ដោយ គង់ សូរិយា

ភ្នំពេញ៖ អ្នកវិនិយោគជាតិ និងអន្តរជាតិបានបង្ហូរទុន៦៣០០លានដុល្លារ អាមេរិក ចូលក្នុងសេដ្ឋកិច្ចកម្ពុជា។នេះបើយោងតាមរបាយការណ៍របស់ក្រុមប្រឹក្សា ភិវឌ្ឍន៍កម្ពុជា។

យោងតាមរបាយការណ៍ដដែលបានឲ្យដឹងងា កាលពី​ឆ្នាំ ២០១៧ កន្លង​ទៅ បាន​ផ្តល់​សិទិ្ធ​ដល់​គម្រោង​ស្នើសុំ​វិនិយោគ​សរុប​ទាំង​ក្នុង​ស្រុក និង​បរទេស មាន​តម្លៃ​ជា​ទឹកប្រាក់៦៣០០ពាន់​លាន​ដុល្លារ​ កើនឡើង​​ពី៣,៦ពាន់​លាន​ដុល្លារ​កាលពី​ឆ្នាំ២០១៦​។

យោងតាមកាសែត Nikkei Asian Review បាន​ចេញ​ផ្សាយ​របាយការណ៍​នេះ​ បន្ទាប់ពីបានជួបសម្ភាសន៍ជាមួយ​លោក សុខ ចិន្តាសោភា អគ្គលេខាធិការ CDC នៅ​ទីក្រុង​តូក្យូ​ប្រទេស​ជប៉ុន​កាលពី​ពេលថ្មីៗនេះ​។

របាយការណ៍ Nikkei Asian Review បាន​បង្ហាញ​ពី​និន្នាការ​នៃ​ការអនុម័ត​លើ​គម្រោង​ស្នើសុំ​វិនិយោគ​នៅ​ កម្ពុជា​តាំងពី​ឆ្នាំ២០១៣មក ​តាមរយៈ​ក្រាហ្វិក​និង​បាន​បង្ហាញ​ថា ក្នុង​ចំណោម​ទឹកប្រាក់​សរុប​នៅ​ឆ្នាំ២០១៧ វិនិយោគ​ដែល​ស្នើឡើង​ ដោយ​ពាណិជ្ជករ​ក្នុង​ស្រុក​មាន​ពាក់កណ្តាល ខណៈ​ពាក់កណ្តាល​ផ្សេង​ទៀត​ជា​គម្រោង​ស្នើ សុំ​វិនិយោគ​ដោយ​ផ្ទាល់​ព​បរទេស (FDI) ដែល​ភាគច្រើន​ជា​គម្រោង​ស្នើសុំ​វិនិយោគ​ពី​វិនិយោគិន​ជនជាតិ​ចិន​។

លោកសុខ ចិន្តាសោភាបានថ្លែងថា “កម្ពុជា​ចាប់ផ្តើម​មាន​ឯករាជ្យភាព​ផ្នែក​ថាមពល​អគ្គិសនី​ចាប់ពី​ឆ្នាំ២០១៨នេះ​តទៅ ហើយ​តម្លៃ​អគ្គិសនី​នឹង​បន្ត​ធ្លាក់​ចុះ​សម្រាប់​ការ​ធ្វើ​ពាណិជ្ជកម្ម ដើម្បី​ប៉ះប៉ូវ​ទៅ​ដល់​កំណើន​ថ្លៃឈ្នួល​អប្បបរមា​ដែល​បន្ត​កើនឡើង​ពី​មួយ​ ឆ្នាំ​ទៅ​មួយ​ឆ្នាំ”​៕

ដោយ គង់ សូរិយា
ភ្នំពេញ៖ មុនការមកដល់របស់អ្នកវិនិយោគចិនក្នុងវិស័យសំណង់ និងអចល ទ្រព្យអ្នកវិនិយោគកូរ៉េបានឈរចំណាត់ថ្នាក់លេខ១នៅកម្ពុជា ប៉ុន្តែពីរឆ្នាំកន្លងមកចិនបានចូលមកជំនួសកូរ៉េ ក្នុងនាមជាអ្នកវិនិយោគទី១លើវិស័យសំណង់ និង​អចលនទ្រព្យនៅកម្ពុជា។

