ដោយ គង់ សូរិយា

ភ្នំពេញ៖ ក្រុមហ៊ុនយក្សរបស់ប្រទេសចិន បាននិងកំពុងស្វែងរកដីសប្បទានពីរដ្ឋាភិបាលទំហំ ៣០០០ហិកតា នៅជុំវិញព្រលានយន្តហោះអន្តរជាតិថ្មី ខេត្តសៀមរាប ដើម្បីសាងសង់មជ្ឈមណ្ឌលពាណិជ្ជកម្ម។

មន្រ្តីជាន់ខ្ពស់រដ្ឋលេខាធិការដ្ឋានអាកាសចរណ៍ស៊ីវិល បានមានប្រសាស​ន៍​ឲ្យដឹងក្នុងលក្ខខ័ណ្ឌមិនបញ្ចេញឈ្មោះកាលពីព្រឹកថ្ងៃទី៩ មករានេះថា ក្រុមហ៊ុន YUNAN Development Group កំពុងស្វែងរកដី៣០០០ហិកតា នៅជុំវិញព្រលានយន្តហោះអន្តរជាតិថ្មី ដើម្បីសាងសង់មជ្ឈមណ្ឌលពាណិជ្ជកម្ម លំនៅដ្ឋា​ន និងសេវាកម្មជាច្រើនទៀត ដើម្បីគាំទ្រការវិនិយោគព្រលានយន្តហោះរបស់ខ្លួន​ឲ្យទទួលបានជោគជ័យ និងមានសកម្មភាពរសរវើក។

លោកបន្តថា “ការវិនិយោគព្រលានយន្តហោះ មិនអាចស្វែងរកផលចំណេ​ញបាននោះទេ ដូច្នេះទើបក្រុមហ៊ុនទាមទារឲ្យមានដីសប្បទាន ដើម្បីសាងសង់​មជ្ឈមណ្ឌលពាណិជ្ជកម្មនៅជុំវិញព្រលាននេះ”។លោកបន្តថា “ខ្ញុំមិនដឹងរដ្ឋាភិបា​លមានជំហបែបណាឡើយ ប៉ុន្តែការទូទាត់ឬការចចាទិញដីពីប្រជាពលរដ្ឋនៅតំបន់នេះអាចនឹងកើតមានឡើង”។

មន្រ្តីដដែលបានបន្តថា “ការសាងសង់មជ្ឈមណ្ឌលពាណិជ្ជកម្ម នឹងអាចចំ​ណាយប្រាក់ខ្ទង់ពាន់លានដុល្លារអាមេរិក ព្រោះជាគំរោងធំដើម្បីដំណើរការនិងគាំទ្រដល់ព្រលានយន្តហោះលំដាប់អន្តរជាតិនេះ”។

ព្រលានយន្តហោះអន្តរជាតិខេត្តសៀមរាប នឹងត្រូវសាងសង់នៅពេលឆាប់ៗនេះលើផ្ទៃដី៧០០ហិកតា ដែលគ្រោងបោះទុនវិនិយោគសរុបចំនួន៨៨០លា​ន​ដុល្លារអាមេរិក។ ប្លង់ស្ថាបត្យកម្មព្រលានយន្តហោះនេះ នឹងចុះហត្ថលេខាទទួ​លយកជាផ្លូវការ ក្រោមអធិបីភាពសម្តេចតេជោហ៊ុន សែននាយករដ្ឋមន្រ្តីកម្ពុជា និងលោកលី ខឺឈាងនាយករដ្ឋមន្រ្តី នៃសាធារណៈរដ្ឋប្រជាមានិតចិនក្នុងសប្តាហ៍នេះ៕

– ពាណិជ្ជកម្ម –

ដោយ​ ដែន ចែងចាំង

ភ្នំពេញ៖ ចិនបាននិងកំពុងនាំមុខគេលើគ្រប់វិស័យនៅកម្ពុជា ពិសេសការវិនិយោគដោយផ្ទាល់ ដោយគិតត្រឹមតែរយៈពេល១០ខែ ឆ្នាំ២០១៧ចិនបានវិនិយោគទឹកប្រាក់១២៥៧កោដិដុល្លារនៅកម្ពុជា។

