អាគារកប់ពពក THAI BUNRONG ផ្លាស់ប្តូរដៃគូវិនិយោគខណៈការបុកគ្រឹះទប់ដីបានបញ្ចប់

November 7, 2018

ដោយ គង់ សូរិយា

ភ្នំពេញ៖ អាគារភ្លោះដែលជាមជ្ឈមណ្ឌលពាណិជ្ជកម្ម កប់ពពកលំដាប់ពិភពលោក Thai Bunrong Twin Tower បានផ្លាស់ប្តូរដៃគូវិនិយោគរបស់ខ្លួនហើយ ខណៈការបុកគ្រឹះសាងសង់ជញ្ជាំងទប់ដីបានបញ្ចប់មុនផែនការ។

យោងតាមប្រភពព៌តមានគួរឲ្យទុកចិត្តបាន ដែលគេហទំព័រ Propertyarea.asia ទទួលបាននារសៀលថ្ងៃទី៧ វិច្ឆិកានេះបានឲ្យដឹងថា CMT Cosmo Pte, Ltd Group ជាថ្មីរបស់ក្រុមហ៊ុនដៃគូក្រុមហ៊ុនថៃ ប៊ុនរ៉ុង ខណៈដំបូងឡើយក្រុមហ៊ុននេះបានចាប់ដៃគ្នាជាមួយក្រុមហ៊ុន Sun Kian Ip Group របស់ប្រទេសចិន ដើម្បីសាងសង់អគារកំពស់៥៦១ម៉ែត្រនេះ។

លោកសាស្ត្រាចារ្យទួស សាភឿនស្ថាបត្យករចូលរួមគូប្លង់គំរោងនេះ និងជាមន្ត្រីជាន់ខ្ពស់នៃក្រុមហ៊ុន Thai Bunrong Group ដែលជាអ្នកអភិវឌ្ឍន៍គំរោងនេះមិនបានឆ្លើយតបសំណួរសុំការពន្យល់បានទេ។

ទាក់ទងនឹងការសាងសង់អាគារនេះ លោកទួស សាភឿនបានឲ្យដឹងថា ក្រុមស្ថាបត្យករ និងវិស្វករលំដាប់ពិភពលោក ដែលធ្លាប់មានបទពិសោធន៍សាងសង់អាគារខ្ពស់ៗមកពីបួនប្រទេស កំពុងសិក្សាពីការសាងសង់អាគារនេះ។លោកបន្តថា ក្រុមស្ថាបត្យករ និងវិស្វករចូលរួមគូរប្លង់អាគារភ្លោះកប់ពពកនេះមានមកពីប្រទេសបារាំង សហរដ្ឋអាមេរិក ប្រទេសចិន និងក្រុមស្ថាបត្យករ និងវិស្វករពោរពេញដោយជំនាញនិងបទពិសោធន៍កម្ពុជាជាច្រើនរូបផងដែរ។

លោកធ្លាប់បានមានប្រសាសន៍ឲ្យដឹងថា រហូតមកទល់ពេលនេះ ក្រុមអ្នកជំនាញនិងក្រុមហ៊ុន បានសម្រេចបន្ថែមកំពស់អាគារនេះ ដល់កំពស់៥៦១ម៉ែត្រ និងបង្កើនទុនវិនិយោគផ្នែកសំណង់រហូតដល់ជាង៣០០០លានដុល្លារអាមេរិក និងជាង៣០០០លានដុល្លារទៀត នឹងត្រូវប្រើប្រាស់ធ្វើឲ្យអាគារនេះដំណើរការដោយរសរវើក។

លោកបន្តថា “ការសាងសង់មជ្ឈមណ្ឌលពាណិជ្ជកម្មពិភពលោកនេះ មិនមានការប្រែប្រួលទេ។ វានឹងជាមោទនភាព និងជាកិត្យានុភាពសម្រាប់កម្ពុជានៅលើពិភពលោក។លោកបន្តថា “មិនមានប្រទេសទាំងអស់អាចមានសមត្ថភាពសាងសង់ទេ ជួនកាលពួកគេមានលុយ តែមិនប្រាកដថាអាចសាងសង់បាននោះឡើយ។

លោកបន្តថា “យើងកំពុងប្រឹងប្រែងធ្វើឲ្យអាគារនេះ មានភាពភាពអស្ចារ្យ មិនមែនរាប់បញ្ចូលអង់តែននោះទេ គឺកំពស់ជាង៥០០ម៉ែត្រនេះ ជាអាគារដែលអាចប្រើប្រាស់បានដល់ចំណុចកំពូល។

ទោះជាយ៉ាងណាលោកមិនបញ្ជាក់ឲ្យដឹង ពីពេលវេលាជាក់លាក់នៃការចាប់ផ្តើមបើកការដ្ឋានសាងសង់ជាផ្លូវការទេ ដោយបានថ្លែងថា ក្រុមហ៊ុនកំពុងជ្រើសរើសរកពេលវេលាសមស្របមួយ។

នាយិកាប្រចាំប្រទេសនៃក្រុមហ៊ុន CBRE Cambodiaអ្នកនាងអាន សុធីតាបានថ្លែងថា ការសាងសង់អាគារដ៏ធំនេះ ជារឿងល្អមួយ ប៉ុន្តែបើគិតពីទំហំសេដ្ឋកិច្ច និងពាណិជ្ជកម្មកម្ពុជានាពេលបច្ចុប្បន្ននេះ ទំហំមជ្ឈមណ្ឌលពាណិជ្ជកម្មនេះ វាហាក់ធំពេក ប៉ុន្តែបើគិតពីការរីកចម្រើននៃសេដ្ឋកិច្ច និងទំហំពាណិជ្ជកម្មកម្ពុជាសម្រាប់រយៈពេល៥ទៅ១០ឆ្នាំខាងមុខ ទំហំអាគារនេះមិនធំនោះទេ។

