ដោយ រ៉ាវី

ដោយសារតែកំណើនសេដ្ឋកិច្ចមានការកើនឡើងខ្ពស់ជាប់ជាប្រចាំ ក្រោមការសម្រុកវិនិយោគយ៉ាងគំហុកពីសំណាក់អ្នកជំនួញបរទេស ក៏ដូចជាក្រុមហ៊ុនលំដាប់អន្តរជាតិជាច្រើន ជាពិសេស លើវិស័យអចលនទ្រព្យពីសំណាក់ក្រុមហ៊ុនចិន បានជំរុញឱ្យផ្ទៃដីក្នុងតំបន់រាជធានីភ្នំពេញមានភាពចង្អៀត និងកើនឡើងនូវតម្លៃ ដែលជាហេតុធ្វើឱ្យអ្នកវិនិយោគផ្នែកសំណង់លំនៅដ្ឋានបែបប្រណីតជាច្រើនងាកទៅចាប់អារម្មណ៍នៅតំបន់ជ្រោយចង្វារ ដែលស្ថិតនៅទិសខាងកើតរាជធានីភ្នំពេញវិញ ។

ចាប់តាំងពីតំបន់គល់ស្ពានជ្រោយចង្វារឆ្ពោះទៅទិសខាងកើតតាមបណ្តោយផ្លូវជាតិលេខ ៦A សំណង់គ្រប់ប្រភេទបានលេចចេញរូបរាងព្រោងព្រាត ជាពិសេស សំណង់លំនៅដ្ឋានបែបប្រណីតតែម្ដង ដែលក្នុងនោះរួមមានដូចជា ៖ សំណង់បុរី សុភមង្គល, បុរី The Mekong Royal , បុរី ប៉េងហួត, បុរីពិភពថ្មី , បុរី អរគីដេ វីឡា , បុរី The Flora, និងបុរី វិមានភ្នំពេញ ជាដើម ។ បន្ថែមពីនេះ នៅមានគម្រោងសំណង់ផ្សេងៗមួយចំនួនទៀត ដែលសង់ឡើងជាមជ្ឈមណ្ឌលពាណិជ្ជកម្ម ។

លោកឧកញ៉ា នួន រឹទ្ធី អគ្គនាយកក្រុមហ៊ុន Khmer Foundation Appraisal  បានលើកឡើងថា វាជារឿងធម្មតា នៅពេលដែលតំបន់ក្រុងភ្នំពេញមានការកើនឡើងនូវចំនួនអគារធំៗដូចជាសំណង់ខុនដូ អាផាតមិន ជាដើមនោះ តំបន់ដែលើស្ថិតនៅជាប់ក្រុង គឺមានតម្រូវការខ្ពស់ ។ ជាក់ស្ដែងដូចជាតំបន់ជ្រោយចង្វារជាដើម ដែលពីមុនមានភាពទូលាយល្ហល្ហេវ ប៉ុន្តែនបច្ចុប្បន្ននេះ បានក្លាយទៅជាតំបន់ដ៏មានសក្ដានុពល ជាពិសេស លើផ្នែកសំណង់លំនៅដ្ឋានតែម្ដង ដែលជំរុញឱ្យតម្លៃដីមានការកើនឡើងខ្ពស់ ។ លោកឧកញ៉ាបានបន្ថែមទៀតថា កាលពីប៉ុន្មានឆ្នាំមុន ដីនៅតំបន់ជ្រោយចង្វារមានភាពទាបនៅឡើយ ពោលគឺប្រមាណ១០០០ ទៅ ១៥០០ដុល្លារក្នុងមួយម៉ែត្រការ៉េ តែប៉ុណ្ណោះ ប៉ុន្តែឥឡូវបានកើនឡើងខ្ពស់ រហូតដល់២៥០០ ទៅដល់៣៥០០ដុល្លារក្នុងមួយម៉ែត្រ។