លោក សុង សៀនម៉ៅ ទីប្រឹក្សាពាណិជ្ជកម្ម នាយកដ្ឋានពាណិជ្ជកម្មបរទេ​ស នៃក្រសួងពាណិជកម្មប្រទេសចិនបានថ្លែងឲ្យដឹងកាលពីម្សិលម៉ិញនេះថា បើគិតត្រឹមខែតុលាឆ្នាំ២០១៧វិញ ទំហំទុនវិនិយោគដែលបានព្រមព្រៀ​ងគ្នា ពីចិនមកកម្ពុជា មានសរុប១២៥៧កោដិដុល្លារអាមេរិក ដែលនាំឲ្យប្រទេសចិនក្លាយជាប្រភពវិនិយោគធំជាងគេបង្អស់ របស់ប្រទេសកម្ពុជា ត្រូវប្រមាណជាង៣៦ភាគរយនៃទុនវិនិយោគពីបរទេសសរុបចូលមកកម្ពុជា។

យោងតាមតួលេខទទួលបានពីការិយាល័យពាណិជ្ជកម្ម នៃស្ថានទូតចិននៅកម្ពុជាបានឲ្យដឹងថា គិតចាប់ពីខែមករា ដល់ខែ វិច្ឆិកាឆ្នាំ២០១៧ មកនេះ ទំហំពាណិជ្ជកម្ម ទ្វេរភាគីរវាងកម្ពុជា-ចិនបានកើនឡើងដល់៥២៧០លានដុល្លាអាមេរិក កើនឡើងប្រមាណ២៣,៣ភាគរយ បើធៀបក្នុងរយៈពេលដូចគ្នាឆ្នាំ២០១៦។

រដ្ឋលេខាធិការក្រសួងពាណិជ្ជកម្ម ឈួន ដារ៉ាបានអំពាវឲ្យក្រុមហ៊ុនជាច្រើន ដែលមានបំណងចង់មកបណ្តាក់ទុនបន្ថែមនោះ សូមសិក្សាលទ្ធភាពដើម្បីមកបណ្តាក់ទុនកាន់តែច្រើន ព្រោះកម្ពុជាជាប្រទេ​សមានសក្តានុពល ប្រកបដោ​យសុខសន្តិភាព និងស្ថិរភាពពេញផ្ទៃប្រទេស និងជាប្រទេសកំពុងទាក់ទាញលើផ្នែកឧស្សាហកម្មផងដែរ៕

– ពាណិជ្ជកម្ម –

ដោយ គង់ សូរិយា

ភ្នំពេញ៖ ក្រុមហ៊ុនចំនួន ៣៤របស់កម្ពុជា-ចិនបានចុះហត្ថលេខាលើអនុស្សារណៈ​យោគយល់គ្នា ក្នុងតម្លៃទឹកប្រាក់សរុបប្រមាណជាង ៥២៥លានដុល្លាអាមេរិក ដើម្បីបង្កើនគោលដៅធ្វើពាណិជ្ជកម្មទ្វេភាគីថ្មី ក្នុងនាំចេញផលិតផល ជាពិ​សេសផ្នែកវិស័យកសិកម្ម ពីកម្ពុជាទៅប្រទេសចិន។

ទីប្រឹក្សាពាណិជ្ជកម្ម នាយកដ្ឋានពាណិជ្ជកម្មបរទេ​ស នៃក្រសួងពាណិជកម្មប្រទេសចិនលោក សុង សៀនម៉ៅ បានថ្លែងលើកឡើង នៅក្នុងពិធីជំនួបពា​ណិ​​ជ្ជកម្ម និងការចុះអនុស្សាធារណៈយោគយល់គ្នារវាងកម្ពុជា-ចិនកាលពីម្សិលម៉ិញ​នេះថា ទំនាក់ទំនងសេដ្ឋកិច្ច និងពាណិជ្ជកម្ម រវាងចិននិងកម្ពុជា បានរក្សាសន្ទុះយ៉ាងឆាប់រហ័ស ក្នុងនោះប្រទេសចិនបានក្លាយជាដៃគូពាណិជកម្មទី១ នៃប្រភពនាំចំណូលពីប្រទេសកម្ពុជា នៅក្នុងរយៈពេលវែងផងដែរ។

