ដោយ គង់ សូរិយា

ភ្នំពេញ៖ ប្លង់គោលរាជធានីភ្នំពេញ ដែលត្រូវបានរាជរដ្ឋាភិបាលអនុម័តជាផ្លូវការកាលពីប៉ុន្មានឆ្នាំមុន  បានបែកចែករាជធានីចំណាស់នេះជា១៤ តំបន់ខុសៗគ្នា តាមលក្ខណៈប្រជាសាស្រ្ត សេដ្ឋកិច្ច និងកំណើននគរូបនីយកម្ម។

យោងតាមសេចក្តីព្រាងប្លង់គោលរាជធានីភ្នំពេញ ដែល propertyarea.asia សូមលើកយកមកបង្ហាញជាថ្មីបានបង្ហាញថា រដ្ឋាភិបាលបាន​កំណត់លក្ខណៈវិនិច្ឆ័យលើ១៤ចំណុច ដូចជា ទី១ ទម្រង់សេដ្ឋកិច្ចរាជធានីភ្នំពេញ ទី២ការដឹកជញ្ជូន ទី៣ ទីផ្សារអចលនវត្ថុ ទី៤ ទីផ្សារអចលនទ្រព្យ ទី៥ សង្កាត់មិនរៀបរយ ទី៦ ការកកើតនិងការរីកចំរើនរបស់ទីក្រុងពីឆ្នាំ១៨៥០ ដល់ឆ្នាំ១៩៩៣ ទី៧ លក្ខណៈសម្បត្តិរូបសាស្រ្តនិងតួនាទីលំហក្រុង ទី៨ សន្ទុះនិងបុគ្គលិកលក្ខណៈភ្នំពេ ញ ទី៩ ទេសភាព និងសមាសភាគទីក្រុង ទី១០ កសិកម្មនិងនគរូបនីយកម្ម ទី១១ ហេដ្ឋារចនាសម្ព័ន្ឋទីក្រុង ទី១២ មធ្យោបាយនិងសេវាសាធារណៈ ទី១៣ និន្នាការនិងទស្សនវិស័យនៃនគរូបនីយកម្មភ្នំពេញ និងទី១៤ ទស្សនវិស័យសេដ្ឋកិច្ចសង្គមនិងលំហ។​

ប្លង់គោលរាជធានីភ្នំពេញ ត្រូវបានអនុម័តកាលពីឆ្នាំ២០១៥ តាមរយៈអនុក្រិតស្តីពី “ការដាក់ឲ្យអនុវត្តប្លង់គោល ប្រើប្រាស់ដីរាជ​ធានីភ្នំពេ​ញឆ្នាំ២០៣៥”។ យោ​ងតាមមាត្រា២ នៃអនុក្រិតលេខ៧៧ អនបប្រក ចុះថ្ងៃទី៧ មិថុនា​ឆ្នាំ២០១២ បានកំណត់ថា ប្លង់គោលប្រើប្រាស់ដីថ្នាក់រាជធានី ខេត្ត ក្រុង ស្រុក ខ័ណ្ឌជាផែនការកំណត់ចក្ខុវិស័យនិងយុទ្ឋសាស្រ្តរួម សម្រាប់ការអភិវឌ្ឈផ្នែករូបវ័ន្ត​ហេដ្ឋារចនាសម្ព័ន្ឋ និងគមនាគមន៍សំខាន់ៗ និងធ្វើសមាហរណកម្មថ្នាក់រាជធានី ថ្នា​ក់​​ស្រុក ថ្នាក់ខ័ណ្ឌទៅនឹងតំបន់និងថ្នាក់ជាតិ។

អតីតអភិបាលរាជធានីភ្នំពេញ លោកប៉ា សុជាតិវង្សបានថ្លែងថា “គោលដៅប្រើប្រាស់ដីរាជធានីភ្នំពេ​ញឆ្នាំ២០៣៥ ជាឯកសារយុទ្ឋសាស្រ្តបំរើឲ្យមហិច្ឆតារបស់រាជរដ្ឋាភិបាល ក៏ដូចជាសាលារាជធានីភ្នំពេញមាន​គោលដៅ និងទស្សនវិស័យដល់ឆ្នាំ២០៣៥ ក្នុងការគ្រប់គ្រង និងតំរង់ទិសការអភិវឌ្ឈសេដ្ឋកិច្ច ក្នុងព្រំប្រទល់រដ្ឋបាលរាជធានី និងតំបន់ប្រជុំជនពាក់ព័ន្ឋទាំងទ្បាយនៅជាប់ជុំវិញ ឆ្លើយតបបាននឹងកំនើននៃការវិនិយោគឯកជន និងចំនួនប្រជាជនក្នុង​រាជធានី តាមរយៈការតំរង់ទិស និងជំរុញការវិនិយោគសាធារណៈស្របតាមរបបសេដ្ឋកិច្ចទីផ្សារសេរី និងអភិវឌ្ឈន៍តាមបែបប្រជាធិបតេយ្យថ្នាក់ក្រោមជាតិ”។

ប្រជាជនសរុបនៅរាជធានីភ្នំពេញ មានចំនួន១.៦៨៨.០៤៤នាក់ (តាមការធ្វើអង្កេតប្រជាសាស្រ្តកម្ពុជាឆ្នាំ២០​១​៣នៃក្រ​សួងផែនការ)ហើយអាចកើនដល់៣លាននាក់នៅឆ្នាំ២០២០។ កំនើនន​គរូបនីយកម្ម និងកំណើនសាងសង់សំណង់ធំថ្មីៗ លើសពី៥ជាន់មានប្រមាណ៦២៨​អាគារ និងសំណង់បុរីចំនួន១១០ទីតាំង ពង្រាយនៅទាំងខ័ណ្ឌក្នុងក្រុង និងជាយក្រុង​និងបានជំរុ​ញការរីកទីក្រុងទៅតំបន់ខាងក្រៅ ចេញពីខ័ណ្ឌកណ្តាលក្រុងស្ទើរតែហួសពីតំបន់រដ្ឋបាលរបស់ខ្លួន។

