ដោយគង់ សូរិយា

       ភ្នំពេញ៖ មជ្ឈមណ្ឌលពាណិជ្ជកម្មតម្លៃ១០០០លានដុល្លារ បានប្រកាសលក់គំរោង​របស់ខ្លួននៅក្រុងភ្នំពេញ ដើម្បីប្រែក្លាយទឹកដីជ្រោយចង្វារ ជាមជ្ឈមណ្ឌលពាណិជ្ជកម្ម លំ​ដាប់ពិភពលោក។

គំរោងនេះ ត្រូវបានសហការវិនិយោគដោយកំពង់ផែស្វយ័ត្នភ្នំពេញ និងក្រុមហ៊ុនយុនណាន សេងម៉ៅ អ៊ិនវេសមិន ដើម្បីបង្កើតគំរោងដែលមានឈ្មោះថាថ្រាយអ៊ឹម (TCC TRIUMPH Commercial Center)។

ប្រតិភូរាជរដ្ឋាភិបាល ទទួលបន្ទុកជាប្រធានអគ្គនាយកកំពង់ផែស្វយ័តភ្នំពេញ លោ​​កហ៊ឺ បាវីបានមានប្រសាសន៍ឲ្យដឹង ក្នុងពិធីប្រកាសលក់គំរោងខាងលើកាលពីថ្ងៃម្សិ​លម៉ិញនេះថា គម្រោងពាណិជ្ជកម្មថ្រាយអ៊ឹម ធ្វើឡើងសមស្របទៅតាមនឹងគោលនយោ​បាយ ផ្លូវមួយខ្សែក្រវ៉ាតមួយ ដែលរដ្ឋាភិបាលប្រទេសចិនបានលើកឡើង ដែលជាស្ពានតភ្ជាប់មិត្តភាពរវាងប្រទេសចិននិងប្រទេ​សកម្ពុជា។

លោកបន្តថា “ក្រោយពេលគម្រោងនេះសាងសង់រួចរាល់ វានឹងក្លាយទៅជាមជ្ឈ​មណ្ឌលបោះដុំទំនិញអន្តរជាតិដ៏ធំមួយ នៅក្នុងប្រទេសកម្ពុជា ព្រមទាំងក្លាយជាមជ្ឈ​មណ្ឌ​លទេសចរណ៍ និងកម្សាន្តជាតិ អន្តរជាតិ”។លោកបន្តថា “ទីនេះក៏នឹងក្លាយទៅជាទីក្រុងទេស​ចណ៍វប្បធម៌ នៃព្រះរាជាណាចក្រកម្ពុជា”។

គម្រោងសាងសង់នៅទីតាំង នៅផ្ទះលេខ៣៦ ភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។

តាមរបាយការណ៍របស់ក្រុមហ៊ុនបានឲ្យដឹងថា រហូតមកទល់ពេលនេះ មានក្រុមហ៊ុនជាង១ម៉ឺន និងទំនិញជាង១០ម៉ឺនមុខប្រមូលផ្តុំនៅទីនេះ ហើយនៅទីនេះក៏នឹងក្លាយជាមជ្ឈមណ្ឌលពាណិជ្ជកម្ម ដ៏ធំជាងគេនៅក្នុងប្រទេសកម្ពុជា ដែលផ្សារភ្ជាប់ទៅនិងពិភពលោក។

លោកហ៊ឺ បាវីបានបន្តថា តំណាក់កាលដំបូងនៃគម្រោងនេះ នឹងបញ្ចប់នៅចុងឆ្នាំ២០១៩គម្រោងនេះ នឹងបញ្ចប់ទាំងស្រុងនៅចុងឆ្នាំ២០២​០ ដោយចំណាយដើមទុនអស់ចំនួន១ពាន់លានដុល្លាអាមេរិក លើផ្ទែដីទំហំជិត១០ហិកតា។ បច្ចុប្បន្នមានក្រុមហ៊ុនម៉ាកល្បីៗជាង៤០០បានសហការជាមួយ ហើយកម្ពុជា នឹងប្រឹងប្រែងអស់ពីកម្លាំងកាយ ដើម្បីធ្វើអោយគម្រោងនេះ ក្លាយជាទីតាំងពាណិជ្ជកម្មចំរុះធំជាងគេនៅភ្នំពេញ៕

យោងតាមឯកសារដែល Propertyarea.asia ទទួលបានពីក្រុមហ៊ុននេះបានឲ្យដឹងថា TCC TRIUMPH Commercial Center នឹងជាកន្លែងនៃវិថីថ្មើជើងពាណិជ្ជកម្ម អន្តរជាតិ ដែលមានរហូតដល់១០រចនាបថ ហើយមជ្ឈមណ្ឌលនេះនឹងធ្វើឲ្យទំនិញនៅ​លើពិភពលោក្សារភ្ជាប់នឹងប្រទេសកម្ពុជាទាំងមូល ឆ្លងតាមរយៈទីក្រុងភ្នំពេញ អាចឲ្យទំនិ ញនៅលើពិភពលោកដឹកជញ្ជូនទូទាំងប្រទេសកម្ពុជា។