លោកបន្តថា ទំហំទឹកប្រាក់នេះគឺលើស៥០ភាគរយ នៃទំហំនាំចូលពីប្រ​ទេសកម្ពុជាទៅប្រទេសចិន ហើយនេះជាការបង្កើនទំហំការធ្វើពាណិជ្ជកម្មទ្វេរភាគីថ្មី តាមរយៈក្រុមហ៊ុនចំនួនសរុប៣៤ ដែលបានចុះកិច្ចព្រមព្រៀងសហការគ្នាដែលបានផ្តោតសំខាន់ ទៅលើការនាំចេញផលិតផល ម្រេច ឈើ ក្រូចឆ្មារ ចេក កៅស៊ូ ស្បែកចចក ស្បែកសម្ពោធ ស្ពានកាតូត ស្វាយចន្ទី ដំឡូងមី ស្ងួត ម្សៅដំឡូងមីជាដើម ។

រដ្ឋលេខាធិការក្រសួងពាណិជ្ជកម្មឯកឧត្តម ឈួន ដារ៉ាបានមានប្រសាស​ន៍ថា កម្ពុជាជាប្រទេស កំពុងអភិវឌ្ឍន៍ ដែលធ្វើឲ្យការនាំចេញរបស់កម្ពុជាមិនជាប់របាំងបច្ចេកទេសទៅកាន់ទីផ្សារអឺរ៉ុប ជាពិសេសទៅប្រទេសចិន គឺមិនមានជាប់ពន្ធក្នុងការនាំចេញនោះឡើយ ព្រោះដោយសារកម្ពុជាមានការអនុគ្រោះលើពន្ធនាំចេញ ហើយអ្នកមកវិនិយោគទុនបរទេសមកវិនិយោគនៅកម្ពុជា គឺទទួលបានអត្ថប្រយោជន៍យ៉ាងច្រើននៅក្នុងការធ្វើអាជីវកម្មរបស់ខ្លួន៕

– ពាណិជ្ជកម្ម –

ដោយ ដួង ចន្រ្ទា
ភ្នំពេញ៖ ការផ្តល់ឥណទាននៅតាមគ្រឹះស្ថានមីក្រូហិរញ្ញវត្ថុ​នានា សម្រេចបានកំណើនខ្ពស់ចន្លោះពី៣០ ទៅ៥០ភាគរយ កាលពីឆ្នាំ២០១៧ ធៀបរយៈពេលដូចគ្នាកាលពីឆ្នាំមុន។

លោក សាយ សូនី ប្រធាននាយកដ្ឋានប្រតិបត្តិការទីផ្សារនៃគ្រឹះស្ថានមីក្រូហិរញ្ញវត្ថុប្រាសាក់ បានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី៨ មករានេះថា ការផ្តល់ឥណទានរបស់ប្រាសាក់សម្រេចបានកំណើន៥០ភាគរយ ដោយទំហំទឹកប្រាក់បានកើនពី១០៣០លានដុល្លារ កាលពីឆ្នាំ២០១៦ ដល់១៥៤៨លាន​ដុល្លារគិតត្រឹមដំណាច់ឆ្នាំ២០១៧។ ចំណែកការដាក់ប្រាក់បញ្ញើក៏សម្រេចបានកើនខ្ពស់ផងដែរ ដោយកំណើនទឹកប្រាក់បានកើនពី៦១៩លានដុល្លារ ដល់៩១៥លានដុល្លារ ស្មើនឹងកំណើន៤៨ភាគរយ។