លោកម៉េង ប៊ុណ្ណារិទ្ឋមន្រ្តីជាន់ខ្ពស់ក្រសួងរៀបចំដែនដី នគរូបនីយកម្មនិងសំណ​ង់បានថ្លែងថា ក្នុងប្លង់គោលនេះបានរៀបចំរាជធានីភ្នំពេញប្រមាណ១៥តំបន់​ខុសៗគ្នា ដូចជាតំបន់ពាណិជ្ជកម្ម តំបន់លំនៅដ្ឋាន តំបន់ឧស្សាហកម្ម តំបន់កសិកម្ម​តំបន់ដែលត្រូវអភិរ័ក្សជាដើម ប៉ុន្តែនៅពេលប្លង់គោលនេះត្រូវសិក្សាលំអិត តំបន់និមួយៗអាចនឹងមានច្រើនជាងនេះ អាស្រ័យលើស្ថានភាពជាក់ស្តែង។

នៅពេលសាកសួរថាតើទីក្រុងភ្នំពេញ នឹងត្រូវពង្រីកបន្ថែមទៀតឬយ៉ាងណា​លោកម៉េង ប៊ុណ្ណារិទ្ឋបានថ្លែងថា “នៅពេលនយោបាយកម្ពុជានៅតែមានស្ថិរភាព សេដ្ឋកិច្ចកម្ពុជាបន្តកើនទ្បើង និងមានកំណើននៃការអភិវឌ្ឈ ការពង្រីកក្រុងអាចត្រូវ ពិនិត្យតាមស្ថានភាពជាក់ស្តែងរៀងរាល់៥ឆ្នាំម្តង”។លោកបន្ថែមថា“ប្លង់របស់យើងអាចមានការ​លំអៀង ដូច្នេះការពង្រីកទីក្រុងនឹងត្រូវសិក្សាទ្បើងវិញ តាមស្ថានភាពជាក់ស្តែង​នៃការរីកចំរើននគរូបនីយកម្ម និងកំណើនប្រជាសាស្រ្ត”។

លោកច្រឹក សុខនីមអគ្គនាយកក្រុមហ៊ុន Century21 Mekong បានថ្លែងថា នេះជាដំណឹងដ៏ល្អ ដែលយើងបានរង់ចាំរាប់ឆ្នាំមកហើយ។ គ្រប់ទីក្រុងធំៗ នៅតាមបណ្តាប្រទេសនៅលើពិភពលោកសុទ្ឋតែមានប្លង់គោល នៅទ្បើយតែកម្ពុជាមិនទាន់​មាន។ ដូច្នេះការមានប្លង់គោលជាការប្រសើរណាស់ ព្រោះទី១ អាច​បង្ហាញពីរចនា​សម្ព័ន្ឋទីក្រុងច្បាស់លាស់ថា ត្រូវសាងសង់អ្វី និងជាការងាយស្រួលដែលយើងបង្ហា​ញពីប្លង់គោលទីក្រុងរបស់យើងទៅអ្នកវិនិយោគ។

ទី២ អាចដឹងពីតំបន់ណាត្រូវធ្វើអ្វី និងកសាងអាគារកំពស់ប៉ុណ្ណា ទី៣ អាចកាត់បន្ថយការសាងសង់សំណង់អា​ណាធិបតេយ្យ និងទី៤ អាចកាត់បន្ថយផលរំខាននានាលើការសាងសង់លំនៅដ្ឋាន និងទ្រព្យសម្បត្តិសាធារណៈ៕

​ដោយគង់ សូរិយា

​ភ្នំពេញ សេដ្ឋវីទូកម្ពុជាបានលើកឡើងថា កម្ពុជាត្រូវពង្រឹងផ្នែកសំខាន់ពីរទៀត ដើម្បីពង្រឹងនិងជំរុញកំនើនសេដ្ឋកិច្ចរបស់ខ្លួន ជាការពឹងផ្អែកកត្តាខាងក្នុងជាជាងកត្តាខាងក្រៅតែម្យ៉ាង។

​លោកបណ្ឌិតម៉ី កល្យាណប្រធានក្រុមប្រឹក្សាភិបាលវិទ្យាស្ថានសិក្សាដើម្បីការអភិ​វឌ្ឍបានថ្លែងឲ្យដឹងកាលពីពេលថ្មីៗនេះថា សេដ្ឋកិច្ចពិភពលោក បាននិងកំពុងពឹងផ្អែកលើការនាំចេញ ដូចប្រទេសកម្ពុជាផងដែរ ប៉ុន្តែប្រទេសរីកចំរើននានាបានពង្រឹងផ្ទៃក្នុងរបស់ខ្លួន ដើម្បីបង្កើនក៏ដូចជាពង្រឹងមូលដ្ឋានសេដ្ឋកិច្ចរបស់ខ្លួន។លោកបន្តថា សេដ្ឋកិច្ចកម្ពុជាត្រូវពឹងផ្អែកលើកត្តាពីរផងដែរ គឺកត្តាខាងក្រៅ និងកត្តាខាងក្នុង ដែលជាមូលដ្ឋាន​ចាំបាច់មិនអាចខ្វះបាន។

​កត្តាខាងក្រៅគឺត្រូវពឹងផ្អែកលើការនាំចេញ ដែលជាមូលដ្ឋានសំខាន់ក្នុងការអភិ​វ ឌ្ឍ​សេដ្ឋកិច្ចរបស់ខ្លួន និងពង្រីកសក្តានុពលសេដ្ឋកិច្ចរបស់ប្រទេស។ ចំណែកកត្តាខាងក្នុង គឺជាកត្តាមិនអាចខ្វះបាន ដែលកម្ពុជាត្រូវពឹងផ្អែកលើមូលដ្ឋានខ្លួនឯង តាមរយៈការពង្រឹងធនធានមនុស្ស និងបច្ចេកទេស ដើម្បីពង្រឹងនូវធនធានមនុស្ស តាមរយៈការប្រើប្រាស់ជំនាញ ហើយទទួលបានចំណូលកាន់តែច្រើនសម្រាប់ប្រជាជន។

