ក្រុមហ៊ុនយក្សកូរ៉េខាងត្បូងSamsung ប្រឈមមុខនឹងការប្រកួតប្រជែងកាន់តែតានតឹងពីក្រុមហ៊ុនចិន

August 20, 2024

ដោយ: គង់ លាងហួរ

សេអ៊ូល: ក្រុមហ៊ុន Samsung Electronics បន្តរក្សាបានតំណែងឈានមុខគេ នៅក្នុងទីផ្សារស្មាតហ្វូនធំៗ នៅតំបន់អាស៊ាន ប៉ុន្តែក្រុមហ៊ុនក៏កំពុងប្រឈមមុខ នឹងការប្រកួតប្រជែងកាន់តែខ្លាំងឡើង ពីដៃគូប្រជែងចិន ដែលលក់ស្មាតហ្វូនក្នុងតម្លៃទាបជាង។

យោងតាមទិន្នន័យ ពីក្រុមហ៊ុនតាមដានទីផ្សារ Canalys បានឱ្យដឹងថា នៅចន្លោះពីខែមេសា ដល់ខែមិថុនា ឆ្នាំ២០២៤ ក្រុមហ៊ុន Samsung របស់ប្រទេសកូរ៉េខាងត្បូង បានកាន់កាប់ចំណែកទីផ្សារស្មាតហ្វូន របស់តំបន់អាស៊ានចំនួន១៨%។ តួលេខនេះ បង្ហាញសញ្ញាពីការធ្លាក់ចុះ២ភាគរយ បើធៀបនឹងរយៈពេលដូចគ្នាកាលពីឆ្នាំមុន។

ទន្ទឹមគ្នានេះ ក្រុមហ៊ុនផលិតស្មាតហ្វូន របស់ប្រទេសចិន រួមមានទូរស័ព្ទ Xiaomi និងទូរស័ព្ទ Oppo គ្រប់គ្រង់ចំណែកទីផ្សារអាស៊ាន បានចំនួន១៧ភាគរយរៀងខ្លួនៗ។

នៅត្រីមាសទី២ ឆ្នាំ២០២៤ ក្រុមហ៊ុន Samsung បាននាំចេញស្មាតហ្វូនចំនួន៤,៤លានគ្រឿង កើនឡើង៥ភាគរយ ខណៈការលក់របស់ក្រុមហ៊ុន Xiaomi បានកើនឡើង៣៧ភាគរយ ហើយការលក់របស់ក្រុមហ៊ុន Oppo បានកើនឡើង២៤ភាគរយ។

យ៉ាងណាមិញ នៅតាមបណ្តាប្រទេស ដែលជាទីផ្សារស្មាតហ្វូនធំៗ ក្រុមហ៊ុន Samsung មិនបានជាប់ចំណាត់ថ្នាក់កំពូលលើតារាងនៃការលក់នោះទេ ដោយក្រុមហ៊ុន Xiaomi ជាអ្នកលក់ដាច់ស្មាតហ្វូនបានច្រើនបំផុត នៅប្រទេសឥណ្ឌូនេស៊ី និងម៉ាឡេស៊ី ខណៈទូរស័ព្ទ Oppo លក់ដាច់បំផុតនៅប្រទេសថៃ និងប្រទេសវៀតណាម។

របាយការណ៍ក្រុមហ៊ុន Canalys បានអះអាងថា ក្រុមហ៊ុនផលិតស្មាតហ្វូនរបស់ប្រទេសចិន កំពុងឈានមុខគេតាមរយៈការដាក់លក់ទូរស័ព្ទ ក្នុងតម្លៃថោកជាងគូប្រជែង និងដាក់ចេញយុទ្ធសាស្ត្រជំរុញការលក់ ស្របពេលតម្រូវការប្រែប្រួលតាមតម្លៃ។

គិតមកដល់ពេលនេះ ក្រុមហ៊ុន Samsung អាចរក្សាតំណែងកំពូលរបស់ខ្លួនភាគច្រើនបាន ដោយសារតែភាពលេចធ្លោលើការលក់ស្មាតហ្វូន ដែលមានតម្លៃចន្លោះពីមធ្យម ទៅទាប ជាជាងតម្លៃខ្ពស់។ ការណ៍នេះតម្រូវឱ្យក្រុមហ៊ុន Samsung រៀបចំយុទ្ធសាស្ត្រកំណត់តម្លៃរបស់ខ្លួន ដើម្បីប្រកួតប្រជែងជាមួយក្រុមហ៊ុនចិន។

កាលពីពេលថ្មីៗនេះ ក្រុមហ៊ុន Samsung បានបាត់បង់តំណែងកំពូលទៅឱ្យក្រុមហ៊ុន Xiaomi នៅប្រទេសឥណ្ឌា ដែលជាទីផ្សារស្មាតហ្វូនធំ បំផុតរបស់ពិភពលោក ខណៈចំណែកទីផ្សារនៅលើសកលលោកទាំងមូល របស់ក្រុមហ៊ុនយក្សកូរ៉េខាងត្បូងមួយនេះ បានធ្លាក់ចុះពី២១ភាគរយ មកនៅត្រឹម១៩ភាគរយក្នុងត្រីមាសទី២។

ក្នុងអំឡុងពេលដូចគ្នានេះ ចំណែកទីផ្សារសកលរបស់ក្រុមហ៊ុន Xiaomi បានកើនឡើងពី១៣% ដល់១៥%៕

