឋកិច្ច និងហិរញ្ញវត្ថុបានឲ្យដឹងថា ប្រាក់ចំណូលប្រជាជនកម្ពុជាម្នាក់ៗក្នុងមួយឆ្នាំនឹងកើនដល់១៥៦០ដុល្លារនៅឆ្នាំ២០១៨នេះ។
លោកបណ្ឌិតម៉ី កណ្យាណទីប្រឹក្សាឧត្តមក្រុមប្រឹក្សាសេដ្ឋកិច្ចជាតិបានថ្លែងថា ការព្យាករណ៍របស់រដ្ឋាភិបាល ពិសេសក្រសួងសេដ្ឋកិច្ច និងហិរញ្ញវត្ថុមានលក្ខណៈវិទ្យាសាស្រ្ត ហេតុនេះលោកជឿជាក់ថា កម្ពុជានឹងសម្រេចបានកំនើនប្រាក់ចំណូលដូចការលើកឡើងរបស់ប្រមុខរដ្ឋាភិបាលកម្ពុជា។ លោកបន្តថា សេដ្ឋកិច្ចកម្ពុជាសម្រេចបានកំននល្អប្រសើរ ដោយសុខភាពនៅក្នុងវិស័យស្នូលទាំង៤ បាននិងកំពុងមានការវិវត្តល្អប្រសើរ ដែលធ្វើឲ្យប្រាក់ចំណូលប្រជាពលរដ្ឋបានកើនឡើង ជាប់ជាប្រចាំក្នុងប៉ុន្មានឆ្នាំចុងក្រោយនេះ។

លោកបន្តថា សេដ្ឋវិទូនៅក្រសួងសេដ្ឋកិច្ច និងហិរញ្ញវត្ថុ ពួកគេមានសមត្ថភាព ហើយការព្យាករណ៍របស់ពួកគេពិតជាអាចទទួលយកបាន ហេតុនេះការលើកឡើងរបស់សម្តេចពិតជាអាចក្លាយជាការពិត។លោកបន្តថា “ក្រុមសេដ្ឋវិទូនៃក្រសួងសេដ្ឋកិច្ច ខ្ញុំបានចូលរួមជ្រើសរើសដោយផ្ទាល់ ពួកគេមានវ័យក្មេងតែមានចំណេះដឹងខ្ពស់ និងមានថាមពល”៕

ដំណឹងថ្មី! សម្តេចតេជោប្រកាសរំសាយការបង្កើតខេត្តថ្មីចំនួនពីរ

October 5, 2018

0

ដោយ គង់ សូរិយា

ភ្នំពេញ៖ សម្តេចតេជោហ៊ុន សែននាយករដ្ឋមន្ត្រីនៃកម្ពុជាបានប្រកាសរំសាយការសិក្សាដើម្បីបង្កើតខេត្តថ្មីចំនួនពីរ ដែលស្នើដោយក្រសួងមហាផ្ទៃបន្ទាប់ពីការបោះឆ្នោតជាតិកាលពីពេលថ្មីៗនេះ។

អញ្ជើញចូលរួមក្នុងទិវាគ្រូបង្រៀននាព្រឹកថ្ងៃទី៥ តុលានេះសម្តេចតេជោហ៊ុន សែនបានថ្លែងថា សម្តេចបានប្រកាសរំសាយលើការសិក្សាបង្កើតខេត្តថ្មី ដែលគ្រោងបែងចែកពីខេត្តកណ្តាល និងខេត្តរតនគិរី និងមណ្ឌលគិរី។ សម្តេចបានបង្ហើបថា ជាពិសេសមានអ្នកខ្លះបានរត់ការដើម្បីសុំឋានៈជាអភិបាលខេត្តថ្មីនេះ។

មួយរយៈពេលចុងក្រោយនេះ តម្លៃដីនៅតំបន់មួយចំនួនបានឡើងថ្លៃខ្ពស់ដោយសារមានពាក្យចចាមអារ៉ាមពីការបង្កើតខេត្តថ្មីនៅតំបន់នោះ។

លោក ង៉ែត ជូ ទីប្រឹក្សាផ្នែកសេដ្ឋកិច្ចនិងភិវឌ្ឍន៍នៃក្រុមហ៊ុន Emerging Market Consulting ធ្លាប់បានព្រមានឲ្យប្រជាពលរដ្ឋប្រុងប្រយ័ត្ន ទាក់ទងនឹងការបំពុលព៌តមានក្នុងវិស័យអចលនទ្រព្យ ដោយលោកជំរុញឲ្យប្រជាជនសិក្សា ពិចារណាលើព៌តមានឲ្យបានច្បាស់លាស់ និងគ្រប់គ្រាន់មុនធ្វើការសម្រេចចិត្តវិនិយោគក្នុងវិស័យនេះ ហើយបោះបង់ការវិនិយោគ ដោយពឹងផ្អែកលើព្រេងសំណាង។

