ដោយៈ និស្ស័យ

    ភ្នំពេញៈ អាកាសយានដ្ឋានអន្តរជាតិតេជោ (TIA) ដែលបច្ចុប្បន្នកំពុងសាងសង់នៅជិតរាជធានីភ្នំពេញ គ្រោងនឹងបើកដំណើរការជាផ្លូវការនៅ ឆ្នាំ២០២៥នេះ។

គិតត្រឹមខែធ្នូ ឆ្នាំ២០២៤ គម្រោងដំណាក់កាលទី១ សម្រេចបានជាង៩២ភាគយហើយ។

រចនាឡើងជាអាកាសយានដ្ឋានកម្រិត 4F ដែលជាចំណាត់ថ្នាក់ខ្ពស់បំផុតសម្រាប់អាកាសយានដ្ឋានអន្តរជាតិ TIA នឹងមានហេដ្ឋារចនាសម្ព័ន្ធទំនើប រួមទាំងស្ថានីយអ្នកដំណើរដែលលាតសន្ធឹងលើផ្ទៃដីជាង 240,000 ម៉ែត្រការ៉េ ច្រកទ្វារចំនួន 22 ដែលផ្ទុកយន្តហោះទំហំមធ្យមបានរហូតដល់40គ្រឿង និងផ្លូវរត់ស្របគ្នាចំនួននាពេលអនាគត។

ខណៈពេលដែលការប្តេជ្ញាចិត្តជាក់លាក់ ពីក្រុមហ៊ុនអាកាសចរណ៍អន្តរជាតិដើម្បីធ្វើប្រតិបត្តិការនៅ TIA មិនត្រូវបានបង្ហាញជាសាធារណៈ គ្រឿងបរិក្ខារទំនើបៗ និងទីតាំងយុទ្ធសាស្ត្ររបស់ព្រលានយន្តហោះត្រូវបានគេរំពឹងថា នឹងទាក់ទាញចំណាប់អារម្មណ៍ពីក្រុមហ៊ុនអាកាសចរណ៍ទូទាំងពិភពលោក។

រដ្ឋលេខាធិការដ្ឋានអាកាសចរស៊ីវិល បានលើកទឹកចិត្តឱ្យក្រុមហ៊ុនអាកាសចរណ៍ទាំងក្នុងស្រុក និងអន្តរជាតិ ត្រៀមលក្ខណៈសម្រា​ប់ការបើកព្រលានយន្តហោះ។

លើសពីនេះ អ្នកអភិវឌ្ឍន៍ព្រលានយន្តហោះបាន និងកំពុងស្វែងរកការវិនិយោគយ៉ាងសកម្ម ពីអង្គភាពជុំវិញពិភពលោក រួមទាំងក្រុមហ៊ុនជប៉ុនផងដែរ ដើម្បីបង្កើនសេវាកម្ម និងហេដ្ឋារចនាសម្ព័ន្ធរបស់ព្រលានយន្តហោះ។

ដោយសារការវិវឌ្ឍន៍ទាំងនេះ គេរំពឹងថា TIA នឹងទាក់ទាញចំណាប់អារម្មណ៍យ៉ាងសំខាន់ ពីក្រុមហ៊ុនអាកាសចរណ៍អន្តរជាតិ ដោយជំរុញការតភ្ជាប់របស់កម្ពុជា ជាមួយបណ្តាញអាកាសចរណ៍ពិភពលោក។

កាលពីឆ្នាំមុនព្រលានយន្តហោះអន្តរជាតិ ទាំងបីរបស់កម្ពុជាបានទទួលភ្ញៀវទេសចរណ៍ជាតិ អន្តរជាតិសរុបប្រមាណ៦លាននាក់។

ព្រលានយន្តហោះអន្តរជាតិតេជោ បាននិងកំពុងវិនិយោគដោយក្រុមហ៊ុនOCIC ក្នុងទំហំទឹកប្រាក់ប្រមាណ១៥០០លានដុល្លារអាមេរិក៕

