ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃក្នុងការជួញដូរនៅព្រឹកថ្ងៃសុក្រនេះ ខណៈក្រុមអ្នកវិនិយោគកំពុងរង់ចាំអ៊ុតមើលការចេញផ្សាយទិន្នន័យអតិផរណារបស់សហរដ្ឋអាមេរិក ដើម្បីស្ទាបស្ទង់អំពីគោលជំហរនៃការបញ្ចុះអត្រាការប្រាក់នាពេលខាងមុខ។

តួយ៉ាង តម្លៃមាស Spot Gold បានងើបឡើង០,១៣ភាគរយដល់២៦៧៣,៦៥ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង០,០១ភាគរយដល់២៦៩៥,៣០ដុល្លារក្នុងមួយអោន គិតត្រឹមម៉ោង១០:៤៥នាទីព្រឹក។

គិតត្រឹមពេលបិទការជួញដូរកាលពីថ្ងៃព្រហស្បតិ៍ម្សិលមិញ តម្លៃមាស Spot Gold បានបិទនៅត្រឹម២៦៧០,២០ដុល្លារក្នុងមួយអោន ខណៈតម្លៃមាស U.S. gold futures បានបិទនៅត្រឹម២៦៩៤,៩០ដុល្លារក្នុងមួយអោន។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាស៥០,៧ភាគរយ ដែលធនាគារកណ្តាលអាមេរិក(Fed) អាចនឹងបញ្ចុះអត្រាការប្រាក់ចំនួន០,៥ភាគរយបន្ថែមទៀតក្នុងកិច្ចប្រជុំគោលនយោបាយប្រចាំខែវិច្ឆិកាខាងមុខ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិក ធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានងើបឡើងថ្លៃដល់១០០,៦៧ពិន្ទុនៅព្រឹកថ្ងៃសុក្រនេះ បន្ទាប់ពីបិទការជួញដូរត្រឹម១០០,៥២ពិន្ទុកាលពីថ្ងៃព្រហស្បតិ៍ម្សិលមិញ។

តម្លៃលោហៈធាតុប្រាក់ Spot silver បានធ្លាក់ចុះ០,៣៦%ដល់៣២,២២ដុល្លារ ក្នុងមួយអោន ខណៈតម្លៃផ្លាទីន បានធ្លាក់ចុះ០,៥៤%ដល់១០១៦,៧០ដុល្លារក្នុងមួយអោន ហើយតម្លៃ palladium បានធ្លាក់់ចុះ០,៩៧%ដល់១.០៤១ដុល្លារក្នុងមួយអោន គិតត្រឹមម៉ោង១០:៤៥នាទីព្រឹក។

ចំណែក ផ្សារហ៊ុននៅតំបន់អាសុីក៏បានងើបឡើងថ្លៃផងដែរនៅព្រឹកថ្ងៃសុក្រនេះ ដោយសារការស្ទុះងើបឡើងថ្លៃនៃផ្សារហ៊ុននៅក្នុងប្រទេសចិន បន្ទាប់ពីទីក្រុងប៉េកាំង បានដាក់ចេញកញ្ចប់ជំរុញដ៏ធំមួយ ដើម្បីស្តារសេដ្ឋកិច្ចឡើងវិញ។

តាមរយៈការជួញដូរនៅលើទីផ្សារ សន្ទស្សន៍​ផ្សារហ៊ុន​នៅតំបន់អាស៊ី​​របស់ក្រុមហ៊ុនអាមេរិក MSCI នៅ​ក្រៅ​ប្រទេស​ជប៉ុន​ បានងើបឡើងថ្លៃចំនួន១,១៣ភាគរយ គិតត្រឹមម៉ោង១០:៥២នាទីព្រឹក។

ជាមួយគ្នានេះ ផ្សារហ៊ុន Nikkei របស់ប្រទេសជប៉ុនបានងើបឡើងថ្លៃ០,១៩ភាគរយ ខណៈពេលសន្ទស្សន៍ផ្សារហ៊ុន Hang Seng របស់ទីក្រុងហុងកុងបានងើបឡើងថ្លៃ៣,៤៦ភាគរយ។