ប្រភព: The Nation

ទីក្រុងហាណូយគ្រោងសង់បញ្ចប់ផ្លូវរថភ្លើងចំនួន១៥ខ្សែត្រឹមឆ្នាំ២០៤៥ជាមួយផែនការចំណាយប្រាក់៥៥ពាន់លានដុល្លារ

August 20, 2024

ដោយ: គង់ លាងហួរ

អន្តរជាតិ: ទីក្រុងហាណូយ គ្រោងដាក់បញ្ចូលផ្លូវដែកចំនួន៥ខ្សែបន្ថែមទៀត ទៅក្នុងផែនការដំបូងចំនួន១០ខ្សែ ដោយគ្រោងសាងសង់បញ្ចប់ នៅត្រឹមឆ្នាំ២០៤៥ខាងមុខ ក្រោមទំហំទុនវិនិយោគ ប្រមាណ៥៥ពាន់លានដុល្លារអាមេរិក។

បច្ចុប្បន្ន រដ្ឋាភិបាលវៀតណាម កំពុងធ្វើវិសោធនកម្មផែនការទូទៅ សម្រាប់ការសាងសង់ហេដ្ឋារចនាសម្ព័ន្ធ នៅក្នុងទីក្រុងរដ្ឋធានីហាណូយ និងរៀបចំផែនការដឹកជញ្ជូន នៅក្នុងរដ្ឋធានី។

យោងតាមផែនការដែលមានស្រាប់ រហូតដល់ឆ្នាំ២០៣០ បណ្តាញផ្លូវរថភ្លើងនេះ នឹងមានចំនួន១០ខ្សែ មានប្រវែងសរុបប្រមាណ៤១០គីឡូម៉ែត្រ ហើយទីក្រុងហាណូយនឹងសាងសង់ផ្លូវដែក ប្រវែង២០៧គីឡូម៉ែត្របន្ថែមទៀត ស្ថិតក្រោមផែនការតែមួយ។

លោក Duong Duc Tuan អនុប្រធានគណៈកម្មាធិការប្រជាជនរបស់ទីក្រុងហាណូយលើកឡើងថា “ការកសាងផ្លូវរថភ្លើងក្នុងទីក្រុងជាប្រព័ន្ធដឹកជញ្ជូនសាធារណៈដ៏ធំ ដែលមានល្បឿនលឿន និងមានសមត្ថភាព ហើយជាឆ្អឹងខ្នងនៃហេដ្ឋារចនាសម្ព័ន្ធដឹកជញ្ជូនក្នុងទីក្រុង ជាពិសេសសម្រាប់ទីក្រុងហាណូយ”។

ទោះជាយ៉ាងនេះក្តី លោកទទួលស្គាល់ថា ការសាងសង់ផ្លូវដែក បានប្រឈមមុខនឹងបញ្ហានានា ក្នុងពេលថ្មីៗនេះ ដោយក្នុងនោះ មានតែខ្សែរថភ្លើង Cat Linh – Ha Dong និងកំណាត់រថភ្លើង Nhon – Hanoi ដែលកំពុងដំណើរការសាងសង់នាពេលបច្ចុប្បន្ន។

ទីក្រុងហាណូយមានគោល បំណងបញ្ចប់ការសាងសង់ផ្លូវរថភ្លើងឱ្យបាន១០ខ្សែ នៅត្រឹមឆ្នាំ២០៣៥ ប្រវែង៤១៨គីឡូម៉ែត្រ ក្រោមដើមទុនវិនិយោគសរុប ចំនួន៣៧ពាន់លានដុល្លារ។

បន្ទាប់ពីបានធ្វើការត្រួតពិនិត្យ មើលប្រភពដើមទុនរួចមក ទីក្រុងហាណូយរំពឹងថា នឹងប្រមូលកៀរគរបានទុនចំនួន៨ពាន់លានដុល្លារពីរដ្ឋាភិបាល និងទុន២៨ពាន់លានដុល្លារពីប្រភពផ្សេងទៀត៕

ប្រភព:Vnexpress

អគារការិយាល័យកប់ពពកដើរដោយថាមពលអ៊ីដ្រូសែនដំបូងគេនៅលើពិភពលោកនឹងលេចឡើងរដ្ឋធានីថ្មីរបស់អេហ្ស៊ីប

August 20, 2024

ដោយ: គង់ លាងហួរ

អន្តរជាតិ: ក្រុមហ៊ុនអភិវឌ្ឍន៍អចលនទ្រព្យ របស់រដ្ឋាភិបាលអារ៉ាប៊ីសាអូឌីតបានប្រកាសថា ខ្លួនគ្រោងបើកការដ្ឋានសាងសង់ អគារការិយាល័យខ្ពស់កប់ពពកមួយ ដើរដោយថាមពលអ៊ីដ្រូសែនស្អាត នៅដើមឆ្នាំ២០២៥ខាងមុខ។

អគារនេះនឹងមានកម្ពស់៥០ជាន់ និងមានឈ្មោះថា Forbes International Tower ជាស្ថាប័នទស្សនាវដ្តីធុរកិច្ចដ៏ល្បីល្បាញរបស់សហរដ្ឋអាមេរិក។ គម្រោងសាងសង់ត្រូវការទុនវិនិយោគចំនួន១ពាន់លានដុល្លារ។ នេះបើយោងតាមសារពត៌មាន Reuters។

