ដោយវុត្ថា

ភ្នំពេញ៖ សារព័ត៌មាន South China Morning Post បានចុះផ្សាយថា ទីផ្សារលំនៅដ្ឋាននៅក្នុងទីក្រុងធំលំដាប់ទី២របស់ចិន គឺទីក្រុងហុងកុងនឹងបន្តឡើងថ្លៃ ក្នុងរយៈពេលជាងមួយទសវត្សទៀត ខណៈបច្ចុប្បន្នទីក្រុងមួយនេះ កំពុងមានវិបត្តិលំនៅដ្ឋានស្រាប់ផងនោះ។

លោកស្រី Carol Wu ប្រធានស្រាវជ្រាវទីផ្សារស្រាវជ្រាវ អចនលទ្រព្យរបស់ធនា​គារ DBS ប្រចាំនៅក្នុងទីក្រុងហុងកុង បានប្រាប់សារព័ត៌មាន South China Morning Postកាលពីសប្តាហ៍មុនថា តម្លៃទីផ្សារលំនៅដ្ឋានក្នុងទីក្រុងហុងកុង នឹងកើនឡើង២ភាគរយនៅក្នុងឆ្នាំ២០៣០ខាងមុខនេះ។

លោកស្រីនិយាយថា“ ការទស្សទាយរបស់យើងគឺថា ទីផ្សារអលនទ្រព្យលំនៅដ្ឋានបានកើនឡើងប្រហែល៥ ទៅ១០ភាគរយក្នុងឆ្នាំនេះ “។លោកស្រីបន្ថែមថា “ភាពយឺតយ៉ាវនៃការទប់ស្កាត់របស់អជ្ញាធរក្រុងហុងកុង បានធ្វើអោយតម្លៃអចលនទ្រព្យកើនឡើង ៣ដងក្នុងទីក្រុងនានា ដូចជា នៅក្នុងទីក្រុង Changsha ទីក្រុង Wuhan និងទីក្រុង Guangzhou ដែលជាតីក្រុងដែលមានសក្តានុពលខ្ពស់”។

តាមការសិក្សាស្រាវជ្រាវកន្លងមកបង្ហាញថា ទីក្រុង Changsha ទីក្រុង Wuhanនិង​ទីក្រុង Guangzhou នឹងមានសក្តានុពលចំពោះការកើនឡើង តម្លៃអចលនទ្រព្យថែមមួយកម្រិតទៀត ខណៈទីផ្សារអចលនទ្រព្យលំនៅដ្ឋាន នៅក្នុងទីក្រុងមួយចំនួន ដូចជា ទីក្រុង ហុងកុង ទីក្រុង សឹង្ហបុរី ទីក្រុង ប៉េកាំង និងទីក្រុង ស៊ាងហៃ មានការធ្លាក់ចុះបន្តិច។

ការសិក្សាស្រាវជ្រាវនេះ គឺផ្តោតទៅលើការប្រើប្រាស់ប្រភពតម្លៃអចលនទ្រព្យធៀបនឹងប្រាក់ចំណូលប្រចាំឆ្នាំ (GDP) របស់មនុស្សម្នាក់ៗ ដែលប៉ាន់ស្មានបានថាអតិផរណានឹងធ្លាក់ដល់សូន្យ។

តម្លៃលំនៅដ្ឋានក្នុងទីក្រុង Wuhan ធៀបនឹង GDP ក្នុងមនុស្សម្នាក់ បានបានកើនឡើប្រហេល១០ភាគរយក្នុងឆ្នាំ២០១៧ ប៉ុន្តែសម្រាប់ទីក្រុងហុងកុងវិញ បានកើនឡើងរហូតដល់៣៦ភាគរយ។

យោងតាមរបស់ការណ៍DBSបន្តថា ទីក្រុងចិនចំនួន៨ ត្រូវបានគេទស្សន៍ទាយថា អាចនឹងវ៉ាដាច់ទីក្រុងហុងកុង និងទីក្រុងសឹង្ហបុរី បើនិយាយពីGDP សម្រាប់មនុស្សម្នាក់ក្នុងឆ្នាំ ២០៣០ ខាងនេះ។