អ្នកនាងបន្តថា “វាជាមោទនភាពសម្រាប់កម្ពុជា បើសិនជាអាគារនេះសាងសង់បានដោយជោគជ័យ”៕

រដ្ឋមន្ត្រីក្រសួងឧស្សាហកម្មស្នើឲ្យក្រុមហ៊ុន Hitachi បង្កើតរោងចក្រនៅកម្ពុជា

November 7, 2018

0

ដោយ គង់ សូរិយា

ភ្នំពេញ៖ រដ្ឋមន្ត្រីក្រសួងឧស្សាហកម្ម និងសិប្បកម្មលោកចម ប្រសិទ្ឋបានស្នើឲ្យនាយកគ្រប់គ្រងក្រុមហ៊ុន Hitachi បង្កើតរោងចក្រផលិតផលិតផលនេះនៅកម្ពុជា ដើម្បីលក់នៅកម្ពុជា និងអាចនាំចេញដោយរួចពន្ឋផងដែរ។

ក្នុងជំនួបពិភាក្សាការងារជាមួយ លោក Hitoshi Ito នាយកប្រតិបត្តិរងនៃក្រុមហ៊ុន Hitachi Co,Ltd នៅទីស្តីការក្រសួង ថ្ងៃទី៦ ខែវិច្ឆិកា ឆ្នាំ២០១៨កន្លងមកលោកចម ប្រសិទ្ឋបានមានប្រសាសន៍ថា ក្រុមហ៊ុន Hitachi Co,Ltd គឺជាក្រុមហ៊ុនមានឈ្មោះល្បីរបស់ជប៉ុន ដោយផលិតនូវផលិតផលប្រកបដោយគុណភាព ដូចជាគ្រឿងអេឡិចត្រូនិក និងអគ្គិសនីជាដើម ដូច្នេះដើម្បីឲ្យផលិតផលនេះមានវត្តមាននៅទីផ្សារកម្ពុជា កាន់តែទូលំទូលាយ ក្រុមហ៊ុនគួរបង្កើតជាកម្មវិធីតាំងពិព័រណ៌ ឬបង្កើតជាបន្ទប់តាំងបង្ហាញផ្សេងៗ ដើម្បីជម្រុញការធ្វើចរាចរផលិតផលនេះឲ្យកាន់តែប្រសើរ។

លោកបន្តថា ដើម្បីឲ្យផលិតផល Hitachi មានស្ថិរភាពក្នុងទីផ្សារនៅកម្ពុជា ក្រុមហ៊ុនគួរបង្កើតរោងចក្រផលិត ឧបករណ៍ម៉ាកHitachiនៅកម្ពុជាតែម្តង ព្រោះក្រោយពីផលិតរួចផលិតផលនេះ មិនត្រឹមតែសម្រាប់លក់ក្នុងទីផ្សារក្នុងស្រុកប៉ុណ្ណោះទេ ក្រុមហ៊ុនអាចនាំផលិតផលរបស់ខ្លួន លក់ចេញទៅផ្សារក្រៅប្រទេសបាន ដោយរួចពន្ធក្នុងការនាំចេញផងដែរ។

កន្លងមកក្រសួងឧស្សាហកម្ម និងសិប្បកម្ម បានចុះអនុស្សារណៈយោគយល់គ្នា ជាមួយការិយាល័យប្រកាសនីយ៍បត្រតក្កកម្មជប៉ុនរួចហើយ ដែលការចុះអនុស្សរណនេះធ្វើឡើងក្នុងបំណងធ្វើកិច្ចប្រតិបត្តិការ ចុះបញ្ជីការពារនូវសុពលភាពប្រកាសនីយបត្រតក្កកម្មជប៉ុននៅកម្ពុជា ដែលជាឧបករណ៍ផ្លូវច្បាប់មួយក្នុងកិច្ចការពារលួចចម្លងស្នាដៃ និងការច្នៃប្រឌិតថ្មីរបស់តក្កករ ដែលជាម្ចាស់នៃអ្នករកឃើញបច្ចេកវិទ្យាអ្វីមួយ។

លោក Hitoshi Ito នាយកប្រតិបត្តិរងនៃក្រុមហ៊ុន Hitachi Co,Ltd បានមានប្រសាសន៍ថាក្រុមហ៊ុននឹងធ្វើការពិនិត្យពិចារណា ស្របពេលដែលបរិយាកាសវិនិយោគ និងសក្តានុពលរបស់កម្ពុជា កាន់តែមានលក្ខណៈអំណោយផលល្អប្រសើរ។ ជាមួយគ្នានេះលោកក៏បានបង្ហាញនូវការភ្ញាក់ផ្អើល ចំពោះការវិវឌ្ឍន៍រីកចម្រើនយ៉ាងរហ័សនៃសេដ្ឋកិច្ច និងកំរិតជីវភាពរបស់ប្រជាពលរដ្ឋកម្ពុជា ក្នុងរយៈពេលប៉ុន្មានឆ្នាំចុងក្រោយ។

តាមរយៈនេះលោកមានក្តីសង្ឃឹមយ៉ាងមុតមាំ ក្នុងការទទួលបានភាពគាំទ្របន្ថែមទៀតលើទីផ្សាកម្ពុជា ចំពោះផលិតផលម៉ាក Hitachi៕

សម្តេចតេជោប្រាប់ឲ្យពន្លឿនការចចាជាមួយកូរ៉េដើម្បីពង្រីកផ្លូវជាតិលេខ2

November 7, 2018

0

ដោយ ស៊ីវ ម៉េង

ភ្នំពេញ៖ សម្តេចតេជោហ៊ុន សែនបានប្រាប់ឲ្យរដ្ឋមន្ត្រីក្រសួងសាធារណៈការ លោកស៊ុន ចាន់ថុលពន្លឿនការចចាជាមួយភាគីកូរ៉េ ដើម្បីពន្លឿនការជួសជុលនិងពង្រីកផ្លូវជាតិលេខ2។