លោកបន្តថា “ព៌តមានមួយចំនួនមានលក្ខណៈបំពុល ហេតុនេះការសិក្សាឲ្យបានច្បាស់លាស់ និងគ្រប់ជ្រុងជ្រោយមុនសម្រេចចិត្តជាការសំខាន់ណាស់ ដើម្បីឲ្យគំរោងវិនិយោគរបស់ខ្លួនប្រាសចាកហានិភ័យ”៕

សមាគមអ្នកជំនាញអចលនទ្រព្យត្រៀមបណ្តុះបណ្តាលជំនាញទាក់ទងនឹងវិស័យនេះ

October 5, 2018

0

ដោយ ស៊ីវ ម៉េង

ភ្នំពេញ៖ សមាគមអ្នកជំនាញអចលនទ្រព្យ នឹងចាប់ផ្តើមបើកការបណ្តុះបណ្តាលទាក់ទងនឹងវិស័យនេះនៅពាក់កណ្តាលខែតុលានេះ ដើម្បីបំពេញតម្រូវការធនធានមនុ ស្សនៅក្នុងវិស័យនេះ។

ប្រធានសមាគមអ្នកជំនាញអចលនទ្រព្យកម្ពុជា លោកឃាង ពុទ្ឋីបានមានប្រសាសន៍ឲ្យដឹងនៅទីតាំងសមាគម ដែលស្ថិតនៅក្នុងគំរោង One Park នៃមជ្ឈមណ្ឌលភ្នំពេញ (Phnom Penh City Center អតីតបឹងកក់)កាលពីល្ងាចថ្ងៃទី៤ តុលាកន្លងមកថា រហូតមកទល់ពេលនេះ ការចុះឈ្មោះចូលរៀនបានចាប់ផ្តើមហើយ ដោយមានសិក្ខាកាមជាច្រើនបានចុះឈ្មោះចូលរៀនវគ្គនេះ។ វគ្គបណ្តុះបណ្តាលនេះ នឹងចាប់ផ្តើមនៅថ្ងៃទី១៥តុលាខាងមុខនេះ។

លោកបន្តថា “មូលហេតុដែលសមាគមបើកថ្នាក់បណ្តុះបណ្តាលនេះ គឺចង់បង្កើនធនធានមនុស្សដើម្បីបំពេញការងារក្នុងវិស័យនេះ ដែលកំពុងមានការរីកចម្រើនយ៉ាងខ្លាំង។លោកបន្តថា “អ្នកបញ្ចប់ការសិក្សាចេញពីវគ្គនេះ យើងមិនលើកទឹកចិត្តពួកគេឲ្យបើកក្រុមហ៊ុនភ្លាមទេ តែពួកគេអាចធ្វើការនៅតាមក្រុមហ៊ុននានា ដែលយើងរកការងារជូន ដើម្បីទទួលបានបទពិសោធន៍ និងមូលដ្ឋានរ៉ឹងមាំក្នុងវិស័យនេះ មុននឹងឈានទៅបើកក្រុមហ៊ុនផ្ទាល់ខ្លួន។

វគ្គបណ្តុះបណ្តាលនេះ នឹងរៀនរយៈពេល៥ថ្ងៃក្នុងមួយសប្តាហ៍ គឺថ្ងៃច័ន្ទ ដល់ថ្ងៃសុក្រ ដែលចាប់ផ្តើមពីម៉ោង៥,៣០នាទីដល់៨,៣០នាទីល្ងាច។

លោក ឃាង ពុទ្ឋី បានបន្តថា ការបណ្តុះបណ្តាលនេះ នឹងមានរយៈពេល១៥ទៅ១៦ម៉ោងក្នុងមួយវគ្គ ដែលបង្រៀនដោយអ្នកមានជំនាញ និងអ្នកដឹកនាំក្នុងវិស័យនេះ ដោយពួកគេនឹងបង្ហាញពីបទពិសោធន៍ការបរាជ័យ និងភាពជោគជ័យដែលពួកគេសម្រេចបាន ជាមួយនឹងកម្មវិធីសិក្សា ដែលមានការច្របាច់បញ្ចូលគ្នាពីកម្មវិធីសិក្សាក្នុងស្រុក និងកម្មវិធីសិក្សាលក្ខណៈអន្តរជាតិ។

កម្មវិធីសិក្សានេះយកតម្លៃ១៦៨ដុល្លារអាមេរិក សម្រាប់សិក្ខាកាមម្នាក់ ដែលលោកឃាង ពុទ្ឋីបានមានប្រសាសន៍ថា តម្លៃនៃការសិក្សានេះមានភាពសមរម្យ បើធៀបនឹងចំណេះដឹងផ្សេងទៀត ព្រោះការបណ្តុះបណ្តាលនេះបង្រៀនដោយអ្នកជំនាញជាតិ និងអន្តរជាតិ ពិសេសលោកស្នើឲ្យយុវជនឬអ្នកចង់ប្រឡូកក្នុងវិស័យនេះ ពង្រឹងសមត្ថភាពរបស់ខ្លួន ដើម្បីទទួលបានជោគជ័យក្នុងវិស័យនេះ៕

