ដោយស៊ីវ ម៉េង

ភ្នំពេញ : ក្នុងគោលដៅពង្រីកសក្តានុពល និងជំរុញកំនើនសេដ្ឋកិច្ចជាតិ ព្រមទាំងសមាហរណគម្មផ្ទៃក្នុងកម្ពុជា និងតំបន់ រដ្ឋាភិបាលបាននិងកំពុងរៀបចំនិងឈានទៅសាងសង់ហេដ្ឋារចនាសម្ព័ន្ឋធំៗចំនួន៩ទៀត ដែលចំណាយទឹកប្រាក់រាប់ពាន់លានដុល្លារអាមេរិក។

គំរោងដែលប្រកាសដោយក្រសួងសាធារណៈការ និងដឹកជញ្ជូន និងស្ថិតក្នុងការសិក្សាជាច្រើនរួមមាន ទី១ គំរោងពង្រីកផ្លូវជាតិលេខ២ ទី២ គំរោងពង្រីកផ្លូវជាតិលេខ៣ ទី៣ ការស្ថាបនានិងលើកកំពស់ផ្លូវជាតិលេខ៤ ទី៤ ការសាងសង់ផ្លូវល្បឿនលឿនភ្នំពេញ ក្រុងព្រះសីហនុ ទី៥ ការសាងសង់ផ្លូវក្រវ៉ាត់ក្រុងទី៣ ទី៦ ការសាងសង់ស្ពានចេញពីតំបន់ជ្រោយចង្វារ ទៅកាន់តំបន់ស្វាយជ្រុំ ក្នុងស្រុកល្វាឯម ទី៧ ការសាងសង់ស្ពានភ្ជាប់ពីក្តីតាកុយ ទៅកាន់តំបន់អរិយក្សត្រ ទី៨ គំរោងតភ្ជាប់ខ្សែរថភ្លើងជាមួយប្រទេសថៃ និងទី៩ គម្រោងសាងសង់ផ្លូវចេញពីតំបន់សំឡូត ខេត្តបាត់ដំបង ឆ្លងកាត់ខេត្តពោធិសាត់ ទៅកាន់ខេត្តកោះកុង ដែលបច្ចុប្បន្នការសិក្សាបាននិងកំពុងជិតបញ្ចប់ហើយ។

តាមការបញ្ជាក់ឲ្យដឹងពីអ្នកនាំពាក្យក្រសួងសាធារណៈការ និងដឹកជញ្ជូនលោកវ៉ា ស៊ីម សូរិយាបានឲ្យដឹងកាលពីពេលថ្មីៗនេះថា គំរោងធំៗទាំងនេះបាននិងកំពុងសិក្សា និងគំរោងខ្លះបានសិក្សាចប់ហើយ និងមានថវិកាសម្រាប់សាងសង់ហើយ ដូចជាគំរោងសាងសង់ផ្លូវក្រវ៉ាត់ក្រុងទី៣ បានទទួលហិរញ្ញប្បទានពីរដ្ឋាភិបាលចិនលើទឹកប្រាក់២៥៩លានដុល្លារអាមេរិក ដែលបានចុះហត្ថលេខារួចហើយ។ ចំណែកគំរោងសាងសងផ្លូវល្បឿនលឿនភ្នំពេញ ក្រុងព្រះសីហនុក៏ត្រៀមសាងសង់នៅចុងឆ្នាំនេះផងដែរ។

លោកបន្តថា “ការសាងសង់ហេដ្ឋារចនាសម្ព័ន្ឋជាការចូលរួមអភិវឌ្ឍន៍ជាតិ ព្រោះបើយើងចង់ឲ្យសេដ្ឋកិច្ចកម្ពុជារីកចម្រើនទៅមុខ ការវិនិយោគលើហេដ្ឋារចនាសម្ព័ន្ឋជារឿ
ងចាំបាច់ និងត្រួវតែធ្វើ”។លោកបន្តថា “ការវិនិយោគលើហេដ្ឋារចនាសម្ព័ន្ឋ រដ្ឋាភិបាលត្រូវការចំណាយច្រើនណាស់”។