អ្នកវិនិយោគកូរ៉េបានផ្តល់នូវកាលានុវត្តន៍ភាពថ្មី និងចូលរួមផ្លាស់ប្តូរមុខមាត់រាជធានីភ្នំពេញផងដែរ ពិសេសទីក្រុងរណបតំបូងគេ គឺ CAMKO CITY គំរោង​ De Castle, និងគំរោងវិនិយោគធំៗជាច្រើនទៀត។

ហេតុអីកូរ៉េវិនិយោគច្រើននៅកម្ពុជា ប្រធានសមាគមជនជាតិកូរ៉េខាងត្បូងប្រចាំនៅកម្ពុជាលោក ផាក យុនបានអះអាងឲ្យដឹងនាព្រឹកថ្ងៃទី១ មិនានេះថា ការកើនឡើងរបស់អ្នកវិនិយោគិនកូរ៉េនៅកម្ពុជា គឺដោយសារប្រទេសមួយនេះមានសុខសន្តិភាព និងស្ថិរភាពនយោបាយល្អប្រសើរ ខណៈរហូតដល់បច្ចុប្បន្ននេះមានអ្នកវិនិយោគ និងប្រជាជនកូរ៉េជាងពីរម៉ឺននាក់កំពុងរស់នៅ និងប្រកបធុរកិច្ចនៅកម្ពុជា។

លោកថ្លែងឲ្យដឹងបែបនេះ នៅក្នុងកម្មវិធីជួបជុំ និងអបអរសាទរទិវាចលនាឯករាជ្យ លើកទី៩៩ និងជំនួបជាថ្មីរវាងកូរ៉េនិងកម្ពុជា ដែលធ្វើឡើងនៅសមាគមជនជាតិកូរ៉េប្រចាំកម្ពុជា ស្ថិតក្នុងខ័ណ្ឌសែន សុខរាជធានាភ្នំពេញ នាថ្ងៃទី១ខែមីនាឆ្នាំ២០១៨នេះក្រោមអធិបតីភាពលោក អូ ណាក់ យ៉ុង ឯកអគ្គរដ្ឋទូតកូរ៉េខាងត្បូងប្រចាំកម្ពុជា។

លោកផាក យុនបានបញ្ជាក់ថា “មកដល់បច្ចុប្បន្ន ប្រជាជនកូរ៉េ និងអ្នកវិនិយោគទុនផ្សេងៗលើវិស័យជាច្រើន ដូចជាវិស័យសំណង់ វិស័យសុខាភិបាល វិស័យហេដ្ឋារចនាសម្ព័ន្ឋ និងវិស័យសេវាកម្មជាដើម”។

លោកបន្តថា អស់រយៈពេល២១ឆ្នាំហើយ ដែលសមាគមជនជាតិកូរ៉េ បានបង្កើតនៅក្នុងប្រទេសកម្ពុជា ក្នុងចន្លោះពេលនេះ សមាគមបានចាត់ចែងជួយឧបត្ថមគាំទ្រដល់ប្រជាពលរដ្ឋកម្ពុជា ដែលជួបនូវការលំបាក នៅតាមជនបទដាច់ស្រយាលឆ្ងាយៗ ដូចជាបានជួយទៅលើផ្នែកថ្នាំពេទ្យ សំលៀកបំពាក់ មណ្ឌល សុខភាព ផ្តល់អណ្តូងទឹក និងផ្តល់បន្ទប់រៀនជាច្រើនកន្លែងជួយដល់កុមារតូចៗដែលជួបការលំបាក មិនអាចទៅសិក្សានៅតាមសាលាបឋមសិក្សា និងនៅតាមអនុវិទ្យាល័យជាដើមនោះ។

សមាគមជនជាតិកូរ៉េប្រចាំនៅកម្ពុជា ត្រូវបានរាជរដ្ឋាភិបាល ជួយជ្រោម​ជ្រែងថែរក្សាឲ្យមានលក្ខណៈល្អប្រសើរជាប្រចាំ។

ឯកអគ្គរដ្ឋទូតកូរ៉េខាងត្បូងប្រចាំកម្ពុជាលោកអូ ណាក់ យ៉ុងបានផ្តាំផ្ញើរដល់សមា​គមជនជាតិកូរ៉េនៅកម្ពុជា ត្រូវថែរក្សានូវទំនាក់ទំនងល្អ ជាមួយប្រជាជនកម្ពុជា និងខិតខំជម្រុញអ្នកវិនិយោគទុន មកបង្កើតការវិនិយោគនៅប្រទេសកម្ពុជាឲ្យបានច្រើន ខិតខំថែរក្សាវប្បធម៌ប្រពៃណី រវាងប្រទេសប្រទេសទាំងពីរ(កម្ពុជានិងកូរ៉េ) ដែលល្អផូផង់តាំងពីយូរយាណាស់មកហើយនោះ កាន់តែល្អប្រសើបន្ថែមទៀត។

