ដោយ: គង់ លាងហួរ
បាងកក: រដ្ឋាភិបាលថៃ បានបញ្ជាឱ្យផ្លាស់ប្តូរទីតាំងកំពង់ផែបាងកកដែលមានទំហំជាង៥ហិកតា នៅជាប់នឹងទន្លេចៅប្រាយ៉ា ស្ថិតក្នុងសង្កាត់ Klong Toey ក្នុងគោលដៅប្រែក្លាយតំបន់នេះសម្រាប់បម្រើដល់សាធារណៈជនទូទៅ។

នាយករដ្ឋមន្ត្រីថៃលោកសេដ្ឋា ថាវីសុីន បានលើកឡើងថាការផ្លាស់ប្តូរទីតាំងកំពង់ផែនេះ នឹងផ្តល់អត្ថប្រយោជន៍ដល់ប្រជាជន ដែលរស់នៅក្នុងតំបន់ Klong Toey នៃទីក្រុងបាងកកក៏ដូចជាប្រជាជនរស់នៅក្នុងរាជធានីទាំងមូលផងដែរ។

ផែនការនេះត្រូវបានស្នើឡើងដោយលោកសេដ្ឋា ខណៈរដ្ឋាភិបាលថៃកំពុងខិតខំព្យាយាមដោះស្រាយបញ្ហាធូលី ដីការបំពុលខ្យល់ ដែលបង្កឡើងដោយរថយន្តដឹកទំនិញចេញ-ចូលកំពង់ផែបាងកកជារៀងរាល់ថ្ងៃ។ក្រោយពីទទួលបានសំណើខាងលើនេះរួចមក គណៈរដ្ឋមន្ត្រីថៃ បានបញ្ជាដល់ក្រសួងដឹកជញ្ជូន ឱ្យធ្វើការជាមួយអាជ្ញាធរកំពង់ផែបាងកក និងភ្នាក់ងារផ្សេងទៀត ដើម្បីពន្លឿនការសិក្សាផ្លាស់ប្តូរទីតាំង។ ជាមួយគ្នានេះ ឃ្លាំង និងកន្លែងស្តុកប្រេងក៏ត្រូវប្តូរទីតាំងផងដែរ។

តំបន់នេះ នឹងត្រូវបានប្រើប្រាស់ជាចម្បងសម្រាប់បម្រើផលប្រយោជន៍សាធារណៈរបស់ប្រជាជនទីក្រុងបាងកក ហើយលទ្ធផលសិក្សាត្រូវតែរាយការណ៍ជូននាយករដ្ឋមន្រ្តីឱ្យបានលឿនតាមដែលអាចធ្វើទៅបាន។

កាលពីខែកុម្ភៈកន្លងទៅ លោក Chadchart Sittipunt អភិបាលក្រុងបាងកក ក៏ធ្លាប់បានស្នើ និងពិភាក្សាជុំវិញបញ្ហានេះ ជាមួយលោកសេដ្ឋា ផងដែរ ខណៈដែលនៅពេលនោះ លោកទាំង២បានជួបគ្នានៅក្នុងសាលាក្រុង។

នៅក្នុងជំនួបនោះ រដ្ឋបាលទីក្រុងបាងកក បានស្នើផ្លាស់ប្តូរទីតាំងកំពង់ផែបាងកកទៅកាន់កំពង់ផែសមុទ្រទឹកជ្រៅ Laem Chabang ស្ថិតក្នុងខេត្ត Chon Buri ដោយសង្ឃឹមថាការធ្វើបែបនេះនឹងជួយកាត់បន្ថយការបំពុលបរិយាកាស និងអភិវឌ្ឍន៍តំបន់នេះទៅជាទីធ្លាបៃតងសម្រាប់ប្រជាជនទីក្រុង៕ប្រភព:Bangkok Post៕

