ដោយ គង់ សូរិយា

ភ្នំពេញ៖ ការជ្រើសរើសអាជីពមួយ ដែលមានគុណតម្លៃពិតជាមានសារៈសំខាន់ណាស់ ក្នុងជីវិតរបស់យើង ដោយសារអាជីពនិមួយៗវាកំណត់នូវគុណតម្លៃក្នុងសង្គម និងឆាកជីវិត។

នាយិកាក្រុមហ៊ុន Century21 Cambodia អ្នកនាង Grace Rachny Fong បាន​មានប្រសាសន៍ឲ្យដឹងតាមទូរស័ព្ទ កាលពីថ្ងៃម្សិលម៉ិញនេះថា“អាជីពនេះនឹងមានអនាគតល្អ នឹងមានគុណតម្លៃដូចជា​អាជីពមេធាវី និងអាជីពជាវេជ្ជបណ្ឌិត ព្រោះអ្នកនៅក្នុងអាជីពនេះត្រូវធ្វើការជាមួ​យទាំងអ្នកទិញ និងអ្នកលក់ ហើយអ្នកណាក៏ត្រូវការលំនៅដ្ឋានដែរ”។អ្នកនាងបន្តថា “អាជីពនេះមិនត្រឹមតែធ្វើឲ្យគាត់មានលុយទេ ប៉ុន្តែក៏មានគុណតម្លៃខ្ពស់នៅក្នុងសង្គមផងដែរ”។

នៅប្រទេសជប៉ុន ពួកគេផ្តោតលើធនធានមនុស្ស ដែលមានសុច្ចរឹតភាព ដើម្បីកសាងទំនុកចិត្តក្នុងទីផ្សារ និងមានការផ្តល់សេវាកម្មលើសការរំពឹងទុក។

អ្នកនាង Grace Rachny Fong បានបានបន្តថា ហេតុនេះអ្នកចង់ធ្វើជាភ្នាក់​ងារអចលនទ្រព្យ ដែលមានគុណតម្លៃខ្ពស់ និងទទួលជោគជ័យត្រូវប្រកាន់ខ្ជាប់​នូវកត្តាសំខាន់ៗជាច្រើនរួមមាន សុច្ចរឹតភាព ភាពស្មោះ​ត្រង់ ចំណេះដឹង ជំនាញជាក់លាក់ ការប្តេជ្ញាចិត្ត និងការខិតខំប្រឹងប្រែងធ្វើការ​ដោយឆ្លាតវៃ។លោកបន្តថា អ្វីសំខាន់បន្ថែមទៀត គឺអ្នកចង់ក្លាយជាភ្នាក់ងារអចល​ន​ទ្រព្យ ត្រូវខិតខំបង្វឹកខ្លួនឯង ប៉ុន្តែសំខាន់បំផុតគឺមានសុច្ចរឹតភាព និងភាពស្មោះ​ត្រង់ ទើបទទួលបាននូវគុណតម្លៃ និងទទួលជោគជ័យក្នុងអាជីពនេះ។

អ្នកនាងបន្តថា “អតិថិជននឹងជឿជាក់លើគាត់ ប្រសិនជាគាត់មានសុច្ចរឹតភាព និងភាពស្មោះត្រង់ ប៉ុន្តែអ្នកមានចំណុចពីរនេះ ពិបាករកណាស់ ហេតុនេះខ្ញុំលើកទឹកចិត្តឲ្យអ្នកចង់ប្រឡូកក្នុងវិស័យនេះ ត្រូវគិតពីផលរយៈពេលវែង”។ អ្នក​នាងបន្តថា “ក្រៅពីចំណុចទាំងពីរខាងលើ ចំណេះដឹងផ្សេងទៀត គឺយើងអាចប ង្វឹកបាន ប៉ុន្តែសុច្ចរឹតភា ព និងភាពស្មោះត្រង់ត្រូវចេញពីខ្លួនរបស់គាត់”។