​លោកបណ្ឌិតម៉ី កល្យាណបានបន្តថា “ការពឹងផ្អែកតែកត្តាខាងក្រៅ នឹងធ្វើឲ្យយើង​ជួបហានិភ័យ នៅពេលមូលដ្ឋានក្នុងស្រុករបស់យើងមិនសូវមានភាពរ៉ឹងមាំ”។លោកបន្តថា “សេដ្ឋកិច្ចត្រូវពឹងលើកត្តាទាំងពីរនេះ ប៉ុន្តែការពង្រឹងមូលដ្ឋានធនធានមនុស្ស បច្ចេក​ទេស បច្ចេកវិទ្យាពិតជាសំខាន់”។

​សេដ្ឋកិច្ចពិភពលោកបាននិងកំពុងផ្លាស់ប្តូរ តាមរយៈបដិវត្តន៍ឧស្សាហកម្មទី៤ ដែលប្រើប្រាស់ផ្នែកបច្ចេកវិទ្យាជាចម្បង។

​រដ្ឋាភិបាលកម្ពុជា បានដាក់ចេញនូវគោលនយោបាយអភិវឌ្ឍន៍វិស័យឧស្សាហកម្ម​ឆ្នាំ២០១៥ ២០២៥ ដើម្បីពង្រឹងមូលដ្ឋាន និងពង្រីកសក្តានុពលសេដ្ឋកិច្ចរបស់ខ្លួនដោយ​ផ្លាស់ប្តូរនិន្នាការពីកំលាំងពលកម្មបែបអតិពលកម្ម ទៅប្រើប្រាស់កំលាំងពលកម្មដែលមានជំនាញខ្ពស់ និងទទួលបានតម្លៃបន្ថែមកាន់តែច្រើន៕

ដោយគង់ សូរិយា

​ភ្នំពេញ៖ ការវិនិយោគសាងសង់ព្រលានយន្តហោះ និងលំនៅដ្ឋានមជ្ឈ​មណ្ឌ​លពាណិជ្ជកម្ម និងកំពង់ផែទឹកជ្រៅថ្មីមួយ ពីសំណាក់ក្រុមហ៊ុនTianjin Union Development Group (TUDG) នឹងធ្វើឲ្យទឹកដីខេត្តកោះកុងកាន់តែមានការីកចម្រើនលឿនថែមទៀត។

​ស្ថាបនិកនិងជាអគ្គនាយកនៃគេហទំព័រ Propertyarea.asia លោកលាងគង់ យិនបានថ្លែងឲ្យដឹងនាព្រឹកថ្ងៃអាទិត្យទី២៧ ឧសភានេះថា ហេដ្ឋារចនាសម្ព័ន្ឋពិតជាវិស័យស្នូលមួយ ក្នុងការជម្រុញកំនើនសេដ្ឋកិច្ចកម្ពុជា ក៏ដូចជាបណ្តាប្រទេស​​នានា ព្រោះពេលរដ្ឋាភិបាល ក៏ដូចជាវិស័យឯកជនចាប់ផ្តើមសាងសង់នៅតំបន់ណាសកម្មភាពសេដ្ឋកិច្ច ពាណិជ្ជកម្មនឹងកើនឡើងនៅតំបន់នោះជាស្វ័យប្រវត្តិ។​ជាក់ស្តែងព្រលានយន្តហោះថ្មីនេះ នឹងផ្តល់ជម្រើសការធ្វើដំណើរ និងការតភ្ជាប់ផ្លូវអាកាសនៅកម្ពុជា និងថ្នាក់តំបន់កាន់តែមានសភាពរសរវើកថែមទៀត។

​លោកបន្តថា “ជាក់ស្តែងតម្លៃដីធ្លីនៅខេត្តកោះកុង បាននិងកំពុងឡើងថ្លៃរួចទៅហើយ ដោយសារគំរោងវិនិយោគនានា ពិសេសគំរោងវិនិយោគរបស់អ្នកវិនិយោគមកពីប្រទេសចិន”។លោកបន្តថា “ខេត្តកោះកុងមានសក្តានុពលទាំងធន​ធានធម្មជាតិ និងសេដ្ឋកិច្ច ដោយសារខេត្តនេះមានព្រំប្រទល់ជាប់នឹងប្រទេសថៃ ដែលធ្វើឲ្យលំហូរពាណិជ្ជកម្ម ទេសចរណ៍ជាមួយប្រទេសនេះ”។

​ទីប្រឹក្សាសមាគមទីភ្នាក់ងារទេសចរណ៍កម្ពុជា លោកហូ វណ្ឌីបានថ្លែងថា នៅពេលមានសកម្មភាព និងលំហូរភ្ញៀវទេសចរណ៍ទៅដល់ទីណា សកម្មភាព សេដ្ឋកិច្ច និងពាណិជ្ជកម្មតែងតែកើតឡើងនៅតំបន់នោះ។លោកបន្តថា មានន័យ​ថា​ទេសចរណ៍ តែងតែនាំមុខសកម្មភាពពាណិជ្ជកម្ម។

​អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល លោកស៊ិន ចាន់សិរីវុត្ថាបានថ្លែងថា ការសាងសង់ព្រលានយន្តហោះនេះ បាននិងកំពុងចាប់ផ្តើម​យ៉ាង​សកម្ម ប៉ុន្តែការសាងសង់លឿនឬយឺត អាស្រ័យលើល្បឿននៃការអភិវឌ្ឍន៍រមណីយដ្ឋាន និងមជ្ឈមណ្ឌលពាណិជ្ជកម្មរបស់ពួកគេនៅក្នុងស្រុកថ្មបាំង និបុទុមសាគរក្នុងខេត្ត​កោះកុង។

​ក្រុមហ៊ុន Tianjin Union Development Group បានទទួលដីសម្បទានពីរដ្ឋាភិ​បាលជាង៥ម៉ឺនហិកតា ដែលគ្របដណ្តប់ស្រុកស្រុកពីររបស់ខេត្តកោះកុង ជាអ្នក​សាងសង់ព្រលានយន្តហោះអន្តរជាតិថ្មីនេះ។ ក្រុមហ៊ុននេះគ្រោងបោះទុនវិនិយោគប្រមាណ៥០០០លានដុល្លារអាមេរិក។