ដោយ: គង់ លាងហួរ
អន្តរជាតិ: បណ្តាក្រុមហ៊ុនជប៉ុន និងក្រុមហ៊ុនអឺរ៉ុបជាច្រើន កំពុងពិចារណា ឬក្រុមហ៊ុនខ្លះទៀត បានផ្លាស់ប្តូរទីស្នាក់ការកណ្តាល ឬ ប្រតិបត្តិការរបស់ពួកគេចេញពីប្រទេសសិង្ហបុរីរួចទៅហើយ ដោយលើកឡើងពីការព្រួយបារម្ភចំពោះថ្លៃចំណាយខ្ពស់។

នៅក្នុងរយៈពេលប៉ុន្មានឆ្នាំចុងក្រោយនេះ ក្រុមហ៊ុនសាជីវកម្មពហុជាតិជាច្រើន បានជ្រើសរើសទីតាំងបង្កើតការិយាល័យកណ្តាលរបស់ខ្លួន នៅតាមបណ្តាប្រទេសផ្សេងៗ ក្រៅពីសិង្ហបុរី ដើម្បីកាត់បន្ថយការចំណាយ និងស្វែងរកឱកាសថ្មីៗកាន់តែច្រើន។

បណ្តាក្រុមហ៊ុនជប៉ុនភាគច្រើនមើលឃើញ ថា សិង្ហបុរីនៅតែជាជម្រើសកំពូល ដែលពួកគេមានបំណងចូលទៅបង្កើតទីតាំងការិយាល័យកណ្តាលនៅទីនោះ។ ប៉ុន្តែ ទោះជាយ៉ាងណាក្តី កាលពីខែកុម្ភៈកន្លងទៅ ក្រុមហ៊ុនផលិតទឹកថ្នាំ របស់ជប៉ុន Sakata Inx បានងាកទៅបង្កើតទីស្នាក់ការកណ្តាលរបស់ខ្លួននៅប្រទេសម៉ាឡេស៊ី។

អ្នកនាំពាក្យមួយរូបនៃក្រុមហ៊ុន Sakata Inx បានលើកឡើងថា ការបង្កើតការិយាល័យកណ្តាលរបស់ខ្លួន នៅប្រទេសម៉ាឡេសុី នឹងជួយបង្កើនប្រាក់ចំណេញប្រតិបត្តិការរបស់ក្រុមហ៊ុនខ្លួន ចាប់ពី៦,៦ ទៅដល់១៣,១លានដុល្លារ នៅក្នុងផែនការអាជីវកម្មរយៈពេលមធ្យមរបស់ខ្លួន រហូតដល់ឆ្នាំ២០២៦។ មូលហេតុ ដែលក្រុមហ៊ុនជ្រើសរើសម៉ាឡេស៊ី គឺដោយសារតែក្រុមហ៊ុននេះសម្លឹងឃើញអត្ថប្រយោជន៍ផ្នែកពន្ធ។

តួយ៉ាង រដ្ឋាភិបាលម៉ាឡេសុីបានស្នើកញ្ចប់ថវិកាជាតិ សម្រាប់ឆ្នាំ២០២៤ ដែលរួមបញ្ចូលទាំងការលើកទឹកចិត្តផ្នែកពន្ធ រួមទាំងការលើកទឹកចិត្តពន្ធលើប្រាក់ចំណូលចន្លោះពី៥ ទៅ១០ភាគរយរយៈពេល១០ឆ្នាំ។

ក្រៅពីម៉ាឡេស៊ី ថៃគឺជាប្រទេសនាំមុខគេមួយទៀត ក្នុងការទាក់ទាញក្រុមហ៊ុនបរទេសធំៗផងដែរ។ ជាក់ស្តែង កាលពីឆ្នាំ២០២០ ក្រុមហ៊ុន Nissin Foods Holdings បានផ្លាស់ប្តូរទីស្នាក់ការកណ្តាល ពីសិង្ហបុរីទៅកាន់ប្រទេសថៃ ខណៈរដ្ឋាភិបាលថៃកំពុងលើកទឹកចិត្តផ្នែកពន្ធ ដើម្បីទាក់ទាញក្រុមហ៊ុនពហុជាតិ ឱ្យមកបណ្តាក់ទុនក្នុងប្រទេសរបស់ខ្លួន។