អគារ Forbes International Tower នឹងត្រូវបានសាងសង់ឡើងដោយក្រុមហ៊ុន Magnom Properties ជាបុត្រសម្ព័ន្ធរបស់ក្រុមហ៊ុនឧស្សាហកម្ម អារ៉ាប៊ីសាអូឌីត Rawabi Holding ដើម្បីទាក់ទាញភ្ញៀវទេសចរណ៍អន្តរជាតិ ទៅកាន់រដ្ឋធានីថ្មីរបស់អេហ្ស៊ីប។

រដ្ឋធានីថ្មី នឹងផ្ទុកប្រជាជនជាង៦លាននាក់ និងត្រូវបានសាងសង់នៅក្នុងតំបន់រហោដ្ឋាន លើវាលខ្សាច់ស្ថិតនៅភាគខាងកើតនៃទីក្រុងគែរ(Cairo)។

អគារការិយាល័យកប់ពពក នឹងប្រើប្រាស់ប្រភពថាមពលកកើតឡើងវិញ ខណៈអេហ្ស៊ីបកំពុងព្យាយាម ប្រែក្លាយប្រទេសរបស់ខ្លួន ជាមជ្ឈមណ្ឌលថាមពលបៃតង ដើម្បីប្រឈមមុខនឹងការប្រកួតប្រជែងក្នុងតំបន់។

បណ្តាក្រសួងនានារបស់រដ្ឋាភិបាល ត្រូវបានផ្ទេរទៅកាន់ទីក្រុងរដុ្ឋធានីថ្មី ចាប់ពីខែកក្កដា ឆ្នាំ២០២៣។ ប៉ុន្តែគេសង្កេតឃើញមានប្រជាជនតិចតួចណាស់ បានផ្លាស់ទីលំនៅ ហើយការសាងសង់ហេដ្ឋារចនាសម្ព័ន្ធសំខាន់ៗ មិនទាន់ត្រូវបានបញ្ចប់រួចរាល់នៅឡើយ រួមទាំងផ្លូវដែកផងដែរ។

លោក Karim Dayhoum នាយកទទួលបន្ទុកលើគម្រោងអភិវឌ្ឍន៍នានា របស់ក្រុមហ៊ុនអចលនទ្រព្យ Magnom Properties បានលើកឡើងថា ក្រុមហ៊ុននឹងចាប់ផ្តើមការរចនាឌីហ្សាញអគារនេះ ឱ្យបានយ៉ាងលម្អិត ក្នុងពេលឆាប់ៗខាងមុខ ហើយយើងមានបំណងបញ្ចប់ ការសាងសង់នៅត្រឹមឆ្នាំ២០៣០។

ការសាងសង់រដ្ឋធានីថ្មីជាមហិច្ឆតា ខ្ពស់បំផុតក្នុងចំណោមបណ្តាគម្រោងធំៗផ្សេងទៀត របស់រដ្ឋបាលប្រធានាធិបតីអេហ្ស៊ីប លោក Abdel Fattah al-Sisi។

គម្រោងទាំងនោះ បានជំរុញការអភិវឌ្ឍន៍ហេដ្ឋារចនាសម្ព័ន្ធ ប៉ុន្តែក៏បានធ្វើឱ្យវិបត្តិថវិកាមានភាពតានតឹង ព្រមទាំងបង្កើនបំណុល និងការហូរចូលនៃរូបិយប័ណ្ណបរទេស។ ការណ៍នេះ បានបង្ខំឱ្យរដ្ឋាភិបាលអេហ្ស៊ីប កាត់បន្ថយការវិនិយោគសាធារណៈ ក្រោមការដាក់សម្ពាធ ពីមូលនិធិរូបិយវត្ថុអន្តរជាតិ(IMF)៕

ប្រភព: Reuters

ការសិក្សាថ្មី: កម្ពុជាស្ថិតក្នុងប្រទេសកំពូចំនួន៣នៅតំបន់អាស៊ាន ដែលបានត្រៀមខ្លួនខ្ពស់ចំពោះគ្រោះធម្មជាតិ

August 20, 2024

ដោយ: គង់ លាងហួរ

អន្តរជាតិ: តំបន់អាស៊ាន ជាតំបន់ងាយរងគ្រោះនឹងគ្រោះមហន្តរាយបំផុត នៅក្នុងពិភពលោក។ ប៉ុន្តែការសិក្សាថ្មីមួយបង្ហាញថា ប្រជាជនរស់នៅក្នុងតំបន់អាស៊ាន មានការត្រៀមខ្លួនខ្ពស់ ក្នុងការប្រឈមមុខនឹងគ្រោះមហន្តរាយ។

យោងតាមការស្ទង់មតិ ហានិភ័យពិភពលោក(World Risk Poll) បានរកឃើញថា ចំនួន២ភាគ៣នៃអ្នកឆ្លើយសំណួរ មកពីតំបន់អាស៊ានជឿថា ពួកគេអាចការពារខ្លួន និងក្រុមគ្រួសារពីគ្រោះមហន្តរាយនាពេលអនាគត ដូចជា រលកយក្សស៊ូណាមិ ឬរញ្ជួយដី។

ការស្ទង់មតិខាងលើ បានវាស់វែងភាពធន់ជា៤ប្រភេទ រួមមាន បុគ្គល គ្រួសារ និងសហគមន៍-សង្គម ដោយមានការចូលរួមពីអ្នកឆ្លើយតបចំនួន១.០០០នាក់ ដែលមានអាយុចាប់ពី១៥ឆ្នាំឡើងទៅ។

