ដោយ: សហសេវិក
អន្តរជាតិ: តម្លៃជួលការិយាល័យនៅតំបន់ពាណិជ្ជកម្មសំខាន់ៗរបស់ទីក្រុងម៉ានីលនៃប្រទេសហ្វីលីពីននឹងកើនឡើងនៅឆ្នាំនេះ ដែលជំរុញដោយតម្រូវការពីបណ្តាក្រុមហ៊ុនពហុជាតិសាសន៍ និងក្រុមហ៊ុន Business process outsourcing។

លោក Mikko Barranda នាយកផ្នែកជួលអចលនទ្រព្យពាណិជ្ជកម្មនៅក្រុមហ៊ុនប្រឹក្សាយោបល់អចលនទ្រព្យ Leechiu Property Consultants បានលើកឡើងថា តម្លៃជួលការិយាល័យនឹងប្រែប្រួលទៅតាមទីតាំង។

តម្លៃជួលការិយាល័យនៅតំបន់ពាណិជ្ជកម្មសំខាន់ៗ ដូចជា តំបន់ Bonifacio Global City (BGC) អាចនឹងមានការកើនឡើង ខណៈដែលតម្រូវការបន្តកើនឡើងលើសពីការផ្គត់ផ្គង់។

គិតត្រឹមចុងឆ្នាំ២០២៥ តំបន់ BGC មានអត្រាការិយាល័យទំនេរទាបជាងគេបំផុតក្នុងរង្វង់៩ភាគរយ ដោយផ្អែកលើរបាយការណ៍ទីផ្សារអចលនទ្រព្យប្រចាំត្រីមាសទី៤ របស់ក្រុមហ៊ុន Leechiu។

តំបន់ពាណិជ្ជកម្មផ្សេងទៀតមានអត្រាការិយាល័យទំនេរខ្ពស់ជាងនេះ រួមមានតំបន់ Makati ចំនួន១៥ភាគរយ តំបន់ Ortigas និងតំបន់ Mandaluyong ចំនួន១៨ភាគរយ តំបន់ Quezon ចំនួន១៩ភាគរយ តំបន់ Taguig ចំនួន២១% តំបន់ Alabang ចំនួន២៣% និងតំបន់ Bay Area ចំនួន២៨%។

ទិន្នន័យពីក្រុមហ៊ុន Leechiu បានបង្ហាញថាគិតត្រឹមចុងឆ្នាំ២០២៥ តំបន់ BGC នៅតែជាទីផ្សារការិយាល័យថ្លៃបំផុត ដោយមានតម្លៃជួលចំនួន១.១៦៧ប៉េសូ ក្នុងមួយម៉ែត្រការ៉េ តាមពីក្រោយដោយតំបន់ Makati ដែលមានតម្លៃជួលចំនួន៨៩១ប៉េសូក្នុងមួយម៉ែត្រការ៉េ។

លោក Barranda បានលើកឡើងថា ការថយចុះនៃការផ្គត់ផ្គង់ការិយាល័យថ្មី និងការងាកទៅរកការិយាល័យដែលមានគុណភាពខ្ពស់នឹងធ្វើឱ្យតម្លៃជួលកើនឡើង។ តំបន់ពាណិជ្ជកម្មកណ្តាលសំខាន់ៗដូចជា តំបន់ Makati និងតំបន់ BGC ត្រូវបានគេរំពឹងថានឹងទទួលបានអត្ថប្រយោជន៍ពីនិន្នាការទាំងនេះ៕ប្រភព: BusinessWorld៕

ដោយ: សហសេវិក
អន្តរជាតិ: ទីផ្សារការិយាល័យនៅទីក្រុងគូឡាឡាំពួររបស់ម៉ាឡេសុីត្រូវបានគេរំពឹងថា នឹងក្លាយជាទីផ្សាររបស់ម្ចាស់អគារ (landlord) ក្នុងរយៈពេលប៉ុន្មានឆ្នាំខាងមុខ ខណៈការផ្គត់ផ្គង់ការិយាល័យកម្រិត A នៅមានកំណត់ និងកំណើននៃតម្រូវការការិយាល័យដែលមានគុណភាពខ្ពស់។

