ដោយ គង់ សូរិយា

       ភ្នំពេញ៖ ក្រុមអ្នកជំនាញក្នុងវិស័យទេសចរណ៍បានអះអាងថា ការមកដល់សណ្ឋា​គារថ្មីៗ លំដាប់ពិភពលោកនៅកម្ពុជាជាបន្តបន្ទាប់ មិនស​ម្លាប់សណ្ឋាគារក្នុងស្រុក​ទេ ផ្ទុយ​ទៅវិញវានឹងជួយដល់ឧស្សាហកម្មនេះនៅកម្ពុជា។

ប្រធានសមាគមសណ្ឋាគារកម្ពុជា លោកឌិន សុមេធារិទ្ឋបានថ្លែងឲ្យដឹងតាមទូរ​ស័ព្ទនាព្រឹកថ្ងៃទី៣១ កក្កដានេះថា ការមកដល់សណ្ឋាគារលំដាប់អន្តរជាតិល្បីៗដូចជា Marriot, Rosewoodជាដើម ជាការជួយលើកកំពស់មុខមាត់កម្ពុជា ព្រោះនៅពេលពួកគេ​ចូលមកកម្ពុជា  ពួកគេនឹងផ្សព្វផ្សាយពីកម្ពុជាទៅកាន់ពិភពលោក និងទាក់ទាញភ្ញៀវទេសចរណ៍ ​និងអ្នកធុរកិច្ចមកកាន់កម្ពុជាកាន់តែច្រើន។

លោកបន្តថា “ពួកគេប្រៀបដូចជាពេជ្រ មិនអាចមកប្រកួតជាមួយមាស ឬប្រាក់នោះទេ ហេតុនេះយើងស្វាគមន៍ពួកគេចូលមកកាន់តែច្រើន កាន់តែល្អប្រសើរ”។លោកបន្តថា “សណ្ឋាគារធំៗទាំងនោះ ពួកគេមិនមកចងមុងទេ គឺមានន័យថា ទាល់តែទីផ្សារកម្ពុជាមានភាពរួចរាល់ ឬទាក់ទាញរួចហើយទើបពួកគេចូលមកកាន់ទីផ្សាររបស់យើង”។

លោកឌិន សុមេធារិទ្ឋបានបន្តថា ដូចជាហាងកាហ្វេ STARBUCK ពួកគេមិនចូលមកទីផ្សារកម្ពុជាទេ ប្រសិនជាទីផ្សារនេះមិនទាន់មានភាពទាក់ទាញ។ ដូច្នេះប្រសិនជាហាងអាហារហ័សទាន់ចិន McDonald ចូលមកទៀត ពិតជាប្រសើរណាស់សម្រាប់ទីផ្សារ​កម្ពុជា។

លោកបន្តថា ទាក់ទងនឹងតម្លៃបន្ទប់សណ្ឋាគារវិញ គឺមិនបានឡើងថ្លៃទេ ដោយសា​រការផ្គត់ផ្គង់កើនឡើង ហើយគុណភាពសេវាកម្ម និងបដិសណ្ឋារកិច្ចក៏កាន់តែមានភាពល្អប្រសើរផងដែរ។

ទីប្រឹក្សាសមាគមទីភ្នាក់ងារទេសចរណ៍កម្ពុជា លោកហូ វណ្ឌីបានថ្លែងថា ការមកដល់នៃសណ្ឋាគារ Rosewood, Marriot ជាដើមសុទ្ឋតែជារឿងល្អសម្រាប់កម្ពុជា ព្រោះនៅពេលពួកគេមកដល់ ពួកគេនឹងចូលរួមផ្សព្វផ្សាយពីកេរ្ត៍ឈ្មោះកម្ពុជាដោយឥតគិតថ្លៃ ទៅកាន់ពិភពលោក។

លោកបន្តថា ការមកដល់សណ្ឋាគារទាំងនោះឆ្លុះបញ្ចាំងពីទំនុកចិត្ត ដែលធ្វើឲ្យកម្ពុ ជានឹងទាក់ទាញបានភ្ញៀវទេសចរណ៍អន្តរជាតិ និងទាក់ទាញអ្នកជំនួញច្រើនថែមទៀត​​មកកាន់ប្រទេសនេះ”៕

