ដោយ: គង់ លាងហួរ

អន្តរជាតិ: លោកស្រី Kamala Harris បេក្ខជនប្រធានាធិបតីមកពីគណបក្សប្រជាធិបតេយ្យ បានឈានចូលដល់សប្តាហ៍ចុងក្រោយ នៃការធ្វើយុទ្ធនាការ សម្រាប់ការបោះឆ្នោតជ្រើសរើសប្រធានាធិបតីសហរដ្ឋអាមេរិក នៅក្នុងខែវិច្ឆិកាខាងមុខ។

លោកស្រីបាននាំមុខ លោកអតីតប្រធានាធិបតីអាមេរិក Donald Trump យ៉ាងប្រកៀកប្រកិតគ្នា នៅក្នុងការស្ទង់មតិជាច្រើន ដោយបានកាត់បន្ថយការរំពឹងទុក ចំពោះការវិលត្រឡប់មកកាន់សេតវិមានវិញរបស់លោក Donald Trump ។

ទោះបីជាលោកស្រី Harris មានប្រៀបជាងលោក Trump បន្ដិចក្តី ប៉ុន្តែការណ៍នេះបានបណ្តុះក្តីសង្ឃឹម ក្នុងចំណោមក្រុមមន្ដ្រីបង្កើតគោលនយោបាយ និងអ្នកធុរកិច្ចនៅតំបន់អាស៊ីចំពោះរដ្ឋបាលគ្រប់គ្រងនាពេលអនាគត ក្នុងទីក្រុងវ៉ាស៊ីន​តោ​ន ព្រោះពួកគេគាំទ្រការបន្តរក្សាស្ថានភាពដើមដដែល ជាជាងភាពវឹកវរ។

ផ្ទុយទៅវិញ ក្នុងករណីលោក Trump ឈ្នះឆ្នោតកាន់តំណែ​ងជាប្រធានាធិបតីម្តងទៀត អាចនឹងមានភាពវឹកវរកើតឡើង  ដោយសារភាពប្រែប្រួល នៃគោលនយោបាយផ្សេងៗ និងការប្រកាសដាក់ពន្ធគយលើការនាំចូលទំនិញ។

ក្រុមអ្នកជំនាញបានព្រមានថា ការសម្រេចចិត្ដដែលមិនអាចទាយទុកជាមុនបាន របស់អតីតប្រធានាធិបតីរូបនេះ បង្កហានិភ័យយ៉ាងធំសម្រាប់តំបន់អាស៊ី និងសេដ្ឋកិច្ចពិភពលោក ក្នុងអំឡុងពេលមានភាពមិនច្បាស់លាស់។

ចំណែកលោកស្រី Kamala Harris ត្រូវបានគេមើលឃើញថាជា បេក្ខជនដែលមានឆន្ទៈ បន្តគោលនយោបាយរបស់រដ្ឋបាលបច្ចុប្បន្ន។

លោកស្រីត្រូវបានគេរំពឹងថា នឹងអនុវត្តន៍គោលនយោបា​យរបស់លោកប្រធានាធិបតីលោក ចូ បៃដិន រួមទាំងជំហរដ៏តឹងរឹងចំពោះប្រទេសចិន ដោយផ្តោតលើបញ្ហាពាណិជ្ជកម្ម សមុទ្រចិនខាងត្បូង និងជាពិសេសក្រុមហ៊ុនផលិតបន្ទះឈីប។

លោក ចូ ដៃដិន បានដាក់ពន្ធថ្មី លើការនាំចូលទំនិញរបស់ចិននៅដើមឆ្នាំនេះ ហើយលោកស្រីHarris ត្រូវបានគេព្យាករ​ណ៍ថា នឹងរក្សាវិធានការទាំងនេះ។ ប៉ុន្តែក្រុមអ្នកជំនាញរំពឹងថា លោកស្រី នឹងមិនអនុវត្តន៍ពន្ធ១០ភាគរយ លើការនាំចូលទំនិ​ញទាំងអស់ ដូចដែលលោក Trump បានស្នើឡើងនោះទេ។

