ដោយៈ យិន លាងគង់ប្រធានសមាគមសហគ្រិនសារព័ត៌មានសេដ្ឋកិច្ចកម្ពុជា(CEMEA)

        ភ្នំពេញៈ ស្នាមញញឹម សម្លេងសើចក្អាកក្អាយ ជាមួយការបាចទឹកដាក់គ្នា ជូនពរគ្នា ក្រោមស្នាមញញឹមរបស់ប្រជាពលរដ្ឋខ្មែរ បាននិងកំពុងបង្ហាញឲ្យឃើញពីគុណតម្លៃ “នៃសុខសន្តិភាព” និងការឈា​នឆ្ពោះទៅកាន់វិបុលភាពរបស់ប្រជាជាតិខ្មែរ។

“អរិយធម៌” ចាប់ផ្តើមដុះពន្លកជាថ្មីក្រោមម្លប់សន្តិភាព ដែលរកបានដោយកម្រ និងរកបានដោយការបូជាសាច់ស្រស់ ឈាមស្រស់​របស់សម្តេចតេជោហ៊ុន សែនប្រធានព្រឹទ្ឋសភា និងជាអតីតនាយករដ្ឋមន្រ្តីនៃកម្ពុជា ដែលសម្តេចបានបញ្ចប់នូវយុគដ៏ខ្មៅងងឹត ក្នុងប្រវត្តិ​សាស្រ្ត​មនុស្សជាតិ យកទឹកភ្នែក លាងនូវស្លាកស្នាមសោកនាដកម្ម និងភាព ស្លោកស្រពោនរបស់ប្រជាជាតិនេះ។

គុណតម្លៃនៃសុខសន្តិភាព
“សន្តិភាពមានតម្លៃជាងអ្វីទាំងអស់ សម្រាប់ការរីកចម្រើនរបស់ប្រជាជាតិមួយនេះ”។ ជាក់ស្តែង ប្រទេសនេះ បានលេចឡើងលើឆាកអន្តរជាតិយ៉ាងត្រដែត ក្រោមការដាក់ចេញគោលនយោបាយ សមាហរណកម្មខ្លួនឯងទៅក្នុងសហគមន៍អន្តរជាតិ និងពិភពលោក។

ជាលទ្ឋផលក្រោយការបញ្ចប់សង្រ្គាម និងនាំមកនូវសុខសន្តិភាពពេញផ្ទៃប្រទេសនៅឆ្នាំ១៩៩៨ របស់បុរសខ្លាំកម្ពុជា “គឺសម្តេចតេជោ” សេដ្ឋកិច្ចកម្ពុជាបានរីកចម្រើនយ៉ាងលឿន គួរឲ្យមោទនភាព ជាក់ស្តែងពីរទសវត្សរ៍ មុនការរាតត្បាតជំងឺកូវីដ១៩មកដល់ សេដ្ឋកិច្ចកម្ពុជា សម្រេចបានកំណើនជាមធ្យម៧ភាគរយ ដែលធ្វើឲ្យប្រទេសនេះ ឈានមកកាន់ឋានៈជាប្រទេស មានប្រាក់ចំណូលមធ្យមកម្រិតទាបនៅឆ្នាំ២០១៥ និងកំពុងឈានទៅកាន់ឋានៈថ្មី ជាប្រទេសមានប្រាក់ចំណូលខ្ពស់នៅឆ្នាំ២០៣០ និងប្រទេសអ្នកមានឬប្រទេសអភិវឌ្ឍន៍នៅឆ្នាំ២០៥០ខាងមុខ។

សម្លេងសើចក្អាកក្អាយ លើផ្ទៃមុខពោរពេញដោយម្សៅព៌ណស សម្លៀកបំពាក់ជោគដោយទឹក  បាននិងកំពុងឆ្លុះបញ្ចាំងឲ្យឃើញនូវតម្លៃនៃការរួបរួម តម្លៃនៃសេចក្តីស្រលាញ់ តម្លៃសាមគ្គីភាព ដែលមានតម្លៃមហាសាល និងមិនអាចកាត់ថ្លៃបានរបស់ប្រជាជាតិធ្លាប់កំសត់មួយនេះ។

សម្តេចតេជោហ៊ុន សែនប្រធានព្រឹទ្ឋសភា និងជាអតីតនាយករដ្ឋមន្រ្តីនៃកម្ពុជា បានមានប្រសាសន៍លើបណ្តាញ ទំនាក់ទំនងសង្គមនៅព្រឹកថ្ងៃទី១៧ មេសា ក្រោយពិធីបុណ្យចូលឆ្នាំថ្មីដ៏រីករាយនេះថា

សង្ក្រាន្តឆ្នាំ២០២៤ នៅ២៥ រាជធានី ខេត្ត ពោរពេញដោយភាពរីករាយ សប្បាយក្អាកក្អាយ របស់ប្រជាពលរដ្ឋ ដែលបានចូលរួមលេងកម្សាន្ត ក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំរោង ឆស័ក ព.ស ២៥៦៨ គ.ស ២០២៤។

សម្តេចបានបញ្ជាក់ថា “កម្ពុជាមានសន្តិភាពពេញលេញ” ទើបអាចមានព្រឹត្តការណ៍ទាំងនេះបាន ហើយលើសពីនេះ មិនថាតែប្រជាពលរដ្ឋខ្មែរទេ គឺមានភ្ញៀវបរទេសច្រើនកុះករ លេងកម្សាន្តផងដែរ ប្រកបដោយភាពសប្បាយរីករាយ និងមានទំនុកចិត្តលើសុវត្ថិភាពរបស់ខ្លួន ដោយមិនមានការភ័យខ្លាចអ្វីទាំងអស់”។

សោមន្សភាព បង្ហាញពីមូលដ្ឋាននៃកំនើនសេដ្ឋកិច្ច

បំភ្លេចចោលអតីតកាល ដែលពោរពេញដោយទុក្ខសោក និងបញ្ហានានា ប្រជាពលរដ្ឋខ្មែររាប់លាននាក់បាននាំគ្នា លេងល្បែងប្រជាប្រិយនានា ដូចជា ទាញព្រ័ត បោះអង្គុយ លាក់កន្សែង ប្រលែងកូនមាន់ កញ្ញាធ្លាក់ទឹក វាយក្អមយករង្វាន់ ឡើងសរសរខ្លាញ់យករង្វាន់ជាដើម។

ជាមួយការដើរកំសាន្តពីតំបន់មួយ ទៅតំបន់មួយ រមណីយដ្ឋានមួយ ទៅកាន់រមណីយដ្ឋានមួយ នៅតា​មបណ្តារាជធានី ខេត្តទាំង២៥ ព្រមទាំងការមកដល់ នៃភ្ញៀវទេសចរ​ណ៍ចម្រុះជាតិសាសន៍ សាច់ប្រាក់ជារាប់លានដុល្លារ បានចាក់ចូលក្នុងចរន្តសេដ្ឋកិច្ចជាតិ ដែលញាំងឲ្យសេដ្ឋកិច្ចមូលដ្ឋានងើបឡើងវិញ បន្ទាប់ពីវិបត្តិកូវីដ១៩ និងវិបត្តិសង្រ្គាមរុស្ស៊ី អ៊ុយក្រែន និងបញ្ហាតានតឹងផ្នែកភូមិសាស្រ្តនយោ​បាយនានា។

