ដោយ: សហសេវិក
អន្តរជាតិ: បណ្តាវិនិយោគិនសកលបន្តចាត់ទុកប្រទេសឥណ្ឌាជាគោលដៅវិនិយោគអចលនទ្រព្យដ៏ទាក់ទាញបំផុតមួយរបស់តំបន់អាស៊ីប៉ាស៊ីហ្វិក ដោយសារកត្តាប្រជាសាស្ត្រអំណោយផល និងស្ថិរភាពនៃបរិយាកាសគោលនយោបាយ។

ក្រុមអ្នកវិនិយោគកំពុងចាក់បញ្ចូលដើមទុនយ៉ាងសកម្មនៅក្នុងទីផ្សារអចលនទ្រព្យឥណ្ឌា តាមរយៈការទិញដីធ្លី ការសាងសង់មជ្ឈមណ្ឌលទិន្នន័យ សួនឧស្សាហកម្ម និងឡូជីស្ទីក គម្រោងការិយាល័យ និងលំនៅឋាន។

លោក Badal Yagnik នាយកប្រតិបត្តិក្រុមហ៊ុនប្រឹក្សាអចលនទ្រព្យ Colliers India បានអះអាងថា ការវិនិយោគនៅក្នុងវិស័យអចលនទ្រព្យរបស់ប្រទេសឥណ្ឌាបានបង្ហាញពីភាពធន់គួរឱ្យកត់សម្គាល់ ដែលឆ្លុះបញ្ចាំងពីការកើនឡើងនៃទំនុកចិត្តរបស់បណ្តាវិនិយោគិន។

លោករំពឹងថា ការបណ្តាក់ទុនវិនិយោគប្រចាំឆ្នាំក្នុងវិស័យអចលនទ្រព្យរបស់ប្រទេសឥណ្ឌានឹងសម្រេចបានទំហំទឹកប្រាក់ចន្លោះពី៥ទៅ៧ពាន់លានដុល្លារអាមេរិកសម្រាប់ឆ្នាំ២០២៥ និងឆ្នាំ២០២៦។

ទីផ្សារអចលនទ្រព្យរបស់ប្រទេសឥណ្ឌាបន្តទទួលបានអត្ថប្រយោជន៍ពីកត្តានានា ដូចជាកំណើនសេដ្ឋកិច្ចក្នុងស្រុកដ៏រឹងមាំ ការកើនឡើងនៃនគរូបនីយកម្មទីក្រុង ការជំរុញការអភិវឌ្ឍហេដ្ឋារចនាសម្ព័ន្ធ និងកំណើននៃការប្រើប្រាស់។

លោក Yagnik បានគូសបញ្ជាក់ថា ខណៈក្រុមវិនិយោគិនចាប់អារម្មណ៍លើកំណើនសេដ្ឋកិច្ចរយៈពេលវែងរបស់ប្រទេសឥណ្ឌា លំហូរដើមទុនក្នុងស្រុក និងក្រៅប្រទេសត្រូវបានគេរំពឹងថា នឹងកើនឡើងបន្ថែមទៀតក្នុងរយៈពេលប៉ុន្មានត្រីមាសខាងមុខ។

លោកបន្ថែមថា បណ្តាអ្នកវិនិយោគនៅតែមានសុទិដ្ឋិនិយម ស្របពេលមានការពង្រីកខ្លួនរបស់វិនិយោគិនបរទេសក្នុងទីផ្សារអចលនទ្រព្យឥណ្ឌា ជាពិសេសមកពីសហរដ្ឋអាមេរិក និងតំបន់អាស៊ីប៉ាស៊ីហ្វិក។ ការណ៍នេះឆ្លុះបញ្ចាំងពីភាពទាក់ទាញរបស់ប្រទេសឥណ្ឌាក្នុងនាមជាទីផ្សារអចលនទ្រព្យដែលមានសក្តានុពលខ្ពស់ និងមានភាពធន់៕ប្រភព: The Economic Times៕

ដោយ: សហសេវិក
អន្តរជាតិ: ក្រុមហ៊ុន Allgreen Properties របស់មហាសេដ្ឋីម៉ាឡេស៊ីលោក Robert Kuok បានកំណត់តម្លៃដេញថ្លៃខ្ពស់បំផុតចំនួន៤៦៤,៨លានដុល្លារសិង្ហបុរី (ប្រមាណ៣៥៨លានដុល្លារអាមេរិក) លើទីតាំងដីលំនៅឋានដ៏ល្បីល្បាញមួយនៅក្នុងប្រទេសសិង្ហបុរី។

ការដេញថ្លៃទីតាំងដីនៅតំបន់ Bedok Rise នេះមានតម្លៃ១.៣៣០ដុល្លារសិង្ហបុរីក្នុងមួយហ្វីតការ៉េ (ប្រមាណ១១.០៨០ ដុល្លារអាមេរិកក្នុងមួយម៉ែត្រការ៉េ)។នេះបើយោងតាមការរាយការណ៍របស់កាសែត The Business Times។

ទីតាំងនេះទាក់ទាញការដេញថ្លៃពីបណ្តាក្រុមហ៊ុនចំនួន១០ ដែលជាចំនួននៃការចូលរួមច្រើនបំផុតមិនធ្លាប់មានចាប់តាំងពីខែកញ្ញា ឆ្នាំ ២០២១។ ក្រុមហ៊ុនប្រកួតប្រជែងផ្សេងទៀត រួមមានក្រុមហ៊ុន Hong Leong Holdings របស់មហាសេដ្ឋីសិង្ហបុរីលោក Kwek Leng Beng ក្រុមហ៊ុន Frasers Properties និងក្រុមហ៊ុន UOL Group។