លោក Keisuke Asakura នាយករងផ្នែកគ្រប់គ្រងរបស់អង្គការពាណិជ្ជកម្មខាងក្រៅនៃប្រទេសជប៉ុន បានលើកឡើងថា “ខណៈថ្លៃជួលការិយាល័យ និងថ្លៃចំណាយផ្សេងទៀតនៅសិង្ហបុរីកំពុងកើនឡើង ដូច្នេះ ក្រុមហ៊ុនពហុជាតិកាន់តែច្រើន នឹងផ្លាស់ប្តូរអគារការិយាល័យទៅកាន់ប្រទេសថៃបន្ថែមទៀត ដើម្បីបំពេញប្រតិបត្តិការមួយផ្នែកនៃក្រុមហ៊ុនរបស់ពួកគេ”។

ទោះបីជាយ៉ាងណាក្តី ពុំមែនមានតែក្រុមហ៊ុនជប៉ុនទេ ដែលបង្ហាញការព្រួយបារម្ភ សូម្បីតែក្រុមហ៊ុនអឺរ៉ុបក៏កំពុងពិចារណាផ្លាស់ប្តូរការិយាល័យកណ្តាលចេញពីសិង្ហបុរីផងដែរ។

ជាក់ស្តែង យោងតាមការស្ទង់មតិកាលពីឆ្នាំ២០២៣ ដោយសភាពាណិជ្ជកម្មអឺរ៉ុបប្រចាំនៅសិង្ហបុរី រកឃើញថា “ចំនួន៦៩ភាគរយនៃក្រុមហ៊ុនអឺរ៉ុបទាំងអស់ដែលចូលរួមការស្ទង់មតិ បានឆ្លើយថា ពួកគេមានបំណងផ្លាស់ប្តូរបុគ្គលិកចេញពីសិង្ហបុរី ដោយសារតែការកើនឡើងនៃថ្លៃចំណាយប្រតិបត្តិការ៕ប្រភព:Nikkie Asia៕

ដោយ: គង់ លាងហួរ
អន្តរជាតិ: ក្រុមហ៊ុនប្រឹក្សាអចលនទ្រព្យដ៏ល្បីល្បាញមួយបានលើកឡើងថា វិស័យអចលនទ្រព្យពាណិជ្ជកម្មរបស់ប្រទេសចិនកំពុងបង្ហាញសញ្ញាវិជ្ជមានមួយចំនួនឡើងវិញ ក្នុងរយៈពេលប៉ុន្មានខែដំបូងដើមឆ្នាំ២០២៤នេះ។

ក្រុមហ៊ុនប្រឹក្សាអចលនទ្រព្យ JLL បានសរសេររៀបរាប់នៅក្នុងរបាយការណ៍មួយថា ថ្លៃជួលទីតាំងលក់រាយសំខាន់ៗនៅទីក្រុងប៉េកាំងបានកើនឡើងក្នុងល្បឿនដ៏លឿនបំផុតមិនធ្លាប់មាន គិតចាប់តាំងពីឆ្នាំ២០១៩។

យោងតាមប្រភពពីរបាយការណ៍ខាងលើបានឱ្យដឹងបន្តទៀតថា ថ្លៃជួលនៅទីនោះបានកើនឡើង១,៣ភាគរយ ក្នុងអំឡុងរយៈពេល៣ខែដំបូងដើមឆ្នាំនេះ បើធៀបនឹងត្រីមាសទី៤ ឆ្នាំ២០២៣។

យោងតាមក្រុមហ៊ុន JLL បានឱ្យដឹងថា តម្រូវការបើកហាងពីសំណាក់ម៉ាកយីហោម្ហូបអាហារ និងភេសជ្ជៈថ្មីៗ រួមទាំងម៉ូដសម្លៀកបំពាក់បរទេស និងក្រុមហ៊ុនរថយន្តអគ្គិសនី បានជំរុញឱ្យការជួលទីតាំងលក់រាយនៅតាមផ្សារទំនើបនានាមានការកើនឡើង។