ស្វែងយល់ពីអាស៊ាន! រដ្ឋាភិបាលមីយ៉ាន់ម៉ា ដាក់ចេញគោលនយោបាយបង្អាក់ការអភិវឌ្ឍវិស័យសំណង់

October 5, 2018

0

ដោយ វុត្ថា

ភ្នំពេញ៖ កាសែត Myanmar Times បានរាយការណ៍កាលពីសប្តាហ៍មុនេះថា គណៈកម្មាធិការអភិវឌ្ឍន៍ទីក្រុងយ៉ាំងហ្គោន (YCDC) កាលពីខែមេសាបានដាក់ចេញសេចក្តីប្រកាស ដោយបានហាមឃាត់ក្រុមអ្នកអភិវឌ្ឍ ពីការសាងសង់ជាន់ផ្ទាល់ដីឲ្យមានកម្ពស់ជាង១២ហ្វីត ដែលបានបង្អាក់ដល់វិស័យសំណង់ក្នុងស្រុក។

លោក U Myo Myint សមាជិកគណៈកម្មការការងារ នៃសមាគមអ្នកម៉ៅការសំណង់ ដែលមានអាជ្ញាប័ណ្ណពីរដ្ឋាភិបាលមីយ៉ាន់ម៉ា បានប្រាប់កាសែត The Times ថា ការប្រកាសនេះ បានធ្វើឱ្យអ្នកសាងសង់មានការភ្ញាក់ផ្អើល ហើយការរឹតបន្តឹងទាំងនេះត្រូវបានដាក់អោយអនុវត្តដោយគ្មានប្រាប់ជាមុន។

លោកបន្តថា ការដាក់សំណើសុំលិខិតអនុញ្ញាតសាងសង់ អាចចំណាយពេលមួយឆ្នាំ រដ្ឋាភិបាលគួរតែជូនដំណឹង ដល់អ្នកសាងសង់នូវការផ្លាស់ប្តូរបទបញ្ជានេះ យ៉ាងហោចណាសពី៥ខែ ទៅ១ឆ្នាំមុនដែរ។

លោក U Yan Aung អគ្គនាយកក្រុមហ៊ុនសាងសង់លំនៅដ្ឋានបានថ្លែងថា “នៅពេលមានការពន្យារពេល ក្នុងការស្វែងរកការអនុញ្ញាត្តិសាងសង់ និងការអនុញ្ញាតឱ្យសាងសង់នៅកម្រិតខុសៗគ្នា និងតម្រូវការទាប ដោយសារតែស្ថានភាពសេដ្ឋកិច្ចរបស់ប្រទេសនោះ ការរឹតបន្តឹងដែលបង្កើតឧបសគ្គកាន់តែច្រើន ដល់ការសាងសង់មិនគួរត្រូវបានកំណត់នោះទេ”។

លោកបន្តថា បទប្បញ្ញត្តិថ្មី ដែលហាមឃាត់ការសាងសង់អគារខ្ពស់ ហាក់ដូចជាផ្ទុយនឹងតម្រូវការសាធារណៈ ចំពោះជាន់ផ្ទាល់ដីដែលមានពិដានខ្ពស់។ ដូច្នេះការបន្សល់ទុកកន្លែងទំនេរមានតម្រូវការខ្ពស់បំផុត ជាពិសេសអ្នកស្វែងរកអចលនទ្រព្យកំពុងស្វែងរកទីកន្លែងទាំងពីរសម្រាប់ធ្វើពាណិជ្ជកម្ម និងកន្លែងរស់នៅ។

លោកបានបន្តថា “ការបំពាក់ឡៅតឿ គឺល្អសម្រាប់ទាំងអ្នកលក់ និងអ្នកទិញ” ។ លោកបញ្ជាក់ទៀតថា«ជាន់ផ្ទាល់ដីចំនួន១២ហ្វីត នឹងមិនមានតម្លៃល្អដូចកាលពីមុនហើយ ក៏មិនសូវងាយស្រួលសម្រាប់អ្នកទិញពិតប្រាកដដែរ»៕

រដ្ឋាភិបាលចាប់ផ្តើមធ្វើសង្គ្រាមជាមួយសំរាម ជាអាទិភាពក្នុងអាណត្តិថ្មីនេះ

October 5, 2018

0

ដោយ ដែន ចែងចាំង

ភ្នំពេញ៖ រដ្ឋាភិបាលតាមរយៈគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ បានដាក់ចេញគោលនយោបាយអាទិភាពទី១ គឺការកំចាត់សំរាមនៅក្នុងអាណត្តិរ ដ្ឋាភិបាលទី៦នេះ។

