ដោយ វុត្ថា

ភ្នំពេញ ប្រតិភូធុរជនមកពីទីក្រុងឆុងជីង នៃសាធារណរដ្ឋប្រជាមានិតចិន បានបំណងបង្កើតសួនសហគ្រាសឆុងជីងនៅក្នុងប្រទេសកម្ពុជា ដើម្បីចូលរួមអភិវឌ្ឍន៍វិស័យសេដ្ឋកិច្ចជាមួយរាជរដ្ឋាភិបាលកម្ពុជា តាមរយៈការបង្កើតនូវឱកាសការងារ និងប្រាក់ចំណូលជូនប្រជាជន សំដៅកាត់បន្ថយភាពក្រីក្រ។

ក្នុងជំនួបពិភាក្សារវាង លោកប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា ប្រតិ​ភូធុរជនទីក្រុងឆុងជីង ដឹកនាំដោយលោកបណ្ឌិត Wu Jianbo អគ្គលេខាធិការនៃអង្គការសហប្រជាជាតិ ផ្នែកដែនសមុទ្រ និងជាសមាជិកគណៈកម្មការឧស្សហកម្មថ្មី សហព័ន្ធទីក្រុងវៃឆ្លាត និងទីក្រុងវិថីសូត្រនៃសាធារណរដ្ឋប្រជាមានិតចិន លោកWu Jianboបានឲ្យដឹងថា ប្រតិភូវិនិយោគចិន គោលបំណងស្វែងរកឱកាសវិនិយោគ និងពង្រីកទីផ្សារនៅក្នុងប្រទេសកម្ពុជា តាមរយៈបង្កើតសួនសហគ្រាសឆុងជីង ដើម្បីផលិតឧបករណ៍អេឡិចត្រូនិក សម្ភារៈកុំព្យូទ័រ គ្រឿងបង្គុំទោចក្រយានយន្ត និងរថយន្ត ព្រមទាំងគ្រឿងចក្រផ្សេងៗ ដោយយកគំរូតាមសួនសហគ្រាសទីក្រុងឆុងជីង នៅក្នុងប្រទេសចិន។

លោកបណ្ឌិតបានបន្តថា “ឆុងជីង គឺជាទីក្រុងឧស្សាហកម្មធំមួយនៅលើពិភពលោក ដែលធ្វើការផលិតសម្ភារៈកុំព្យូទ័រ និងឧបករណ៍អេឡិចត្រូនិក ដើម្បីនាំចេញទៅកាន់ទីផ្សារអឺរ៉ុប តាមរយៈផ្លូវរថភ្លើងដែលតភ្ជាប់ពីទីក្រុងឆុងជីងនៃប្រទេសចិន ទៅកាន់ប្រទសអាល្លឺម៉ង់ ឆ្លងកាត់ប្រទេសរុស្សី”។

លោកប៉ាន សូរស័ក្តិ បានស្វាគមន៍ចំពោះគម្រោងវិនិយោគនេះ ហើយបានជម្រាបលោកបណ្ឌិត Wu Jianbo អំពីគោលនយោបាយបើកចំហរ និងគោលការណ៍លើកទឹកចិត្តវិនិយោគិន ដាក់ចេញដោយរាជរដ្ឋាភិបាលកម្ពុជា ព្រមទាំងការប្តេជ្ញាចិត្តរបស់ក្រសួងពាណិជ្ជកម្ម ក្នុងការសម្របសម្រួលគម្រោងវិនិយោគនានារបស់ធុរជនជាតិ និងអន្តរជាតិ។ លោកក៏បានលើកឡើងពីវត្ថុបំណង នៃគោលនយោបាយអភិវឌ្ឍន៍ឧស្សាហកម្ម (IDP) ព្រមទាំងអត្ថប្រយោជន៍ផ្សេងៗ នៃតំបន់សេដ្ឋកិច្ចពិសេសខេត្តព្រះសីហនុ សម្រាប់វិនិយោគិនដែលចង់មកបណ្តាក់ទុននៅក្នុងប្រទេសកម្ពុជា។