យោងតាមអាជ្ញាធរអភិវឌ្ឍន៍ទីក្រុងសិង្ហបុរី(URA) បានឱ្យដឹងថា ដីឡូតិ៍ជួលរយៈពេល៩៩ឆ្នាំនេះ មានទំហំ២០.២៩៤ម៉ែត្រការ៉េស្ថិតនៅតំបន់ Bedok Rise នៅភាគខាងកើតនៃប្រទេសសិង្ហបុរី ។

ដីឡូតិ៍នេះអាចផ្គត់ផ្គង់ការអភិវឌ្ឍខុនដូចំនួន៣៨០យូនីត និងអាចសាងសង់អគារ១២ជាន់ ជាមួយនឹងផ្ទៃក្រឡាសរុបអតិបរមាចំនួន៣២.៤៧០ម៉ែត្រការ៉េ។

ដីឡូតិ៍នេះជាដីឡូតិ៍ចុងក្រោយដែលបែរមុខទៅស្ថានីយ៍រថភ្លើងក្រោមដី Tanah Merah ដែលជាចំណុចប្រសព្វតភ្ជាប់ខ្សែរថភ្លើងក្រោមដីខាងកើត-ខាងលិចជាមួយនឹងខ្សែរថភ្លើង Thomson-East Coast ដើម្បីកែលម្អការតភ្ជាប់ទៅកាន់អាកាសយានដ្ឋាន Changi និងឧទ្យានពាណិជ្ជកម្ម Changi៕ប្រភព: Vnexpress ៕

ដោយៈ គង់ សូរិយា

    ព្រះសីហនុៈ អភិបាលរងខេត្តព្រះសីហនុ លោកឯម ភាពបានលើកឡើងថា អគារជាប់គាំងមាន១៩៤គម្រោង មានទុនវិនិយោគប្រមាណ៣៨១៦លានដុល្លារអាមេរិកត្រូវបានទទួលការលើកទឹកចិត្តពិសេសពីកម្មវិធីជម្រុញការវិ​និយោគនៅខេត្តព្រះសីហនុ។

កម្មវិធីជម្រុញការវិនិយោគនេះ ត្រូវបានប្រកាសឡើងជាផ្លូវការក្រោមអធិបតីភាពសម្តេចធិបតីហ៊ុន ម៉ាណែតនាយករដ្ឋមន្រ្តីនៃកម្ពុជាកាលពីខែមករា ឆ្នាំ២០២៤។

លោកឯម ភាពបានលើកឡើងបែបនេះកាលពីសប្តាហ៍មុន ក្នុងសិក្ខាសលាផ្សព្វផ្សាយសេចក្តីណែនាំស្តីពី “នីតិវិធីនៃការអនុវត្តការលើកទឹកចិត្តផ្នែកពន្ធដារ ក្រោមកម្មវិធីពិសេសជំរុញការវិនិយោគ ក្នុងខេត្តព្រះសីហនុកាលពីសប្តាហ៍មុន។

លោកបញ្ជាក់ថា “ក្នុងនាមសមាជិកក្រុមការងារ ជំរុញការវិនិយោគខេត្តព្រះសីហនុ រីករាយ ព្រោះសិក្ខាសាលា ក្នុងថ្ងៃនេះ មានគោលបំណង ដើម្បីផ្សព្វផ្សាយអំពីសេចក្តីណែនាំលេខ ២៩៧២២ អពដ ស្តីពី “នីតិវិធីនៃការអនុវត្តការលើកទឹកចិត្តផ្នែកពន្ធដារ ក្រោមវិសាលភាពកម្មវិធីពិសេស”។

លោកអភិបាលរងខេត្តបានបន្ថែមថា ស្ថានភាពនៃការវិនិយោគ របស់ក្រុមហ៊ុននានា នៅទូទាំងខេត្តព្រះសីហនុ ផ្តោតលើវិស័យមួយចំនួន ដូចជា តំបន់សេដ្ឋកិច្ចពិសេស អភិវឌ្ឍន៍ទេសចរណ៍(ដីជួលរយៈពេលវែង ដីឆ្នេរ និងកោះ) កសិកម្ម កសិ-ឧស្សាហកម្ម ឧស្សាហកម្ម រោងចក្រ សហគ្រាស សិប្បកម្ម ហេដ្ឋារចនាសម្ព័ន្ធ សេវាកម្មទេសចរណ៍ និងសណ្ឋាគារ កសិដ្ឋានចិញ្ចឹមសត្វ កំពង់ផែសម្រាប់ធ្វើការនាំចេញ-ចូល ក្នុង និងក្រៅប្រទេស។

លោកឯម ភាព បានបញ្ជាក់ទៀតថា ក្រោមវិសាលភាពនៃកម្មវិធីពិសេសនេះ រហូតដល់ដំណាច់ឆ្នាំ២០២៥ ជាលទ្ធផលក្រុមការងារពិសេសជំរុញការវិនិយោគ ទទួលបានសំណើសុំលើកទឹកចិត្តចំនួន៤១៣គម្រោងក្នុងនោះគម្រោង ដែលទទួលបានលិខិតអនុញ្ញាតជាគោលការណ៍ចំនួន៤១២គម្រោង មានទុនវិនិយោគសរុបប្រមាណ ៧៩៧០លានដុល្លារ និងប៉ាន់ស្មាន អាចបង្កើតឱកាសការងារ៥២, ០០៤កន្លែង៕