ដោយ គង់ សូរិយា

       ភ្នំពេញ៖ សម្តេចតេជោហ៊ុន សែននាយករដ្ឋមន្រ្តីកម្ពុជាបានអះអាងថា តម្លៃដីធ្លីនៅ​កម្ពុជាបន្តកើនឡើងមុន និងក្រោយការបោះឆ្នោតអាណត្តិទី៦នេះ។

ក្នុងជំនួបជាមួយកម្មករ និយោជិតរាប់ម៉ឺននាក់នៅតំបន់ផ្លូវវេងស្រេង នាព្រឹកថ្ងៃទី២ សីហានេះ សម្តេចតេជោបានមានប្រសាសន៍ថា មានឈ្មួញដីធ្លីខ្លះបានទិញដីធ្លីច្រើនទាំងមុន និងក្រោយការបោះឆ្នោត ហើយឈ្មួញខ្លះបានទិញនៅមុនការបោះឆ្នោត ដោយសារ​ពួកគេដឹងថា ការបោះឆ្នោតដីនឹងឡើងថ្លៃទៀតហើយ ហើយការប្រមូលពន្ឋដាបានបន្តកើនឡើង។

សម្តេចបន្តថា អាជីវករនៅតាមបណ្តាទីផ្សារនានាបាននិយាយថា អស់ពួកអាចង្រៃនោះ (សំដៅអតីតបក្សប្រឆាំង) ពួកគេលក់ដូរបានធម្មតា ហើយពួកគេមិនបារម្ភពីការត្រូវរើតូបផ្សារ និងជ្រួលច្របល់នោះទេ។

នាយិកាប្រចាំប្រទេសនៃក្រុមហ៊ុន CBRE Cambodia អ្នកនាងអាន សុធីតាបានយល់ស្របនឹងការលើកឡើងរបស់ប្រមុខរដ្ឋាភិបាល ប៉ុន្តែបានអះអាងថា ការឡើងតម្លៃដីធ្លីនៅឆ្នាំ២០១៨នេះ បើមើលជាទូទៅគឺឡើងថ្លៃទាបជាងឆ្នាំមុន និងឡើងតាមតំបន់ដោយតំបន់ខ្លះកើនឡើងខ្លាំង ហើយតំបន់ខ្លះក៏ស្ថិតក្នុងសភាពទ្រឹងផងដែរ។អ្នកនាងបន្តថា ផ្ទុយទៅវិញ តម្លៃដីធ្លីនៅខេត្តព្រះសីហនុបានកើនខ្លាំង ដែលតំបន់ខ្លះដូចជាតំបន់អូរឈើ​ទាល តំបន់អូរត្រេះជាដើម តម្លៃដីបានកើនរហូតដល់១០០ទៅ២០០ភាគរយក៏មាន។

អ្នកនាងបន្តថា “ជាទូទៅតម្លៃដីធ្លីក្នុងប៉ុន្មានឆ្នាំចុងក្រោយនេះ បានកើនឡើងយ៉ាង​ល្អប្រសើរ ដោយសារកំនើនសេដ្ឋកិច្ច ស្ថិរភាពនយោបាយ និងកំនើននៃលំហូរវិនិយោគផ្ទាល់ពីបរទេស”៕

ដោយគង់ សូរិយា

       ភ្នំពេញ៖ មន្រ្តីជាន់ខ្ពស់ក្រសួងដែនដី នគរូបនីយកម្មនិងសំណង់បានថ្លែងថា កម្ពុជាត្រូវការលំនៅដ្ឋានប្រមាណ១លានខ្នងបន្ថែមទៀត ដើម្បីឆ្លើយតបនឹងកំនើនប្រជាសាស្រ្ត និងរីកចំរើននៃសេដ្ឋកិច្ចសង្គម។

