ដោយ : វុត្ថា
ភ្នំពេញ : ទីក្រុង Chicago របស់សហរដ្ឋអាមេរិក កំពុងបង្ហាញកិត្យានុភាពរបស់ខ្លួន ដោយគ្រោងនឹងសាងសង់អគារខ្ពស់កប់ពពកមួយទៀត នៅក្បែអគារប្រវត្តិសាស្ត្រ Tribune Tower ។

អគារនេះគឺជាអគារខ្ពស់លំដាប់ទី២ នៅក្នុងក្រុង ហើយត្រូវបានគូប្លងដោយក្រុមហ៊ុនស្ថាបត្យករល្បីឈ្មោះ គឺ Adrian Smith + Gordon Gill ។ អគារដែលនឹងសាងសង់នេះ មានកំពស់៤៣៣ម៉ែត្រ ដែលទាបជាងអគារ Willis Tower (អតិត អគារ Sear Tower) ដែលគូប្លង់ដោយក្រុមហ៊ុន Skidmore Owings & Merrill នៅក្នុងឆ្នាំ១៩៧៣។

ស្ថាបករ លោក Gordon Gill មកពីស្ថាបត្យករក្រុមហ៊ុន Adrian Smith + Gordon Gill បានរចនាប្លង់អាគារខ្ពស់ថ្មីនេះ ជាផ្នែកមួយនៃគម្រោងធំជាងមុន ដែលរួមមានការជួសជុលអគារTribune Tower និងអគារនៅជុំវិញ។

អគារនេះនឹងត្រូវគេសាងសង់ឡើងកំពស់៩៦ជាន់ ដោយបូកបញ្ចូលទាំងចំណតរថយន្ត អាហារដ្ឋាន ហាងលក់ទំនិញ និងសណ្ឋាគារជាដើម។ លើសពីនេះទៀតអគារនេះមានផ្ទះល្វែសម្រាប់ជួលចំនួន៤៣៩ និងខុនដូចំនួន១២៥យូនីតនៅលើកំពូលនៃអគារ។

ផ្នែកខាងកើតនិងខាងលិច នៃអគារមានលង្ហិនមានពណ៌ត្នោត ដែលត្រូវបានរចនាឡើង ដើម្បីបិទផ្នែកខាងក្រៅនៃអគារប្រវត្តិសាស្ត្ររបស់ Tribune Tower ។

សេចក្តីថ្លែងការណ៍មួយពីក្រុមហ៊ុនអភិវឌ្ឍន៍ក្នុងស្រុក គឺក្រុមហ៊ុន Golub & Co ដែលកំពុងធ្វើការជាមួយក្រុមហ៊ុន CIM Group ដែលមានមូលដ្ឋាននៅទីក្រុងឡាអេបាន ឱ្យដឹងថា ការសាងសង់អគារនេះ មានគោលបំណង «ចូលរួមកិច្ចសន្ទនាប្រកបដោយការចុះសម្រុង»ជាមួយនឹងអគារនេះ។

អគារនេះត្រូវគេរំពឹងថានឹងសាងសង់បញ្ចប់ និងដាក់អោយដំណើរការជាផ្លូវការនៅនៅក្នុងឆ្នាំ២០២០ខាងមុខនេះ តែយ៉ាងណាក៏ដោយគេមិនបានបង្ហាញពីការចំណាយថវិកាអស់ប៉ុន្មានទេ ចំពោះការសាងសង់អគារខ្ពស់កប់ពពកមួយនេះ៕

ដោយ គង់ សូរិយា

ភ្នំពេញ៖ មានចម្ងល់ជាច្រើនពីការចូលមកដល់កម្ពុជា នៃក្រុមហ៊ុនលំដាប់យក្សរបស់ចិនមកវិនិយោគនៅកម្ពុជា ប៉ុន្តែអ្នកជំនាញក្នុងវិស័យនេះបានប្រាប់ថា កត្តាសំខាន់ចំនួន៤បានទាក់ទាញក្រុមហ៊ុនទាំងនោះចូលមកកាន់ទីក្រុងភ្នំពេញ។

