ដោយ គង់ សូរិយា
ភ្នំពេញ៖ កំនើនប្រជាសាស្រ្តក្នុងទីក្រុង ការកើនឡើងនូវការកកស្ទះចរាចរ និងកំនើននៃការប្រើប្រាស់បច្ចេកវិទ្យា នឹងធ្វើឲ្យវជនសម័យថ្មីនឹងរស់នៅតាមអាគារខុនដូ កណ្តាលទីក្រុង ជំនូសឲ្យការចេញទៅរស់នៅជាយរាជធានីភ្នំពេញ។
លោកងួន ឆាយលាង តំណាងគំរោងខុនដូ Urban Loft បានថ្លែងឲ្យដឹងតាមទូរស័ព្ទកាលពីពេលថ្មីៗនេះថា ជាមួយនឹងកំនើនសេដ្ឋកិច្ចនឹងបន្តរីកចំរើនរយៈពេលវែង ចរន្តរីកចំរើននៃបច្ចេកវិទ្យា ដូចជាការផ្ញើរលុយតាមទូរស័ព្ទដៃ ការហៅឬកុំម៉ង់ទំនិញ ទិញអាហារ ជាមួយម៉ូតូឌុប តុកៗ និងតាក់ស៊ី តាមរយៈទូរស័ព្ទដៃនឹងបន្តរីកចំរើន និងមានការប្រើប្រាស់កាន់តែច្រើន និងការកកស្ទះចរាចរណ៍កាន់តែខ្លាំង រំខានដល់ការធ្វើដំនើរ សេវាសាធារណៈកាន់តែរីកចំរើន និងកង្វះចំណតយានយន្ត លោកជឿថា នឹងមានការវិនិយោគលើចំណតយានយន្ត សម្រាប់ជួលកាន់តែច្រើននាពេលអនាគត។
យោងតាមការសិក្សារបស់ក្រុមហ៊ុន Urban Living Solution បានរកឃើញថា ប្រជាពលរដ្ឋរស់នៅរាជធានីភ្នំពេញ នឹងកើនឡើងដល់៤លាននាក់ឬច្រើនជាងនេះនៅឆ្នាំ២០៣០ ហើយនិន្នារស់នៅតាមខុនដូនឹងកើនឡើង ពីសំណាក់ក្រុមយុវជនដែលបច្ចុប្បន្នមានវ័យក្មេង និងដល់វ័យសកម្មក្នុងការងារនាឆ្នាំនោះពួកគេនឹងជ្រើសរើសរស់នៅតាមខុនដូ ដោយសារការកើនឡើងនូវក្រុមអ្នកមានជីវភាពមធ្យម និងការប្រើប្រាស់សេវាកម្ម សម្រាប់រស់នៅប្រចាំថ្ងៃកាន់តែមានការរីកចំរើន។
លោកងួន ឆាយលាងបានបន្តថា “ដោយសារនិន្នាការខាងលើនេះ ខ្ញុំគិតថាយុវជនសម័យថ្មី នឹងជ្រើសរើសរស់នៅតាមខុនដូ ដែលមានទីតាំងនៅជិតកន្លែងធ្វើការងាររបស់ពួកគេ”។លោកបន្តថា “យុវជនវ័យក្មេងនឹងក្លាយជាអ្នកសកម្ម ក្នុងការងារនៅឆ្នាំ២០៣០ ពួកគេជាក្រុមមនុស្សស៊ីវិល័យ និងជាអ្នកប្រើប្រាស់បច្ចេកវិទ្យា។ ពួកគេនឹងសម្រេចចិត្តរស់នៅក្នុងទីក្រុង ហើយអ្នកអភិវឌ្ឍន៍ខុនដូដែលផ្តោតលើក្រុមមនុស្សវ័យនេះនឹងទទួលបានផលប្រយោជន៍”។
នាពេលអនាគតរដ្ឋាភិបាល នឹងរៀបចំបែងចែកតំបន់ឧស្សាហកម្ម តំបន់លំនៅដ្ឋានដាច់ពីគ្នា ជាក់ស្តែងបច្ចុប្បន្នការលក់គ្រឿងចក្រធុនធ្ងន់ ការលក់គ្រឿងម៉ាស៊ីនធំៗ និងរោងចក្រមួយចំនួនចាប់ផ្តើមផ្លាស់ប្តូរទៅកាន់តំបន់ជាយក្រុង។
