ដោយ: គង់ លាងហួរ
អន្តរជាតិ: ការស្ទុះងើបឡើងវិញនៃកំណើនសេដ្ឋកិច្ចកំពុងតែជំរុញសន្ទុះទីផ្សារអចលនទ្រព្យលក់រាយនៅក្នុងទីក្រុងហុងកុង យ៉ាងសន្សឹមៗ ដោយជំរុញឱ្យអត្រាទុកទំនេរចោលនៃកន្លែងលក់រាយធ្លាក់ចុះដល់កម្រិតទាបបំផុតក្នុងរយៈពេល៣ឆ្នាំ។

តួយ៉ាង អត្រាទុកទំនេរចោលនៃកន្លែងលក់រាយសរុបជារួម( Retail space) បានធ្លាក់ចុះមកនៅត្រឹម៩,៦ភាគរយនៅក្នុងខែមីនា បើធៀបនឹងអត្រា១០ភាគរយកាលពីឆ្នាំមុន ហើយអត្រានេះនឹងរក្សាស្ថិរភាពក្នុងរយៈពេល៦ខែខាងមុខ។ នេះបើយោងតាមរបាយការណ៍ថ្មីចុងក្រោយរបស់ក្រុមហ៊ុន Midland IC&I ។

ទោះជាយ៉ាងណាក្តី ទីផ្សារលក់រាយនៅតំបន់ភាគពាយ័ព្យនៃទីក្រុងហុងកុង មិនបានស្ទុះងើបឡើងវិញឡើយ ដោយសារប្រជាជនហុងកុងភាគច្រើនដែលរស់នៅទីនោះ បានសម្រុកធ្វើដំណើរទៅទិញទំនិញ និងសេវាកម្ម នៅក្នុងទីក្រុង Shenzhen និងបណ្តាទីក្រុងជិតខាងផ្សេងទៀតនៅតំបន់ចិនដីគោក ព្រោះវាមានតម្លៃថោកជោង។ទីភ្នាក់ងារអចលនទ្រព្យខាងលើបានបញ្ជាក់នៅក្នុងរបាយការណ៍របស់ខ្លួនថា “ទំហំនៃការលក់រាយនៅក្នុងទីក្រុងហុងកុងបានស្ទុះងើបឡើងវិញ ហើយឧស្សាហកម្មលក់រាយនៅក្នុងតំបន់ស្នូលទាំង៤បានបន្តងើបឡើងវិញ” ។នេះបើយោងតាមការចុះផ្សាយដោយសារពត៌មាន South China Morning Post។

យោងតាមក្រុមហ៊ុនប្រឹក្សាអចលនៈទ្រព្យ Cushman & Wakefield បានឱ្យដឹងថា និន្នាការនេះបានបន្តកើតឡើងចាប់តាំងពីឆ្នាំមុនមកម្ល៉េះ។ ជាក់ស្តែង ការលក់រាយនៅតាមផ្លូវដើរទិញឥវ៉ាន់ និងផ្សារទំនើប តាមបណ្តោយខ្សែរថភ្លើង East Rail Line នៅភាគពាយ័ព្យនៃទីក្រុងហុងកុង និងទីក្រុង Shenzhen បានដាំក្បាលចុះ៣០ភាគរយ។

ក្រុមហ៊ុន Midland បានព្យាករណ៍ថា“ប្រជាជនហុងកុងនឹងសម្រុកទៅកាន់ទីក្រុងនៅតំបន់ចិនដីគោកដើម្បីទទួលទានអាហារ លេងកម្សាន្ត និងទៅផ្សារទំនើបធំៗ ដើម្បីទិញសម្ភារៈប្រើប្រាស់ប្រចាំថ្ងៃ។ ដូច្នេះ ទីផ្សារលក់រាយ ក្នុង តំបន់នៅ ប៉ែកខាង ហុងកុង ស្ថិតក្បែរ ទីក្រុង Shenzhen នឹង រង ផល ប៉ះពាល់ ខ្លាំង បំផុត”៕ប្រភព: SCMP៕

ដោយ: គង់ លាងហួរ

ហាណូយ: ឈ្មួញកណ្តាលអចលនទ្រព្យ កំពុងវិលត្រឡប់មកធ្វើការងារចាស់របស់ខ្លួនឡើងវិញ ដោយសារទីផ្សារបង្ហាញពីសញ្ញានៃការស្ទុះងើបឡើងវិញ បន្ទាប់ពីពួកគេបានប្តូរ ទៅរកការងារផ្សេងទៀតកាលពីឆ្នាំមុន។

បច្ចុប្បន្ននេះ ដោយមានវ័យ៣២ឆ្នាំ អ្នកនាង Bao Ngoc បានធ្វើការនៅក្នុងឧស្សាហកម្ម អចលនទ្រព្យអស់រយៈពេល៥ឆ្នាំ ដោយលក់ដី និងផ្ទះ ក្នុងរដ្ឋធានីហាណូយ ប៉ុន្តែដូចអ្នកផ្សេងទៀតដែរ អ្នកនាងបានលាឈប់ពីការងារនេះកាលពីឆ្នាំមុន ដើម្បីប្តូរទៅលក់គ្រឿងសម្អាងតាមអ៊ីនធឺណេតវិញម្តង។