​ទោះជាយ៉ាងណាតាមព៌តមានរបស់ក្រុមហ៊ុននេះ នាពេលកន្លងមកបានឲ្យដឹងថា រដ្ឋាភិបាល​កម្ពុជាបានអនុម័ត នូវគំរោងសាងសង់ព្រលានយន្តហោះអន្តរជាតិថ្មី ដែលវិនិយោ​គដោយក្រុមហ៊ុនTianjin Union Development Group ជាក្រុមហ៊ុនដែលបាន និងកំពុងវិនិយោគលើរមណីយដ្ឋាន ​ទេសចរណ៍លំដាប់អន្តរជាតិនៅខេត្តកោះកុង។

​តំណាងក្រុមហ៊ុនTainjin Union Development Groupលោកស្រីប៊ែលឡា ហ្សាងបានមានប្រសាសន៍ថា ក្រុមហ៊ុនបាននិងកំពុងសាងសង់ព្រលានយន្តហោះ​នេះ អាចទទួលអ្នកដំណើរបាន១០លាននាក់ក្នុងមួយឆ្នាំ និងអាចចុះចតយន្តហោះខ្នាតធំBoing៣៨០ ហើយក្រុមហ៊ុនបានធ្វើការសិក្សាពីភូមិសាស្រ្ត និងកំណត់ទីតាំងសម្រាប់ព្រលានយន្តហោះ​នេះរួចហើយ។

​បច្ចុប្បន្នក្រុមហ៊ុនបាន និងកំពុងដំណើរការគំរោងរមណីយដ្ឋាន លំដាប់ប្រ​ណីតនៅខេត្តកោះកុងរួចហើយ ដែលរួមមានសណ្ឋាគារលំដាប់ផ្កាយ៥ភោជនីយដ្ឋាន ទីលានវាយកូនហ្គោលលំដាប់អន្តរជាតិជាដើម៕

ដោយគង់ សូរិយា

​ភ្នំពេញ៖ លំនៅដ្ឋានបែបលំហែរកាយប្រណីតថ្មីមួយ ដែលបោះទុនវិនិយោគ៧,៥លានដុល្លារអាមេរិក ដែលជាការវិនិយោគរបស់អ្នកវិនិយោគអ៊ីតាលីបានប្រកាសលក់ជាផ្លូវការ។

​គំរោងនេះនឹងសាងសង់បែរមុខទៅមាត់ទន្លេមេគង្គក្រោម ស្ថិតក្នុងសង្កាត់ព្រែកឯង ខ័ណ្ឌច្បារអំពៅ រាជធានីភ្នំពេញ។ គំរោងនេះមានការរចនាម៉ូតផ្ទះតាមរចនាបទអ៊ីតាលី និងដែលមានផ្ទះសរុបចំនួន១៧វីឡា ដែលជាប្រភេទវីឡាប្រណី​ត ដោយលក់ក្នុងតម្លៃចន្លោះពី២០៦,០០០ដល់ជាង៩៩ម៉ឺនដុល្លារអាមេរិក។

​យោងតាមសេចក្តីប្រកាសព៌តមានរបស់ក្រុមហ៊ុនCentury21 Cambodiaដែលបានក្លាយជាភ្នាក់ងារលក់ផ្តាច់មុខនៃគំរោងនេះបានឲ្យដឹងថា គំរោងវីឡាប្រណីតនេះនឹង​សាងសង់លើផ្ទៃដីជាង៧០០០ម៉ែត្រការ៉េ និងជាគំរោងវិនិយោគដោយអ្នកវិនិយោគមកពីបារាំង អ៊ីតាលី និងអ្នកវិនិយោគក្នុងស្រុក។

សេចក្តីប្រកាសបន្តថា “វាជាគំរោងវីឡាប្រណីត ដែលមានPrivate swimming Pool និងមានការឌីសាញម៉ូតផ្ទះបែបអ៊ីតាលី និងបំពាក់សម្ភារៈបរិក្ខាសុទ្ឋតែជាផលិតផល​នាំចូលមកពីប្រទេសអ៊ីតាលីផងដែរ”។

អ្វីកាន់តែគួរឲ្យចាប់អារម្មណ៍ គឺវីឡាដែលមានតម្លៃជាង៩៩ម៉ឺនដុល្លារ ដែលមានតែចំនួនពីរក្នុងគំរោងនេះ ជាប្រភេទវីឡា ដែលមានរោងកុនឯកជន មានបណ្ណាល័យ មានកន្លែងលេងស្នូកឃឺ ជាដើម។

សេចក្តីប្រកាសព៌តមានបានឲ្យដឹងទៀតថា ជាមួយនឹងទស្សនទាននៃការអភិវឌ្ឍ​ថ្មី គំរោងនេះនឹងរៀបចំការសាងសង់ និងរចនាម៉ូតផ្ទះ ដោយប្រើប្រាស់ប្រព័ន្ឋសូឡាមកប្រើ​ប្រាស់ច្រើន ដើម្បីកាត់បន្ថយការប្រើប្រាស់ថាមពលអគ្គិសនី និងជាការចូលរួមលើកកំពស់ការការពារបរិស្ថានផងដែរ។

នាយកប្រតិបត្តិនៃក្រុមហ៊ុនCentury21 Cambodiaបានថ្លែងថា នេះជាគំរោងវីឡា​ប្រណីតតំបូងបំផុតនៅកម្ពុជា ដែលមានការរចនាម៉ូតផ្ទះដ៏ទំនើប និងមានរចនាបទបែបអ៊ីតាលី។ អ្វីដែលកាន់តែពិសេសវីឡាប្រណីតនេះ សាងសង់ឡើងនៅជាប់មាត់ទន្លេ ដែលមានខ្យល់អាកាស និងទេសភាពដ៏ស្រស់ត្រកាល និងអាចមើលឃើញសម្រប់ទីក្រុងភ្នំពេញយ៉ាងប្រណីត។