លោកប៉ែន សុផលរដ្ឋលេខាធិការក្រសួងរៀបចំដែនដី នគរូបនីយកម្មនិង​សំណង់បានថ្លែងឲ្យដឹងកាលពីពេលថ្មីៗនេះថា ជាមួយនឹងកំនើនសេដ្ឋកិច្ច នគរូ​បនីយកម្មក៏បានកើនឡើងយ៉ាងឆាប់រហ័ស ព្រោះតាមការសិក្សារបស់ក្រសួងអំពី ​ក្របខ័ណ្ឌយុទ្ឋសាស្រ្តអភិវឌ្ឍន៍ទីក្រុងនៅកម្ពុជាបានរកឃើញថា ចំនួនប្រជាជន​រស់នៅរាជធានី ក្រុង និងទីប្រជុំជននៅឆ្នាំ២០១៤ មានចំនួន៤,៥លាននាក់ ស្មើនឹង២៧,១ភាគរយ និងបន្តកើនឡើងដល់៧,៩២លាននាក់នៅឆ្នាំ២០៣០ ស្មើនឹង៤៤ភាគរយនៃចំនួនប្រជាជនកម្ពុជាសរុប។

តាមទិន្នន័យនេះបានបង្ហាញឲ្យឃើញថា បើគិតចា​ប់ពីឆ្នាំ២០១៥ ដល់២០៣០ តម្រូវការលំនៅដ្ឋានសម្រាប់រាជធានី ក្រុង និងទីប្រជុំជនមានប្រមាណ៨០ម៉ឺនលំនៅដ្ឋាន ដែលគិតជាមធ្យមមានតម្រូវ​ការប្រមា​ណ៥ម៉ឺនលំនៅដ្ឋានក្នុងមួយឆ្នាំ។

លោកប៉ែន សុផលបានបន្តថា ឆ្លើយតបនឹងបញ្ហានេះក្រ​សួងបាន និងកំពុងសកម្មអនុវត្តន៍គោលនយោបាយជាតិស្តីពី ការរៀបចំដែនដី ក្នុងការកសាងផែន​​ការរៀបចំដែនដី​ប្លង់គោល និងផែនការប្រើប្រាស់ដីគ្រប់កម្រិត និងគោលនយោ​បាយជាតិស្តីពីលំនៅដ្ឋាន ពិសេសលំនៅដ្ឋានដែលមានតំលៃសមរម្យជូនមន្រ្តីរាជ​ការ កងកំលាំងប្រដាប់អាវុធ និងប្រជាពលរដ្ឋដែលមានប្រាក់ចំណូលមធ្យម ប្រាក់ចំណូលទាប និងជនងាយរងគ្រោះ ដើម្បីធានាការអភិវឌ្ឍប្រកប​ដោយចីរភាព និងសមធ៌ម។

លោកច្រឹក សុខនីមអគ្គនាយកក្រុមហ៊ុន Century21 Mekong បានថ្លែងថា ទីផ្សារលំនៅដ្ឋាននៅតែមានភាពល្អប្រសើរ ដោយសារកត្តាសំខាន់ៗមួយចំនួនដូចជា កំនើនប្រាក់ចំណូលរបស់ប្រជាពលរដ្ឋ កំនើនប្រជាសាស្រ្តកើនឡើងក្នុងទីក្រុង ការកើនឡើងនូវតម្លៃដីធ្លី ធ្វើឲ្យអ្នកមានដីធ្លីក្នុងទីក្រុងបានលក់ចេញ ហើយទិញលំនៅដ្ឋាននៅជាយក្រុង ឬតាមបុរីនានា និងការគាំទ្រឥណទានពីធនាគារនានា។

លោកបន្តថា “យើងឃើញថាទីផ្សារលំនៅដ្ឋាននៅតាមបុរីនានា មានសកម្ម​ភាពទិញលក់កើនឡើងជាប្រចាំ ទាំងផ្ទះថ្មី និងផ្ទះទី២ដែលអ្នកទិញលក់យកចំណេញឬលក់ចេញដើម្បីផ្លាស់ប្តូរទីតាំងថ្មី”៕

ដោយវុត្ថា

ភ្នំពេញ៖ អាជ្ញាធរលំនៅដ្ឋានទីក្រុងហុងកុង កំពុងតែរិះរកដំណោះស្រាយចំពោះវិបត្តិលំនៅដ្ឋាន នៅក្នុងទីក្រុងទាំងមូល ស្របពេលដែលទីក្រុងមួយនេះ កំពុងកង្វះខាតដី ក្នុងការសាងសង់លំនៅដ្ឋាន និងកំណើនប្រជាជន។