ទ្រព្យសម្បត្តិរបស់ទីក្រុង Shenzhen នឹងអាចប្រកួតប្រជែងជាមួយទីក្រុងសឹង្ហបុរិបាននាពេលបច្ចុប្បន្ន។ ចំណែកទ្រព្យសម្បត្តិរបស់ទីក្រុង Hangzhou វិញមានភាពប្រកៀកប្រកើយទៅនឹងទ្រព្យសម្បត្តិរបស់ទីក្រុងហុងកុង៕

ដោយដែន ចែងចាំង

       ភ្នំពេញ៖ ការបោះឆ្នោតបានបញ្ចប់ហើយ ជាពេលវេលាសមស្របសម្រាប់ការវិនិ​យោគឬបង្កើនការវិនិយោគលើដីធ្លី ហេតុនេះតើគួរវិនិយោគដីធ្លីយ៉ាងដូចម្តេចដើម្បីទទួលបានផលចំណេញ និងបញ្ចៀសហានិភ័យបាន។

គេហទំព័រដែលឈានមុខគេ ក្នុងផ្នែកអចលនទ្រព្យPropertyarea.asia បានជួបជាមួយអ្នកជំនាញ ដើម្បីផ្តល់ចំណេះដឹងខ្លះៗទាក់ទងនឹងបញ្ហានេះ។

អគ្គនាយកក្រុមហ៊ុនCentury21 Mekongលោកច្រឹក សុខនីមបានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី៣ សីហានេះថា ការបោះឆ្នោតបានបញ្ចប់ដោយរលូន ហេតុនេះសម្រាប់អ្នកស្ទាក់ស្ទើរមុនការបោះឆ្នោត គួរចាប់ផ្តើមវិនិយោគឡើងវិញដោយត្រូវសម្លឹងមើលកត្តាសំខាន់ៗមួយចំនួន ដូចជា ទី១ ត្រូវក្តាប់ព៌តមានឲ្យបានគ្រប់ជ្រុងជ្រោ​យពីតំបន់អភិវឌ្ឍន៍ និងគំរោងអភិវឌ្ឍន៍របស់រដ្ឋាភិបាល ទី២ ស្វែងរកអចលនទ្រព្យដែល​ម្ចាស់លក់បន្ទាន់ ដែលជាអចលនទ្រព្យមានតម្លៃក្រោមទីផ្សារ ដែលធ្វើឲ្យការវិនិយោគ​របស់យើងងាយរកផលចំណេញបាន ទី៣ ត្រូវកសាងបណ្តាញទីផ្សារឲ្យបាច្រើន ដើម្បីអចលនទ្រព្យដែលយើងទិញបានហើយលក់ឆាប់ដាច់។

ទី៤ បើអ្នកទិញឬអ្នកលក់មានបញ្ហាហិរញ្ញវត្ថុ គួរស្វែងរកអ្នកជំនាញក្នុងវិស័យនេះ ព្រោះពួកគេអាចជួយស្វែងរកប្រភពទុនជូនបាន។

តើគួរទិញដីធ្លីនៅតំបន់ណា ងាយទទួលបានចំណេញនិងលក់ចេញបានលឿនលោកច្រឹក សុខនីមបានផ្តល់ជាយោបល់ថា ដីនៅតំបន់ភ្នំពេញថ្មី តំបន់ក្រាំងធ្នង់ និងដីនៅតាមតំបន់ផ្សេងៗក្នុងខ័ណ្ឌសែនសុខ ជាតំបន់មានការអភិវឌ្ឈលឿន និងមានការចាប់អារម្មណ៍ច្រើនពីអតិថិជន៕

ដោយគង់ សូរិយា

       ភ្នំពេញ៖ បន្ទាប់ពីរដ្ឋាភិបាលប្រកាសពង្រីកផ្លូវជាតិលេខ៣ តម្លៃដីធ្លីនៅតាមបណ្តោ​យផ្លូវនេះបានកើនឡើងយ៉ាងខ្លាំង ក្នុងប៉ុន្មានខែចុងក្រោយនេះ ដែលធ្វើឲ្យអ្នកវិនិយោគ​មួយចំនួនមានការរារែកក្នុងការវិនិយោគនៅតំបន់នេះ។