លោក RAYSON ប្រធានផ្នែកលក់ជាន់ខ្ពស់នៃក្រុមហ៊ុនយក្សមួយក្នុងចំណោម​យក្សទាំង១០នៅប្រទេសចិន R& F Properties បានមានប្រសាសន៍ឲ្យដឹង កាលពីដើមស ប្តាហ៍នេះថា មានមូលហេតុសំខាន់ៗចំ​នួន៤ ដែលក្រុមហ៊ុននេះសម្រេចចិត្តមកវិនិយោគ​នៅកម្ពុជា ទី១ គោលនយោបាយផ្លូវសូត្រ ដែលផ្តួចផ្តើមដោយប្រធានាធិបតីហ្សី ជីនពីង ហើយកម្ពុជាជាប្រទេសមានលក្ខខ័ណ្ឌពិសេស ដែលទទួលបានផលប្រយោជន៍ពីគំរោងនេះ ទី២ ទំនាក់ទំនងដ៏ល្អ និងរ៉ឹងមាំរវាងមេដឹកនាំកម្ពុជា ពិសេសម្តេចតេជោហ៊ុន សែននាយករដ្ឋមន្រ្តីកម្ពុជា និងមេដឹកនាំចិន ទី៣ កំណើនសេដ្ឋកិច្ចដ៏រ៉ឹងមាំរបស់ប្រទេសកម្ពុជា និងទី៤ ស្ថិរភាពនយោបាយរយៈពេលវែងរបស់កម្ពុជា។

លោកបន្តថា “ប្រទេសកម្ពុជា គឺជាប្រទេសទី២ក្នុងតំបន់អាស៊ាន ដែលយើងបានមកវិនិយោគ បន្ទាប់ពីប្រទេសភូមា។ ហេតុផលដែលយើងមកទីនេះ គឺដោយសារគោលនយោបាយខ្សែក្រវ៉ាត់មួយ ផ្លូវមួយ ដែលផ្តួចផ្តើមដោយប្រធានាធិបតីហ្សី ជីនពីង ហើយកម្ពុជាជាប្រទេសដែលមានលក្ខណៈពិសេស ដែលកំពុងទទួលផលប្រយោជន៍ពីគោលនយោបា​យ​នេះ”។

R&F PROPERTIES បាននិងកំពុងចាប់ផ្តើមគំរោង R&F CITY នៅមហាវិថីសម្តេចតេជោហ៊ុន សែន(ផ្លូវ៦០ម៉ែត្រ)ព្រោះយើ​ង​ចង់ផ្តល់នូវបែបផែនជីវិតថ្មីមួយ សម្រាប់ប្រជាជនកម្ពុជានិងសហគមន៍ចិន ដែលមកវិនិយោគ និងធ្វើការនៅប្រទេសកម្ពុជា។ គំរោងនេះមានអាគារសរុបចំនួន២០ និងមានកំពស់៣៣ជាន់ ដែលនឹងបញ្ចប់នៅឆ្នាំ២០២០ ហើយទំហំទឹកប្រាក់នៃការវិនិយោគគំរោងនេះ មានច្រើនជាង​២ពាន់លានដុល្លារអាមេរិក។

លោក RAYSON បានបន្តថា គំរោងនេះមានផ្ទះចំនួន៥២៣២យូនីត មានរួមបញ្ចូលនូវក្លឹបកីឡាទំហំ៣២០០ម៉ែត្រ និងផ្ទះបែបអាជីវកម្ម៣៨ និងសួនច្បារដ៏ធំមួយ។ គំរោងនេះបានចាប់ផ្តើមលក់ហើយ ដោយយើងផ្តោត ទីផ្សារនៅប្រទេសចិន និងជនបរទេសដទៃទៀត និងនៅកម្ពុជា ប៉ុន្តែយើងផ្តោតជាពិសេសលើអតិថិជនចិន ដែលមានជីវភាពខ្ពស់ និងចង់បានជីវិតរស់នៅបែបស៊ីវិល័យ។