ដោយ វុត្ថា

ភ្នំពេញ៖ យោងតាមការចុះផ្សាយពីសារព័ត៌មានដ៏ល្បី Bloomberg បានឲ្យដឹងថា ប្រទេសសឹង្ហបុរីបានប្រកាសនាពេលថ្មីៗនេះថា វិធានការនានាពាក់ព័ន្ធនឹងទីផ្សារលំនៅដ្ឋានប្រណីត អាចនឹងធ្វើអោយផលប៉ះពាល់ ដល់អ្នកស្វែងរកទិញអចលនទ្រព្យលំនៅដ្ឋានប្រណិតក្នុងប្រទេសឹង្ហបុរី។

លោក Christine Li  ប្រធានស្រាវជ្រាវជ្រាវប្រចាំសឹង្ហបុរីនៃក្រុមហ៊ុន Cushman & Wakefield Inc បានប្រាប់សារព័ត៌មាន Bloomberg ថា អ្នកទិញបរទេសជាច្រើនកំពុងសម្លឹងមើលទីផ្សារលំនៅដ្ឋានប្រណីត ក្នុងប្រទេសសឹង្ហបុរីកាលពីឆ្នាំកន្លងទៅនេះ ប៉ុន្តែពួកគេអាចនឹងបកក្រោយវិញនាពេលបច្ចុប្បន្ននេះ ដោយសារតែវិធានការរបស់រដ្ឋាភិបាលមួយចំនួន ដែលអាចធ្វើអោយមានការធ្លាក់ចុះទីផ្សារលំនៅដ្ឋានប្រណីតពី៣០ ទៅ៤០ភាគរយ សម្រាប់ត្រីមាសបន្ទាប់ទៀត។

ជាមួយគ្នានេះរដ្ឋាភិបាលសឹង្ហបុរីបានប្រកាសដំឡើងពន្ធបន្ថែ មលើអ្នកទិញជាជនបរទេស (Additional Buyer’s Stamp Duty)  (ABSD) ពី១៥ ទៅ២០ភាគរយ និងលើអ្នកទិញលំនៅដ្ឋានទំាងអស់ពី១៥ ភាគរយទៅ២៥ភាគរយ។

សារព័ត៌មាន Bloomberg បានរាយការណ៍ផងដែរថា អ្នកទិញនៅក្រៅប្រទេសចំនួ​ន៣ភាគរយ បានចុះកិច្ចព្រមព្រៀងទិញលំនៅដ្ឋានប្រណីត ក្នុងប្រទេសសឹង្ហបុរីកាលពីឆ្នាំមុន។ ក្រៅពីការកំណត់ទៅលើភារកិច្ច ក្នុងការបង់ថ្លៃព័ន្ឋខ្ពស់នោះ រដ្ឋាភិបាលក៏បានរឹតបន្តឹង ចំពោះការកំណត់ប្រាក់កម្ចីពីធនាគារផងដែរ ចំពោះការទិញលំនៅដ្ឋាន។

ក្រសួងហិរញ្ញវត្ថុ ក្រសួងអភិវឌ្ឍន៍ជាតិ និងអាជ្ញាធររួបិយវត្ថុរបស់សឹង្ហបុរីបានចេញសេក្តីថ្លែងការណ៍ព្រមានរួមគ្នាថា រដ្ឋាភិបាលនឹងបន្តតាមដាន ទៅលើទីផ្សារអចនលទ្រព្យ និងការកែសម្រួលគោលនយោបាយជាចាំបាច់ ដើម្បីរក្សាបាននូវទីផ្សារអចលនព្រទ្យមួយប្រកបដោយចីរភាព។

រដ្ឋាភិបាលសិង្ហបុរីបានឱ្យដឹងកាលពីថ្ងៃសុក្រសប្តាហ៍មុនថា តម្លៃលំនៅដ្ឋានឯកជននៅក្នុងប្រទេសសិង្ហបុរី បានកើនឡើង៣,៤ភាគរយនៅក្នុងត្រីមាសទី២នៃឆ្នាំនេះ។