តាមរយៈការចុះសាកសួរព៌តមានដីធ្លី ពីក្រុមការងារPropertyarea.asiaកាលពីពេលថ្មីៗនេះបានរកឃើញថា តម្លៃដីធ្លីនៅតាមបណ្តោផ្លូវនេះ បានកើនឡើងចន្លោះ៣០ទៅ៤០ភាគរយ ដោយដីនៅចន្លោះគីឡូម៉ែត្រលេខ២០ទៅ៣០ គិតពីរង្វង់មូលចោមចៅពីមុនមានតម្លៃចន្លោះ១០ទៅ២០ដុល្លារ បានកើនដល់៣០ទៅ៣៥ដុល្លារក្នុងមួយម៉ែត្រការ៉េ ខណៈឈ្នួញទិញដីពុះឡូត៍លក់ បានងាកទៅតំបន់នេះកាន់តែច្រើន។ សកម្មភាពពុះដីឡួត៍លក់បានធ្វើឲ្យតម្លៃដីធ្លីកើនឡើងខ្ពស់ ខណៈតំបន់ពុះដីឡូ៍លក់ ជាតំបន់គ្មានការអភិវឌ្ឈ​ច្រើននោះទេ។

លោកសាត ប៊ុនធីមប្រជាពលរដ្ឋរស់នៅតាមបណ្តោយផ្លូវនេះ ស្ថិតក្នុងស្រុកគងពិធី ខេត្តកំពង់ស្ពឺបានលើកឡើងថា ដីនៅតាមតំបន់នេះពិតជាឡើងថ្លៃខ្ពស់ ដោយដីមុន​មួយម៉ែត្រការ៉េត្រឹម៥ដុល្លារ ឥឡូវម្ចាស់ដីបានទារដល់២០ទៅ៣០ដុល្លារអាមេរិកក្នុងមួយ​ម៉ែត្រការ៉េ ហើយសកម្មភាពទិញលក់មានការកើនឡើងខ្លាំងពីអ្នកវិនិយោគនានា។

លោកបន្តថា “ដីនៅតំបន់នេះពិបាកលូកណាស់ឥលូវ ព្រោះវាឡើងថ្លៃលឿនមែនទែន ធៀបនឹងប៉ុន្មានឆ្នាំមុន ដែលដីមិនសូវមានសកម្មភាពអភិវឌ្ឍន៍អ្វីនោះឡើយ”។

ការកើនឡើងតម្លៃដីធ្លី ដោយសារកត្តាមួយចំនួន ដូចជា កត្តាប្រជាសាស្រ្ត ការរីក​ចម្រើនសេដ្ឋកិច្ចនៅមូលដ្ឋាន កត្តាសុខសន្តិភាព និងកំនើនសេដ្ឋកិច្ច ពិសេសការអភិវឌ្ឈ​ហេដ្ឋារចនាសម្ព័ន្ឋរបស់រដ្ឋាភិបាល។

រដ្ឋាភិបាលតាមរយៈក្រសួងសាធារណៈការ និងដឹកជញ្ជូននឹងពង្រីកផ្លូវជាតិលេខ៣ ពីរាជធានីភ្នំពេញដល់ចំណុចថ្នល់បំបែកបាយគូស ជាបួនគន្លងសម្រាប់រថយន្តនិងមាន​សួនច្បារកណ្តាល ដូចគ្នានឹងផ្លូវជាតិលេខ៦អាផងដែរ។

អគ្គនាយកក្រុមហ៊ុន Century21 Mekong លោកច្រឹក សុខនីមបានថ្លែងថា តាមធម្មតានៅពេលមានការអភិវឌ្ឍហេដ្ឋារចនាសម្ព័​ន្ឋរបស់រដ្ឋាភិបាល នឹងធ្វើឲ្យមានសកម្ម​ភាពទិញលក់ដីធ្លី និងសកម្មភាពពាណិជ្ជកម្មកើនឡើងនៅតំបន់នោះ ពិសេសតម្លៃដីធ្លីនឹ​ង​កើនឡើងជាស្វ័យប្រវត្តិ ប៉ុន្តែតម្លៃដីកើនឡើងលឿនឬយឺតអាស្រ័យលើតំបន់និមួយៗផងផងដែរ ពិសេសតំបន់ដែលមានសកម្មភាពសេដ្ឋកិច្ច តម្លៃដីធ្លីនឹងកើនឡើងខ្លាំង ប៉ុន្តែតំបន់ដែលគ្មានសកម្មភាពសេដ្ឋកិច្ច ឬមនុស្សរស់នៅច្រើនតម្លៃដីធ្លីក៏មិនកើនឡើងនោះទេ។