លោកបន្តថា “យើងក៏ផ្តោតលើអតិថិជនជាជនជាតិខ្មែរ ព្រោះខ្ញុំគិតថានាពេលអនាគត​ប្រជាជនកម្ពុជា នឹងចូលចិត្តរស់នៅខុនដូឬអាផាតម៉ិនផងដែរ ព្រោះនៅប្រទេសចិនប្រជា​ជនចិនចូលចិត្តរស់នៅតាមអាផាតម៉ិន ដោយសារអាផាតម៉ិន និងខុនដូផ្តល់ភាពងាយស្រួលសម្រាប់ការរស់នៅ និងមានជីវិតបែបស៊ីវិល័យ”។

តម្លៃផ្ទះនៅក្នុងគំរោងនេះ លក់ក្នុងតម្លៃចាប់ពី១៩០០ដុល្លារក្នុងមួយម៉ែត្រការ៉េឡើងទៅ។

លោក RAYSON បានបន្តថា “យើងជឿជាក់ថាគំរោងនេះ នឹងទទួលបានជោគជ័យ ដោយសារហេតុផលខាងលើនេះ ដោយសារកំនើនសេដ្ឋកិច្ចកម្ពុជា និងចំនួនអ្នកវិនិយោគកាន់តែច្រើននឹងចូលមកវិនិ​យោគកម្ពុជា”។

ជាមួយគ្នានេះ អ្នកវិនិយោគចិនជាច្រើនចង់វិនិយោគនៅក្រៅប្រទេស ដែលពួកគេចង់ស្វែងរកប្រាក់ចំណេញ ហើយទីផ្សារកម្ពុជាជាទីផ្សារដ៏ជោគជ័យ និងទាក់ទាញមួយ ហើយទីក្រុងភ្នំពេញជាកន្លែងមួយដ៏ទាក់ទាញ។ ទោះបីខេត្តព្រះសីហនុ និងសៀមរាបមានសក្តានុពល ប៉ុន្តែខេត្តទាំងពីរមិនទាន់មានហេដ្ឋារចនាសម្ព័ន្ឋ និងសេវាកម្មសម្រាប់ផ្តល់ភាពងាយស្រួលក្នុងការរស់នៅដូចទីក្រុងភ្នំពេញទេ៕

ដោយ គង់ សូរិយា

ភ្នំពេញ៖ នៅឆ្នាំ២០១៨នេះ អ្នកជំនាញអចលនទ្រព្យបានហៅថា “ជាឆ្នាំនៃផ្សារទំនើប” ដោយសារឆ្នាំនេះផ្សារទំនើបតូច ធំចំនួន១២ នឹងបើកដំណើរការនៅក្នុងត្រីមាស​បន្តបន្ទាប់។

តោះទៅមើលទីតាំង ទំហំ និងឈ្មោះផ្សារទំនើបចំនួន១២ ដែលបើកដំណើរការនៅឆ្នាំនេះ។

១/ ផ្សារបែបសហគមន៍ EDEN GARDEN

ផ្សារទំនើបនេះស្ថិតនៅក្នុងមជ្ឈមណ្ឌលភ្នំពេញ (Phnom Penh City Center) ក្នុងតំបន់បឹងកក់ ស្ថិតនៅលើផ្លូវ City Center Blvd ស្ថិតក្នុងសង្កាត់ស្រះចក ខ័ណ្ឌដូនពេញ រាជធានីភ្នំពេញ។ ផ្សារទំនើបនេះមានទំហំ ៥០០០ម៉ែត្រការ៉េ។

២/ ផ្សារសហគមន៍ THE PARK

ផ្សារបែបសហគមន៍នេះ ស្ថិតនៅតាមបណ្តោយផ្លូវជាតិលេខ១ ទល់មុខបុរីប៉េង ហួត ស្ថិតក្នុងសង្កាត់ឬស្សីស្រស់ ខ័ណ្ឌច្បារអំពៅ ក្រុងភ្នំពេញ។ ផ្សារទំនើបនេះមានទំហំ៤៥៨១ម៉ែត្រការ៉េ។