លោកបន្តថា “ខ្ញុំនឹងខិតខំជំរុញឲ្យសមាគមជនជាតិកូរ៉េនៅកម្ពុជា ឲ្យថែរក្សានូវទំនាក់ទំនងល្អជាមួយប្រជាជនកម្ពុជា និងមកវិនិយោគនៅប្រទេសកម្ពុជា ឲ្យបានច្រើនថែមទៀត ដើម្បីផលប្រយោជន៍របស់ប្រជាជន និងប្រទេសទាំងពីរ”៕

ដោយ ដែន ចែងចាំង

ភ្នំពេញ៖ ដំណឹងល្អៈ ប្រជាពលរដ្ឋដែលបាននិងកំពុងប្រើប្រាស់បណ្តាញអគ្គិស​នីពីសេវាករចែកចាយឯកជន នឹងទទួលបានការបញ្ចុះតម្លៃបន្ថែមសម្រាប់ចំនួ​ន៣១៥តំបន់ គ្របដណ្តប់លើ២៥រាជធានី ខេត្តនៅក្នុងឆ្នាំនេះ។

យោងតាមសេចក្តីជូនដំណឹងរបស់អាជ្ញាធរអគ្គិសនីកម្ពុជា ដែលបានចេញ​ផ្សាយកាលពីថ្ងៃទី២ មិនា ស្តីពីការពិគ្រោះយោបល់សាធារណៈ លើគម្រោងបន្ថយថ្លៃលក់អគ្គិសនី សម្រាប់តំបន់ចែកចាយរបស់សេវាករ ផ្គត់ផ្គង់អគ្គិសនីវិស័យឯកជន នៅរាជធានីភ្នំពេញ និងខេត្តចំនួន២៤ផ្សេងទៀត ស្ថិតនៅក្នុងតំបន់ចែកចាយរបស់វិស័យឯកជនចំនួន៣១៥តំបន់ និងគ្របដណ្តប់លើភូមិសាស្រ្ត ២៤រាជធានី ខេត្ត ត្រូវនឹង១៦៥ ស្រុក ខណ្ឌ ស្មើ១២៥០ឃុំ សង្កាត់។ ទីតាំងទាំងនេះ នឹងទទួលប្រភពអគ្គិសនីពីបណ្តាញជាតិ និងត្រូវកែសម្រួល តាមផែនការយុទ្ធសាស្រ្តកាត់បន្ថយថ្លៃ ដោយអគ្គិសនីកម្ពុជាគ្រោងនឹងបន្ថយថ្លៃលក់អគ្គិសនី នៅតាមតំបន់សេវាករទាំងនោះ តាមប្រភេទសេវាករនីមួយៗ ទៅតាមអត្រាថ្លៃលក់អគ្គិសនីសម្រាប់ខួបឆ្នាំ២០១៨។

ការបញ្ចុះតម្លៃអគ្គិសនីនេះបានកំណត់ថា សម្រាប់ការប្រើប្រាស់ក្នុងមួយខែមិនលើសពី១០គឺឡូវ៉ាត់ម៉ោង គឺរក្សាក្នុងតម្លៃ៤៨០រៀល ក្នុងមួយគីឡូវ៉ាត់ម៉ោង។ អ្នកប្រើប្រាស់ពី១០ ដល់៥០គឺឡូវ៉ាត់ម៉ោង ក្នុងតម្លៃ៦១០រៀល ក្នុងគីឡូវ៉ាត់ម៉ោង និងការប្រើប្រាស់ក្នុងមួយខែ លើសពី៥០គឺឡូវ៉ាត់ម៉ោងចុះ នឹងទទួលការបញ្ចុះ​តម្លៃពី៧៩០រៀល មកនៅ៧៧០រៀល ក្នុងគីឡូវ៉ាត់ម៉ោងវិញ។

