រាជធានីភ្នំពេញស្ថិតក្នុងគោលដៅអាទិភាពទាំង២៥របស់ក្រុមហ៊ុនអាកាសចរណ៍ Turkish Airlines

ដោយ: គង់ លាងហួរ
អន្តរជាតិ: ក្រុមហ៊ុនអាកាសចរណ៍ Turkish Airlines បានធ្វើបច្ចុប្បន្នភាពលើអាទិភាព នៃការបើកផ្លូវហោះហើររបស់ខ្លួនទៅកាន់គោលដៅអន្តរជាតិ ដោយបានគូសបញ្ជាក់ពីទីក្រុងចំនួន២៥នៅទូទាំងពិភពលោក។
ក្នុងនោះ គោលដៅអាទិភាពចំនួន២ មានទីតាំងស្ថិតនៅក្នុងតំបន់អាស៊ីប៉ាស៊ីហ្វិក ដោយក្រុមហ៊ុនអាកាសចរណ៍ Turkish Airlines គ្រោងបើកការហោះហើរ មកកាន់កាន់រាជធានីភ្នំពេញរបស់កម្ពុជា នាពេលអនាគត និងទីក្រុងស៊ីដនីនៃប្រទេសអូស្ត្រាលី។
លោក Ahmet Bolat ប្រធានក្រុមហ៊ុនអាកាសចរណ៍ Turkish Airlines បានបញ្ជាក់ប្រាប់សារពត៌មាន Aviation Week ថា “យើងនឹងរីកចម្រើននៅអូស្ត្រាលី។ ក្នុងរយៈពេល២ឆ្នាំទៀត យើងនឹងបើកជើងហោះហើរប្រចាំថ្ងៃ ទៅកាន់ទាំងទីក្រុងម៊ែលបន (Melbourne) និងទីក្រុងស៊ីដនី (Sydney)”។
ជាមួយគ្នានេះ ក្រុមហ៊ុនគ្រោងបើកជើងហោះហើរ ទៅកាន់គោលដៅចំនួន៤ នៅក្នុងតំបន់អាមេរិក ដូចជាទីក្រុងលីម៉ានៃប្រទេសប៉េរូ ទីក្រុង Orlando នៃសហរដ្ឋអាមេរិក ទីក្រុង Rio de Janeiro នៃប្រទេសប្រេស៊ីល និងទីក្រុងSantiagoនៃប្រទេសChile។
ចំពោះតំបន់មជ្ឈិមបូព៌ា និងអាហ្វ្រិក ក្រុមហ៊ុនគ្រោងបើកជើងហោះហើរ ទៅកាន់ទីក្រុង Abha នៃប្រទេសអារ៉ាប៊ីសាអូឌីត ទីក្រុងAswan របស់អេហ្ស៊ីប ទីក្រុង Brazzaville នៃសាធារណរដ្ឋកុងហ្គោ ទីក្រុង Hargeisa នៃប្រទេសសូម៉ាលី និងទីក្រុងជាច្រើនទៀត។

បញ្ជីនៃគោលដៅអនាគត ចំនួន៧ផ្សេងទៀតរបស់ក្រុមហ៊ុនអាកាសចរណ៍ខាងលើ មានទីតាំងនៅក្នុងទ្វីបអឺរ៉ុប ដូចជាទីក្រុង Bergen នៃប្រទេសន័រវេស ទីក្រុង Glasgowនៃប្រទេសស្កុតឡេន ទីក្រុង Iasi និងទីក្រុង Timisoara នៃប្រទេសRomania ទីក្រុង Katowiceរបស់ប៉ូឡូញ ទីក្រុង Nantes របស់ប្រទេសបារាំង និងទីក្រុង Newcastle នៃប្រទេសអង់គ្លេស។

នៅក្នុងត្រីមាសទីពីរ ឆ្នាំ២០២៤ ក្រុមហ៊ុនអាកាសចរណ៍ Turkish Airlines បានដឹកអ្នកដំណើរចំនួន២២,១លាននាក់ កើនឡើង៣៨ភាគរយ បើធៀបនឹងកម្រិតមុន ការរាតត្បាតនៃជំងឺកូវីដ-១៩ ទោះបីជាមានការពន្យាពេល ប្រគល់យន្តហោះយ៉ាងណាក្តី៕ប្រភព:Aviation Week៕

ការសិក្សាថ្មីៈ តើគម្រោងព្រែកជីកហ្វូណន-តេជោនឹងផ្តល់អត្ថប្រយោជន៍អ្វីខ្លះដល់ទីផ្សារអចលនទ្រព្យនៅកម្ពុជា?