ជាក់ស្តែងធនាគារអភិវឌ្ឍន៍អាស៊ី ធនាគារពិភពលោក បានព្យា​ករណ៍ថា សេដ្ឋកិច្ចកម្ពុជានឹងរីកចម្រើន ក្នុងរង្វង់៥,៨ភាគរយនៅឆ្នាំ២០២៤នេះ ស្របពេលរដ្ឋាភិបាល បានបង្កើនការព្យាករណ៍ថា សេដ្ឋកិច្ចកម្ពុជា នឹងរីកចម្រើនក្នុងរង្វង់៦,៦ភាគរយផងដែរ។

ដំណើរឆ្ពោះទៅកាន់អរិយធ៌ម
សម្តេចមហាបវរធិបតីហ៊ុន ម៉ាណែតនាយករដ្ឋមន្រ្តីនៃកម្ពុជាបានថ្លែងអំណរគុណដល់អាជ្ញាធរ កងកំលាំងសមត្ថកិច្ចគ្រប់លំដាប់ថ្នាក់ ប្រជាការពារ សន្តិសុខ និងប្រជាពលរដ្ឋកម្ពុជា ដែលបានចូលរួមថែររក្សាសណ្តាប់ធ្នាប់ ដើម្បីញាំងបរិយាកាសពិធីបុណ្យចូលឆ្នាំប្រពៃ​ណីជាតិខ្មែរ ពោរពេញដោយភាពសប្បាយរីករាយ។

អ្នកបន្តវេនកម្ពុជា គឺសម្តេចធិបតីហ៊ុន ម៉ាណែត បាននិងកំពុងធ្វើដំណើរលើកម្រាលព្រំមាស ដែលបានឆ្លងផុតពីឆ្នាំសូន្យអស់រយៈពេល៤៥ឆ្នាំមកនេះ។

ការបញ្ចប់នូវស្នូរកំភ្លើងនៅឆ្នាំ១៩៩៨ ជាពេលវេលាមាស ដែលអាចឲ្យប្រជាជាតិនេះ អាចកសាងសេដ្ឋកិច្ចគ្រួសារ រដ្ឋាភិបាលអាចដាក់ចេញគោ​លនយោបាយថ្មីៗ ដើម្បីជម្រុញកំនើនសេដ្ឋកិច្ចជាតិ ឆ្ពោះទៅកាន់ឋានៈថ្មី ដែលមានឧត្តមភាពលើឆាកអន្តរជាតិ។ ប្រជាជាតិ ដែលធ្លាប់តែរងទុក្ខសោក ក្នុងយុគដ៏ខ្មៅងងឹត បានញញឹមជាថ្មី “ជាភាសាញញឹមជាមួយកែវភ្នែក” ដែលស្នាមញញឹមនេះខានបានឃើញជាយូរមកហើយ។

ពិធីបុណ្យចូលឆ្នាំប្រពៃណីជាតិខ្មែរ បានបញ្ចប់ហើយ តែស្នាមញញឹម អនុស្សាវរីយ៍ ភាពត្រកុំត្រកាលក្នុងលំហរចិត្ត បានស្ថិតនៅជាមួយប្រជាជាតិខ្មែរ ដែលពួកគេតែងតែលួចញញឹម នៅពេលនឹកឃើញអនុស្សាវរីយ៍ល្អៗ និងអន្ទះសាររង់ចាំពិធីបុណ្យចូលឆ្នាំថ្មីប្រពៃ​ណីជាតិមកដល់នៅឆ្នាំខាងមុខទៀត។

ក្នុងដំណើរជាប្រវត្តិសាស្រ្ត លើវិថីឆ្ពោះទៅកាន់អរិយធ៌មជាថ្មី ទាម​ទារឲ្យប្រជាជាតិនេះ កសាងនូវមូលដ្ឋានគ្រឹះសេដ្ឋកិច្ចឲ្យបានកាន់តែរ៉ឹងមាំ មានឆន្ទះស្នេហាជាតិកាន់តែមោះមុត និងត្រូវមានសីលធ៌ម សុភាវធ៌មជាងមុន គាំទ្រគោលនយោបាយរបស់រដ្ឋាភិបាល ដែលបាននិងកំពុងខិតខំប្រឹងប្រែង ដើម្បីរក្សាឲ្យបាននូវមូលដ្ឋានគ្រឹះសុខសន្តិភាព និងកសាងសេដ្ឋកិច្ចជាតិឲ្យមានភាពរីកចម្រើន កាន់តែខ្លាំងថែមទៀត។

ការបញ្ចប់ពិធីបុណ្យរយៈពេល៤ថ្ងៃនេះ គឺជាពេលត្រូវចាប់ផ្តើមការងារ អាជីវកម្មមានសភាពរសរវើកជាងមុន ជាមួយទស្សនវិស័យកម្ពុជា ឆ្ពោះទៅកាន់ប្រទេសអភិវឌ្ឍន៍នៅឆ្នាំ២០៥០។

ហេតុនេះប្រជាជាតិនេះ មិនត្រូវសួរថា “តើប្រទេសជាតិនេះ បានផ្តល់អ្វីឲ្យអ្នកនោះទេ ប៉ុន្តែត្រួវសួរខ្លួនឯងថា តើអ្នកបានធ្វើអ្វីខ្លះ ដើម្បីប្រទេសជាតិនេះជំនួសវិញ”។
រីករាយឆ្នាំថ្មី អរគុណតម្លៃនៃសុខសន្តិភាព!

ដោយ: គង់ លាងហួរ

សេអ៊ូល: ការបោះឆ្នោតសភា នៅប្រទេសកូរ៉េខាងត្បូង ដែលរៀបចំឡើងកាលពីថ្ងៃទី១០ ខែមេសា កំពុងឈានទៅបញ្ចប់ការរាប់សន្លឹកឆ្នោតជាផ្លូវការហើយ ខណៈគណបក្សប្រឆាំងទទួលបានជ័យជម្នះភ្លូកទឹកភ្លូកដី។

ជ័យជំនះរបស់គណបក្សប្រឆាំង អាចជះផលប៉ះពាល់ទៅលើលោកប្រធានាធិបតី Yoon Suk Yeol និងគណបក្សអភិរក្សនិយមរបស់លោកក្នុងកៅអីសភាផងដែរ ។ នេះបើយោងតាមការចុះផ្សាយដោយសារពត៌មាន Yonhap នៅថ្ងៃទី១១ ខែមេសា។