ក្រុមហ៊ុនប្រឹក្សាអចលនទ្រព្យខាងលើរំពឹងថា តម្រូវការទាំងអស់នេះនឹងបន្តកើនឡើងពេញមួយឆ្នាំ២០២៤ ដែលនឹងជួយជំរុញឱ្យការជួល និងថ្លៃជួលស្ទុះងើបឡើងវិញ។

ទីផ្សារអចលនទ្រព្យបែបពាណិជ្ជកម្ម ដែលរួមមានដូចជា អគារការិយាល័យ និងផ្សារទំនើបជាដើម បង្កើតបានជាចំណែកមួយប៉ុណ្ណោះនៃទីផ្សារអចលនទ្រព្យទាំងមូលរបស់ប្រទេសចិន។

យោងតាមក្រុមហ៊ុនផ្តល់ទិន្នន័យហិរញ្ញវត្ថុ Wind Information បានឱ្យដឹងថា បើគិតពីទំហំផ្ទៃក្រឡា ការលក់ការិយាល័យ និងអចលនទ្រព្យផ្សេងទៀត ដែលប្រើប្រាស់ក្នុងគោលបំណងពាណិជ្ជកម្ម បានកើនឡើង១៥% និង១៧% រៀងៗគ្នា នៅក្នុងខែមករា និងខែកុម្ភៈ បើធៀបនឹងឆ្នាំមុន៕ប្រភព:CNBC៕

ដោយ: គង់ លាងហួរ
អន្តរជាតិ: តំបន់អាស៊ីមានគោលដៅទេសចរណ៍ជាច្រើនរាប់មិនអស់ ដែលសាកសមសម្រាប់វិស្សមកាលរដូវក្តៅ ជាមួយនឹងវប្បធម៌ដ៏សម្បូរបែប ទេសភាពដ៏ស្រស់ស្អាត និងកន្លែងប្រវត្តិសាស្ត្រដ៏គួរឱ្យចាប់អារម្មណ៍។

ខាងក្រោមនេះគឺជាគោលដៅទេសចរណ៍ចំនួន៥នៅតំបន់អាសុី ដែលភ្ញៀវទេសចរណ៍អាចចំណាយសមរម្យបំផុតសម្រាប់មកលំហែ នាវិស្សមកាលរដូវក្តៅ ដែលចងក្រងឡើងដោយកាសែតបរទេស The Daily Star ដែលមានមូលដ្ឋាននៅប្រទេសបង់ក្លាដែស។

ទី១. ទីក្រុងCebu ប្រទេសហ្វីលីពីន
នៅក្នុងនាមជាគោលដៅទេសចរណ៍វិស្សមកាលរដូវក្តៅ ដែលចំណាយសមរម្យបំផុត ទីក្រុង Cebu គឺជាគោលដៅទេសចរណ៍ដ៏ពេញនិយមបំផុតរបស់ប្រទេសហ្វីលីពីន។ ឆ្នេរខ្សាច់ពណ៌សដ៏បរិសុទ្ធ ទឹកជ្រោះធ្លាក់ដ៏ស្រស់ស្អាត សមុទ្រដ៏ស្រស់បំព្រង សួនឧទ្យានផ្សងព្រេង និងសកម្មភាពខាងក្រៅជាច្រើនកំពុងរង់ចាំអ្នកធ្វើដំណើរទៅកាន់ទីក្រុងមួយនេះ។

ភ្ញៀវទេសចរណ៍អាចទៅទស្សនាទីក្រុង Cebu ចាប់ពី៣ទៅ៧ថ្ងៃ ដោយចំណាយប្រាក់អស់តិចបំផុត។ សម្រាប់វិស្សមកាលរយៈពេលមួយសប្តាហ៍ ភ្ញៀវទេសចរណ៍អាចចំណាយប្រាក់ជាមធ្យម៤៤៦ដុល្លារ។