ប៉ុន្តែក្នុងរយៈពេលប៉ុន្មានសប្តាហ៍ថ្មីៗនេះ អ្នកនាង Ngoc បានចូលមកដាក់ពាក្យការងារ ក្នុងតួនាទីជាឈ្មួញកណ្តាលអចលនទ្រព្យឡើងវិញ បន្ទាប់ពីបានឮដំណឹងថា អតីតសហការីមួយចំនួនរបស់ខ្លួនបានវិលមកធ្វើការងារនេះឡើងវិញ។

លោក Nguyen Minh Duc នាយកក្រុមហ៊ុនឈ្មួញជើងសាអចលនទ្រព្យមួយនៅទីក្រុងហាណូយ បានមានប្រសាសន៍ឱ្យដឹងថា អតីតបុគ្គលិកជាច្រើន បានខលទូរស័ព្ទមកលោក នាពេលថ្មីៗនេះ ដើម្បីស្វែងរកឱកាសដើម្បីចូលធ្វើការវិញ។

នៅពេលនេះ ក្រុមហ៊ុនរបស់លោក Nguyen កំពុងលក់ដីឡូតិ៍នៅខេត្ត Bac Giang ស្ថិតនៅភាគខាងជើង នៃប្រទេសវៀតណាម ដោយក្រុមហ៊ុនគ្រោង នឹងជួលឈ្មួញកណ្តាលចំនួន៥០នាក់ នៅចុងឆ្នាំនេះ។

ចំណែកក្រុមហ៊ុន Dat Xanh Services ដែលស្ថិតនៅភាគខាងជើងនៃប្រទេសវៀតណាមបានប្រកាសថា ខ្លួនគ្រោងជួលឈ្មួញកណ្តាលឱ្យបានចំនួន៤.០០០នាក់ គិតត្រឹមដំណាច់ត្រីមាសនេះ ដែលកើនឡើងទ្វេរដងបើប្រៀបធៀបនឹងឆ្នាំមុន។

ការជួលបុគ្គលិកឱ្យកាន់តួនាទី ជាឈ្មួញកណ្តាលនៅតាមបណ្តាក្រុមហ៊ុននានាមានការកើនឡើង ស្របពេលដែលទីផ្សារអចលនទ្រព្យនៅប្រទេសវៀតណាម កំពុងបង្ហាញសញ្ញានៃការស្ទុះងើបឡើងវិញ។

ជាក់ស្តែងតម្លៃអាផាតម៉ិន នៅទីក្រុងហាណូយ បានកើនឡើងក្នុងអត្រាប្រចាំឆ្នាំចំនួន១៩ភាគរយ ខណៈដែលតម្លៃដីធ្លីនៅក្នុងតំបន់ជាយក្រុង បានកើនឡើងក្នុងអត្រាប្រចាំឆ្នាំ ចាប់ពី១០ ទៅដល់២០%៕ប្រភព: VNexpress៕

ដោយ: គង់ លាងហួរ

អន្តរជាតិ: ក្រុមហ៊ុនបច្ចេកវិទ្យាលំដាប់យក្ស Samsung របស់ប្រទេសកូរ៉េខាងត្បូង បានក្លាយជាក្រុមហ៊ុនលក់ ទូរស័ព្ទស្មាតហ្វូនដាច់ខ្លាំងជាងគេបំផុតនៅលើពិភពលោក។

ក្រុមហ៊ុនSAMSUNG បានវ៉ាដាច់ក្រុមហ៊ុន Apple បន្ទាប់ពីការលក់របស់ក្រុមហ៊ុនយក្សអាមេរិកមួយនេះ បានដាំក្បាលចុះប្រមាណ១០ភាគរយ ក្នុងត្រីមាសទី១ ឆ្នាំ២០២៤។a

យោងតាមសារព័ត៌មាន Reuters បានចុះផ្សាយថា ការនាំចេញទូរស័ព្ទស្មាតហ្វូន នៅទូទាំងពិភពលោក បានកើនឡើង៧,៨ភាគរយ ដល់ចំនួន២៨៩,៤លានគ្រឿង គិតចាប់ខែមករារហូតដល់ខែមីនា ឆ្នាំ២០២៤នេះ។

ដោយឡែក បើយោងតាមទិន្នន័យ ដែលដកស្រង់ពីក្រុមហ៊ុនស្រាវជ្រាវ IDC បានបង្ហាញថា ក្រុមហ៊ុន Samsung កាន់កាប់បានចំណែកទីផ្សារចំនួន២០,៨% តាមពីក្រោយដោយក្រុមហ៊ុន Apple ដែលកាន់កាប់បានចំណែកទីផ្សារចំនួន១៧,៣%។