លោកបន្តថា “កំណើនឥណទានកើនខ្លាំង ដោយសារការរីកចម្រើននៃវិស័យ​សហគ្រាសធុនតូចបំផុត ធុនតូច និងធុនមធ្យម និងការរីកចម្រើននៃវិស័យកសិ​កម្ម”។លោកបន្តថា “កំណើនប្រាក់បញ្ញើក៏បញ្ជាក់ពីស្ថិរភាពនយោបាយ និងជំនឿទុកចិត្តរបស់ប្រជាពលរដ្ឋ លើវិស័យហិរញ្ញវត្ថុនៅកម្ពុជាកើនឡើងផងដែរ”។
លោក សាយ សូនី បានបន្តថា ទោះជាការដាក់ប្រាក់បញ្ញើរសម្រេចបានកំណើនល្អប្រសើរក្តី ប៉ុន្តែទំហំសាច់ប្រាក់បញ្ញើធៀបនឹងឥណទាន ដែលយើងផ្តល់ជូន​ប្រជាពលរដ្ឋ មិនទាន់មានតុល្យភាពគ្នានៅឡើយទេ ពោលគឺយើងនៅតែត្រូវការឥណទានពីបរទេសនៅឡើយ។

អគ្គនាយកគ្រឹះស្ថានមីក្រូហិរញ្ញវត្ថុអម្រិត លោក ជា ផល្លារិន បានមានប្រ​សា​សន៍ឲ្យដឹងផងដែរថា ការផ្តល់ឥណទាន ពិតជាសម្រេចបានកំណើនល្អប្រសើរ ដោយសារការរីកចម្រើន នៃសហគ្រាសធុនតូចបំផុត ធុនតូច និងធុនមធ្យម ព្រមទាំងវិស័យកសិកម្មមានការរីកចម្រើននៅឆ្នាំនេះ ជាមួយនឹងកំណើនផលិតកម្មនិងតម្លៃមានភាពសមស្របផងដែរ។  លោកបន្តថា ឥណទានរបស់អម្រិតបានកើនពី៥៨០លានដុល្លារកាលពីឆ្នាំ២០១៦ ដល់៦៨៨លានដុល្លារនៅឆ្នាំ២០១៧ ស្មើនឹងកំណើន២១ភាគ​រយ។

ចំណែកការដាក់ប្រាក់បញ្ញើបានកើនល្អប្រសើរផងដែរ ដោយទំហំទឹកប្រា​ក់បានកើនពី២៣០លានដុលារកាលពីឆ្នាំ២០១៦ ដល់៣៣០លានដុល្លារនៅឆ្នាំ២០១៧ ស្មើនឹងកំណើន២៥ភាគរយផងដែរ។

លោក ជា ផល្លារិន បានបន្តថា “ការរីកចម្រើននៃសកម្មភាពអាជីវកម្ម ពិសេ​សវិស័យសហគ្រាសធុនតូច និងមធ្យម និងវិស័យកសិកម្មបានស្ថិតនៅពីក្រោយ​ការរីកចម្រើននេះ”។ លោកបន្តថា “នៅឆ្នាំ២០១៨នេះ យើងនឹងនៅតែបន្តផ្តោត​លើវិស័យSME និងសកម្មដែលកំពុងតែបន្តមានភាពវិជ្ជមាន”។

កម្ពុជាជាប្រទេសមួយ ដែលមានការរីកចម្រើនក្នុងវិស័យមីក្រូហិរញ្ញវត្ថុខ្លាំង និងជាប់ចំណាត់ថ្នាក់ល្អនៅលើពិភពលោក ដោយសារការសម្រេចបានកំណើនឥណទាន និងឥណទានមានបញ្ហាស្ថិតនៅក្នុងការគ្រប់គ្រងបានល្អប្រសើរ៕