លោកបន្តថា “ការសាងសង់លំនៅដ្ឋាននៅតាមមាត់ទន្លេ មិនសូវពេញនិយមនៅកម្ពុជាច្រើននៅឡើយទេ ប៉ុន្តែគំរោងបែបនេះមានការពេញនិយម នៅបណ្តាប្រទេសរីកចម្រើននានា”។លោកបន្តថា “លំនៅដ្ឋាននៅតាមមាត់ទន្លេបែបនេះ នឹងមានការដាក់តម្លៃបន្ថែមខ្ពស់ ធៀបនឹងលំនៅដ្ឋាននៅតា

ដោយ គង់ សូរិយា

ភ្នំពេញ៖ គំរោងអចលនទ្រព្យយក្ស ដែលបោះទុនវិនិយោគជាង២០០០លានដុល្លារ​អាំមេរិក បានសម្រេចប្រកាសលក់នាថ្ងៃនេះហើយ នៅសាលតាំងបង្ហាញគំរោង ស្ថិតនៅតាមបណ្តោយមហាវិថីព្រះមុនីវង្ស។

លោក RAYSON មន្រ្តីជាន់ខ្ពស់ផ្នែកទីផ្សារ នៃគំរោង R&F CITY ដែលបានវិនិយោ គគំរោងដ៏ធំមួយ នៅតាមបណ្តោយមហាវិថីសម្តេចតេជោហ៊ុន សែន(ផ្លូវ៦០ម៉ែត្រ)បានមានប្រសាសន៍ឲ្យដឹងថា គំរោងនេះមានផ្ទះសម្រាប់ធ្វើអាជីវកម្មចំនួន៣៨ និងមានខុនដូ​សរុបជាង៥០០០យូនីត។ គំរោងនេះមានអាគារខ្ពស់ៗចំនួន៣៣ជាន់ សរុបចំនួន២០អាគារ ដែលធ្វើឲ្យគំរោងនេះ ក្លាយជាសហគមន៍ដ៏រសរវើកមួយនាពេលអនាគត។

លោកបន្តថា “គោលនយោបាយផ្លូវសូត្រ ទំនាក់ទំនងល្អរវាងរដ្ឋាភិបាលចិននិងកម្ពុជា និងកំនើនសេដ្ឋកិច្ចដ៏រ៉ឹងមាំរបស់កម្ពុជា ទើបក្រុមហ៊ុនសម្រេចចិត្តចូលមកវិនិយោគនៅ​ទីក្រុងភ្នំពេញ”។លោកបន្តថា “គំរោងនេះស្ថិតនៅលើផ្ទៃដីជាង៧ហិកតា និងបានបោះទុន​វិនិយោគសរុបជាង២០០០លានដុល្លារអាមេរិក”។

លោក RAYSON បានថ្លែងឲ្យដឹងទៀតថា គំរោងនេះយើងផ្តោតសំខាន់លើសហគមន៍ជំនួញ និងប្រជាជនចិនដែលបានវិនិយោគ និងរស់នៅកម្ពុជា និងប្រជាជនកម្ពុជា ដែលចង់ផ្លាស់ប្តូរ Lifestyle របស់ពួកគេ ព្រោះអនាគតប្រជាជននៅទីក្រុងភ្នំពេញនឹងសម្រេ​ចចិត្តរស់នៅខុនដូកាន់តែច្រើន ដោយសារការរស់នៅតាមខុនដូធ្វើឲ្យមានភាពងាយស្រួល កក់ក្តៅ ជាមួយសេវាសន្តសុខ អនាម័យ និងសេវាកម្មដ៏ទាក់ទាញជាច្រើនទៀត។

លោកឧកញ៉ា នួន រិទ្ឋី អគ្គនាយកក្រុមហ៊ុនអចលនទ្រព្យ Khmer Foundation Appraisal បានថ្លែងថា ការប្រកាសលក់គំរោងដែលមានផ្ទះចំនួន៥០០០យូនីត ស្តាប់ទៅ​ដូចមានចំនួនច្រើន ប៉ុន្តែបើមើលពីគោលនយោបាយលំនៅដ្ឋាននៅកម្ពុជា ចំនួននេះនៅ​មានកាខ្វះខាតនៅឡើយ។ លោកបន្តថា បើមើលសក្តានុពលនៅកម្ពុជា លំនៅដ្ឋានក្នុងចំនួននេះនៅតែមានតម្រូវការច្រើន ដោយសារកម្ពុជាមានច្បាប់អនុញ្ញាត្តឲ្យជនបរទេស អាចមានសិទ្ឋទិញផ្ទះចាប់ពីជាន់ទី១ឡើងទៅ និងច្បាប់វិនិយោគកម្ពុជាបានអនុញ្ញាត្តឲ្យ ជនបរទេសមានសិទ្ឋកាន់កាប់ភាគហ៊ុន១០០ភាគរយនៅកម្ពុជា។

លោកឧកញ៉ាបានបន្តថា “កម្ពុជាជាបេះដូងអាស៊ាន និងគោលនយោបាយផ្លូវសូត្រ កម្ពុជាទទួលបានផលប្រយោជន៍ច្រើន និងជាប្រទេសដែលគេវិនិយោគទទួលបានផលចំណេញ ទើបពួកគេចូលមកវិនិយោគនៅទីនេះ”។លោកបន្តថា “កម្ពុជាស្ថិតនៅចំចំណុច​កណ្តាលតំបន់អាស៊ាន ដែលការធ្វើដំណើរចំណាយពេលត្រឹម២ម៉ោងកន្លះប៉ុណ្ណោះយ៉ាង​យូរពីបណ្តាប្រទេសជាសមាជិកអាស៊ានមកកម្ពុជា ហេតុនេះនាពេលអនាគតកម្ពុជានឹងក្លាយជាhubមួយនៅក្នុងតំបន់នេះ”៕