យោងតាមការបញ្ជាក់ពីគណៈកម្មការជាតិ រៀបចំការបោះឆ្នោតនៅប្រទេសកូរ៉េខាងត្បូងបានឲ្យដឹងថា គិតត្រឹមម៉ោង១១ព្រឹកថ្ងៃព្រហស្បតិ៍ (ម៉ោងនៅកូរ៉េខាងត្បូង) សន្លឹកឆ្នោតរាប់បាន៩៩ភាគរយទៅហើយ ដោយក្នុងនោះគណបក្សប្រជាធិបតេយ្យ (DP) ទទួលបានអាសនៈចំនួន១៧០ លើអាសនៈសភាសរុបចំនួន៣០០ ខណៈគណបក្សអំណាចប្រជាជន (PPP) របស់លោក Yoon ទទួលបានត្រឹមតែ១០៨អាសនៈប៉ុណ្ណោះ។លោកលី ជេម្យុង (Lee Jae-myung) ប្រធានគណបក្សប្រជាធិបតេយ្យ (DP)  ដែលបានដឹកនាំយុទ្ធនាការ ឃោសនាបោះឆ្នោតតតាំងនឹងលោក Yoon បានមានប្រសាសន៍ឱ្យដឹងថា ឥឡូវនេះ អាទិភាពកំពូលរបស់យើង គឺស្ដារសេដ្ឋកិច្ចឲ្យស្ទុះងើបឡើងវិញ។

ក្រុមអ្នកវិភាគបានវាយតម្លៃថា លទ្ធផលបោះឆ្នោតសភានាពេលនេះ គឺជាការធ្វើប្រជាមតិមួយ ចំពោះការកាន់អំណាចរបស់លោកប្រធានាធិបតី Yoon Suk Yoel ស្របពេលដែលប្រជាប្រិយភាពរបស់លោកកំពុងធ្លាក់ចុះយ៉ាងគំហុក ដោយសារថ្លៃចំណាយនៃការរស់នៅរបស់ប្រជាពលរដ្ឋកើនឡើងកាន់តែខ្ពស់ ក៏ដូចជាជម្លោះនយោបាយជាដើម។

តើលោក Lee Jae-myung ជានរណា និងមានជីវប្រវត្តិបែបណាខ្លះ?
លោក Lee Jae-myung កើតនៅថ្ងៃទី ២២ ខែធ្នូ ឆ្នាំ១៩៦៤ ក្នុង​ទីក្រុង Andong។ លោកកើតចេញពីគ្រួសារ​ក្រីក្រ​មួយ និងជា​កូន​ទី​៥ ក្នុង​ចំណោម​បងប្អូនបង្កើតសរុបចំនួន៧នាក់។ លោក លី គឺជាអ្នកនយោបាយកូរ៉េខាងត្បូង ដែលបម្រើការជាសមាជិករដ្ឋសភា និងជាមេដឹកនាំគណបក្សប្រជាធិបតេយ្យកូរ៉េ។

លោក លី បានធំធាត់ឡើងនៅក្នុងភាពក្រីក្រ ហើយលោកមិនសូវយកចិត្តទុកដាក់ ចំពោះសកម្មភាពសង្គម ដោយសារការខ្វះខាតថវិការបស់គ្រួសារ  ហើយលោកពឹងផ្អែកលើសប្បុរសធម៌ របស់គណៈសាស្ត្រាចារ្យសាលា ដើម្បីចូលរួមដំណើរកំសាន្តនានា។ លោកលី បាន​លើក​ឡើង​ថា​ “ការ​ស្ទូច​ត្រី​នៅតាម​ដង​ព្រែក​ជាមួ​យ​មិត្តភ័ក្តិ​​ គឺជា​កន្លែង​កម្សាន្ត​មួយ​ដែល​លោកចូលចិត្ត”។

នៅពេលដែលលោក លី បានបញ្ចប់ការសិក្សាថ្នាក់បឋមសិក្សា ប្រព័ន្ធសាលាសាធារណៈរបស់កូរ៉េខាងត្បូង មិនបានផ្ដល់ការអប់រំដោយឥតគិតថ្លៃ សម្រាប់ថ្នាក់អនុវិទ្យាល័យ និងវិទ្យាល័យនោះទេ។ ឪពុក​របស់​លោក បាន​ចំណាយ​ប្រាក់​ភាគច្រើន​របស់​គ្រួសារ​ ទៅ​លើ​ការ​លេង​ល្បែង ហើយ​គ្រួសារ​របស់លោក បាន​ចាកចេញ​ពីស្រុកកំណើតក្នុងទីក្រុង Andong ដើម្បី​រក​ការងារ​ធ្វើ។

គ្រួសាររបស់លោក បានផ្លាស់ទីលំនៅទៅកាន់ទីក្រុង Seongnam ដែលជាទីក្រុងឧស្សាហកម្ម ត្រូវបានសាងសង់ឡើងក្នុងអំឡុងរដ្ឋបាល របស់លោកអតីតប្រធានាធិបតី Park Chung Hee ដើម្បីប្រមូលផ្តុំឧស្សាហកម្ម នៅខាងក្រៅទីក្រុងសេអ៊ូល។ ប្រជាជនដែលរស់នៅទីក្រុង Seongnam ភាគច្រើនមានជីវភាពក្រីក្រ ដែលត្រូវបានរដ្ឋាភិបាលបង្ខំឱ្យផ្លាស់ទីលំនៅទៅទីនោះ។

មិនខុសពីកុមារដទៃទៀតមកពីគ្រួសារក្រីក្រដែរ លោកលីបានធ្វើការនៅក្នុងរោងចក្រផលិតខ្សែកមួយ ជំនួសឱ្យការចូលរៀននៅសាលាមធ្យមសិក្សា។  បន្ទាប់​ពី​រោងចក្រ​ផលិត​ខ្សែ “ក”​បាន​ក្ស័យធន លោកបាន​ផ្លាស់​ទៅ​ធ្វើការ នៅក្រុមហ៊ុន​មួយ​ឈ្មោះ Dongma Rubber។ ប៉ុន្តែនៅពេលនោះ លោក មិនទាន់មានវ័យគ្រប់គ្រាន់ដើម្បីធ្វើការស្របច្បាប់ នៅក្នុងប្រទេសកូរ៉េខាងត្បូងនោះទេ ដូច្នេះហើយ លោកបានធ្វើការក្រោមឈ្មោះក្លែងក្លាយផ្សេងៗ។

លោកលី បានរងរបួសម្រាមដៃ នៅពេលកំពុងធ្វើការឱ្យក្រុមហ៊ុនDongma Rubber។ បន្ទាប់ពីកើតមានឧបទ្ទវហេតុនេះ លោកបានសម្រេចចាកចេញពីក្រុមហ៊ុន Dongma Rubber រួចហើយចូលទៅធ្វើការឱ្យក្រុមហ៊ុន Daeyang Industry វិញម្តង ។

នៅកន្លែងធ្វើការទី២ ថ្មីនេះ លោក លី បានបាក់សន្លាក់កដៃ តែមិន​ត្រូវ​បាន​ព្យាបាល​នោះឡើយ ដែលនាំឱ្យលោកត្រូវពិការ​ដៃ​។ ក្រោយមក លោកត្រូវបានលើកលែងពីកាតព្វកិច្ចចូលបម្រើយោធា។

