ដោយគង់ សូរិយា

       ភ្នំពេញ៖ ដោយសារការកើនឡើងនៃតម្លៃដីធ្លី និងការរីកចម្រើនសេដ្ឋកិច្ចសង្គម រយៈពេល៥ឆ្នាំខាងមុខទៀត តំបន់ចក្រអង្រែលើ និងចក្រអង្រែក្រោមស្ថិតនៅតាមបណ្តោ​យផ្លូវជាតិលេខ២ នឹងក្លាយជាតំបន់ពាណិជ្ជកម្មរសរវើក។

លោក លាងគង់ យិន ស្ថាបនិកនិងជាអគ្គនាយកនៃគេហទំព័រ propertyarea.asia ដែលបានតាមដានវិស័យសេដ្ឋកិច្ច និងសង្គមជាច្រើនឆ្នាំនៅកម្ពុជាបានលើកឡើងថា នេះជានិន្នាការធម្មតារបស់ប្រទេសមួយ ដែលការវិវត្តន៍នានាបានផ្លាស់ប្តូរពីតំបន់មួយដែលធ្លាប់ជាដីស្រែក្លាយជាតំបន់លំនៅដ្ឋាន ហើយតំបន់លំនៅដ្ឋានមិនរៀបរយក្លាយជាតំបន់លំនៅដ្ឋាន និងពាណិជ្ជកម្ម។ ដូចគ្នានេះតំបន់ចក្រអង្រែលើ និងចក្រអង្រែក្រោម ស្ថិតក្នុង​ខ័ណ្ឌមានជ័យ ដែលជាបណ្តុំរោងចក្រ សហគ្រាសកាត់ដេរ និងផលិតស្បែកជើងតាំងពី ទសវត្សរទី៩០ មកនឹងក្លាយជាតំបន់លំនៅដ្ឋាន និងមជ្ឈមណ្ឌលពាណិជ្ជកម្មយ៉ាងផុសផុលនាពេលអនាគត។

លោកបន្តថា “រដ្ឋាភិបាលនឹងមិនទុកឲ្យរោងចក្រ សហគ្រាសនៅក្នុងទីក្រុងទៀតនោះទេនាពេលអនាគត ព្រោះវាមិនត្រឹមតែធ្វើឲ្យបាត់តម្លៃបន្ថែមក្នុងសេដ្ឋកិច្ចទេ តែក៏ធ្វើឲ្យមានការបំពុលផ្សែង ដែលបង្កការរំខានដល់ការរស់នៅរបស់ពលរដ្ឋផងដែរ”។ លោកបន្តថា “ការកើនឡើងនូវតម្លៃដីធ្លី និងទំនោរនៃការអភិវឌ្ឍន៍នឹងរុញច្រានរោងចក្រ សហគ្រាសទាំងនោះចេញទៅជាយក្រុងភ្នំពេញ”។

លោកលាងគង់បានលើកពាក្យទំនៀមមួយថា “ចិនចេញខ្មែរ ខ្មែរដេញខ្មោច”​ជាក់​ស្តែងរឿងនេះ បាននិងកំពុងកើតឡើងនៅកម្ពុជា ពិសេសតំបន់ជាយក្រុងភ្នំពេញ ដែលដើមឡើយជាតំបន់កប់ខ្មោច ប៉ុន្តែពេលនេះតំបន់ទាំងនោះបានក្លាយជាតំបន់ពាណិជ្ជកម្ម និងលំនៅដ្ឋានយ៉ាងរៀបរយ។

អគ្គនាយកក្រុមហ៊ុន Century21 Mekong លោក ច្រឹក សុខនីម បានថ្លែងឲ្យដឹងផងដែរថា ពិតហើយគោលនយោបាយរបស់រដ្ឋាភិបាល នាពេលអនាគតនឹងរៀបចំតំបន់ឧស្សាហកម្មដាច់ដោយឡែកពីគ្នា និងមិនស្ថិតនៅក្នុងទីក្រុងនោះទេ។ គឺដូចគ្នានឹងតំបន់​ចក្រអង្រែលើ និងចក្រអង្រែក្រោម ដែលបច្ចុប្បន្នសម្បូររោងចក្រ សហគ្រាស នឹងក្លាយជា​តំបន់លំនៅដ្ឋាន និងមជ្ឈមណ្ឌលពាណិជ្ជកម្មនាពេលដ៏ខ្លីខាងមុខនេះ។