៣/ ផ្សារទំនើប AEON MALL2

ផ្សារទំនើបនេះ ជាផ្សារធំជាងគេដែលនឹងបើកដំណើរការ នៅត្រីមាសទី២ឆ្នាំនេះ ផ្សារនេះស្ថិតនៅលើផ្លូវលេខ១០០៣ ស្ថិតក្នុងក្រុងពោងពាយ ខ័ណ្ឌឬស្សីកែវ ក្រុងភ្នំពេញ។ ផ្សារនេះមានទំហំរហូតដល់៧០៥០០ម៉ែត្រការ៉េ។ វាជាផ្សារទំនើបលំដាប់អន្តរជាតិ ដែលមានទំហំធំជាងផ្សារទំនើប AEON MALL1។

៤/ ផ្សារទំនើប PRINCE CENTRAL PLAZA

ផ្សារទំនើបនេះ ស្ថិតនៅក្នុងអាគារ Prince Plaza ស្ថិតនៅលើមហាវិថីព្រះនរោត្តម ក្នុងសង្កាត់ទន្លេបាសាក់ ខ័ណ្ឌចំការមន រាជធានីភ្នំពេញ។ ផ្សារនេះមានទំហំ៨១០០ម៉ែត្រការ៉េ។ Prince Plaza ជាគំរោងដែលប្រើប្រាស់ចម្រុះ សម្រាប់បរិបទនៃទស្សនវិស័យអភិវឌ្ឍន៍ថ្មីនៅរាជធានីភ្នំពេញ។

៥/ Midtown Mall

ផ្សារទំនើបនេះស្ថិតនៅលើបណ្តោយផ្លូវលេខ២០០៤ ក្នុងសង្កាត់ទឹកថ្លា ខ័ណ្ឌសែនសុខ ក្រុងភ្នំពេញ។ ផ្សារទំនើបនេះមានទំហំ៤៨៨១ម៉ែត្រការ៉េ និងគ្រោងបើកដំនើរការនៅខែធ្នូ ឆ្នាំ២០១៨នេះ។

៦/ ផ្សារទំនើប THE OLYMPIA MALL

ផ្សារទំនើបលំដាប់អន្តរជាតិនេះ ស្ថិតក្នុងគំរោង OLYMPIA CITYដែលជាគំរោងអភិវឌ្ឍន៍ដ៏ធំមួយនៅកណ្តាលរាជធានីភ្នំពេញ។ ផ្សារនេះស្ថិតនៅលើផ្លូវហ្សានដឺហ្គោល សង្កាត់វាលវង់ ខ័ណ្ឌ៧មករា រាជធានីភ្នំពេញ។

ផ្សារទំនើបនេះមានទំហំដ៏ធំផងដែរ ដោយមានផ្ទៃក្រឡារហូតដល់១៥០៨១ម៉ែត្រ​ការ៉េ និងគ្រោងបើកដំណើការនៅខែ ធ្នូ ឆ្នាំនេះ។

៧/ ផ្សារទំនើប THE COMMUNE

ផ្សារទំនើបនេះស្ថិតនៅលើផ្លូវ៣៤៧ និងផ្លូវលេខ៣៤៩ ស្ថិតក្នុងសង្កាត់បឹងកក់១ ខ័ណ្ឌទួលគោក ក្រុងភ្នំពេញ។ នេះជាគំរោងអភិវឌ្ឍន៍ចម្រុះ ដែលផ្សារនេះមានទំហំរហូត​ដល់៨១២៨ម៉ែត្រការ៉េ។

៨/ ផ្សារទំនើប THE HERITAGE WALK

ផ្សារទំនើបនេះស្ថិតនៅលើផ្លូវជាតិលេខ៦ សង្កាត់ស្វាយដង្គុំ ក្រុងសៀមរាប ខេត្តសៀមរាប។ ផ្សារទំនើបនេះនឹងបើកដំនើរការនៅត្រីមាសទី២ឆ្នាំនេះ។ ផ្សារទំនើបបែបសហគមន៍នេះមានទំហំ១៤០០០ម៉ែត្រការ៉េ។