ដោយរ៉ាវី

ភ្នំពេញ៖ បន្ទាប់ពីបានបើកដំណើរសាកល្បងអស់រយៈពេលជាង៣ឆ្នាំកន្លងទៅនេះ អគារពាណិជ្ជកម្មដ៏ធំ និងប្រណីតជាងគេបំផុតនៅកម្ពុជា ដែលមានឈ្មោះVattanac Capital នឹងធ្វើការសម្ពោធជាផ្លូវការនៅត្រឹមល្ងាចថ្ងៃទី26 ខែឧសភា ឆ្នាំ2018 នេះ ក្រោមវត្តមានវត្តរបស់សម្តេច តេជោ ហ៊ុន សែន រួមជាមួយនឹងមន្ដ្រីជាន់ខ្ពស់របស់រដ្ឋាភិបាលកម្ពុជា ព្រមទាំងបណ្តាអ្នកជំនួញធំៗជាតិ-អន្តរជាតិផងដែរ។

ការបើកសម្ភោធអាគារពាណិជ្ជកម្មចម្រុះ ដែលឈរលំដាប់អន្តរជាតិនៅទីក្រុងភ្នំពេញនេះ សណ្ឋាគារប្រណីតលំដាប់ផ្កាយ5 Rosewood ក៏នឹងបើកសម្ភោធព្រមគ្នាផងដែរ។ សណ្ឋាគារលំដាប់ពិភពលោកមួយនេះ ត្រូវបានគេដឹងថា មានបន្ទប់ចំនួន148បន្ទប់ មានអាងហែលទឹកដ៏ធំទំហំរហូតដល់ជាង20ម៉ែត្រ រួមជាមួយកន្លែងអង្គុយទទួលអាហារ និងភេសជ្ជៈ Sky bar នាពេលរាត្រី។

អគារវឌ្ឍនៈខាប់ពីតាល់ ដែល​មាន​រាង​ដូច​ដង​ខ្លួន​សត្វ​នាគ ​ត្រូវបាន​គេ​គិត​ថា មាន​ហុងស៊ុយ​ល្អ​នេះ ​មាន​កម្ពស់​សរុប​ចំនួន188ម៉ែត្រ ស្មើនឹង39ជាន់ ត្រូវ​បាន​គេ​ចាត់​ចូល​ជា​អគារ​ដ៏​ខ្ពស់​មួយ​ក្នុង​ប្រទេស​កម្ពុជា​នា​ពេល​បច្ចុប្បន្ន​នេះ។ អគារ​នេះ​ត្រូវ​គេ​បែង​ចែក​ចេញ​ជា4 ផ្នែក​សំខាន់ៗ គឺ​តំបន់​ការិយាល័យ​កម្រិតA ​មាន​ចំនួន21ជាន់ តំបន់​លក់​វត្ថុ​ប្រណីតៗ កន្លែងកម្សាន្តដ៏ស្រស់ស្អាត និងប្រណីតភាព រួមជាមួយសណ្ឋាគារ​លំដាប់​ផ្កាយ 5 Rosewood ចាប់ពីជាន់ទី25 រហូតដល់ជាន់ទី39 ដែលមានប្រភពដើមនៅសហរដ្ឋអាមេរិក ដែល​ប្រើ​ប្រាស់​បច្ចេកវិទ្យា​ទំនើបៗ​បំផុត។

អគារពាណិជ្ជកម្ម Vattanac Capital ត្រូវបានជាប់ចំណាត់ថ្នាក់លេខ1 ថាជាអគាពាណិជ្ជកម្មដ៏ធំ និងប្រណីតបំផុតនៅក្នុងតំបន់អាស៊ី (Gold Certification in LEED ) នៅក្នុងកម្មវិធីពាន់រង្វាន់ Property Asia Award៕

ដោយដែន ចែងចាំង

ភ្នំពេញ៖ បន្ទាប់ពីចាក់ខ្សាច់បំពេញ ក្រុមហ៊ុនOCICបានវិនិយោគទឹកប្រាក់ ១៥០លានដុល្លារ លើការ​សាងសង់​ហេដ្ឋារចនាសម្ព័ន្ឋនានានៅក្នុងទីក្រុងរណបជ្រោយចង្វារ។

អគ្គនាយករងក្រុមហ៊ុន OCIC លោកទូច សំណាងបានមានប្រសាសន៍ឲ្យដឹងនៅពេលថ្មីៗនេះថា ក្រុមហ៊ុនបាននិងកំពុងសាងសង់ហេដ្ឋារចនាសម្ព័ន្ឋ ដោយមានផ្លូវប្រវែងសរុបប្រមាណ៣០គីឡូម៉ែត្រ និងប្រព័ន្ឋលូប្រវែង៦០គីឡូ​ម៉ែ​ត្រនៅក្នុងទីក្រុងរណបនេះទាំងមូល។ លោកបន្តថា ក្រុមហ៊ុនបានចំណាយថវិកាសាងសង់ប្រមាណ១៥០លានដុល្លារ ដោយមិនទាន់គិតបញ្ចូលតម្លៃនៃការបូមខ្សាច់ចាក់បំពេញនៅឡើយទេ។

លោកបន្តថា ពេលនេះក្រុមហ៊ុនកំពុងសាងសង់ផ្ទះល្វែង លក់​ក្នុងតម្លៃចន្លោះ១៥ទៅ២៥ម៉ឺនដុល្លារ និងបានបើកលក់បណ្តើរៗហើយ ។ ក្រុមហ៊ុនក៏កំពុង​សាងសង់អាគារពាណិជ្ជកម្មកំពស់១០ ទៅ១២ជាន់លក់ក្នុងតម្លៃ៣ទៅ៤លានដុល្លារ និងអាគារិយាល័យកណ្តាលរបស់ OCIC កំពស់២០ជាន់នៅតំបន់នេះ ដែលបោះទុនវិនិយោគទឹកប្រាក់​ប្រ​មាណ៣០លានដុល្លារអាមេរិក”។

លោកបន្តថា “យើងគ្រោងរៀបចំតំបន់នេះ ជាទីក្រុងពាណិជ្ជកម្មនាពេលអនាគត ហេតុនេះទើបយើងមិនសាងសង់វីឡា ឬផ្ទះល្វែងច្រើននោះទេ ប៉ុន្តែយើងស្វាគមន៍អ្នកវិនិយោគបរទេស ដែលចង់ទិញដីដើម្បីសាងសង់មជ្ឈមណ្ឌល ពាណិជ្ជកម្មនៅក្នុងទីក្រុងនេះ​”។ លោកបន្តថា “យើងចង់ឲ្យទីក្រុងនេះក្លាយជាតំបន់ពាណិជ្ជកម្មទី២ ដូចតំបន់ពាណិជ្ជ​កម្មស្ថិតនៅតាមមហាវិថីព្រះមុនីវង្សនាពេលអនាគត”។