លោកបន្តថា “នេះជានិន្នាការធម្មតា ពេលប្រទេសមិនទាន់អភិវឌ្ឍន៍ អ្វីៗមិនសូវមានភាពរៀបរយទេ ប៉ុន្តែពេលប្រទេសអភិវឌ្ឍន៍កាន់តែច្រើន និន្នាការបែបនេះនឹងកើតឡើងជាស្វ័យប្រវត្តិ”។

រហូតមកទល់ពេលនេះមានរោងចក្រ សហគ្រាសមួយចំនួនបានរើចាកចេញពីតំបន់នេះបណ្តើរៗហើយ ពិសេសតំបន់ស្ថិតក្នុងសង្កាត់ចក្រអង្រែលើ នៃទឹកដីខ័ណ្ឌមានជ័យ រាជធានីភ្នំពេញ៕

ដោយគង់ សូរិយា

       ភ្នំពេញ៖ នៅទីបំផុតកំពស់អាគារកប់ពពក ROYAL TOWER PHNOM PENHដែលគ្រោងសាងសង់ នៅលើទីតាំងសណ្ឋាគារកាំបូឌីយ៉ាណាបច្ចុប្ប​ន្ន បានបង្ហាញបង្ហា​ញកំពស់ក្រៅផ្លូវការហើយ។

យោងតាមប្រភពព៌តមានដែលអាចទុកចិត្ត បានឲ្យដឹងកាលពីម្សិលម៉ិញនេះថា អាគារកប់ពពកដែ​លនឹងសាងសង់នាពេលខាងមុខនេះ មានកំពស់១៤៤ជាន់ ស្មើនឹងកំពស់៦៤៨ម៉ែត្រ ខណៈអាគារពាណិជ្ជកម្មភ្លោះ THAI BUNRONG TWIN TOWER នឹងសាងសង់កំពស់៥៦១ម៉ែត្រ និងអាគារ THE DIAMOND TOWER ស្ថិតនៅទីក្រុងកោះពេជ្រនឹងសាងសង់កំពស់ជាង៦០០ម៉ែត្រផងដែរ។

ទោះជាយ៉ាងណាប្រភពព៌តមានមិនបញ្ជាក់ឲ្យដឹងថា អាគារ ROYAL TOWER PHNOM PENH នឹងចាប់ផ្តើមសាងសង់នៅពេលណានោះទេ ខណៈក្រុមហ៊ុននេះកំពុងត្រៀមសាងសង់អាគារពាណិជ្ជកម្មភ្លោះកំពស់៦២ជាន់ ស្ថិតនៅអតីតស្ថានីយ៍ទូរទស្សន៍ប៉ុស្ត៍លេខ៣ នាពេលឆាប់ៗខាងមុខនេះ។

បច្ចុប្បន្នក្រុមហ៊ុនថៃ ប៊ុនរ៉ុងបាននិងកំពុងអនុញ្ញាត្តឲ្យក្រុមហ៊ុនមួយជីកជញ្ជាំងទប់ដីនៅទីតាំងអាគារភ្លោះកប់ពពកនេះហើយ ដែលការជីកដីនេះគ្រោងចំណាយពេល១៦ខែ។

ថ្នាក់ដឹកនាំក្រុមហ៊ុន ROYAL GROUP មិនអាចទាក់ទងសុំការអត្ថាធិប្បាយបានទេ ប៉ុន្តែបើតាមអ្នកនាំពាក្យក្រសួងរៀបចំដែនដី នគរូបនីយកម្មនិងសំណង់លោកសេង ឡូតបានអះអាងថា រដ្ឋាភិបាលបានឯកភាពជាគោលការឲ្យក្រុមហ៊ុន ROYAL GROUPសាងសង់អាគារកប់ពពកនៅទីតាំងសណ្ឋាគារកាំបូឌីយ៉ាណារួចហើយ។

លោកបន្តថា “ការសាងសង់អាគារនេះនៅពេលណា ខ្ញុំមិនអាចបញ្ជាក់បាននៅឡើយទេ បើចង់ដឹងព៌តមានលំអិតសូមសាកសួរទៅកាន់ក្រុមហ៊ុនចុះ”៕          

ដោយគង់ សូរិយា

       ភ្នំពេញ៖ ដោយសារមើលឃើញសក្តានុពល និងសម្រស់ក្រុងកែបស័ក្តិសមជាទីលំហែរកាយ អ្នកវិនិយោគក្នុងស្រុកមួយរូបបានសម្រេចចិត្ត វិនិយោគខុនដូជាលើកដំបូងនៅទឹកដីក្រុងកែប ដែលជាទីក្រុងដ៏ស្រស់ស្អាតមួយនៃភាគនារតីកម្ពុជា។