ក្នុងដំណើរតាមរថយន្តចុះសំណេះសំណាលជាមួយកម្មករ និយោជិតជាង២ម៉ឺននាក់នៅស្រុកបាទី ខេត្តតាកែវ នាព្រឹកថ្ងៃទី៧ វិច្ឆិកានេះសម្តេចអគ្គមហាសេនាបតីតេជោហ៊ុន សែននាយករដ្ឋមន្ត្រីកម្ពុជា បានជំរុញឲ្យរដ្ឋមន្ត្រីក្រសួងសាធារណៈការ និងរដ្ឋមន្ត្រីក្រសួងសេដ្ឋកិច្ច ពន្លឿនការចចាជាមួយប្រទេសកូរ៉េខាងត្បូង ដើម្បី ពន្លឿនការពង្រីកផ្លូវជាតិលេខ២ ដែលជាផ្លូវសំខាន់មួយតភ្ជាប់ពីរាជធានីភ្នំពេញ ទៅកាន់ស្រុកគិរីវង្ស ខេត្តតាកែវជាប់ព្រំប្រទល់ប្រទេសវៀតណាម។ សម្តេចតេជោបានសម្តែងការងឿងឆ្ងល់ និងមិនសប្បាយចិត្ត ចំពោះភាពយឺតយ៉ាវនៃការសាងសង់ផ្លូវជាតិលេខ២នេះ។

សម្តេចបន្តថា “ស្ថានភាពក្នុងខេត្តតាកែវបានប្តូរអស់ហើយ មិនដូចពីមុននោះទេ អ្វី ដែលមិនប្តូរគឺមានតែផ្លូវជាតិលេខ២ប៉ុណ្ណោះ។

អ្នកនាំពាក្យក្រសួងសាធារណៈការ និងដឹកជញ្ជូនលោកវ៉ាស៊ីម សូរិយាធ្លាប់បានមានប្រសាសន៍ឲ្យដឹងកាលពីពេលថ្មីៗនេះថា ការសិក្សាដើម្បីចាប់ផ្តើមសាងសង់ និងពង្រីកផ្លូវជាតិលេខ២បានបញ្ចប់ហើយ ដោយការសាងសង់អាចចាប់ផ្តើមនៅឆ្នាំ២០១៩ខាងមុខនេះ ដោយគំរោងនេះស្ថិតក្រោមហិរញ្ញប្បទានសម្បទានពីរដ្ឋាភិបាលកូរ៉េ។

លោកបន្តថា “បច្ចុប្បន្នមន្ត្រីពាក់ព័ន្ឋកំពុងដោះស្រាយ ផលប៉ះពាល់ជាមួយប្រជាពលរដ្ឋ មុនពេលផ្លូវនេះនឹងចាប់ផ្តើមបើកការដ្ឋានសាងសង់”៕

ដំណឹងល្អ! គំរោងរៀបចំកែលំអរ និងលើកកំពស់ផ្លូវជាតិលេខ៤ នឹងចាប់ផ្តើមចុងឆ្នាំនេះ

November 7, 2018

0

ដោយ គង់ សូរិយា

ភ្នំពេញ៖ មន្ត្រីជំនាញក្រសួងសាធារណៈការ និងដឹកជញ្ជូនបានអះអាងថា ការកែលំអរនិងស្ថាបនាឡើងវិញនូវផ្លូវជាតិលេខ៤ នឹងអាចចាប់ផ្តើមនៅចុងឆ្នាំនេះឬដើមឆ្នាំ២០១៩ខាងមុខនេះ។

អ្នកនាំពាក្យក្រសួងសាធារណៈការ និងដឹកជញ្ជូនលោកវ៉ាស៊ីម សូរិយាបានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី៧ វិច្ឆិកានេះថា ផ្លូវជាតិនេះនឹងមិនមានការពង្រីកទេ ប៉ុន្តែក្រសួងនឹងចាក់នៅលើចិញ្ចើមផ្លូវក្រួសក្រហម ដែលមាននាពេលបច្ចុប្បន្ននេះ និងលើកកំពស់តួផ្លូវនៅតំបន់ស្ពានគគីរ និងស្ពានសំរោង ដែលតែងតែប្រឈមមុខនឹងការលិចទឹកជំនន់ទឹកភ្លៀងពេលរដូវវស្សាចូលមកដល់ម្តង។លោកបន្តថា គំរោងនេះគ្រោងចំណាយថវិកា១០០លានដុល្លារអាមេរិក ដែលជាហិរញ្ញប្បទានសម្បទានពីធនាគារពិភពលោក។

លោកបន្តថា “យើងអាចនិយាយបានថា ការសិក្សាដើម្បីចាក់កៅស៊ូ និងលើកកំពស់តួផ្លូវនៅតំបន់ទាំងពីរបានបញ្ចប់ហើយ ហេតុនេះគំរោងចាប់ផ្តើមនៅចុងឆ្នាំនេះនឹងអាចដំណើរការបានឬអាចចាប់ផ្តើមឆ្នាំក្រោយ។

ផ្លូវជាតិលេខ៤ជាផ្លូវដ៏សំខាន់មួយ ដែលជាការតភ្ជាប់បណ្តាញដឹកជញ្ជូនទំនិញដ៏សំខាន់ ពីរាជធានីភ្នំពេញទៅកាន់ខេត្តព្រះសីហនុ។ ផ្លូវនេះមានប្រវែងជាង១១០គីឡូម៉ែត្រ។

ការប្រកាសពីការរៀបចំលើកកំពស់តួផ្លូវ និងចាក់កៅស៊ូនៅលើចិញ្ចើមផ្លូវជាតិនេះ បានប្រកាសដោយលោកទេសរដ្ឋមន្ត្រីស៊ុន ចាន់ថុលរដ្ឋមន្ត្រីក្រសួងសាធារណៈការ និងដឹកជញ្ជូន ក្នុងកំឡុងពេលលោកចុះពិនិត្យស្ថានភាពជំនន់ទឹកភ្លៀង ដែលបានហូរកាត់និងបង្អាក់ការធ្វើចរាចរណ៍ឆ្លងកាត់ផ្លូវជាតិដ៏សំខាន់នេះ៕

ចំនួនកាស៊ីណូនៅក្រុងប៉ោយប៉ែត នឹងកើនឡើងដល់ ៣០ទីតាំងនៅឆ្នាំ២០១៩

November 7, 2018

0

ដោយ គង់ សូរិយា

ភ្នំពេញ៖ ចំនួនកាស៊ីណូបានកើនឡើងខ្ពស់នៅក្រុងប៉ោយប៉ែត ដែលរហូតមកទល់ពេលនេះទីក្រុងជាប់ព្រំដែនជាមួយប្រទេសថៃនេះ មានកាស៊ីណូនឹងកើនឡើងដល់២០ទីតាំងហើយ និងកើនដល់៣០នាឆ្នាំខាងមុខ។