លោក Benedict Vigers អ្នកប្រឹក្សាយោបល់ផ្នែកស្រាវជ្រាវនៅក្រុមហ៊ុន Gallup និងបានធ្វើការលើការស្ទង់មតិ បានលើកឡើងថា “តំបន់អាស៊ាន បានបង្ហាញទៅកាន់ពិភពលោកថា ភាពធន់ និងការត្រៀមខ្លួន ក៏អាចកើតឡើងបានផងដែរ នៅក្នុងបណ្តាប្រទេសកំពុងអភិវឌ្ឍន៍”។

លោកបន្តថា “ប្រទេសចំនួន៣ ដែលជាប់ចំណាត់ថ្នាក់ខ្ពស់បំផុត លើការរៀបចំធ្វើផែនការក្នុងគ្រួសារ ដើម្បីឆ្លើយតបនឹងគ្រោះធម្មជាតិ រួមមាន ហ្វីលីពីន វៀតណាម កម្ពុជា ហើយប្រទេសទាំង៣នេះ សុទ្ធតែជាប្រទេសមានប្រាក់ចំណូលមធ្យមកម្រិតទាប”។

ប្រទេសឥណ្ឌូនេស៊ី និងហ្វីលីពីន សម្បូរដោយភ្នំភ្លើងសកម្មជាច្រើន។ ការណ៍នេះធ្វើឱ្យប្រទេសទាំង២ ងាយរងគ្រោះខ្លាំងចំពោះការរញ្ជួយដី និងរលកយក្សស៊ូណាមិ ក៏ដូចជាព្យុះត្រូពិចប្រចាំឆ្នាំផងដែរ។ ជាការឆ្លើយតបនឹងសំណួរស្ទង់មតិ ប្រជាជនអាស៊ាន ទទួលបានពិន្ទុខ្ពស់ក្នុងការត្រៀមខ្លួន និងការធ្វើផែនការគ្រួសារ នៅពេលគ្រោះមហន្តរាយមកដល់។

ការស្ទង់មតិហានិភ័យពិភពលោក បានបង្ហាញថា ចំនួន៧៤ភាគរយ នៃមនុស្សពេញវ័យ នៅតំបន់អាស៊ានលើកឡើងថា ពួកគេបានទទួលការព្រមាន ឬសេចក្តីជូនដំណឹងទុកជាមុនយ៉ាងតិចណាស់១ដង មុនពេលមានគ្រោះមហន្តរាយកើតឡើង តាមរយៈប្រព័ន្ធផ្សព្វផ្សាយសង្គម និងរដ្ឋាភិបាល៕

ប្រភព:ABC News

តម្លៃលំនៅដ្ឋាននៅក្នុងតំបន់ដែនដីថ្មីរបស់ក្រុងហុងកុង ហក់ឡើងដល់កម្រិតខ្ពស់បំផុតក្នុងរយៈពេល៦ឆ្នាំ

August 20, 2024

ដោយ: គង់ លាងហួរ

អន្តរជាតិ: លំហូរនិស្សិត និងអ្នកជំនាញការងារកំពុងជំរុញតម្រូវការលំនៅដ្ឋាន នៅក្នុងតំបន់ដែនដីថ្មី (New Territories)នៃទីក្រុងហុងកុង និងតម្លៃជួលដល់កម្រិតខ្ពស់បំផុត ក្នុងរយៈពេល៦ឆ្នាំ ទោះបីជាទីផ្សារអចលនទ្រព្យ ក្នុងតំបន់ផ្សេងទៀតកំពុងដាំក្បាលចុះយ៉ាងណាក្តី។

ផ្ទះល្វែងប្រភេទ Studio ទំហំ២៣៥ហ្វីតការ៉េ នៅឯគម្រោង Novo Land ក្នុងសង្កាត់ Tuen Mun នៃតំបន់ New Territories ត្រូវបានដាក់ជួល ក្នុងតម្លៃ១.៥៦៥ដុល្លារអាមេរិក ឬស្មើនឹង៦,៦៦ដុល្លារក្នុងមួយហ្វីតការ៉េ។

ការជួលផ្ទះនៅតំបន់ New Territories មានតម្លៃប្រហាក់ប្រហែល នឹងគម្រោងមួយចំនួន នៅលើកោះហុងកុង។ តួយ៉ាង ផ្ទះល្វែងទំហំ២៣៦ហ្វីតការ៉េ នៅគម្រោង The Holborn ក្នុងសង្កាត់ Sai Wan Ho កំពុងដាក់ជួលក្នុងតម្លៃ១៧៩៧ដុល្លារអាមេរិកក្នុងមួយខែ។ នេះបើយោងតាមទិន្នន័យ នៅលើគេហទំព័រ Midland Realty ។

ផ្អែកលើខ្នាតក្នុងមួយហ្វីតការ៉េ ផលចំណេញត្រឡប់ពីការជួលនៅតំបន់ New Territories មានកម្រិតខ្ពស់ជាងនៅគម្រោងលំនៅដ្ឋានប្រណីត Residence Bel-Air ស្ថិតនៅសង្កាត់ភាគខាងត្បូងនៃកោះហុងកុង។ នេះបើយោងតាមសារពត៌មាន South China Morning Post។