លោកទូច សំណាងបានបន្តថា ទីក្រុងនេះនឹងត្រូវអភិវឌ្ឈន៍ តាមបែប Smart City ដោយមានការកប់ខ្សែរភ្លើងក្រោមដី អំពូលបំភ្លឺLED បំពាក់ដោយកាមេរ៉ា និងទឹកកខ្វក់ចេញពីអាគារនិមួយៗ សុទ្ឋតែឆ្លងកាត់ប្រព័ន្ឋចម្រោះ មុនបង្ហូរ​ចេញទៅកាន់ទន្លេ។

ទីក្រុងរណបជ្រោយចង្វារ ស្ថិតនៅលើទឹកដីក្នុងសង្កាត់ចំនួនបី គឺសង្កាត់ជ្រោយចង្វារ ព្រែកលាប និងសង្កាត់ព្រែកតាសេក ក្នុងខ័ណ្ឌជ្រោយចង្វារ។

អ្នកនាំពាក្យរដ្ឋបាលក្រុងភ្នំពេញ​លោកម៉េត មាសភ័ក្តីបានថ្លែងថា រដ្ឋាភិបាលបាន​ផ្តល់ដីសម្បទានដល់ក្រុមហ៊ុនOCIC អភិវឌ្ឍន៍តំបន់នេះជាទីក្រុងរណប ហើយជាលទ្ឋផលខ្សាច់ត្រូវបានចាក់បំពេញរួចហើយ ប៉ុន្តែការអភិវឌ្ឍរបស់វិស័យឯកជនត្រូវតែធ្វើតាម​ប្លង់គោលអភិវឌ្ឍន៍ក្រុង តាមរយៈការកសាងហេដ្ឋារចនាសម្ព័ន្ឋ ប្រព័ន្ឋលូចម្រោះទឹកកខ្វ​ក់ជាដើម ដើម្បីធ្វើឲ្យប្រាកដថា ការអភិវឌ្ឈធ្វើឡើងប្រកបដោយនិរន្តរភាព និងធានាបាននូវនិរន្តរភាពបរិស្ថាន។

លោកបន្តថា “ទស្សនទាននៃការអភិវឌ្ឍតំបន់នេះ ជាគំរោងរបស់ក្រុមហ៊ុនដែលត្រូវអនុវត្តន៍តាមផែនការរបស់ខ្លួន ព្រោះទីតាំងនេះ គឺជាទីក្រុងរណបដែលនឹងបណ្តុំដោ​យប្រជាពលរដ្ឋ ដែលនឹងរីកដុះដាលចេញពីទីក្រុង”។លោកបន្តថា “តំបន់និមួយៗមានមាន​សក្តានុពល និងភាពពិសេសដោយឡែកៗពីគ្នា ប៉ុន្តែការកសាងហេដ្ឋារចនាសម្ព័ន្ឋនានាភ្ជាប់ទៅតំបន់នេះនាពេលអនាគត នឹងធ្វើឲ្យទីក្រុងនេះមានការរីកចម្រើននាពេលអនាគត”៕

ដោយគង់ សូរិយា

ភ្នំពេញ៖ ក្រុមហ៊ុនអចលនទ្រព្យខ្នាតយក្សចំនួន៥ បាននិងកំពុងចូលមកវិនិយោគនៅទីក្រុងភ្នំពេញ តាមរយៈការសាងសង់គំរោងធំៗដ៏អស្ចារ្យ ដែលកំពុងផ្លាស់ប្តូរមុខមាត់ទីក្រុងនេះយ៉ាងលឿន។

ក្រុមហ៊ុនទាំងនោះរួមមាន ទី១ ក្រុមហ៊ុន Prince Real Estate Group ដែលបាននិងកំពុងវិនិយោគ​សាងសង់​ខុនដូ Diamond One នៅទីក្រុងកោះពេជ្រ គំរោងខុនដូ Prince Plaza, Prince Modern Plaza នៅតាមហាវិថីព្រះនរោត្តម និងគំរោងជាច្រើនទៀតនៅ​ខេត្តព្រះសីហនុ ដោយគ្រោងបោះទុនវិនិយោគ៥០០០លានដុល្លារនៅកម្ពុជា។ ទី២ ក្រុមហ៊ុន R&F Properties,បាននិងកំពុងសាងសង់អាគារកំពស់៣៣ជាន់ ចំ​នួន២០អាគារស្ថិតនៅតាមបណ្តោយមហាវិថីសម្តេចតេជោហ៊ុន សែន ដែលគ្រោងបោះទុនវិនិយោគជាង២០០០លានដុល្លារ និងគំរោងមួយទៀតស្ថិតនៅអតីតរងចក្រស័ង្កសី ស្ថិតនៅតាមបណ្តោយមហាវិថីព្រះមុនីវង្ស ។

ទី៣ ក្រុមហ៊ុន SINO Plaza ដែលបាននិងកំពុងសាងសង់ គំរោងមជ្ឈមណ្ឌលមណ្ឌលពាណិជ្ជកម្មកំពស់៤៥ជាន់ នៅអតីតទីតាំងផ្សារបឹងត្របែក ដែលប្រកាសបោះទុនវិនិយោគ២៥០លានដុល្លារ និងគ្រោងវិនិយោគគំរោងជាច្រើនទៀត។