លោកស្រី Quiny Lee ប្រធានផ្នែកប្រឹក្សាយោបល់លើការជួលការិយាល័យនៅក្រុមហ៊ុន JLL Malaysia បានលើកឡើងថា សម្ពាធតម្រូវការកំពុងកើនឡើងនៅក្នុងទីក្រុងគូឡាឡាំពួរ និងតំបន់ជាយក្រុង ដែលអាចផ្លាស់ប្តូរទីផ្សារទៅជាទីផ្សាររបស់ម្ចាស់អគារក្នុងរយៈពេលមធ្យម។

តម្រូវការជួលការិយាល័យបានកើនឡើងដល់ចំនួន៤៣០.០០០ហ្វីតការ៉េនៅក្នុងត្រីមាសទី៤ ឆ្នាំ២០២៥។ អត្រាការិយាល័យទំនេរមានភាពប្រសើរឡើងនៅគ្រប់តំបន់ទាំងអស់ ដោយស្ថិតក្នុងរង្វង់១៨,៦ភាគរយនៅទីក្រុងគូឡាឡាំពួរ និង៦,៧ភាគរយនៅតំបន់ជាយក្រុងគូឡាឡាំពួរ។

ចាប់ពីឆ្នាំ២០២៧ តទៅ ការផ្គត់ផ្គង់ត្រូវបានគេរំពឹងថា នឹងមានការថយចុះ ដោយមានអគារការិយាល័យកម្រិត A តិចតួចណាស់ដែលអាចបើកដំណើរការរវាងឆ្នាំ២០២៧ និងឆ្នាំ២០២៨។

គេសង្កេតឃើញមានអគារការិយាល័យកម្រិត A ថ្មីតែមួយប៉ុណ្ណោះ ឈ្មោះ The Capitol at Bandar Utama ដែលគ្រោងនឹងបញ្ចប់ការសាងសង់នៅឆ្នាំ២០២៧ ហើយគ្មានអគារកម្រិត A ណាមួយគ្រោងបើកសម្ពោធនៅឆ្នាំ២០២៨ នោះឡើយ។

លោកស្រី Lee បានបន្ថែមថា បណ្តាអ្នកអភិវឌ្ឍន៍នៅតែមានការប្រុងប្រយ័ត្ន ដោយសារផលចំណេញពីការជួលការិយាល័យមិនសូវមានភាពទាក់ទាញ ហើយកិច្ចសន្យាជួលការិយាល័យនៅម៉ាឡេសុីជាធម្មតាមានរយៈពេលប្រហែល៣ឆ្នាំប៉ុណ្ណោះ។

ការថយចុះនៃការផ្គត់ផ្គង់ការិយាល័យកម្រិត A ត្រូវបានគេរំពឹងថា នឹងពង្រឹងអំណាចនៃការចរចារបស់ម្ចាស់អគារ ដែលនាំឱ្យតម្លៃជួលការិយាល័យកើនឡើងកាន់តែខ្លាំង និងការលើកទឹកចិត្តតិចជាងមុន៕ប្រភព: The Edge of Malaysia៕

ដោយ: សហសេវិក
អន្តរជាតិ: រដ្ឋមន្ត្រីក្រសួងលំនៅឋាន លោក Ni Hong បានអះអាងថា ប្រទេសចិនគ្រោងស្តារវិស័យអចលនទ្រព្យ ពន្លឿនការកែលម្អទីក្រុង និងធ្វើទំនើបកម្មឧស្សាហកម្មសំណង់ចាប់ពីឆ្នាំ២០២៦ ដើម្បីជំរុញផែនការរយៈពេល៥ឆ្នាំលើកទី១៥ (២០២៦-២០៣០)។