តំណាងខុនដូឈ្មោះ “ថ្ម១ដុំ” លោកហ៊ុយ អៀងបានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី១៦ សីហានេះថា ទីក្រុងកែបស័ក្តិសមជាទីលំហែរ និងជាទីក្រុងដែល​មានភាពស្ងប់ស្ងាត់ មិនមានការបំពុលបរិយាកាស ហើយជាទីក្រុងដែលបារាំងចាប់អារម្ម ណ៍ជាងគេ ក្នុងចំណោមខេត្តជាប់តំបន់ឆ្នេរទាំងបួនរបស់កម្ពុជា។ ហេតុនេះទើបលោកសម្រេចចិត្តវិនិយោគគំរោងនេះឡើង ដោយរចនាអាគារកំពស់៧ជាន់នេះផ្សារភ្ជាប់ជាមួ​យធម្មជាតិ និងបរិយាកា​សដ៏ស្រស់ស្រាយនៃទីក្រុងកែប។

លោកបន្តថា “គំរោងខុនដូនេះនឹងសាងសង់នៅពេលឆាប់ៗខាងមុខ ដែលជាខុនដូ​លើកដំបូងនៅទីក្រុងកែបមានចំនួន៧១យូនីត និងបន្ទប់ខុនដូនិមួយៗមានតម្លៃ៨០០ដុល្លារក្នុងមួយម៉ែត្រការ៉េ”។ លោកបន្តថា វាជាតម្លៃសមរម្យមួយដែលប្រជាពលរដ្ឋកម្ពុជាអាចមានលទ្ឋភាព​ទិញសម្រាប់ស្នាក់នៅឬវិនិយោគបាន”។

ទំហំបន្ទប់និមួយៗ ត្រូវបានរចនាឡើងប្រកដោយភាពធំទូលាយ ដែលមានទំហំចាប់ពី១០៨ម៉ែត្រការ៉េឡើងទៅ។ ការរចនាបែបនេះ ដើម្បីផ្តល់ផាសុខភាពដល់អ្នកស្នាក់នៅ និងអាចលំហែរកាយជាមួយនឹងគំរោង ដែលស្ថិតនៅកណ្តាលឧទ្យានជាតិកែប។

គំរោងខុនដូនេះ ស្ថិតក្នុងសង្កាត់កែប ក្រុងកែប ដែលទីក្រុងតូចច្រឡឹងមួយរបស់កម្ពុជា ដែលកាលពីឆ្នាំមុនបានទទួលពានរង្វាន់ទីក្រុងស្អាត និងបៃតងអាស៊ាន។

លោកហ៊ុយ អៀងបានបន្តថា គំរោងនេះនឹងចំណាយពេលសាងសង់២៤ខែ បន្ទាប់ពីទទួលបានការអនុញ្ញាត្តច្បាប់សាងសង់ពីអាជ្ញាធរក្រុងកែប និងក្រសួងរៀបចំដែនដី នគរូបនីយកម្ម និងសំណង់។

ទោះជាយ៉ាងណាលោកមិនទាន់បញ្ជាក់ឲ្យដឹង ពីទុនវិនិយោគក្នុងគំរោងនេះនៅឡើយទេ៕

ដោយគង់ សូរិយា

       ភ្នំពេញ៖ កំណើនភ្ញៀវទេសចរណ៍ជាតិ អន្តររជាតិ និងការមកដល់របស់អ្នកវិនិយោគអន្តរជាតិនៅខេត្តព្រះសីហនុ បានផ្តល់ឪកាសដ៏សំខាន់ក្នុងការវិនិយោគលើខុនដូសម្រាប់ស្នាក់នៅឬសម្រាប់ជួលឲ្យអ្នកវិនិយោគ និងទេសចរណ៍នានា។

ការកើនឡើងនូវចំនួនអាកាសចរណ៍ចុះចតជាង៥០០លើកក្នុងមួយសប្តាហ៍ នៅទី​តាំងព្រលានយន្តហោះដែលធ្លាប់តែស្ងប់ស្ងាត់ បាននិងកំពុងធ្វើឲ្យខេត្តព្រះសីហនុក្លាយជា​ប៉ូលសេដ្ឋកិច្ចធំទី២របស់ប្រទេសកម្ពុជា ខណៈទីក្រុងនេះកំពុងប្រឈមនឹងកង្វះបន្ទប់​ស្នាក់នៅរយៈពេលវែង។