៩/ ផ្សារទំនើប WB ARENA

ផ្សារទំនើបនេះស្ថិតនៅលើផ្លូវជាតិលេខ២ ស្ថិតក្នុងសង្កាត់ចក្រអង្រែក្រោម ខ័ណ្ឌ​មានជ័យ។ ផ្សារទំនើបនេះជាផ្សារបែបសហគមន៍ ដែលផ្តល់សេវាកម្មម្ហូបអាហារ ភេសជ្ជៈ និងការកំសាន្ត។

១០/ ផ្សារទំនើប DOWNTOWN93

ផ្សារទំនើបនេះស្ថិតក្នុងគំរោងអភិវឌ្ឍន៍ចម្រុះ ដែលមានការិយាល័យធ្វើការ និងអាផាតម៉ិន។ ផ្សារទំនើបនេះស្ថិតនៅលើផ្លូវព្រះមុនីវង្ស ស្ថិតក្នុងសង្កាត់ទន្លេបាសាក់ ខ័ណ្ឌចំ​ការមក ក្រុងភ្នំពេញ។

ផ្សារទំនើបបែបសហគមន៍នេះ មានទំហំសរុបចំនួន៦៩៨០ម៉ែត្រការ៉េ និងគ្រោងបើកដំណើការក្នុងត្រីមាសទី២ឆ្នាំនេះ។

១១/ ផ្សារទំនើប THE BRIDGE  

ផ្សារទំនើបលំដាប់អន្តរជាតិនេះ ស្ថិតក្នុងគំរោង THE BRIDGE ដែលជាគំរោងអភិវឌ្ឍន៍ចម្រុះ។ ផ្សារនេះស្ថិតនៅលើមហាវិថីរដ្ឋសភាជាតិ សង្កាត់ទន្លេបាសាក់ ខ័ណ្ឌចំការមក ក្រុងភ្នំពេញ។

ផ្សារទំនើបលំដាប់អន្តរជាតិនេះ មានទំហំ១៩៣៤០ម៉ែត្រការ៉េ។ ផ្សារនេះស្ថិតនៅក្នុងតំបន់ដើរកំសាន្ត តំបន់លំនៅដ្ឋាននិងជាតំបន់ពាណិជ្ជកម្មរស់រវើក។

១២/ ផ្សារទំនើប DIAMOND TWIN TOWER

ផ្សារទំនើបនេះ ស្ថិតនៅលើផ្លូវសុភមង្គល ក្នុងទីក្រុងកោះពេជ្រ ខ័ណឌចំការមក ក្រុងភ្នំពេញ។ ផ្សារទំនើបនេះស្ថិតនៅក្នុងគំរោងអភិវឌ្ឍន៍ចម្រុះ ដែលរួមមានខុនដូ ការិយាល័យជាដើម។

ផ្សារទំនើបក្នុងគំរោងនេះមានទំហំ១៥៦៤០ម៉ែត្រការ៉េ និងគ្រោងបើកដំនើរការនៅត្រីមាសទី២ឆ្នាំនេះ៕

ដោយ ៖ រាវី

ភ្នំពេញ ៖ បន្ទាប់ពី​បានប្រកាស​លក់​គម្រោង​សំណង់​លំនៅដ្ឋាន​បែប​វីឡា​ប្រណីត​លក្ខណៈ Resort សម្រាប់​អភិជន មានតម្លៃ​វិនិយោគ​រហូតដល់​ទៅ 110 លាន​ដុល្លារ ដែលមាន​ឈ្មោះថា The Palms របស់​កំពូល​អ្នកវិនិយោគ​អចលនទ្រព្យ លោក​ឧកញ៉ា សៀ រឹទ្ធី ប្រធាន​ក្រុមប្រឹក្សាភិបាល​ក្រុមហ៊ុន វើ​ល​ប្រ៊ី​ដ គ្រុប ដែលមាន​ទីតាំង​ស្ថិតនៅតាម​បណ្តោយ​ផ្លូវជាតិ​លេខ1 បានចាប់ផ្តើម​ប្រារព្វ​ពិធី​បញ្ចុះបឋមសិលា​ដើម្បី​អនុវត្ត​ការសាងសង់​ហើយ ក្រោម​វត្តមាន​របស់លោក ជា សុផារ៉ា រដ្ឋមន្ត្រីក្រសួង ដែនដី នគរូបនីយកម្ម និង​សំណង់ រួមជាមួយ​នឹង​បណ្ដា​អ្នកជំនួញ​ផ្នែក​វិស័យ​អចលនទ្រព្យ​ជាតិ-អន្តរជាតិ ជាច្រើន​នាក់ ។