ទី២. ទីក្រុង Goa ប្រទេសឥណ្ឌា
ភ្ញៀវទេសចរណ៍ ដែលមានបំណងសម្រាកលំហែនៅពេលវិស្សមកាល គួរតែទៅទស្សនាទីក្រុង Goa ដែលជារដ្ឋតូចបំផុតនៅក្នុងប្រទេសឥណ្ឌា ប៉ុន្តែទីក្រុងនេះគឺជាគោលដៅទេសចរណ៍ដ៏ពេញនិយម។ នៅទីនោះ ភ្ញៀវទេសចរណ៍អាចសម្រាកលំហែកាយនៅតាមខ្ទមមាត់សមុទ្រ ហើយថែមទាំងអាចរីករាយជាមួយនឹងការសម្រាកលំហែជីវិតផងដែរ។ សម្រាប់វិស្សមកាលរយៈពេលមួយសប្តាហ៍ ភ្ញៀវទេសចរណ៍អាចចំណាយប្រាក់ជាមធ្យម២២៩ដុល្លារ។

ទី៣. ខេត្តសៀមរាប ប្រទេសកម្ពុជា
ខេត្តសៀមរាបគឺជាត្បូងមួយគ្រាប់ ដែលមានប្រាសាទបុរាណដ៏អច្ឆរិយៈ ហាងកាហ្វេ និងដងស្ទឹងដ៏ស្ងប់ស្ងាត់។ ក្រៅពីប្រាសាទអង្គរវត្ត ភ្ញៀវទេសចរណ៍ក៏អាចទៅទស្សនាភូមិបណ្តែតទឹកទន្លេសាប និងផ្សាររាត្រីនៅខេត្តសៀមរាប ដើម្បីទទួលបាននូវបទពិសោធន៍ ដែលរួមបញ្ចូលគ្នានូវភាពទំនើបទាន់សម័យជាមួយនឹងភាពបុរាណ។

ភ្ញៀវទេសចរណ៍នៅខេត្តសៀមរាបអាចចំណាយប្រាក់ត្រឹមតែ៧៣ដុល្លារប៉ុណ្ណោះ ក្នុងមួយសប្តាហ៍សម្រាប់ការដឹកជញ្ជូន និងថ្លៃម្ហូបអាហារ។ លើសពីនេះ ភ្ញៀវទេសចរណ៍អាចចំណាយត្រឹមតែ៩១ដុល្លារប៉ុណ្ណោះសម្រាប់ការទស្សនា និងការកម្សាន្ត។

ទី៤. ទីក្រុង Nha Trang ប្រទេសវៀតណាម
ទីក្រុង Nha Trang គឺគោលដៅដ៏ល្អឥតខ្ចោះសម្រាប់ភ្ញៀវទេសចរណ៍ ដែលមានបំណងមកលេងកំសាន្តតាមឆ្នេរសមុទ្រ។ ទីក្រុង Nha Trang មានឆ្នេរសមុទ្រដ៏ស្រស់ស្អាត ថ្មប៉ប្រះទឹក ផ្កាថ្មដែលមិនចេះរីងស្ងួត និងបណ្តុំកោះជាច្រើន គឺជាគោលដៅល្អសម្រាប់ការធ្វើដំណើរកម្សាន្តនារដូវក្តៅ ដែលរកអ្វីមកប្រៀបផ្ទឹមពុំបាន។ ភ្ញៀវទេសចរណ៍អាចសម្រាកវិស្សមកាលរយៈពេលមួយសប្តាហ៍នៅទីក្រុង Nha Trang ដោយចំណាយប្រាក់អស់ប្រហែល២៧៤ដុល្លារ។

ទី៥. ទីក្រុង Dushanbe ប្រទេសតាជីគីស្ថាន
លោកអ្នក អាច ពិចារណា ទៅ ទស្សនា រដ្ឋធានី Dushanbe របស់ ប្រទេសតាជីគីស្ថាន សម្រាប់ វិស្សមកាល នារដូវក្តៅ។ ទីក្រុងនេះបានបង្កប់នូវស្នាដៃសិល្បៈសម័យសូវៀតដ៏ចម្លែក និងអគារដ៏ប្រណីតនៅតាមដងផ្លូវ ដែលមានដាំដើមដើមឈើជាជួរៗ។ ភ្ញៀវទេសចរណ៍អាចសម្រាកវិស្សមកាលរយៈពេលពេញ១សប្តាហ៍នៅទីក្រុង Dushanbe ដោយចំណាយប្រាក់ប្រហែល៣៤៦ដុល្លារ៕ប្រភព:The Nation៕