ដោយ: គង់ លាងហួរ
បាងកក: រដ្ឋាភិបាលថៃបានបង្ហាញអំពីផែនការមួយក្នុងការប្រែក្លាយប្រទេសរបស់ខ្លួនទៅជាមជ្ឈមណ្ឌលដឹកជញ្ជូនដ៏សំខាន់នៅក្នុងតំបន់អាស៊ាន តាមរយៈការវិនិយោគលើគម្រោងធំៗរួមមានការដឹកជញ្ជូនតាមផ្លូវគោក ផ្លូវសមុទ្រ និងផ្លូវអាកាស។

លោកស្រី Manaporn Charoensri អនុរដ្ឋមន្ត្រីក្រសួងដឹកជញ្ជូនថៃបានគូសបញ្ជាក់អំពីចក្ខុវិស័យជាយុទ្ធសាស្ត្ររបស់រដ្ឋាភិបាលថៃ ដោយផ្តោតលើការសាងសង់ចំណតកប៉ាល់ទេសចរណ៍ ព្រលានយន្តហោះថ្មី និងគម្រោងយក្ស Land Bridge។

គម្រោងអភិវឌ្ឍន៍សំខាន់ៗរួមមានការសាងសង់កំពង់ផែពាណិជ្ជកម្មថ្មីចំនួន៣ទីតាំង និងអាកាសយានដ្ឋានថ្មីចំនួន២ទីតាំង ដោយផ្តោតជាពិសេសលើការបង្កើតចំណតនាវាចរណ៍នៅទីក្រុងប៉ាតាយ៉ា កោះភូកេត និងកោះសាមុយ។រដ្ឋាភិបាលថៃរំពឹងថា ចំណតទាំងនេះអាចធ្វើឱ្យប្រាក់ចំណូលពីនាវាទេសចរណ៍ប្រណីតកើនឡើងចន្លោះពី៧ដងទៅ៨ដង។

យោងតាមទិន្នន័យស្ថិតិបានបង្ហាញថា ប្រទេសថៃបានទទួលស្វាគមន៍កប៉ាល់ទេសចរណ៍ប្រណីតក្នុងចំនួនច្រើនជាងគេបំផុតលំដាប់ទី៣នៅក្នុងតំបន់អាស៊ាន រួមជាមួយនឹងអត្រាកំណើនប្រចាំឆ្នាំចំនួន១៤ភាគរយ។

យ៉ាងណាមិញ ប្រទេស​ថៃ​ជួបប្រទះការខ្វះ​ខាតចំណត​សម្រាប់នាវា​ទេសចរណ៍ ដោយកប៉ាល់​ទេសចរណ៍បានចូល​ចត​នៅ​តាមកំពង់ផែ​ពាណិជ្ជកម្ម ដូចជាកំពង់ផែក្រុងបាងកក កំពង់ផែ Laem Chabang កំពង់ផែកោះសាមុយ និង​កំពង់ផែកោះភូកេត។ការណ៍នេះបង្កឱ្យមានការរអាក់រអួលសម្រាប់ភ្ញៀវទេសចរណ៍។

លោក​ស្រី​ Manaporn បាន​បន្ត​ថា​ “ជា​លទ្ធផល យើង​ត្រូវ​ការ​សាងសង់​ចំណត​នាវា​ទេសចរណ៍​ថ្មី​មួយ​ដើម្បី​ជួយ​ធ្វើ​ឲ្យ​ឧស្សាហកម្ម​ទេសចរណ៍​ក្លាយ​ជា​កម្លាំង​ចលករជំរុញ​សេដ្ឋកិច្ច​របស់​ប្រទេស​ថៃ​នា​ពេល​អនាគត”។

ដោយឡែក គម្រោង Land Bridge នៅខេត្ត Chumphon និងខេត្ត Ranong ដែលរួមមានការតភ្ជាប់បណ្តាញផ្លូវដែក និងកំពង់ផែ មានគោលបំណងកាត់បន្ថយថ្លៃដឹកជញ្ជូនចន្លោះពី១៥ភាគរយទៅ២០ភាគរយ និងកាត់បន្ថយរយៈពេលដឹកជញ្ជូនដើម្បីប្រែក្លាយប្រទេសថៃទៅជាមជ្ឈមណ្ឌលដឹកជញ្ជូនសកលថ្មីមួយ។