ទី៤ ក្រុមហ៊ុន Green Land Group​ ជាក្រុមហ៊ុនយក្ស ដែលបានប្រកាសបោះទុនវិនិយោគ៧០០០លានដុល្លារនៅកម្ពុជាបន្ថែមនាពេលខាងមុខ ហើយក្រុមហ៊ុននេះបានប្រកាសទិញអាគារកំពស់៣៨ជាន់ចំនួន៣ នៃគម្រោង D.I RIVIERA និងទៅ៥ ក្រុមហ៊ុន Guangzhou Yuetai Group ដែល​ជា​ក្រុមហ៊ុន​អភិវឌ្ឍន៍​របស់​ចិន​កំពុង​មាន​ប្រតិបត្តិការ​លើ​គម្រោង​ ជាច្រើន​នៅ​កម្ពុជា​ដូចជា East One និង East View និងគំរោងដ៏ធំមួយទៀតស្ថិតនៅផ្លូវវេងស្រេង(តំបន់លូ៥)។ ក្រុមហ៊ុននេះបានបោះទុនវិនិយោគរាប់ពាន់លានដុល្លារនៅកម្ពុជាផងដែរ។

ក្រុមហ៊ុន Guangzhou Yuetai Group បានប្រកាសពី​ផែនការអភិវឌ្ឍន៍​នៅ​លើ​ដី​ដែល​មាន​ទំហំ​៩,២៥ ​ហិកតា​នា​មាត់​ទន្លេសាប​ក្នុង​រាជធានី​ភ្នំពេញ​។ គម្រោង​ថ្មី​នោះ​នឹង​មាន​ឈ្មោះ​ថា Harbour Bay ដែល​អាច​មាន​អគារ​ខ្ពស់ៗ​ចំនួន​ ២៤ ស្ថិត​តាម​ឆ្នេរ​ទន្លេ ចាប់ពី​គល់ស្ពាន​ជ្រោយចង្វារ​ទៅ​ដល់​សួនច្បារ​ផ្សារ​រាត្រី​។ នេះ​បើ​យោង​តាម​គម្រោង​រចនា​ប្លង់​។

លោក RAYSON មន្រ្តីផ្នែកលក់ជាន់ខ្ពស់នៃក្រុមហ៊ុន R&F Propertiesបានមានប្រសាសន៍ឲ្យដឹងនាពេលថ្មីៗនេះថា ក្រុមហ៊ុន​ចូល​មក​បោះទុន​វិនិយោគ​នៅ​ប្រទេស​កម្ពុជា​ក្នុង​ឆ្នាំ​ ២០១៧​។ កម្ពុជា គឺជា​ប្រទេស​ទី​ ២ ក្នុង​តំបន់​អាស៊ាន​ដែល​ក្រុមហ៊ុន​បាន​មក​វិនិយោគ បន្ទាប់ពី​ប្រទេស​មីយ៉ាន់ម៉ា​។ ហេតុផល​ដែល​យើង​មក​ទី​នេះ ដោយសារ​គោលនយោបាយ «​ខ្សែ​ក្រវាត់​ ១ ​ផ្លូវ ​១» ដែល​ផ្តួចផ្តើម​ដោយ​លោក​ប្រធានាធិបតី ស៊ី ជីនភីង ខណៈ​កម្ពុជា ​ជា​ប្រទេស​មាន​លក្ខណពិសេស ​ដែល​នឹង​ទទួល​ផលប្រយោជន៍​ច្រើន​ពី​ នយោបាយ​នេះ​។

លោកបន្តថា​”យើង​ចាប់ផ្តើម​គម្រោង​នៅ​មហាវិថី​សម្តេច​តេជោ ហ៊ុន សែន (​ផ្លូវ​ ៦០ ​ម៉ែត្រ​) ព្រោះ​យើង​ចង់​ផ្តល់​នូវ​បែប​ផែន​ជីវិត​ថ្មី​ ១ សម្រាប់​ប្រជាជន​ខ្មែរ និង​សហគមន៍​ចិន​ដែល​មក​វិនិយោគ និង​ធ្វើការ​នៅ​ប្រទេស​កម្ពុជា​”។

R&F City បាន​ចាប់ផ្តើម​ដំណើរការ​សាងសង់​កាលពី​ខែ​មីនា​ឆ្នាំ​ ២០១៨ នេះ​ដោយ​គ្រោង​នឹង​បញ្ចប់​ក្នុង​ឆ្នាំ​ ២០២០​។ គម្រោង​នេះ​មាន​ទឹកប្រាក់​វិនិយោគ​ជាង​ ២ ​ពាន់​លាន​ដុល្លារ​អាមេរិក​។ គម្រោង​នេះ​មាន​ផ្ទះ​ស្នាក់នៅ​ចំនួន ៥២៣២ ​យូនីត រួម​ជាមួយ​ក្លិប​កីឡា​ទំហំ​ ៣២០០ ​ម៉ែត្រការ៉េ​ផ្ទះ​បែប​អាជីវកម្ម​ចំនួន​ ៣៨ និង​មាន​សួនច្បារ​ដ៏ធំ​ទៀត​ផង​។ គម្រោង​នេះ​បាន​ចាប់ផ្តើម​បើក​លក់​ហើយ ដោយ​យើង​ផ្តោត​លើ​ទីផ្សារ​នៅ​ប្រទេស​ចិន និង​កម្ពុជា​។ សំណង់ និង​ការ​រចនា​របស់​គម្រោង​ផ្តោត​ជាពិសេស​លើ​អតិថិជន​ជនជាតិ​ចិន​ដែល​មាន​ ជីវភាព​ខ្ពស់ និង​ចង់​បាន​ជីវិត​រស់នៅ​បែប​ស៊ីវិល័យ​។

លោក RAYSON បានបន្តថា “យើង​ក៏​ផ្តោត​លើ​អតិថិជន​ជនជាតិ​ខ្មែរ​ផង​ដែរ ​ព្រោះ​ខ្ញុំ​គិត​ថា​នៅពេល​ អនាគត​ប្រជាជន​ខ្មែរ​នឹង​ផ្លាស់ប្តូរ​ទម្លាប់​ការ​រស់ទៅ​រស់នៅ​ក្នុង​ខុនដូ ឬ​អាផាតមិន​ដោយសារ​ការរស់នៅ​ខុនដូ ឬ​អាផាតមិន គឺ​មាន​ភាព​ងាយស្រួល និង​មាន​សុវត្ថិភាព​”៕