ឧបនាយករដ្ឋមន្ត្រីអគ្គបណ្ឌិតសភាចារ្យ អូន ព័ន្ឋមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុកាលពីថ្ងៃទី៣ តុលាកន្លងមកនេះ បានដឹកនាំកិច្ចប្រជុំក្រុមគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ បានលើកយករបៀបវារៈធំៗចំនួន៣ ក្នុងនោះវារៈទី១ ការពិនិត្យរៀបចំគោលនយោបាយទឹកចិត្ត ឱ្យមានការកែច្នៃសំណល់រឹង និងគម្រោងទុកដាក់សំរាម និងការស្នើសុំការគាំទ្រផ្នែកបច្ចេកទេស និងឥណទានខ្នាតតូចដល់សហគមន៍មូលដ្ឋានជាដើម ។ ជាក់ស្តែងនៅឆ្នាំ២០១៧ តាមការប៉ាន់ប្រមាណនៅទូទាំងកម្ពុជា បរិមាណសំរាមសំណល់រឹងនៅទីប្រជុំជន បានបង្កើតឡើងគឺប្រមាណ ៣,៦៥ លានតោនក្នុងមួយឆ្នាំ។ ចំណែកនៅរាជធានីភ្នំពេញមានប្រមាណ៣ពាន់តោន/ថ្ងៃ។

កិច្ចប្រជុំដដែលបានដាក់ចេញនូវផែនការអាទិភាព ដោយផ្តោតលើការកែច្នៃ និងការគ្រប់គ្រងសំរាម និងសំណល់រឹង គឺត្រូវការយន្តការដោះស្រាយជាកញ្ចប់ ដែលមានលក្ខណៈគ្រប់ជ្រុងជ្រោយ ដោយគិតអំពីគោលការណ៍ធំៗរួមមាន ការទុកដាក់សំរាម, ការប្រមូល និងការកែច្នៃសំរាម ដែលប្រការនេះទាមទារជាចាំបាច់នូវក្របខ័ណ្ឌច្បាប់/លិខិតបទដ្ឋានគតិយុត្ត ក្របខ័ណ្ឌគោលនយោបាយ វិធានការ និងផែនការសកម្មភាព ជាពិសេសការចូលរួមពីអន្តរក្រសួង-ស្ថាប័នពាក់ព័ន្ធសំខាន់ៗ ទន្ទឹមនឹងការបណ្តុះស្មារតីចូលរួមពីប្រជាជនទូទាំងប្រទេស។

ទី២ គណកម្មាធិការនេះ ក៏បានជំរុញការអនុវត្តវិធានការសំខាន់ៗ ពាក់ព័ន្ធនឹងវិស័យសេដ្ឋកិច្ច និងហិរញ្ញវត្ថុ ដែលបានដាក់ចេញនៅក្នុងយុទ្ធសាស្ត្រចតុកោណ ដំណាក់កាលទី៤ ក្នុងនោះគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ ដើរតួនាទីសំខាន់ក្នុងការតាមដាន ត្រួតពិនិត្យ និងវាយតម្លៃការអនុវត្តវិធានការសំខាន់ៗ ពាក់ព័ន្ធនឹងវិស័យសេដ្ឋកិច្ច និងហិរញ្ញវត្ថុ ដែលបានដាក់ចេញក្នុង“យុទ្ធសាស្ត្រចតុកោណដំណាក់កាលទី៤”នាពេលថ្មីៗនេះ។

ចំណុចទី៣ ការពិភាក្សាលើសេចក្តីព្រាងក្របខ័ណ្ឌគោលដៅ អភិវឌ្ឍន៍ប្រកបដោយចីរភាពកម្ពុជា ឆ្នាំ២០១៦-២០៣០ ដោយអង្គប្រជុំបានបន្តពិនិត្យ និងពិភាក្សាឡើងវិញនូវឯកសារក្របខ័ណ្ឌអភិវឌ្ឍន៍ ប្រកបដោយចីរភាពកម្ពុជាឆ្នាំ២០១៦-២០៣០ និងបានប្រជុំបានវាយតម្លៃខ្ពស់ពីសារៈសំខាន់ និងផ្តល់ធាតុចូលបន្ថែមធ្វើឱ្យសេចក្តីព្រាងនេះកាន់តែមានលក្ខណៈគ្រប់ជ្រុងជ្រោយ ផ្សារភ្ជាប់នឹងសូចនាករ ដែលមានលក្ខណៈអាចវាស់វែងបាន និងខ្លឹមសារមានសង្គតិភាពជាមួយឯកសារពាក់ព័ន្ធនានា របស់រាជរដ្ឋាភិបាលដែលបានដាក់ចេញនាពេលកន្លងទៅ និងស្នើសុំដាក់សេចក្តីព្រាងនេះជូនកិច្ចប្រជុំពេញអង្គគណៈរដ្ឋមន្ត្រីនាពេលខាងមុខផងដែរ៕