ទន្ទឹមនឹងនេះដែរ ក្រុមហ៊ុនXiaomi ដែលជាក្រុមហ៊ុនផលិតទូរស័ព្ទស្មាតហ្វូន ខ្នាតយក្សមួយរបស់ប្រទេសចិន បានឈរនៅលេខរៀងទី៣ បន្ទាប់ពីក្រុមហ៊ុន Samsung និងក្រុមហ៊ុន Apple ដោយកាន់កាប់បានចំណែកទីផ្សារចំនួន១៤,១% នៅក្នុងត្រីមាសទី១កន្លងទៅ។

ជាការពិតណាស់ កំណើននៃការលក់ទូរស័ព្ទស្មាតហ្វូន របស់ក្រុមហ៊ុនយក្ស Samsung ដែលធ្វើឱ្យក្រុមហ៊ុននេះ អាចវ៉ាដាច់ការលក់របស់ក្រុមហ៊ុនApple ពុំមែនជារឿងចៃដន្យឡើយ។

ប៉ុន្តែកាលពីដើមឆ្នាំ២០២៤ ក្រុមហ៊ុនកូរ៉េខាងត្បូងមួយនេះ បានដាក់តាំងបង្ហាញលក់ស្មាតហ្វូនជំនាន់ថ្មី ចុងក្រោយបង្អស់របស់ខ្លួន គឺស៊េរីទូរស័ព្ទ Galaxy S24 គួបផ្សំជាមួយនឹងការនាំចេញសរុបជាង៦០លានគ្រឿង៕

ដោយ: គង់ លាងហួរ

អន្តរជាតិ: ប្រទេសអារ៉ាប៊ីសាអូឌីត បានរៀបចំកម្មវិធីបង្ហាញផ្លូវ ឬហៅថា Roadshow ស្តីអំពីទីក្រុង Neom របស់ខ្លួនទៅកាន់ប្រទេសចិន ស្របពេលមានការរំពឹងទុកជាបន្តបន្ទាប់ អំពីវិសាលភាពនៃគម្រោង និងបញ្ហាផ្នែកហិរញ្ញវត្ថុ។

តួយ៉ាងកាលពីពេលថ្មីៗនេះ ក្រុមមន្ត្រីអារ៉ាប៊ីសាអូឌីត ក៏បានអញ្ជើញទៅបំពេញទស្សនកិច្ច នៅក្នុងទីក្រុងប៉េកាំង ទីក្រុងសៀងហៃ និងទីក្រុងហុងកុង ក្នុងគោលបំណងទាក់ទាញអ្នកវិនិយោគចិន ឱ្យចូលមកបណ្តាក់ទុន នៅក្នុងគម្រោងទីក្រុង Neom របស់ខ្លួន។

ទោះជាយ៉ាងណាក្តី គេសង្កេតឃើញថា ពុំមានកិច្ច​ព្រម​ព្រៀង​ណាមួយ ត្រូវ​បាន​គេ​ប្រកាសឡើងនោះទេ។ ប៉ុន្តែអ្នក​ចូល​រួម​ម្នាក់​បាន​បញ្ជាក់់ប្រាប់សារពត៌មាន AFP ថា​ កម្មវិធីបង្ហាញផ្លូវ​នេះ​ បាន​ជួយ​បកស្រាយបំភ្លឺនូវអាថ៌កំបាំងជាច្រើន នៃគម្រោងទីក្រុង Neom ។

ជាមួយគ្នានេះ សារពត៌មាន Bloomberg បានរាយការណ៍ថា អារ៉ាប៊ីសាអូឌីត ក៏គ្រោងនឹងបោះផ្សាយលក់មូលបត្របំណុល សម្រាប់ផ្គត់ផ្គង់ ដល់ការអភិវឌ្ឍន៍ទីក្រុងNeomផងដែរ ដែលអាចនឹងរៃអង្គាសប្រាក់បានចំនួន១,៣ពាន់លានដុល្លារ។ នេះបើយោងតាមប្រភព ដែលសុំមិនបញ្ចេញឈ្មោះ។

សារពត៌មាន Bloomberg បានបញ្ជាក់បន្ថែមថា ភាពជាក់ស្តែងផ្នែកហិរញ្ញវត្ថុ នៃគម្រោងតម្លៃ៥០០ពាន់លានដុល្លារនេះ បានចាប់ផ្តើមបង្កឱ្យមានការភ្ញាក់ផ្អើល នៅក្នុងជួររដ្ឋាភិបាលអារ៉ាប៊ីសាអូឌីត។

កាលពីខែកុម្ភៈកន្លងទៅ កាសែតអាមេរិក Wall Street Journal ធ្លាប់បានរាយការណ៍ថា  អារ៉ាប៊ីសាអូឌីតក៏បានចាប់ផ្តើមខ្ចីប្រាក់ ដើម្បីជួយផ្តល់មូលនិធិ ដល់ការសាងសង់ទីក្រុង Neom និងគម្រោងខ្នាតធំជាច្រើនផ្សេងទៀត ដែលស្ថិតក្រោមចក្ខុវិស័យឆ្នាំ២០៣០ របស់រាជ    រដ្ឋាភិបាលអារ៉ាប៊ីសាអូឌីតផងដែរ ។