យោងតាមទីភ្នាក់ងារ Midland Realty បានឱ្យដឹងថា ផ្ទះជាប់មាត់សមុទ្រទំហំ១.៣៤០ហ្វីតការ៉េ នៅក្នុងគម្រោង Bel-Air ដំណាក់កាលទី៦ ត្រូវបានជួលក្នុងតម្លៃ៨.៣៤៥ដុល្លារអាមេរិក ក្នុងមួយខែ ឬស្មើនឹង៦,២៣ដុល្លារ ក្នុងមួយហ្វីតការ៉េ។

លោក Lau Ka-fai ប្រធានក្រុមអ្នកវិភាគនៅទីភ្នាក់ងារ Midland Realty បានលើកឡើងថា “ទីផ្សារជួលនៅក្នុងតំបន់ដែនដីថ្មីនេះ មានភាពសកម្ម។ ផ្ទះខ្នាតតូច និងផ្ទះខ្នាតមធ្យមដែលមានតម្លៃជួល ប្រហែល២.៥៦៧ដុល្លារអាមេរិក ក្នុងមួយខែមានការពេញនិយមខ្លាំង ហើយតំបន់ New Territories ផ្តល់ជម្រើសច្រើនជាងកោះហុងកុង”។

តំបន់ដែនដីថ្មី ឬ New Territories ជាតំបន់សំខាន់មួយក្នុងចំណោមតំបន់សំខាន់ៗទាំង៣ នៃទីក្រុងហុងកុង មានទីតាំងស្ថិតនៅតាមបណ្តោយកោះហុងកុង និងឧបទ្វីបKowloon។

អាជ្ញាធររូបិយវត្ថុ នៃតំបន់រដ្ឋបាលពិសេស ក្រុងហុងកុងបានសម្រេចចិត្ដ រក្សាទុកអត្រាការប្រាក់ឱ្យនៅថេរចំនួន៧លើកជាប់ៗគ្នា គិតត្រឹមដើមខែសីហា ស្របតាមការសម្រេចចិត្តរបស់ធនាគារកណ្តាលសហរដ្ឋអាមេរិក។

ធនាគារកណ្តាលអាមេរិក(Fed) បានផ្តល់សញ្ញាអំពីផែនការកាត់បន្ថយអត្រានៅដើមខែកញ្ញា ឆ្នាំនេះ ខណៈក្រុមវិនិយោគិន បានព្យាករណ៍ចំនួន៣លើកនៅឆ្នាំ២០២៤។ នេះបើយោងតាមក្រុមហ៊ុនសេវាកម្មហិរញ្ញវត្ថុ CME Group៕

ប្រភព: SCMP

តើការសាងសង់ស្ពានឆ្លងកាត់ទន្លេរបាសាក់ ចក្រអង្រែក្រោម ព្រែកប្រាសម្រេចបានវឌ្ឍនភាពបែបណាហើយ?

August 20, 2024

ដោយៈ គង់ សូរិយា

ភ្នំពេញៈ ក្រសួងសាធារណៈការ និងដឹកជញ្ជូនបានបង្ហាញពីវឌ្ឍនភាពគម្រោង ស្ថាបនាស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) សម្រេចបាន ១២,៣៦ភាគរយហើយ។

តាមក្រសួងបានឲ្យដឹងថា គិតត្រឹមថ្ងៃទី១៥ ខែសីហា ឆ្នាំ២០២៤នេះ គម្រោងស្ថាបនាស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) សម្រេចបាន១២,៣៦% ហើយ បន្ទាប់ពីសម្ពោធបើកការដ្ឋានសាងសង់ កាលពីថ្ងៃទី១៩ ខែកុម្ភៈ ឆ្នាំ២០២៤ ក្រោមអធិបតីភាពដ៏ខ្ពង់ខ្ពស់ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកវ៉ាង វិនធៀន ឯកអគ្គរដ្ឋចិនប្រចាំកម្ពុជា។

បច្ចុប្បន្នសម្រាប់ការងារ សសរគ្រឹះចំនួន៣៦ដើម បានចាក់បេតុងរួច ក្នុងចំណោម១៥៦ដើម និងចាក់ជើងតាងបាន៦ ក្នុងចំណោម២០ជើងតាង។ ចំណែកឯការងារហេដ្ឋារចនាសម្ព័ន្ធផ្នែកក្រោម ចាក់សរសរភ្លោះបាន៤ក្នុងចំណោម១២ សសរ ព្រមទាំងការងារសំខាន់ៗមួយចំនួនទៀត។

គម្រោងសាងសង់ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) មានប្រវែងសរុប១៦៥០ម៉ែត្រ (ប្រវែងស្ពាន ៨៤៥,៧០ម៉ែត្រ ទទឹងផ្លូវ២៧ម៉ែត្រ ផ្លូវតភ្ជាប់ក្បាលស្ពានប្រវែង ៨០៤,៣០ម៉ែត្រ ទទឹងផ្លូវ២៧ម៉ែត្រ) សាងសង់ដោយក្រុមហ៊ុនសំណង់សៀងហៃ និងទីប្រឹក្សាគម្រោងដោយក្រុមហ៊ុនក្វាងចូវវ៉ានអាន៕

:: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT)