វាគ្មិនជំនាញ១២រូបនឹងចូលរួមចែករំលែកចំណេះដឹងក្នុងពិព័រណ៌អចលនទ្រព្យ កម្ពុជាឆ្នាំ២០១៨

October 4, 2018

0

ដោយ : គង់ សូរិយា

ភ្នំពេញ : នៅសល់ពេលតែជាងពីរសប្តាហ៍ទៀតប៉ុណ្ណោះ ពិព័រណ៌អចលនទ្រព្យកម្ពុជាសម្រាប់ឆ្នាំ២០១៨នេះ នឹងរៀបចំជាលើកទី៣នៅកម្ពុជា ជាមួយនឹងទំហំនៃការតាំងបង្ហាញកាន់តែគួរអោយ ចាប់អារម្មណ៍ជាងលើកមុនៗ។

ក្នុងព្រឹត្តិការណ៍ឆ្នាំនេះ វេទិកាសិក្ខាសាលាអប់រំស្តីអំពីទីផ្សារអចលនទ្រព្យកម្ពុជា នឹងដំណើរការ រយៈពេលពីរថ្ងៃពេញ ដោយជួបជាមួយអ្នកជំនាញសំខាន់ចំនួន១៣រូបនឹងចែករំលែកបទពិសោធន៍ និងចំណេះដឹងរបស់ពួកគេទាក់ទងនឹងការរីកចម្រើន និងចក្ខុវិស័យចំពោះមុខនៅក្នុងវិស័យនេះ។

វាគ្មិនសំខាន់ៗទាំងនោះ រួមមាន ទី១ លោកឧកញ៉ា ចេង ខេង ប្រធានក្រុមប្រឹក្សាភិបាល និងជានាយកប្រតិបត្តិនៃក្រុមហ៊ុនអចលនទ្រព្យ CPL ទី២ លោក James Whitehead នាយកប្រតិបត្តិគេហទំព័រផ្សព្វផ្សាយអចលនទ្រព្យ Yula.la (ប្រទេសឡាវ) ទី៣ លោក តេង រិទ្ធី ស្ថាបនិក និងនាយកក្រុមហ៊ុន R’ Investment Group ទី ៤ លោក Matthew Rendall ដៃគូជាន់ខ្ពស់របស់ក្រុមហ៊ុន Sok Siphana & Associates និងជាសមាជិកនៃក្រុមហ៊ុន ZicoLaw ទី៥ លោក Michael Verdy អ្នកគ្រប់គ្រងផ្នែកប្រតិបត្តិការប្រទេសវៀតណាមនិងអាស៊ីអាគ្នេយ៍

ទី ៦កញ្ញា Alice Hsieh ប្រធានផ្នែកលក់ និងទីផ្សារនៃក្រុមហ៊ុនអចលនទ្រព្យ Position Property Services ទី៧ លោក Guillaume Massin ដៃគូ និងនាយកចាត់ចែងទូទៅនៃក្រុមហ៊ុន DFDL ទី៨ លោក Haijun Zeng ដៃគូនៃក្រុមហ៊ុន Ting & Association ទី៩ លោក Wanye Wang សហស្ថាបនិកនៃក្រុមហ៊ុន Lumi Arch Global ទី១០. កញ្ញា Doris Han អ្នកប្រឹក្សាផ្នែកច្បាប់ ទី១១. លោក Kam Chin Seng នាយកចាត់ការទូទៅនៃក្រុមហ៊ុនអភិវឌ្ឍន៍ N6A investment Co., Ltd., និងទី១២. លោក Simon Griffiths ជានាយកគ្រប់គ្រងទូទៅរបស់ក្រុមហ៊ុន Urban Asset Solutionsជាដើម។

ក្នុងវេទិការនេះ អ្នកជំនាញនីមួយៗ នឹងធ្វើបទបង្ហាញអំពីប្រធានបទល្អៗ ជុំវិញភាពរីកចម្រើន នៃវិស័យអចលនទ្រព្យកម្ពុជា ការណែនាំសម្រាប់អ្នកចង់វិនិយោគអចលនទ្រព្យលើ់កដំបូង ទិដ្ឋភាពផ្លូវច្បាប់នៃការវិនិយោគ កម្មសិទ្ធិស្របច្បាប់នៅកម្ពុជា ព្រមទាំងសក្តានុពលនៃតំបន់ វិនិយោគសំខាន់ៗនៅកម្ពុជា។