ទោះជាយ៉ាងនេះក្តី តំណាងក្រុមមន្ត្រីទទួលបន្ទុកលើការអភិវឌ្ឍនា៍ទីក្រុង Neom ពុំបានឆ្លើយតបភ្លាមៗ ចំពោះសំណើសុំការអត្ថាធិប្បាយពីសារពត៌មាន Business Insider នៅក្រៅម៉ោងធ្វើការធម្មតានោះឡើយ៕ប្រភព: Business Insider៕

ដោយៈ គង់ ហ្វីអូណា

        ភ្នំពេញៈ រដ្ឋមន្រ្តីក្រសួងការបរទេសចិន លោកវ៉ាង យីបានបញ្ជាក់ថា ភាគីចិន នឹងជំរុញបញ្ចប់ការរៀបចំផែនការមេលើគំរោងជាច្រើនក្នុងក្រមខ័ណ្ឌកិច្ចសហប្រតិបត្តិការកម្ពុជា ចិនឱ្យបានឆាប់នាពេលខាងមុខ។

ផែនការមេនោះ គឺកិច្ចសហប្រតិបត្តិការលើច្រករបៀងមច្ឆា និងអង្ករ និងកិច្ចសហប្រតិបត្តិការ ច្រករបៀងឧស្សាហកម្ម និងបច្ចេកវិទ្យា លេចចេញជារូបរាងក្នុងពេលដ៏ខ្លីខាងមុខ ព្រមទាំងជួយអភិវឌ្ឍន៍ និងធ្វើទំនើបកម្មវិស័យកសិ-ឧស្សាហកម្ម នៅកម្ពុជាផងដែរ។

លោកវ៉ាង យីបានថ្លែងបែបនេះ ក្នុងពេលសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានអនុញ្ញាតឱ្យលោ និងគណ:ប្រតិភូ ចូលជួបសម្តែងការគួរសម និងពិភាក្សាការងារ នៅវិមានសន្តិភាព។

លោកវ៉ាង យីបានមានប្រសាសន៍បញ្ជាក់ថា “ប្រទេសចិន និងកម្ពុជា គឺជាមិត្តដ៏ជិតស្និទ្ធ និងស្មោះត្រង់ និងបានសម្តែងនូវក្ដីសោមនស្សរីករាយ ដែលរដ្ឋាភិបាលទាំងពីរ បានអនុវត្តន៍នូវកិច្ចសហប្រត្តិការបានយ៉ាងល្អ”។លោកបន្ថែមថា “ក្នុងភាពជាដៃគូយុទ្ធសាស្រ្តគ្រប់ជ្រុងជ្រោយ កិច្ចសហប្រតិបត្តិការនេះ បានជំរុញចំណងមិត្តភាពចិន-កម្ពុជាកាន់តែរឹងមាំដូចដែកថែប ហើយតួនាទីរបស់កម្ពុជានៅលើឆាកអន្តរជាតិ ក៏កាន់តែមានសារៈសំខាន់”។

លោកបានបន្តដោយរំលឹកថា ដំណើរទស្សនកិច្ចផ្លូវការលើកដំបូងរបស់សម្តេចធិបតី នៅសាធារណរដ្ឋប្រជាមានិតចិន នាពេលកន្លងទៅបានឆ្លុះបញ្ចាំង និងបានរួមចំណែករឹតចំណងទំនាក់ទំនង មិត្តភា​ព និងសាមគ្គីភាព ចិន-កម្ពុជាឱ្យកាន់តែស្អិតរមួតបន្ថែមទៀត ហើយលោ​​កក៏បានគូសបញ្ជាក់ថា ទស្សនកិច្ចនាឱកាសនេះ នឹងបន្តគាំទ្រ និងជំរុញកិច្ចសហប្រតិបត្តិការ នៃការកសាងសហគមន៍វាសនារួម ចិន-កម្ពុជា ក្នុងយុគសម័យថ្មី ឱ្យលេចចេញជារូបរាង និងមានដំណើរការកាន់តែរឹងមាំ។

សម្តេចធិបតី បានសម្តែងនូវការស្វាគមន៍ ចំពោះលោករដ្ឋមន្រ្តី វ៉ាង យី និងគណៈប្រតិភូ ដែលបានអញ្ជើញមកបំពេញទស្សនកិច្ចនៅព្រះរាជាណាចក្រកម្ពុជា ព្រមទាំងបានថ្លែងអំណរគុណ និងវាយតម្លៃខ្ពស់ចំពោះកិច្ចសហប្រតិបត្តិការកម្ពុជា-ចិន ដែលបានរួមចំណែកក្នុងការជំរុញ ការអភិវឌ្ឍសង្គម-សេដ្ឋកិច្ចកម្ពុជា ឱ្យមានការរីកចម្រើន។