លោកឧកញ៉ាបានបន្តទៀតថា ៖ ប្រសិនបើបរិយាកាសសេដ្ឋកិច្ចកម្ពុជា នៅតែមានភាពល្អប្រសើរដូចជាពេលបច្ចុប្បន្ននេះ មិនយូរទៀតនោះទេ តំបន់ជ្រោយចង្វារនឹងក្លាយជាតំបន់ពិសេស ដែលអំណោយផលលើវិស័យសំណងលំនៅដ្ឋាន ក៏ដូចជាមណ្ឌលពាណិជ្ជកម្មផ្សេងៗ ដែលកើតមានវត្តមានអគារធំៗ និងខ្ពស់ៗ មិនក្រោម ១៥-២០ ជាន់ ប្រៀបដូចជាតំបន់ កៅលន់ ដែលស្ថិតនៅជ្រោយម្ខាងនៃក្រុងហុងកុងយ៉ាងដូច្នោះដែរ ។ ដោយឡែកសម្រាប់អ្នកវិនិយោគលើវិស័យដីធ្លីនាពេលនេះ ក៏អាចនៅមានឱកាសក្នុងការទទួលបានភាគលាភនៅឡើយ ខណៈដែលតម្លៃដីនៅតំបន់ជ្រោយចង្វារអាចហក់ឡើងកាន់តែខ្ពស់ក្នុងពេលអនាគត់៕

ដោយ ដែន ចែងចាំង

ភ្នំពេញ៖ គំរោងវិនិយោគលើដីឡូត៍ និងលំនៅដ្ឋានដ៏ធំមួយកំពុងចាប់ផ្តើមនៅក្រុងមង្គលបុរី ក្នុងទឹកដី ខេត្តបន្ទាយមានជ័យ ជាតំបន់ដែលកំពុងមានការរីកចម្រើនយ៉ាងឆាប់រហ័ស។

លោកឧកញ៉ាភួ ពុយអគ្គនាយកក្រុមហ៊ុនបៃតង និងអគ្គនាយកធនាគារស្រូវបានថ្លែងឲ្យដឹងកាលពីពេលថ្មីៗនេះថា លោកសម្រេចចិត្តវិនិយោគគំរោងនេះឡើង ដោយសា​រតំបន់នោះប្រជាពលរដ្ឋច្រើន និងមានជីវភាពធូរធារកើនឡើងជាប្រចាំ ដែលធ្វើឲ្យតម្រូវការដីឡូត៍ និងលំនៅដ្ឋានតម្លៃមធ្យមមានការកើនឡើង។លោកបន្តថា គំរោងនេះមានផ្ទៃដីជាង៤០ហិកតា ដែលបាននិងកំពុងពុះដីឡូត៍លក់ និងសាងសង់ផ្ទះក្នុងតម្លៃចន្លោះពី៣០,០០០ទៅ ៤០,០០០ដុល្លារសម្រាប់លក់។

លោកបន្តថា “ក្រៅពីពុះដីឡូត៍លក់ ក្រុមហ៊ុនរបស់លោកក៏ជួយសាងសង់ផ្ទះជូនម្ចាស់ដីក្នុងតម្លៃសមរម្យផងដែរ ស្របតាមស្ថានភាពជាក់ស្តែងនៃជីវភាពប្រជាពលរដ្ឋនៅតំបន់នោះ”។លោកបន្តថា “ខេត្តបន្ទាយមានជ័យ កំពុងមានការរីកចម្រើនយ៉ាងលឿន ដោ​យសារការតភ្ជាប់ហេដ្ឋារចនាសម្ព័ន្ឋនានា ពិសេសការធ្វើពាណិជ្ជកម្មជាមួយប្រទេសថៃ”។

ទោះជាយ៉ាងណាលោកមិនបញ្ជាក់ឲ្យដឹង ពីទំហំទុនវិនិយោគក្នុងគំរោងនេះនៅឡើយ ដោយលោកអះអាងថា គំរោងនេះធ្វើឡើងជាដំណាក់កាលៗ ហេតុនេះពិបាកក្នុងការប្រើប្រាស់ប្រភពទុនជាក់លាក់។

កាលពីពេលថ្មីៗនេះ ក្រសួងសាធារណៈការនិងដឹកជញ្ជូនបានបើកឲ្យដំនើរការខ្សែរថភ្លើងថ្មីមួយ ដោយចាកចេញពីក្រុងប៉ោយប៉ែត មកកាន់ក្រុងសិរីសោភ័ណ្ឌ និងបានតភ្ជាប់ពីក្រុងសិរីសោភ័ណមកកាន់ ក្រុងបាត់ដំបង។