សេចក្តីជូនដំណឹងដដែលឲ្យដឹងទៀតថា សម្រាប់អតិថិជនទូទាត់ ដោយថវិការដ្ឋ និងលំនៅដ្ឋានគ្រប់ជនបរទេស គ្រប់ទំហំប្រើប្រាស់តម្លៃអគ្គិសនីនឹងធ្លាក់ពីតម្លៃ៧៩០រៀល មកនៅត្រឹម៧៧០រៀលក្នុងគីឡូវ៉ាត់ម៉ោង។ ចំណែកអតិថិជន ប្រើប្រាស់ជាលក្ខណៈរដ្ឋបាល ពាណិជ្ជកម្ម និងឧស្សាហកម្ម  សម្រាប់ធុនតូចទទួលការបញ្ចុះតម្លៃពី៧៩០រៀល មកនៅ៧៧០រៀល ក្នុងគីឡូវ៉ាត់ម៉ោងផងដែរ។ ចំណែកការបូមទឹកធ្វើកសិកម្មនៅពេលយប់ ចាប់ពីម៉ោង៩ដល់ម៉ោង៧ព្រឹក គឺរក្សានៅក្នុងតម្លៃ៤៨០រៀល ក្នុងមួយគីឡូវ៉ាត់ម៉ោងដដែល។

តំបន់សេវាករផ្គត់ផ្គង់អគ្គិសនីឯកជន ដែលតម្រូវកំណត់តម្លៃថ្មីនេះ មាន នៅរាជធានីភ្នំពេញ ខេត្តកណ្តាល កំពង់ស្ពឺ តាកែវ កំពត កែប ព្រះសីហនុ កោះកុង កំពង់ឆ្នាំង ពោធិសាត់ បាត់ដំបង ប៉ៃលិន បន្ទាយមានជ័យ ឧត្តរមានជ័យ ព្រៃវែង និងខេត្តស្វាយរៀង ដែលនឹងចាប់ផ្តើមអនុវត្តន៍ចេញវិក្ក័យបត្រថ្មី ចាប់ពីថ្ងៃទី២២ ខែមីនា ឆ្នាំ២០១៨ ខាងមុននេះ៕

ដោយ ដែន ចែងចាំង

ភ្នំពេញ៖ ប្រទេស​កម្ពុជា​កំពុង​រកបាន​ដៃគូ​អភិវឌ្ឍន៍​ថ្មី មកជួយ​អភិវឌ្ឍន៍​ប្រទេស ឲ្យ​កាន់តែ​មានការ​រីកចម្រើន​ថែមទៀត នោះ​គឺ​ប្រទេស​អូទ្រីស​បាន​ត្រៀមលក្ខណៈ​រួចជាស្រេច ដើម្បី​ផ្តល់​ឥណទាន​សម្បទាន និង​ហិរញ្ញប្បទាន​ឥត​សំណង​នាពេលឆាប់ៗខាងមុខនេះ។

លោកជំទាវ Eva Hager ឯកអគ្គរដ្ឋទូត​ប្រទេស​អូទ្រីស ប្រចាំ​នៅ​កម្ពុជា បាន​ថ្លែង​លើកឡើង​នៅក្នុង​ជំនួប​ពិភាក្សា ពី​ការពង្រឹង​កិច្ចសហប្រតិបត្តិការ​រ​វាង​ប្រទេស​ទាំងពីរ ពិសេស​ឱកាស​វិនិយោគ​របស់​វិនិយោគិន​អូទ្រីស នៅ​កម្ពុជា ជាមួយ​លោក​អូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួង​សេដ្ឋកិច្ច​កាលពី​ថ្ងៃ​ម្សិល​ម៉ិ​ញ​នេះ​ថា ភាគី​អូទ្រីស​មាន​គោលបំណង​ផ្តល់ជូន​ល័ក្ខខ័ណ្ឌ​ឥណទាន ដែលមាន​លក្ខណៈ​សម្បទា​ន​ខ្ពស់​ដល់​កម្ពុជា សម្រាប់​គម្រោង​ជាក់លាក់​មួយចំនួន ដែល​ស្របតាម​អាទិភាព និង​គោលនយោបាយ​របស់​រាជ​រដ្ឋាភិបាល​កម្ពុជា ក្នុងនោះ​ប្រទេស​អូទ្រីស បាន​ត្រៀមលក្ខណៈ​រួចជាស្រេច ក្នុងការ​ផ្តល់​ឥណទាន​សម្បទាន និង​ហិរញ្ញប្បទាន​ឥត សំណង​នាពេលឆាប់ៗខាងមុខ ដើម្បី​ចូលរួម​អភិវឌ្ឍន៍​ប្រទេស​កម្ពុជា​ប្រកបដោយ​ចីរភាព។