ដោយឡែក សន្ទស្សន៍ផ្សារហ៊ុនបន្ទះឈីបពណ៌ខៀវ CSI300 របស់ប្រទេសចិនបានងើបឡើងថ្លៃ៣,៧៧ភាគរយ ខណៈដែលសន្ទស្សន៍ផ្សារហ៊ុន shanghai Composite បានងើបឡើងថ្លៃ២,១៤ភាគរយ។

រីឯ ផ្សារហ៊ុនរបស់ប្រទេសអូស្ត្រាលី S&P /ASX 200 បានងើបឡើងថ្លៃ០,០៧៨ភាគរយ ខណៈពេលដែលសន្ទស្សន៍ផ្សារហ៊ុន KOSPI របស់ប្រទេសកូរ៉េខាងត្បូងបានធ្លាក់ថ្លៃចុះ០,២១ភាគរយ៕

ធនាគារពាណិជ្ជ ឈីហ្វ (ខេមបូឌា) ម.ក និងសាកលវិទ្យាល័យអាមេរិកាំងភ្នំពេញ (AUPP) បានចុះហត្ថលេខាលើអនុស្សារណៈនៃការយោគយល់គ្នាជាដៃគូយុទ្ធសាស្ត្រ ដែលបានធ្វើឡើងនៅថ្ងៃទី២៦ ខែកញ្ញា ឆ្នាំ២០២៤ ហើយកិច្ចសហប្រតិបត្តិការនេះផ្តោតលើការលើកស្ទួយឱកាសការសិក្សា និងការអភិវឌ្ឍជំនាញវិជ្ជាជីវៈជាមួយកម្មវិធី Chief Easy ជាកម្មវិធីកម្ចីប្រាក់ខ្នាតតូចបែបឌីជីថលដែលជួយបង្កើនភាពងាយស្រួលនៃកម្ចីផ្នែកហិរញ្ញវត្ថុនៅប្រទេសកម្ពុជា។

Chief Easy បង្កើននិន្នាការរីកចម្រើននៃធនាគារឌីជីថលនៅប្រទេសកម្ពុជា និងអនុញ្ញាតឱ្យអ្នកប្រើប្រាស់ស្នើសុំប្រាក់កម្ចីបានងាយស្រួលរហូតដល់ ៥០០០ដុល្លារ ជាមួយនឹងលក្ខខណ្ឌនៃការសងរហូតដល់ ៣ ឆ្នាំពីគ្រប់ទីកន្លែង គ្រប់ពេលវេលា និងធានាការឆ្លើយតបក្នុងរយៈពេល ២៤ ម៉ោងនៃថ្ងៃធ្វើការ។

Chief Easy បង្ហាញពីការប្តេជ្ញាចិត្តក្នុងការផ្តល់សេវាហិរញ្ញវត្ថុទូលំទូលាយ ជាពិសេសដល់ប្រជាជនកម្ពុជាដែលត្រូវការសេវាកម្មហិរញ្ញវត្ថុ។ កិច្ចសហការរបស់ធនាគារ ឈីហ្វជាមួយនឹងសាកលវិទ្យាល័យអាមេរិកាំងភ្នំពេញ (AUPP) អនុញ្ញាតឱ្យយើងផ្ដល់កម្ចីដល់អតិថិជនកាន់តែទូលំទូលាយ ក៏ដូចជាជួយគាំទ្រដល់និស្សិត និងក្រុមគ្រួសាររបស់និស្សិតក្នុងដំណោះស្រាយហិរញ្ញវត្ថុ។

សាកលរិទ្យាល័យ AUPP នឹងគាំទ្រដល់ការផ្សព្វផ្សាយ និងការចាប់យកប្រើប្រាស់ “Chief Easy” អនុញ្ញាតឱ្យសិស្ស, មាតាបិតា និងអាណាព្យាបាលអាចទទួលបានកម្ចីឌីជីថលរហូតដល់ $5,000ដែលត្រូវបានរៀបចំជាពិសេសដើម្បីជួយដល់ការចំណាយលើការសិក្សា និងតម្រូវការហិរញ្ញវត្ថុផ្សេងៗទៀត។