អ្នកវិនិយោគក្នុងស្រុកមួយរូប លោក សុខ ហ៊ាង បានមានប្រសាសន៍ឲ្យដឹងតាមទូរស័ព្ទកាលពីចុងសប្តាហ៍មុនថា រហូតមកទល់ពេលនេះ ក្រុងប៉ោយប៉ែតមានកាស៊ីណូសរុបចំនួន២០ទីតាំងហើយ និងរំពឹងកើនដល់៣០ទៅទីតាំងនៅឆ្នាំ២០១៩ខាងមុខនេះ។លោកបន្តថា កាស៊ីណូទាំងនោះវិនិយោគដោយអ្នកវិនិយោគក្នុងស្រុក និងអ្នកវិនិយោគបរទេសដូចជា ជនជាតិចិន ថៃ ម៉ាឡេស៊ីជាដើម។លោកបន្តថា អ្នកមកលេងកាស៊ីណូភាគច្រើននៅក្រុងប៉ោយប៉ែត ជាជនជាតិថៃ និងជនជាតិចិន និងជនបរទេសដទៃទៀត។

រដ្ឋាភិបាលបានអនុញ្ញាត្តឲ្យក្រុមហ៊ុនជាតិ អន្តរជាតិបង្វែរការសាងសង់កាស៊ីណូទៅកាន់បណ្តោយព្រំដែនកម្ពុជាថៃ និងកម្ពុជាវៀតណាម ជាក់ស្តែងក្រុងប៉ោយប៉ែត និងក្រុងបាវិតជាតំបន់មានកាស៊ីណូច្រើនជាងគេ។ ក្រៅពីនេះកម្ពុជាក៏មានការវិនិយោគកាស៊ីណូ នៅតំបន់ភ្នំដិន ស្រុកគិរីវង្ស ខេត្តតាកែវ ព្រំប្រទល់កម្ពុជា វៀតណាម និងនៅព្រំដែនច្រកអន្តរជាតិត្រពាំងផ្លុង ស្ថិតក្នុងស្រុកពញ្ញាក្រែក ខេត្តត្បូងឃ្មុំជាដើម។

លោក សុខ ហ៊ាង បានបន្តឲ្យដឹងថា បច្ចុប្បន្នក្រុងប៉ោយប៉ែតមានការរីកចម្រើនយ៉ាងលឿនលើវិស័យក្រៅពីកាស៊ីណូ ដោយវិស័យអចលនទ្រព្យបានកើនឡើងខ្ពស់ ដែលរហូតមកទល់ពេលនេះ បុរីលំនៅដ្ឋានចំនួន៨បានបញ្ចប់ការសាងសង់ និងបុរីជាច្រើនទៀតកំពុងសាងសង់។លោកបន្តថា ក្រៅពីបុរីលំនៅដ្ឋានក្រុងប៉ោយប៉ែត ក៏កំពុងមានការសាងសង់ខុនដូកំពស់កប់ពពក និងមជ្ឈមណ្ឌលពាណិជ្ជកម្មនិងផ្សារទំនើបផងដែរ។

លោក សាន ស៊ាងហូ អភិបាលក្រុងប៉ោយប៉ែត ខេត្តបន្ទាយមានជ័យបានមានប្រសាសន៍ឲ្យដឹងផងដែរថា ក្រុងប៉ោយប៉ែតកំពុងទាក់ទាញការចាប់អារម្មណ៍ច្រើនពីអ្នកវិនិយោគជាតិ និងអន្តរជាតិ ដោយបច្ចុប្បន្នចំនួនកាស៊ីណូថ្មីៗជាច្រើន បាននិងកំពុងសាងសង់ ដែលធ្វើឲ្យចំនួនកាស៊ីណូកើនឡើងកាន់តែច្រើននាពេលអនាគត។

លោកបន្តថា កំនើននៃការវិនិយោគ បានធ្វើឲ្យតម្លៃដីធ្លីមានកំនើនខ្ពស់ និងមានការរីកចម្រើនលើវិស័យអចលនទ្រព្យ ដែលបច្ចុប្បន្នក្រុងនេះមានអាគារកំពស់២០ជាន់ជាច្រើន និងនៅឆ្នាំ២០១៩ខាងមុខ ក្រុងនេះអាចមានការសាងសង់អាគារកំពស់២០ ទៅ៣០ជាន់កាន់តែច្រើន៕

អស្ចារ្យ! ចិនវិនិយោគប្រាក់ ១១,២ពាន់លានដុល្លារសង់ព្រលានយន្តហោះថ្មីដែលអាចទទួលអ្នកដំណើរ១០០លាននាក់

November 6, 2018

0

ដោយ វុត្ថា

ភ្នំពេញ៖ ដើម្បីពង្រីកមធ្យោយបាយដឹកជញ្ជូន ក៏ដូចជាការផ្លាស់ប្តូរពាណិជ្ជកម្មរដ្ឋាភិបាលចិនបាន និងកំពុងវិនិយោគទឹកប្រាក់១១,២ពាន់លានដុល្លារអាមេរិក ដើម្បីសាងសង់ព្រលានយន្តហោះថ្មីមួយ ដែលមានសមត្ថភាពអាចឲ្យអ្នកដំណើរឆ្លងកាត់ ១០០លាននាក់ក្នុងមួយឆ្នាំ។

បច្ចុប្បន្ននេះ ប្រទេសចិនកំពុងសម្រុកសាងសង់ ព្រលានយន្តហោះអន្តរជាតិថ្មីនេះ ដែលស្ថិតនៅជាប់ព្រុំប្រទល់ទីក្រុងប៉េកាំង និងទីក្រុង Langfang នៃខេត្ត Hebei។ ព្រលានយន្តអន្តរជាតិនេះ គឺជាព្រលានយន្តហោះធំលំដាប់ទី ២ បន្ទាប់ពីព្រលានយន្តហោះមួយទៀតស្ថិតនៅក្នុងទីក្រុងប៉េកាំង។