– Facebook: https://www.facebook.com/mpwt.gov.kh

– Telegram: https://t.me/mpwtnews

– TikTok: https://www.tiktok.com/@mpwt.tiktok

– YouTube: https://www.youtube.com/@mpwt.youtube

ABCនិងCMAចេញផ្សាយគោលការណ៍ណែនាំថ្មីសម្រាប់ស្ថាប័នហិរញ្ញវត្ថុជាមួយអតិថិជន

August 20, 2024

ដោយៈ គង់ សូរិយា

ភ្នំពេញៈ សមាគមធនាគារកម្ពុជា (ABC) និងសមាគមមីក្រូហិរញ្ញវត្ថុកម្ពុជា (CMA) បានចេញផ្សាយគោលការណ៍ណែនាំថ្មី ដោយទាមទារឱ្យស្ថាប័នហិរញ្ញវត្ថុ ទទួលយកវិធីសាស្ត្រដែលអាចបត់បែនបាន នៅពេលដោះស្រាយជាមួយអតិថិជនដែលបានប្រើប្រាស់ដី ជាទ្រព្យធានាក្នុងការដោះដូរ ដើម្បីការពារអ្នកខ្ចីដែលងាយរងគ្រោះ។

យោងតាមគោលការណ៍ណែនាំថ្មីនេះ ធនាគារ និងគ្រឹះស្ថានមីក្រូហិរញ្ញវត្ថុ ត្រូវបានហាមឃាត់ដោយមិនបង្ខំឱ្យ អតិថិជនលក់ដី ដើម្បីសងប្រាក់បំណុល។

ផ្ទុយទៅវិញ ស្ថាប័នទាំងនេះ ត្រូវបានលើកទឹកចិត្តឱ្យចូលរួមក្នុងការចរចាដោយយុត្តិធម៌ និងអាចបត់បែនបាន ដែលផ្តល់អាទិភាពដល់អ្នកខ្ចី ក្នុងការទូទាត់សង ដោយមិនបង្ខំឱ្យលក់ទ្រព្យសម្បត្តិរបស់ពួកគេ។

លោក សុខ ចាន់ នាយកបរិយាបន្នហិរញ្ញវត្ថុ និងទំនាក់ទំនងសាធារណៈនៃសមាគមធនាគារនៅកម្ពុជា ABC មានឱ្យដឹងថា ចំពោះអតិថិជនដែលមានទ្រព្យធានា ជាដីសមូលភាព គ្រឹះស្ថាន ត្រូវមានភាពទន់ភ្លន់ក្នុងការជជែក ឬពិភាក្សាជាមួយអតថិជន ដោយមិនបង្ខំក្នុងការទារបំណុល ឬលក់ដីនោះទេ។

លោកបានបន្ដថា “យើងបារម្ភពីបងប្អូន ជនជាតិដើមភាគតិច អ្នកខ្ចីដែលដាក់ទ្រព្យធានា ដូចជា ដីធ្លី ទើបយើងបានចេញគោលដៅណែនាំនេះ ដើម្បីជួយដល់ពួកគាត់ ហើយយើងបានជម្រាបទៅគ្រឹះស្ថាន [ធនាគារ និងស្ថាប័នមីក្រូហិរញ្ញវត្ថុ] ដែរ បើសិនជាពួកគាត់មានប្លង់ដី ជាទ្រព្យធានា សម្រាប់ឥណទាន ពួកគេត្រូវប្រគល់ប្លង់ទាំងនោះ ឱ្យត្រឡប់ទៅកាន់ពួកគាត់វិញ ពេលសងគ្រប់ចំនួននៃកម្ចី។

គោលការណ៍ណែនាំ ដែលបានចូលជាធរមាន កាលពីថ្ងៃទី១៦ ខែសីហា ក៏បានហាមឃាត់ទទួលយកដីកម្មសិទ្ធិសមូហភាព មានដូចជា ដីឯកជនរបស់រដ្ឋ និងដីសាធារណៈរបស់រដ្ឋ ដែលបានចុះបញ្ជីរួចហើយជាមួយរដ្ឋ មកធ្វើជាទ្រព្យធានាឥណទានថ្មី ដូចជា ដីសហគមន៍ ដីសហគមន៍ជនជាតិដើមភាគតិច ដីសមូហភាព ដីអាជ្ញាធរជាតិអប្សរា ដីដែនជម្រកសត្វព្រៃ ដីតំបន់ការពារ ដីច្រករបៀង និងដីតំបន់ការពារផ្សេងទៀត។

គ្រឹះស្ថានត្រូវបានហាមឃាត់ ទទួលយកឯកសារសម្គាល់អត្តសញ្ញាណបុគ្គលដែល រួមមាន អត្តសញ្ញាណបណ្ណ សៀវភៅគ្រួសារ សៀវភៅស្នាក់នៅ លិខិតឆ្លងដែន សំបុត្រកំណើត និងបណ្ណសមធម៌ សម្រាប់ការធានាលើការផ្ដល់ឥណទាន ជាដាច់ខាត។

គោលការណ៍ណែនាំបានបង្ហាញថា “ការផ្តល់ឥណទានចំពោះគ្រួសារ ដែលមានបណ្ណសមធម៌ ត្រូវធ្វើឡើងដោយមានការវាយតម្លៃលទ្ធភាព សងឥណទានឱ្យបានត្រឹមត្រូវ និងហ្មត់ចត់។ ចៀសវាងការផ្តល់ឥណទាន ដែលមានទំហំលើសពីសមត្ថភាព ដែលអាចប្រឈមនឹងបំណុលច្រើនលើសលប់”។