ប្រធានក្រុមប្រឹក្សាភិបាលនៃវិទ្យាស្ថានសិក្សាដើម្បីការអភិវឌ្ឍន៍ លោកបណ្ឌិតម៉ី កល្យាណបានថ្លែងឲ្យដឹងផងដែរថា ហេដ្ឋារចនាសម្ព័ន្ឋជាបញ្ហាប្រឈមធំមួយនៅក្នុងសេដ្ឋកិច្ចកម្ពុជា ប៉ុន្តែរដ្ឋាភិបាលបាននិងកំពុងរៀបចំនិងអភិវឌ្ឍន៍លើវិស័យនេះហើយ ប៉ុន្តែការសាងសង់ហេដ្ឋារចនាសម្ព័ន្ឋនិមួយៗ ត្រូវចំណាយពេលយូរ ហេតុនេះការពន្លឿនការវិនិយោគ និងអភិវឌ្ឍន៍ក្នុងវិស័យនេះជារឿងចាំបាច់មួយ។

លោកបន្តថា “ដើម្បីអភិវឌ្ឍន៍សេដ្ឋកិច្ចជាតិ យើងត្រូវតែកសាងហេដ្ឋារចនាសម្ព័ន្ឋ ដើម្បីសេដ្ឋកិច្ចរបស់យើងមានសន្ទុះកំនើនថែមទៀត ព្រោះហេដ្ឋារចនាសម្ព័ន្ឋជាតម្លៃនៃសេដ្ឋកិច្ច ជាតម្លៃនៃការកសាងនិងអភិវឌ្ឍន៍សេដ្ឋកិច្ចជាតិ”៕

ដោយ គង់ សូរិយា

ភ្នំពេញ៖ ស្របពេល​តម្រូវ​ការកើនឡើង បានធ្វើ​ឲ្យ​មាន​កំនើន​វិនិយោគ​លើ​អាគារ​ការិយាល័យ ជាក់ស្តែង​អាគារ​ការិយាល័យ​កម្រិត​Bចំនួន​បួន​ទៀត នឹង​បើក​ដំណើរការ​នៅមុន​ដំណាច់​ឆ្នាំនេះ។

អាគារ​ការិយាល័យ​កម្រិត​B ទាំង​បួន​នោះ​រួមមាន East Commercial Center, Diamond Twin, E.Sun Tower និង Elysee។ ការផ្គត់ផ្គង់​ថ្មី​នេះ​នឹងធ្វើ​ឲ្យ​ទំហំ​ការិយាល័យ​ជួល​នៅ ភ្នំពេញ កើនឡើង​ដល់​ជិត៤០០ ០០០ ម៉ែត្រការ៉េ។

យោងតាម​ការសិក្សា​រប​ស់​ក្រុមហ៊ុន CBRE Cambodiaបាន​រកឃើញថា ការិយាល័យ​ដែល​កំពុង​ប្រើប្រាស់ និង​ដាក់​ជួល​ក្នុង​រាជធានី​ភ្នំពេញ គិត​ត្រឹម​ដំណាច់ត្រីមាស​ទី ៣ ឆ្នាំ ២០១៨ នេះ​បាន​កើនឡើង​តិចតួច បើ​ធៀប​នឹង​ត្រីមាស​ទី ២ ខណៈ​អត្រា​ប្រើប្រាស់​មាន​ជាង៨៦ភាគរយ។របាយការណ៍​ដដែល​បាន​បង្ហាញថា ក្នុង​ត្រីមាស​ទី ៣ អគារ​ការិយាល័យ Keystone ដែលមាន​ទំហំ​ជាង១៥,០០០ ម៉ែត្រការ៉េ ត្រូវបាន​ដាក់ចូល​ក្នុង​ទីផ្សារ។

របាយការណ៍​នេះ​បាន​ឲ្យ​ដឹង​ទៀតថា ចំណែក​អគារ​ការិយាល័យ​កម្រិត​A មាន​អត្រា​ប្រើប្រាស់​ប្រហែល៦៨ភាគរយ កម្រិត​Bមាន​អត្រា​ប្រើប្រាស់៨៨ភាគរយ និង​កម្រិត C មាន​អត្រា​អ្នកប្រើប្រាស់​រហូតដល់៩២ភាគរយ។

ទាក់ទង​តម្លៃ​ជួល​វិញ​របាយការណ៍​របស់​CBRE Cambodiaបាន​ឲ្យ​ដឹងថា ក្នុង​ត្រីមាស​ទី៣ មិនមាន​ការប្រែប្រួល​នោះទេ បើ​ធៀប​នឹង​ត្រីមាស​ទី២ ដោយ​ការិយាល័យ​កម្រិត​A មានតម្លៃ​ចន្លោះ​ពី ២៨-៣៨ ដុល្លារ​ក្នុង ១ ម៉ែត្រការ៉េ សម្រាប់​រយៈពេល ១ ខែ កម្រិត B តម្លៃ​ពី១៨-២៨ ដុល្លារ និង​កម្រិត C តម្លៃ​ពី ១០-១៨ ដុល្លារ​ក្នុង​មួយ​ម៉ែត្រការ៉េ៕