ដោយ: គង់ លាងហួរ

ភ្នំពេញ: ស្រដៀងគ្នាទៅនឹងការអភិវឌ្ឍ គម្រោងហេដ្ឋារចនាសម្ព័ន្ធផ្សេងទៀត ការអភិវឌ្ឍន៍ព្រែកជីកហ្វូណនតេជោ ត្រូវបានគេរំពឹងថា នឹងធ្វើឱ្យទីផ្សារអចលនទ្រព្យ នៅក្នុងតំបន់ជុំវិញព្រែកជីក ទទួលបានការចាប់អារម្មណ៍ កាន់តែច្រើនពីអ្នកវិនិយោគ។

ការអភិវឌ្ឍន៍ព្រែកជីក និងហេដ្ឋារចនាសម្ព័ន្ធផ្សេងទៀត នឹងទាក់ទាញទាំងការវិនិយោគ និងការទិញអចលនទ្រព្យស្តុកទុក។ ទីផ្សារនៅតំបន់នោះ នឹងជួបប្រទះការកើនឡើង នៃការចុះបញ្ជីអចលនទ្រព្យ ការសាកសួរ និងប្រតិបត្តិការ។

តម្លៃ​ដី​ ដែលភាគច្រើន​ជា​ដី​កសិកម្ម ​ត្រូវ​បាន​គេ​រំពឹង​ថា ​នឹង​កើនឡើង​ចាប់ពី​ពេល​នេះ​ រហូត​ដល់​ការ​បញ្ចប់​ការសាងសង់ព្រែកជីក​។

ទោះជាយ៉ាងណា ក្រុមហ៊ុនCBRE  បញ្ជាក់ថា ពុំមែនគ្រប់តំបន់ជុំវិញព្រែកជីក នឹងក្លាយជាជម្រើស នៃការវិនិយោគដ៏ល្អនោះទេ។ ដូច្នេះ ការវាយតម្លៃត្រឹមត្រូវ និងការពិគ្រោះយោបល់ជាមួយក្រុមអ្នកជំនាញជារឿងចាំបាច់ មុនពេលធ្វើការសម្រេចចិត្តណាមួយ។

ព្រែកជីកហ្វូណនតេជោ ត្រូវ​បាន​គេ​រំពឹង​ថា​ នឹង​ជះឥទ្ធិពលយ៉ាង​ខ្លាំង​ ដល់​ការ​អភិវឌ្ឍន៍ទីក្រុង និង​ខេត្ត។ ព្រែកជីកនេះ​មានសក្តានុពល​ ក្នុង​ការ​បង្វែរ​ទិសដៅ ​នៃការអភិវឌ្ឍន៍​ឧស្សាហកម្ម​របស់​រាជធានី​ភ្នំពេញ ​ពី​ទិសខាងលិច​ទៅ​កាន់ទិសភាគ​ខាងត្បូង​ និង​ទិសអាគ្នេយ៍​។

លើសពីនេះ គម្រោងខាងលើ នឹងបង្កើតច្រករបៀងសេដ្ឋកិច្ចភាគខាងត្បូងថ្មីមួយទៀតនៅកម្ពុជា ដោយប្រែក្លាយបណ្តាខេត្តនៅតាមបណ្តោយ គម្រោងព្រែកជីក ទៅជាតំបន់សេដ្ឋកិច្ចចម្រុះ។

ក្នុងរយៈពេលខ្លី និងមធ្យម ព្រែកជីកនឹងជំរុញតម្រូវការដីធ្លីនៅក្នុងវិស័យឧស្សាហកម្ម និងភស្តុភារ។ អ្នកវិនិយោគនឹងចាប់អារម្មណ៍ទិញដី ដើម្បីសាងសង់មជ្ឈមណ្ឌលដឹកជញ្ជូន កំពង់ផែស្ងួត ឃ្លាំងស្តុកទំនិញ និងសួនឧស្សាហកម្មជាដើម ដោយ​សារការតភ្ជាប់ នឹងកាន់តែមានភាពប្រសើរឡើង និងលទ្ធភាពប្រើប្រាស់ផ្លូវពាណិជ្ជកម្ម។

លើសពីនេះ ហេដ្ឋារចនាសម្ព័ន្ធថ្មី អាចបើកឱកាសជាច្រើនក្នុងវិស័យកសិកម្ម ដោយទាក់ទាញគម្រោងកសិកម្មខ្នាតធំ និងការបង្កើតកសិ-កែច្នៃ។