ប្រធានមន្ទីរទេសចរណ៍ខេត្តព្រះសីហនុ លោកតាំង សុចិត្រគ្រឹះស្នាបានមានប្រ​សា​សន៍ឲ្យដឹងកាលពីសប្តាហ៍មុនថា កង្វះបន្ទប់សណ្ឋាគារបាននិងកំពុងក្លាយជាបញ្ហាប្រឈ​មមួយសម្រាប់ទីក្រុងព្រះសីហនុ ពិសេសថ្ងៃចុងសប្តាហ៍ឬថ្ងៃបុណ្យទាននានា។លោកបន្ត​ថា នៅដំណាច់ឆ្នាំនេះឬឆ្នាំ២០១៩ខាងមុខ សណ្ឋាគារធំៗចំនួន៥នឹងបើកទ្វារ ដែលមាន​បន្ទប់ជាង២០០០ដាក់ឲ្យភ្ញៀវស្នាក់នៅ ប៉ុន្តែចំនួននេះមិនទាន់ឆ្លើយតបនឹងតម្រូវការនៅ ឡើយទេ។

លោកបន្តថា “កំនើនភ្ញៀវទេសចរណ៍ជាតិ អន្តរជាតិ និងអ្នកវិនិយោគចិនបាននិងកំពុងធ្វើឲ្យបញ្ហាបន្ទប់សណ្ឋាគារក្លាយជាបញ្ហាចោទ ព្រោះសណ្ឋាគារភាគច្រើនបានជួល​ដោយអ្នកវិនិយោគចិន ហើយពួកគេមិនជួលបន្ទប់ឲ្យភ្ញៀវស្នាក់នៅទេ”។

ជាមួយនឹងបញ្ហាប្រឈមនេះ វាក៏ជាឳកាសមាសផងដែរ សម្រាប់អ្នកមានបំណង ទិញខុនដូសម្រាប់ទុកជួលជូនភ្ញៀវទេសចរណ៍ និងអ្នកវិនិយោគនានា។

ដោយមើលឃើញនូវឳកាសនេះ អ្នកវិនិយោគក្នុងស្រុកបានវិនិយោគសាងសង់ខុនដូដ៏ប្រណីតមួយ THE SEAGATE SUITE ដែលស្ថិតនៅកណ្តាលក្រុងព្រះសីហនុ និង​មានទីតាំងដ៏ល្អបំផុត ដែលអាចគយគន់ទេសភាពសមុទ្របានគ្រប់ផ្នែក ពីអាគារកប់ពពក​កំពស់៤៥ជាន់នេះ។

គំរោងនេះនឹងក្លាយជាមជ្ឈមណ្ឌលនៃទីក្រុង ផ្សារភ្ជាប់ជាមួយធនធានដ៏សម្បូរបែប និងមានលលក្ខណៈចាស់ទុំរបស់ខេត្តព្រះសីហនុ។ អតិថិជនកម្រិតVIPចំនួន១១១៨គ្រួ​សារ នឹងទទួលបានសេវាកម្មដ៏ល្អ ភាពរួសរាយរាក់ទាក់ពីអ្នកគ្រប់គ្រងអាគារលំដាប់អន្តរជាតិ លើអាគារដ៏ស្រស់ស្អាតនិងទាក់ទាញទំហំ១០ម៉ឺនម៉ែត្រការ៉េនេះ។

ការវិនិយោគលើខុនដូនេះ អតិថិជននឹងទទួលបានការជួលត្រលប់ពីក្រុមហ៊ុនវិញ និងទទួលបានប្រាក់ពីការវិនិយោគ៩ភាគរយប្រចាំឆ្នាំ ដែលនេះជាឳកាសមួយដែលផ្តល់​នូវការគាំទ្រដល់ការរីកចម្រើន និងឆ្លើយតបតម្រូវការរបស់អតិថិជន។

នាយិកាប្រចាំប្រទេសនៃក្រុមហ៊ុនCBRE Cambodiaអ្នកនាងអាន សុធីតាបានថ្លែងថា ទីផ្សារខុនដូនៅខេត្តព្រះសីហនុមានភាពរីកចម្រើន និងមានតម្រូវការច្រើនពីអតិថិជន ដោយសារវាជាទីផ្សារថ្មីដែលកំពុងមានភាពទាក់ទាញ ហើយមានតម្រូវការបន្ទប់ស្នាក់នៅកើនឡើងជាប្រចាំពីភ្ញៀវទេសចរណ៍ និងអ្នកជំនួញនានា។

តាមការសិក្សាកាលពីដំណាច់ឆ្នាំមុនរបស់ក្រុមហ៊ុនVTRUST APPRAISALបាន​រកឃើញថា ខុនដូនៅខេត្តព្រះសីហនុមានចំនួនប្រមាណ១៦គំរោង និងមានបន្ទប់ខុនដូ​សរុបចំនួនជាង៥០០០យូនីត ដែលភាគច្រើនកំពុងស្ថិតក្នុងដំណាក់កាលសាងសង់នៅឡើយ៕