តាមឯកសាររបស់ក្រុមហ៊ុនដដែលបានឲ្យដឹងថា អ្វីជាគុណសម្បត្តិពិសេសនៃគំរោ​ងនេះមានចំនួន៥ ដូចជា ទី១ កន្លែងនេះមានប្រជា ជនទៅមកច្រើន ទី២ ទីនេះមានដើមទុនរ៉ឹងមាំ ទី៣ ទីនេះមានស្ថេរភាពអាជីវកម្មល្អបំផុត ទី៤ ទីនេះមានសេវាកម្មល្អបំផុត និងទី៥ ទីនេះមានសន្តិសុខល្អបំផុត៕

ដោយដែន ចែងចាំង

       ភ្នំពេញ៖ គំរោងដ៏អស្ចារ្យមួយដែលស្ថិតនៅទីក្រុងកោះពេជ្រ ដែលនឹងសាងសង់អាងហែលទឹកធំនិងខ្ពស់ជាងគេបំផុតនៅក្រុងភ្នំពេញ និងកម្រិតតំបន់បាននិងកំពុងសាងសង់យ៉ាងសកម្ម។

គំរោង THE D. I RIVIERA បាននិងកំពុងដំណើរការតាមផែនការរបស់ខ្លួន ក្នុងនោះអាគារកកំពស់២៨ជាន់ចំនួន២ផ្នែកខាងមុខ បានបញ្ចប់ការសាងសង់ស្ទើរ១០០ភាគ​រយហើយ ប៉ុន្តែអាគារចំនួនបីទៀត ស្ថិតនៅផ្នែកខាងក្រោយនៃគម្រោងនេះ ដែលមានកំពស់រហូតដល់៣៨ជាន់ និងមានអាងទឹកបន្តុបពីលើប្រវែងជាង២០០ម៉ែត្របាន និងកំពុង​សាងសង់យឺតៗ និងហាក់យឺតជាងផែនការរបស់ខ្លួន។

ក្រុមហ៊ុន GREENLAND GROUP ជាក្រុមហ៊ុនលំដាប់យក្សមកពីប្រទេសចិនកាលពីចុងឆ្នាំមុន បានប្រកាសទិញអាគារទាំងបីកំពស់៣៨ជាន់នៃគំរោងនេះ ដើម្បីសាងសង់និងរៀបចំជាសណ្ឋាគារប្រណីត។

អគ្គនាយករងក្រុមហ៊ុន OCIC លោកទូច សំណាងបានមានប្រសាសន៍ឲ្យដឹងកាលពីចុងសប្តាហ៍មុនថា ការសាងសង់អាគារកប់ពពកទាំងបីនេះ មិនផ្លាស់ប្តូរនោះទេ ទោះជា​បច្ចុប្បន្នគេឃើញមានអាគារកប់ពពកចំនួនពីរកំពុងសាងសង់ឡើងក្តី ប៉ុន្តែអាគារមួយទៀត ដែលមានកំពស់៣៨ជាន់ដូចគ្នា នឹងសាងសង់នាពេលឆាប់ៗនេះ។ លោកបន្តថា ផែន​ការនៃគំរោងនេះ កំពុងដំណើរការតាមគំរោងរបស់ខ្លួន ដោយមិនមានការផ្លាស់ប្តូរនោះទេ។

លោកបន្តថា “អ្វីៗនឹងដំនើរការទៅមុខតាមការគ្រោងទុក គ្រាន់តែពេលវេលាបញ្ច​ប់អាចយឺតជាងផែនការឬយ៉ាងណា ខ្ញុំមិនមានព៌តមានលំអិតទេ”៕

ដោយគង់ សូរិយា

ភ្នំពេញ៖ បន្ទាប់ពីការសាងសង់យ៉ាងសកម្ម បច្ចុប្បន្នគារសាងសង់អាគារ Gold Tower42 ដែលចំណាយប្រាក់២៤០លានដុល្លារ នឹងបញ្ចប់គ្រោងអាគាររបស់ខ្លួនហើយ។

ការសាងសង់អាគារនេះ កាលពីដើមឡើយសម្រេចបាន៣១ជាន់រួចហើយ មុនពេលអាគារនេះបានផ្អាករយៈពេលស្ទើរមួយទសវត្សរ៍ ប៉ុន្តែបន្ទាប់ពីប្រកាស​និងចាប់ផ្តើមសាងសង់ឡើងវិញ ក្រុមហ៊ុនសាងសង់បានសម្រេចបានសមិទ្ឋិផល​របស់ខ្លួន ដោយសាងសង់បាន៧ជាន់បន្ថែម ដែលធ្វើឲ្យកំពស់អាគារនេះឡើង​ដល់៣៨ជាន់ ដូច្នេះនៅសល់៤ជាន់ទៀតប៉ុណ្ណោះ ការសាងសង់គ្រោងអាគារនេះ​នឹងបញ្ចប់តាមផែនការ។