ដោយ : ស៊ីវ ម៉េង
ភ្នំពេញ : ស្របពេលផ្លូវជាតិលេខ៦អាបានបញ្ចប់ការសាងសង់ បានធ្វើឲ្យការតភ្ជាប់ពីតំបន់នានានៅតាមបណ្តោយផ្លូវនេះ មកកាន់ក្រុងភ្នំពេញកាន់តែមានភាពងាយស្រួល ដែលធ្វើឲ្យអ្នកវិនិយោគជាតិ អន្តរជាតិបានឆ្ពោះទៅតំបន់នេះ។

អ្នកវិនិយោគក្នុងស្រុកមួយរូប លោកឧកញ៉ា លី ហួរប្រធានសមាគមអ្នកអភិវឌ្ឍន៍លំនៅដ្ឋានកម្ពុជា និងជាអគ្គនាយកក្រុមហ៊ុន លី ហួរ គ្រុប ​បាននិងកំពុងឆ្ពោះទៅកាន់តំបន់នេះ តាមរយៈការវិនិយោគបុរីវិមានភ្នំពេញមង្គលរតនៈ ដើម្បីប្រែក្លាយតំបន់នេះក្លាយជាសហគមន៍ដ៏ស៊ីវិល័យមួយ។
លោកឧកញ៉ា បានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី៨ វិច្ឆិកានេះថា តំបន់នេះនឹងមានការរីកចម្រើនលឿន ពិសេសបុរីវិមានភ្នំពេញមង្គលរតនៈ នឹងធ្វើឲ្យតំប​ន់​នេះមានរបៀបរៀបរយ និងមានសួនច្បារ កន្លែងហាត់ប្រាណ និងមានផ្លូវថ្មើជើង ដែលនឹងធ្វើឲ្យតំបន់នេះកាន់តែមានរបៀបរៀបរយ និងស៊ីវិល័យមួយ។
លោកបន្តថា “វានឹងក្លាយជាទីប្រជុំជន ដែលបង្ហាញពីការរីកចម្រើនមួយនៅតំបន់នេះនាពេលអនាគតឆាប់ៗនេះ”។

ប្រធានផ្នែកទីផ្សារនៃគំរោងបុរីវិមានភ្នំពេញមង្គលរតនៈ អ្នកនាង ឆាយ ស៊ីណា បាន​មានប្រសាសន៍ឲ្យដឹងថា គំរោងនេះនឹងក្លាយជាសហគមន៍ធំមួយនៅតំបន់នេះ ដោយសា​រតំបន់នេះជាទីប្រជុំជនស្រាប់ និងមានហេដ្ឋារចនាសម្ព័ន្ឋតភ្ជាប់មកកាន់ក្រុងភ្នំពេញមាន​ភាពងាយស្រួល ដែលបានធ្វើឲ្យអ្នកវិនិយោគជាច្រើន បានមកសាងសង់បុរីនៅតំបន់នេះ ព្រោះនាពេលអនាគតតំបន់នេះនឹងមានភាពរីកចម្រើនលឿន និងកាន់តែរសរវើក។
អ្នក​នាងបន្តថា “រហូតមកទល់ពេលនេះ លំនៅដ្ឋានក្នុងគំរោងនេះលក់អស់ប្រមា​ណ២០ភាគរយហើយ នៅក្នុងគំរោងដំណាក់កាលទី១ ក្នុងចំណោមគំរោងទាំងមូលដែលមានលំនៅដ្ឋានសរុបជាង៣០០០ល្វែង”។អ្នកនាងបន្តថា “គំរោងនេះក្រៅពីលំនៅដ្ឋាន​ ក៏មានសួនច្បារ ក្លឹបហាត់ប្រាណ សាលរៀបចំអាពាហ៍ពិពាហ៍ និងផ្ទះបែបអាជីវកម្មជាដើម”។
លំនៅដ្ឋានក្នុងបុរីនេះមានតម្លៃចាប់ពី៤៦,០០០ ដល់ជាង២១ម៉ឺនដុល្លារអាស្រ័យលើទីតាំង និងប្រភេទផ្ទះនិមួយៗ។
អ្នកនាង Grace Rachny Fong នាយិកានៃក្រុមហ៊ុន Century21 Cambodia បានមានប្រសាសន៍ថា ដោយសារមានហេដ្ឋារចនាសម្ព័ន្ឋល្អប្រសើរ មានលក្ខខ័ណ្ឌអាកាសធាតុអំណោយផល បានធ្វើឲ្យមានការវិនិយោគលំនៅដ្ឋាន មជ្ឈមណ្ឌលពាណិជ្ជកម្មកាន់​តែច្រើននៅតំបន់នេះ ដែលធ្វើឲ្យតំបន់នេះនឹងមានការរីកចម្រើនខ្លាំងនាពេលអនាគត។
អ្នកនាងបន្តថា “បច្ចុប្បន្នទាំងអ្នកវិនិយោគក្នុងស្រុក ពិសេសអ្នកវិនិយោគចិនបាននិងកំពុង​វិនិយោគ និងកំពុងស្វែងរកឳកាសវិនិយោគនៅតំបន់នេះផងដែរ”៕