លោកសុខ ចាន់ បានបន្តថា វាជាការងារប្រចាំថ្ងៃរបស់គ្រឹះស្ថាននីមួយៗក្នុងការវាយតម្លៃ ដល់កម្ចីដល់អតិថិជនរបស់ពួកគេ។ នេះគ្រាន់តែវិធានបន្ថែម ដើម្បីរំឭកដល់គ្រឹះស្ថាន ដើម្បីអនុវត្ដន៍ឱ្យបានខ្ជាប់ខ្ជួន ទៅនឹងក្រមប្រតិបត្ដិ ដែលបានចេញកាលពីខែមីនា ឆ្នាំ២០២២។

សមាគមធនាគារ ក៏មានសេវាកម្មទូរស័ព្ទ (Hot Line) ដើម្បីទទួលនូវបណ្ដឹងពីអតិថិជន បើសិនការអនុវត្ដបុគ្គលិក ឬគ្រឹះស្ថានធនាគារ ដែលមិនសមទៅនឹងក្រមប្រតិបត្ដិ ក្រមសីលធម៌របស់សមាគមន៍ និងច្បាស់។

សមាគម ក៏នឹងធ្វើការវាយតម្លៃដល់គ្រឹះស្ថាន៣០ ក្នុងដំណាក់កាលទីមួយ ចំពោះក្រមប្រតិបត្ដិ ដែលត្រូវបានដាក់ចេញកន្លងមក៕

ក្រុមហ៊ុនវិនិយោគចិនចាប់អារម្មណ័ចំពោះសក្តានុពល និងបរិយាកាសវិនិយោគនៅកម្ពុជា

August 20, 2024

ដោយៈ គង់ សូរិយា

ភ្នំពេញៈ ប្រតិភូក្រុមហ៊ុនចិនធំមួយ បានចាប់អារម្មណ៍ចំពោះសក្តានុពល និងបរិយាកាសវិនិយោគនៅកម្ពុជា។

ក្នុងជំនួបសម្តែងការគួរសម ជាមួយសម្តេចធិបតីហ៊ុន ម៉ាណែតនាយករដ្ឋមន្រ្តីនៃកម្ពុជា នៅថ្ងៃទី២០ ខែសីហា ឆ្នាំ២០២៤ លោកស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានអញ្ជើញចូលរួមក្នុងជំនួបសម្ដែងការគួរសម និងពិភាក្សាការងារ ក្រោមកិច្ចដឹកនាំដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ជាមួយគណៈប្រតិភូក្រុមហ៊ុនវិនិយោគចិន តំណាងដោយលោកZhao Yudong ប្រធានក្រុមហ៊ុន Everbright Group Everbright Sunshine Asset Management Co.,Ltd ដែលបានប្រព្រឹត្តទៅនៅវិមានសន្តិភាព។

ភាគីចិនបាននិងកំពុងចាប់អារម្មណ៍ ចំពោះសក្តានុពល និងបរិយាកាសវិនិយោគ លើវិស័យសំខាន់ៗមួយចំនួននៅកម្ពុជា ជាពិសេសលើវិស័យហេដ្ឋារចនាសម្ព័ន្ធ ឧស្សាហកម្ម ហិរញ្ញវត្ថុ និងថាមពល ស្របពេលដែលកម្ពុជាបានត្រៀមខ្លួនរួចជាស្រេចសម្រាប់ទទួលការវិនិយោគ ធ្វើពាណិជ្ជកម្ម ដែលជាដង្ហើមដ៏ចាំបាច់បំផុត សម្រាប់ជំរុញខឿនសេដ្ឋកិច្ចជាតិ៕

រដ្ឋាភិបាលឥណ្ឌូនេស៊ីបង្កើតក្រុមការងារអន្តរក្រសួងដើម្បីរកដំណោះស្រាយបញ្ចុះតម្លៃសំបុត្រយន្តហោះ

August 19, 2024

ដោយ: គង់ លាងហួរ

អន្តរជាតិ: លោក Sandiaga Salahuddin Uno រដ្ឋមន្ត្រីក្រសួងទេសចរណ៍ និងសេដ្ឋកិច្ចច្នៃប្រឌិតអះអាងថា រដ្ឋាភិបាលឥណ្ឌូនេស៊ីកំពុងខិតខំប្រឹងប្រែង ដើម្បីធ្វើឱ្យសំបុត្រធ្វើដំណើរតាមផ្លូវអាកាសកាន់តែមានតម្លៃសមរម្យសម្រាប់អ្នកដំណើរ។

រដ្ឋាភិបាលឥណ្ឌូនេស៊ីបានបង្កើតក្រុមការងារអន្តរក្រសួងមួយក្នុងគោលដៅដោះស្រាយបញ្ចុះតម្លៃសំបុត្រយន្តហោះ។ ក្រុមអ្នកជំនាញរំពឹងថា តម្លៃសំបុត្រយន្តហោះក្នុងស្រុកនឹងថយចុះប្រមាណ១០ភាគរយនៅត្រឹមខែតុលាខាងមុខ។

ក្រុមការងារអន្តរក្រសួង រួមមានក្រសួងសម្របសម្រួលកិច្ចការសេដ្ឋកិច្ច ក្រសួងសម្របសម្រួលកិច្ចការសមុទ្រ និងការវិនិយោគ ក៏ដូចជាក្រសួង និងស្ថាប័នពាក់ព័ន្ធផ្សេងទៀត។