ការតភ្ជាប់ការដឹកជញ្ជូន និងធ្វើដំណើរតាមផ្លូវរថភ្លើងនេះ នឹងជួយធ្វើឲ្យសកម្មភាព ណាណិជ្ជកម្មកាន់តែរសរវើកនៅក្នុងទឹកដីភូមិភាគពាយ័ព្យ នៃប្រទេសកម្ពុជា ដែលជាខេត្តមានទីតាំងជាប់នឹងប្រទេសថៃ៕

ដោយ គង់ សូរិយា

ភ្នំពេញ៖ ជាមួយនឹងការផ្តល់សេវាកម្មប្រកបដោយទំនុកចិត្ត ទីបំផុតក្រុមហ៊ុន KHCN ដែលជាអ្នកអភិវឌ្ឍន៍​ខុនដូ SEA GATE SUITE នៅខេត្តព្រះសីហនុ បានប្រគល់សិទ្ឋលក់ផ្តាច់មុខដល់ក្រុមហ៊ុនអចលនទ្រព្យ Hutton CPL។

នាយកប្រតិបត្តិក្រុមហ៊ុន Hutton CPL លោកសុត វីរៈបានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី៥ ឧសភានេះថា ការសម្រេចចិត្តជ្រើសរើសយកគំរោងខុនដូប្រណីតនេះមកលក់ ដោយសារកត្តាសំខាន់ៗចំនួន៣ ដូចជា ទី១ យើងមានទំនុកចិត្តលើ​ម្ចាស់អភិវឌ្ឍន៍គំរោងនេះ ដែលពួកគេនឹងសាងសង់គំរោងនេះចប់ចុងចប់ដើម ទី២ អ្នកសាងសង់គំរោងនេះ ជាក្រុមហ៊ុនជាប់លំដាប់ថ្នាក់លេខ៣នៅប្រទេសចិន និងជាប់ចំណា​ត់ថ្នាក់លេខ១នៅកម្ពុជា និងទី៣ តម្រូវការបន្ទប់ស្នាក់នៅក្នុងទីក្រុងព្រះសីហនុបានកើនឡើងខ្ពស់។

គំរោងនេះសាងសង់ដោយក្រុមហ៊ុន CSCEC និងវិនិយោគដោយក្រុមហ៊ុន KHCN Investment &Development Co, Ltd។

លោកបន្តថា “អ្នកទិញគំរោងនេះ នឹងទទួលបានការបង់រំលស់ ដោយឥតការប្រាក់   រយៈពេលបីឆ្នាំ ហើយពេលសាងសង់ចប់ អ្នកទិញផ្ទះក្នុងគំរោងនេះនឹងទទួលបានការជួលត្រលប់វិញ ក្នុងអត្រា៨ភាគរយប្រចាំឆ្នាំ”។

គំរោងខុនដូ Sea Gate Suite ជាខុនដូប្រណីត ដែលមានបន្ទប់សរុបចំនួន១១១៨យូនីត និងលក់ក្នុងតម្លៃពិសេសត្រឹម២០០០ដុល្លារក្នុងមួយម៉ែត្រការ៉េ”។ ខុនដូ Sea Gate Suite មានកំពស់សរុប៤៣ជាន់ និងសាងសង់នៅទីតាំងនៅជាប់សាលាខេត្តព្រះសីហនុ ស្ថិតក្នុងសង្កាត់មិត្តភាព ខ័ណ្ឌមិត្តភាព ក្រុងព្រះសីហនុ។