ដោយ គង់ សូរិយា

ភ្នំពេញ៖ គំរោង​ស្ពាន​អាកាស​និង​ផ្លូវ​ក្រោម​ដី នៅ​រង្វង់​មូល​ចោមចៅ​កន្លែង​ដែលមាន​ការកកស្ទះ​ចរាចរ​ជាប្រចាំ បាននិងកំពុង​ពន្យា​ពេល ដោយសារ​ការដោះស្រាយ​ផលប៉ះពាល់​ជាមួយ​ប្រជាពលរដ្ឋ​មិនទាន់​បញ្ចប់។

អ្នកនាំពាក្យ​រដ្ឋបាល​រាជធានី​ភ្នំពេញ លោក​ឈាង ប៊ុន​ថា បាន​មានប្រសាសន៍​ឲ្យ ដឹង​តាម​ទូរស័ព្ទ​នា​ព្រឹក​ថ្ងៃទី៨ វិច្ឆិកា​នេះ​ថា ការសាងសង់​ស្ពាន​នេះ​មិនទាន់​អាច​ចាប់ផ្តើម​នៅឡើយ​ទេ ដោយសារ​ការដោះស្រាយ​ផលប៉ះពាល់ ជាមួយ​ប្រជាពលរដ្ឋ​មិនទាន់​បញ្ចប់ ប៉ុន្តែ​លោក​រំពឹងថា ការសាងសង់​អាច​នឹង​ចាប់ផ្តើម នៅ​ដើមឆ្នាំ២០១៩ខាងមុខនេះ។លោក​បន្តថា កាលពី​ម្សិល​ម៉ិ​ញ​អាជ្ញាធរ​ខ័​ណ្ឌ បាន​ចុះ​ដោះស្រាយ​ជាមួយ​ប្រជាពលរដ្ឋ ប៉ុន្តែ​មិនទាន់​ដឹងបាន​ទទួល​ល​ទ្ឋ​ផល​បែបណា​នៅឡើយ​ទេ។

លោក​បន្តថា “ការដោះស្រាយ​ជាមួយ​ប្រជាពលរដ្ឋ​ជា​រឿង​លំបាក ហេតុនេះ​ទើប​គំរោង​មិនទាន់​អាច​បើក​ការដ្ឋាន​សាងសង់​ជា​ផ្លូវការ​បាន។

អគ្គនាយករង​ក្រុមហ៊ុន OCIC លោក​ទូច សំណាង​បាន​មានប្រសាសន៍​ឲ្យ​ដឹង​តាម​ទូរស័ព្ទ​ស្រដៀង​គ្នា​ថា ការដោះស្រាយ​ផលប៉ះពាល់​ជាមួយ​ប្រជាពលរដ្ឋ​កំពុង​ប្រព្រឹត្តិ​ទៅ ដូច្នេះ​នៅពេល​វា​បញ្ចប់​ពេលណា ការសាងសង់​នឹង​ចាប់ផ្តើម​ភ្លាម ព្រោះ​គំរោង​នេះ​បាននិងកំពុង​ក្លាយជា​គំរោង​អាទិភាព​មួយ ដើម្បី​សម្រួលការ​កកស្ទះ​ចរាចរណ៍។

រង្វង់​មូល​ចោមចៅ ជា​ចំណុច​ផ្លូវ​ប្រសព្វ​រវាង​មហាវិថី​សហ​ព័​ន្ឋ​រុស្ស៊ី ផ្លូវ​វេ​ង​ស្រេង និង​ផ្លូវជាតិ​លេខ៣ និង​លេខ។