លោក Ong Teck Hui នាយកផ្នែកស្រាវជ្រាវរបស់ JLL Singapore បាននិយាយថា ទោះបីជាមានគោនយោបាយតំឡើងពន្ឋ និងការកំណត់ផ្សេងៗនេះក៏ដោយ ក៏ទីផ្សារអចលនទ្រព្យនៅតែស្ថិតនៅក្នុងការរីកចម្រើន។

លោកបន្តថា “ទស្សនវិស័យសេដ្ឋកិច្ចរបស់ប្រទេសសិង្ហបុរី នៅតែមានកម្រិតរឹងមាំ ហើយប្រទេសសឹង្ហបុរី នៅតែរក្សាសមតុល្យលំនៅដ្ឋានឲ្យមានសុខភាពល្អ ស្របតាមលំហូរសាច់ប្រាក់”៕

ដោយ ដែន ចែងចាំង

ភ្នំពេញ៖ ការអភិវឌ្ឈរវាងរាជធានីភ្នំពេញ និងទីរួមខេត្តកំពង់ស្ពឺត្រូវបានតភ្ជាប់គ្នា​ហើយក្នុងប៉ុន្មានឆ្នាំចុងក្រោយនេះ ប៉ុន្តែល្បឿននៃការអភិវឌ្ឍនេះកំពុងបន្តតភ្ជាប់ជាមួយនឹងខេត្តព្រះសីហនុ ដែលជាខេត្តកំពុងមានការរីកចម្រើនលឿន។

ការដាក់ឲ្យដំណើរការគោលនយោបាយអភិវឌ្ឍន៍ វិស័យឧស្សាហកម្មឆ្នាំ២០១៥ ២០២៥កាលពីចុងឆ្នាំ២០១៥ បាននិងកំពុងជួយជម្រុញនិងពន្លឿនចក្ខវិស័យរបស់រដ្ឋាភិ​បាល តាមរយៈការរៀបចំឲ្យតំបន់ស្ថិតនៅស្របតាមផ្លូវជាតិលេខ៤ ពីរាជធានីភ្នំពេញ ដល់ខេត្តព្រះសីហនុជាតំបន់ឧស្សាហកម្ម។

ជាមួយនឹងផែនការពង្រីកផ្លូវនេះពីទំហំ៧ម៉ែត្រ ដល់១១ម៉ែត្រនាពេលខាងមុខ តា​មរយៈជំនួយពីធនាគារពិភពលោក ដែលផ្តល់ឥណទាន១១០លានដុល្លារ។

លោកទេសរដ្ឋមន្រ្តីស៊ុន ចាន់ថុលរដ្ឋមន្រ្តីក្រសួងសាធារណៈការនិងដឹកជញ្ជូនបានថ្លែងថា រដ្ឋាភិបាលនឹងរៀបចំស្ថាបនាឡើងវិញ និងពង្រីកផ្លូវជាតិលេខ៤ នាពេលខាងមុខនេះ ដើម្បីសម្រួលការដឹកជញ្ជូន ពិសេសជួយធ្វើឲ្យតំបន់លិចទឹកជំនន់នាតំបន់ស្ទឹងសំរោ​ង និងស្ទឹងអូរគគីរ ស្ថិតក្នុងស្រុកកំពង់សិលា មិនប្រឈមនឹងការលិចទឹកជាថ្មី។

ជាមួយគ្នានេះ ការសាងសង់ផ្លូវល្បឿនលឿនពីរាជធានីភ្នំពេញ ទៅកាន់ខេត្តព្រះ​សី​ហនុ នឹងបើកការដ្ឋានសាងសង់នៅកំឡូងខែវិច្ឆិកាខាងមុខផងដែរ។

លោកបណ្ឌិតសុក ស៊ីផាន់ណាទីប្រឹក្សារដ្ឋាភិបាលកម្ពុជាបានថ្លែងថា តាមផែនការ​និងគោលនយោបាយរបស់រដ្ឋាភិបាល តំបន់ផ្លូវជាតិលេខ៤ពីរាជធានីភ្នំពេញ ទៅកាន់ខេត្តព្រះសីហនុ នឹងក្លាយជាតំបន់ឧស្សាហកម្ម ដោយសារខេត្តព្រះសីហនុជាខេត្តពិសេសមួយ ដែលរដ្ឋាភិបាលបានដាក់បញ្ចូលជាតំបន់ឧស្សាហកម្មពិសេស ក្នុងគោលនយោ​បាយអភិវឌ្ឍន៍វិស័យឧស្សាហកម្មឆ្នាំ២០១៥ ២០២៥។