លោកបន្តថា “ការអភិវឌ្ឍហេដ្ឋារចនាសម្ព័ន្ឋជាផ្នែកមួយ ជួយឲ្យតម្លៃដីធ្លីកើនឡើង ខណៈកត្តាសំខាន់ៗដទៃទៀត ក៏ជួយជម្រុញតម្លៃដីធ្លីឲ្យមានកំនើនផងដែរ ដូចជាកត្តាប្រ​ជាសាស្រ្ត សកម្មភាពពាណិជ្ជកម្មនិងការវិនិយោគជាដើម”៕

ដោយដែន ចែងចាំង

       ភ្នំពេញ៖ ស្ពានមិត្តភាពកម្ពុជា ជប៉ុនជ្រោយចង្វារបាននិងកំពុងជួសជុលនិងសាងសង់ឡើងវិញលឿនជាងផែនការ ដែលនឹងបញ្ចប់នៅមុនពិធីបុណ្យចូលឆ្នាំប្រពៃណីជាតិខ្មែរខាងមុខនេះ។

លោកឈឹម ផល្លា ប្រធាននាយកដ្ឋានផ្លូវថ្នល់ នៃក្រសួងសាធារណៈការ និងដឹកជញ្ជូន ទទួលបន្ទុកគំរោងជប៉ុនបានមានប្រសាសន៍ឲ្យដឹង តាមទូរស័ព្ទនាព្រឹកថ្ងៃទី៣ សី​ហានេះថា រហូតមកទល់ពេលនេះការជួសជុល និងសាងសង់ស្ពាននេះឡើងវិញសម្រេ​ចបានជិត៤០ភាគរយហើយ។ ការស្ថាបនានិងជួសជុលឡើងវិញនេះ ធ្វើបានលឿនជាងផែនការគ្រោងទុក ដែលអាចនឹងបញ្ចប់នៅមុនចូលឆ្នាំខ្មែរ ប៉ុន្តែការដាក់ឲ្យដំណើរការមិនទាន់ប្រាកដនោះទេ ព្រោះក្រោយជួសជុលចប់អាចនឹងទុកមួយរយៈ មុនពេលដាក់ឲ្យដំនើរការ ដោយសារលក្ខខណ្ឌសុវត្ថិភាព។

លោកបន្តថា “ស្ពាននេះត្រូវសាងសង់ថ្មីនៅគល់ស្ពានទាំងសងខាង ប៉ុន្តែចំណុចកណ្តាលស្ពាននៅមានភាពល្អ និងជាប់មាំ ហេតុនេះក្រុមការងារជប៉ុនមិនសាងសង់ឡើង​វិញទេ គ្រាន់តែជួសជុលឡើងវិញតាមលក្ខខ័ណ្ឌបច្ចេកទេសពិសេសមួយ”។លោកបន្តថា “ការសាងសង់ស្ពានឡើងវិញនេះ ជាជំនួយឥតសំណងរបស់រដ្ឋាភិបាលជប៉ុន ដែលចំណា​យទឹកប្រាក់៣០លានដុល្លារអាមេរិក”។

ស្ពានជ្រោយចង្វារ ត្រូវបានដាក់ឲ្យដំណើរការលើកដំបូងនៅឆ្នាំ១៩៦២ និងត្រូវកាត់ផ្តាច់ដោយគ្រាប់បែកក្នុងកំឡុងឆ្នាំ១៩៧២។ ស្ពាននេះត្រូវបានជួសជុលឡើងវិញនៅ​ឆ្នាំ១៩៩១ និងដាក់ឲ្យប្រើប្រាស់ជាថ្មីនៅឆ្នាំ១៩៩៣៕

ដោយគង់ សូរិយា

       ភ្នំពេញ៖ ការបោះឆ្នោតបានបញ្ចប់ជាមួយនឹងសន្តិភាព ស្ថិរភាពនយោបាយ ដែលបានធ្វើឲ្យអាជីវកម្មទូទៅក្នុងវិស័យនានា ពិសេសវិស័យអចលនទ្រព្យបន្តរីកចម្រើននៅកម្ពុជា។