ការមានចំណេះដឹងជាតិ អន្តរជាតិ យល់ដឹងទាក់ទងពីទីផ្សារ ច្បាប់ ប្លង់អចលនទ្រព្យច្បាស់លាស់ នឹងធ្វើឲ្យអតិថិជនជឿជាក់លើគាត់ ព្រោះនៅពេលអតិថិជនជឿជាក់លើគាត់ ពួកគេនឹងមានទំនុកចិត្ត និងមានទំនាក់ទំនងល្អ ហើយ​ពេលណាម្ចាស់អចលនទ្រព្យជឿជាក់លើគាត់ ពួកគេនឹងទទួលបានជោគជ័យក្នុ​ងអាជីពនេះ។ អ្នកនាង Grace Rachny Fong បញ្ជាក់ឲ្យដឹង៕

ដោយ ដួង ចន្រ្ទា

ភ្នំពេញ៖ ស្របពេលទីផ្សារធានារ៉ាប់រងកាន់តែមានភាពប្រសើរ ដោយសារ​ការកើនឡើងនូវចំណូលប្រជាពលរដ្ឋ លោកឧកញ៉ាលី ហួរបានសម្រេចចូលប្រ​ឡូកក្នុងវិស័យធានារ៉ាប់រង ដោយសហការជាមួយក្រុមហ៊ុនអន្តរជាតិចំនួន៥នៅលើពិភពលោក។

លោកឧកញ៉ាបានមានប្រសាសន៍ឲ្យដឹង នាព្រឹកថ្ងៃទី២៤ មករា​នេះថា លោក នឹងចាប់ផ្តើមពិធីបើកសម្ភោធក្រុមហ៊ុនធានារ៉ាប់រងលី ហួរនៅថ្ងៃទី២៩ មករាខាងមុខនេះ ប៉ុន្តែបច្ចុប្បន្នក្រុមហ៊ុនបានចាប់ផ្តើមប្រតិបត្តិការហើយ ដោយផ្តោត​លើអតិថិជនចម្រុះ និងធ្វើលើ២៥រាជធានី ខេត្តទូទាំងប្រទេស។លោកបន្តថា​ វាជាក្រុមហ៊ុនខ្នាតធំមួយ ដែលត្រូវចំណាយទុនចុះបញ្ជីររហូតដល់៧លានដុល្លារ តាមលក្ខខ័ណ្ឌតម្រូវរបស់ក្រសួងសេដ្ឋកិច្ច និងហិរញ្ញវត្ថុ។

លោកបន្តថា “ដោយសារក្រុមហ៊ុនលី ហួរគ្រុបមានក្រុមហ៊ុនជាបុត្រសម្ព័ន្ឋ​ច្រើន ទើបខ្ញុំបង្កើតក្រុមហ៊ុននេះឡើង ដើម្បីទ្រទ្រង់ក្រុមហ៊ុនទាំងនោះ និងចាប់​យកទីផ្សារដទៃទៀត ដែលជាទីផ្សារកំពុងមានការរីកច្រើន”។លោកបន្តថា “ក្រុម​ហ៊ុនលី ហួរធានារ៉ាប់រង នឹងផ្តោតលើអតិថិជនចម្រុះទាំងការធានារ៉ាប់រងសុខភា​ព យានយន្ត ការដឹកជញ្ជូន ការធានារ៉ាប់រងលើអចលនទ្រព្យជាដើម”។

លោកឧកញ៉ា លី ហួរបានបន្តថា ប្រទេសកម្ពុជាកំពុងមានការរីកចម្រើន ហេតុនេះ ទើបលោកសម្រេចបើកក្រុមហ៊ុនលី ហួរអ៊ីនសួរិននេះឡើង ដើម្បីឆ្លើយ​តបនឹងតម្រូវការរបស់ប្រជាពលរដ្ឋ ជាពិសេសក្រុមហ៊ុនបានចុះកិច្ចព្រមព្រៀងជា​មួយ ក្រុមហ៊ុនធានារ៉ាប់រងអន្តរជាតិចំនួន៥ ដើម្បីសហប្រតិបត្តិការគ្នានៅលើទីផ្សារអន្តរជាតិ ព្រោះវាជាច្បាប់តម្រូវផង និងជាលក្ខខ័ណ្ឌតម្រូវឲ្យមានផង ដោយ​សារការធានារ៉ាប់រង ត្រូវធ្វើឡើងជាលក្ខណៈបណ្តាញអន្តរជាតិ។