ព្រលានហោះនេះ ត្រូវបានគេប្រកាសសាងសង់ផ្លូវការ នៅក្នុងពាក់កណ្តាលឆ្នាំ ២០១៤ នេះ ហើយគ្រោងនឹងបញ្ចប់និងដាក់អោយប្រើប្រាស់ជាផ្លូវការ នៅក្នុងចុងឆ្នាំ ២០១៩ខាងមុខនេះ។ ព្រលានយន្តហោះនេះ សាងសង់នៅក្នុងទំហំដី ៧០០,០០០ ហិកតា នឹងក្លាយជាព្រលានយន្តហោះខ្នាតអន្តរជាតិ ដែលមានចំណតរហូត២៦០ ។

ម្យ៉ាងទៀត នៅពេលសាងសង់រួចរាល់ហើយនោះ ព្រលានយន្តហោះអន្តរជាតិនេះ នឹងក្លាយជាព្រលាន ដែលធំជាងគេបំផុតនៅលើពិភពលោក។ បន្ថែមពីនេះគេនឹងសាងសង់បន្ថែមនូវផ្លូវយន្តហោះ រត់អោយបាន៧ខ្សែរនាពេលខាងមុខទៀត ដើម្បីអាចផ្ទុកយន្តហោះចុះចតបានចំនួន៦២០,០០០ និងអ្នកធ្វើដំណើរចំនួន ១០០លាននាក់ក្នុងមួយឆ្នាំ។ គម្រោងថវិកាក្នុងការសាងសង់ព្រលានយន្តហោះនេះ គ្រោងចំណាយអស់ចំនួណ១១,២ ពាន់លានដុល្លារ រួមជាមួយនឹងការសាងសង់តភ្ជាប់ផ្លូវរថភ្លើង ចូលទៅក្នុងព្រលានផងដែរ៕

កម្ពុជាសាងប្រវត្តិសាស្ត្រថ្មីជាមួយសហព័ន្ធអារ៉ាប់រួម ដើម្បីពង្រីកឧត្តមភាពសេដ្ឋកិច្ច

November 6, 2018

0

ដោយ វុត្ថា

ភ្នំពេញ៖ ប្រទេសកម្ពុជាបាននិងកំពុងចាប់ផ្តើមកសាងប្រវត្តិសាស្ត្រថ្មីជាមួយសហព័ន្ឋអារ៉ាប់រួម ដើម្បីជំរុញការផ្លាស់ប្តូរពាណិជ្ជកម្ម និងការវិនិយោគជាមួយប្រទេសនៅមជ្ឈឹមបូព៌ាមួយនេះ ដើម្បីពង្រីកកាលានុវត្តន៍ភាពរបស់ខ្លួន។

សមាជិករាជវង្ស ឌូបៃ នៃសហព័ន្ធអារ៉ាប់រួម ព្រះអង្គម្ចាស់ Amed Dalmook Al Maktoum ក្នុងជំនួបជាមួយសម្តេចតេជោហ៊ុន សែននាព្រឹកថ្ងៃទី៦ វិច្ឆិកានេះបានឲ្យដឹងថា សហព័ន្ឋអារ៉ាប់រួមមានបំណងចូលរួមអភិវឌ្ឍន៍កម្ពុជា ឲ្យមានការរីកចម្រើនថែមទៀត និងគ្រោងវិនិយោគលើប្រព័ន្ធប្រេង ឧស្ម័ន ពាណិជ្ជកម្ម និងហិរញ្ញវត្ថុនៅកម្ពុជា។ព្រះអង្គបានបន្តថា សហព័ន្ឋអារ៉ាប់រួមនឹងផ្តល់ជូនឥណទានកម្ចី (Credit line) ចំនួន៥០០លានដុល្លារអាមេរិក សម្រាប់ប្រើប្រាស់ក្នុងការនាំទំនិញចូលពីសហព័ន្ធ អារ៉ាប់រួម ហើយនឹងសិក្សាលទ្ធផលផ្សេងៗទៀត ដើម្បីធ្វើការវិនិយោគនៅក្នុងព្រះរាជាណាចក្រកម្ពុជា។

ជាមួយគ្នានេះព្រះអង្គម្ចាស់ Amed Dalmook Al Maktoumក៏បានអញ្ជើញសម្តេចតេជោហ៊ុន សែនទៅបំពេញទស្សនកិច្ចនៅសហព័ន្ឋអារ៉ាប់រួម ដើម្បីពង្រីកទំនាក់ទំនងរវាងប្រទេសទាំងពីរឲ្យកាន់តែរ៉ឹងមាំថែមទៀត។

សម្ដេចតេជោ នាយករដ្ឋមន្ត្រី បានថ្លែងអំណរគុណព្រះអង្គម្ចាស់ និងប្រជាជន ក៏ដូចជា សហព័ន្ធអារ៉ាប់រួម ដែលបានជួយដល់ព្រះរាជាណាចក្រកម្ពុជា ជាពិសេសសម្រាប់អភិវឌ្ឍធនធានមនុស្សផង ការកសាងមជ្ឈមណ្ឌលកុមារកំព្រា និងជួយដល់កុមារកំព្រាផង។ ពាក់ព័ន្ធនឹងការវិនិយោគលើវិស័យឧស្ម័ន សម្តេចតេជោ នាយករដ្ឋមន្ត្រី បានស្វាគមន៍ និងមានប្រសាសន៍ផងដែរថា ក្នុងករណីដែលបាន វិនិយោគក្នុងវិស័យឧស្ម័ននេះ គឺជួយកាត់បន្ថយក្នុងការកាប់ឈើធ្វើអុសដុតផង ហើយក៏ជួយក្នុងការ គ្រប់គ្រងធនធានធម្មជាតិផងដែរ ។