– ពាណិជ្ជកម្ម –

ដោយ  :  គង់ សូរិយា
ភ្នំពេញ : របាយការណ៍ព្យាករណ៍សេដ្ឋកិច្ចកម្ពុជា បានបង្ហាញជាផ្លូវការហើយ ដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីកម្ពុជាបាន​ឲ្យដឹងថា សេដ្ឋកិច្ចកម្ពុជាកាលពីឆ្នាំមុន សម្រេចបានកំណើន៦,៩ភាគរយ និងប្រាក់​ចំណូលប្រជាពលរដ្ឋម្នាក់ៗ ទទួលបាន១៤៣៥ដុល្លារអាមេរិកក្នុងមួយឆ្នាំ។
សម្តេចតេជោ  ហ៊ុន សែន បានមានប្រសាសន៍បែបនេះ ក្នុងពិធីរំលឹកខួបនៃទិវាជ័យជន្នះ ​៧មករា លើកទី៣៩ ដែលមានប្រជាពលរដ្ឋចូលរួមប្រមាណ​៤៥,០០០នាក់កាលពីម្សិលម៉ិញនេះថា ការរក្សាបាននូវសុខសន្តិភាព ស្ថិរភាពនយោបាយ និងសន្តិសុខដ៏រ៉ឹងមាំ បានធានាឲ្យកម្ពុជាសម្រេចបានសមិទ្ឋិផលធំៗជាថ្មីទៀត ក្នុងដំណើរការអភិវឌ្ឍន៍សេដ្ឋកិច្ចសង្គម និងកែលំអរជីវភាពរស់នៅរបស់ប្រជាជន។
សម្តេចបានបន្តថា “កំណើនសេដ្ឋកិច្ចដ៏រឹងមាំនេះ ត្រូវបានឆ្លុះបញ្ចាំងតាមរយៈការរីកចម្រើនវិស័យឧស្សាហកម្មកម្មន្តសាល សំណង់ កសិកម្ម និងសេវាកម្ម ដូចជាទេសចរណ៍ និងអចលនទ្រព្យជាដើម”។សម្តេចបន្តថា “ជាមួយគ្នានេះកម្ពុជាបានផ្លាស់ប្តូររចនាសម្ពន្ឋសេដ្ឋកិច្ច ពីប្រទេសពឹងផ្អែកលើវិស័យកសិកម្ម ទៅជាប្រទេសដែល ពឹងផ្អែកលើវិស័យឧស្សាហកម្ម និងសេវាកម្ម”។
អត្រានៃភាពក្រីក្រនៅកម្ពុជា បានធ្លាក់ចុះពី៥៣,៥ភាគរយនៅឆ្នាំ២០០៤ មកនៅត្រឹម១៣,៥ភាគរយនៅឆ្នាំ២០១៤ និងធ្លាក់ចុះថែមទៀត ខណៈដែលគម្លាតប្រាក់ចំណូលប្រជាពលរដ្ឋ ក៏ត្រួវបានកាត់បន្ថយផងដែរ។
អ្នកស្រាវជ្រាវសេដ្ឋកិច្ចនៃរាជបណ្ឌិតសភាកម្ពុជាលោកបណ្ឌិត ហុង វណ្ណៈ  បានថ្លែងថា ប្រសិនជាគិតក្នុងក្របខ័ណ្ឌម៉ាក្រូសេដ្ឋកិច្ចកម្ពុជា ការសម្រេចបានកំណើនសេដ្ឋកិច្ចកម្ពុជាក្នុងរង្វង់៦,៩ភាគរយជារឿងល្អ ដែលអាចឲ្យកម្ពុជាអាចឈោ​ងយកកំណើនសេដ្ឋកិច្ចបានល្អ ក្នុងរយៈពេលប៉ុន្មានឆ្នាំខាងមុខទៀត ហើយប្រសិ​នជាកម្ពុជារក្សាបាននូវសន្តិភាព នូវស្ថិរភាពនយោបាយ សេដ្ឋកិច្ចកម្ពុជានឹង​រក្សាបានកំណើនក្នុងរង្វង់៧ភាគរយ ឬអាចខ្ពស់ជាងនេះទៀត ដោយសារកំណើននៃការវិនិយោគផ្ទាល់ពីបរទេស ពិសេសពីប្រទេសចិន ពីប្រទេសសមាជិកអាស៊ាន អឺរ៉ុបជាដើម។
លោកបណ្ឌិតបន្តថា “ខ្ញុំនៅតែមើលឃើញថា អ្នកវិនិយោគចិនកាន់តែច្រើននៅបន្តចូលមកកម្ពុជា ហើយអ្នកវិនិយោគដទៃទៀតក៏បានចូលមក ដោយ​មិនឃើញសញ្ញាថមថយនោះទេ ដែលនេះសុទ្ឋតែជាសញ្ញាល្អ ដែលអាចឲ្យរដ្ឋាភិ​បាលប្រមូលចំណូលបានកាន់តែច្រើន ដើម្បីទ្រទ្រង់កំណើនសេដ្ឋកិច្ចរបស់ខ្លួន”៕