តើអ្នកនៅក្នុងវិស័យនេះយល់ឃើញយ៉ាងដូចម្តេច? ស្តាប់ស្រ្តីជើងខ្លាំងទាំងបីរូបក្នុងវិស័យអចលនទ្រព្យលើកឡើងពីដំណើរវិវត្តន៍ក្នុងវិស័យនេះ។

អ្នកនាង អាន សុធីតា នាយិកាប្រចាំប្រទេសនៃក្រុមហ៊ុន CBRE Cambodia បាន​ថ្លែងឲ្យដឹងកាលពីដើមសប្តាហ៍នេះថា មុននិងក្រោយការបោះឆ្នោត បរិយា​កាសវិនិយោគ និងសកម្មភាពទិញលក់ក្នុងវិស័យអចលនទ្រព្យ មិនរងផលប៉ះពាល់ទេ ហើ​យបញ្ហានយោ​បាយ មិនជះឥទ្ឋិពលដល់វិស័យនេះឡើយ ដោយសារអ្នកវិនិយោគមកវិនិ​យោគនៅកម្ពុជាភាគច្រើន ជាអ្នកវិនិយោគមកពីតំបន់អាស៊ី។

អ្នកនាងបន្តថា “ខ្ញុំគិតថាក្រោយការបោះឆ្នោតបញ្ចប់ អ្វីៗនឹងមានភាពល្អប្រសើរជា​ងមុន ខណៈទីផ្សារក្នុងក្រុងកំពុងទាញយកការផ្គត់ផ្គង់មកប្រើប្រាស់វិញ ហើយទីផ្សារអច​លទ្រព្យជាយក្រុងរីកចម្រើន ដោយសារការរីកចម្រើននៃវិស័យហេដ្ឋារចនាសម្ព័ន្ឋ”។

ជាមួយគ្នានេះ អ្នកនាង Grace Rachny Fong នាយិកានៃក្រុមហ៊ុន Century21 Cambodia បានលើកឡើងស្រដៀងគ្នាថា អ្វីៗនឹងល្អប្រសើរជាងមុន ដោយសារការបោះ​ឆ្នោតនេះបានបង្ហាញនូវសន្តិភាព សន្តិសុខ និងស្ថិរភាពនយោបាយ ដែលធ្វើឲ្យអ្នកវិនិយោគកាន់តែមានទំនុកចិត្ត។ អ្នកនាងបន្តថា ទាំងមុនការបោះឆ្នោត កំឡុងការបោះឆ្នោត និងក្រោយការបោះឆ្នោត យើងឃើញថាស្ថានភាពនៃការទិញលក់អចលនទ្រព្យ នៅតែកើនឡើង។

អ្នកនាងបន្តថា “សន្តិភាព ស្ថិរភាពនយោបាយនេះហើយ ជាអ្វីដែលពួកគេមើលឃើញ ជាអ្វីដែលអ្នកវិនិយោគកាន់តែមានទំនុកចិត្ត ហើយខ្ញុំគិតថាអ្នកវិនិយោគអន្តរជាតិ នឹងចូលមកវិនិយោគកាន់តែច្រើននៅកម្ពុជា”។

ស្របគ្នានេះដែរលោកស្រីតាំង ហួរអគ្គនាយិកាក្រុមហ៊ុន AMATAK Property Service បានមានប្រសាសន៍ឲ្យដឹងផងដែរថា មុននិងក្រោយការបោះឆ្នោត សកម្មភាពទិញលក់អចលនទ្រព្យនៅបន្តកើនឡើង គ្រាន់តែមុនបោះឆ្នោតប្រហែលមួយខែសកម្ម​ភាពទិញលក់មានសភាពទ្រឹងបន្តិច ប៉ុន្តែក្រោយការបោះឆ្នោតបានបញ្ចប់នាពេលថ្មីៗ​នេះសកម្មភាពនៃការទិញលក់បានកើនឡើងវិញ ហើយភ្ញៀវមានភាពសប្បាយរីករាយជាមួយ​នឹងបរិយាកាសនយោបាយមានភាពល្អប្រសើរ។