សម្ដេចក៏ថ្លែងអំណរគុណចំពោះព្រះអម្ចាស់ផងដែរ ចំពោះការផ្ដល់ឥណទានកម្ចី (Credit line) ចំនួន៥០០លានដុល្លារ សម្រាប់នាំទំនិញចូលពីសហព័ន្ធអារ៉ាប់រួម ហើយក៏បានថ្លែងអំណរគុណផងដែរ ចំពោះការអញ្ជើញសម្ដេចទៅទស្សនកិច្ចនៅអារ៉ាប់រួម ដោយសម្ដេចបញ្ជាក់ថា នឹងពិនិត្យមើលពេលវេលាដ៏សមស្របមួយ នឹងទៅធ្វើទស្សនកិច្ចនៅទីនោះ។

ពាក់ព័ន្ធឥណទាន (Credit line) 500 លានដុល្លារនោះ សម្ដេចតេជោបានណែនាំឲ្យពិភាក្សាជាមួយស្ថាប័នពាក់ព័ន្ធផ្សេងៗទៀត ដើម្បីរកចំណុចណាមួយក្នុងការចាប់ផ្ដើមប្រើប្រាស់ថវិកានេះ៕

ដើមខែវិច្ឆិកា៖ CDC អនុម័តគំរោងវិនិយោគចំនួន៦ ដែលមានតម្លៃទឹកប្រាក់ ១៧៣លានដុល្លារ

November 6, 2018

0

ដោយ គង់ សូរិយា

ភ្នំពេញ៖ ក្រុមប្រឹក្សាអភិវឌ្ឍន៍កម្ពុជាហៅកាត់ CDC បានអនុម័តយល់ព្រមចុះបញ្ជីរវិនិយោគក្រុមហ៊ុនផ្នែកឧស្សាហកម្ម និងសណ្ឋាគារចំនួន៦ ដែលមានទុនវិនិយោគជាង ១៧៣លានដុល្លាអាមេរិក។

យោងតាមសេចក្តីប្រកាសព័ត៌មានរបស់ CDC ដែល Propertyarea.asia ទើបទទួលបាននារសៀលថ្ងៃទី៦ វិច្ឆិកានេះឲ្យដឹងថា នៅក្នុងវិច្ឆកា ឆ្នាំ២០១៨នេះ គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនប័ត្រចុះបញ្ជីជាស្ថាពរជូនដល់ក្រុមហ៊ុនចំនួន៦ ដែលក្រុមហ៊ុនទាំងនោះមានគម្រោងវិនិយោគលើផ្នែកឧស្សាហកម្ម និងសណ្ឋាការ ដែលជាផ្នែកមួយក្នុងការចូលរួមចំណែកក្នុងការអភិវឌ្ឍន៍ លើផ្នែកសេដ្ឋកិច្ចកម្ពុជាបន្ថែម។

ក្រុមហ៊ុនទាំង៦នោះ មានដូចជា ទី១ ក្រុមហ៊ុន LING XIU INT’L គ្រោងសាងសង់ និងបង្កើតអាជីវកម្មសណ្ឋាគារថ្នាក់ផ្កាយ៥ ចំនួន៤១០បន្ទប់ ដែលមានទីតាំងវិនិយោគស្ថិតនៅភូមិ៦សង្កាត់លេខ៤ ក្រុងព្រះសីហនុ ខេត្តព្រះសីហនុ មានទុនវិនិយោគសរុបមាណជិត៦៩លានដុល្លារអាមេរិក។ ក្រោយពីការសាងសង់រួច សណ្ឋាគារមួយត្រូវការកំលាំងពលកម្មប្រមាណ១៣៣កន្លែង ជាពិសេសបានចូលរួមចំណែកដ៏សំខាន់ ក្នុងការបម្រើសេវាដល់វិស័យទេសចរ។

ទី២ ក្រុមហ៊ុន NORO MALL ដែលកំពុងវិនិយោគផ្សារទំនើប Noro Mall មានទីតាំងស្ថិត សង្កាត់បឹងកេងកងទី១ ខណ្ឌចំការមនរាជធានីភ្នំពេញ ក្នុងទឹកប្រាក់ចំនួន៩,២លានដុល្លារអាមេរិក។ ទី៣ ក្រុមហ៊ុន CATH PHARMA គ្រោងវិនិយោគបង្កើតរោងចក្រផលិតថ្នាំពេទ្យ ដែលមានទីតាំងវិនិយោគស្ថិតនៅភូមិទីទុយ សង្កាត់ព្រៃស ខណ្ឌដង្កោ រាជធានីភ្នំពេញ ដែលមានទុនវិនិយោគចំនួន ៦,៣ លានដុល្លារអាមេរិកផងដែរ។

ទី៤ ក្រុមហ៊ុន CHNEITEC RENEWABLE មានគម្រោងសាងសង់ស្ថានីយ៍ ផលិតថាមពលអគ្គិសនី ដើរដោយថាមពលពន្លឺព្រះអាទិត្យ ដែលមានកម្លាំ ៦០មេហ្គាវ៉ាត់ គ្រោងវិនិយោគក្នុងទំហំទឹកប្រាក់ប្រមាណជាង៥៨ លានដុល្លារអាមេរិក ដែលមានទីតាំងវិនិយោគស្ថិតនៅឃុំដំណាក់រាំង ស្រុកឧដុង្គ ខេត្តកំពង់ស្ពឺ។ ទី៥ ក្រុមហ៊ុន HERSHEY PLASTIC INDUSTRIAL (CAMBODIA) គម្រោងបង្កើតរោងចក្រផលិតទុយោ និងផលិតផលប្លាស្ទិកគ្រប់ប្រភេទ គ្រោងវិនិយោគទុនប្រមាណជាង២៦លានដុល្លារអាមេរិក ដែលមានទីតាំងវិនិយោគស្ថិតនៅឃុំត្រពាំងគង ស្រុកសំរោងទង ខេត្តកំពង់ស្ពឺ ។

និងទី៦ក្រុមហ៊ុន SAIER (CAMBODIA) GARMENT ដែលមានគម្រោងបង្កើតរោងចក្រកាត់ដេរសម្លៀកបំពាក់វិញ គ្រោងវិនិយោគទុនប្រមាណជាង ៤លានដុល្លារអាមេរិក ដែលមានទីតាំងវិនិយោគស្ថិតនៅភូមិព្រៃសណ្តែក សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។