ផ្ទុយទៅវិញ លោកស្រី អាចនឹងប្រើប្រាស់វិធីសាស្រ្ត ដើម្បីធ្វើឱ្យមានតុល្យភាពកាន់តែល្អ រវាងគូប្រជែងជាយុទ្ធសាស្រ្តរបស់សហរដ្ឋអាមេរិកជាមួយប្រទេសចិន និងទំនាក់ទំនងសេដ្ឋកិច្ចរបស់ទីក្រុងវ៉ាស៊ីនតោន ជាមួយបណ្តាប្រទេសនៅទូទាំងអាស៊ី៕ប្រភព: SCMP៕

ដោយ: គង់ លាងហួរ

អន្តរជាតិ: តម្លៃផ្ទះនៅប្រទេសឥណ្ឌា រំពឹងបន្តកើនឡើងជាលំដាប់ ក្នុងរយៈពេល២ឆ្នាំឬ៣ឆ្នាំខាងមុខ ដោយសារកំណើននៃតម្រូវការ អចលនទ្រព្យប្រណីត ពីវណ្ណៈអ្នកមាន ហើយតម្លៃផ្ទះជួល នឹងកើនឡើងលើសពីអត្រាអតិផរណា លើតម្លៃទំនិញប្រើប្រាស់។

ប៉ុន្តែក្រុមអ្នកជំនាញព្រមានថា អត្ថប្រយោជន៍កំពុងត្រូវបានបង្វែរ ទៅកាន់មនុស្សមួយចំនួនតូចប៉ុណ្ណោះ ខណៈចំនួនអ្នកស្វែងរកការងារធ្វើរាប់លាននាក់ ជាពិសេសយុវជនកំពុងជួបផលលំបាក។ នេះបើយោងតាមសារពត៌មាន Reuters។

ការធ្លាក់ចុះនៃការផ្គត់ផ្គង់ផ្ទះ មានតម្លៃសមរម្យ និងក្រុមអ្នកមានសម្រុកទិញផ្ទះ ដោយប្រើប្រាស់សាច់ប្រាក់សុទ្ធ បាននាំឱ្យអ្នកមានបំណងទិញផ្ទះ លើកដំបូងជាច្រើនត្រូវបង្ខំចិត្តបន្តស្នាក់នៅផ្ទះជួល។

បន្ទាប់ពីកើនឡើង៤,៣% កាលពីឆ្នាំមុន តម្លៃផ្ទះជាមធ្យមនៅក្នុងប្រទេសឥណ្ឌា ត្រូវបានគេរំពឹងថា នឹងកើនឡើង៧,៧៥ភាគរយនៅឆ្នាំនេះ បើធៀបនឹងការព្យាករណ៍ ពីមុនចំនួន៦%។ការស្ទង់មតិនេះ មានការចូលរួមពីក្រុមអ្នកជំនាញ ទីផ្សារអចលនទ្រព្យចំនួន១៦រូប។

ចំណែកក្នុងរយៈពេលពីរឆ្នាំខាងមុខ តម្លៃផ្ទះត្រូវបានគេរំពឹងថា នឹងកើនឡើងពី៦% ទៅ៦,២៥%។

លោកAnuj Puri ប្រធានក្រុមហ៊ុនANAROCK Property Consultants បាននិយាយថា “តម្រូវការលំនៅដ្ឋាននៅឥណ្ឌាបានផ្អៀងយ៉ាងខ្លាំង ​ឆ្ពោះទៅរកផ្នែកលំនៅដ្ឋានប្រណីត។ និន្នាការនេះ បានធ្វើឱ្យតម្លៃផ្ទះកើនឡើងឥតឈប់ឈរ ខណៈការអភិវឌ្ឍន៍លំនៅដ្ឋាន តម្លៃសមរម្យនៅតែបន្តធ្លាក់ចុះ”។

យោងតាមទិន្នន័យរបស់ក្រុមហ៊ុន Knight Frank បានឱ្យដឹងថា ជាធម្មតា បុគ្គលមានទ្រព្យសម្បត្តិសុទ្ធ ជាង៣០លានដុល្លារឡើងទៅ នៅក្នុងប្រទេសឥណ្ឌា កាន់កាប់ផ្ទះច្រើនជាង២កន្លែង ហើយចំនួន១២ភាគរយនៃពួកគេ មានគម្រោងទិញផ្ទះមួយកន្លែងផ្សេងទៀតនៅឆ្នាំនេះ។