លោកស្រីបន្តថា “ទាំងអ្នកវិនិយោគជាតិ អន្តរជាតិនៅតែមានជំនឿចិត្តហើយសកម្ម​ភាពទិញលក់បានចាប់ផ្តើមឡើងវិញ ជាមួយចរន្តទិញលក់មានការកើនឡើង”។លោកស្រីបន្តថា “ការទិញលក់ និងការមកដល់នៃអ្នកវិនិយោគអន្តរជាតិ នឹងបន្តកើនឡើង​បន្ថែមទៀត ដោយសារទំនុកចិត្តពីកត្តាសន្តិភាព ស្ថិរភាពនយោបាយដែលកម្ពុជាសម្រេចបាន”៕

ដោយវុត្ថា

       ភ្នំពេញ៖ ទីក្រុងឌូបៃពិតជាAmazing ដែលពោពេញទៅដោយការប្រមូលផ្តុំនូវអាគា​រ​ខ្ពស់ៗ និងស្ថាបត្យកម្មទំនើបជាច្រើនប្រភេទ ហើយភាគច្រើនគឺជាស្ថាបត្យកម្មតាមបែបបទសាសនាអ៊ីស្លានៅក្នុងទីក្រុងឌូបៃ។

គេហទំព័រ propertyarea.asia បានបង្ហាជូនអ្នកអានបានសិក្សាស្វែងយល់ ពីអគាខ្ពស់ៗជាច្រើនទាំងនៅក្នុងពិភពអារ៉ាប់ និងពិភពលោក។ សម្រាប់ពេលនេះ នឹងបន្តបង្ហា​ញជូននូវអគារ Almas Tower (អគារពេជ្យ) មួយបន្ថែមទៀត ទុកគ្រាន់បានស្វែងយល់ពីការរីកចម្រើនវិស័យសំណង់។

អាគារ Almas Tower ឬ ហៅថា Diamond Tower មានកំពស់៣៦០ម៉ែត្រនិង ៦៨ជាន់ គឺជាអគារខ្ពស់កប់ពពកមួយ ស្ថិតនៅក្នុងតំបន់មាត់បឹងJumeirah ទីក្រុង Dubai ប្រទេសអារ៉ាប់រួម។ អាគារនេះ បានចាប់ផ្តើមសាងសង់នៅក្នុងឆ្នាំ ២០០៥ និងបានបញ្ចប់នៅក្នុងឆ្នាំ២០០៩។

Almas Tower គឺជាអគារដែលខ្ពស់ជាងគេ ក្នុងតំបន់អភិវឌ្ឍន៍មួយនេះ ដោយសាងសាងឡើង ក្នុងគោលបំណងសម្រាប់ពាណិជ្ជកម្មពេជ្យ។ អគារនេះ ផងដែរត្រូវបានរចនាប្លង់ដោយក្រុមហ៊ុន Atkins Middle East ។ ចំណែកកំពូលអគារវិញ កសាងដោយក្រុមហ៊ុនTaisei Corperation របស់ប្រទេសជប៉ុន សហការជាមួយក្រុមហ៊ុន Arabian Construction Co. ដែលជាក្រុមហ៊ុនទទួលបានពានខាងផ្នែកសាងសង់ ពីក្រុមហ៊ុន Nakheel Properties កាលពីឆ្នាំ២០០៥។

អាគារAlmas Tower បំរើសេវាកម្មជាច្រើនប្រភេទ រួមមាន កន្លែងលក់ពេជ្យ ឧស្សាហកម្មត្បូង រ៉ែ  ដែលគេហៅអគារនេះថា ជាមណ្ឌលជួញដូរមាស ពេជ្យ និងរ៉ែ  ព្រមទាំងមានកន្លែងប្រជុំរបស់អ្នកជំនួញមាស នៅទូទាំងពិភពលោកផងដែរ ។ អគារនេះ ត្រូវបានគេសាងសងឡើងប្រកបដោយសុវត្ថិភាពបំផុត។

ជាមួយគ្នានោះអគារនេះ ក៏ធ្លាប់ទទួលបានរង្វាន់ជាអគារខ្ពស់លំដាប់ទី៨ ក្នុងឆ្នាំ២០០​៩ ពី Emporis Skyscraperផងដែរ៕