ក្រៅពីនោះ កំណើននៃសកម្មភាពសេដ្ឋកិច្ច តាមរយៈការអភិវឌ្ឍន៍ឧស្សាហកម្ម និងភស្តុភារត្រូវបានរំពឹងថា នឹងជំរុញតម្រូវការអចលនទ្រព្យលំនៅដ្ឋាន និងពាណិជ្ជកម្ម។នៅពេលអាជីវកម្មថ្មីបានលេចរូបរាលឡើង ហើយអាជីវកម្មមានស្រាប់ត្រូវបានពង្រីក នោះតម្រូវការលំនៅដ្ឋានតម្លៃសមរម្យ នឹងមានការកើនឡើង ដោយសារកម្លាំងពលកម្ម។

ការណ៍នេះ នឹងនាំឱ្យមានការអភិវឌ្ឍន៍លំនៅដ្ឋាន ដើម្បីឆ្លើយតបនឹងមនុស្ស ដែលមានកម្រិតប្រាក់ចំណូលផ្សេងៗគ្នា ដោយធានាថា និយោជិតមានលទ្ធភាព ទទួលបានលក្ខខណ្ឌរស់នៅសមរម្យ នៅជិតកន្លែងធ្វើការរបស់ពួកគេ។ ក្នុងពេលដំណាលគ្នានេះ ការកើនឡើងនៃប្រតិបត្តិការអាជីវកម្ម នឹងបង្កើតឱ្យមានតម្រូវការអគារពាណិជ្ជកម្ម។

បន្ថែមពីលើនេះ ប្រតិបត្តិការអាជីវកម្ម ទាក់ទងនឹងវិស័យ​ទេ​​សចរណ៍ សណ្ឋាគារ រមណីយដ្ឋាន និងសេវាកម្មបដិសណ្ឋារកិច្ចផ្សេងៗត្រូវបានរំពឹងថា នឹងកើនឡើង ព្រោះហេដ្ឋារចនាសម្ព័ន្ធនៅតំបន់ព្រែកជីក នឹងបង្កើនភាពងាយស្រួល ក្នុងការធ្វើដំណើរទៅកាន់តំបន់ដាច់ស្រយាល៕ប្រភព: CBRE៕

       ដោយៈ គង់ សូរិយា

       ភ្នំពេញៈ សម្តេចធិបតីហ៊ុន ម៉ាណែតនាយករដ្ឋមន្រ្តីនៃកម្ពុជាបានប្រកាសអញ្ជើញប្រជាពលរដ្ឋ ដែលចង់ទៅសិក្សាស្វែងយល់នៅខេត្តទាំង៤ អាចធ្វើដំណើរតាមរយៈរថយន្ត ដែលរដ្ឋាភិបាលរៀបចំជូនរៀងរាល់ ចុងសប្តាហ៍ចាប់ពីខែកញ្ញា ដល់ខែធ្នូ ឆ្នាំ២០២៤នេះ។

ក្នុងសារពិសេសចេញផ្សាយ កាលពីល្ងាចថ្ងៃទី២២ សីហានេះ សម្តេចធិបតីបានបញ្ជាក់ថា រដ្ឋាភិបាលនឹងអនុញ្ញាត្តឲ្យប្រជាពលរដ្ឋអាចធ្វើដំណើរកំសាន្ត នៅខេត្តទាំង៤ នៃតំបន់ភូមិភាគឦសាន្ត តាមរយៈរថយន្តដែលរដ្ឋាភិបាល នឹងរៀបចំជូន ព្រមទាំងមានការផ្តល់បាយទឹកផងដែរ។

សម្តេចបញ្ជាក់ថា “ការរៀបចំនេះ ដើម្បីឲ្យប្រជាពលរដ្ឋ ពិសេសយុវជន បានទៅឃើញទិដ្ឋភាពជាក់ស្តែង នៅតាមខេត្តទាំង៤ ស្របតាមព្រំដែន និងការអភិវឌ្ឍនៅតាមព្រំដែនរបស់យើង”។ សម្តេចបន្តថា “កន្លងមកខ្ញុំធ្លាប់អំពាវនាវឲ្យ បងប្អូនប្រជាពលរដ្ឋទៅលេងឲ្យបានច្រើន ពេលខ្លះបងប្អូនថាចង់ទៅដែរ តែថាអត់លុយ ឥលួវរាជរដ្ឋាភិបាលនឹងរៀបចំនូវកម្មវិធីនេះ ដោយផ្តល់នូវមធ្យោបាយដឹកជញ្ជូន អាហារ ដោយមិនគិតថ្លៃ”។