ក្នុងពិព័រណ៌អចលនទ្រព្យនឹងមានក្រុមហ៊ុនអចលនទ្រព្យ និងគម្រោងលំនៅដ្ឋានដាក់តាំង បង្ហាញជាច្រើន។ ក្នុងនោះរួមមាន៖ ក្រុមហ៊ុន Creed Group គម្រោង Orkide Villa ក្រុមហ៊ុន ព្រីនស៍រៀលអ៊ីស្ទេត(ខេមបូឌា)គ្រុប គម្រោង The Parkway គម្រោង The Palm ក្រុមហ៊ុន Aristo Developers គម្រោង One Park គម្រោង Phnom Penh Harbour គម្រោង Le Bassac គម្រោង North Park Condominium គម្រោង Residences Bel Air ក្រុមហ៊ុន Pafilia ក្រុងហ៊ុន Position Property Servicesជាដើម។

ក្រៅពីនេះក៏មានការតាំងបង្ហាញពីវិស័យហិរញ្ញវត្ថុមួយចំនួន ដែលរួមមាន៖ ធនាគារ ANZ Royal ធនាគារភ្នំពេញពាណិជ្ជ ធនាគារ PPCBank និងធនាគារ RHB។ព្រឹត្តិការណ៍នេះ នឹងប្រព្រឹត្តិទៅនៅថ្ងៃទី ១៩ និង ២០ ខែ តុលា ឆ្នាំ ២០១៨ នេះដោយមានគេហទំព័រ កាសែតជាច្រើនជាដៃគូព៌តមាន ដូចជា គេហទំព័រអចលនទ្រព្យឈានមុខគេនៅកម្ពុជា Propertyarea.asia, Freshnews ជាដើម។

សម្រាប់ការឧបត្ថម្ភ ឬការទិញកន្លែងតាំងពិព័រណ៍សូមទាក់ទង:

● ភាសាខ្មែរ និងចិន: [email protected] ឬទូរស័ព្ទ (+855) 93 552 305 និង (+855) 78 637 323

● អង់គ្លេស: [email protected] ឬទូរស័ព្ទ (+855) 12 599 669 និង (+855) 81 599 669

កាដូបុណ្យភ្ជុំបិណ្ឌៈបុរីប៉េង ហួតផ្លូវ៦០ម៉ែត្របញ្ចុះតម្លៃរហូតដល់៧ភាគរយ

October 4, 2018

0

ដោយ : រតនៈ

ភ្នំពេញ : ក្នុងគោលដៅលើកទឹកចិត្ត ក៏ដូចជាដើម្បីអបអរសាទរពិធីបុណ្យភ្ជុំបិណ្ឌ អតិថិជន នឹងទទួលបានការបញ្ចុះតម្លៃរហូតដល់៧ភាគរយ ពីហ្សបហោស៍ក្លាសស៊ិក ក្នុងគម្រោងដឹស្តាដាយមិន (ផ្លូវ៦០ម៉ែត្រ) ដែលមានសុពលភាពចាប់ពីថ្ងៃនេះរហូតដល់ដំណាច់ខែតុលាខាងមុខនេះ។

ហ្សបហោស៍ក្លាសស៊ិក បានរចនាឡើងសមឥតខ្ចោះ ផ្អែកទៅលើគុណភាព សោភណ្ឌភាព និងប្រណិតភាព ជាមួយនឹងការរួមបញ្ចូលរចនាបថបែបខ្មែរ និងអឺរ៉ុប ដែលរួមមានបន្ទប់គេង៤ បន្ទប់ទឹក៥ បរិវេណទទួលភ្ញៀវ កន្លែងទទួលទានអាហារ បន្ទប់ចម្អិនអាហារ និងកន្លែងចតរថយន្តធំទូលាយ ប្រកបដោយបរិយាកាសស្រស់ស្រាយ និងផាសុកភាព ជាពិសេសគឹស្ថិតនៅទីតាំងទល់មុខផ្សារទំនើបភីអេច ដាយមិនផ្លេស (PH Diamond Place) ក្នុងគម្រោងដឹស្តា ដាយមិន ផ្ទាល់តែម្តង សក្តិសមបំផុត សម្រាប់ការរស់នៅ និងប្រកបអាជីវកម្មរបស់លោកអ្នក។

គម្រោងដឹស្តាដាយមិន ជាគម្រោងដែលមានវិសាលភាព ប្រមាណជា៤០ហិកតា នៅជាប់មហាវិថី សម្តេចតេជោ ហ៊ុន សែន (៦០ម៉ែត្រ) ជាគម្រោងមួយ ដែលបែងចែកជាតំបន់សម្រាប់ធ្វើពាណិជ្ជកម្ម និងសម្រាប់ស្នាក់នៅផងដែរ។ សម្រាប់តំបន់ពាណិជ្ជកម្ម ក្នុងគម្រោងដ៏ធំនេះ ក៏នឹងក្លាយជាទីប្រជុំជនពាណិជ្ជកម្មដ៏ធំមួយ ក្នុងតំបន់ចាក់អង្រែក្រោម ដែលរួមមានទាំងផ្សារទំនើបភីអេច ដាយមិនផ្លេស (PH Diamond Place) សាលសន្នីសីទ និងអគារពាណិជ្ជកម្មតែមួយគត់ នឹងផ្តល់ជូនលោកអ្នក នូវការកំសាន្ត និងជម្រើសហាងទំនិញ សេវាកម្មរាប់រយប្រភេទ ពីហ្សបហោស៏ ដែលជាគេហដ្ឋានសម្រាប់អាជីវកម្មផងដែរ។