លោកជំទាវ​បាន​បន្តថា ក្នុង​ដំណើរ​ទស្សនកិច្ច​មក​ក​ម្ពុ​ជានា​ពេលនេះ ក៏មាន​អ្នក​វិនិយោគិន​អូទ្រីស​ចំនួន១៧ក្រុមហ៊ុន​បាន​ចូលរួម​ផងដែរ ដើម្បី​ជួបពិភាក្សា​កម្រិត​បច្ចេក​ទេសដោយឡែកៗ ជាមួយ​ថ្នាក់ដឹកនាំ​នៃ​ក្រសួង​សេដ្ឋកិច្ច និង​ហិរញ្ញវត្ថុ អំពី​បរិយាកាស​វិនិយោគ​នៅ​កម្ពុជា និង​ការរៀបចំ​គម្រោង​ជាក់លាក់​ជាមួយ​ក្រសួង ស្ថាប័ន​ពាក់ព័ន្ធ​នៃ​ប្រទេស​ទាំងពីរ ។

ទេសរដ្ឋមន្ត្រី រដ្ឋមន្ត្រីក្រសួង​សេដ្ឋកិច្ច និង​ហិរញ្ញវត្ថុ​លោក អូន ព័ន្ធមុនីរ័ត្ន បាន​ថ្លែងថា ដើម្បី​ទាក់ទាញ​អ្នក​វិនិយោគិន​បរទេស​ឲ្យ​កាន់​តែមាន​ចំនួន​ច្រើន មក​បណ្តាក់ទុន​នៅ​កម្ពុជា​បន្ថែម និង​គាំពារ​វិនិយោគ​ពី​បរទេស កម្ពុជា​បាន​នឹង​កំពុង​អនុវត្ត​នូវ​បរិយាកាស​ធុរកិច្ច អំណោយផល​មិន​តែ​ចំពោះ​អ្នក​វិនិយោគិន​អូទ្រីស​នោះឡើយ គឺ​បាន​ធ្វើឡើង​ចំពោះ​វិនិយោគ​គិ​ន​បរទេស​ទាំងអស់។

លោក​បន្តថា “កម្ពុជា ជា​ប្រទេសមួយ​ក្នុងចំណោម​ឯក​ទ​គ្គករ​កំណើន​ទាំង៨  នៅក្នុង​ពិភពលោក  ដែលមាន​កំណើន​រឹងមាំ​ក្នុង​អត្រា៧,៧ភាគរយ ក្នុង​រយៈពេល២ទសវត្សរ៍​កន្លងមក​នេះ ។ ចំណែក​ការគ្រប់គ្រង​បំណុល​សាធារណៈ កម្ពុ​ជាមាន​ភាពប្រសើរ​ឡើង​បំផុត​ផងដែរ ដែល​ការសម្រេចបាន​ទាំងនេះ គឺ​ស្ថិតក្រោម​ការដឹកនាំ​ដ៏​វៃ​ឈ្លាស ប្រកបដោយ​ភាពប្រាកដនិយម របស់​សម្ដេច​អគ្គមហាសេនាបតី​តេ​ជោ ហ៊ុន សែន នាយក-រដ្ឋមន្ត្រី​នៃ​កម្ពុជា៕

ប៉ោយប៉ែត គឺជា​ក្រុង​មួយ​ដែល​ស្ថិតនៅក្នុង​ខេត្តបន្ទាយមានជ័យ​ជាប់​នឹង​ព្រុំ​ដែនកម្ពុជា-ថៃ ហើយក៏​ជា​ច្រកទ្វារ​សេដ្ឋកិច្ច​អន្តរជាតិ​យ៉ាងសំខាន់​លើ​ការដឹកជញ្ជូន ក៏ដូចជា​ច្រកចេញចូល​លើ​វិស័យ​ទេសចរណ៍​ផងដែរ។ ដោយឡែក​សម្រាប់ 2018-2021 បន្ទាប់ពី​ទទួល​ជ័យលាភី​ជាទី​ក្រុង​ស្អាត ក្រោម​រហស្សនាម​ថា​ជា«ផ្ការំដួល2ទង» កាលពីពេល​កន្លងទៅថ្មីៗនេះ អជ្ញាធរ និង​ថ្នាក់ដឹកនាំ​ខេត្ត​បានចេញ​គម្រោង​ជា​ផ្លូវការ​មួយ​ក្នុង​ការរៀបចំ និង​កែប្រែ​មុខមាត់​ច្រកទ្វារ​អន្តរជាតិ ប៉ោយប៉ែត ដែល​ធ្លាប់តែ​ផ្តោតទៅលើ​ការដឹកជញ្ជូន​រវាង​ប្រទេស​ទាំងពីរ មកជា​ទីក្រុង​ដ៏​ឆើតឆាយ និង​ទាក់ទាញ​បំផុត​លើ​វិស័យ​ទេសចរណ៍។