សម្តេចធិបតីបានបញ្ជាក់ថា ឯកឧត្តមនេត្រ ភ័ក្រ្តារដ្ឋមន្រ្តីក្រសួងព័ត៌មាន បានទទួលភារកិច្ចនូវការងារនេះ និងរៀបចំដា​ក់ចេញនូវផែនការលំអិត ពីការចុះឈ្មោះ និងពេលវេលាដែលត្រូវអនុវត្តន៍។ ជាពិសេសយុវជននៅភ្នំពេញ ដែលចង់ទៅលេង ទៅឲ្យស្គាល់ថា តើនៅព្រំដែនយ៉ាងណា? ថាផ្លូវយើងបានធ្វើប៉ុណ្ណា? ថាតើប្រជាពលរដ្ឋដែលរស់នៅទីនោះ មានជីវភាពរស់នៅយ៉ាងម៉េច? តើអាចទេប្រជាពលរដ្ឋទាំងនោះ នៅថ្ងៃមុខ មិនមែនជាប្រជាពលរដ្ឋខ្មែរ?។ តើអាចទេ យើងអាចបាត់បង់ខេត្តទាំង៤? ហើយបាត់បង់អធិបតេយ្យភាពនៅខេត្តទាំង៤?។

សម្តេចបានបញ្ជាក់ទៀតថា “នេះជាកង្វល់របស់ប្រជាពល​រដ្ឋទាំងអស់ មិនថាប្រជាពលរដ្ឋគាំទ្រ និងមិនគាំទ្រនូវគំរោងកិច្ចសហប្រតិបត្តិការត្រីកោណអភិវឌ្ឍន៍(DTA)នោះទេ”។សម្តេចបន្តថា “នេះជាសិទ្ឋនិងជាកាតព្វកិច្ច ហើយខ្ញុំដាក់ចេញនូវកម្មវិធីទាំងប៉ុន្មាននេះ ហើយខ្ញុំស្តាប់ប្រជាពលរដ្ឋ អំពីការព្រួយបារម្ភរបស់គាត់ ហើយប្រជាពលរដ្ឋភាគច្រើនលើសលុប គាត់មិនខ្វល់DTA ឬមិនDTAទេ គឺគាត់គិតយ៉ាងណា កុំឲ្យបាត់ខេត្តទាំងបួន បាត់អធិបតេយ្យខេត្តទាំងបួន គឺផ្តោតលើខេត្តនៅទូទាំងប្រទេស គឺធ្វើយ៉ាងណាធានាបាននូវការអភិវឌ្ឍ ធានានូវសុខសន្តិភាពជូនគាត់”៕

ដោយ: គង់ លាងហួរ

បាងកក: យោងតាមប្រភពវិមានរដ្ឋាភិបាល បានឱ្យដឹងថា រដ្ឋាភិបាលថៃ ក្រោមការដឹកនាំរបស់នាយករដ្ឋមន្ត្រីថ្មី លោកស្រី Paetongtarn Shinawatra គ្រោងបោះទុនជាង៣០០ពាន់លានបាត(ប្រហែល៨,៧៥ពាន់លានដុល្លារ) ដើម្បីជំរុញសេដ្ឋកិច្ច។

ទុនវិនិយោគមានប្រភពមកពីច្បាប់ ចំណាយថវិកាបន្ថែម ថវិកាជាតិ សម្រាប់ការចំណាយបន្ទាន់ក្នុងគ្រាអាសន្ន និងថវិកាជាតិឆ្នាំ២០២៥។

ទី១: នៅក្រោមច្បាប់ចំណាយថវិកាបន្ថែម សម្រាប់ឆ្នាំសារ ពើពន្ធ២០២៤ រដ្ឋាភិបាលបានវិភាជន៍ថវិកា១២២ពាន់លានបាត ដើម្បីផ្តល់មូលនិធិដល់គម្រោងចែកប្រាក់ ឌីជីថលរបស់ខ្លួន។ ច្បាប់​នេះ ​បាន​ឆ្លង​ផុត​​ការជជែកដេញដោលក្នុងសភា​ និង​កំពុង​រង់​ចាំ​ការ​អនុម័ត។

ទី២: នៅក្រោមសេចក្តីព្រាង នៃថវិកាសារពើពន្ធឆ្នាំ២០២៥ រដ្ឋាភិបាលមុន បានវិភាជន៍ថវិកាចំនួន១៥២ពាន់លានបាតសម្រាប់ការជំរុញសេដ្ឋកិច្ច។ ដើមឡើយ ថវិកានេះត្រូវបានបម្រុងទុក សម្រាប់គម្រោងចែកប្រាក់ឌីជីថល ប៉ុន្តែថវិកាអាចត្រូវបានបង្វែរ ដើម្បីផ្តល់មូលនិធិដល់គម្រោងផ្សេងទៀត ប្រសិ នបើរដ្ឋាភិបាលសម្រេចចិត្ត កែសម្រួលវិសាលភាពនៃគម្រោងចែកប្រាក់ជូនប្រជាជន។