លោកសុត វីរៈបានបន្តថា ជាមួយនឹងទីតាំងសមស្រប និងជាគំរោងដែលមានកំពស់ខ្ពស់ជាងគេក្នុងខេត្តនេះ ដែលអាចមើលឃើញទេសភាពដ៏ស្រស់ស្អាត៣៦០ដឺក្រេចេញពីខុនដូនេះ។ លោកបន្តថា គំរោងនេះនឹងបញ្ចប់ការសាងសង់នៅចុងឆ្នាំ២០២០ ហើយរហូតមកទល់ពេលនេះការបុកគ្រឹះបានបញ្ចប់ហើយ។ គំរោងនេះមានចំណតយាន​យន្តចាប់ពីជាន់ទី១ដល់ទី៧ ជាន់ទី៧ជាផ្សារទំនើប ជាន់ទី៨ ជាក្លឹបហាត់ប្រាណ អាងហែលទឹក និងចាប់ពីជាន់ទី៩ឡើងទៅជាខុនដូ និងសណ្ឋាគារ។

បច្ចុប្បន្នខុនដូប្រមាណ១០គំរោងបាន និងកំពុងសាងសង់នៅទីក្រុងព្រះសីហនុ ដែលធ្វើឲ្យចំនួនខុនដូ សរុបមានប្រមាណ៦០០០យូនីត ស្របពេលតម្រូវការបន្ទប់ស្នាក់នៅបានកើនឡើងយ៉ាងខ្ពស់ ដោយសារលំហូរនៃអ្នកវិនិយោគអន្តរជាតិ ពិសេសអ្នកវិនិយោគ​ចិន និងការទៅទស្សនាកំសាន្តរបស់ភ្ញៀវទេសចរណ៍ជាតិ និងអន្តរជាតិ៕

ដោយគង់ សូរិយា

ភ្នំពេញ៖ អ្នកជំនាញក្នុងវិស័យអចលនទ្រព្យបានហៅឆ្នាំ២០១៨ថា ជាឆ្នាំនៃឧស្សា​ហកម្ម”ផ្សារទំនើប”ដោយសារនៅឆ្នាំនេះ ផ្សារទំនើបតូចធំប្រមាណ១៣នឹងបើកដំនើរការ នៅទីក្រុងភ្នំពេញ និងខេត្តសៀមរាប។

អ្នកនាងអាន សុធីតានាយិកាប្រចាំប្រទេសនៃក្រុមហ៊ុន CBRE CAMBODIAបានថ្លែងឲ្យដឹងកាលពីពេលថ្មីៗនេះថា ផ្សារបែបសហគមន៍ និងផ្សារទំនើបស្តង់ដាអន្តរជាតិចំនួន១២ នឹងបើកដំណើរការនៅទីក្រុងភ្នំពេញភាគច្រើន ដែលធ្វើឲ្យចំនួនផ្សារកាន់តែច្រើនមាននៅទីក្រុងនេះ និងធ្វើឲ្យស្ថានភាពប្រកួតប្រជែងមានការកើនឡើង ប៉ុន្តែចំនួនផ្សារដែលបើកដំនើរការពីមុនមក និងបើកបន្ថែមនៅឆ្នាំនេះ មិនទាន់លើសតម្រូវការនោះទេ ផ្ទុយទៅវិញបើផ្សារទំនើបថ្មីៗផ្គត់ផ្គង់ច្រើនបែបនេះ នឹងធ្វើឲ្យការផ្គត់ផ្គង់លើសតម្រូវ​ការ។

អ្នកនាងបន្តថា “ផ្សារបែបសហគមន៍ និងផ្សារទំនើបធំៗមួយចំនួនដែលបើកនៅឆ្នាំនេះ វាមិនលើសតម្រូវការទេ ដោយអ្នកវិនិយោគបានជ្រើសរើសទីតាំង និងចាប់យកចំណែកអតិថិជនខុសៗគ្នា”។ អ្នកនាងបន្ថែមថា “អំណាចទិញនៅកម្ពុជាកំពុងមានការកើនឡើង ប៉ុន្តែអ្វីដែលយើងកត់សំគាល់ឃើញ គឺផ្សារបែបសហគមន៍ដែលលក់ចំណីអាហារ និងភេសជ្ជៈជាផ្សារឬជាមុខទំនិញដែលមានតម្រូវការច្រើនជាងគេ”។