ដោយ: គង់ លាងហួរ

អន្តរជាតិ: ក្រុមហ៊ុនថាមពលខ្នាតយក្ស Chevron របស់សហរដ្ឋអាមេរិក បានប្រកាសដកខ្លួនចេញ ពីអាជីវកម្មថាមពលនៅតំបន់រុករកឧស្ម័នធម្មជាតិ Yadana ក្នុងប្រទេសមីយ៉ាន់ម៉ា ដោយបានផ្ទេរភាគហ៊ុនទៅឱ្យរដ្ឋាភិបាលមីយ៉ាន់ម៉ា និងក្រុមហ៊ុនថៃកាន់កាប់។

ការប្រកាសដកខ្លួននេះបានធ្វើឡើង បន្ទាប់ពីក្រុមហ៊ុនខ្នាតយក្សមួយនេះ បានថ្កោលទោសទៅលើអំពើហិង្សា និងការរំលោភសិទ្ធិមនុ ស្សនៅតំបន់នោះ អស់រយៈពេលជាង២ឆ្នាំមកហើយ។

អ្នកនាំពាក្យមួយរូបនៃក្រុមហ៊ុន Chevron បានមានប្រសាសន៍ឱ្យដឹងថា ភាគហ៊ុនជាង៤១ភាគរយ របស់ក្រុមហ៊ុនChevron មិនត្រូវបានលក់ទៅឱ្យម្ចាស់ភាគហ៊ុនផ្សេងទៀត ដូចជា ក្រុមហ៊ុនរុករក និងផលិតថាមពលថៃPTTEP រួមទាំងសហគ្រាសប្រេង និងឧស្ម័ន MOGE របស់រដ្ឋាភិបាលមីយ៉ាន់ម៉ានោះទេ ប៉ុន្តែក្រុមហ៊ុន Chevron បានផ្ទេរឱ្យគ្រប់គ្រងតែម្ដង។ទន្ទឹមនឹងនេះ ភាគីខាងក្រុមហ៊ុនថៃ PTTEP  បានលើកឡើងថា ភាគហ៊ុនរបស់ខ្លួន នៅក្នុងតំបន់រុករកឧស្ម័ន Yadana បានហក់ឡើងដល់ជិត៦៣%។

ចំណែក ក្រុមហ៊ុន Chevron បានលើកឡើងថា ការដកខ្លួននេះបានឆ្លុះបញ្ចាំងពីចេតនារបស់យើង ក្នុងការចាកចេញពីប្រទេសមីយ៉ាន់ម៉ា បន្ទាប់ពីមានរដ្ឋប្រហារយោធាកាលពីខែកុម្ភៈ ឆ្នាំ២០២១ ដែលបានបង្កឱ្យមានវិបត្តិមនុស្សធម៌ដ៏ធ្ងន់ធ្ងរ នៅក្នុងប្រទេសមួយនេះ។

ការដកខ្លួនចេញនាពេលនេះបានធ្វើឡើង បន្ទាប់ពីក្រុមហ៊ុន Chevron ធ្លាប់បានបញ្ជាក់នៅក្នុងខែមករា ឆ្នាំ២០២២កន្លងមកថា ខ្លួននឹងដើរចេញពីប្រទេសមីយ៉ាន់ម៉ា និងឯកភាពលក់ទ្រព្យសម្បត្តិរបស់ខ្លួននៅទីនោះ រួមទាំងភាគហ៊ុនរបស់ខ្លួននៅក្នុងតំបន់ Yadana ផងដែរ ប៉ុន្តែផ្ទុយទៅវិញ ក្រុមហ៊ុននេះបានដកខ្លួនចេញ ដោយផ្ទេរឱ្យភាគីពាក់ព័ន្ធជាអ្នកគ្រប់គ្រងទៅវិញ។