កំនើនសេដ្ឋកិច្ច និងប្រាក់ចំណូលប្រជាពលរដ្ឋ ព្រមទាំងការយល់ដឹងរបស់​ប្រជាពលរដ្ឋប្រសើរជាងមុន បានធ្វើឲ្យក្រុមហ៊ុនធានារ៉ាប់រងលំដាប់អន្តរជាតិជា​ច្រើនបានឈានជើងមកកាន់ទីផ្សារកម្ពុជាជាបន្តបន្ទាប់ ក្នុងប៉ុន្មានឆ្នាំចុងក្រោយនេះ៕

ដោយ គង់ សូរិយា

ភ្នំពេញ៖ ស្របពេលទីផ្សារបុរីកំពុងមានភាពល្អប្រសើរ លោកឧកញ៉ាលី ហួរអគ្គនាយកបុរីវិមានភ្នំពេញ បានសម្រេចបើកការដ្ឋានសាងសង់គំរោងទី៨ នៃបុរីវិមានភ្នំពេញ ដែលមានផ្ទៃដីប្រមាណ២០ហិកតា។

មានប្រសាសន៍បន្ទាប់ពីពិធីបើកការដ្ឋានសាងសង់គំរោងថ្មីនេះ លោកឧកញ៉ាលី ហួរបានមានប្រសាសន៍ឲ្យដឹងនាព្រឹកថ្ងៃទី២៤ មករានេះថា គំរោងទី៨ នៃបុរីវិមានភ្នំពេញ ត្រូវបានជ្រើសរើសដាក់ឈ្មោះ “ភូមិរុងរឿង” ដើម្បីផ្តល់ឲ្យអ្នក​ស្នាក់នៅមានភាពជោគជ័យ និងរុងរឿងក្នុងឆាកជីវិត។ គំរោងនេះមានផ្ទះចំនួនជាង៦០០ ដែលភាគច្រើនជាប្រភេទផ្ទះវីឡាកូនកាត់ និងវីឡាទោល ដោយលក់ក្នុងតម្លៃចាប់ពីជាង១៨ម៉ឺនដុល្លារឡើងទៅ។

លោកឧកញ៉ាបានបន្តថា “ទីផ្សារបុរីនៅតែមានភាពល្អប្រសើរ ដោយបច្ចុ​ប្បន្ននៅតែមានតម្រូវការខ្ពស់ សម្រាប់លំនៅដ្ឋានមានតម្លៃមធ្យម និងក្រោមមធ្យម ប៉ុន្តែ​កា​រវិនិយោគបុរីនិមួយៗ វាអាស្រ័យលើទីតាំង និងតំបន់ជាក់លាក់”។ លោកបន្តថា “បើយើងវិនិ​យោគលើលំនៅដ្ឋានមានតម្លៃទាប គួរស្ថិតនៅតំបន់ណា និងវិនិយោគលើបុរីមាន​តម្លៃមធ្យម និងតម្លៃខ្ពសគួរស្ថិតនៅតំបន់ណា ដើម្បីធ្វើឲ្យគំរោងនោះទទួលបានជោគជ័យ”។

លោកឧកញ៉ាលី ហួរបានបន្តទៀតថា ដោយសារបុរីវិមានភ្នំពេញ ផ្តោតលើគុណភាពសំណង់ សោភ័ណភាព កេរ្ត៍ឈ្មោះ ព្រមទាំងលក្ខខ័ណ្ឌបង់ប្រាក់ពិសេស និងមានទីតាំល្អប្រសើរ ជាតំបន់ដែលមានការអភិវឌ្ឍន៍យ៉ាងឆាប់រហ័ស ដោយមានផ្សារទំនើប និងមជ្ឈមណ្ឌលពាណិជ្ជកម្មព័ទ្ឋជុំវិញ ទើបធ្វើឲ្យគំរោងនេះទទួលបានជោគជ័យតាមការចង់បានរបស់យើង។