យោងតាមគេហទំព័រអចលនទ្រព្យ Properstar បានឱ្យដឹងថា ផ្ទះទូទៅនៅប្រទេសឥណ្ឌា មានតម្លៃជាមធ្យមចំនួន១៩២.១៤៤រូពី (ប្រហែល២.២៩០ដុល្លារ)ក្នុងមួយម៉ែត្រការ៉េ ខណៈអាផាតម៉ិន មានតម្លៃជាមធ្យមចំនួន៩៨.៥៤៩រូពី (ប្រហែ​ល១១៧៤ដុល្លារ)ក្នុងមួយម៉ែត្រការ៉េ៕ប្រភព:Reuter៕

ដោយៈ គង់ សូរិយា

      ភ្នំពេញៈ សម្តេចធិបតី ហ៊ុន ម៉ាណែតនាយករដ្ឋមន្ត្រីនៃកម្ពុជា បានបញ្ជាក់ឱ្យដឹងថា ទោះបីជាកម្ពុជា ប្រកាសដកខ្លួនពីកិច្ចសហប្រតិបត្តិការអភិវឌ្ឍតំបន់ត្រីកោណកម្ពុជា-ឡាវ-វៀតណាម (CLV-DTA) រួចហើយក្តី ក៏គោលនយោបាយរាជរដ្ឋាភិបាល ក្នុងការជំរុញអភិវឌ្ឍ នៅតាមបណ្តាខេត្តភូមិភាគឦសានរបស់កម្ពុជា គឺនៅតែរក្សាដដែល មិនមានការប្រែប្រួលទេ។

ការប្រកាសរបស់ សម្តេចធិបតីហ៊ុន ម៉ាណែត បានធ្វើឡើងតបតាមចម្ងល់ របស់ប្រជាពលរដ្ឋមួយចំនួន ដែលហាក់ព្រួយបារម្ភខ្លាច រាជរដ្ឋាភិបាល ឈប់អភិវឌ្ឍន៍បណ្តាខេត្តភូមិភាគឦសាសន្ត ដោយសារតែការដកខ្លួន ចេញពីកិច្ចសហប្រតិបត្តិការ CLV-DTA។

តាមរយៈសារសំឡេងពិសេសមួយ នៅថ្ងៃទី២៣ ខែកញ្ញា ឆ្នាំ២០២៤នេះ សម្តេចធិបតី ហ៊ុន ម៉ាណែត បានបញ្ជាក់ថា ទោះមាន ឬមិនមានកិច្ចសហប្រតិបត្តិការ CLV-DTA រាជរដ្ឋាភិបាលកម្ពុជា នៅតែបន្តអភិវឌ្ឍតំបន់ភូមិភាគឦសាន នៃប្រទេ​សរបស់ខ្លួន ក៏ដូចជា ការធានានូវការការពារទឹកធី អធិបតេយ្យភាពរបស់ប្រទេសកម្ពុជា ព្រោះនេះជាការចង់បានរបស់ប្រជាពលរដ្ឋខ្មែរច្រើនលើសលប់ ជាពិសេសប្រជាពលរដ្ឋ ដែលរស់នៅផ្ទាល់នៅក្នុង បណ្តាខេត្តភូមិភាគឦសានផ្ទាល់តែម្តង។ ដូច្នេះការបន្តគោលនយោបាយ ជំរុញអភិវឌ្ឍភូមិភាគឦសានរបស់កម្ពុជា គឺនៅរក្សាដដែលមិនមានការប្រែប្រួល ដោយរួមមានការបោះបង្គោលព្រំដែន ជាមួយប្រទេសជិតខាង ការកសាងហេដ្ឋារចនាសម្ព័ន្ធតភ្ជាប់ ជាពិសេសផ្លូវក្រវាត់ព្រំដែន និងការដាក់ចេញនូវកញ្ចប់លើកទឹកចិត្ត និងជំរុញការវិនិយោគខេត្តភូមិភាគឦសានឆ្នាំ២០២៥។