នៅពេលកំពុងធ្វើការនៅក្រុមហ៊ុន Daeyang Industry លោក លី បានឃើញសិស្សមួយក្រុមស្លៀកពាក់ ឯកសណ្ឋានសាលា ដោយធ្វើឱ្យលោក មានបំណងប្រាថ្នាចង់ចូលរៀននៅសាកលវិទ្យាល័យ។  ដូច្នេះ  លោកបានប្រលងចូលវិទ្យាល័យ ហើយទទួលបានសញ្ញាបត្រមធ្យមសិក្សាទុតិយភូមិនៅឆ្នាំ១៩៧៨។ រយៈពេល២ឆ្នាំក្រោយមក គឺនៅក្នុងឆ្នាំ១៩៨០ លោកបានប្រឡងចូលសាកលវិទ្យាល័យឈុង អាង(Chung-Ang) ដោយទទួលបានសញ្ញាប័ត្រផ្នែកច្បាប់នៅឆ្នាំ១៩៨៦។

នៅឆ្នាំ១៩៩១ លោកលី បានរៀបការជាមួយនឹងអ្នកស្រី Kim Hye-kyung ដោយទទួលបានចំណងដៃកូនចំនួនពីរនាក់។ នៅក្នុង​វ័យ៥៩ឆ្នាំ លោក លី គឺជា​អតីត​មេធាវីសិទ្ធិមនុស្ស និងការងារ ហើយលោកក៏ធ្លាប់កាន់តំណែង ជា​អភិបាលខេត្តផងដែរ។ លោកធ្លាប់​ឈរជា​បេក្ខភាព ប្រធានាធិបតី​ម្តង​នៅ​ឆ្នាំ​២០១៧ ប៉ុន្តែ លោកមិនទទួលបានជោគជ័យឡើយ។

លោក​ លី បាន​ប្រើ​​ប្រាស់អតីត​កាល ជា​កម្មករ​រោងចក្រ​ជា​អត្តសញ្ញាណនយោបាយ​​ ដោយ​បាន​ប្តេជ្ញាបង្កើត​ឡើង​វិញនូវប្រាក់​ចំណូ​ល​​សកលអប្បបរមា និង​ផ្តល់ឯកសណ្ឋាន​​ ដល់​សិស្ស​ដោយ​ឥតគិត​ថ្លៃ។

លោក លី បានឈរជាបេក្ខភាពរបស់ គណបក្សប្រជាធិបតេយ្យនៅក្នុងការបោះឆ្នោត ប្រធានាធិបតីកូរ៉េខាងត្បូងម្តងទៀត នៅឆ្នាំ២០២២ ដោយទទួលបានការតែងតាំងពីគណបក្ស ប៉ុន្តែលោក លី បានចាញ់លោក Yoon Suk-yeol នៅក្នុងការបោះឆ្នោតនោះ ដែលមានលទ្ធផលសន្លឹកឆ្នោតប្រកៀកប្រកិតគ្នាយ៉ាងខ្លាំង។

លោក លី បាន​ចូល​ប្រឡូក​ក្នុង​ឆាក​នយោបាយ នៅក្នុង​ឆ្នាំ​២០០៥​។ ក្រោយមក លោកត្រូវបានជ្រើសរើស ជាចៅហ្វាយទីក្រុងសុងណាម(Seongnam) ក្នុងឆ្នាំ២០១០ ហើយបានជាប់ឆ្នោតជាចៅហ្វាយក្រុងមួយនេះម្តងទៀត នៅក្នុងឆ្នាំ២០១៤ រហូតដល់ឆ្នាំ២០១៨។

នៅឆ្នាំ២០១៨ លោកបានលាលែងពីតំណែង ជាចៅហ្វាយក្រុងSeongnam ដើម្បីឈរឈ្មោះជាអភិបាលខេត្ត Gyeonggi វិញម្តង ដោយទទួលបានលទ្ធផលជោគជ័យ។ ក្រោយ​មក លោក លី ត្រូវ​បាន​ជាប់​ឆ្នោត​ជា​សមាជិក​រដ្ឋសភា ហើយ​បាន​ក្លាយ​ជា​ប្រធាន​គណបក្ស​ប្រជាធិបតេយ្យកូរ៉េ។

កាលពីថ្ងៃទី២ ខែមករា ឆ្នាំ ២០២៤ លោក លី ត្រូវបានគេចាក់ចំកញ្ចឹងករ នៅក្នុងកំឡុងពេលលោក ទៅបំពេញទស្សនកិច្ចនៅទីក្រុងប៊ូសាន ដែលនាំឱ្យលោកត្រូវបានបញ្ជូន ទៅសង្គ្រាះបន្ទាន់នៅមន្ទីរពេទ្យ។

ទាក់ទិននឹងរឿងនេះ លោកប្រធានាធិបតី Yoon Suk-yoel បានថ្កោលទោសការវាយប្រហារ ទៅលើលោក លី ថា ជា “ភេរវកម្ម” ដោយលោក Yoon បានចាត់ទុកអំពើនេះជា “សត្រូវនៃលទ្ធិប្រជាធិបតេយ្យសេរី” ហើយលោកក៏ធ្លាប់បានជូនពរឱ្យលោក Lee ឆាប់ជាសះស្បើយផងដែរ៕ ប្រភព: Wiki Pedia &AFP៕

        ដោយៈ សហសេវិក

        ភ្នំពេញៈ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបង្ហាញក្តី​សោម​នស្ស​រីករាយ និងថ្លែងអំណរគុណជ្រាលជ្រៅដល់អាជ្ញាធរ កងកម្លាំងសមត្ថកិច្ច ព្រមទាំងប្រជាពលរដ្ឋ ក៏ដូចជាអ្នកទេសចរបរទេស ដែលបានរួមគ្នាញ៉ាំងឱ្យពិធីបុណ្យ ចូល​ឆ្នាំថ្មីប្រពៃណីជាតិខ្មែរ ប្រព្រឹត្តទៅដោយក្តីសប្បាយរីករាយ និងរក្សាបានសន្តិសុខសណ្តាប់ធ្នាប់ល្អប្រសើរ។

សម្តេចធិបតី ហ៊ុន ម៉ាណែត បានគូសរំលេចសារលើបណ្តាញសង្គមនាព្រឹកថ្ងៃទី១៧ ខែមេសា ឆ្នាំ២០២៤ថា ក្នុងនាមរាជរដ្ឋាភិបាល និងក្នុងនាមខ្លួនខ្ញុំផ្ទាល់ ខ្ញុំសូម​ថ្លែង​អំណរគុណយ៉ាងជ្រាលជ្រៅចំពោះក្រសួង-ស្ថាប័ន អាជ្ញាធរដែនដីគ្រប់លំដាប់ថ្នាក់ គ្រប់រាជធានី-ខេត្ត​ ក៏ដូចជានៅក្រៅប្រទេសផងដែរ​ កងយោធពលខេមរភូមិន្ទ កងនគល​ជាតិ កងរាជអាវុធហត្ថ ប្រជាការពារ អ្នកអនាម័យ​ និងកម្លាំងស្ម័គ្រចិត្តគ្រប់យន្តការ​ទាំង​អស់ ដែលបានចូលរួមសហការបំពេញភារកិច្ចរៀបចំតុបតែង​ និងប្រចាំការការពារ​សន្តិសុខ​សណ្តាប់ធ្នាប់​ ធានាបាននូវសុវត្ថិភាព​ បង្កលក្ខណៈដល់ការកំសាន្តសប្បាយ របស់បងប្អូន​ អ៊ំពូមីង​ តាយាយ ព្រមទាំងបានញ៊ាំងឱ្យការប្រារព្ធពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំរោង ឆស័ក ព.ស ២៥៦៨ នៅទូទាំងប្រទេស បានប្រព្រឹត្ត ទៅដោយភាពសប្បាយ​រីក​រាយ សោភ័ណភាព សេចក្តីថ្លៃថ្នូរ សុខសុវត្ថិភាព របៀបរៀបរយល្អ ប្រកបដោយមោទន​ភាព​ជាតិ»។