បន្ថែមលើនេះ សម្តេចធិបតី ក៏បានសម្តែងនូវការវាយតម្លៃខ្ពស់ចំពោះគំនិតផ្តួចផ្តើមខ្សែក្រវ៉ាត់ និងផ្លូវ (BRI) ដែលបានរួមចំណែកផ្តល់លទ្ធភាពដល់កម្ពុជាក្នុងការកសាងហេដ្ឋារចនាសម្ព័ន្ធ ដូចជាផ្លូវលឿនភ្នំពេញ-ក្រុងព្រះសីហនុ និងអាកាសយានដ្ឋានអន្តរជាតិសៀម​រាប-អង្គរ ជាដើម ដែលបានរួមចំណែកដល់កំណើនសេដ្ឋកិច្ចកម្ពុជា។

ទន្ទឹមនេះ សម្តេចធិបតីបានសម្តែងនូវក្តីរីករាយ និងវាយតម្លៃខ្ពស់អំពីវឌ្ឍនភាព នៃក្របខ័ណ្ឌកិច្ចសហប្រតិបត្តិការត្បូងពេជ្រ ដែលប្រទេសទាំងពីរ បានឯកភាពកាលពីឆ្នាំ២០២៣។ តាមរយៈការកំណត់យកឆ្នាំ២០២៤ ជាឆ្នាំនៃការផ្លាស់ប្តូររវាងប្រជាជន និងប្រជាជន សម្តេចធិបតី មានជំនឿជាក់ថារំហូរវិនិយោគ និងអ្នកទេសចរ មកពីប្រទេសចិននឹងកើនឡើងថែមទៀត ក្នុងព្រះរាជាណាចក្រកម្ពុជា។

សម្ដេចធិបតី និងលោករដ្ឋមន្រ្តីវ៉ាង យី បានបញ្ជាក់អំពីការបន្តពង្រឹងកិច្ចសហប្រតិបត្តិការ ដែលមានស្រាប់លើវិស័យការពារជាតិ និងសន្តិសុខ អប់រំ វប្បធម៌ និងវិស័យផ្សេងៗទៀត និងពង្រីកកិច្ចសហប្រតិបត្តិការថ្មីៗ។

ព្រមជាមួយគ្នានេះដែរ សម្តេចធិបតីបានស្នើឱ្យភាគីចិនពិនិត្យលទ្ធភាព ក្នុងការជំរុញកិច្ចសហប្រតិបត្តិការ ក្នុងការបង្កើតតំបន់ពាណិជ្ជកម្មសេរីកម្ពុជា-ចិន និងតំបន់សេដ្ឋកិច្ចពិសេសបន្ថែមទៀត៕

ដោយ: គង់ លាងហួរ

អន្តរជាតិ: យោងតាមទិន្នន័យថ្មីបានបង្ហាញឱ្យដឹងថា ទស្សនវិស័យសេដ្ឋកិច្ចរបស់រដ្ឋញូវយ៉ក គឺស្ថិតក្នុងសភាaពអាក្រក់បំផុត បើធៀបនឹងបណ្តារដ្ឋផ្សេងទៀតទាំងអស់ របស់សហរដ្ឋអាមេរិក ដោយសារតែការប្រមូលអត្រាពន្ធខ្ពស់ និងបរិយាកាសបទប្បញ្ញត្តិ។

យោងតាមសន្ទស្សន៍ នៃការប្រកួតប្រជែងសេដ្ឋកិច្ច នៅតាមរដ្ឋនីមួយៗ បានរកឃើញថា រដ្ឋញូវយ៉កជាប់ចំណាត់ថ្នាក់ចុងក្រោយគេបង្អស់ សម្រាប់ទស្សនវិស័យសេដ្ឋកិច្ច អស់រយៈពេល១១ឆ្នាំជាប់ៗគ្នាមកហើយ។

របាយការណ៍នេះ ត្រូវបានសហការនិពន្ធ ដោយលោកសេដ្ឋវិទូអាមេរិក  Arthur Laffer លោក Stephen Moore អ្នកជំនាញគោលនយោបាយសេដ្ឋកិច្ច និងលោកJonathan Williams ប្រធានសេដ្ឋវិទូនៃក្រុមប្រឹក្សាផ្លាស់ប្តូរនីតិបញ្ញត្តិអាមេរិក (ALEC)។

របាយការណ៍ខាងលើនេះ បានវាយតម្លៃទៅបណ្តារដ្ឋសរុបទាំង៥០របស់សហរដ្ឋអាមេរិក លើទិដ្ឋភាពនៃការប្រកួតប្រជែងផ្នែកសេដ្ឋកិច្ចនៅតាមរដ្ឋនីមួយៗ។