អគ្គនាយកក្រុមហ៊ុន Century21 Mekong លោក ច្រឹក សុខនីម ​បានថ្លែងថា ទីផ្សារបុរីពិតជាបន្តមានភាពល្អប្រសើរ ដោយសារកំនើនសេដ្ឋកិច្ច និងការកើនឡើ​ងប្រាក់ចំណូលរបស់ប្រជាពលរដ្ឋ ពិសេសលក្ខខ័ណ្ឌទទួលបានឥណទានកាន់​តែងាយស្រួលជាងមុន បានធ្វើឲ្យប្រជាពលរដ្ឋមានលទ្ឋភាពទិញលំនៅដ្ឋាន​កា​ន់តែច្រើន ហើយបុរីដែលមានកេរ្ត៍ឈ្មោះល្អ ដូចជា បុរីប៉េង ហួត បុរីវិមានភ្នំពេញជាដើម នៅតែទទួលបានជោគជ័យក្នុងការអភិវឌ្ឍគំរោងរបស់ពួកគេ។

លោកបន្តថា “ទីផ្សារទិញលក់លំនៅដ្ឋាននៅតាមបុរីនានា ដែលក្រុមហ៊ុន​របស់លោកមានឯកទេសធ្វើការងារនេះ នៅតែលក់បានច្រើន ពិសេសលំនៅដ្ឋាន​ថ្មីៗ ក៏ដូចជាលំនៅដ្ឋានទី២ ដែលអ្នកវិនិយោគទិញ ដើម្បីលក់បន្តយកប្រាក់​ចំណេញ”៕

ដោយ វុត្ថា

ភ្នំពេញ៖ វិនិយោគិនចិនកាន់តែកើនច្រើនឡើង បានចូលមកវិនិយោគនៅកម្ពុជាពីមួយឆ្នាំទៅមួយឆ្នាំ ដោយពួកគេមកវិនិយោគលើវិស័យជាច្រើន នៅក្នុងប្រ​ទេសកម្ពុជា ក្នុងចំណោមនោះគេមើលឃើញថា វិស័យសំណង់គឺជាគោលដៅថ្មីរបស់របស់វិនិយោគិនចិនដែលចាប់អារម្មណ៍ខ្លាំង។

ជាក់ស្តែងគម្រោងសំណង់អគារខ្ពស់ៗកប់ពក នៅក្នុងរាជធានីភ្នំពេញនិងបណ្តាខេត្តមួយចំនួនដូចខេត្តព្រះសីហនុជាដើម បានសរសេរផ្ទាំងប៉ាណូជាអក្សចិនធំៗ យ៉ាងព្រោងព្រាតនោះបាននិងកំពុងសាងសង់យ៉ាងសកម្ម។

ការណ៍នេះ ត្រូវបានគេមើលឃើញថា វិនិយោគិនចិននៅពីក្រោយនៃការរីកចម្រើនសំណង់អគារនានាក្នុងប្រទេសកម្ពុជា។ នេះក៏ដោយសារតែមេដឹកនាំនៃប្រទេសកម្ពុជា សម្តេចតេជោហ៊ុន សែន មានទំនាក់ទំនងល្អ និងយ៉ាងជិតស្និតជាមួយរដ្ឋាភិបាលចិនរហូតមក។

កាសែត The New York Time បានសរសេរថា ចិនមកវិនិយោគនៅកម្ពុជាជាការលាងលុយកខ្វក់ ជាការសរសេរមួយដែលអ្នកនាំពាក្យក្រសួងការបរទេសកម្ពុជាបានបដិសេធ។

អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ លោក ជុំសុន្ទរី កាលពីពេលថ្មីៗនេះបានច្រានចោលភ្លាមៗ ចំពោះបញ្ហានេះដោយ លោកបានអះអាងថា កម្ពុជាមានសមត្ថភាពគ្រប់គ្រាន់ ក្នុងការដឹងពីប្រភពទុនវិនិយោគរបស់បរទេសនៅកម្ពុជា រាប់ទាំងអ្នកវិនិយោគចិន។ ការវិនិយោគរបស់ចិន នៅកម្ពុជា គឺមិនមែនជាការលាងលុយកខ្វក់ ដូចការចុះផ្សាយនោះឡើយ។

យោងតាមរបាយការណ៍របស់ក្រសួងដែនដី នគរូបនីយកម្ម និងសំណង់ បានបង្ហាញថា ក្នុងឆ្នាំ២០១៧កន្លងទៅនេះ គម្រោងសាងសង់សំណង់ក្នុងប្រទេសកម្ពុជា បានកើនឡើង២២ភាគរយធៀបនឹងឆ្នាំ២០១៦ ក្នុងនោះគម្រោងភាកច្រើន គឺជាគម្រោងសាងសង់របស់វិនិយោគិនចិន។  ជាមួយគ្នានេះក្រសួងបានផ្តល់គម្រោងសាសង់៣.០៥២គម្រោង និងមានផ្ទៃក្រឡាសរុបប្រមាណ ១០លានម៉ែតការ៉េ។