ផ្សារទំនើបអន្តរជាតិដែលគ្រោងបើកដំនើរការនៅឆ្នាំនេះ មានដូចជា ផ្សារទំនើបស្តង់ដាអន្តរជាតិ AEON MALL2 , THe BRIDGE Commercial, The Prince Central Plaza, Phnom Penh Mega Mall និងផ្សារបែបសហគមន៍ជាច្រើនទៀតដូចជា​ផ្សារបែបសហគមន៍ THE PARK, THE COMMUNE, WB ARENA, HERITAGE WALK ក្នុង​ខេត្តសៀមរាបជាដើម។

នាយកផ្នែកស្រាវជ្រាវនៃក្រុមហ៊ុនប៊ុណ្ណារៀលធីគ្រុប លោកប៉ែន សុខគាបានថ្លែងថា កំនើននៃផ្សារទំនើបនៅកម្ពុជា ដោយសារកត្តាសំខាន់ៗជាច្រើនរួមមាន កំនើនសេដ្ឋកិច្ច ដែលធ្វើឲ្យប្រាក់ចំណូលប្រជាពលរដ្ឋកើនឡើង ហើយជំរុញឲ្យកំលាំងទិញមានការ​កើនឡើង កំនើនប្រជាសាស្រ្តនៅក្នុងទីក្រុង ការឈានមកកាន់ដំណាក់កាលថ្មីរបស់កម្ពុជា ក្នុងនាមជាប្រទេសមានប្រាក់ចំណូលមធ្យមកម្រិតទាបជាដើម។

លោកបន្តថា “កំនើនសេដ្ឋកិច្ច និងការកើនឡើងប្រាក់ចំណូលរបស់ប្រជាពលរដ្ឋជាភាពទាក់ទាញមួយរបស់កម្ពុជា ដែលបានធ្វើឲ្យអ្នកវិនិយោគជាតិ និងអន្តរជាតិវិនិយោគផ្សារទំនើបនៅទីក្រុងភ្នំពេញ”៕

ក្រុមហ៊ុននាំចេញធនធានចិន China Resource Export Company បានសាងសង់អគារខ្ពស់កប់ពពករាង្គដូចក្បាលគ្រាប់ជិតរួចរាល់ហើយដែលគូប្លង់ដោយ ស្ថាបត្យករ លោក Kohn Pedersen Fox ។ បើតាមការជូនដំណឹងពីក្រុមហ៊ុន អគារនេះនឹងដាក់សម្ពោធអោយដំណើរការនៅចុងឆ្នាំ ២០១៨ នេះ ។

អគារខ្ពស់កប់ពពកមានកម្ពស់ ៤០០ ម៉ែត្រត្រូវបានគេស្គាល់ថា មានរូបរាង្គជាទំពាំងឬស្សី ឫ ដូចក្បាល់គ្រាប់ ។ នៅពេលសាងសង់បញ្ចប់អគារនេះនឹងក្លាយជាអាគារដែលខ្ពស់ជាងគេលំដាប់ទី ៣ នៅទីក្រុង Shenzhen ។ អគារនេះត្រូវបានគេដាក់ឈ្មោះជាផ្លូវការថា China Resources Headquarters មានកំពស់ ៦៧ជាន់ ដែលរចនាដោយឡើងដោយ Kohn Pedersen Fox (KPF) នៅក្នុងទីក្រុង Shenzhen ។ អគារនេះមានកំពស់ ៥៩៩ម៉ែត្របច្ចុប្បន្ននេះគឺជាអាគារខ្ពស់ជាងគេលំដាប់ទី ៤ នៅលើពិភពលោក។

អគារដ៏អស្ចារ្យនេះ ត្រូវបានគេសាងសង់ឡើងដោយមានដំបូលកំពស់៦៨.៤ ម៉ែត្រនៅចំកណ្តាលនៃអគារដែលអាចអោយមើលឃើញទេសទេសភាពទីក្រុងទាំងមូលបាន។ អគារនេះស្ថិតនៅជិតឆ្នេរ Shenzhen ភាកខាងលិចនៃទីក្រុងដែលជាកន្លែងបណ្តុំដោយតំបន់ពាណិជ្ជកម្មនៅក្នុងទីក្រុង។

អគារនេះសាងសង់លើទំហំដី ២០០ហិកតា មានទាំងផ្សារទំនើប សារមន្ទីរ ឆាកសំដែង និងកន្លែងមើលភាយន្តជាដើម៕