នៅពីក្រោយទីក្រុងញូវយ៉ក គឺរដ្ឋ Vermont ដែលបានជាប់ចំណាត់ថ្នាក់លេខ៤៩ ក្នុងការសិក្សាសម្រាប់ទស្សនវិស័យសេដ្ឋកិច្ចរបស់ខ្លួន បន្ទាប់មកចំណាត់ថ្នាក់លេខ៤៨ បានទៅលើរដ្ឋIllinois។ ចំណាត់ថ្នាក់លេខ៤៧ បានទៅលើរដ្ឋCalifornia និងចំណាត់ថ្នាក់លេខ៤៦ បានទៅលើរដ្ឋNew Jersey ។

ចំណែកឯ រដ្ឋដែលមានទស្សនវិស័យសេដ្ឋកិច្ច ល្អជាងគេបំផុតនៅ​លើកំពូល​តារាង រួមមាន រដ្ឋ Utah ជាប់​ចំណាត់ថ្នាក់លេខ​១​ តាម​ពី​ក្រោយ​ដោយ​ចំណាត់ថ្នាក់លេខ​២ ដែលបានទៅលើរដ្ឋ Idaho ចំណាត់ថ្នាក់លេខ​៣ បានទៅលើរដ្ឋអារីហ្សូណា ចំណាត់ថ្នាក់លេខ​៤ រដ្ឋ បានទៅលើរដ្ឋ North Carolina និង​រដ្ឋ Indiana ជាប់​ចំណាត់ថ្នាក់លេខ​៥។

ដើម្បីវាយតម្លៃចំណាត់ថ្នាក់ ទស្សនវិស័យសេដ្ឋកិច្ចសម្រាប់រដ្ឋនីមួយៗ ក្រុមសេដ្ឋវិទូបានពិនិត្យមើលកត្តាមួយចំនួន ដូចជា អត្រាពន្ធលើប្រាក់ចំណូលផ្ទាល់ខ្លួន និងសាជីវកម្ម បន្ទុកពន្ធលើការលក់  ប្រាក់ឈ្នួលអប្បបរមា និងសេវាបំណុលជាចំណែកមួយ នៃប្រាក់ចំណូលពន្ធ៕ប្រភព: Fox Business៕

ដោយៈ គង់ សូរិយា
ភ្នំពេញៈ លោកប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំលើកទី១ របស់ក្រុមការងារបច្ចេកទេសអន្តរក្រសួង ដើម្បីជំរុញការអភិវឌ្ឍផ្លូវដែកនៅកម្ពុជា ដោយមានការអញ្ជើញចូលរួមពីមន្រ្តីពាក់ព័ន្ឋជាច្រើន។

កិច្ចប្រជុំនេះមានគោលបំណង ពិនិត្យលើយន្តការកិច្ចសហប្រតិបត្តិការផ្លូវដែកកម្ពុជា-ចិន ព្រមទាំងកំណត់ទិសដៅការងារបន្ត ដោយផ្តោតចម្បង លើការកសាងសមត្ថភាព ការរៀបចំផែនការមេ ការសិក្សាលើគម្រោងផ្លូវដែក និងយន្តការនៃការអនុវត្តគម្រោង។

ជាលទ្ធផលនៃកិច្ចប្រជុំ លោករដ្ឋមន្រ្តីបានវាយតម្លៃខ្ពស់ និងកោតសរសើរដល់ ក្រុមការងារបច្ចេកទេសអន្តរក្រសួង និងជំរុញឱ្យមានកិច្ចសហប្រតិបត្តិការ ជាមួយដៃគូអភិវឌ្ឍន៍ ដើម្បីបន្តអភិវឌ្ឍន៍ផ្លូវដែក ក៏ដូចជា លើកកម្ពស់ការដឹកជញ្ជូនអន្តរមធ្យោបាយនៅកម្ពុជា ឱ្យកាន់តែសម្បូរបែប។

កាលពីពេលថ្មីៗនេះ ក្រុមហ៊ុនRoyal Railways បានត្រៀមដាក់ដំណើរការនូវក្បាលនិងទូរថភ្លើងថ្មី ដែលបានទិញពីប្រទេសជប៉ុន ដើម្បីដឹកជញ្ជូនអ្នកដំណើរពីរាជធានីភ្នំពេញ ទៅកាន់ក្រុងព្រះសីហនុ និងពីរាជធានីភ្នំពេញ ទៅកាន់ទីក្រុងប៉ោយប៉ែត ខេត្តបន្ទាយមានជ័យ ដែលរថភ្លើងថ្មីនេះ អាចនឹងដំណើរការនៅចុងត្រីមាសទី២ឆ្នាំនេះ។

ខ្សែរថភ្លើងថ្មីនេះ អាចរត់ក្នុងល្បឿងចន្លោះពី៨០ ទៅ១០០គីឡូម៉ែត្រក្នុងមួយម៉ោង ខណៈរថភ្លើងបច្ចុប្បន្នរត់ក្នុងល្បឿនជាមធ្យមបានចន្លោះពី៤០ ទៅ៦០គីឡូម៉ែត្រក្នុងមួយម៉ោងប៉ុណ្ណោះ៕