លោក Ronnie Chan Chi-Chung ប្រធានក្រុមហ៊ុនអចលនទ្រព្យ Hang Lung Propertyបានថ្លែងប្រាប់សារព័ត៌មាន South China Morning Post កាលពីសប្តាហ៍មុនថា អាជ្ញាធរត្រូវតែមានការដោះស្រាយបន្ទាន់ ចំពោះបញ្ហាកង្វះខាតដីធ្លីក្នុងការសាងសង់លំនៅដ្ឋាន សម្រាប់ផ្គត់ផ្គង់ដល់ប្រជាពលរដ្ឋ ដែលកើនឡើងនៅក្នុងទីក្រុងទាំងមូល ។ លោកបន្តថា ការខ្វះខាងដីធ្លីនេះ ដោយសារតែអាជ្ញាធរក្រុង បានផ្តល់ដីសម្បទានយូរអង្វែងដល់ក្រុមហ៊ុនឯកជន។

ចំណែកលោកស្រី Carrie Lam អនុប្រធានប្រតិបត្តិទីក្រុងហុងកុងបានថ្លែងច្រានចោលការដែលថា អាជ្ញាធរហុងកុងបានផ្តល់សម្បទានដីធ្លីយូអង្វែង ដែលនាំអោយមានបញ្ហាកង្វះខាតដីធ្លីសាងសង់លំនៅដ្ឋាននៅក្នុងទីក្រុង។

ឆ្លើតតបនឹងបញ្ហានេះ លោកស្រីនឹងស្នើសុំវិធានការផ្សេងៗ សម្រាប់ទប់ស្កាត់កុំអោយតម្លៃនៅដ្ឋានឡើងថ្លៃ ទើបប្រជាពលរដ្ឋមានលទ្ធភាពក្នុងការទិញ។ ក្នុងរយៈពេលវែង លោកស្រីនឹងដាក់តំបន់ Vitoria Harbor ដែលនៅជាយក្រុងធ្វើជាតំបន់អភិវឌ្ឍន៍លំនៅ ដ្ឋានដោយជៀសមិនផុត តែយ៉ាងណាក៏ដោយក៏នៅតែមានការជំទាស់ពីសំណាក់ លោក Ronnie Chan Chi-Chung ប្រធានក្រុមហ៊ុនអចលនទ្រព្យ Hang Lung Property ផងដែរ ចំពោះការយកតំបន់នេះ យកមកអភិវឌ្ឍន៍លំនៅដ្ឋាន ដោយសារតែវាជាតំបន់ដែលមានភាល្បីល្បាញក្នុងពិភពលោក។

លោកស្រី Lam បានលើកឡើងថា អាជ្ញាធរទីក្រុងហុងកុង មានគម្រោងអភិរក្សដីធ្លីអោយបានចំនួនជាង៤៨០០ហិកតា ត្រឹមឆ្នាំ២០៤៦ ។

យោងតាមរបាយការណ៍អង្គការសហប្រជាជាតិបានបង្ហាញថា ទីក្រុងហុងកុងជាទីក្រុងមានដង់ស៊ីតេប្រជាជនច្រើនបំផុត លំដាប់ទី៤ក្នុងពិភពលោក ដែលមានមនុស្សរស់នៅចំនួន៧,០១៤នាក់ ក្នុងមួយគីឡូម៉ែត្រក្រឡា៕

ដោយ ដែន ចែងចាំង

ភ្នំពេញ៖ ជាមួយនឹងទីតាំងមានសក្តានុពល និងជាតំបន់មានការអភិវឌ្ឍន៍យ៉ាងឆាប់​រហ័ស ទីផ្សារដីឡូត៍នៃគំរោង AMORY 7MAKARA កំពុងទទួលបានការចាប់អារម្មណ៍ពីអតិថិជន ហើយពួកគេនឹងទទួលបានផលចំណេញពីរយ៉ាង ពីគំរោងដែលស្ថិតនៅតំបន់ផ្លូវជាតិលេខ៦អានេះ។