ដោយគង់ សូរិយា

       ភ្នំពេញ៖ កម្ពុជាជាថ្មីម្តងទៀត នឹងកាន់តែបង្ហាញពីមុខមាត់របស់ខ្លួនទៅកាន់អន្តរជាតិ តាមរយៈការរៀបចំពិព៌ណអចលនទ្រព្យលំដាប់អន្តរជាតិប្រចាំឆ្នាំ២០១៨។

ព្រឹត្តិការណ៍ដ៏សំខាន់នេះរៀបចំដោយ Realestate.com.kh ដែលនឹងប្រារពឡើងចាប់ពីថ្ងៃទី ១៩-២០ ខែតុលាខាងមុខនេះ។

ពិព័រណ៍អចលនទ្រព្យកម្ពុជាដែលបានរៀបចំកាលពីឆ្នាំមុន មានគម្រោងអចលនទ្រព្យធំៗ  និងក្រុមហ៊ុននានាជាង១០០ បានចូលរួមដាក់តាំងបង្ហាញក្នុងនោះ មានអ្នកទស្សនាជាង១០,០០០នាក់ ហើយអចលនទ្រព្យដែលបានលក់នៅនឹងកន្លែង សរុបជាទឹកប្រាក់ខ្ទង៣០លានដុល្លារ។ សម្រាប់ពិព័រណ៍ចុងក្រោយនៅក្នុងខែតុលាឆ្នាំ២០១៧ទទួលបានអ្នកចូលរួមជាង៥,០០០នាក់ ហើយលំនៅដ្ឋានចំនួន១៣៣យូនីបានលក់ភ្លាមៗ។​

ដោយបានក្លាយជាវេទិកាពិព័រណ៍អចលនទ្រព្យជោគជ័យ នៅក្នុងប្រវត្តិសាស្រ្តរបស់ប្រទេសកម្ពុជា ទាក់ទងនឹងទំហំនៃការលក់អចលនទ្រព្យដ៏សម្បើម ជាមួយជាមួយការគាំទ្រយ៉ាងខ្លាំងក្លាពីសំណាក់អ្នកវិនិយោគ អ្នកអភិវឌ្ឍន៍​ភ្នាក់ងារអចលនទ្រព្យ ព្រមទាំងអតិថិជនក្នុងស្រុក និងក្រៅស្រុក Realestate.com.kh នឹងបង្កើតព្រឹត្តិការណ៍ពិព័រ​ណ៍អចលនទ្រព្យសម្រាប់ឆ្នាំ២០១៨ ដែលនឹងប្រព្រឹត្តិទៅនៅក្នុងសណ្ឋាគារណាហ្គាវើលទី១នៅថ្ងៃទី ១៩ និង ២០ ខែតុលា។

សារព៌តមានជាច្រើនបានធ្វើជាដៃគូនៃព្រឹត្តិការណ៍នេះ ដូចជា Fresh News, និងគេហទំព័រ Propertyarea.asiaជាដើម។

ក្នុងព្រឹត្តិការណ៍ឆ្នាំនេះ យើងនឹងមានគម្រោងអចលនទ្រព្យល្អប្រណីត ទាំងខុនដូ និងបុរី ក្រៅពីនេះក៏ក្រុមហ៊ុនភ្នាក់ងារ ស្ថាប័នហិរញ្ញវត្ថុ និងក្រុមហ៊ុនពាក់ព័ន្ធក្នុងវិស័យអចលនទ្រព្យជាច្រើនទៀតចូលរួមដាក់តាំងបង្ហាញ។

យោងតាមសេចក្តីប្រកាសព៌តមានរបស់គេហទំព័រនេះបានឲ្យដឹងថា ពិព៌ណដ៏ធំ​នេះនឹងមានវគ្គសិក្ខា​សា​លាអប់រំស្តីពី ទីផ្សារអចលនទ្រព្យកម្ពុជា ទីតាំងវិនិយោគសក្តានុពល​ ច្បាប់វិនិយោគ និងកម្មសិទ្ធិកាន់កាប់អចលនទ្រព្យនៅកម្ពុជា ដោយវាគ្មិនជំនាញៗទាំងក្នុងស្រុក និងអន្តរជាតិ។