        ដោយៈ អេង ស្រីទៀង

ភ្នំពេញៈ ក្រុមថ្នាក់ដឹកនាំជាន់ខ្ពស់ សមាគមសហគ្រិន​សារព័ត៌មាន​សេដ្ឋកិច្ចកម្ពុជា (CEMEA) នាព្រឹកថ្ងៃទី២៣ ខែមេសា ឆ្នាំ២០២៤នេះ បានអញ្ជើញដឹកនាំក្រុមការងារ CEMEA ប្រជុំជាលើកទី៣ ដោយបានសម្រេចកិច្ចការសំខាន់ៗ ឆ្ពោះទៅរកចក្ខុ​វិ​ស័យ​​របស់ខ្លួន។

លោក យិន លាងគង់ ​ប្រធានសមាគមសហគ្រិនសារព័ត៌មានសេដ្ឋកិច្ចកម្ពុជា មានប្រសាសន៍ក្នុងកិច្ចប្រជុំថា គិតមកដល់ពេលនេះ​​​​ CEMEA ទើបតែមានអាយុមិនដល់២ខែទេ ប៉ុន្តែសមាគមមានការទទួលស្គាល់ និងចាប់អារម្មណ៍ជាខ្លាំងពីជួរអ្នកសារព័ត៌មានដូចគ្នា ពីសមាគមកាសែតនានា ពីមន្រ្តីរាជរដ្ឋាភិបាលកម្ពុជា និងពីអ្នកតាមដានបញ្ហាសង្គមជាដើម។

លោកបញ្ជាក់ថា «មូលហេតុដែលមានការចាប់អារម្មណ៍ច្រើន ដោយសារធនធានមនុស្សយើងនៅទីនេះ សុទ្ធតែចេញពីអាជីពអ្នកកាសែតឆ្នើមៗ ដែលឈរលើវិជ្ជាជីវៈ ដើម្បីផ្សព្វផ្សាយព័ត៌មានឱ្យប្លែកពីគេឯង​ ដែលទាក់ទងសំខាន់ទៅនឹងសេដ្ឋកិច្ចជាតិ​ និងអន្តរជាតិ”។លោកបន្តថា  “ក្រោយពីយើងបាន​ចុះ​បញ្ជី ​នៅ​ក្រសួង​មហាផ្ទៃ​ជាផ្លូវ​ការហើយ អ្វីដែលពួកយើងត្រូវធ្វើ គឺខិតខំប្រឹងប្រែងធ្វើជាបន្តទៀត ដើម្បីផ្សព្វផ្សាយព័ត៌មានសេដ្ឋកិច្ច និងសង្គមកម្ពុជាក្នុងរូបភាពវិជ្ជមានឲ្យកាន់តែទូលំទូលាយ និងជម្រុញទាក់ទាញការវិនិយោគពីបរទេសមកកាន់កម្ពុជា”។

តាមលទ្ធផល នៃកិច្ចប្រជុំនាព្រឹកថ្ងៃនេះ បានសម្រេចដូចខាងក្រោម
ទី១៖ លោក កៃ គឹមសុង ទទួលបន្ទុកពិនិត្យអត្ថបទសំខាន់ៗ មុនចេញផ្សាយ លើគេហទំព័ររបស់CEMEA.biz និងផ្តល់ជាគំនិតរឿងដែលបន្ថែមលើតួនាទីជាអនុប្រធាន។
ទី២ លោក អាន ចាន់ថ្លា ទទួលបន្ទុកជាអ្នកផ្តល់គំនិតរឿង, ផលិតអត្ថបទទាក់ទងនឹងសេដ្ឋកិច្ច និងធ្វើកិច្ចសម្ភាសន៍ដាក់លើគេហទំព័រ និងបណ្តាញទំនាក់ទំនងសង្គមរបស់CEMEA បន្ថែមលើតួនាទីជា អនុប្រធាន។
ទី៣ លោកស្រី ហា​ន ស៊ូជីន ទទួលបន្ទុកជា អគ្គលេខាធិការ បន្ថែមលើដំណែងជា អនុប្រធាន។
ទី៤ លោកស្រី អេង ស្រីទៀង ទទួលបន្ទុកជា អគ្គលេខាធិការរង ចូលរួមផលិតព័ត៌មាន និងធ្វើកិច្ចសម្ភាសន៍ភ្ញៀវ បន្ថែមលើដំណែងជា អនុប្រធាន។
ទី៥ សម្រេចបានផែនការផ្សេងៗ។