ជាមួយនឹងការអភិវឌ្ឍន៍ផ្តោតលើការទទួលខុសត្រូវផ្នែកសង្គម អ្នកវិនិយោគគំរោង AMORY 7MAKARA បានគិតគូលើបញ្ហាហេដ្ឋារចនាសម្ព័ន្ឋជាចម្បង ក្នុងគំរោងនេះ ដូចជាមាន​ផ្លូវធំទូលាយ មានសួនច្បារស្រស់បំព្រង និងមានការបំពាក់ហេដ្ឋារចនាសម្ព័ន្ឋជាច្រើនទៀត ដើម្បីឲ្យអ្នកទិញដីឡូត៍ក្នុងគំរោងនេះ អាចសាងសង់លំនៅដ្ឋានរស់នៅប្រកប​ដោយផាសុខភាព។

ប្រធានផ្នែកលក់ នឹងទីផ្សារនៃគំរោង AMORY 7MAKARA លោកបានថ្លែងឲ្យដឹង​ នាព្រឹកថ្ងៃទី៣១ កក្កដានេះថា ការវិនិយោគលើគំរោងដីឡូត៍នេះ អតិថិជននឹងមានផលចំណេញពីរបែប ទី១ ចំណេញសម្រាប់ការរស់នៅ ព្រោះការរស់នៅក្នុងគំរោងនេះមានផ្លូវធំទូលាយ សួនច្បាធំអមតាមមាត់ព្រែក សួនច្បាសំរាប់ក្មេងកំសាន្ត សួនច្បាបាញ់ទឹក មានធម្មជាតិស្រស់បំព្រង ជាមួយខ្យល់អាកាសបរិសុទ្ឋសំរាប់បំរើឲ្យការរស់នៅប្រកបដោយផាសុភាព។

ទី២ ការវិនិយោគដីឡូត៍នេះ នឹងទទួលបានចំណេញលើការវិនិយោគដោយសារតំបន់​នេះជាតំបន់មានការអភិវឌ្ឍន៍ និងមានការលូតលាស់លឿន ដែលមានគំរោងជាច្រើននៅព័ន្ឋជុំវិញគំរោងនេះ ដូចជា ទីក្រុងមិត្តភាពកម្ពុជា ចិន គំរោងបុរីវិមានភ្នំពេញ បុរីឌឹផ្លរ៉ា បុរីអ័រគីដេ ទីក្រុងរណបតេជោមរកត ជាដើម។

លោកបានបន្តថា “ដីនៅតំបន់នេះនឹងកើនឡើងខ្លាំងនាពេលអនា​គត ដោយសារសក្តានុ​ពលផ្លូវជាតិលេខ៦ នឹងមានការរីកចម្រើនខ្លាំង ​និងក្លាយជាតំបន់លំនៅដ្ឋាន និងមជ្ឈ​មណ្ឌលពាណិជ្ជកម្មយ៉ាងរស់រវើកនាពេលអនាគត”។ លោកបន្តថា “នាឆ្នាំ២០២៣ តំបន់នេះនឹងមានការផ្លាស់ប្តូរមុខមាត់យ៉ាងសម្បើម និងទាក់ទាញអ្នកវិនិ​យោគកាន់តែច្រើន ដោយសារជាឆ្នាំនៃការរៀបចំកីឡាអាស៊ានស៊ីហ្គេម ដែលកម្ពុជាធ្វើជាម្ចាស់ផ្ទះជាលើកដំបូង”។

សម្រាប់ព័ត៌មានលំអិតដីឡូត៍ក្នុងគំរោងនេះ អាចមកកាន់ការិយាល័យផ្ទាល់ដែលមានទីតាំង អាគាលេខ២៤ ជាន់ទី៦នឹង៧ ផ្លូវ២៧១ សង្កាត់ ទឹកថ្លា ខណ្ឌ័សែនសុខ ភ្នំពេញ ឬទាក់ទងនឹងស្តង់របស់ក្រុមហ៊ុនដែលមានដាក់បង្ហាញរយៈពេលពីរថ្ងៃនៅផ្សារធំថ្មី ​ខាងត្បូង ស្ថិតក្នុងខ័ណ្ឌដូនពេញ ចាប់ពីថ្ងៃទី៤ ដល់៥ ខែសីហា ឆ្នាំ២០១៨ នឹងវេលាម៉ោង ៨ព្រឹក ដល់ ម៉ោង ៦ល្ងាច ខាងមុខនេះ ឬអាចទាក់ទងលេខទូរសព្ទ័ ០៧៨​ ២២៧ ៥៥៥ /​​ ០៨១ ២២៧ ៥៥៥ / ០១៧ ៣៥៥ ៣៦០ / ០២៣ ៩០៩ ៩៩៩។