សម្តេច​អគ្គសេនាបតី​តេ​ជោ​ហ៊ុន សែន​បាន​អញ្ជើញ​ជា​អធិបតី​ក្នុង​ពិធី​បើក​ករ​ដ្ឋា​ន​សាងសង់​ស្ពាន​នេះ​កាលពី​ថ្ងៃទី២៩ មិថុនា ឆ្នាំ ២០១៨កន្លងមកនេះ ប៉ុន្តែ​ដោយសារ​ការដោះស្រាយ​ផលប៉ះពាល់​ជាមួយ​ប្រជាពលរដ្ឋ​មិនទាន់​បញ្ចប់ ទើប​គំរោង​នេះ​មិនទាន់​អាច​ចេញដំណើរ​សាងសង់​រហូតមកទល់​ពេលនេះ៕

ដោយ វុត្ថា

ភ្នំពេញ៖ ដំណឹង​ល្អ​សម្រាប់​ក្រុង​សៀមរាប ដែល​នឹងមាន​ផ្លូវ​ស្អាត​ទាំងអស់​នៅក្នុង​ក្រុង បន្ទាប់ពី​មានការ​រិះគន់​ពី​វិស័យ​ឯកជន ទាក់ទង​នឹង​ហេ​ដ្ឋា​រចនា​ស​ម្ព័​ន្ឋ​ក្នុង​ទីក្រុង​ដ៏​ល្បី​នេះ មាន​សភាព​ទ្រុឌទ្រោម​និង​តំបន់​ខ្លះ​ជា​ផ្លូវដី ដែល​គ្មាន​ការ​ថែ​រទាំ​ពី​អាជ្ញាធរ​ក្រុង​និង​ក្រសួង​សាធារណៈការ។

ឆ្លើយតប​បញ្ហា​នេះ ក្រសួង​សាធារណៈការ និង​ដឹកជញ្ជូន គ្រោង​ចំណាយ​ថវិកាប្រមាណ១៥លាន​ដុល្លារ​សហរដ្ឋអាមេរិក ដើម្បី​ជួសជុល​ផ្លូវ​ខ្នែង​ចំនួន៥២ខ្សែ ត​ភ្ជាប់​ផ្លូវជាតិ​លេខ៦ និង​ផ្លូវ១១ខ្សែ នៅក្នុង​ខេត្តសៀមរាប ហើយនឹង​ត្រូវ​សាងសង់​ក្នុងពេលឆាប់ៗ ដើម្បី​ផ្លាស់ប្តូរ​មុខមាត់ ខេត្ត​មួយ​នេះ ឱ្យ​ស័​ក្កិ​សមជា​ខេត្ត​ទេសចរណ៍​មួយ​យ៉ាងសំខាន់។

លោក​ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួង​សាធារណការ និង​ដឹកជញ្ជូន​ថ្លែង​នៅក្នុង​កិច្ចប្រជុំ​អន្តរក្រសួង​ស្តីពី​ការងារ​ជួសជុល និង​ថែទាំ​ផ្លូវថ្នល់​ក្នុង​ខេត្តសៀមរាប​កាលពី៦ ខែវិច្ឆិកា​កន្លងមក​ថា កិច្ចប្រជុំ​នេះ​រៀបចំឡើង​ដើម្បី​ពិភាក្សា​រក​នីតិវិធី​ក្នុង​ការស្តារ​ផ្លូវថ្នល់​ដែល​ខូចខាត​ទ្រុឌទ្រោម​ដោយ​កត្តាផ្សេងៗ ពិសេស​ការដឹកជញ្ជូន​លើស​ទម្ងន់​កម្រិត​កំណត់ សំដៅ​ធានា​ឱ្យ​ការគ្រប់គ្រង​ផ្លូវថ្នល់​មាន ប្រសិទ្ធភាព​ខ្ពស់ និង​ឆ្លើយតប​ទៅនឹង​កំណើនប្រជាជន កំណើន​ភ្ញៀវទេសចរ​ជាតិ និង​អន្តរជាតិ​នៅក្នុង​ខេត្ត​នេះ។