សម្រាប់ព័ត៌មានបន្ថែម សូមទាក់ទងទូរសព្ទលេខ 015 90 6789 Email: [email protected] ឬចូលទៅកាន់គេហទំព័រ Facebook: www.facebook.com/boreypenghuothgroup ឬអាចអញ្ជើញមកសាកសួរព័ត៌មាន ពីគ្រប់ការិយាល័យលក់ ដែលមានទីតាំងក្បែរលោកអ្នក រៀងរាល់ម៉ោងធ្វើការ៕

ព្រមាន៖ រដ្ឋមន្ត្រីក្រសួងដែនដីស្នើឲ្យលោកអភិបាលខេត្តព្រះសីហនុបញ្ឈប់ ការចេញលិខិតអនុញ្ញាតសាងសង់

October 4, 2018

0

ដោយ : វុត្ថា

ភ្នំពេញ : ឧបនាយករដ្ឋមន្រ្តី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា ស្នើរឲ្យ លោក យន្ត មីន អភិបាលខេត្តព្រះសីហនុបញ្ឈប់ជាបន្ទាន់ចំពោះការចេញលិខិតអនុញ្ញាតជាគោលការណ៍ ដល់ម្ចាស់សំណង់ឱ្យដំណើរការសាងសង់មុនទទួលបានលិខិតអនុញ្ញាតសាងសង់ពីស្ថាប័នមានសមត្ថកិច្ច និងត្រូវពង្រឹងការគ្រប់គ្រងការដ្ឋានសំណង់ឱ្យគោរពច្បាប់ បទដ្ឋានគតិយុត្ត និងបច្ចេកទេសជាធរមាន។

នៅក្នុងលិខិតដែលចុះហត្ថលេខាដោយ លោក ឆាន់ សាផាន រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ ផ្ញើរជូន លោក យន់ មីន អភិបាលខេត្តព្រះសីហនុ បានសរសេរថា “ការដ្ឋានសំណង់ជាច្រើនក្នុងភូមិសាស្ត្រខេត្តព្រះសីហនុ បាននឹងកំពុងដំណើរការសាងសង់ខ្លះ ជិតរួចរាល់ទាំងស្រុងទៅហើយ ដោយពុំមានលិខិតអនុញ្ញាតសាងសង់។ មានតែគោលការណ៍ឲ្យដំណើរការសាងសង់ មុនទទួលបានលិខិតអនុញ្ញាតសាងសង់ ចេញដោយរដ្ឋបាលខេត្តព្រះសីហនុ ផ្ទុយទៅនឹងស្មារតីនៃអនុក្រឹត្យស្តីពីលិខិតអនុញ្ញាតសាងសង់ បណ្តាលឪ្យកើតមានបទល្មើសសំណង់ប៉ះពាល់ ដល់សណ្តាប់ធ្នាប់សារធារណៈ សោភណ្ឌភាព និងគុណភាពសំណង់”។

លោក យន្ត មីន អភិបាលខេត្តព្រះសីនុ ជារឿយៗ តែងតែចេញលិខិតអនុញ្ញាតសាងសង់ដល់ម្ចាស់សំណង់មុនទទួលបានលិខិតអនុញ្ញាតសាងសង់ពីស្ថាប័នមានសមត្ថកិច្ច ដែលធ្វើអោយមានការរិះគនពីប្រជាពលរដ្ឋក្នុងមូលដ្ឋាន និងអាជ្ញាធរពាក់ព័ន្ធជុំវិញសំណង់គ្មានសណ្តាប់ធ្នាប់ និងគ្មានសបទដ្ឋានគតិយុត្តិត្រឹមត្រូវ។

លោក យន្ត មីន កាលពីពេលថ្មីៗនេះ បានចេញលិខិតអនុញ្ញាតអោយលោក Liu Changhai ជនជាតិចិនសាងសង់សណ្ឋាគារ និងភោជនីយដ្ឋាននៅក្នុងខេត្តមួយនេះ ដែលបានស្នើរសុំគោលការណ៍បណ្តើរ និងសាងសង់បណ្តើដែលជាហេតុធ្វើអោយផ្ទុយទៅនឹងស្មារតីអនុក្រឹត្យលេខ អនក្រ.បក ចុះថ្ងៃទី ១៩ ខែធ្នូរ ឆ្នាំ ១៩៩៧ ស្តីពីលិខិតអនុញ្ញាតសាងសង់ បណ្តាលអោយកើតមានបទល្មើសំណង់ ប៉ះពាល់ដល់សណ្តាប់ធ្នាប់សារធារណៈ សោភណ្ឌភាព និងគុណភាពសំណង់នៅក្នុងខេត្ត៕