ទី៣: នៅក្រោមថវិកាជាតិ សម្រាប់ការចំណាយគ្រាអាសន្នក្រោមថវិកាសារពើពន្ធឆ្នាំ២០២៤ រដ្ឋាភិបាលមុនបានវិភាជន៍ទុកថវិកាចន្លោះពី៤០ ទៅ៥០ពាន់លានបាត។ ទោះជាយ៉ាងណា ថវិកានេះនឹងត្រូវបានអនុម័ត និងបញ្ចេញក្នុងខែកញ្ញាខាងមុខ មុនពេលឆ្នាំសារពើពន្ធបញ្ចប់។

ទាក់ទិននឹងពាក្យចចាមអារ៉ាមថា នាយករដ្ឋមន្ត្រីថ្មីរបស់ថៃអាចពិចារណាកែប្រែមធ្យោបាយ ចែកប្រាក់ឌីជីថលទៅជាការចែកសាច់ប្រាក់វិញ លោកChalermphol Pensoot អគ្គនាយ កនៃការិយាល័យថវិកា បានអះអាងថា “វាអាចទៅរួច ព្រោះការផ្លាស់ប្តូរវិធីសាស្រ្តទូទាត់ មិនផ្លាស់ប្តូរគោលបំណងដើម ដើម្បីជំរុញសេដ្ឋកិច្ច តាមរយៈការបង្កើនការចំណាយ ក្នុងស្រុកនោះទេ”។

លោក Chalermphol Pensoot បានបន្ថែមថា ទោះបីជាការបង្កើតគណៈរដ្ឋមន្ត្រីថ្មី មិនទាន់ត្រូវបានបញ្ចប់រួចរាល់នៅចុងខែសីហានេះយ៉ាងណាក្តី ក៏សេចក្តីព្រាងថវិកាជាតិឆ្នាំ២០២៥ មិនអាចរងផលប៉ះពាល់នោះទេ។

លោកស្រី Paetongtarn បានគូសបញ្ជាក់ថា “បញ្ជីឈ្មោះគណៈរដ្ឋមន្ត្រីរបស់គណបក្សភឿថៃ នឹងមិនត្រូវបានបញ្ចប់រួចរា ល់ក្នុងរយៈពេល២ ឬ៣ថ្ងៃនោះទេ ខណៈចំនួនកូតារដ្ឋមន្ត្រីនឹងត្រូវបានពិភាក្សាយ៉ាងប្រុងប្រយ័ត្ន ចំពោះបេក្ខជននីមួយៗ មុនពេលអ្វីៗត្រូវបានសម្រេចបញ្ចប់៕ប្រភព: The Nation៕

ក្រុមហ៊ុនធំមួយគ្រោងពង្រីកការវិនិយោគនៅកម្ពុជា បន្ទាប់ពីឈរជើងនៅប្រទេសនេះអស់ពេល៣០ឆ្នាំ

ដោយៈ គង់  សូរិយា

ភ្នំពេញៈ ថ្នាក់ដឹកនាំក្រុមហ៊ុន ហ៊ិននីគែន (ខេមបូឌា) និងសហការី ស្របពេលដែលក្រុមហ៊ុន គ្រោងនឹងរៀបចំពិធីប្រារព្ធខួប៣០ឆ្នាំ នៃដំណើរការអាជីវកម្មរបស់ខ្លួន ក្នុងខែកញ្ញា ខាងមុខនេះ។

ក្នុងជំនួបពិភាក្សានេះ លោកនុត អ៊ុនវ័ណរ៉ា អគ្គលេខា​ធិការរងគណៈកម្មាធិការវិនិយោគកម្ពុជា បានវាយតម្លៃខ្ពស់ចំពោះ ការចូលរួមចំណែករបស់ក្រុមហ៊ុន ក្នុងការជំរុញកំណើនសេដ្ឋកិច្ចកម្ពុជា កាត់បន្ថយភាពក្រីក្រ បង្កើតឱកាសការងារ និងបណ្ដុះបណ្ដាលជំនាញ ដល់បងប្អូនប្រជាពលរដ្ឋខ្មែរ។