រាជរដ្ឋាភិបាលកម្ពុជា បានប្រកាសដកខ្លួនចេញពីកិច្ចសហ​ប្រតិបត្តិការតំបន់ត្រីកោណអភិវឌ្ឍន៍កម្ពុជា ឡាវ វៀតណាម (CLV-DTA) កាលពីថ្ងៃទី២០ ខែកញ្ញា ឆ្នាំ២០២៤ បន្ទាប់ពីកិច្ចសហប្រតិបត្តិការ ដែលផ្តួចផ្តើមដោយកម្ពុជានេះ ត្រូវបានអនុវត្តរយៈពេល២៥ឆ្នាំកន្លងមក។ ការដកខ្លួនេះ ដើម្បី “ដកអាវុធចេញពីដៃពួកជ្រុលនិយម” កុំឲ្យមានលទ្ធភាពប្រើប្រាស់ CLV-DTA បោកប្រាស់ប្រជាជនកម្ពុជាតទៅទៀត។

ជាមួយនឹងសារសំឡេងថ្មីនេះ សម្តេចធិបតី ហ៊ុន ម៉ាណែត បានថ្លែងអំណរគុណប្រជាពលរដ្ឋក្នុង និងក្រៅប្រទេស ដែលបានចូលរួមបរិច្ចាគថវិកាដោយស្ម័គ្រចិត្ត ចូលរួមកសាងហេដ្ឋារចនាសម្ព័ន្ធតាមព្រំដែន កសាងផ្លូវខ្សែក្រវាតព្រំដែន ដែលគិតមកដល់ពេលនេះ មានប្រមាណ៧០ម៉ឺននាក់ហើយ ដែលគិតជាថវិកាប្រមាណ២១លានដុល្លារអាមេរិកផងដែរ។

សម្តេចបានបន្ថែមថា “វិភាគទាននេះ នឹងត្រូវយកទៅប្រើប្រាស់ លើការកសាងហេដ្ឋារចនាសម្ព័ន្ធតាមព្រំដែន ដោយផ្តោតលើការកសាងផ្លូវក្រវាត់ព្រំដែន”។

សម្តេចធិបតី ហ៊ុន ម៉ាណែតបានបញ្ជាក់ថា ការកសាងផ្លូវក្រវាត់ព្រំដែន នៅជាប់ប្រទេសទាំង៣ ឡាវ-ថៃ-វៀតណាម បានចាប់ផ្តើមឡើង តាំងពីឆ្នាំ១៩៩៤ មកម្ល៉េះ ហើយរហូតមកដល់បច្ចុប្បន្ន កម្ពុជាបានកសាងសម្រេចចំនួន ១៣០០គីឡូ​ម៉ែត្រហើយ ដែលនៅសេសសល់ប្រមាណ១៣០០គីឡូម៉ែត្រទៀត នឹងត្រូវធ្វើបន្ត។

ដោយសង្កេតឃើញចលនានៃការបរិច្ចាគ ដើម្បីកសាងហេដ្ឋារចនាសម្ព័ន្ធតាមព្រំដែន ដោយផ្តោតលើការកសាងផ្លូវក្រវាត់ព្រំដែន នៅតែមានការចូលរួមជាហូរហែនោះ សម្តេចបានបញ្ជាក់ថា ក្រុមការងារនឹងបន្តទទួលថវិកា រហូតដល់ថ្ងៃទី៣១ ខែតុលា ឆ្នាំ២០២៤ ហើយនៅពេលបិទបញ្ចប់ក្រុមការងារនឹងជម្រាបអំពីចំនួនទឹកប្រាក់ចុងក្រោយ និងផែនការច្បាស់​លាស់ ដើម្បីប្រើប្រាស់ថវិកាទាំងនេះ។

ចំពោះការរៀបចំដំណើរទស្សនកិច្ច នៅខេត្តភូមិភាគឦ​សាន រៀងរាល់ចុងសប្តាហ៍ រហូតដល់ដំណាច់ឆ្នាំ២០២៤ សម្តេ​ចក៏បានប្រកាសឱ្យបន្តរក្សាដដែល ដើម្បីឱ្យពលរដ្ឋបានទស្សនាជាក់ស្តែង នូវបណ្តាខេត្តភូមិភាគឦសាន របស់កម្ពុជាយើង៕