លោក​ទេសរដ្ឋមន្ត្រី បាន​ស្នើឱ្យ​មន្ទីរ និង​ភាគី​ពាក់ព័ន្ធ​កែសម្រួល​នីតិវិធី​ជួសជុល​ផ្លូវ ដើម្បី​ស្តារ កសាង និង​ជួសជុល​ថែទាំ​បណ្តាញ​ផ្លូវថ្នល់​នានា​ឱ្យបាន​ល្អ​ជាង​មុន ដើម្បី​បំពេញតម្រូវការ​របស់​ប្រជាពលរដ្ឋ ដែលជា​ម្ចាស់ឆ្នោត និង​បាន​សំណូមពរ​ឱ្យធ្វើ​របាយការណ៍​រួមមួយ​ដាក់ជូន​រាជរដ្ឋាភិបាល​ស្នើសុំ​ថវិកា ប្រមាណ១៥លាន​ដុល្លារ​សហរដ្ឋអាមេរិក ដើ ម្បី​សាងសង់​ផ្លូវ​ខ្នែង​ចំនួន៥២ខ្សែ ត​ភ្ជាប់​ផ្លូវជាតិ​លេខ៦ និង​ផ្លូវ១១ខ្សែ​ទៀត​ក្នុង​ខេត្តសៀមរាប ឱ្យបាន​ឆាប់​តាម​ដែល​ធ្វើទៅបាន។

លោក​ទេសរដ្ឋមន្ត្រី ក៏បាន​លើកឡើង​អំពី​គម្រោង​ដាក់ឱ្យ​ដំណើរការ Road Care App នៅ​ថ្ងៃទី១៥ ខែធ្នូ ឆ្នាំ២០១៨ ដែលជា​គោលដៅ​មួយ​ក្នុងចំណោម​គោលដៅ​ទាំងឡាយ​នៃ​ផែនការ១០០ថ្ងៃ នៅក្នុង​អាណត្តិ​ទី៦នៃ​រាជរដ្ឋាភិបាល​ថ្មី​នេះ ដើម្បី​ប្រជាពលរដ្ឋ​អាច​ទាញយក​កម្មវិធី​នេះ​ថត​យក​រូបភាព ផ្លូវ​ខូច​ឬ​ជង្ហុក​សំបុកមាន់ ហើយ​បញ្ជូន​រូបភាព​នោះ​ទៅកាន់​មន្ត្រី​ពាក់ព័ន្ធ​នៃ​ក្រសួង​សាធារណការ និង​ដឹកជញ្ជូន​បន្ទាប់មក​តាម​រយៈ​រូបភាព​នោះ មន្ត្រី​ពាក់ព័ន្ធ​អាច​ដឹង​ពី​ទីតាំង​ពិតប្រាកដ ហើយ​ធ្វើការ​ជួសជុល បាន​ទាន់ពេលវេលា ដើម្បី​បង្ការ​កុំឱ្យ​ខូច​រាលដាល​កាន់តែ​ធំ។

ជាមួយគ្នានេះ​ផងដែរ ដើម្បី​ចូលរួមចំណែក​ក្នុងការ​ទប់ស្កាត់ ការដឹកជញ្ជូន​លើស​ទម្ងន់​ឱ្យ​កាន់​តែមាន ប្រសិទ្ធភាព ក្រសួង​សាធារណការ និង​ដឹកជញ្ជូន បាន​ឯកភាព​ដាក់បញ្ចូល​ក្រសួង​អភិវឌ្ឍន៍ជនបទ​ជា សមាជិក​គណៈកម្មាធិកា​រដឹក​នាំ​ការត្រួតពិនិត្យ​យានយន្ត​ដឹកជញ្ជូន​លើស​ទម្ងន់​កម្រិត​កំណត់ និង​បានផ្តល់​ជញ្ជីង​ចល័ត​ចំនួន​ពីរ​គ្រឿង ដើម្បី​ទប់ស្កាត់​ការដឹកជញ្ជូន​លើស​ទម្ងន់​កម្រិត​កំណត់​ផងដែរ។

លោក​ទេសរដ្ឋមន្ត្រី​ស៊ុន ចាន់ថុល​ក៏បាន​ជំរុញ​លើកទឹកចិត្ត​ឱ្យ​វិស័យ​ឯកជន​ចូលរួមចំណែក​ក្នុងការ​អភិវឌ្ឍ​ហេដ្ឋារចនាសម្ព័ន្ធ​ផ្លូវថ្នល់​នៅ​ខេត្តសៀមរាប​ឱ្យមាន​ការរីកចម្រើន​ផងដែរ ដើម្បី​ផ្លាស់ប្តូរ​មុខមាត់​ខេត្ត​នេះ ឱ្យ​ស័ក្តិ​សមជា​ខេត្ត​ទាក់ទាញ​ទេសចរណ៍​មួយ​យ៉ាងសំខាន់៕