លោកបន្តថា “ខេត្តព្រះសីហនុនឹងក្លាយជាប៉ូលសេដ្ឋកិច្ចធំទី២ បន្ទាប់ពីរាជធានីភ្នំពេ​ញ ដោយសារសក្តានុពលជាច្រើន ដែលបានធ្វើឲ្យខេត្តនេះកំពុងមានភាពរូកចម្រើន​យ៉ាងលឿន”។

ខេត្តព្រះសីហនុមានសក្តានុពលសំខាន់ៗជាច្រើន ដូចជា ទី១ មានកំពង់ផែទឹកជ្រៅតែមួយគត់នៅកម្ពុជា ទី២ មានការតភ្ជាប់បណ្តាញផ្លូវដែក ទី៣ មានព្រលានយន្តហោះលំដាប់អន្តរជាតិ ដែលបាននិងកំពុងពង្រីក ទី៤ មានការសាងសង់ផ្លូវល្បឿនលឿន ជាលើកទី១រវាងរាជធានីភ្នំពេញ ​និងខេត្តនេះ និងទី៥ មានឆ្នេរដ៏ស្រស់ស្អាត ដែលបានធ្វើឲ្យខេត្តនេះក្លាយជាតំបន់ទេសចរណ៍ដ៏មានសក្តានុពល។

ចូលរួមក្នុងពិធីសម្ភោធតំបន់ឧស្សាហកម្មមួយ ក្នុងចំណោមតំបន់ឧស្សាហកម្មជា​ច្រើននៅតាមបណ្តោយផ្លូវនេះ លោកប៉ាន សូរស័ក្តិរដ្ឋមន្រ្តីក្រសួងពាណិជ្ជកម្មបានមានប្រសាសន៍ថា មជ្ឈមណ្ឌលពាណិជ្ជកម្មនេះ នឹងបង្កើតឱកាសការងារ និងប្រាក់ចំណូលជូនប្រជាជន លើកកម្ពស់វិស័យទេសចរណ៍ជាតិ ព្រមទាំងជំរុញទំហំពាណិជ្ជកម្មទ្វេភាគីរវាងកម្ពុជា និងចិន ថែមទៀត។

លោកបន្តថា សេដ្ឋកិច្ចកម្ពុជាកំពុងមានកំនើនរឹងមាំ និងវឌ្ឍនភាពនៃវិស័យសំណ​ង់ ដែលធ្វើឲ្យកើនឡើងនូវតម្រូវការប្រើប្រាស់សម្ភារ និងគ្រឿងសង្ហារឹមប្រណិតៗ ហើយការមកដល់នៃផ្សារពាណិជ្ជកម្មចិន នឹងផ្តល់ជម្រើសកាន់តែច្រើនសម្រា​ប់​ប្រជាជនកម្ពុជា ដែលប្រាថ្នាចង់បានជីវិតរស់នៅតាមបែបស៊ីវិល័យ ស្របតាមបរិបទរីកចម្រើននៃវិស័យសេដ្ឋកិច្ច”៕

ភ្នំពេញ : អ្នកជំនាញអចលនទ្រព្យនៃក្រុមហ៊ុនអន្តរជាតិនានា បានសម្តែងសុទិដ្ឋិនិ​យមថា កម្ពុជានឹងទាក់ទាញអ្នកវិនិយោគអន្តរជាតិកាន់តែច្រើនថែមទៀត ក្រោយការបោះឆ្នោតបានបញ្ចប់ ដែលមានបរិយាកាសល្អប្រសើរ និងស្ថិរភាពនយោបាយ។