ដីឡូត៍ក្នុងគំរោង AMORY 7MAKARA មានទំហំពីរប្រភេទដូចជា ទី១ ដីឡូត៍មានទំហំ១០គុណនឹង២០ម៉ែត្រ ទី២ នឹងដីឡូត៍មានទំហំ២០គុណនឹង៣០ម៉ែត្រ   លោកបានបន្តថា គំរោងដីឡូត៍ AMORY 7MAKARA មានទំហំ៣១ហិកតា ដែលជាទំហំសមស្រប ​និងអនុញ្ញាត្តឲ្យក្រុមហ៊ុនវិនិយោគនិងរៀបចំហេដ្ឋារចនាសម្ព័ន្ឋបានសមស្រប ដើម្បីឆ្លើយតបត​ម្រូវការ និងលក្ខខ័ណ្ឌជីវិតរបស់ប្រជាពលរដ្ឋដែល​ចង់បានដីដែលមានទីតាំងល្អ ​និងជាតំបន់ដែលមានខ្យល់អាកាសបរិសុទ្ឋ អមជាមួយ ធម្មជាតិស្រស់បំព្រង។

អ្នកជំនាញអចលនទ្រព្យឯករាជ្យមួយរូបបានលើកឡើងថា តំបន់ស្ថិតនៅស្របតាម​មាត់ទន្លេ និងផ្លូវជាតិលេខ៦ បាននិងកំពុងក្លាយជាទីតាំង នៃការចាប់អារម្មណ៍របស់អ្នក​វិនិយោគជាតិ អន្តរជាតិ ដែលបាននិងកំពុងស្វែងរកដី ដើម្បីសាងសង់បុរី និងមជ្ឈមណ្ឌលពាណិជ្ជកម្មនានា ព្រោះពួកគេមើលឃើញថា តំបន់នេះមិនត្រឹមតែមានខ្យល់អាកាសបរិសុទ្ឋទេ តែមានហេដ្ឋារចនាសម្ព័ន្ឋតភ្ជាប់យ៉ាងល្អប្រសើរ តាមរយៈស្ពានជ្រោយចង្វារភ្លោះ ស្ពានឧកញ៉ាលី យ៉ុងផាត់(ព្រែកព្នៅ) ស្ពានថ្មីដែលនឹងវិនិយោគដោយក្រុមហ៊ុនOCIC តភ្ជាប់ទៅកាន់តំបន់ជ្រោយចង្វារ។

លោកបន្តថា “គំរោងវិនិយោគនៅតំបន់នេះ បាននិងកំពុងក្លាយជាទីចាប់អារម្មណ៍​របស់អ្នកមានធនធាន ដែលចង់គេចចេញពីការបំពុលផ្សែងក្នុងទីក្រុង ហើយស្វែងរកបរិស្ថានបរិសុទ្ឋសម្រាប់ការរស់នៅ”។លោកបន្តថា “ការសាងសង់មជ្ឈមណ្ឌលពាណិជ្ជកម្ម​នានានៅពេលអនាគត ពិសេសទីក្រុងរណបជ្រោយចង្វារ ​និងទីក្រុងមិត្តភាពកម្ពុជាចិន នឹងទាក់ទាញអ្នកនិយមបរិស្ថាន ទៅរស់នៅនិងស្វែងរកភាពមនោរម្យក្នុងជីវិតនៅតំបន់នេះកាន់តែច្រើននាពេលអនាគត”៕