បន្ថែមលើនេះលោកប៉ាន សូរស័ក្តិ បានស្នើប្រតិភូធុរជនចិននៃទីក្រុងឆុងជីង ពិចា​រណាវិនិយោគលើការកែច្នៃផលិតផលកសិកម្មរបស់កម្ពុជា ដើម្បីនាំចេញទៅកាន់ទីផ្សារអន្តរជាតិ និងចាប់ដៃវិនិយោគជាមួយធុរជនក្នុងស្រុក ជាពិសសេសសហគ្រិនវ័យក្មេងរបស់កម្ពុជា ដើម្បីបង្កើតសេវាពាណិជ្ជកម្មតាមប្រព័ន្ធអេឡិចត្រូនិក (E-Commerce)៕

បន្ទាប់ពីបានរៀបចំសន្និសីទផ្សព្វផ្សាយទេសចរណ៍ឥណ្ឌានៅកម្ពុជា (Incredible India Road Show 2018) ក្នុងរាជធានីភ្នំពេញ កាលពីម្សិលមិញ រួចមក ក្រសួងទេសចរណ៍កម្ពុជា និងក្រសួងទេសចរណ៍ឥណ្ឌា នាថ្ងៃទី១០ ខែឧសភា ឆ្នាំ២០១៨នេះ បានបន្តបើកកិច្ចប្រជុំលើកទី២ នៃក្រុមការងារទេសចរណ៍កម្ពុជា-ឥណ្ឌា មួយទៀតនៅខេត្តសៀមរាប ទឹកដីបេតិកភណ្ឌដ៏ល្បីល្បាញរបស់កម្ពុជា ជាមួយនឹងគោលបំណងដ៏មានសារសំខាន់។

កិច្ចប្រជុំនេះធ្វើឡើងក្រោមអធិបតីភាព លោក ហោ មុនីរ័ត្ន អនុរដ្ឋលេខាធិការក្រសួងទេសចរណ៍កម្ពុជា លោកជំទាវ Rashmi Verma រដ្ឋលេខាធិការក្រសួងទេសចរណ៍ នៃសាធារណរដ្ឋឥណ្ឌា និងលោក MANIKA JAIN ឯកអគ្គរដ្ឋទូតឥណ្ឌាប្រចាំកម្ពុជា ព្រមជាមួយវត្តមានសមាជិកប្រតិភូនៃប្រទេសទាំងពីរ ក្រសួង-ស្ថាប័នពាក់ព័ន្ធ និងសមាគមទីភ្នាក់ងារទេសចរណ៍កម្ពុជា (CATA) ផងដែរ។

លោក ហោ មុនីរ័ត្ន បានលើកឡើងពីសារសំខាន់ចាំបាច់ដើម្បីជំរុញ និងពង្រឹងទំនាក់ទំនងមិត្តភាព និងកិច្ចសហប្រតិបត្តិការ ព្រមទាំងបានវាយតម្លៃខ្ពស់លើលទ្ធផល ដែលកើតចេញពីកិច្ចសហប្រតិបត្តិការលើវិស័យទេសចរណ៍ ដែលបានចូលរួមចំណែកយ៉ាងសំខាន់ដល់ការជំរុញកំណើនទេសចរ។

លោក ហោ មុនីរ័ត្ន បានលើកឡើងអំពីចំណុចសំខាន់ៗ សម្រាប់ការពិភាក្សាឆ្ពោះទៅរកជំហានរីកចម្រើន នៃកិច្ចសហប្រតិបត្តិការទេសចរណ៍ ក្នុងនោះភាគីទាំងពីរបានឯកភាពគ្នាក្នុងការគិតគូរដល់ការអភិវឌ្ឍវិស័យទេសចរណ៍ ប្រកបដោយនិរន្តរភាព ស្របតាមផែនការការងារនៃការអនុវត្តអនុស្សរណៈយោគយល់គ្នា ស្តីពីកិច្ចសហប្រតិបត្តិការទេសចរណ៍រវាងកម្ពុជា និងឥណ្ឌា ពិសេសផ្តោតលើចំណុចសំខាន់ៗ រួមមាន៖
* ការសម្រួលការធ្វើដំណើររបស់ភ្ញៀវទេសចរ, ការគិតគូរដោះស្រាយឧបសគ្គ និងបញ្ហាប្រឈមក្នុងការទំនាក់ទំនង និងការធ្វើដំណើរ, ជំរុញការលើកកម្ពស់គុណភាព និងសេវាកម្មទេសចរណ៍។