កិច្ចសហប្រតិបត្តិការយុទ្ធសាស្រ្តរវាងធនាគារ Chief និងសាកលវិទ្យាល័យ AUPP មិនត្រឹមតែដោះស្រាយនូវបញ្ហាហិរញ្ញវត្ថុជាបន្ទាន់ទេ ប៉ុន្តែថែមទាំងបង្កើតឱកាសសម្រាប់ការប្រកួតប្រជែងក្នុងក្រុមហ៊ុន និងឱកាសការងារសម្រាប់សិស្សនិស្សិតផងដែរ។ ដោយសហការគ្នា, ស្ថាប័នទាំងពីរកំពុងជួយបង្កើតមាគ៌ាសម្រាប់អនាគតអប់រំនិងហិរញ្ញវត្ថុដ៏ភ្លឺស្វាងសម្រាប់សិស្សនិស្សិតក្នុងប្រទេសកម្ពុជា, ខណៈដែលសាកលវិទ្យាល័យ AUPP គឺជាសាកលវិទ្យាល័យកំពូលមួយនៅក្នុងប្រទេសកម្ពុជា។ បុគ្គលិកធនាគារ Chief ក៏ទទួលបានឱកាសបន្តការអភិវឌ្ឍវិជ្ជាជីវៈរបស់ពួកគាត់តាមរយៈកម្មវិធីសិក្សាដ៏មានសក្ដានុពលរបស់សាកលវិទ្យាល័យ AUPP ផងដែរ។

សម្រាប់ព័ត៌មានបន្ថែម: https://www.chiefbank.com.kh/en/OnlineServices/ChiefEasy

Join Our Telegram Channel: https://t.me/chiefbankcambodia

App Store: https://apple.co/3A1kXzD

Google Play: https://bit.ly/2WrWBkK

☎️ 097 9 900 878

☎️ 089 900 878

☎️ 010 900 878

☎️ 023 900 878 (ទីស្នាក់ការកណ្ដាល)

☎️ 023 900 879 (សាខាខណ្ឌដូនពេញ – សង្កាត់ផ្សារកណ្ដាលទី២)

☎️ 023 212 878 (សាខាខណ្ឌ ៧ មករា – សង្កាត់វាលវង់)

☎️ 023 230 488 (សាខាខណ្ឌច្បារអំពៅ – សង្កាត់ច្បារអំពៅទី២)

☎️ 023 998 878 (សាខាអ៊ីអនមានជ័យ)

ដោយ: គង់ លាងហួរ
អន្តរជាតិ: ការចាក់បំពេញដីឡើងវិញសំដៅលើដំណើរការនៃការចាក់ដីដើម្បីបំពេញសមុទ្រ ដើម្បីសាងសង់ហេដ្ឋារចនាសម្ព័ន្ធផ្សេងៗ។កន្លងមក បណ្តាប្រទេសមួយចំនួនបានអនុវត្តន៍វិធីសាស្ត្រនេះ ព្រោះប្រទេសរបស់ពួកគេមានផ្ទៃឆ្នេរសមុទ្រធំ ប៉ុន្តែដែនដីគោកមានទំហំផ្ទៃក្រឡាតូច។

ខាងក្រោមនេះជាបណ្តាប្រទេសចំនួន៣ដែលបានចាក់បំពេញដីទៅក្នុងសមុទ្រដើម្បីស្ថាបនាសំណង់អគារ ឬហេដ្ឋារចនាសម្ព័ន្ធសំខាន់ផ្សេងៗ:

ទី១: ប្រទេសម៉ាល់ឌីវ

ម៉ាល់ឌីវ ជា​ប្រទេស​ដែល​មាន​កម្ពស់ផ្ទៃដី​ទាប​បំផុត​ពីកម្រិតនីវ៉ូទឹកសមុទ្រ។ ដោយសារតែសម្បូរទៅដោយប្រជុំកោះ ប្រទេសនេះងាយនឹងរងការលិចលង់ ដោយសារកម្រិតទឹកសមុទ្រត្រូវបានគេរំពឹងថា នឹងកើនឡើងដល់៣០សង់ទីម៉ែត្រនៅឆ្នាំ២០៥០។

លក្ខខណ្ឌនេះបាននាំឱ្យរដ្ឋាភិបាលម៉ាល់ឌីលសម្រេចចាក់ដីបំពេញទៅក្នុងសមុទ្រដើម្បីពង្រីកផ្ទៃក្រឡាដែនដីគោក តាមរយៈការផ្តួចផ្តើមឡើងនូវគម្រោង ResMalé។ គម្រោងនេះត្រូវ​បាន​គេ​ចាត់​ទុក​ថា​ ជា​គម្រោង​ចាក់បំពេញដី​ធំ​ជាង​គេ​របស់​ប្រទេស​ម៉ាល់ឌីវក្រោមទុនវិនិយោគប្រមាណ៩១,២លានដុល្លារអាមេរិក។

ទី២: ទីក្រុងម៉ាកាវ ប្រទេសចិន

សាធារណរដ្ឋ​ប្រជាមានិត​ចិន​មាន​កេរ្តិ៍ឈ្មោះ​ល្បីល្បាញ​ចំពោះ​ការ​សាងសង់​កោះ​សិប្បនិម្មិតថ្មី​ៗនៅ​សមុទ្រ​ចិន​ខាងត្បូង​ដើម្បី​អះអាង​ពី​ដែនអធិបតេយ្យភាព​របស់ខ្លួន​។ លើសពីនេះ ប្រទេសចិនគ្រោងនឹងចាក់បំពេញដីបន្ថែមនៅអាកាសយានដ្ឋានអន្តរជាតិម៉ាកាវក្នុងឆមាសទីពីរ ឆ្នាំ២០២៤នេះ។

សារព័ត៌មាន Macao News បានរាយការណ៍ថា គម្រោងនេះនឹងពង្រីកផ្ទៃដីសរុបនៃអាកាសយានដ្ឋានអន្តរជាតិម៉ាកាវដល់ទំហំ១២៩ហិកតា ដើម្បីបង្កើនសមត្ថភាពរបស់អាកាសយានដ្ឋានក្នុងការផ្ទុកអ្នកដំណើរចំនួន១៣លាននាក់ជារៀងរាល់ឆ្នាំ។

ទី៣: ប្រទេសសិង្ហបុរី

អគារ Marina Bay Sands ដ៏ល្បីល្បាញបំផុតរបស់សិង្ហបុរីត្រូវបានសាងសង់នៅលើដីដែលត្រូវបានចាក់បំពេញទៅក្នុងសមុទ្រ។នៅចុងទសវត្សរ៍ឆ្នាំ១៩៩០ តំបន់ Marina Bay បានលាតសន្ធឹងលើផ្ទៃដីសរុបចំនួន៣៦០ហិកតា។

បច្ចុប្បន្ននេះ តំបន់ Marina Bay បានក្លាយជាគោលដៅទេសចរណ៍កំពូលមួយក្នុងទីក្រុងសិង្ហបុរី ដោយទាក់ទាញបានការចូលមកទស្សនាពីភ្ញៀវទេសចរណ៍អន្តរជាតិមកពីជុំវិញពិភពលោក៕ប្រភព: Tempo៕

ដោយ: គង់ លាងហួរ
អន្តរជាតិ: តំបន់់អាស៊ីប៉ាស៊ីហ្វិកបន្តប្រឈមមុខនឹងបញ្ហាជាច្រើន ប៉ុន្តែសេដ្ឋកិច្ចរបស់តំបន់នេះនៅតែមានភាពធន់។នេះបើយោងតាមរបាយការណ៍ថ្មីរបស់ធនាគារអភិវឌ្ឍន៍អាស៊ី (ADB)។