សូមចូលរួមដើម្បីស្វែងយល់ចូលរួមដើម្បីទទួលយកការបញ្ចុះតម្លៃមិនធ្លាប់មានពីមុនមក​​ជាមួយពិព័រណ៍អចលនទ្រព្យកម្ពុជាឆ្នាំ២០១៨។ សម្រាប់ការឧបត្ថម្ភ ឬការទិញកន្លែងតាំងពិព័រណ៍នៅសូមទាក់ទង តាមរយៈទូរស័ព្ទ និងអ៊ីម៉េលភាសាខ្មែរ និងចិន​: [email protected]​​​​  ឬទូរសព្ទ (+855) 93 552 305 និង (+855) 78 637 323។ សម្រាប់ភាសាអង់គ្លេស: [email protected]  ឬទូរសព្ទ (+855) 12 599 669 និង (+855) 81 599 669៕

ដោយគង់ សូរិយា

       ភ្នំពេញ៖ មជ្ឈមណ្ឌលកំសាន្ត និងពាណិជ្ជកម្មស្ថិតនៅស្របតាមដងទន្លេបាសាក់ ក្រុងភ្នំពេញ ដែលជាទីតាំងរចនាឡើងយ៉ាងប្រណីត និងមានខ្យល់អាកាសបរិសុទ្ឋនឹងបើកទ្វារស្វាគមន៍អតិថិជន ដែលមានបំណងស្វែងរកទីតាំងអាជីវកម្ម ឬមានគំរោងអាជីវកម្មថ្មីនានា។

យោងតាមសេចក្តីប្រកាសព៌តមានរបស់ក្រុមហ៊ុន World Bridge ដែលជាអ្នកវិនិយោគគំរោងនេះបានឲ្យ Propertyarea.asia ដឹងនារសៀលថ្ងៃទី១៥ សីហានេះថា កម្មវិធីនេះនឹងចាប់ផ្តើមបើកទ្វារស្វាគមន៍អតិថិជន និងអ្នកមានបំណងស្វែងរកទីតាំងអាជីវកម្មចាប់ពីម៉ោង៨ព្រឹក រហូតដល់៦ល្ងាចនាថ្ងៃទី២១ សីហាខាងមុខនេះ។ ក្នុងឳកាសនេះអតិថិជននឹងអាចស្វែងយល់ពីសក្តានុពល ទស្សនាគំរោង និងអាគារនិមួយៗដែលស្ថិតក្នុងគំរោងនេះ ដើម្បីអាចជ្រើសរើសទីតាំងសមស្របសម្រាប់អាជីវកម្ម ឬជំនួញរបស់ខ្លួន។

WB ARENA ជាមណ្ឌលកំសាន្តដ៏ធំ ស្ថិតនៅក្នុងសង្កាត់ចក្រអង្រែក្រោម ខ័ណ្ឌមានជ័យ រាជធានីភ្នំពេញ ស្របតាមបណ្តោយផ្លូវជាតិលេខ២ ហើយវាជាគំរោងមាន​លក្ខ ណៈពិសេស ដែលមានការរចនាឡើងប្រកបដោយបរិយាកាសរសរវើក ដូចជា ភោជនីយ​ដ្ឋាននៅតាមមាត់ទន្លេ មានអាហារដ្ឋានបែបខ្មែរ កន្លែងម៉ាស្សា និងស្បារ ផ្សារចំនួន៩០ស្តង់ និងសេវាកម្មជាច្រើនទៀត។

អតិថិជន ឬអ្នកមានបំណងស្វែងរកដៃគូអាជីវកម្ម និងចាប់ផ្តើមអាជីវកម្មក្នុងគំរោងនេះអាចទាក់ទងតាមរយៈលេខទូរស័ព្ទ ០៨៩ ៩៩៩ ៦៨១ ឬតាមរយៈអាស័យដ្ឋាននៅក្នុងបណ្តាញ Facebook ឈ្មោះ WB ARENA។

នាយក​ប្រតិបត្តិ​របស់​ក្រុមហ៊ុន Worldbridge Land លោក Tan Teck Kee បានថ្លែងឲ្យដឹងកាលពីពេលថ្មីៗនេះថា WB ARENA ​នឹង​ក្លាយ​ជាគោលដៅ​កន្លែង​សម្រាប់ ​លម្ហែ​សម្រាប់​ក្រុមគ្រួសារ​នាពេលអនាគត ​នៅពេល​គម្រោង​នេះ ​នឹង​បើក​ដំណើរការ​នៅ​ខែ​វិច្ឆិកា​ខាង​មុខ​ ។ លោក​បន្ត​ថា ​វា ​នឹង​ក្លាយ​ជា​គោលដៅ​កម្សាន្ត​នៅ​មាត់​ទន្លេ​សម្រាប់​ប្រជាជន​ក្នុង​ស្រុក ជនបរទេស និង​ភ្ញៀវទេសចរ​ផង​ដែរ​។ យើង​បាន​សាងសង់​នូវ​កន្លែង​សម្រាប់​ប្រកួត​កីឡា ​ដែល​នឹង​មាន​បើក​ស្វាគមន៍​ ទទួល​ការប្រកួត​ និង​ការ​ប្រារព្ធ​កម្មវិធី​ជាច្រើន​ទៀត​។ ជាមួយគ្នានេះ ក្រុមហ៊ុនមានគំរោង​នឹង​ធ្វើ​ព្រឹត្តិការណ៍​នានា ​ដោយផ្តោតលើមនុស្សគ្រប់​វ័យ​ផង​ដែរ​​។