* ជំរុញការផ្សព្វផ្សាយទីផ្សាររួមគ្នា ការរៀបចំដំណើរទស្សនកិច្ចស្វែងយល់អំពី FAM Trips នៃប្រតិបត្តិករទេសចរណ៍ និងប្រព័ន្ធផ្សព្វផ្សាយ ការរៀបចំព្រឹត្តិការណ៍បង្ហាញផ្លូវទេសចរណ៍ (Roadshow) និងការគាំទ្រគ្នាទៅវិញទៅមកក្នុងការចូលរួមក្នុងពិព័រណ៍ទេសចរណ៍អន្តរជាតិ ដែលរៀបចំឡើងដោយប្រទេសនីមួយៗ។
* ពង្រឹងការអភិវឌ្ឍហេដ្ឋារចនាសម្ព័ន្ធទន់ តាមរយៈការផ្លាស់ប្តូរទស្សនកិច្ចសិក្សា ការពង្រឹងស្ថាប័ននៃអភិបាលកិច្ចល្អ ការកសាងសមត្ថភាព និងកម្មវិធីបណ្ដុះបណ្ដាលសម្រាប់មន្ត្រីរដ្ឋាភិបាល ក្នុងវិស័យទេសចរណ៍។

* សហការជាមួយស្ថាប័នពាក់ព័ន្ធអំពីលទ្ធភាពការតភ្ជាប់តាមផ្លូវអាកាស សម្រាប់ជើងហោះហើរត្រង់រវាងឥណ្ឌា និងកម្ពុជា។

* បង្កើតការយល់ដឹង និងជំរុញផ្សព្វផ្សាយតំបន់គោលដៅទេសចរណ៍ និងខ្សែទស្សនកិច្ចព្រះពុទ្ធសាសនា និងធម្មយាត្រាដែលទាក់ទងនឹងប្រវត្តិសាស្ត្រ វប្បធម៌ និងធម្មជាតិ។

កាលពីឆ្នាំ២០១៦ ក្រោមកិច្ចសហប្រតិបត្តិការលើវិស័យទេសចរណ៍ ប្រទេសទាំងពីរបានធ្វើការផ្លាស់ប្ដូរ និងផ្សព្វផ្សាយវប្បធម៌ជាមួយគ្នា តាមរយៈក្រសួងទេសចរណ៍ និងស្ថានទូតឥណ្ឌាប្រចាំកម្ពុជា ដោយបានរៀបចំការសម្ដែងសិល្បៈរាមាយណៈដោយជោគជ័យ និងបានរៀបចំព្រឹត្តិការណ៍យោហ្គា (Yoga) ជារៀងរាល់ឆ្នាំ ចាប់តាំងពីឆ្នាំ២០១៥រហូតមកដល់បច្ចុប្បន្ន។ ឆ្នាំនេះ ព្រឹត្តិការណ៍យោហ្គានឹងធ្វើឡើងនៅថ្ងៃទី១៦ និង១៧ ខែមិថុនា ឆ្នាំ២០១៨ នៅភ្នំពេញ ខេត្តសៀមរាប ព្រះសីហនុ និងបាត់ដំបង ។

គួរបញ្ជាក់ថា នៅឆ្នាំ២០១៧ កម្ពុជាទទួលបានភ្ញៀវទេសចរអន្តរជាតិប្រមាណ ៥,៦លាននាក់ កលនឡើង ១១% បើធៀបនឹងឆ្នាំ២០១៦ ក្នុងនោះទេសចរឥណ្ឌាមានចំនួន ៥៩.៥៧១នាក់ កើនឡើង ២៩%។ លើសពីនេះ ក្នុងរយៈពេល២ខែ ដើមឆ្នាំ២០១៨ ទេសចរឥណ្ឌាដែលមកទស្សនាកម្ពុជា បានកើនឡើង ១០% ដែលមានចំនួន ១០.៧៥០នាក់។ ឆ្នាំ២០១៨នេះ កម្ពុជារំពឹងនឹងទទួលទេសចរឥណ្ឌាប្រមាណ ៨ម៉ឺននាក់។