ដោយមានទីតាំងស្ថិតនៅឈូងសមុទ្រម៉ាតា អណ្ដូងឧស្ម័នធម្មជាតិ Yadana អាចផលិតឧស្ម័ន បានប្រមាណ៦ពាន់លានម៉ែត្រគូបក្នុងមួយឆ្នាំ ដោយក្នុងនោះឧស្ម័នចំនួន៧០% ត្រូវបាននាំចេញទៅកាន់ប្រទេសថៃ។ រីឯឧស្ម័នប្រហែល៣០%ផ្សេងទៀត ត្រូវបានផ្គត់ផ្គង់ដល់សហគ្រាសរដ្ឋ MOGE សម្រាប់បម្រើដល់ការប្រើប្រាស់នៅក្នុងស្រុក៕ប្រភព: Reuters៕

ដោយ: គង់ លាងហួរ

សេអ៊ូល: យោងតាមសារពត៌មានYonhap បានចុះផ្សាយថា ចំនួនផ្ទះ ដែលត្រូវបានរឹបអូស និងដាក់លក់ដេញថ្លៃ ដោយតុលាការ នៅក្នុងប្រទេសកូរ៉េខាងត្បូង បានកើនឡើងដល់កម្រិតខ្ពស់បំផុត ក្នុងរយៈពេលជាង១១ឆ្នាំកាលពីខែមីនាកន្លងទៅ។

យោងតាមទិន្នន័យស្ថិតិរបស់តុលាការកំពូលស្តីពី ការចុះបញ្ជីអចលនទ្រព្យ បង្ហាញថា ផ្ទះសរុបចំនួន៥.៣៣៦យូនីត ត្រូវបានដាក់លក់ដេញថ្លៃកាលពីខែមុន បន្ទាប់ពីម្ចាស់ផ្ទះទាំងនោះ មិនបានទូទាត់សងប្រាក់ទាន់ពេលវេលា។

ដើម្បីប្រមូលដើមទុនត្រឡប់មកវិញ ម្ចាស់បំណុល ដែលភាគច្រើន គឺជាធនាគារបានរឹបអូសទ្រព្យសម្បត្តិ ដែលត្រូវបានដាក់បញ្ចាំ ហើយយកទៅដាក់លក់ដេញថ្លៃ បន្ទាប់ពីឆ្លងកាត់ការសម្រេចចិត្តពីតុលាការ។

តួលេខខាងលើបង្ហាញថា ចំនួនផ្ទះដែលត្រូវបានរឹបអូស នៅក្នុងខែមីនា ឆ្នាំ២០២៤ ស្ថិតក្នុងកម្រិតខ្ពស់បំផុត ដែលមិនធ្លាប់មាន គិតចាប់តាំងពីខែមករា ឆ្នាំ២០១៣ ដែលនៅពេលនោះ ផ្ទះចំនួន៥.៤០៧យូនីត ត្រូវបានរឹបអូស។

បើគិតតាមតំបន់ ផ្ទះចំនួន១.៥១០យូនីត ដែលត្រូវបានរឹបអូស មានទីតាំង ស្ថិតនៅក្នុងខេត្ត Gyeonggi ខណៈផ្ទះចំនួន៨៣០យូនីតផ្សេងទៀត ស្ថិតនៅក្នុងទីក្រុងប៊ូសាន និងផ្ទះចំនួន៦០៣យូនីតផ្សេងទៀតស្ថិតនៅក្នុងទីក្រុងសេអ៊ូល។

អ្វីដែលកាន់តែពិសេសនោះ គឺនៅត្រង់ថា នេះជាលើកដំបូងហើយ គិតចាប់តាំងពីខែមេសា ឆ្នាំ២០១៥ ដែលផ្ទះត្រូវបានរឹបអូសជាង៦០០យូនីត នៅក្នុងទីក្រុងសេអ៊ូល ត្រូវបានតុលាការប្រកាសដាក់លក់ដេញថ្លៃ។