គម្រោង​នេះ​ត្រូវ​បាន​ឌីសាញ​ឡើង ​ដោយ​ក្រុមហ៊ុន​ស្ថាបត្យកម្ម​នៅ​ប្រទេស​ សិង្ហបុរី Chin Kam and Associates (CK&A) ដែល​ជា​ក្រុមហ៊ុន​ធ្លាប់​ត្រូវ​បាន​ក្រុមហ៊ុន Worldbridge Group និង​ដៃគូ​វិនិយោគ​របស់​ខ្លួន​គឺ Oxley International Holdings ជួល​ឲ្យ​រចនា​ប្លង់​គម្រោង The Bridge និង The Peak​។ WB Arena ត្រូវ​បាន​គេ​រចនា​ស្រដៀង​គ្នា​នឹង Clarke Quay នៅ ​សិង្ហបុរី​។ យ៉ាង​ណា​មិញ​ការ​រចនា​ប្លង់​នេះ​ត្រូវ​បាន​រចនា​យ៉ាង​ផិ្ចតផ្ចង់​ដើម្បី​ឱ្យ ​ស៊ី​គ្នា​ទៅ​នឹង​បរិបទ​កន្លែង​កម្សាន្ត​បែប​ខ្មែរ ​នៅ​តាម​បណ្តោយ​មាត់​ទន្លេ​។

​​        លោក Simon Griffiths នាយក​គ្រប់គ្រង​របស់​ក្រុមហ៊ុន Urban Asset Solutions ដែល​ជា​ភ្នាក់ងារ​ទទួល​បន្ទុក​ការជួល និង​ជួប​អតិថិជន​របស់​គម្រោង WB Arena បាន ​ឲ្យ​ដឹង​ថា គម្រោង​នេះ​មាន​ផ្ទៃ​សរុប​៦០០០ម៉ែត្រការ៉េ ដែលក្រុមហ៊ុននឹងបែងចែក​តំបន់​ផ្សេងៗ​គ្នា​សម្រាប់​ហាង​លក់ទំនិញ ហាង​លក់​ចំណី​អាហារ និង​ភេសជ្ជៈ និង​កន្លែង​កម្សាន្ត​។

លោក Simon Griffiths បានបន្ត​ថា “​យើង​ចង់​ធ្វើ​អ្វីៗ​ដែល​ទាក់ទាញ​ភ្ញៀវទេសចរ​ជាតិ អន្តរជាតិមកកំសាន្តនៅតំបន់នេះ​”។

គម្រោង​នេះ នឹង​មាន​ស្តង់​ដែល​បម្រី​អាហារ​ព្រម​ទាំង​ភេសជ្ជៈ​ជាច្រើន​ មុខ​សម្រាប់​អ្នក​ទៅ​កម្សាន្ត​ ក៏​ដូចជា ​កន្លែង​ពិសា​អាហារ​មាត់​ឆ្នេរ​ក្រោម ​ម្លប់​ដើមត្នោត​ប្រប​មាត់​ទន្លេ​ផង​ដែរ​៕

ដោយវុត្ថា

ភ្នំពេញ៖ តម្លៃដីធ្លីនៅក្នុងខណ្ឌចំនួន៣នៅរាជធានីភ្នំពេញ មានថ្លៃបំផុតធៀបនឹងខ័ណ្ឌចំនួន៩ទៀត នោះគឺខណ្ឌដូនពេញ ខណ្ឌ៧មករា និងខណ្ឌចំការមន ដែលជាខ័ណ្ឌមានសកម្មភាពពាណិជ្ជកម្មធំជាងគេក្នុងរាជធានីភ្នំពេញ។