ការដឹកជញ្ជូនតាមផ្លូវអាកាសក៏ជាចំណុចសំខាន់ផងដែរ ខណៈសមាគមដឹកជញ្ជូនតាមផ្លូវអាកាសអន្តរជាតិ(IATA) ព្យាករណ៍ថា អ្នកដំណើរចំនួន២៤០លាននាក់នឹងធ្វើដំណើរទៅប្រទេសថៃតាមយន្តហោះនៅក្នុងឆ្នាំ២០៣៥។

ដើម្បីឆ្លើយតបនឹងតម្រូវការនេះ រដ្ឋាភិបាលថៃគ្រោងពង្រីកអាកាសយានដ្ឋានសុវណ្ណភូមិ និងអភិវឌ្ឍន៍អាកាសយានដ្ឋានអន្តរជាតិថ្មីនៅទីក្រុងឈៀងម៉ៃ កោះភូកេត និងអាកាសយានដ្ឋានចំនួន២ទីតាំងបន្ថែមទៀត ដូចជាអាកាសយានដ្ឋាន Lanna នៅភាគខាងជើងនៃប្រទេសថៃ និងអាកាសយានដ្ឋាន Andaman នៅភាគខាងត្បូងនៃប្រទេសថៃ។

រដ្ឋាភិបាលថៃបង្ហាញក្តីសង្ឃឹមថា ការវិនិយោគលើគម្រោងហេដ្ឋារចនាសម្ព័ន្ធធំៗទាំងនេះនឹងប្រែក្លាយប្រទេសរបស់ខ្លួនទៅជាចំណុចឆ្លងកាត់ដ៏ចម្បងមួយសម្រាប់ការធ្វើដំណើររបស់ភ្ញៀវទេសចរណ៍ ព្រមទាំងពាណិជ្ជកម្មក្នុងតំបន់ និងអន្តរជាតិ។

លោកស្រី Manaporn បានសង្កត់ធ្ងន់លើសារៈសំខាន់នៃការពន្លឿនគម្រោងទាំងនោះ ហើយយើងមិនទាន់បានទាញយកសក្តានុពលពេញលេញពីទីតាំងភូមិសាស្រ្តដ៏អំណោយផលរបស់ប្រទេសថៃ ដែលស្ថិតនៅចំកណ្តាលនៃបណ្តាប្រទេសអាស៊ាននៅឡើយទេ។

លោកស្រីបានកត់សម្គាល់ថា “ប្រសិនបើប្រទេសថៃក្លាយទៅជាមជ្ឈមណ្ឌលដឹកជញ្ជូន នោះប្រជាជនទូទាំងពិភពលោក ដែលធ្វើដំណើរមកកាន់តំបន់អាស៊ាននឹងត្រូវឆ្លងកាត់ប្រទេសថៃមុនដំបូងគេ រួចទើបទៅដល់គោលដៅចុងក្រោយរបស់ពួកគេ”។

ម៉្យាងវិញទៀត ទំនិញ ដែលត្រូវដឹកជញ្ជូនទៅកាន់បណ្តាប្រទេសផ្សេងទៀតក្នុងតំបន់អាស៊ាន ក៏នឹងត្រូវដឹកជញ្ជូនឆ្លងកាត់តាមរយៈប្រទេសថៃផងដែរ៕ប្រភព: The Nation៕

ខេត្តព្រះសីហនុមានសក្តានុពលក្លាយជាទីក្រុងអន្តរជាតិនាពេលខាងមុខ ប៉ុន្តែកត្តាជាច្រើននឹងកំណត់ភាពជោគជ័យរបស់វា។ នេះគឺជាទិដ្ឋភាពសំខាន់ៗមួយចំនួនដែលត្រូវពិចារណា៖