លោកងួន ឆាយលាងបានបន្តថា តាមបរិបទទីក្រុងរីកចំរើននានាដូចជាទីក្រុងហុងកុង ទីក្រុងញូយ៉ក ទីក្រុងបាងកក ប្រទេសសឹង្ហបុរីជាដើម ពួកគេកំពុងរស់នៅតាមខុនដូនៅកណ្តាលក្រុង ជាជាងទៅរស់នៅជាយក្រុង ហើយពេលអនាគត ក្រុមយុវជនស៊ីវិល័យ ពួកគេនឹងសម្រេចចិត្តរស់នៅក្នុងទីក្រុង ជាជាងចេញទៅរស់នៅតំបន់ជាយក្រុង។
តាមការសិក្សាបានរកឃើញថា នៅកម្ពុជាក្រុមយុវជនអាយុចាប់ពី៣០ឆ្នាំចុះក្រោមមាន៦០ភាគរយនៃប្រជាពលរដ្ឋសរុប។
លោកវ៉ា វីរៈអគ្គនាយកក្រុមហ៊ុន Century21 Fortuna Investment ដែលទើបទទួលវិញ្ញាបនបត្រទទួលស្គាល់ ក្នុងនាមជាអ្នកជំនាញក្នុងវិស័យអចលនទ្រព្យលំដាប់អន្តរជាតិ ពី National Association Realtor បានថ្លែងយល់ស្របនឹងការលើកឡើងខាងលើ ដោយលោកបានមានប្រសាសន៍ថា “ខ្ញុំយល់ស្របនឹងការលើកឡោះងខាងលើនេះ ព្រោះនៅឆ្នាំ២០៣០ចំនួនប្រជាជនរស់នៅក្នុងទីក្រុង នឹងកើនដល់៤លាននាក់ ពួកគេនឹងប្រឈមបញ្ហាជាច្រើន ដូចជាការកកស្ទះចរាចរ ការបំពុលបរិស្ថាន ហើយបច្ចេកវិទ្យានឹងចូលរួមដោះស្រាយបញ្ហាទាំងនោះ”។
លោកបន្តថា និន្នាការប្រជាពលរដ្ឋនឹងចូលមករស់នៅជាយក្រុង និងក្នុងទីក្រុងកាន់តែច្រើន ហេតុនេះ១០០ភាគរយប្រជាពលរដ្ឋវ័យក្មេង នឹងជ្រើសរើសរស់នៅតាមខុនដូ ដូចប្រទេសថៃ វៀតណាម សាំងហ្កាពួរ កុងកុងជាដើម។ វាជាជម្រើសមួយ ដែលផ្តល់អត្ថប្រយោជន៍ច្រើន ចំណេញច្រើន ពិសេសលើពេលវេលា ។
លោកបន្តថា “ក្រុមយុវជនវ័យក្មេងដែលធ្លាប់សិក្សានៅបរទេស ពួកគេនឹងជ្រើសរើសរស់នៅតាមខុនដូ ព្រោះវាមានទីតាំងនៅជិតហាងកាហ្វេ ផ្សារទំនើប កន្លែងហាត់ប្រាណ និងកន្លែងធ្វើការរបស់ពួកគេ”។លោកបន្តថា “ការធ្វើដំនើរនឹងកាន់តែលំបាក ពេលវេលាជាមាសប្រាក់ ខុនដូនឹងជាជម្រើសរបស់ពួកគេ ដែលជាកន្លែងមានផាសុខភាព មានសន្តិសុខ២៤ម៉ោង មានសេវាកម្មសំអាតអនាម័យជាដើម”។
តាមការសិក្សារបស់ក្រសួងរៀបចំដែនដី នគរូបនីយកម្ម និងសំណង់អំពីក្របខ័ណ្ឌយុទ្ឋសាស្រ្តអភិវឌ្ឍន៍ទីក្រុង នៅកម្ពុជាបានរកឃើញថា ចំនួនប្រជាជនរស់នៅរាជធានី ក្រុង និងទីប្រជុំជននៅឆ្នាំ២០១៤ មានចំនួន៤,៥លាននាក់ ស្មើនឹង២៧,១ភាគរយ និងបន្តកើនឡើងដល់៧,៩២លាននាក់នៅឆ្នាំ២០៣០ ស្មើនឹង៤៤ភាគរយនៃចំនួនប្រជាជនកម្ពុជាសរុប។