ផ្អែក​តាម​ការ​ឱ្យដឹងពី​សំណាក់​អ្នកជំនាញ​ផ្នែក​លក់​គម្រោង​ដ៏​មហិមារ​មួយ​នេះ​បាន​លើកឡើងថា ៖ គម្រោង​បុរី​លំនៅដ្ឋាន The Palms ស្ថិតនៅតាម​បណ្តោយ​ផ្លូវជាតិ​លេខ១ ចម្ងាយ​ប្រមាណ៤គីឡូម៉ែត្រ ពី​គល់ស្ពាន​ព្រះមុនីវង្ស ដែល​ត​ភ្ជាប់​រហូតដល់​មាត់ទន្លេ ក្នុងភូមិ​ក្តី​តា​កុយ​សង្កាត់​វាល​ស្បូវ ខណ្ឌ​ច្បារអំពៅ រាជធានី​ភ្នំពេញ និង​ជា​គម្រោង​អភិវឌ្ឍន៍​លំនៅដ្ឋាន​ដ៏​ប្រណីត​ប្លែក​ពី​គេ មិន​ធ្លាប់​មាននៅ​កម្ពុជា ដោយមាន​ការសហការ​ជាមួយ​ដៃគូ​វិនិយោគ​មកពី​ប្រទេស​សិង្ហ​បុរី។

គម្រោង​អភិវឌ្ឍន៍ បុរី ឌឹ​ផាម នឹងមាន​ការសាងសង់​វីឡា​កូនកាត់ Clusters ចំនួន ២០៤វីឡា ជា​លក្ខណៈ​បឹង​កា​ឡូ ១៦វីឡា និង​មាន​កន្លែង​ចត​អូប័រ ជាពិសេស សម្រាប់​អ្នក​ដែល​ទិញ​វីឡា​បឹង​កា​ឡូ។ ហើយ​វីឡា​ទាំងអស់​សុទ្ធតែ​អាច​មើលឃើញ​ផ្ទៃ​ទន្លេ ហើយ​ផ្ទះ​និមួយៗមាន​ជណ្តើរយន្ត​ផងដែរ ដែល​ស្ថិតនៅលើ​ទំហំ​ផ្ទៃដី​សាងសង់​ចំនួន​៣,៧ហិកតា។ គម្រោង​នេះ​ខុសប្លែក​ពី​គម្រោង​ទី១ និង​គម្រោង​ទី២ ដែល​ក្រុមហ៊ុន វើ​ល ប្រ៊ី​ដ បាន​អភិវឌ្ឍ​សាងសង់​រួចមកហើយ ដូចជា គម្រោង​អគារ​ពាណិជ្ជកម្ម និង​លំនៅដ្ឋាន​កម្ពស់៤៥ជាន់ The Bridge និង​អគារ​ពាណិជ្ជកម្ម​លំនៅដ្ឋាន សណ្ឋាគារ ដែលមាន​ឈ្មោះថា The Peak។ ហើយ​គម្រោង​ទាំងពីរ​នេះ ទទួលបាន​ការគាំទ្រ​និង​មាន​ភាពជោគជ័យ​យ៉ាងខ្លាំង។