លោក សាន ស៊ានហូ អភិបាល ក្រុង​ប៉ោយប៉ែត បាន​ប្រាប់ឱ្យដឹង​កាលពី​ថ្ងៃទី28 ខែកុម្ភៈ ម្សិលមិញ​នេះ​ថា ជាគោលការណ៍​រួម អាជ្ញាធរ និង​ថ្នាក់ដឹកនាំ​ក្រុង នឹង​ព្យាយាម​កែប្រែ​មុខមាត់​ក្រុង​ប៉ោយប៉ែត​ឱ្យក្លាយ​ជាទី​ក្រុង​ដ៏​ស្រស់ស្អាត និង​ទាក់​បំផុត ក្រោម​ការរៀបចំ​សណ្តាប់ធ្នាប់ ការកសាង​ហេ​ដ្ឋា​រចនា​សម្ពន្ធ ក៏ដូចជា​រូ​ម​សំណាក​នានា​ដែល​បង្ហាញ​ពី​វប្បធម៌ អរិយធម៌ បង្ហាញ​ពី​ភាព​អស្ចារ្យ​របស់​ខ្មែរ។ លោក​បាន​បញ្ជាក់ថា «ការកែលម្អ​សោភ័ណភាព​ក្នុង​ក្រុង​ប៉ោយប៉ែត ដែល​គម្រោង​អាទិភាព​ទាំងនោះ​មានដូចជា ការរៀបចំ​សាងសង់​រង្វង់ ថ្មី​មួយ​ដ៏​ស្រស់ស្អាត​រំលេច​ដោយ​ប្រាង្គ​ប្រាសាទអង្គរវត្ត ប្រាសាទព្រះវិហារ បន្ទាយស្រី ដើមត្នោត​ព្រមទាំង​ឈ្មោះ​នៃ​រាជធានី ខេត្ត​ទាំង 25 របស់​កម្ពុជា​ផងដែរ ហើយ​ដែល​កំពុងដំណើរការ។ ក្រៅពីនេះ​នៅមាន​គម្រោង​ធ្វើ​សួនច្បារ ដោយមាន​រំលេច​ផ្កា និង​ដើមត្នោត​ចាប់​មាត់ ច្រកទ្វារ ព្រំដែន​រហូតដល់​វត្ត​បា​លិ​លេ​យ្យ ការ​ពុះ​ចែក​ទ្រូងផ្លូវ និង​ការរៀបចំ​តាំង​លម្អ​ភ្លើង​ជាដើម។ ដោយឡែក ចំពោះ​បញ្ហា​សម្អាត​ផ្លូវថ្នល់​ការប្រមូល​សំរាម និង​ការ​ទុកដាក់​សំរាម​ក៏​ជា​រឿង​ដែល​ត្រូវ​យកចិត្តទុកដាក់​តាម​រយៈ​ការ​បំផុស​ចលនា​ចូលរួម​ពី​ប្រជាពលរដ្ឋ។

លោក​បាន​បន្ថែមទៀតថា ៖ សម្រាប់​ឆ្នាំ2018នេះ ក្រុង​ប៉ោយប៉ែត នឹង​បង្ហាញខ្លួន​ក្នុង​រូបរាង​ថ្មី មាន​ភាពល្អប្រសើរ​ជាង​មុន ដើម្បីឱ្យ​ស័ក្ដិ​សមជា​ក្រុង​ទេសចរណ៍​ដ៏​ទាក់ទាញ​បំផុត។ បច្ចុប្បន្ន​នៅទីនេះ មាន​មជ្ឈមណ្ឌល​កម្សាន្ត​ដែល​ចាប់អារម្មណ៍​ពី​សំណាក់​ភ្ញៀវទេសចរ​ជាច្រើន ដែល​ក្នុងនោះ​មណ្ឌល​ទំនិញ​ម៉ាក​ល្បី , កាស៊ីណូ​ខ្នាត​អន្តរជាតិ, ភោជនីយដ្ឋាន​បែប​ទំនើប, សណ្ឋាគារ​ប្រណីត ជាពិសេស តំបន់​កម្សាន្ត​អាងទឹក​អូរ​ខៃ​ដន ជាដើម ៕