លោក Andrew Peter Hewson អគ្គនាយកក្រុមហ៊ុន ហ៊ិននីគែន បានជម្រាបជូនឯកឧត្ដមអគ្គលេខាធិការរង អំពីវឌ្ឍនភាព និងសមិទ្ធផលនានារបស់ក្រុមហ៊ុន និងបានថ្លែងអំណរគុណយ៉ាងជ្រាលជ្រៅជូន ចំពោះរាជរដ្ឋាភិបាលកម្ពុជា ថ្នាក់ដឹកនាំក្រុមប្រឹក្សាអភិវឌ្ឍន៍កម្ពុជា ជាពិសេសលោកឧបនាយករដ្ឋមន្រ្តី ដែលជានិច្ចកាល តែងតែផ្ដល់ការគាំទ្រ និងកិច្ចសម្របសម្រួលគ្រប់បែបយ៉ាងដល់ក្រុមហ៊ុន។

ការណ៍នេះ បានអនុញ្ញាតឱ្យក្រុមហ៊ុន ហ៊ិននីគែន អាចធ្វើប្រតិបត្តិការអាជីវកម្ម និងឈរជើងនៅកម្ពុជា អស់រយៈកាល ៣០ឆ្នាំកន្លងមកនេះ។ ក្នុងនាមក្រុមហ៊ុន លោក Andrew Peter Hewson ក៏បានប្ដេជ្ញាចិត្តបន្តពង្រីក ការវិនិយោគរបស់ខ្លួននៅកម្ពុជា ជួយផ្សព្វផ្សាយនិងទាក់ទាញ វិនិយោគិនបរទេសមកបន្ថែមទៀត ព្រមទាំងចូលរួមចំណែកជំរុញ ឧស្សាហកម្មស្រាបៀរកម្ពុជា ឱ្យក្លាយជាឧស្សាហកម្មមួយ ដែលមានការទទួលខុសត្រូវខ្ពស់ចំពោះសង្គម ដើម្បីបន្តចូលរួមចំណែកអភិវឌ្ឍសង្គម-សេដ្ឋកិច្ចកម្ពុជា ឱ្យកាន់តែរីកចម្រើន ស្របតាមចក្ខុវិស័យឆ្នាំ២០៣០ និង២០៥០ និងយុទ្ធសាស្រ្តបញ្ចកោណ-ដំណាក់កាលទី១។

លោកអគ្គលេខាធិការរង បានថ្លែងអំណរគុណសារជាថ្មីដល់ក្រុមហ៊ុន ចំពោះការប្ដេជ្ញាចិត្តយ៉ាងមុតមាំ របស់លោកអគ្គនាយកក្រុមហ៊ុន ហ៊ិននីគែន (ខេមបូឌា) និងបានជូនពរក្រុមហ៊ុនទទួលបានជោគជ័យ ក្នុងប្រតិបត្តិការអាជីកម្មរបស់ខ្លួនបន្តទៀត ដើម្បីបង្កើតឱកាសការងារបន្ថែម ជូនប្រជាពលរដ្ឋកម្ពុជា ក៏ដូចជា ពង្រីករចនាសម្ព័ន្ធឧស្សាហកម្មកម្ពុជា ឱ្យកាន់តែមានភាពសម្បូរបែប ផងដែរ ខណៈដែលក្រុមប្រឹក្សាអភិវឌ្ឍន៍កម្ពុជានឹងត្រៀមខ្លួនជានិច្ច ក្នុងការផ្តល់ការគំាទ្រ និងកិច្ចសម្រួលដល់ការវិនិយោគ៕

ទីផ្សារលំនៅដ្ឋាននៅទីក្រុងធំៗរបស់តំបន់អាស៊ីបង្ហាញសញ្ញាប្រែប្រួលយ៉ាងឆាប់រហ័ស

ដោយ: គង់ លាងហួរ

អន្តរជាតិ: ស្ថានភាពទីផ្សារលំនៅដ្ឋាននៅតាមបណ្តាទីក្រុងធំៗរបស់តំបន់អាស៊ី ដូចជា ទីក្រុងហុងកុង ទីក្រុងសិង្ហបុរី និងទីក្រុងបាងកក បានប្រែប្រួលយ៉ាងលឿនរហ័ស ក្នុងរយៈពេល២ឆ្នាំកន្លងមក។

កាលពីត្រីមាសទី១ ឆ្នាំ២០២២ តម្លៃជួលលំនៅដ្ឋានជាមធ្យមបានធ្លាក់ចុះ នៅក្នុងទីក្រុងបាងកក និងទីក្រុងហុងកុង។  ផ្ទុយទៅវិញ តម្លៃជួលនៅតាមទីក្រុងជាច្រើន របស់ប្រទេសអូស្ត្រាលី រួមទាំងទីក្រុងស៊ីដនី ក៏ដូចជានៅប្រទេសសិង្ហបុរី បានកើនឡើង។