1. ទីតាំងយុទ្ធសាស្ត្រ និងការអភិវឌ្ឍន៍ហេដ្ឋារចនាសម្ព័ន្ធ

ព្រះសីហនុគឺជាកំពង់ផែទឹកជ្រៅតែមួយគត់របស់ប្រទេសកម្ពុជា ដែលធ្វើឱ្យវាក្លាយជាមជ្ឈមណ្ឌលពាណិជ្ជកម្ម និងដឹកជញ្ជូនដ៏សំខាន់។ រដ្ឋាភិបាលកម្ពុជា រួមជាមួយនឹងគំនិតផ្តួចផ្តើមខ្សែក្រវាត់ និងផ្លូវ (BRI) របស់ប្រទេសចិន បានវិនិយោគយ៉ាងច្រើនលើហេដ្ឋារចនាសម្ព័ន្ធ រួមមានផ្លូវថ្នល់ ផ្លូវល្បឿនលឿន និងកំពង់ផែពង្រីក។ ផ្លូវល្បឿនលឿនថ្មីដែលតភ្ជាប់ពីភ្នំពេញទៅខេត្តព្រះសីហនុបានធ្វើឱ្យការតភ្ជាប់កាន់តែប្រសើរឡើងគួរឱ្យកត់សម្គាល់។

2. ការវិនិយោគបរទេស និងកំណើនសេដ្ឋកិច្ច

ខេត្តនេះបានទាក់ទាញការវិនិយោគរបស់ចិនរាប់ពាន់លានដុល្លារ ជាពិសេសផ្នែកអចលនទ្រព្យ កាស៊ីណូ និងទេសចរណ៍។ ប្រសិនបើកម្ពុជាអាចធ្វើពិពិធកម្មប្រភពវិនិយោគរបស់ខ្លួន និងកែលម្អការត្រួតពិនិត្យបទប្បញ្ញត្តិ ខេត្តព្រះសីហនុអាចក្លាយជាមជ្ឈមណ្ឌលពាណិជ្ជកម្ម និងហិរញ្ញវត្ថុក្នុងតំបន់។ ការបង្កើតតំបន់សេដ្ឋកិច្ចពិសេស (SEZs) ក៏ជំរុញឧស្សាហូបនីយកម្ម និងពាណិជ្ជកម្មផងដែរ។

3. ឧស្សាហកម្មទេសចរណ៍ និងបដិសណ្ឋារកិច្ច

ខេត្តព្រះសីហនុមានឆ្នេរ និងកោះដ៏ស្រស់ស្អាត ដែលធ្វើឱ្យវាក្លាយជាគោលដៅទេសចរណ៍ដ៏សំខាន់។ ទោះជាយ៉ាងណាក៏ដោយ រូបភាពរបស់វារងទុក្ខដោយសារការអភិវឌ្ឍន៍គ្មានការគ្រប់គ្រង ឧក្រិដ្ឋកម្ម និងបញ្ហាបរិស្ថាន។ ប្រសិនបើរដ្ឋាភិបាលកែលម្អផែនការទីក្រុង ពង្រឹងបទប្បញ្ញត្តិ និងលើកកម្ពស់ទេសចរណ៍ប្រកបដោយនិរន្តរភាព វាអាចទាក់ទាញភ្ញៀវទេសចរអន្តរជាតិ និងអាជីវកម្មកាន់តែច្រើន។

4. អភិបាលកិច្ច និងផែនការទីក្រុង

ដើម្បីក្លាយជាទីក្រុងអន្តរជាតិពិតប្រាកដ ខេត្តព្រះសីហនុត្រូវការការគ្រប់គ្រងទីក្រុងកាន់តែប្រសើរ។ បញ្ហាប្រឈមដូចជាការកកស្ទះចរាចរណ៍ ការគ្រប់គ្រងកាកសំណល់ និងការអនុវត្តច្បាប់មិនស៊ីសង្វាក់គ្នាត្រូវតែដោះស្រាយ។ ផែនការមេរយៈពេលវែងដែលមានច្បាប់កំណត់តំបន់ច្បាស់លាស់ និងការអភិវឌ្ឍន៍ហេដ្ឋារចនាសម្ព័ន្ធមានសារៈសំខាន់ណាស់។