ពិធីបុណ្យចូលឆ្នាំថ្មីប្រពៃណីជាតិ រយៈ៤ថ្ងៃកន្លងទៅនេះ បាននាំមកនូវភាពសប្បាយរីករាយ​ជា​ខ្លាំង សម្រាប់ប្រជាពលរដ្ឋ តាមរយៈការរៀបចំព្រឹត្តិការណ៍នានា របស់អាជ្ញាធរនៅទូទាំង​ប្រទេស។

សម្តេចធិបតីនាយករដ្ឋមន្ត្រី បានគូសរំលេចថា “ភាពសប្បាយរីករាយនេះកើតមានទៅបាន អាស្រ័យលើកត្តាចម្បងបំផុត​ គឺម្លប់នៃសុខសន្តិភាព ដែលបានផ្តល់នូវឱកាសឱ្យប្រជាជន​ខ្មែរគ្រប់រូប​ អាចរួមរស់ប្រកបដោយកុសលធម៌ និងសាមគ្គីធម៌ ក្នុងធ្លុងជាមហាគ្រួសារខ្មែរតែ​មួយ នៅលើទឹកដីមាតុភូមិអង្គរដ៏បវរជាទីស្នេហា និងក្នុងសេចក្តីសុខក្សេមក្សាន្ត កិត្តិយស និងសេចក្តីថ្លៃថ្នូរជាដរាបតរៀងទៅ”។

សម្តេចធិបតី ក៏បានប្រគេនពរដល់ព្រះតេជព្រះគុណ គ្រប់ព្រះអង្គ និងជូនពរ​ប្រជា​ពលរដ្ឋខ្មែរ ជួបប្រទះតែសុខភាពល្អ សុភមង្គល និងទទួលបានសិរីសួស្តី ជោគជ័យ​គ្រប់ប្រការ ព្រមជាមួយពុទ្ធពរទាំងឡាយបួនប្រការ គឺអាយុ វណ្ណៈ សុខៈ ពលៈ កុំបីឃ្លៀង​ឃ្លាតឡើយ៕

ដោយ: គង់ លាងហួរ

អន្តរជាតិ: ប្រទេសអង់គ្លេសបានត្រៀមខ្លួនរួចជាស្រេច ដើម្បីនាំមុខការស្ទុះងើបឡើងវិញ នៃទីផ្សារអចលនទ្រព្យនៅតំបន់អឺរ៉ុប ក្នុងឆ្នាំ២០២៤នេះ ខណៈវិនិយោគិនអន្តរជាតិ បានប្រមូលដើមទុនចូលមកកាន់ទីផ្សារក្នុងតំបន់នេះឡើងវិញ។

យោងតាមការ​ស្រាវជ្រាវ​ថ្មីមួយ ​ពី​ក្រុមហ៊ុន​អចលនទ្រព្យ​អន្តរជាតិ Savills បង្ហាញថា “ការរំពឹងទុកនៃការ​បញ្ចុះអត្រា​ការ​ប្រាក់​ និង​ការ​ស្ទុះឡើង​វិញ​នៃសេដ្ឋកិច្ច​ នឹង​ជំរុញ​លំហូរ​អ្នក​វិនិយោគ​បរទេស​ ដែល​មានបំណងទាញផលប្រយោជន៍​ពី “កម្រិត​តម្លៃ​ដែល​គួរ​ឱ្យ​ទាក់​ទាញ​កាន់​តែ​ខ្លាំង”។

យោងតាមការស្រាវជ្រាវបានឱ្យដឹងថា “ក្នុងឆ្នាំ២០២៤នេះ សកម្មភាពវិនិយោគអចលនទ្រព្យ របស់វិនិយោគិនអាមេរិក អ៊ីស្រាអែល ជប៉ុន និងតៃវ៉ាន់ នៅតំបន់អឺរ៉ុប នឹងស្ទុះងើបឡើងវិញ២០ភាគរយ ខណៈដើមទុនភាគច្រើន បានហូរចូលទៅកាន់ប្រទេសអង់គ្លេស អាល្លឺម៉ង់ អេស្ប៉ាញ និងហូឡង់”។

លោក Rasheed Hassan ប្រធានផ្នែកវិនិយោគឆ្លងព្រំដែនសកលរបស់ក្រុមហ៊ុនSavills បានថ្លែងប្រាប់ស្ថានីយទូរទស្សន៍ CNBC ថា “ប្រាកដណាស់ វាហាក់បីដូចជាយើងបានឆ្លងផុតពីស្ថានភាពអាក្រក់បំផុត ហើយយើងកំពុងស្ទុះងើបឡើងវិញសន្សឹមៗ” ។

យោងតាមការស្ទង់មតិ 2024 European Investor Intentions របស់ក្រុមហ៊ុនប្រឹក្សាអចលនទ្រព្យ CBRE បានបង្ហាញថា ប្រទេសអង់គ្លេស បានជាប់ចំណាត់ថ្នាក់ជាគោលដៅកំពូល ប្រចាំតំបន់អឺរ៉ុប សម្រាប់ការវិនិយោគឆ្លងព្រំដែន តាមពីក្រោយដោយប្រទេសអាល្លឺម៉ង់ ប៉ូឡូញ អេស្ប៉ាញ និងហូឡង់។

ការស្ទង់មតិដដែលបានរកឃើញទៀតថា ទីក្រុងឡុងដ៍ត្រូវបានគេដាក់ឈ្មោះថា “ជាទីក្រុងដ៏ទាក់ទាញបំផុត” តាមពីក្រោយដោយទីក្រុងប៉ារីស ទីក្រុងម៉ាឌ្រីដ ទីក្រុងអាំស្ទែដាំ និងទីក្រុងប៊ែរឡាំង។

លោក Chris Brett នាយកគ្រប់គ្រងផ្នែកទីផ្សារមូលធនអឺរ៉ុបរបស់ក្រុមហ៊ុន CBRE បានអះអាងថា “ទីក្រុងឡុងដ៍គឺជាទីក្រុងមួយក្នុងចំណោមទីក្រុងមួយចំនួន ដែលបង្ហាញភាពធន់របស់ខ្លួន ក្នុងការប្រឈមមុខ ជាមួយបញ្ហាផ្នែកសេដ្ឋកិច្ច ហើយនៅតែជាចំណុចស្នូលដ៏សំខាន់សម្រាប់មូលធនសកល”។