មន្រ្តីពាណិជ្ជកម្មអឺរ៉ុប : កម្ពុជា ជាប្រទេសមានភាពអំណោយផលដល់ការវិនិយោគ

October 4, 2018

0

ដោយ : ស៊ីវ ម៉េង

ភ្នំពេញ : មន្រ្តីជាន់ខ្ពស់សភាពាណិជ្ជកម្មអឺរ៉ុបប្រចាំកម្ពុជាបានអះអាងថា កម្ពុជាជាប្រទេសមានភាពអំណោយផលដល់ការវិនិយោគ បើធៀបជាមួយបណ្តាប្រទេសផ្សេងទៀត ក្នុងសហគមន៍សេដ្ឋកិច្ចអាស៊ាន។

លោក Tasilo Brinzer អនុប្រធាននៃសភាពាណិជ្ជកម្មអឺរ៉ុបប្រចាំប្រទេសកម្ពុជា បានមានប្រសាសន៍ ក្នុងកិច្ចពិភាក្សាជាមួយអ្នកសារព័ត៌មានស្ដីពី “ធុរកិច្ចរបស់សហភាពអឺរ៉ុប និងប្រទេសកម្ពុជា” នៅព្រឹកថ្ងៃទី៤ ខែតុលានេះថា កម្ពុជាជាប្រទេសមានភាពអំណោយផលមួយសម្រាប់ការវិនិយោគ បើធៀបនឹងប្រទេសជិតខាងដទៃទៀត។ ជាពិសេសកម្ពុជាមានកំណើនសេដ្ឋកិច្ចល្អប្រសើរ ក្នុងរយៈពេលប៉ុន្មានឆ្នាំចុងក្រោយនេះ។ លោកបន្តថា សព្វថ្ងៃសភាពាណិជ្ជកម្មអឺរ៉ុបប្រចាំកម្ពុជា កំពុងរៀបចំកម្មវិធីជាច្រើនដើម្បីជាការទាក់ទាញ ដល់បណ្ដាវិនិយោគគិនក្នុងសហភាពអឺរ៉ុប មកបណ្ដាក់ទុននៅកម្ពុជាបន្ថែមទៀតផងដែរ។ លោកបន្តថា “សព្វថ្ងៃក្រុមហ៊ុនមកពីសហភាពអឺរ៉ុប ដែលមកបណ្ដាក់ទុននៅកម្ពុជា មានចំនួនរហូតដល់ជាង៥០០ក្រុមហ៊ុន ដោយពួកគេបានវិនិយោគលើវិស័យជាច្រើន”។

យោងតាមរបាយការណ៍របស់សភាពាណិជ្ជកម្មអឺរ៉ុបប្រចាំកម្ពុជា បានឲ្យដឹងថា ទំហំពាណិជ្ជកម្មរវាងសហភាពអឺរ៉ុប និងកម្ពុជាមានភាពល្អប្រសើរជាខ្លាំង ដោយកាលពីឆ្នាំ ២០១៧កន្លងមក កម្ពុជាបាននាំចេញមុខទំនិញសំខាន់ៗដូចជា ខោអាវ ស្បែកជើង អង្ករ កង់ ម្រេច ទៅកាន់ទីផ្សារសហភាពអឺរ៉ុប ក្នុងទំហំទឹកប្រាក់រហូតដល់ ៥, ៥ ប៊ីលានយូរ៉ូ។ រីឯការនាំចូលមុខទំនិញពី សហភាពអឺរ៉ុបមកកម្ពុជាវិញ មានទំហំទឹកប្រាក់ត្រឹមតែប្រមាណ៨៥០លានយូរ៉ូប៉ុណ្ណោះ។

ចំណែកលោក George Edgar ឯកអគ្គរដ្ឋទូតសហភាពអឺរ៉ុបបានលើកឡើងផងដែរថា សព្វថ្ងៃវត្តមានរបស់ក្រុមហ៊ុនមកពីសហភាពអឺរ៉ុប សុទ្ធតែគោរពតាមលក្ខណ្ឌត្រឹមត្រូវ តាមលក្ខណៈស្តង់ដា គោរពច្បាប់ នឹងផ្ដល់ប្រាក់បៀរវត្សន៍ខ្ពស់ និងមានការងារជាប់លាប់សម្រាប់ប្រជាពលរដ្ឋកម្ពុជា៕

● ភាសាខ្មែរ និងចិន: [email protected]​​​​ ឬទូរស័ព្ទ (+855) 93 552 305 និង (+855) 78 637 323

● អង់គ្លេស: [email protected] ឬទូរស័ព្ទ (+855) 12 599 669 និង (+855) 81 599 669

● ភាសាខ្មែរ និងចិន: [email protected] ឬទូរស័ព្ទ (+855) 93 552 305 និង (+855) 78 637 323