5. ការប្រកួតប្រជែងជាមួយទីក្រុងក្នុងតំបន់

ក្រុងព្រះសីហនុប្រឈមនឹងការប្រកួតប្រជែងពីមជ្ឈមណ្ឌលក្នុងតំបន់ផ្សេងទៀតដូចជាទីក្រុងបាងកក ហូជីមិញ និងសិង្ហបុរី។ ដើម្បីលេចធ្លោ វាចាំបាច់ត្រូវផ្តោតលើចំណុចខ្លាំងជាក់លាក់ដូចជា ភស្តុភារ ទេសចរណ៍ និងឧស្សាហកម្ម ជាជាងការលេងល្បែងស៊ីសង និងការប៉ាន់ស្មានអចលនទ្រព្យ។

6. ស្ថេរភាព និងកេរ្តិ៍ឈ្មោះ

កត្តា​សំខាន់​សម្រាប់​ទាក់ទាញ​អាជីវកម្ម​សកល​និង​ប្រជាជន​គឺ​ស្ថិរភាព​នយោបាយ និង​សេដ្ឋកិច្ច។ គោលនយោបាយរបស់កម្ពុជាស្តីពីកម្មសិទ្ធិបរទេស តម្លាភាពផ្លូវច្បាប់ និងវិធានការប្រឆាំងអំពើពុករលួយនឹងមានឥទ្ធិពលលើថាតើអ្នកវិនិយោគអន្តរជាតិបន្តមើលឃើញខេត្តព្រះសីហនុជាជម្រើសដែលអាចសម្រេចបានដែរឬទេ។

សេចក្តីសន្និដ្ឋាន

ប្រសិនបើកម្ពុជាគ្រប់គ្រងកំណើនខេត្តព្រះសីហនុដោយជោគជ័យដោយការកែលម្អហេដ្ឋារចនាសម្ព័ន្ធ ការអនុវត្តបទប្បញ្ញត្តិ និងការធ្វើពិពិធកម្មសេដ្ឋកិច្ចរបស់ខ្លួន ទីក្រុងអាចនឹងក្លាយទៅជាមជ្ឈមណ្ឌលអន្តរជាតិសម្រាប់ពាណិជ្ជកម្ម ទេសចរណ៍ និងឧស្សាហកម្ម។ ទោះយ៉ាងណាក៏ដោយដោយគ្មានភាពត្រឹមត្រូវ

ដោយ: គង់ លាងហួរ
ភ្នំពេញ: លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១នៃក្រុមប្រឹក្សាអភិវឌ្ឍន៍កម្ពុជា(CDC) បានបង្ហើបឱ្យដឹងថា នៅខែវិច្ឆិកា ឆ្នាំ២០២៥នេះ រោងចក្រផលិតរថយន្ដម៉ាក BYD នឹងចាប់ផ្តើមដំណើរការផលិតរថយន្តនៅកម្ពុជា ដែលសមត្ថភាពផលិតរថយន្ដចំនួន១ម៉ឺនគ្រឿងក្នុងមួយឆ្នាំ។

លោកឧបនាយករដ្ឋមន្ត្រី ស៊ុន ចាន់ថុល បានបន្ដថា ចំពោះការដំឡើងផលិតរថយន្ដ ក្រុមហ៊ុន BYD នឹងអាចដំឡើងរថយន្ដចន្លោះពី១ម៉ឺនគ្រឿងក្នុងមួយឆ្នាំ ដោយផលិតចំនួន២ប្រភេទរថយន្ដ រួមមានរថយន្ដ BYD ដើរដោយថាមពលអគ្គិសនីសុទ្ធសាធ និងរថយន្ដ BYD ដែលអាចប្រើប្រាស់ទាំងសាំង និងថាមពលអគ្គិសនី។