យោងតាមការព្យាករណ៍ ពីក្រុមហ៊ុនប្រឹក្សាអចលនទ្រព្យ Knight Frank បានឱ្យដឹងថា ក្នុងឆ្នាំនេះ ប្រទេសអង់គ្លេសនឹងទាក់ទាញបានចំនួនមួយភាគបី ឬប្រមាណ១៣ពាន់លានដុល្លារ នៃការវិនិយោគទៅក្រៅប្រទេស សរុបរបស់សហរដ្ឋអាមេរិក។ ចំណែកអាល្លឺម៉ង់ អេស្ប៉ាញ និងហូឡង់ នឹងក្លាយជាអ្នកទទួលផលធំបំផុត ពីការ វិនិយោគរបស់សហរដ្ឋអាមេរិក បន្ទាប់ពីអង់គ្លេស៕ប្រភព: CNBC៕

ដោយ: គង់ លាងហួរ

អន្តរជាតិ: ប្រធានសេដ្ឋវិទូនៃការិយាល័យស្រាវជ្រាវម៉ាក្រូសេដ្ឋកិច្ចអាស៊ាន+៣ (AMRO) លោក Khor Hoe Ee បានព្យាករណ៍ថា ម៉ាឡេស៊ី នឹងក្លាយជាប្រទេស ដែលមានប្រាក់ចំណូលកម្រិតខ្ពស់ ឬប្រទេសអ្នកមាននៅឆ្នាំ២០៣០ខាងមុខ ដោយសារតែការកើនឡើងនៃលំហូរវិនិយោគផ្ទាល់ពីបរទេស(FDI)។

លោក Khor បានថ្លែងក្នុង​សន្និសីទ​សារព័ត៌មាន​ស្តីពី ការ​បើកសម្ពោធរបាយការណ៍ ​ទស្សនវិស័យ​សេដ្ឋកិច្ច​តំបន់​អាស៊ាន​+៣ ឆ្នាំ២០២៤ ថា “យើង​មាន​សុទិដ្ឋិនិយម​ថា ដរាបណា​ប្រទេសម៉ាឡេស៊ីអាចរក្សា​បានវិន័យ​សារពើពន្ធ និង​រូបិយវត្ថុ នោះលំហូរ​នៃ​ការ​វិនិយោ​គ​ថ្មី​ពី​បរទេស​ នឹង​អាច​ជួយ​ជំរុញកំណើនសេដ្ឋកិច្ច និង​ធ្វើឱ្យម៉ាឡេស៊ីក្លាយជាប្រទេសដែលមាន​ប្រាក់ចំណូល​កម្រិតខ្ពស់​។

លោកបានបន្ថែមថា “ម៉ាឡេស៊ីបានដាក់ចេញគោលដៅបញ្ចប់ឋានៈរបស់ខ្លួន ជាប្រទេសដែលមានប្រាក់ចំណូលកម្រិតមធ្យម ដើម្បីឆ្ពោះទៅក្លាយជាប្រទេស ដែលមានប្រាក់ចំណូលកម្រិតខ្ពស់ នៅចុងទសវត្សរ៍នេះ ហើយគ្មានហេតុផលណាមួយ ដែលម៉ាឡេស៊ីមិនអាចធ្វើបាននោះទេ”។យោងតាមទិន្នន័យបានបង្ហាញថា “លំហូរFDIចូលមកកាន់ប្រទេ​​សម៉ាឡេស៊ី មានទំហំទឹកប្រាក់ខ្ពស់ រហូតដល់ចំនួន២០៨,៦ពាន់លានរីងហ្គិត ក្នុងឆ្នាំ២០២១ តាមពីក្រោយដោយលំហូរFDI ចំនួន១៦៣,៣ពាន់លានរីងហ្គីត ក្នុងឆ្នាំ២០២២ និងលំហូរFDI ចំនួន១២៥,៧ពាន់លានរីងហ្គីត ក្នុងឆ្នាំ២០២៣”។

នៅក្នុងឆ្នាំ២០២៣ ផលទុនជាតិសរុប(GDP) សម្រាប់ប្រជាជនម៉ាឡេស៊ីម្នាក់ៗ មានទំហំទឹកប្រាក់ចំនួន១១.១៤១ដុល្លារអាមេរិក ប៉ុន្តែដើម្បីក្លាយជាប្រទេស មានប្រាក់ចំណូលកម្រិតខ្ពស់ ប្រជាជនម៉ាឡេស៊ីម្នាក់ៗ ត្រូវមានចំណូល១៣.៨៤៥ដុល្លារអាមេរិកក្នុងមួយឆ្នាំ។ នេះបើយោងតាមការកំណត់របស់ធនាគារពិភពលោក។

ប៉ុន្តែទោះជាយ៉ាងណាក្តី លោក Allen Ng សេដ្ឋវិទូមួយរូបទៀតនៅស្ថាប័ន AMRO បានលើកឡើងថា “ អ្វីដែលសំខាន់ជាងនេះទៀត ដែលយើងចង់គូសបញ្ជាក់ នៅក្នុងរបាយការណ៍របស់យើងថា ប្រទេ​សម៉ាឡេស៊ី ព្រមទាំងបណ្តាប្រទេស ក្នុងតំបន់ជាច្រើនទៀត នៅតែបន្តប្រឈមមុខនឹងបញ្ហារចនាសម្ព័ន្ធ”។

លោក Ng បានបន្ថែមថា “ម៉ាឡេស៊ីមិនអាចគេចផុតពីបញ្ហាប្រឈមរយៈពេលវែងទូទៅ ចំពោះទស្សនវិស័យសេដ្ឋកិច្ច ដោយលោកកត់សម្គាល់ថា ម៉ាឡេស៊ីចាំបាច់ត្រូវគ្រប់គ្រងប្រជាសាស្រ្ត ដែលមានវ័យចំណាស់ កំណើនផលិតភាព និងកម្លាំងពលកម្មជំនាញរបស់ខ្លួន”៕ ប្រភព: The Edge Malaysia៕

        ដោយៈ គង់ សូរិយា

        ព្រះសីហនុៈ គម្រោងវិនិយោគចំនួន៦ទៀត បានហូរចូលខេត្តព្រះសីហនុ ដែលមានទាំងគម្រោងជាប់ពាក់ព័ន្ធ នឹងអគារជាប់គាំង និងមិនពាក់ព័ន្ធ ត្រួវបានទទួលបានការលើកទឹកចិត្តពិសេស ពីរដ្ឋាភិបាល។

យោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហរិញ្ញវត្ថុបានឲ្យដឹងកាលពីសប្តាហ៍មុនថា ​គម្រោងទាំង៦នេះ មានទុនវិនិយោគប្រមាណ៧៣លានដុល្លារ។​

ម្រោងវិនិយោគនៅព្រះសីហនុ ដែលមានការទឹកចិត្តពិសេសពីរដ្ឋាភិបាលនោះ មានគម្រោងបង្កើតរោងចក្រកែច្នៃផ្លែដូង គម្រោងអភិវឌ្ឍន៍លំនៅដ្ឋាន គម្រោងសណ្ឋាគារ និងកាស៊ីណូ គម្រោងសួនកម្សា​ន្តលើទឹកសមុទ្រ គម្រោងអគារស្នាក់នៅរួម និងគម្រោងវិនិយោគពេទ្យធ្មេញ។