យោងតាមរបាយការណ៍របស់ក្រុមហ៊ុន Key Real Estate ដែលបានចេញផ្សាយកាលពីពេលថ្មីៗនេះ សម្រាប់ពាក់កណ្តាលឆ្នាំ២០១៨បង្ហាញថា តំលៃដីធ្លីនៅខណ្ឌដូនពេញ ដែលជាតំបន់ពាណិជ្ជកម្មមានតំលៃថ្លៃបំផុតនោះ គឺដីសម្រាប់សាងសង់លំនៅដ្ឋានគិតជាមធ្យមមានតម្លៃ៣,៥០០ដុល្លារ ក្នុង១ម៉ែត្រការ៉េ។ ចំណែកដីសម្រាប់ធ្វើពាណិជ្ជកម្មមានតម្លៃ ជាមធ្យម6,១០០ដុល្លារ ក្នុងមួយម៉ែត្រការ៉េ។

ក្នុងសង្កាត់ផ្សារថ្មីស្ថិតក្នុងសង្កាត់ផ្សារទី ១,ទី ២ និង៣ ដែលជាតំបន់ពាណិជ្ជកម្មជាមធ្យមមានតំលៃ៩០០០ដុល្លារក្នុងមួយម៉ែត្រការ៉េ។ សម្រាប់ដីសាងសង់លំនៅដ្ឋានក្នុងសង្កាត់ផ្សារចាស់មានតម្លៃ៤០០០ ដុល្លារក្នុងមូយម៉េត្រការ៉េ។

ចំណែកខណ្ឌ៧ មករា ឯណេះ វិញ នៅក្នុងសង្កាត់ចំនួនដូជាអូឬស្សី ទី១ ដល់ សង្កាត់អូឬស្សី៤ មានតម្លៃដីថ្លៃបំផុតគិតជាមធ្យមមានតម្លៃ៦០០០ ដុល្លារ ក្នុងមួយម៉ែត្រការ៉េ ខណៈសង្កាត់ បឹងប្រលិត តម្លៃដីជាមធ្យមមានតម្លៃ៤០០០ដុល្លារ ក្នុងមួយម៉ែត្រការ៉េ។

ដីនៅក្នុងតំបន់ខណ្ឌចំការមនវិញ មានតម្លៃចាប់ពី៣០០០ដុល្លារ ទៅ៥១០០ ដុល្លា​រក្នុងមួយម៉ែត្រការ៉េ សម្រាប់ដីពាណិជ្ជកម្ម និងសាងសង់លំនៅដ្ឋាន។

តម្លៃដីដែលថោកជាងគេ គឺដីស្ថិត​នៅក្នុងសង្កាត់ព្រែកព្នៅ ភាគខាងជើងនៃទីក្រុងភ្នំពេញ ដែលតម្លៃដីធ្លីសម្រាប់សាងសង់លំនៅដ្ឋាន គិតជាមធ្យមមានតម្លៃ១០០ដុល្លារ និងដីពាណិជ្ជកម្មមានតម្លៃ៣៤០ដុល្លារក្នុងមួយម៉ែត្រការ៉េ។

សម្រាប់ខណ្ឌដង្កោស្ថិតនៅភាគខាងត្បូង នៃទីក្រុងភ្នំពេញវិញ តំលៃដីមានតម្លៃ ១០០ដុល្លារក្នុងមួយម៉ែត្រការ៉េ សម្រាប់ដីឡូត៍សាងសង់លំនៅដ្ឋាន និង២៨០ ដុល្លារក្នុងមួយម៉ែត្រការ៉េសម្រាប់ដីពាណិជ្ជកម្ម។

ចំណែកខណ្ឌទួលគោក ខណ្ឌសែនសុខ និង ខណ្ឌព្រែកព្នៅតម្លៃដីធ្លីកើនឡើងពី ៦.៣ភាគរយ, ៦.៧ភាគរយ, និង៧ភាគរយ បើធៀបទៅនឹងឆ្នាំ២០១៧កន្លងទៅនេះ។

តាមរបាយការណ៍ដដែលបញ្ជាក់ថា តំលៃដីធ្លីនៅក្នុងទីក្រុងភ្នំពេញ គឺនៅរក្សាតម្លៃដដែលដូកាលពីឆ្នាំមុនដែរ ពុំមានអ្វីប្រែប្រួលនោះទេ ។

យ៉ាងណាក៏ដោយបើធៀបតម្លៃដីធ្លីនៅក្រុងភ្នំពេញ នឹងបណ្តាទីក្រុងនានានៅក្នុងតំបន់អាស៊ីអាគ្នេយ៍ តម្លៃដីនៅក្នុងទីក្រុងភ្នំពេញមានតម្លៃថោកជាងគេ៕