លោកឧបនាយករដ្ឋមន្ត្រី ស៊ុន ចាន់ថុល បានគូសបញ្ជាក់បន្ថែមថា “ក្នុងដំណាក់កាលដំបូង រោងចក្រផលិតរថយន្ដរបស់ក្រុមហ៊ុនចិន BYD នឹងធ្វើការចែកចាយនៅលើទីផ្សារកម្ពុជាជាមុនសិន ដោយសារតែរថយន្ត EV ត្រូវបានផលិតនៅក្នុងប្រទេសនីមួយៗតែម្ដង”។

យោងតាមលោកឧបនាយករដ្ឋមន្ត្រី ស៊ុន ចាន់ថុល បានបញ្ជាក់ឱ្យដឹងទៀតថា ក្នុងដំណាក់កាលដំបូង រោងចក្រនេះជារោងចក្របង្គុំ ដែលនាំចូលគ្រឿងបង្គុំមកពីក្រៅប្រទេស ដើម្បីផលិតជារថយន្ត។ ប៉ុន្តែ រោងចក្រនេះនឹងពង្រឹងសមត្ថភាពរបស់ខ្លួនឱ្យក្លាយទៅជារោងចក្រផលិតគ្រឿងបង្គុំផលិតដោយខ្លួនឯងនាពេលអនាគត។

លោកឧបនាយករដ្ឋមន្ត្រី ស៊ុន ចាន់ថុល បន្ថែមថា “យើងគិតថា នៅពេលដែលរោងចក្រអាចផលិតរថយន្ដ EV បាន នោះយើងក៏អាចផលិតគ្រឿងបន្លាស់ និងគ្រឿងបង្គុំដើម្បីលក់ចេញទៅកាន់បណ្តាប្រទេសផ្សេងទៀតដែរ”។

មន្ដ្រីជាន់ខ្ពស់រូបនេះបានអះអាងឱ្យដឹងបន្ដថា មូលហេតុដែលក្រុមហ៊ុន BYD ជ្រើសរើសដាក់មូលដ្ឋានផលិតកម្មក្នុងខេត្តព្រះសីហនុ ដោយសារវាផ្ដល់ភាពងាយស្រួលដល់ក្រុមហ៊ុនខ្នាតយក្សមួយនេះក្នុងការនាំចូលគ្រឿងបន្លាស់ និងគ្រឿងបង្គុំតាមរយៈកំពង់ផែក្រុងព្រះសីហនុ។

គម្រោងនៃការបង្កើតរោងចក្រផលិតរថយន្តម៉ាក BYD នៅកម្ពុជាត្រូវបានបង្ហើបកាលពីដំណាច់ចុងឆ្នាំ២០២៤។ ដូច្នេះ ការឈានជើងចូលរបស់ក្រុមហ៊ុនផលិតរថយន្តអគ្គិសនី BYD ដ៏ល្បីល្បាញរបស់ប្រទេសចិន ជាជោគជ័យមួយរបស់រាជរដ្ឋាភិបាលកម្ពុជា ក្នុងការដើរទាក់ម៉ូយឱ្យចូលមកបោះទុនវិនិយោគនៅកម្ពុជា៕

ដោយ: គង់ លាងហួរ
កណ្ដាល: លោក គួច ចំរើន អភិបាលខេត្តកណ្តាលបានទុកឱសានវាទដល់ប្រជាពលរដ្ឋ ដែលមានដីឡូតិ៍នៅតំបន់ 7NG ក្នុងប្លុក B2 ដែលរងប៉ះពាល់ដោយគម្រោងផ្លូវ៦០ម៉ែត្រឱ្យយកឯកសារមកពិនិត្យ និងផ្ទៀងផ្ទាត់ ដើម្បីដោះដូរដីឡូតិ៍ថ្មី នៅទីតាំងផ្ទាល់ចាប់ពីថ្ងៃនេះដល់ថ្ងៃទី១៨ ខែកុម្ភៈ ឆ្នាំ២០២៥នេះ។