យោងតាមប្រភពពីក្រុមអ្នកជំនាញ ផ្នែកឧស្សាហកម្មអចលនទ្រព្យរំពឹងថា ចំនួនផ្ទះដែលត្រូវបានរឹបអូស និងត្រូវបានដាក់លក់ដេញថ្លៃ ដោយតុលាការជារៀងរាល់ឆ្នាំ នឹងកើនឡើងដល់កំណត់ត្រាខ្ពស់បំផុតនៅឆ្នាំ២០២៤នេះ៕ប្រភព:Yonhap៕

ដោយៈ គង់ សូរិយា

        បាត់ដំបងៈ ការស្ថាបនាផ្លូវជាតិលេខ១០ តភ្ជាប់ខេត្តចំនួន៣តភ្ជាប់ពីខេត្តបាត់ដំបង ពោធិសាត់ ឆ្ពោះទៅកាន់ ខេត្តកោះកុង ដែលមានប្រវែងសរុបជិត២០០គីឡូម៉ែត្រគីឡូម៉ែត្រ សម្រេចការសាងសង់បាន៨៣,៣៦% នៃគម្រោងទាំងមូល គិតត្រឹមដើមខែមេសា ឆ្នាំ២០២៤នេះ។

គម្រោងស្ថាបនាផ្លូវជាតិលេខ១០នេះ បានដំណើរការចាប់ផ្ដើមចាក់កៅស៊ូពីខាងខេត្តកោះកុង ឆ្ពោះទៅកាន់រង្វង់មូលប្រមោយ ស្រុកវាលវែង ខេត្តពោធិ៍សាត់ ដោយក្នុងនោះដែរ ការងារផ្លូវថ្នល់អនុវត្តបាន ៨០,៥៣%  ការងារស្ពានអនុវត្តបាន៨៦,២៨% ការងារស្ពានខ្ពស់ប្រវែង៥៣០ម៉ែត្រ ត្រង់គីឡូម៉ែត្រ១២៨+៩០៥ សម្រេចបាន ៤០%  ការងារលូកាត់ទទឹងផ្លូវ៩៨,១៩% និងការងារលូបណ្តោយផ្លូវ និងជញ្ជាំងការពារជើងទេរ អនុវត្តន៍បាន៨៧,៦៣%។

ផ្លូវជាតិលេខ១០នេះ ជាប្រភេទផ្លូវក្រាលកៅស៊ូពីរស្រទាប់ (DBST) ការសាងសង់មានរយៈពេល៦៦ខែ និងបានចាប់ផ្ដើមសាងសង់ពីថ្ងៃទី១៨ ខែធ្នូ ឆ្នាំ២០១៩ មក ហើយគ្រោងនឹងបញ្ចប់នាខែមិថុនា ឆ្នាំ២០២៥ខាងមុខនេះ។

មន្រ្តីជាន់ខ្ពស់ក្រសួងសាធារណៈការ និងដឹកជញ្ជូនលោកវ៉ា ស៊ីមសូរិយា ធ្លាប់បានមាន​ប្រសាសន៍ឲ្យដឹងថា ការស្ថាបនាផ្លូវជាតិលេខ១០ ជាការធ្វើសមាហរណកម្មផ្ទៃក្នុងប្រទេសផង និងដើម្បីពង្រឹងឯករាជ្យភាពផ្នែកសេដ្ឋកិច្ចកម្ពុជាផង ដោយផ្លូវនេះនឹងរួមចំណែកដឹកកសិផល ចេញពីភូមិភាគពាយ័ព្យ ដែលជាប៉ូលសេដ្ឋកិច្ចទី៤របស់ប្រទេស ទៅកាន់កំពង់ផែតារាសាគរក្នុងខេត្តកោះកុង ដើម្បីដឹកចេញទៅកាន់ប្រទេសទី៣ ដោយកាត់បន្ថយការពឹងផ្អែកប្រទេសជិតខាង។

លោកបន្តថា “ដើម្បីសេដ្ឋកិច្ចរីកចម្រើនបន្ថែមទៀត រដ្ឋាភិបាលត្រូវការវិនិយោគលើហេដ្ឋារចនាសម្ព័ន្ឋ ព្រោះហេដ្ឋារចនាសម្ព័ន្ឋជាសសៃឈាមសេដ្ឋកិច្ចជាតិ”៕