យោងតាមរបាយការណ៍បច្ចុប្បន្នភាពចេញផ្សាយនៅខែកញ្ញា ឆ្នាំ២០២៤បានឱ្យដឹងថា ធនាគារអភិវឌ្ឍន៍អាស៊ី បានរក្សាការព្យាករណ៍កំណើនសេដ្ឋកិច្ចរបស់ខ្លួនសម្រាប់តំបន់អាស៊ីប៉ាស៊ីហ្វិកក្នុងកម្រិត៥ភាគរយសម្រាប់ឆ្នាំនេះ និងកម្រិត៤,៩ភាគរយសម្រាប់ឆ្នាំ២០២៥ខាងមុខ។

របាយការណ៍ខាងលើបានបង្ហាញថា អត្រាអតិផរណានៅក្នុងតំបន់អាសុីប៉ាសុីហ្វិកត្រូវបានព្យាករណ៍ថា នឹងស្ថិតក្នុងកម្រិត២,៨ភាគរយសម្រាប់ឆ្នាំ២០២៤ ខណៈអត្រាអតិផរណាសម្រាប់ឆ្នាំ២០២៥ត្រូវបានព្យាករណ៍ថា នឹងស្ថិតក្នុងកម្រិត២,៩ភាគរយ។

របាយការណ៍បច្ចុប្បន្នភាពថ្មីនេះក៏បានកែប្រែការព្យាករណ៍កំណើនសេដ្ឋកិច្ចរបស់ខ្លួនសម្រាប់តំបន់អាស៊ីបូព៌ានៅក្នុងឆ្នាំ២០២៤ដល់កម្រិត៤,៦ភាគរយ។

ចំណែក ទស្សនវិស័យកំណើនសេដ្ឋកិច្ចនៅតំបន់អាស៊ីខាងត្បូងសម្រាប់ឆ្នាំនេះត្រូវបានរក្សានៅត្រឹមកម្រិត៦,៣ភាគរយ។ប៉ុន្តែ ធនាគារ ADB បានទាញទម្លាក់ការព្យាករណ៍កំណើនសេដ្ឋកិច្ចសម្រាប់តំបន់អាស៊ីអាគ្នេយ៍មកនៅត្រឹម៤,៥ភាគរយ ដោយសារការធ្លាក់ចុះនៃការវិនិយោគសាធារណៈ និងការងើបឡើងវិញយឺតនៃការនាំចេញ។

លោក Albert Park ប្រធានសេដ្ឋវិទូរបស់ធនាគារ ADB បានលើកឡើងថា កំណើនសេដ្ឋកិច្ចនៅបណ្តាប្រទេសកំពុងអភិវឌ្ឍន៍ក្នុងតំបន់អាស៊ីនៅតែមានភាពរឹងមាំក្នុងអំឡុងឆមាសទី២ ឆ្នាំ២០២៤ ដែលជំរុញដោយតម្រូវការក្នុងស្រុកដ៏រឹងមាំ និងកំណើននៃការនាំចេញ។

លោក Park បានថ្លែងប្រាប់សន្និសីទសារព័ត៌មានមួយតាមរយៈប្រព័ន្ធអនឡាញថា “យើងរំពឹងថា កំណើនសេដ្ឋកិច្ចនៅក្នុងបណ្តាប្រទេសកំពុងអភិវឌ្ឍន៍ក្នុងតំបន់អាស៊ី នឹងនៅតែមានភាពរឹងមាំនៅឆ្នាំនេះ និងឆ្នាំក្រោយ”។

លោក Park បានបន្ថែមថា អតិផរណាបានបន្តកើនឡើងក្នុងកម្រិតមធ្យម ដោយបង្កើតឱកាសបន្ថែមទៀតសម្រាប់ការបន្ធូរបន្ថយគោលនយោបាយរូបិយវត្ថុរបស់បណ្តាធនាគារកណ្តាលក្នុងតំបន់៕ប្រភព:Xinhua៕