អ្នកជំនាញវិស័យអចលនទ្រព្យមួយចំនួនបានឲ្យដឹងថា អ្នកអភិវឌ្ឍន៍គំរោ ​​ងសំណង់ភាគច្រើនគឺជាជនជាតិចិន ហើយអ្នកដែលទិញក៏ជនជាតិចិនតែមិនសម្រាប់រស់នៅឡើយ គឺទិញយកទៅវិនិយោគបន្ត។ យោងតាមតួលេខផ្លូវការដែលបានចេញផ្សាយកាលពីឆ្នាំ២០១៦ បង្ហាញថា ចំនួនវិយោគិនចិនប្រមាណជា ៣០ ភាករយដែលបានមកវិនិយោគក្នុងវិស័យសំណង់ក្នុងប្រទេសកម្ពុជា។

សម្រាប់ឆ្នាំ២០១៨នេះ ក្រុមហ៊ុនដ៏ធំរបស់ចិន Prince Real Estate and Yue Tai Group នឹងសម្ពោធគម្រោងរបស់ខ្លួន ដាក់លក់ក្នុងទីផ្សារក្នុងតំលៃពី ២២,០០០ដុល្លារ ទៅ៩០.០០០ដុល្លារក្នុងមួយយូនីត។

អ្នកនាងអាន សុធីតានាយិកាប្រចាំប្រទេសនៃក្រុមហ៊ុន CBRE Cambodiaបានថ្លែងថា គំរោងវិនិយោគរបស់ចិនភាគច្រើនជាគំរោងធំៗ ដែលមានលំនៅដ្ឋា​នច្រើន និងជាគំរោងមិនសូវបានគិតគូពីភាពបៃតងនោះទេ ហើយគំរោងទាំងនោះភាគច្រើនផ្តោតលើអតិថិជនចម្រុះ ទាំងជនជាតិចិន និងជនជាតិខ្មែរ ក៏ដូចជាជនបរទេសដទៃទៀត។

អ្នកនាងបន្តថា “ការវិនិយោគរបស់ចិននៅកម្ពុជា ដោយសារតែសេដ្ឋកិច្ចកម្ពុជារីកចម្រើន កំណើនប្រាក់ចំណូលរបស់ប្រជាពលរដ្ឋ និងទំនាក់ទំនងល្អរវាង​រដ្ឋាភិបាលប្រទេសទាំងពីរ”។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោកគីម ហ៊ាងបានថ្លែងថា ការវិនិយោគរបស់ចិននៅកម្ពុជា ជារឿងល្អដែលផ្តល់ផលប្រយោ​ជន៍ច្រើនដល់សេដ្ឋកិច្ច និងសង្គមកម្ពុជា ប៉ុន្តែលោកបានផ្តល់អនុសាសន៍ឲ្យរដ្ឋាភិ​បាល គួរចាប់យកទីផ្សារផ្សេងទៀត ជាជាងចាប់យកតែទីផ្សារចិន ព្រោះបើចិនមានបញ្ហា កម្ពុជានឹងមានបញ្ហា ប៉ុន្តែបើយើងមានទីផ្សារច្រើន ទោះបីចិនមានបញ្ហា យើងនឹងមិនប្រឈមមុខនឹងបញ្ហានោះទេ។

លោកបានលើកឧទាហរណ៍ប្រៀបធៀបថា “ការពឹងផ្អែកចិនតែមួយ ប្រៀប​បីដូចជាយើងដកដង្ហើមដោយប្រើរន្ឋច្រមុះតែមួយ ដូច្នេះបើរន្ឋច្រមុះនោះស្ទះទៀត យើងនឹងមានបញ្ហា”។លោកបន្តថា “ផ្ទុយទៅវិញ បើយើងដកដង្ហើមដោយ​ប្រើរន្ឋច្រមុះពីរ ទោះបីរន្ឋច្រមុះមួយស្ទះ ក៏នៅមានរន្ឋមួយទៀតសម្រាប់ដកដង្ហើមដែរ”៕