ក្រុមហ៊ុនទាំងនេះក្រោយពីការសាងសង់ និងដាក់ឲ្យដំណ់ការជាផ្លូវការនោះ ក្រុមហ៊ុនទាំងនេះ ត្រូវការកំលាំងពលកម្មចូលរួមក្នុងវិស័យការងារជិត២ពាន់កន្លែងផងដែរ៕

មហាយក្សចិនដាក់ចេញយុទ្ឋសាស្រ្តថ្មីក្នុងការផ្លាស់ប្តូរពាណិជ្ជកម្មជាមួយ បណ្តាប្រទេសនានា

November 6, 2018

0

ដោយ : វុត្ថា
ភ្នំពេញៈ ក្នុងគោលដៅសម្រួលពាណិជ្ជកម្ម និងកាត់បន្ថយផលប៉ះពាល់ពីសង្រ្គាមពាណិជ្ជកម្មជាមួយអាមេរិក មេដឹកនាំកំពូលរបស់ប្រទេសចិនបានសន្យាថា នឹងខិតខំកាត់បន្ថយអត្រាពន្ធគយថែមទៀត សម្រាប់ប្រទេសដែលជាគូទាំងអស់ ដើម្បីសម្រួលការធ្វើពាណិជ្ជកម្មឱ្យមានលក្ខណៈកាន់តែល្អប្រសើរ។

តាមការព្យាករណ៍ ក្នុងរយៈពេល១៥ឆ្នាំខាងមុខ ការនាំចូលផលិតផលពីប្រទេសដៃគូ នឹងកើនឡើងរហូតដល់៣០ទ្រីលានដុល្លារអាមេរិក ហើយសេវាកម្មក៏នឹងមានការកើនឡើងដល់១០ទ្រីលានដុល្លារអាមេរិក។
ប្រធានាធិបតីចិន លោក ស៊ី ជីនពីង បានថ្លែងនៅក្នុងពិធីសម្ពោធពិព័រណ៍អន្តរជាតិនាំចូលចិន (China’s International Import Expo) ដែលមានការចូលរួមពីនាយកដ្ឋមន្រ្តី ឧបនាយករដ្ឋមន្រ្តី និងរដ្ឋមន្រ្តីនៃបណ្តាប្រទេសនានានៅក្នុងតំបន់ និងពិភពលោកកាលពីទី៥ ខែវិច្ឆិកា ម្សិលមិញនេះបានអះអាងបន្ថែមទៀតថា គោលជំហររបស់ប្រទេសចិន គឺបន្តការពារនូវបទប្បញ្ញតិ អង្គការពាណិជ្ជកម្មពិភពលោក (WTO) និងគាំទ្ររាល់កំណែទម្រង់របស់អង្គការមួយនេះ ដើម្បីរួមគ្នាការពារប្រព័ន្ធពាណិជ្ជកម្មពហុភាគី ជាពិសេសការធ្វើពាណិជ្ជកម្មប្រកបដោយស្មើភាព និងតម្លាភាព។
លោកបន្តថា «ប្រទេសចិន ជាមហាអំណាចសេដ្ឋកិច្ចទី២លើពិភពលោក និងជាទីផ្សារដ៏ធំ ដែលមានសក្តានុពលអតិថិជន១,៣០០លាននាក់ ដូច្នេះចិននឹងពង្រឹងគោលនយោបាយបើកចំហរ ហើយបន្តរៀបចំពិព៌ណនាំចូលអន្តរជាតិចិននេះ ឱ្យកាន់តែធំឡើងៗរៀងរាល់ឆ្នាំ»។

ព្រឹត្តិការណ៍ពិព័រណ៍នាំចូលអន្តរជាតិចិនឆ្នាំនេះ បានរៀបចំនៅលើផ្ទៃក្រឡា៣០ម៉ឺនម៉ែត្រការ៉េ ដែលមានការចូលរួមពីប្រទេស និងអង្គការអន្តរជាតិសរុប ចំនួន ១៧២ នៅក្នុងនោះមានក្រុមហ៊ុន សហគ្រាសចំនួន៣,៦០០ក្រុមហ៊ុន ដែលមានអ្នកបញ្ជាទិញធំៗក្នុងពិភពលោកជាង៤០ម៉ឺននាក់។
សម្រាប់ប្រទេសកម្ពុជា ក៏មានការចូលរួមពីតំណាងក្រុមហ៊ុនចំនួន១០ និងមានការរៀបចំពន្លាជាតិតាមរចនាបទខ្មែរទំហំ១៣៦ម៉ែត្រការ៉េ ដើម្បីផ្សព្វផ្សាយពីសក្តានុពលវិនិយោគ ពាណិជ្ជកម្ម ទេសចរណ៍ និងវប្បធម៌ជាតិផងដែរ៕

តោះមកឈ្វេងយល់សេចក្តីព្រាងច្បាប់ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ២០១៩

November 6, 2018

0

ដោយ វុត្ថា

ភ្នំពេញ៖ រដ្ឋសភានៃព្រះរាជាណាចក្រកម្ពុជាកំពុងពិនិត្យ និងសិក្សាលើសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៩ ឲ្យបានហ្មត់ចត់ គ្រប់ជ្រុងជ្រោយ និងស៊ីជម្រៅ ជាពិសេសធ្វើឲ្យប្រាកដថាការវិភាជន៌ថវិកា ពិតជាឆ្លើយតបទៅនឹងវិស័យជាអាទិភាពរបស់ជាតិ ដែលជាចលករនៃកំណើនសេដ្ឋកិច្ចរបស់កម្ពុជា បន្ទាប់ពីទទួលបានពីរដ្ឋាភិបាល មុននឹងដាក់ជូនរដ្ឋសភាពិភាក្សានិងអនុម័តនាពេលខាងមុខនេះ។