ដោយគង់ សូរិយា

       ភ្នំពេញ៖ ថ្នាក់បរិញ្ញាបត្ររង និងបរិញ្ញាបត្រជំនាញអចលនទ្រព្យ នឹងបើកដំនើរការនៅពេលឆាប់ៗខាងមុខនេះ បន្ទាប់ពីការបណ្តុះបណ្តាលជំនាញពាក់ព័ន្ឋនឹងវិស័យនេះសម្រាប់រយៈពេលខ្លី នឹង​ចាប់ផ្តើមនៅដើមសប្តាហ៍ក្រោយ។

ប្រធានសមាគមអ្នកវាយតម្លៃ និងភ្នាក់ងារះអចលនវត្ថុកម្ពុជាលោកបណ្ឌិតគីម ហ៊ាងបានមានប្រសាសន៍ឲ្យដឹងនៅពេលថ្មីៗនេះថា ដោយសារមានភាពបន្ទាន់ ដើម្បីបំពេញ​តម្រូវការធនធានមនុស្សក្នុងវិស័យនេះ ទើបសមាគមសហការជាមួយសាកលវិទ្យាល័យ​សេដ្ឋកិច្ច និងហិរញ្ញវត្ថុ នៃក្រសួងសេដ្ឋកិច្ចនិងហិរញ្ញវត្ថុ បើកវគ្គបណ្តុះបណ្តាលរយៈពេលខ្លី នៅថ្ងៃទី៨ សីហាខាងមុខនេះ។

លោកបន្តថា “ជាមួយនឹងផែនការចំពោះមុខ សមាគមនិងក្រសួងសេដ្ឋកិច្ចនឹងបើកការបណ្តុះបណ្តាលជំនាញ អចលនទ្រព្យកម្រិតបរិញ្ញាបត្ររង និងបរិញ្ញាបត្រនៅឆ្នាំ២០២០ខាងមុខនេះ”។ លោកបន្តថា “ការបណ្តុះបណ្តាលដែលនឹងចាប់ផ្តើម នៅដើមស ប្តាហ៍ក្រោយ ធ្វើឡើងជាលក្ខណៈបន្ទាន់”។

ជាមួយនឹងកង្វះធនធានមនុស្សក្នុងវិស័យនេះ មជ្ឈមណ្ឌលអចលនវត្ថុកម្ពុជានឹងបើកដំណើរការនៅខែកញ្ញាខាងមុខផងដែរ បើសិនជាគ្មានការប្រែប្រួលទេនោះ។

លោកឃាង ពុទ្ឋីប្រធានក្រុមប្រឹក្សាភិបាល នៃមជ្ឈមណ្ឌលអចលនវត្ថុកម្ពុជាបានថ្លែងថា ប្រសិនជាគ្មានការប្រែប្រួលទេនោះ មជ្ឈមណ្ឌលអចលនវត្ថុកម្ពុជានឹងបើកបណ្តុះ​បណ្តាលជំនាញពាក់ព័ន្ឋក្នុងវិស័យនេះ នៅខែកញ្ញាខាងមុខ។ មជ្ឈមណ្ឌលនេះមានទីតាំង​នៅក្នុងគំរោង ONe Park ស្ថិតក្នុងមជ្ឈមណ្ឌលភ្នំពេញ (Phnom Penh City Center)។លោកបន្តថា ការបើកការបណ្តុះបណ្តាលជំនាញនេះ ធ្វើឡើងតាមកម្មវិធីសិក្សាលំដាប់​អន្តរជាតិ ដែលក្រុមអ្នកជំនាញបានសិក្សាកម្មវិធីសិក្សាពីប្រទេសសឹង្ហបុរី ជប៉ុន កូរ៉េជាដើម ដើម្បីយកមកច្របាច់បញ្ចូលគ្នា ស្របតាមបរិបទនិងស្ថានភាពនៃសេដ្ឋកិច្ចសង្គមកម្ពុជា។

លោកបន្តថា “កង្វះខាតធនធានមនុស្សក្នុងវិស័យនេះ ជាអ្វីដែលយើងត្រូវឆ្លើយតប​ដើម្បីជួយលើកកំពស់វិស័យសំណង់ និងអចលនទ្រព្យកាន់តែរីកចម្រើនថែមទៀត”៕