គួរបញ្ជាក់​ផងដែ​ថា លោក​ឧកញ៉ា សៀ រឹទ្ធី អគ្គនាយក​ក្រុមហ៊ុន World Bridge Group បានបញ្ជាក់​ផងដែរ​ថា មូលហេតុ​ដែល​លោក​សម្រេចចិត្ត​អភិវឌ្ឍ​បុរី​លំនៅដ្ឋាន The Palms  នៅ​តំបន់​នោះ ដោយសារតែ​មើលឃើញថា តំបន់​នោះ​មាន​ប្រព័ន្ធ​ហេ​ដ្ឋា​រចនា​សម្ពន្ធ​ល្អ ផ្លូវជាតិ​ធំ​ទូលាយ មាន​ស្ពាន​ពី​រត​ភា្ជ​ប់ និង​ទីតាំង​អភិវឌ្ឍន៍​នៅ​ជិត​មាត់ទន្លេ ដែល​បង្ក​លក្ខណៈពិសេស​សម្រាប់​ការអភិវឌ្ឍ​គម្រោង​លំនៅដ្ឋាន ឌឹ ផាម នេះ ឲ្យ​ក្លាយជា រី​ស៊​ត ដ៏​ប្រណីត​នៅ​កណ្តាល​ទីក្រុង​ភ្នំពេញ។ លោក​បានបង្ហាញ​ពី​ក្ដី​ជឿជាក់​យ៉ាង​ដូច្នេះ​ថា «អ្វីដែល​ខ្ញុំ​ធ្វើ​គឺ​ត្រូវតែ​ទទួលបាន​ជោគជ័យ បើ​មិន​ជោគជ័យ​ខ្ញុំ​មិន​ធ្វើ​នោះទេ»៕

ដោយ គង់ សូរិយា

ភ្នំពេញ៖ មុខមាត់​កម្ពុជា​ពិសេស​ទីក្រុង​ភ្នំពេញ បាន​ផ្លាស់ប្តូរ​យ៉ាង​លឿន ដោយសារ​បច្ចុប្បន​ន្ន​នេះ មាន​ក្រុមហ៊ុន​យក្ស​ចិន​ប្រមាណ៤ ទៅ៥ក្រុមហ៊ុន​ប៉ុណ្ណោះ​បាននិងកំពុង​រួមចំណែក​ផ្លាស់ប្តូរ​មុខមាត់​កម្ពុជា។

ក្រុមហ៊ុនធំៗទាំងនោះ​រួមមាន ទី១ Prince Real Estate Group ដែល​បាននិងកំពុង​វិនិយោគ​លើ​គំរោង​ជាច្រើន​នៅ​ទីក្រុង​ភ្នំពេញ ដូចជា Diamond Condo នៅ​ទីក្រុង​កោះ​ពេជ្រ គំរោង Prince Plaza និង​គំរោង Prince Modern Plaza នៅតាម​មហាវិថី​ព្រះ​នរោត្តម គំរោង​មជ្ឈមណ្ឌល​ពាណិជ្ជកម្ម និង​សណ្ឋាគារ​កំពស់៦០ជាន់​នៅ​ទល់មុខ​Prince Plaza និង​គំរោង​ជាច្រើន​ទៀត ដែល​បាននិងកំពុង​ចាប់ផ្តើម​នៅ​ខេត្ត​ព្រះសីហនុ ដែល​គ្រោង​ចំណាយ​ទុនវិនិយោគ​រហូតដល់ ៥០០០លាន​ដុល្លារ​អាមេរិក។

ទី២ ក្រុមហ៊ុន GREEND Land GROUP ដែល​បានប្រកាស​កាលពី​ឆ្នាំមុន ដើម្បី​បោះទុន​វិនិយោគ៧០០០លាន​ដុល្លារ​បន្ថែមទៀត​នៅ​កម្ពុជា។ បច្ចុប្បន្ន​ក្រុមហ៊ុន​នេះ​បាន​ទិញ​អាគារ​ចំនួន​បី​នៅក្នុង​គំរោង The RIVIERA ស្ថិតនៅ​ទីក្រុង​កោះ​ពេជ្រ។ ជាមួយគ្នានេះ​ក្រុមហ៊ុន​នេះ ក៏បាន​វិនិយោគ​លើ​គំរោង​ហេ​ដ្ឋា​រចនា​ស​ម្ព័​ន្ឋ​ជាច្រើន​ទៀតផង​ដែរ។