លោកជាម យៀប ប្រធានគណៈកម្មការសេដ្ឋកិច្ចហិរញ្ញវត្ថុក៏បានឲ្យដឹងថា ថវិកាឆ្នាំ២០១៩ នឹងដើរតួនាទីជាឧបករណ៍គោលនយោបាយដ៏មានសារៈសំខាន់ ដើម្បីអនុញ្ញាតឲ្យរាជរដ្ឋាភិបាលអនុវត្តនូវ “ផែនការយុទ្ធសាស្ត្រ អភិវឌ្ឍន៍ជាតិឆ្នាំ២០១៩-២០២៣” និង “យុទ្ធសាស្ត្រចតុកោណដំណាក់កាលទី៤” ដើម្បីបន្តរក្សាស្ថិរភាពនយោបាយ បន្តពង្រឹងនិងពង្រីកការអនុវត្តលទ្ធិប្រជាធិបតេយ្យ បន្តរក្សាបាននូវស្ថិរភាព ម៉ាក្រូសេដ្ឋកិច្ច និងធានាបាន នូវប្រសិទ្ធិភាពខ្ពស់ក្នុងការគ្រប់គ្រងហិរញ្ញវត្ថុសាធារណៈ និងឈានទៅសម្រេចឲ្យបាននូវគោលនយោបាយគ្រឹះ គឺការធានាឲ្យបាននូវកំណើនសេដ្ឋកិច្ច ប្រកបដោយចីរភាពក្នុងរយៈពេលវែង មានអត្រាខ្ពស់ប្រមាណ៧%ក្នុងមួយឆ្នាំ នៅលើមូលដ្ឋានទូលាយ និងមានសមត្ថភាពប្រកួតប្រជែងជាងមុន។

តួអង្គសំខាន់មួយរូបទៀត ដែលជាសេនាធិការរបស់រដ្ឋាភិបាល លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានគូសបញ្ជាក់ថា ការកសាងសេចក្តីព្រាងច្បាប់ហរិញ្ញវត្ថុសម្រាប់ការគ្រប់គ្រង ឆ្នាំ២០១៩នេះឡើង ដើម្បីឆ្លើយតបទៅនឹងសេចក្តីទុកចិត្តដ៏ច្រើន លើសលប់របស់ប្រជាពលរដ្ឋ មកលើការដឹកនាំរបស់រាជរដ្ឋាភិបាល មកពីគណបក្សប្រជាជនកម្ពុជា តាមរយៈលទ្ធផលការបោះឆ្នោតជ្រើសតាំងតំណាងរាស្ត្រនីតិកាលទី៦ កាលពីខែកក្កដា ឆ្នាំ២០១៨នេះ។

លោករដ្ឋមន្ត្រីបានបញ្ជាក់ថាសេចក្តីព្រាងច្បាប់នេះ មានគោលដៅគាំទ្រ ដល់ការអនុវត្តកម្មវិធីនយោបាយរបស់រាជរដ្ឋាភិបាល ជាពិសេសការអនុវត្តអាទិភាពគោលនយោបាយសំខាន់ៗ និងវិធានការកែទម្រង់ជាក់ស្តែងនានា ដែលនឹងត្រូវផ្តើមអនុវត្តនៅក្នុងឆ្នាំ២០១៩ ដែលជាឆ្នាំទី១នៃរាជរដ្ឋាភិបាលអាណត្តិទី៦ ឱ្យសម្រេចបាននូវលទ្ធផលផ្លែផ្កាជាអតិបរមាជូនប្រទេសជាតិ និងប្រជាពលរដ្ឋ។

សម្តេចអគ្គមហាពញ្ញាចក្រហេង សំរិន ប្រធានរដ្ឋសភា បានលើកឡើងដែរថា ថវិកាជាតិឆ្នាំ២០១៩ ត្រូវបានគិតគូរដោះស្រាយ និងត្រូវបានវិភាជន៌សម្រាប់វិស័យអាទិភាព នៃគោលនយោបាយជាតិសំខាន់ៗជាសារវ័ន្ត។ “យើងចាត់ទុកថា ថវិកាជាតិឆ្នាំ២០១៩ នេះ ជាឧបករណ៍នៃគោលនយោបាយ របស់រាជរដ្ឋាភិបាលប្រកបដោយប្រសិទ្ធភាព និងស័ក្តសិទ្ធភាព ក្នុងការថែរក្សាការពារ និងពង្រឹងថែមទៀតនូវសមិទ្ធផលដ៏ធំធេងដែលកម្ពុជាសម្រេចបានកន្លងមក ក៏ដូចជាបន្តចាក់គ្រឹះរឹងមាំ សម្រាប់បម្រើឲ្យការអភិវឌ្ឍរបស់កម្ពុជាតទៅមុខទៀត។

សម្តេចក៏បានសាទរចំពោះសមិទ្ធផល ដែលរាជរដ្ឋាភិបាលកម្ពុជា សម្រេចបានដោយជោគជ័យ ក្នុងការអនុវត្តយុទ្ធសាស្ត្រចតុកោណដំណាក់កាលទី៣ នៅក្នុងនីតិកាលទី៥ នៃរដ្ឋសភាកន្លងមក ដោយរក្សាបាននូវសុខសន្តិភាពស្ថេរភាពនយោបាយ និងការឯកភាពជាតិ សម្រេចបាននូវសូចនាករសង្គមសំខាន់ៗ ដូចជា វិស័យអប់រំ សុខាភិបាល សម្រេចបានលទ្ធផលល្អ ក្នុងការគ្រប់គ្រងហិរញ្ញវត្ថុសាធារណៈ សេដ្ឋកិច្ចមានកំណើនខ្ពស់ជាមធ្យមក្នុងរង្វង់៧ភាគរយ ភាពក្រីក្ររបស់ប្រជាពលរដ្ឋត្រូវបានកាត់បន្ថយមកនៅត្រឹមក្រោម១០ភាគរយ ដែលជាមធ្យមជាង១ភាគរយក្នុងមួយឆ្នាំ ជាពិសេសបានកសាង និងប្រែក្លាយប្រទេសកម្ពុជា ពីប្រទេសក្រីក្រមានចំណូលទាប ទៅជាប្រទេសមានចំណូលមធ្យមកម្រិតទាប និងឈានទៅកា្លយជាប្រទេសមានចំណូលមធ្យម កម្រិតខ្ពស់នៅឆ្នាំ២០៣០ខាងមុខ៕