ដោយ : គង់ សូរិយា

ភ្នំពេញ : សម្តេច អគ្គមហាសេនា បតីតេជោ ហ៊ុន សែន នាយក​រដ្ឋ​ន្រ្តីកម្ពុជាបានថ្លែងថា នៅដើមឆ្នាំនេះរោងចក្រ សហគ្រាសថ្មីចំនួន៥០បានបើកដំណើរការ និងផ្តល់ការងារកម្មករ និយោជិតជិត៣០,០០០កន្លែង។

សម្តេចតេជោ ហ៊ុន សែន បានថ្លែងក្នុងឳកាសជួបសំណេះសំណាលជាមួ​យកម្មករ និយោជិតប្រមាណ២ម៉ឺននាក់នៅតំបន់សេដ្ឋកិច្ចពិសេស ក្នុងក្រុងបាវិត ខេត្តស្វាយរៀងនាព្រឹកថ្ងៃទី១០ ឧសភានេះថា ​និយោជិតនៅខេត្តស្វាយរៀង ទទួលបានចំណូលប្រមាណ​១២០លានដុល្លារក្នុងមួយឆ្នាំ ដែលជាការរួមចំណែកដ៏ធំក្នុងការទ្រទ្រង់ជីវភាព និងចាក់ចូលក្នុងសេដ្ឋកិច្ចជាតិ។ ទឹកប្រាក់នេះ គិតត្រឹមជាមធ្យមសម្រាប់កម្មករ កម្មការិនីម្នាក់ទទួលបានប្រាក់ឈ្នួលត្រឹម២០០ដុល្លារ ក្នុងមួយខែប៉ុណ្ណោះ​។

សម្តេចបន្តថា “មានប្រទេសនៅក្នុងតំបន់អាស៊ីជាច្រើន កំពុងប្រកួតប្រជែងជាមួយកម្ពុជា ដូច្នេះបើការទាមទារដំឡើងប្រាក់ឈ្នួលខ្ពស់ហួសហេតុពេក ឬទាមទាររហូតដល់មានការផ្ទុះបាតុភាពផ្សេងៗ នឹងនាំឲ្យថៅកែរោងចក្រទាំងនោះ ទៅវិនិយោគនៅប្រទេសដទៃ ហើយនាំឲ្យកម្មករអត់ការងារធ្វើជាក់ជាមិនខាន”។ សម្តេចបន្តថា “សមិទ្ឋិផលទាំងនេះមិនបានកើតមាន ដោយសារការស្រែករបស់គណបក្សប្រឆាំងនោះទេ ពោលគឺពួកគេបានត្រឹមតែស្រែកទាមទារឲ្យបរទេ​សឈប់ទិញទំនិញពីកម្ពុជា ដែលជាការសម្លាប់ឆ្នាំងបាយរបស់កម្មករប៉ុណ្ណោះ”។

យោងតាមទិន្នន័យរបស់ការិយាល័យច្រកចេញចូលតែមួយ នៃក្រសួងពាណិជ្ជកម្ម​បានបង្ហាញថា កម្ពុជានាំចេញទៅសហរដ្ឋអាមេរិកឆ្នាំនេះមានកំនើនខ្ពស់ ដោយមានទឹកប្រាក់ជាង៩០០លានដុល្លារអាមេរិក។

លោកបណ្ឌិត កាំង ម៉ូនីកា អគ្គលេខាធិការរងសមាគមរោងចក្រកាត់ដេរកម្ពុជាបាន​អោយដឹងថា ស្ថិរភាពក្នុងវិស័យវាយណភ័ណ្ឌកាត់ដេរ និងស្បែកជើងមានភាពល្អប្រសើរនៅឆ្នាំនេះ ដោយរោងចក្រថ្មីៗជាច្រើនបានបង្កើតឡើង ហើយការបញ្ជាទិញពីសហរដ្ឋអាមេរិក ក៏មានកំនើនខ្ពស់ ធៀបរយៈពេលដូចគ្នាកាលពីឆ្នាំមុន។ លោកបន្តថា “នៅឆ្នាំនេះអ្វីៗពិតជាមានសញ្ញាល្អប្រសើរ ដោយសារការកើនឡើង​នូវការបញ្ជាទិញ និងការបន្តវត្តមាននៃការមកដល់របស់អ្នកវិនិយោគថ្មីៗ”៕