អ្នកនាង អាន សុធីតា នាយិកាប្រចាំប្រទេសនៃក្រុមហ៊ុន CBRE Cambodia បាន​ថ្លែងឲ្យដឹងតាមទូរស័ព្ទនាព្រឹកថ្ងៃទី៣០ កក្កដា នេះថា មុននិងក្រោយការបោះឆ្នោត បរិយា​កាសវិនិយោគ និងសកម្មភាពទិញលក់ក្នុងវិស័យអចលនទ្រព្យ មិនរងផលប៉ះពាល់ទេ ហើ​យបញ្ហានយោបាយ មិនជះឥទ្ឋិពលដល់វិស័យនេះឡើយ ដោយសារអ្នកវិនិយោគមកវិនិ​យោគនៅកម្ពុជាភាគច្រើន ជាអ្នកវិនិយោគមកពីតំបន់អាស៊ី។
អ្នកនាងបន្តថា “ខ្ញុំគិតថាក្រោយការបោះឆ្នោតបញ្ចប់ អ្វីៗនឹងមានភាពល្អប្រសើរជា​ងមុន ខណៈទីផ្សារក្នុងក្រុងកំពុងទាញយកការផ្គត់ផ្គង់មកប្រើប្រាស់វិញ ហើយទីផ្សារអច​លទ្រព្យជាយក្រុងរីកចម្រើន ដោយសារការរីកចម្រើននៃវិស័យហេដ្ឋារចនាសម្ព័ន្ឋ”។

ជាមួយគ្នានេះ អ្នកនាង Grace Rachny Fong នាយិកានៃក្រុមហ៊ុន Century21 Cambodiaបានលើកឡើងស្រដៀងគ្នាថា អ្វីៗនឹងល្អប្រសើរជាងមុន ដោយសារការបោះ​ឆ្នោតនេះបានបង្ហាញនូវសន្តិភាព សន្តិសុខ និងស្ថិរភាពនយោបាយ ដែលធ្វើឲ្យអ្នកវិនិយោគកាន់តែមានទំនុកចិត្ត។ អ្នកនាងបន្តថា ទាំងមុនការបោះឆ្នោត កំឡុងការបោះឆ្នោត និងក្រោយការបោះឆ្នោត យើងឃើញថាស្ថានភាពនៃការទិញលក់អចលនទ្រព្យ នៅតែកើនឡើង។
អ្នកនាងបន្តថា “សន្តិភាព ស្ថិរភាពនយោបាយនេះហើយ ជាអ្វីដែលពួកគេមើលឃើញ ជាអ្វីដែលអ្នកវិនិយោគកាន់តែមានទំនុកចិត្ត ហើយខ្ញុំគិតថាអ្នកវិនិយោគអន្តរជាតិ នឹងចូលមកវិនិយោគកាន់តែច្រើននៅកម្ពុជា”។
អគ្គនាយកក្រុមហ៊ុនគេហទំព័រ Realestate.com.kh លោក Tom O”Sullivan បានថ្លែងថា លោកគិតថាក្រោយបញ្ចប់ការបោះឆ្នោត ​និងគិតពីពេលនេះដល់ដំណាច់ឆ្នាំនេះ វិស័យអចលនទ្រព្យនៅកម្ពុជា នឹងកើនឡើងនិងមានភាពប្រសើរឡើងកាន់តែខ្លាំង។លោ​កបន្តថា មុនការបោះឆ្នោត អ្នកវិនិយោគនិយាយពីបញ្ហាស្ថិរភាពនយោបាយ ប៉ុន្តែលទ្ឋ​ផល​ និងដំណើរការនៃការបោះឆ្នោតបានបង្ហាញរួចហើយថា កម្ពុជាមានសន្តិភាព និងស្ថិរ​ភាពនយោបាយ។​​​
លោកបន្តថា “ខ្ញុំគិតថាឧស្សាហកម្មអចលនវត្ថុនៅកម្ពុជា នឹងបន្តរីកចម្រើនខ្លាំងបន្ថែមទៀតនាពេលខាងមុខ ពិសេសក្រោយការបោះឆ្នោត”។ លោកបន្តថា “កម្ពុជានឹងទាក់ទាញអ្នកវិនិយោគចិន ជប៉ុន កូរ៉េនិងបណ្តាអ្នកវិនិយោគមកពីប្រទេសក្នុងតំបន់ចូលមកកម្ពុជាកាន់តែច្រើន”៕