កន្លងមក សមាគមក្រុមហ៊ុនអាកាសចរណ៍ជាតិឥណ្ឌូណេស៊ី (INACA) បានវាយតម្លៃថា អាជីវកម្មអាកាសចរណ៍នៅក្នុងប្រទេសកំពុងជាប់គាំង និងបង្កការខាតបង់។ ជាក់ស្ដែង ថ្វីបើសំបុត្រយន្តហោះមានតម្លៃខ្ពស់ ប៉ុន្តែ ក្រុមហ៊ុនអាកាសចរណ៍ក្នុងស្រុករកប្រាក់ចំណេញមិនបានច្រើនទេ។

លោក Denon Prawiraatmadja ប្រធានសមាគម INACA បានលើកឡើងថា “ក្រុមហ៊ុនអាកាសចរណ៍កំពុងប្រឈមនឹងការខាតបង់ដោយសារតែការចំណាយថ្លៃដើមខ្ពស់។ ការណ៍នេះបានជំរុញឱ្យក្រុមហ៊ុននានាដំឡើងតម្លៃសំបុត្រយន្តហោះ”។

លោក Sandiaga បានគូសបញ្ជាក់ថា បញ្ហាទាំងអស់នេះនឹងត្រូវបានលើកមកសិក្សាដើម្បីធានាថា ឧស្សាហកម្មអាកាសចរណ៍របស់ប្រទេសឥណ្ឌូនេស៊ីអាចដំណើរការប្រកបដោយប្រសិទ្ធភាព ដូចគ្នានឹងបណ្តាប្រទេសដទៃទៀត។

លោក Alvin Lie អ្នកសង្កេតការណ៍អាកាសចរណ៍ បានចង្អុលបង្ហាញថា បន្ទុកពន្ធខ្ពស់ពីរដ្ឋាភិបាល និងអាកាសយានដ្ឋាន ជាកត្តាចម្បងដែលរួមចំណែកដល់ការហក់ឡើងតម្លៃសំបុត្រយន្តហោះនៅក្នុងប្រទេសឥណ្ឌូនេស៊ី។

យោងតាមលោក Alvin បានឱ្យដឹងថា តម្លៃសំបុត្រយន្ដហោះសម្រាប់អ្នកដំណើរ បានបូករួមបញ្ចូលទាំងថ្លៃប្រតិបត្តិការ និងការថែទាំអាកាសយានដ្ឋាន ក៏ដូចជាថ្លៃសេវាព្រលានយន្តហោះផងដែរ។ នេះជាហេតុធ្វើឱ្យតម្លៃសំបុត្រកើនឡើងខ្ពស់។

លោក Alvin បានកត់សម្គាល់បន្ថែមទៀតថា តម្លៃសំបុត្រយន្តហោះក៏រួមបញ្ចូលអាករលើតម្លៃបន្ថែមចំនួន១១ភាគរយផងដែរ។

ទន្ទឹមនឹងនេះ ក្រុមហ៊ុនអាកាសចរណ៍ត្រូវបង់ពន្ធទាំងនេះនៅពេលទិញប្រេងឥន្ធនៈ ហើយក៏បង់ពន្ធលើការនាំចូលយន្តហោះ និងគ្រឿងបន្លាស់។ នេះជាលទ្ធផលនាំឱ្យមានការយកពន្ធត្រួតគ្នាទ្វេរដង ដែលធ្វើឱ្យតម្លៃសំបុត្រយន្តហោះហក់ឡើងខ្ពស់៕

ប្រភព: Vnexpress

China adds new clean power equivalent to UK’s entire electricity output

August 19, 2024

China added as much new clean energy generation in the first half of this year as the UK produced from all sources in the same period last year, data shows, as wind and solar power generation continued to surge in the world’s biggest emitter of greenhouse gases.

Electricity generation from coal and gas dropped by 5% in China in July, year on year, according to an update from the Centre for Research on Energy and Clean Air (CREA) thinktank, basing its analysis on data released by the Chinese government on Thursday.

The latest figures reinforce a clear trend – China is racing ahead in renewable energy, adding record-breaking amounts of solar and wind generation, eclipsing the rest of the world. It is a transformation that analysts are saying could be the world’s best hope yet of staving off climate catastrophe.

“China is leading against all of its competitors, when it comes to green technology,” said Li Shuo, the director of the China Climate Hub at the Asia Policy Institute in Washington DC. “China has a real advantage, and has established a huge green industry.”

Last year, China installed a record 293GW of wind and solar generating capacity. Last month, solar and wind capacity outstripped China’s coal-fired electricity capacity. By 2026, solar power alone will surpass coal as China’s primary energy source, with a capacity of more than 1.38TW, or 150GW more than coal, according to forecasts by Rystad Energy.

Electric vehicles production is surging ahead, with hybrids and fully electric cars making up more than half of all new models sold in July, and the steel industry is also changing, with no permits for coal-fired plants issued in the first half of this year.

This continuing boom in clean technology has led some analysts to suggest China’s greenhouse gas emissions may have already reached a peak, perhaps as early as February this year. This would be momentous.

For China, the world’s second biggest economy behind the US, to reverse its decades of almost unbroken rapid growth – nearly tripling from about 3.6bn tonnes of carbon emitted in 2000 to 11.4bn in 2022 – would have seismic implications for the global climate emergency.

Source: The Guardian

1...427428429...3,239 Page 428 of 3,239