ថ្នាក់ដឹកនាំ នៅសមាគមសហគ្រិន​សារព័ត៌មាន​សេដ្ឋកិច្ចកម្ពុជា (CEMEA) បានអញ្ជើញមកពីស្ថាប័នជាច្រើន ដូចជា លោក យិន លាងគង់ ស្ថាបនិកនិងអគ្គនាយក​គេហទំព័រ​Propertyarea.asia & Cambodia Financialtimes.com, លោក កៃ គឹមសុង អតីតនិពន្ឋនាយក​សារព័ត៌មាន​ភ្នំពេញប៉ុស្ត៍ និងជាស្ថាបនិកសារព័ត៌មាន​ Amazadia Education,​ ​លោកលីម ឡាយហ៊ត ស្ថាបនិកសារព័ត៌មាន Asean Properties, ​លោកសយ សុភា និពន្ឋនាយកសារព័ត៌មានដើមអម្ពិល។

លោក អាន ចាន់ថ្លា និពន្ឋនាយកសារព័ត៌មាន CEN, លោក ផ្លុង វិចិត្រ ស្ថាបនិកនាយកសារព័ត៌មាន​ CCTIMES, ​លោកស្រីហាន ស៊ូជីន ស្ថាបនិកព្រឹត្តបត្រសកល លោក អ៊ុំ សារ៉ាវុធ ស្ថាបនិកសារព័ត៌មាន CFN និង លោកស្រី អេង ស្រីទៀង ជានិពន្ធនាយកនៅអង្គភាពសារព័ត៌មាន ដំរី ជាដើម។

សមាគមសហគ្រិន​សារព័ត៌មាន​សេដ្ឋកិច្ចកម្ពុជា(CEMEA) ​​​បា​ន​​ចុះ​បញ្ជី​នៅ​ក្រសួង​មហាផ្ទៃ​ជាផ្លូវ​ការ កាលពី​ថ្ងៃទី១៣ ខែមីនា ឆ្នាំ២០២៤ កន្លងទៅនេះ ក្នុងគោលបំណងដើម្បី​រួម​ចំណែកលើកកម្ពស់​ការផ្សព្វផ្សាយ​ព័ត៌មានទាក់ទងនឹងសេដ្ឋកិច្ច ប្រកបដោយ​មូលដ្ឋានវិជ្ជាជីវៈ និងក្រមសីលធ៌ម។

លោកយិន លាងគង់បានបន្តថា “អ្វីៗបានផ្លាស់ប្តូរហើយលើនិន្នាការសង្គម សេដ្ឋកិច្ច ដែលប្រព័ន្ឋផ្សព្វផ្សាយនានា គួរផ្តោតលើព័ត៌មាន​សេដ្ឋកិច្ច និងព័ត៌មានជាចំណេះដឹង ដែលមានលក្ខណៈវិជ្ជមានដល់ប្រជាពលរដ្ឋឲ្យបានដឹង”។

លោក​បន្ថែម​ថា ប៉ុន្តែ​យើងសោកស្តាយ ដែលស្ថាប័នសារព័ត៌​មាននៅកម្ពុជាតិចតួច បានផ្តោតលើផ្សព្វផ្សាយរឿងសេដ្ឋកិច្ច ព្រោះអ្នកសារព័ត៌មាន​ជំនាញខាងសេដ្ឋកិច្ច មានចំនួនតិចតួចបំផុតដោ​យសារពួកគេទទួលការបណ្តុះបណ្តាល ពីគ្រូដែលគ្មានជំនាញ​ខាង​សេដ្ឋកិច្ច​កន្លងមក។

ហេតុនេះ ទើបសមាគមនេះ ត្រូវបានបង្កើតឡើងដោយអ្នកសារព័ត៌មាន ដែលមានជំនាញ និងវិជ្ជាជីវៈច្បាស់លាស់​ខាង​សេដ្ឋកិច្ច ដើម្បីរួមចំណែកផ្សព្វផ្សាយព័ត៌មាន សេដ្ឋកិច្ច ប្រកបដោយវិជ្ជាជីវៈ គ្រប់ជ្រុងជ្រោយ និងប្រកបដោយពុទ្ឋិ ដល់​សាធារណៈជនជាតិ និងអន្តរជាតិអាចជឿ និងទុកចិត្តបាន។លោកយិន លាងគង់បន្ថែម។

លោកបាន​បញ្ជាក់​ទៀត​ថា គោលដៅរបស់សមាគម គឺចង់រួមចំណែកជាមួយរាជរដ្ឋាភិបាលកម្ពុជា ក្នុង​ការផ្សព្វផ្សាយលើកកម្ពស់​មុខមាត់របស់ជាតិ ទៅកាន់មជ្ឈដ្ឋានជាតិ និងអន្តរជាតិ ក៏ដូចជាចូលរួមជ្រោមជ្រែង​ដល់​សហគ្រិន អ្នកធុរកិច្ច និងអ្នកអភិវឌ្ឍន៍នានាឲ្យទទួលបានព័ត៌មាន ដែលមានមូលដ្ឋានច្បាស់លាស់ សម្រាប់ពួកគេ ធ្វើការ​ពិចារណា និងសម្រេចចិត្តមកវិនិយោគនៅកម្ពុជា៕