សេចក្តីប្រកាសព័ត៌មានរបស់ក្រសួងសេដ្ឋកិច្ច ស្តីពីកិច្ចប្រជុំក្រុមការងារដើម្បីពិភាក្សា លើការស្នើការលើកទឹកចិត្ត ការអនុគ្រោះ និង ការសម្រួលនីតិវិធី របស់គម្រោងវិនិយោគ/ធុរកិច្ច ក្រោមការដឹកនាំរបស់លោក ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងជាប្រធានក្រុមការងារជំរុញការវិនិយោគ ក្នុងខេត្តព្រះសីហនុ នាថ្ងៃទី១០មេសា បានបញ្ជាក់ថា “គម្រោងទាំងនេះ ជាគម្រោងចម្រុះ ដែលមានម្ចាស់ជាជនជាតិខ្មែរ-បរទេស និងមានទំហំតូច មធ្យម និងធំ”។
គិតត្រឹមពេលនេះ មានគម្រោងវិនិយោគ១៣ហើយ ដែលទទួលបានការលើកទឹកពិសេសពីរដ្ឋាភិបាល។ ក្នុងនោះរដ្ឋាភិបាលបានសម្រេ​ចជាគោលការណ៍ ក្នុងការផ្តល់អត្ថប្រយោជន៍ពិសេស ដល់គម្រោ​ងវិនិយោគ/ធុរកិច្ចចំនួន៧ ដែលជាគម្រោងអគារសហកម្មសិទ្ធិ (អគារស្នាក់នៅរួម) សណ្ឋាគារ និងមជ្ឈមណ្ឌលទេសចរណ៍ នៅខែកុម្ភៈ ឆ្នាំ២០២៤។ នេះបើយោងតាមក្រសួងសេដ្ឋកិច្ច។

ជាមួយគ្នានេះ ក្រុមការងារជំរុញការវិនិយោគ ក្នុងខេត្តព្រះសីហនុ ក៏បានទទួល និងពិនិត្យពាក្យស្នើនានា ចំនួន១៦គម្រោង ព្រមទាំងកំពុងអនុវត្តវិធានការផ្សេងទៀត ដែលបានដាក់ចេញក្នុង “កម្មវិធីពិសេសជំរុញការវិនិយោគ ក្នុងខេត្តព្រះសីហនុ ឆ្នាំ២០២៤”។

ក្រុមការងារជំរុញការវិនិយោគ ក្នុងខេត្តព្រះសីហនុ កំពុងសិក្សាកំណត់តំបន់វិនិយោគ ឬតំបន់អភិវឌ្ឍន៍ និងការរៀបចំសេចក្តីព្រាងអនុក្រឹត្យស្តីពី ទិដ្ឋាការពិសេសរយៈពេលវែង សម្រាប់ការទិញ ឬការជួលអចលនវត្ថុ ដែលមានតម្លៃចាប់ពី១០ម៉ឺនដុល្លារឡើង នៅក្នុងខេត្តព្រះសីហនុ ដើម្បីចូលរួមចំណែកជំរុញសកម្មភាពវិនិយោគ និងការអភិវឌ្ឍ។ បើតាមសេចក្តីប្រកាសព័ត៌មានដដែល។​

កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ ២០២៤” ត្រូវបានប្រមុខរដ្ឋាភិបាលសម្តេចធិបតីហ៊ុន ម៉ាណែត នាយករដ្ឋមន្ត្តីនៃកម្ពុជា ប្រកាសឱ្យអនុវត្តនៅថ្ងៃ ទី៣១មករា​ ឆ្នាំ២០២៤។​

តាមរយៈកម្មវិធីនេះ​ រដ្ឋាភិបាលនឹងសម្រួលដល់វិនិយោគិន ដូចជា៖​ ការសម្រួលនីតិវិធី និងការបំពេញបែបបទ ពាក់ព័ន្ធនឹងការវិនិយោគ និងការធ្វើធុរកិច្ច ការសម្រួលក្នុងការផ្តល់លិខិតអនុញ្ញាត និងទិដ្ឋាការ ការផ្តល់ការលើកទឹក​ចិត្តពន្ធ​អាករ ការលើកលែងកម្រៃសេវាសាធារណៈ ឬការអនុគ្រោះផ្សេងៗ ពាក់ព័ន្ធនឹងការសាងសង់ ការរៀប​ចំ​តំបន់អភិវឌ្ឍន៍តាមភូមិ-សង្កាត់ និងផ្លូវសំខាន់ៗ ការវិនិយោគលើគម្រោងហេដ្ឋារចនាសម្ព័ន្ធ ការអភិវឌ្ឍ​​តំបន់ឧស្សាហកម្ម និងការអភិវឌ្ឍដីដែលមានសក្តានុពល សម្រាប់តំបន់ប្រមូលផ្តុំ​ឧស្សាហ​កម្ម ឬសហគ្រាស និង/ឬតំបន់ទេសចរណ៍។

គោលដៅដែលរដ្ឋាភិបាលអនុវត្តន៍ នូវកម្មវិធីពិសេស​ជំរុញការវិនិយោគ ក្នុងខេត្តព្រះសីហនុឆ្នាំ២០២៤នេះ  គឺជំរុញសកម្មភាពធុរកិច្ច និងការវិនិយោគ សំដៅប្រែក្លាយខេត្តព្រះសីហនុ ឱ្យទៅជា​ខេត្ត​លើកស្ទួយកំណើនសេដ្ឋកិច្ចកម្ពុជា ក្នុងស្ថានភាពសេដ្ឋកិច្ច​ពិភព​លោក និង​តំបន់ ​កំពុងបន្តប្រឈមនឹងភាពមិនប្រាកដប្រជាខ្ពស់។

គិតត្រឹមត្រីមាសទី១ ឆ្នាំ២០២៤ កម្ពុជាបានអនុម័តគម្រោងវិនិយោគចំនួន១០៦ ដែលមានទុនប្រមាណ២២០០លានដុល្លារ។ គម្រោងទាំងនេះ អាចបង្កើតការងារឱ្យពលរដ្ឋបានជាង១០៧ពាន់កន្លែង៕

        ដោយៈ គង់ សូរិយា

        ភ្នំពេញៈ ក្រុមហ៊ុនVinci Construction Grands Projets (VCGP) បានសន្យាផ្តល់ថវិកា១០៣,៣លានដុល្លារ ដល់រដ្ឋាករទឹកស្វយ័តក្រុងភ្នំពេញ (PPWSA)  ដើម្បីសាងសង់រោងចក្រផលិតទឹកស្អាតបាក់ខែងជំហានទី៣ នាខែឧសភាខាងមុខនេះ។

តាមផែនការរោងចក្រនេះ នឹងត្រូវបើកដ្ឋានសាងសង់​នៅអំឡុងខែឧសភា ស្ថិតក្រោមគម្រោងសហហិរញ្ញប្បទាន ប្រមាណ២៥០លានដុល្លារ រវាងរដ្ឋាភិបាលកម្ពុជា និងរដ្ឋាភិបាលបារាំង។