លោក Ni បានបន្តថា រយៈពេល៥ឆ្នាំខាងមុខមានសារៈសំខាន់ខ្លាំងណាស់សម្រាប់ការអភិវឌ្ឍលំនៅឋាន និងការអភិវឌ្ឍទីក្រុង-ជនបទ។ ទោះបីជាមានបញ្ហាប្រឈមយ៉ាងណាក្តី ប៉ុន្តែឱកាសថ្មីៗក៏លេចចេញឡើងផងដែរ។

ជាមួយគ្នានេះ ការកែលម្អគុណភាពទីផ្សារអចលនទ្រព្យគឺជាអាទិភាពគោលនយោបាយកំពូល ហើយរដ្ឋាភិបាលចិនបានសង្កត់ធ្ងន់លើតម្រូវការក្នុងការធ្វើឱ្យទីផ្សារលំនៅដ្ឋានមានស្ថិរភាពឡើងវិញ។

ខណៈនគរូបនីយកម្ម​នៅតែបន្តរីកចម្រើន ប្រទេសចិននៅតែមានឱកាសក្នុងការប្រើប្រាស់លំនៅឋានប្រភេទទី២ បានកាន់តែប្រសើរឡើង។ តម្រូវការលំនៅឋាន ដែលមានគុណភាពខ្ពស់ក៏កំពុងកើនឡើងផងដែរ ដែលបង្ហាញពីសក្តានុពលរយៈពេលវែងសម្រាប់ទីផ្សារលំនៅឋាន។

អាជ្ញាធរមូលដ្ឋាននៃប្រទេសចិននឹងបន្តដាក់ចេញគោលនយោបាយរៀងៗខ្លួន ដើម្បីកាត់បន្ថយការផ្គត់ផ្គង់លំនៅឋានថ្មី សម្រាលចំនួនស្តុកលំនៅឋានលើសតម្រូវការ និងកែលម្អគុណភាពលំនៅឋាន។ រដ្ឋាភិបាលនឹងគាំទ្រដល់ការផ្តល់ហិរញ្ញប្បទានសម្រាប់បណ្តាអ្នកអភិវឌ្ឍន៍ និងបំពេញតម្រូវការលំនៅដ្ឋានជាមូលដ្ឋានឱ្យបានប្រសើរឡើង។

ការ​អភិវឌ្ឍ​ទីក្រុង​នឹង​នៅ​តែ​ជា​ចំណុច​សំខាន់​មួយ។ ក្នុង​រយៈពេល​១​ឆ្នាំ​កន្លង​មក​នេះ ប្រទេស​ចិន​បាន​ជួសជុល​សហគមន៍​លំនៅឋាន​ចាស់ៗ​ចំនួន២៦.០០០កន្លែង ដំឡើង​ជណ្តើរយន្ត​ចំនួន១៤.០០០គ្រឿង សាងសង់​ឧទ្យាន​តូចៗ​ជាង៤.៧០០កន្លែង និង​បាន​បញ្ចប់ការសាងសង់​ផ្លូវ​ Greenway​ ជាង៥.៨០០គីឡូម៉ែត្រ ដែល​ផ្តល់​អត្ថប្រយោជន៍​ដល់​ប្រជាជន​រាប់លាន​នាក់។

ប្រទេសចិនក៏នឹងធ្វើឱ្យប្រសើរឡើងនូវឧស្សាហកម្មសំណង់របស់ខ្លួន ដោយលើកកម្ពស់បច្ចេកវិទ្យាថ្មីៗ សំណង់ឆ្លាតវៃ និងអគារបៃតង។ ប្រទេសនេះមានគម្រោងពង្រឹងនវានុវត្តន៍ អភិវឌ្ឍកម្លាំងជំរុញផលិតភាពថ្មីៗ និងលើកទឹកចិត្តក្រុមហ៊ុនសំណង់ឱ្យពង្រីកខ្លួនលើឆាកអន្តរជាតិ និងបង្កើនសមត្ថភាពប្រកួតប្រជែងទូទាំងពិភពលោក៕ប្រភព: Xinhua៕