លោក គួច ចំរើន បានគូសបញ្ជាក់ថា មន្ត្រីសូរិយោដី និងមន្ត្រីពាក់ព័ន្ធអង្គុយរង់ចាំក្នុងតង់នៅទីតាំងដែលត្រូវផ្លាស់ប្ដូរថ្មី ដើម្បីឲ្យប្រជាពលរដ្ឋដែលរង់ផលប៉ះពាល់ចំនួន៣៩នាក់ មកពិនិត្យផ្ទៀងផ្ទាត់ឯកសារជាក់ស្ដែង។ ប៉ុន្ដែ បែរជាមិនឃើញអ្នកដែលរងផលប៉ះពាល់ទៅវិញ។

ក្នុងអំឡុងពេលចុះពិនិត្យមើលទីតាំងដោះដូរដីឡូតិ៍ថ្មី សរុបចំនួន២១៥ឡូតិ៍ ស្ថិតនៅតំបន់ 7NG ក្នុងឃុំវិហារសួគ៌ ស្រុកខ្សាច់កណ្ដាល ខេត្តកណ្ដាល នៅថ្ងៃទី៦ ខែកុម្ភ: ឆ្នាំ២០២៥ លោកអភិបាលខេត្តបានលើកឡើងថា ប្រជាពលរដ្ឋ ដែលបានទិញដីឡូតិ៍ពីក្រុមហ៊ុន 7NG ហើយប៉ះពាល់លើគម្រោងផ្លូវហេដ្ឋារចនាសម្ព័ន្ធ ឬផ្លូវ៦០ម៉ែត្រសូមយកឯកសារមកពិនិត្យ និងផ្ទៀងផ្ទាត់ លើដីឡូតិ៍របស់ខ្លួន ដែលរដ្ឋបាលខេត្តបានសម្របសម្រួលជាមួយក្រុមហ៊ុន រៀបចំផ្លាស់ប្តូរជូននូវទីតាំងដីឡូតិ៍ថ្មីទាំង២១៥ឡូតិ៍ ចាប់ពីថ្ងៃនេះដល់ថ្ងៃទី១៨ ខែកុម្ភៈ ឆ្នាំ២០២៥។

លោកអះអាងថា “ឥលូវ ខ្ញុំខំប្រឹងដោះ ក្ដៅផង ត្រជាក់ផង ដល់បានដីឲ្យអត់មកយកទៀត ឥលូវវាពិបាកខ្ញុំដដែល ហើយបងប្អូនមន្ត្រីចាំឡើងមុខខ្មៅអស់ហើយ ហើយចាំយ៉ាងយូរដល់ថ្ងៃទី១៨ទេ, ឲ្យមន្ត្រីយើងមកអង្គុយចាំរហូតម៉េចកើត ពួកគាត់ត្រូវធ្វើការផ្សេងទៀតដែរ ដូច្នេះសូមអំពាវនាវអ្នកដែលមិនទាន់មកយកដី សូមរូតរះមកឲ្យបានមុនថ្ងៃទី១៨ ខែកុម្ភៈ ឆ្នាំ២០២៥ខាងមុខនេះ ដើម្បីធ្វើនីតិវិធីយកដីដែលបានបាត់បង់គ្រប់ចំនួន និងទំហំវិញ”។

ពលរដ្ឋដែលបានមកទទួយកដីសំណងនេះ បានសម្ដែងនូវការកោតសរសើរចំពោះយុទ្ធសាស្ត្រដ៏ល្អរបស់លោកអភិបាលខេត្ត ដែលបានខិតខំរកដំណោះស្រាយយ៉ាងល្អប្រសើរជូនពួកគាត់ ហើយសូមថ្លែងអំណរគុណយ៉ាងជ្រាលជ្រៅជាទីបំផុត ដល់លោកអភិបាលខេត្ត និងសុំដឹងគុណព្រោះរឿងរ៉ាវដីធ្លីនេះ កើតមានបញ្ហាជាយូរមកហើយទើបតែមកដល់ជំនាន់លោក គួច ចំរើន ទេ ទើបរឿងដីធ្លីក្ដៅនេះ ដោះស្រាយជូនបានយ៉ាងត្រចះត្រចង់៕