ប៉ុន្តែស្ថានភាពនៅឆ្នាំ២០២៤នេះ បានវិវត្តន៍ខុសគ្នាយ៉ាងខ្លាំង។ តម្លៃជួលផ្ទះនៅទីក្រុងបាងកក និងហុងកុងកំពុងកើនឡើង ខណៈតម្លៃជួលនៅសិង្ហបុរីកំពុងធ្លាក់ចុះ។ទន្ទឹមនឹងនេះ ប្រទេសអូស្ត្រាលី ក៏កំពុងជួបប្រទះ នឹងកំណើនតម្លៃជួលទាបបំផុតក្នុងរយៈពេល៤ឆ្នាំ ខណៈគេសង្កេតឃើញមានការធ្លាក់ចុះនៃតម្លៃផ្ទះ នៅទីក្រុងស៊ីដនីក្នុងខែកក្កដា ឆ្នាំ២០២៤។

យោងតាមរបាយការណ៍ របស់ក្រុមហ៊ុនប្រឹក្សាអចលនទ្រព្យ Savills ដែលតាមដានទីផ្សារលំនៅដ្ឋាន នៅតាមទីក្រុងចំនួន៣០ជុំវិញពិភពលោក បង្ហាញថា ទីក្រុងបាងកកជាទីផ្សារជួលមានដំណើរការល្អបំផុតទី២ បន្ទាប់ពីទីក្រុងឌូបៃក្នុងឆមា​ស​ទី១ ឆ្នាំនេះ។

នៅទីក្រុងបាងកក ទីផ្សារជួលទទួលបានអត្ថប្រយោជន៍ពីកត្តាសេដ្ឋកិច្ចក្នុងស្រុក មិនអំណោយផល និងការព្រួយបារម្ភអំពីបន្ទុកបំណុលគ្រួសារ ខណៈធនាគារកណ្តាលថៃស្ទាក់ស្ទើរក្នុងការកាត់បន្ថយអត្រាការប្រាក់ ហើយអស្ថិរភាពនយោបាយបានបង្កជាក្តីបារម្ភអំពីស្ថិរភាពហិរញ្ញវត្ថុ។

ការដាក់ពាក្យស្នើសុំប្រាក់កម្ចីទិញផ្ទះ តម្លៃក្រោម៨៧.០០០ដុល្លារអាមេរិក នៅក្នុងទីក្រុងបាងកក ត្រូវបានបដិសេធយ៉ាងច្រើនករណី នៅក្នុងរយៈពេលប៉ុន្មានឆ្នាំកន្លងមក។ ការណ៍នេះបានជំរុញឱ្យអ្នកអភិវឌ្ឍន៍ ផ្តោតលើអចលនទ្រព្យប្រណីត និងបង្ខំឱ្យអ្នកទិញជាច្រើន ងាកទៅរកផ្ទះជួលវិញ។

ផ្ទុយទៅវិញ តម្លៃជួលលំនៅដ្ឋានជាមធ្យម នៅតាមទីក្រុងធំៗ ក្នុងប្រទេសអូស្ត្រាលី បានកើនឡើងត្រឹមតែ០,១ភាគរយកាលពីខែកក្កដា។ នេះជាការកើនឡើងទាបបំផុត ក្នុងអត្រាប្រចាំខែ គិតចាប់តាំងពីខែសីហា ឆ្នាំ២០២០។ នេះបើយោងតាមទិន្នន័យពីក្រុមហ៊ុន CoreLogic ។

ទន្ទឹមនឹងនេះ ទីផ្សារជួលរបស់ទីក្រុងហុងកុង កំពុងទទួលបានអត្ថប្រយោជន៍ ​ពីការហូរចូលនៃអ្នកជំនាញ និងនិស្សិត ភា​គច្រើន មកពីតំបន់ចិនដីគោក។ ការបន្ធូរបន្ថយលក្ខខណ្ឌទិដ្ឋាការការងារ និងតម្រូវការស្នាក់នៅរបស់និស្សិត បានជំរុញឱ្យការជួល មានការកើនឡើងចាប់តាំងពីដើមឆ្នាំមុន។

ទោះជាយ៉ាងនេះក្តី ទីផ្សារនៅទីក្រុងសិង្ហបុរី បានប្រែប្រួលខ្លាំងជាងគេបំផុត។  តម្លៃជួលលំនៅដ្ឋានឯកជន បានធ្លាក់ចុះចំនួន៣ត្រីមាសជាប់គ្នា បន្ទាប់ពីបានកើនឡើង១០,២ភាគរយកាលពីឆមាសទីមួយឆ្នាំមុន ។