ទី៣ ក្រុមហ៊ុន R&F Properties បាននិងកំពុង​វិនិយោគ​សាងសង់ R&F City នៅលើ​មហាវិថី​សម្តេច​តេ​ជោ​ហ៊ុន សែន ដែលមាន​ទុនវិនិយោគ​រហូតដល់​ជាង ២០០០លាន​ដុល្លារ​អាមេរិក។ ក្រុមហ៊ុន​នេះ​នឹង​សាងសង់​អាគារ​ចំនួន២០ និង​មាន​កំពស់៣៣ជាន់ ដែលមាន​ផ្ទះ​សរុប​ចំនួន​ជាង ៥២០០០យូ​នី​ត ក្លឹប​កីឡា និង​សួនច្បារ​ស្រស់បំព្រង​មួយ​នៅក្នុង​គំរោង​នេះ។

ក្រុមហ៊ុន R&F Properties ជា​ក្រុមហ៊ុន​អចលនទ្រព្យ​ធំ​មួយ ក្នុងចំណោម​ក្រុមហ៊ុន​អចលនទ្រព្យ​យក្ស​ទាំង១០នៅ​ប្រទេស​ចិន ដែល​បាននិងកំពុង​រៀបចំ​គំរោង​វិនិយោគ​ថ្មី​មួយទៀត នៅតាម​បណ្តោយ​មហាវិថី​ព្រះមុនីវង្ស ស្ថិតក្នុង​សង្កាត់​ទន្លេបាសាក់ ខ័​ណ្ឌ​ចំការមន ក្រុងភ្នំពេញ។

ទី៤ ក្រុមហ៊ុន SINO PLAZA ក៏​ជា​ក្រុមហ៊ុន​យក្ស​មួយ​របស់​ប្រទេស​ចិន​ផងដែរ ដែល​ក្រុមហ៊ុន​នេះ មិន​ត្រឹម​មាន​ជំនាញ​លើ​ការអភិវឌ្ឍន៍​អចលនទ្រព្យ​នោះទេ តែ​ជា​ក្រុមហ៊ុន​សាងសង់​ដ៏​ធំ​និង​ល្បីល្បាញ​នៅ​ប្រទេស​ចិន​ផងដែរ។

ក្រុមហ៊ុន​នេះ​កំពុង​សាងសង់​មជ្ឈមណ្ឌល​ពាណិជ្ជកម្ម និង​លំនៅដ្ឋាន​ដ៏​ធំ​មួយ នៅលើ​ទីតាំង​អតីត​ផ្សារ​បឹងត្របែក ដែលមាន​អាគារ​ចំនួន៦កំពុង​សាងសង់ ដោយ​អាគារ​និមួយៗមាន​កំពស់៤៥ជាន់។ គំរោង​នេះ​ក្រៅពី​មាន​ខុន​ដូ​ប្រណីត ក៏​រួមបញ្ចូល​នូវ​សេវាកម្ម​កំសាន្ត ក្លឹប​ហាត់ប្រាណ ផ្សារ​ទំនើប និង​កា​រិ​លាយ​ល័យ​សម្រាប់​ជួល​ផងដែរ។

ទី៥ ក្រៅពីនេះ​ក៏មាន​ក្រុមហ៊ុន​ចិន​ដ៏​ធំ កំពុង​សហការ​ជាមួយ​ក្រុមហ៊ុន​លី យ៉ុង​ផាត់​គ្រុប​ដើម្បី​សាងសង់​ទីក្រុង​មិត្តភាព​កម្ពុជា ចិន​នៅក្នុង​រណប​តេ​ជោ​មរកត ស្ថិតក្នុង​សង្កាត់​បាក់​ខែង ខ័​ណ្ឌ​ជ្រោយចង្វារ រាជធានី​ភ្នំពេញ​ផងដែរ។

គេហទំព័រ Propertyarea.asia នឹង​ផ្តល់​បច្ចុប្បន្នភាព​ក្រុមហ៊ុន​យក្ស​ចិន​ជាច្រើន​ទៀត ដែល​បាននិងកំពុង​វិនិយោគ​នៅ​កម្ពុជា​នាពេលឆាប់ៗនេះ៕