កិច្ចសន្យារវាងVCGP និងPPWSA នៃគម្រោង “បាក់ខែងដំណា​ក់កាលទី៣” ត្រូវបានធ្វើឡើង នៅថ្ងៃទី១០មេសា ឆ្នាំ២០២៤ ក្នុងគោលដៅពង្រីក សមត្ថភាពផ្គត់ផ្គង់ទឹកស្អាត ឱ្យបានដល់៦០ម៉ឺនគូបក្នុងមួយថ្ងៃ។ បើតាមសេចក្តីប្រកាសព័ត៌មាន របស់ស្ថានទូតបារាំងប្រចាំកម្ពុជា​ កិច្ចព្រមព្រៀងនៃការសន្យាផ្តល់កម្ចី១០៣,៣ ដល់​រដ្ឋាករទឹកស្វយ័តក្រុងភ្នំពេញនេះ គឺជាផ្នែកមួយនៃគម្រោងដែលទទួលបានហិរញ្ញប្បទាន ពីទីភ្នាក់ងារបារាំងសម្រាប់អភិវឌ្ឍន៍ (AFD)។

សេចក្តីប្រកាសបានបញ្ជាក់ថា “ការសាងសង់គ្រោងនឹងបញ្ចប់នៅឆ្នាំ២០២៧ ដោយនឹងចូលរួមលើកកម្ពស់លទ្ធភាព ទទួលបានទឹកប្រកបដោយគុណភាពពិសេស សម្រាប់ប្រជាពលរដ្ឋទាំងអស់ដែលរស់នៅក្នុងរាជធានីភ្នំពេញ”។

ស្ថានទូតបារាំងបានបញ្ជាក់ទៀតថា បន្ទាប់ពីសាងសង់រួច ស្ថានីយ៍ប្រព្រឹត្តកម្មទឹកស្អាត នឹងក្លាយជាស្ថានីយ៍ធំជាងគេបំផុត នៅអាស៊ីអាគ្នេយ៍ ដែលអាចផ្គតផ្គង់ទឹកស្អាត ដល់បពលរដ្ឋចំនួន១៤៧ពាន់គ្រួសារ​បន្ថែមទៀត។​

គម្រោងនេះ បានបង្ហាញពីទំនុកចិត្តរបស់កម្ពុជា លើជំនាញរបស់ក្រុមហ៊ុនសំណង់បារាំង សម្រាប់ការវិនិយោគរបស់ខ្លួនប្រកប​ដោយយុទ្ធសាស្រ្ត ដែលមានតម្លៃបន្ថែមខ្ពស់។

ស្ថានទូតបារាំងបានបញ្ជាក់ថា “នេះជាគម្រោងដែលឆ្លុះបញ្ចាំងឱ្យឃើញនូវយុទ្ធសាស្រ្ត “Global Gateway” ហើយក៏បង្ហាញឱ្យឃើញផងដែរ នូវការប្តេជ្ញាចិត្តរបស់ក្រុមអឺរ៉ុបនៅកម្ពុជា”។

បច្ចុប្បន្ន​រោងចក្រប្រព្រឹត្តិកម្មទឹកបាក់ខែង ដំណាក់កាលទី១ និងទី២ គឺមានសមត្ថភាពផលិតទឹកស្អាត បាន៣៩ម៉ឺនម៉ែត្រគូបក្នុងមួយថ្ងៃ ហើយផ្គត់ផ្គង់បាន១៩ម៉ឺន​ម៉ែត្រគូ។ ការចាប់ផ្តើមដំណាក់កាលទី៣ បង្ហាញពីវឌ្ឍនភាពដ៏សំខាន់ នៅក្នុងហេដ្ឋារចនាសម្ព័ន្ធទឹក ប្រកប​ដោយនិរន្តរភាព ក្នុងការដោះស្រាយតម្រូវការទឹកស្អាត ដែលកំពុងកើនឡើងនៅក្នុងរាជធានី និងតំបន់ជុំវិញ៕

ដោយ: គង់ លាងហួរ
អន្តរជាតិ: នាយករដ្ឋមន្ត្រីជប៉ុនលោក Fumio Kishida ទាក់ទាញបានទុនវិនិយោគចំនួន២,៩ពាន់លានដុល្លារពីក្រុមហ៊ុនបច្ចេកវិទ្យាយក្ស Microsoft ក្នុងដំណើរទស្សនកិច្ចរបស់លោកទៅកាន់សហរដ្ឋអាមេរិក។

ក្នុងអំឡុងកិច្ចប្រជុំជាមួយលោក Kishida ប្រធានក្រុមហ៊ុន Microsoft លោក Brad Smith បានបង្ហាញពីផែនការវិនិយោគដ៏ធំបំផុតមិនធ្លាប់មាននៅក្នុងប្រទេសជប៉ុន ដែលរួមមានវិធានការ ដើម្បីធ្វើឱ្យប្រសើរឡើងនូវមជ្ឈមណ្ឌលទិន្នន័យរបស់ខ្លួន។

លោកKishida បានថ្លែងប្រាប់លោក Smith ថា “វាមានសារៈសំខាន់ណាស់សម្រាប់ក្រុមហ៊ុនជប៉ុនក្នុងការធ្វើការជាមួយបណ្តាក្រុមហ៊ុនសកលដូចជា Microsoft ដោយលោកបង្ហាញក្តីសង្ឃឹមថា ក្រុមហ៊ុនអាមេរិកនឹងបន្តជួយជំរុញការអភិវឌ្ឍន៍បច្ចេកវិទ្យានៅក្នុងប្រទេសជប៉ុន”។យោងតាមប្រភពក្រុមហ៊ុនបានបង្ហើបឱ្យដឹងថា ក្រុមហ៊ុន Microsoft គ្រោងនឹងបើកមូលដ្ឋានស្រាវជ្រាវនៅទីក្រុងតូក្យូ ក្នុងគោលបំណងលើកកម្ពស់ការស្រាវជ្រាវលើ វិស័យបច្ចេកវិទ្យា AI និងមនុស្សយន្ត។

នៅថ្ងៃអង្គារ សប្តាហ៍នេះ លោក Kishida បានបញ្ជាក់ប្រាប់ថ្នាក់ដឹកនាំធុរកិច្ចនៅក្នុងព្រឹត្តិការណ៍មួយ ដែលរៀបចំដោយសភាពាណិជ្ជកម្មសហរដ្ឋអាមេរិក ថា ទីក្រុងតូក្យូ និងទីក្រុងវ៉ាស៊ីនតោនអាចដឹកនាំសហគមន៍អន្តរជាតិឆ្ពោះទៅរកស្ថិរភាព និងវិបុលភាព។

លោក Kishida បានបន្ថែមថា ប្រទេសជប៉ុននឹងចាប់ដៃជាមួយសហរដ្ឋអាមេរិក ដើម្បីពន្លឿនកំណើនសេដ្ឋកិច្ចពិភពលោកក្នុងបច្ចេកវិទ្យាសំខាន់ៗ រួមទាំងឧបករណ៍អេឡិចត្រូនិក បច្ចេកវិទ្យា AI កុំព្យូទ័រកង់ទិច និងថាមពលស្អាត ដោយពង្រីកការវិនិយោគទៅវិញទៅមក៕ប្រភព:Kyodo៕