ដោយ: គង់ លាងហួរ
អន្តរជាតិ: ក្រុមហ៊ុនផលិតយន្តហោះខ្នាតយក្សអឺរ៉ុប Airbus គ្រោងនឹងពង្រីកប្រតិបត្តិការរបស់ខ្លួននៅក្នុងប្រទេសហ្វីលីពីន ដោយសារមើលឃើញថា ប្រទេសនេះជាទីផ្សារដ៏មានសក្តានុពល។នេះបើយោងតាមសារពត៌មាន Business World Online។

លោក Jussi Hoikka ប្រធានតំណាងក្រុមហ៊ុន Airbus ប្រចាំប្រទេសហ្វីលីពីន អះអាងថា “ប្រទេសហ្វីលីពីនជាទីផ្សារដ៏ទាក់ទាញមួយសម្រាប់ក្រុមហ៊ុន Airbus។នៅខាងផ្នែកអាកាសចរណ៍ពាណិជ្ជកម្ម ចំនួនអ្នកដំណើរនៅហ្វីលីពីនមានការកើនឡើងយ៉ាងខ្លាំង”។

លើសពីនេះ លោក Hoikka បានបញ្ជាក់ថា ក្រុមហ៊ុន Airbus ក៏គ្រោងនឹងជួយពង្រឹងវិស័យការពារដែនអាកាសរបស់ប្រទេសហ្វីលីពីន ហើយក្រុមហ៊ុនកំពុងពិភាក្សាជាមួយកងទ័ពអាកាសហ្វីលីពីន ដើម្បីពង្រីកចំនួនយន្ដហោះរបស់ពួកគេ។

លោកបន្តថា“អាជីវកម្មរបស់ក្រុមហ៊ុន Airbus រួមមានទាំងការផលិតយន្តហោះពាណិជ្ជកម្ម ការការពារដែនអាកាស អវកាស និងឧទ្ធម្ភាគចក្រ។ ស្របពេលទិដ្ឋភាពភូមិសាស្ត្រនយោបាយនៅក្នុងតំបន់អាស៊ីប៉ាស៊ីហ្វិកកាន់តែមានភាពស្មុគស្មាញ វាជារឿងសំខាន់ ដែលបណ្តាប្រទេសនានាដូចជា ហ្វីលីពីនត្រូវមានឧបករណ៍ដើម្បីការពារដែនអធិបតេយ្យភាពរបស់ខ្លួន”។

លោកអះអាងថា ក្រុមហ៊ុន Airbus មានទំនុកចិត្តថា នឹងអាចបំពេញតម្រូវការយោធានាពេលអនាគតរបស់ហ្វីលីពីន តាមរយៈការផ្តល់បច្ចេកវិទ្យាទំនើបៗ និងយន្តហោះរបស់យើង ដើម្បីជួយកងកម្លាំងប្រដាប់អាវុធហ្វីលីពីនក្នុងការបំពេញបេសកកម្មរបស់ពួកគេដើម្បីការពារអធិបតេយ្យភាព និងធានាសុវត្ថិភាពរបស់ពលរដ្ឋហ្វីលីពីន។

ជាពិសេស ក្រុមហ៊ុនផលិតយន្តហោះខ្នាតយក្សអឺរ៉ុប Airbus ក៏កំពុងពិចារណាពង្រីករោងចក្រផលិតកម្មរបស់ខ្លួននៅអាកាសយានដ្ឋានអន្តរជាតិ Ninoy Aquino នៅក្នុងរដ្ឋធានីម៉ានីល។

លោក Jussi Hoikka បានអះអាងថា “ក្រុមហ៊ុន Airbus ជាប្រភពផ្គតផ្គង់យន្តហោះដ៏សំខាន់សម្រាប់ក្រុមហ៊ុនអាកាសចរណ៍ហ្វីលីពីនPhilippine Airlines និងក្រុមហ៊ុន Cebu Pacific”៕ប្រភព:Business World៕