ក្រុមហ៊ុនវិនិយោគ YUNWOO Cambodia ​សហការជាមួយក្រុមហ៊ុន Hongtao Decoration Co.,Ltd និង H T W M Engineering Cambodia Co., Ltd ដែលអគ្គនាយកក្រុមហ៊ុនHongtal Decoration Co, Ltdប្រកាសថា គ្រោងអាគារនេះនឹងបញ្ចប់នៅចុងឆ្នាំនេះ ហើយអាគារនេះនឹងដាក់ឲ្យដំណើរការនៅចុងឆ្នាំ​២០១៩ខាងមុខ។

លោក Liu Nianxin អគ្គនាយក​ក្រុមហ៊ុន Hongtao Decoration Co., Ltd និងHTWM Engineering Cambodia Co,Ltd បានលើកឡើងក្នុងពិធីប្រកាសបើកការ​ដ្ឋានសាងសង់អាគារGold Tower42Lឡើងវិញកាលពីពេលថ្មីៗនេះថា ការសម្រេ​ចចិត្តដាក់ទុនវិនិយោគបន្ត លើគម្រោងអគារ៤២ជាន់ គឺមានចំនុចសំខាន់៤ ដូចជា ទី១ ក្រុមហ៊ុនHongtao មានប​ទ​ពិសោធន៍ក្នុងរយៈពេលជាង៣០ឆ្នាំ ទៅលើគម្រោងសាងសង់អគារខ្ពស់ៗ ដែលល្បីៗបំផុតក្នុងប្រទេសចិន។ ទី២ គោលនយោបាយផ្លូវមួយ ខ្សែក្រវ៉ាត់មួយ ដែលជាគោលការណ៍របស់ប្រទេសចិន ដែលលោកជឿជាក់ថា គោលការណ៍ខាងលើនេះ នឹងធ្វើឲ្យអគារ​៤២ជាន់ស​ម្រេចបានជោគជ័យ។

ទី៣ ទីតាំងអគារ៤២ជាន់នេះជាទីតាំងមានហាងឆេងល្អ ស្ថិតនៅចំកណ្តាលរាជធានីភ្នំ​ពេ​ញ និងស្ថិតនៅទីប្រជុំរវាងមហាវិថីធំៗចំនួនពីរ គឺមហាវិថីព្រះមុនីវង្ស និងមហាវិថីព្រះសីហនុ និងជាតំបន់ពាណិជ្ជកម្មកណ្តាលរាជធានីភ្នំពេញ។ និងទី៤.សំណង់អគារ៤២ជាន់នេះរឹងមាំ និងមានគុណភាពខ្ពស់ស្របតាម​ស្តង់ដាអន្តរជាតិ។

លោក Liu Nianxin បានបន្តថា “ខ្ញុំសោកស្តាយមែនទែន នៅពេលឃើញអគារមួយនេះត្រូវបានគេបោះបង់​ចោល ដូចនេះទើបក្រុ​មហ៊ុនរបស់លោកត្រឡប់មកសហការគ្នា ដើម្បីសាងសង់អគារនេះឡើងវិញ ជាពិសសរំពឹងខ្ពស់ថា ក្រុមហ៊ុនទាំងពីរនឹង​អាច​រក​បា្រក់កំរៃយ៉ាងច្រើនពីអគារមួយនេះ”។

លោកKim Tae Yeon អគ្គនាយក​ក្រុមហ៊ុនYUNWOO CAMBODIA Co.,LTD បានថ្លែងឲ្យ​ដឹងថា ក្រុមហ៊ុន​បាន​បន្ថែម​ទុន១៤០​លាន​ដុល្លារ​លើ​គម្រោ​ងGolden Tower មួយ​នេះ បន្ទាប់ពីបាន​បោះទុន​ចំនួន​១០០​លាន​ដុល្លាររួចមកហើយ​។លោកបន្តថា បន្ទាប់ពីអគារ Gold Tower 42 នេះសម្រេចការសាងសង់ជាស្ថាពរ វានឹងក្លាយជា​សមិទ្ធ​ផល​អគារ​ពាណិជ្ជកម្មថ្មីមួយទៀត ស្ថិតនៅកណ្តាល រាជធានីភ្នំពេញ ដែលនេះជាការឆ្លុះបញ្ចាំងពីការអភិវឌ្ឍរីកចម្រើន ព្រមទាំង​បានរួម​ចំណែកក្នុងកំណើនសេដ្ឋកិច្ចកម្ពុជាតទៅអនាគត៕