សេដ្ឋវិទូកម្ពុជាលោកបណ្ឌិតម៉ី កល្យាណទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិបានថ្លែងថា ប្រទេសកាលណាមានការអភិវឌ្ឍន៍ ទីក្រុងកាន់តែរីកធំមានមនុស្សរស់នៅច្រើនជារឿងធម្មតា ហើយនៅពេលទីក្រុងកាន់តែធំ តម្រូវការហេដ្ឋារចនាសម្ព័ន្ឋកាន់តែមានភាពចាំបាច់។ ហេតុនេះប្រសិនជារដ្ឋាភិបាលគិតទុកជាមុន ជាការល្អប្រសើរ ដើម្បីបន្ឋូរបន្ថយបញ្ហា ទោះជាដោះស្រាយមិនបានទាំងស្រុងក្តី។លោកបន្តថា ការដោះស្រាយបញ្ហាច្បាប់ ដើម្បីសម្រួលចរាចរណ៍ ការវិនិយោគលើហេដ្ឋារចនាសម្ព័ន្ឋ និងសេវាសាធារណៈ ជាអ្វីដែលរដ្ឋាភិបាលត្រូវវិនិយោគច្រើនជាងមុន។
លោកបន្តថា “ពេលទីក្រុងកាន់តែរីកចំរើន គុណភាពជីវិតនឹងកាន់តែលំបាកទៅៗ ហេតុនេះការមានបច្ចេកវិទ្យាស្មាតហ្វូន និងបច្ចេកវិទ្យាអាចជួយបាន តែមិនជួយបានច្រើនទេ”។លោកបន្តថា “ខ្ញុំមិនជឿថាប្រព័ន្ឋបច្ចេកវិទ្យាអាចជួយបាន១០០ភាគរយទេ ហើយវាជារឿងអនាគត ពិបាកប្រមើលមើលណាស់”។
លោកចន ណារិទ្ឋប្រជាពលរដ្ឋរស់នៅទីក្រុងភ្នំពេញ ដែលទើបបានទិញខុនដូក្នុងគំរោងលំនៅដ្ឋានអ៊ិលភ្នំពេញ (L Resident) នៅតំបន់បឹងត្របែកបានថ្លែងថា ការសម្រេចចិត្តទិញខុនដូរស់នៅ ដោយសារលោកចង់ឲ្យការរស់នៅមានផាសុខភាព មិនបារម្ភពីសុវត្ថិភាព ព្រោះការរស់នៅខុនដូមានសន្តិសុខ២៤ម៉ោង មានក្លឹបហាត់ប្រាណ មានផ្សារ និងសេវាកម្មជាច្រើនទៀត ដែលធ្វើឲ្យជីវិតមានភាពស៊ីវិល័យ។លោកបន្តថា ការពិតលោកមានផ្ទះរស់នៅរួចហើយ តែការសម្រេចចិត្តទិញខុនដូ ព្រោះលោកចង់ផ្លាស់ប្តូរបរិយាកាសក្នុងការរស់នៅ។
លោកបន្តថា “បច្ចុប្បន្នខ្ញុំឃើញគេទិញខុនដូច្រើនព្រោងព្រាត ហើយខ្ញុំគិតថាមនុស្សរស់នៅខុនដូកាន់តែកើនឡើងនាពេលអនាគត ព្រោះបើសាងសង់មិនជោគជ័យគេមិនវិនិយោគជាបន្តបន្ទាប់នោះទេ”។លោកបន្តថា “ខ្ញុំមានកូន ខ្ញុំគិតថានាពេលអនាគត ពួកគេនឹងពេញចិត្តរស់នៅខុនដូ ហេតុនេះទើបខ្ញុំទិញសម្រាប់លំហែរ និងសម្រាប់ពួកគេនាពេកអនាគត”៕