ផលប៉ះពាល់លើទីក្រុងសិង្ហបុរី បណ្តាលមកពីការកើនឡើងនៃការផ្គត់ផ្គង់ផ្ទះឯកជន ក្នុងរយៈពេល២ឆ្នាំចុងក្រោយនេះ និងការចាកចេញរបស់ជនបរទេសមួយចំនួន ដោយសារតែការកាត់បន្ថយកម្លាំងពលកម្ម របស់បុគ្គលិកនៅក្នុងវិស័យសំខាន់ៗ៕ប្រភព:SCMP៕

លោកមហាសេដ្ឋី Elon Musk លក់ដាច់ផ្ទះនៅសេសសល់ចុងក្រោយក្នុងតម្លៃ៣២លានដុល្លារអាមេរិក

ដោយ: គង់ លាងហួរ

អន្តរជាតិ: លោក Elon Musk ជាកំពូលមហាសេដ្ឋីលើពិភពលោកនាពេលបច្ចុប្បន្ន ដោយលោកកំពុងដឹកនាំក្រុមហ៊ុនធំៗ រួមមាន ក្រុមហ៊ុនផលិតរថយន្តអគ្គិសនី Tesla ក្រុមហ៊ុនអវកាស SpaceX និងក្រុមហ៊ុនធំៗជាច្រើនទៀត។

ថ្មីៗនេះ លោក Elon Musk ត្រូវបានគេរាយការណ៍ថា លោកបានលក់ដាច់ផ្ទះ តម្លៃជិត៣២លានដុល្លារ កាលពីចុងសប្តាហ៍មុន។ ទោះ​ជា​យ៉ាង​ណាក្តី អត្តសញ្ញាណ​អ្នក​ទិញ​នៅ​មិន​ទាន់​បង្ហើប​ឱ្យ​ដឹង​នៅ​ឡើយ​ទេ។

នៅឆ្នាំ២០២១ លោក Elon Musk បានចុះបញ្ជីផ្ទះទំហំ១៦.០០០ហ្វីតការ៉េ លាតសន្ធឹងនៅលើដីដ៏ធំបំផុតមួយ នៅតំបន់មួយ នៅក្នុងរដ្ឋកាលីហ្វ័រញ៉ា បន្ទាប់ពីបានប្រកាសនៅលើបណ្តាញសង្គម X ថា លោកគ្រោងនឹងលក់ផ្ទះ នៅសេសសល់ចុងក្រោយរបស់លោក។

មុនពេលលក់ផ្ទះនេះដាច់ លោកមហាសេដ្ឋី Elon Musk ធ្លាប់បានបង្ហើបថា លោកចង់លក់កន្លែងពិសេសមួយនេះ ទៅឱ្យគ្រួសារធំមួយ។

យោងតាមក្រុមហ៊ុន Mansion Global បានឱ្យដឹងថា ផ្ទះនោះត្រូវបានប្រកាសលក់ដំបូង ក្នុងតម្លៃ៣៧,៥លានដុល្លារ ប៉ុន្តែនៅក្នុងខែតុលា ឆ្នាំមុន តម្លៃហាងឆេងបានធ្លាក់ចុះ៥,៥លានដុល្លារ មកនៅត្រឹម៣១,៩៩លានដុល្លារ។

ផ្ទះនេះជាផ្ទះចុងក្រោយរបស់លោក Musk មានទីតាំងស្ថិតនៅក្នុងតំបន់ San Francisco Bay Area នៅរដ្ឋកាលីហ្វ័រញ៉ា ហើយក៏ធ្លាប់ត្រូវបានដាក់ជួល សម្រាប់ការរៀបចំព្រឹត្តិការណ៍ផ្សេងៗផងដែរ។

លោក Walter Isaacson អ្នកនិពន្ធជីវប្រវត្តិរបស់លោក Elon Musk បានបង្ហោះនៅលើបណ្តាញសង្គមថា “លោកធ្លាប់ជួបលោក Musk នៅក្នុងផ្ទះនេះ ហើយផ្ទះមានសោភ័ណភាពស្អាត មានបន្ទប់គេងចំនួន២ និងគ្មានការរញ៉េរញ៉ៃទេ ដោយមានអាវមួយព្យួរនៅលើកៅអី”។

លោក Walter Isaacson បានបង្ហោះរូបភាពបរិយាកាសរស់នៅក្នុងផ្ទះនោះ ដោយរួមមានតុឈើ និងផ្ទះបាយ។ លោក Musk ធ្លាប់បានដើរលេងកំសាន្តនៅទីនោះ អង្គុយនៅលើកៅអីឈើ និងលើកទូរស័ព្ទ។

លើសពីនេះទៀត គេសង្កេតឃើញមានរូបចម្លាក់រ៉ុក្កែតមួ​យនៅលើតុ និងដាវជប៉ុន(white Katana)៕ប្រភព: DNA India៕